Mālōlōʻanga ʻo e ʻOtuá​—Kuó Ke Hū ki Ai?

“Ko e folofola ʻa e ʻOtua, ko e koto moʻui mo e koto malohi.”—HEP. 4:12.

1. Ko e hā e founga ʻe taha ʻe lava ke tau hū ai ki he mālōlōʻanga ʻo e ʻOtuá he ʻaho ní, ka ko e hā ʻe faingofua ange nai ai hono leaʻakí ʻi hono faí?

ʻIHE kupu ki muʻá, naʻa tau sio ai ʻe lava ke tau hū ki he mālōlōʻanga ʻo e ʻOtuá ʻaki ʻetau ngāue talangofua fakataha mo ʻene ngaahi taumuʻá. ʻE faingofua ange nai hono leaʻakí ʻi hono faí. ʻI he taimi ʻoku tau ako ai ʻoku taʻehōifua ʻa Sihova ki ha meʻa ʻoku tau fiefia ai, ko e fakatātaá, ko ʻetau muʻaki fakafeangaí nai ke angatuʻu. ʻOku fakahaaʻi mai ai ʻoku fiemaʻu ke tau fai e fakalakalaka ʻi he ʻēlia ʻo e hoko ʻo “ogogofua.” (Sem. 3:17, PM) ʻI he kupu ko ení, te tau fakamanatu ai ha ngaahi ʻēlia siʻi ʻa ia ko ʻetau loto-lelei ke taau ʻi he taumuʻa ʻa e ʻOtuá—ko e hoko ʻo talangofua mei he lotó—ʻe lava ke ʻahiʻahiʻi ia.

2, 3. Ko e hā e ngaahi feinga kuo pau ke tau hokohoko atu ke faí kae lava ke tau manakoa ai pē ʻi he anga ʻo e vakai mai ʻa Sihová?

² ʻOku lelei fēfē hoʻo fakafeangai fekauʻaki mo hono tali e akonaki makatuʻunga he Tohi Tapú? ʻOku tala mai kiate kitautolu ʻe he Tohi Tapú ko e ʻOtuá te ne fakatahatahaʻi kiate ia ʻa e “holi [‘ngaahi meʻa manakoa,’ NW] ʻo e ngaahi puleʻanga kotoa pe.” (Hak. 2:7) Ko e moʻoni, ko e tokolahi taha ʻo kitautolú naʻe halaʻatā haʻatau teitei manakoa he taimi naʻa tau ʻuluaki ako ai ʻa e moʻoní. Kae kehe, ko e ʻofa ki he ʻOtuá pea mo hono ʻAlo ʻofaʻangá ʻokú ne ueʻi kitautolu ke fai ʻa e ngaahi liliu lahi ʻi heʻetau fakakaukaú mo e tōʻongá koeʻuhí kae hoko ʻo fakahōifua kakato ki he ʻOtuá. Ne faai mai pē, hili ha lotu mo ha feinga lahi ʻi heʻetau tafaʻakí, naʻe aʻu mai e ʻaho faitāpuekiná ʻa e taimi naʻa tau malava ʻo ʻoatu ai kitautolu ʻi he papitaiso faka-Kalisitiané.—Lau ʻa e Kolose 1:9, 10.

³ Kae kehe, ko e faitau mo e taʻehaohaoá naʻe ʻikai ngata ia ʻi heʻetau papitaisó. Naʻe hokohoko mai e faitaú pea ʻe hokohoko atu pē lolotonga ʻetau kei taʻehaohaoa. Kae kehe, ʻoku fakapapauʻi mai kia kitautolu, kapau te tau hokohoko atu e faitau pea fakapapau ke hoko ai pē ʻo manakoa ange ʻi he fofonga ʻo e ʻOtuá, ʻe tāpuakiʻi ʻe Sihova ʻetau ngaahi feingá.

Taimi ʻOku Fiemaʻu Ai ʻa e Akonakí

4. ʻI he founga ʻe tolu fē te tau maʻu nai ai e akonaki Fakatohitapú?

⁴ Ki muʻa ke tau lava ʻo kamata feangainga mo ʻetau ngaahi taʻehaohaoá, kuo pau ke tau ʻiloʻi ko e hā kinautolu. Ko ha malanga sivi-loto ʻi he Fale Fakatahaʻangá pe ko ha kupu fakatupunga-fakakaukau ʻi he taha ʻetau ʻū tohí te ne fakaeʻa nai ha mele mafatukituki. ʻI he tafaʻaki ʻe tahá, kapau ʻe ʻikai ke tau maʻu e poiní ʻi he taimi ʻoku fakahoko ai ʻi ha malanga pe taʻemalava ke fai hano ngāueʻaki fakafoʻituitui ʻo ha akonaki kuo tohi, ʻe ngāueʻaki nai ʻe Sihova ha kaungā Kalisitiane ke ne ʻai ke tau ʻiloʻi ʻetau tōnounoú.—Lau ʻa e Kaletia 6:1.a

5. Fakahaaʻi ha niʻihi ʻo e ngaahi founga taʻemanakoa te tau tali nai ʻi he taimi ʻoku fai mai ai ha akonaki, pea fakamatalaʻi ko e hā kuo pau ai ki he kau tauhi-sipi Kalisitiané ke nau kīvoi heʻenau feinga ke tokoniʻi kitautolú.

⁵ ʻOku ʻikai faingofua ke tali ha akonaki mei ha tangata taʻehaohaoa, neongo ai pē e fakapotopoto mo anga-ʻofa hono ʻomai ʻa e akonakí. Kae kehe, hangē ko ia ʻoku tuhuʻi mai ʻe he Kaletia 6:1, ʻoku fekauʻi ʻe Sihova ʻa e faʻahinga ʻoku taau fakalaumālié ke nau ‘feinga’ ke fakatonutonu kitautolu, ʻo fai ia ‘ʻi ha laumālie ʻo e anga-malū.’ Kapau te tau tali lelei, te tau hoko ʻo toe manakoa ange he vakai ʻa e ʻOtuá. Ka ko e meʻa anga-kehé, ʻi he taimi ʻoku tau lotu aí, ʻoku tau fakahaaʻi tauʻatāina ʻoku tau taʻehaohaoa. Kae kehe, he taimi ʻoku ʻai ai ʻe ha taha ke tau ʻiloʻi haʻatau tōnounou tefito, ko e hehemá ia ko e feinga ke fakatonuhiaʻi kitautolu, fakasiʻisiʻia e palopalemá, fehuʻia e taumuʻa ʻa e tokotaha faiakonakí, pe ko e fakafepaki ki he founga naʻe fakahoko ai e akonakí. (2 Tuʻi 5:11) Pea kapau ko e akonakí naʻe tau tonu ia tautefito ki ha foʻi tafaʻaki laveangofua—ko e ngaahi ngāue ʻo ha mēmipa ʻo e fāmilí, ko hotau valá mo e teuteú, ko ʻetau haisini fakafoʻituituí, pe ko ha faʻahinga fakafiefia ʻoku tau saiʻia ai ka ʻoku fehiʻa ai ʻa Sihova—te tau feangainga mātuʻaki tamaki nai, ki heʻetau ʻohovalé pea ki he moʻutāfuʻua hotau tokotaha faiakonakí! Ka he hili ʻetau mokomoko hifó, ʻoku tau faʻa fakahaaʻi ai ne totonu pē ʻa e akonakí.

6. ʻOku fēfē hono fakaeʻa ʻe he folofola ʻa e ʻOtuá e “ngaahi holi mo e fakakaukau ʻo e loto”?

⁶ Ko e konga Tohi Tapu ʻo e kaveinga ki he kupu ko ení ʻoku fakamanatu mai ai kia kitautolu ko e folofola ʻa e ʻOtuá ko e “koto malohi.” ʻIo, ko e folofola ʻa e ʻOtuá ko e koto mālohi ki hono liliuʻi e ngaahi moʻuí. ʻOku ola lelei tatau pē ia ʻi hono tokoniʻi kitautolu ke fai e ngaahi liliu ʻoku fiemaʻú hili ʻetau papitaisó hangē pē ko ia naʻe ʻi ai ki muʻa ʻi heʻetau lākai e sitepu ko iá. ʻI heʻene tohi ki he kau Hepeluú, ʻoku toe tohi ʻe Paula ko e folofola ʻa e ʻOtuá ʻoku “ʻasi atu ʻo māioioʻi ʻa e loto [‘tangata ʻi tuʻá,’ NW] mo e laumalie, ʻio, hono ngaahi hokonga mo e uho; pea ʻoku ne vavangaʻi ʻa e ngaahi holi mo e fakakaukau ʻo e loto.” (Hep. 4:12) ʻI hono toe fakalea ʻe tahá, he taimi ʻoku tau mahinoʻi māʻalaʻala ai e taumuʻa ʻa e ʻOtuá kia kitautolú, ko e founga ʻetau tali ki aí ʻoku fakaeʻa ai e meʻa loloto ʻi loto ʻia kitautolu. ʻOku ʻi ai nai ha kehekehe he taimi ʻe niʻihi ʻi he vahaʻa ʻo e meʻa ʻoku hā atu ko kitautolú (ʻa e tangata ʻi tuʻá) pea ko hai moʻoni kitautolu (ʻa e “laumalie”)? (Lau ʻa e Mātiu 23:27, 28.) Fakakaukau ange pe ʻe fēfē haʻo tali ki he ngaahi tuʻunga ko ení.

Hanganaki Laka Fakataha mo e Kautaha ʻa Sihová

7, 8. (a) Ko e hā nai naʻá ne ueʻi e kau Kalisitiane Siu ʻe niʻihi ke piki ki ha ngaahi tōʻonga ʻe niʻihi ʻo e Lao ʻa Mōsesé? (e) Naʻe fēfē fehoanakimālie ʻenau ngaahi feingá mo e taumuʻa laka ki muʻa ʻa Sihová?

⁷ Ko e tokolahi ʻo kitautolu ʻe lava ke tau lave maʻuloto ki he Palovepi 4:18: “He ko e ʻalunga ʻo haʻa faitotonu ʻoku hange ko e maama hengihengi, ʻa e fakautuutu ʻene maama ʻo aʻu ki he hoʻatā malie.” ʻOku ʻuhinga iá ko hotau ʻulungāngá mo ʻetau mahinoʻi e ngaahi taumuʻa ʻa e ʻOtuá ʻe fakaleleiʻi he faai mai ʻa e taimí.

⁸ Hangē ko ia ne tau lāulea ki ai ʻi he kupu ki muʻá, hili e pekia ʻa Sīsuú ne faingataʻa ki he kau Kalisitiane Siu tokolahi ke mavahe mei he Lao ʻa Mōsesé. (Ng. 21:20) Neongo naʻe fakakikihiʻi pōtoʻi ʻe Paula ko e kau Kalisitiané naʻe ʻikai ke nau kei ʻi he malumalu ʻo e Laó, ne talitekeʻi ʻe he niʻihi ʻene ngaahi fakaʻuhinga fakamānavaʻí. (Kol. 2:13-15) Mahalo naʻa nau ongoʻi kapau te nau kei hokohoko atu ke tauhi naʻa mo ha kiʻi konga ʻo e Laó, te nau kalofi ai e fakatangá. Neongo ia, naʻe tohi ʻa Paula ki he kau Kalisitiane ʻi Hepeluú ʻo tala mahino kiate kinautolu heʻikai te nau lava ke hū ki he mālōlōʻanga ʻo e ʻOtuá lolotonga ʻenau kei fakafisi ke ngāue fehoanaki mo ʻEne taumuʻa ʻoku fakaeʻá.b (Hep. 4:1, 2, 6; lau ʻa e Hepelu 4:11.) Ke maʻu e hōifua ʻa Sihová, ʻe pau ke nau fehangahangai mo e foʻi moʻoni ko ia naʻá ne tataki hono kakaí ʻi ha hala kehe.

9. Ko e hā e fakakaukau ʻoku totonu ke tau maʻu he taimi ʻoku fai ai ha ngaahi fakatonutonu ki heʻetau mahino fekauʻaki mo e ngaahi meʻa Fakatohitapú?

⁹ ʻI onopooni, kuo ʻi ai e ngaahi fakalelei ʻi heʻetau mahinoʻi ʻa e ngaahi akonaki Fakatohitapu ʻe niʻihi. ʻOku ʻikai totonu ke fakahohaʻasi kitautolu ʻe he meʻá ni; ʻoku totonu ke fakamālohiʻi ʻetau falala-pau ki he kalasi tamaioʻeiki anga-tonu mo potó. ʻI he taimi ʻoku ʻiloʻi ai ʻe he kau mēmipa fakafofonga ʻo e “tamaioeiki” ko ʻetau fakakaukau ki he ngaahi poini ʻe niʻihi ʻo e moʻoní ʻoku fiemaʻu ke fakamāʻalaʻala mo fakatonutonú, ʻoku ʻikai te nau toumoua mei hono fai e fakatonutonú. Ko e kalasi tamaioʻeikí ʻoku nau mahuʻingaʻia lahi ange he ngāue fakataha mo e taumuʻa ʻoku fakaeʻa ʻa e ʻOtuá ʻi hano maluʻi ia mei hano fakaangaʻi ʻo e mahino kuo fakatonutonú. ʻOku fēfē hoʻo talí he taimi ʻoku ʻomai ai ha fakatonutonu ki heʻetau mahino fekauʻaki mo e Tohi Tapú?—Lau ʻa e Luke 5:39.

10, 11. Ko e hā e ngaahi lēsoni ʻe lava ke tau ako mei he tali ʻa e niʻihi he taimi naʻe kamata ai e ngaahi founga foʻou ʻo e malangaʻi ʻa e ongoongo leleí?

¹⁰ Tau lāulea ki ha toe fakatātā ʻe taha. ʻI he konga ki mui e senituli 19 mo e konga ki muʻa e senituli 20, ko e Kau Ako Tohi Tapu ʻe niʻihi ʻa ia ko e kau malanga lelei ʻaupito maʻá e kakaí naʻa nau ongoʻi ʻe lava ke nau fakahoko lelei taha e fekau ke malangá ʻaki hono fakahoko ha ngaahi malanga ʻosi teuteuʻi lelei ki he kau fanongo houngaʻiá. Naʻa nau fiefia he malanga maʻá e kakaí, pea ko e niʻihi ʻo kinautolu naʻa nau mātuʻaki fiefia he fakahīkihiki māfana ʻenau kau fanongó. Kae kehe, ki mui aí naʻe toki hoko ʻo fakamoʻoniʻi ko e fiemaʻu ia ʻa Sihova maʻa hono kakaí ke nau femoʻuekina he ngaahi founga kehekehe ʻo e ngāue fakamalangá, ʻo kau ai e ngāue fale-ki-he-falé. Ko e niʻihi ʻo e kau malanga lavameʻa maʻá e kakaí naʻa nau mātuʻaki fakafisi ke ʻahiʻahi ha meʻa foʻou. ʻI tuʻá, naʻa nau hā ko e kau tangata fakalaumālie, ʻo līʻoa kakato ki he ʻEikí. Kae kehe, ʻi he fehangahangai mo e fakamoʻoni māʻalaʻala ʻo e taumuʻa ʻa e ʻOtuá fekauʻaki mo e ngāue fakamalangá, naʻe hoko ʻo eʻa ʻenau ngaahi fakakaukau, ngaahi taumuʻa, mo ʻenau fakaueʻiloto moʻoní. Naʻe fēfē ongoʻi ʻa Sihova fekauʻaki mo kinautolú? Naʻe ʻikai te ne tāpuakiʻi kinautolu. Naʻa nau mavahe mei he kautahá.—Mt. 10:1-6; Ng. 5:42; 20:20.

¹¹ ʻOku ʻikai ke pehē ia ai naʻe faingofua ki he kotoa naʻe nofo mateaki ki he kautahá ke malanga ki he kakaí. Ko e tokolahi naʻa nau ʻilo ko ha pole ʻa e ngāué, tautefito ʻi he kamatá. Ka naʻa nau talangofua. ʻI he faai mai e taimí, naʻa nau ikuʻi ʻenau loto-moʻuá, pea naʻe tāpuekina lahi kinautolu ʻe Sihova. ʻOku fēfē hoʻo talí he taimi ʻoku fakaafeʻi ai koe ke kau ʻi ha founga ʻo e ngāue fakamalangá ʻa ia kuo teʻeki ke ke anga ki ai? ʻOkú ke loto-lelei ke ke ʻahiʻahiʻi ha meʻa foʻou?

Taimi ʻOku Mavahe Ai Meia Sihova ha Taha Naʻa Tau ʻOfa Ai

12, 13. (a) Ko e hā ʻa e taumuʻa ʻa Sihová ʻi hono tuʻusi e kau faihala taʻefakatomalá? (e) Ko e hā e ʻahiʻahi ʻoku fehangahangai mo e ngaahi mātuʻa Kalisitiane ʻe niʻihi, pea ko e hā ʻokú ne ʻai e ʻahiʻahí ke mātuʻaki faingataʻá?

¹² ʻOku ʻikai ha toe veiveiua ʻoku tau loto-tatau mo e tefitoʻi moʻoni ko ia kuo pau ke tau maʻa fakaesino, fakaeʻulungaanga, mo fakalaumālie kae malava ke fakahōifua ki he ʻOtuá. (Lau ʻa e Taitusi 2:14.) Kae kehe, ʻe ʻi ai nai ha ngaahi taimi, ʻe mātuʻaki ʻahiʻahiʻi ai ʻetau mateaki ki he tafaʻaki ko eni ʻo e taumuʻa ʻa e ʻOtuá. Ko e fakatātaá, tau pehē, ʻoku mavahe mei he moʻoní ha foha pē ʻe toko taha ʻo ha ongo mātuʻa Kalisitiane alafaʻifaʻitakiʻanga. ʻI he saiʻia ange ke “maʻu fakataimi pe ha malie tuʻu he angahala” ʻi ha vahaʻangatae fakafoʻituitui mo Sihova mo ʻene ongo mātuʻa manavahē-ʻOtuá, kuo tuʻusi ai e kiʻi talavoú.—Hep. 11:25.

¹³ Kuo moʻutāfuʻua e ongo mātuʻá! ʻI he kaveinga fekauʻaki mo e tuʻusí, ko e moʻoni, ʻokú na ʻilo ʻoku pehē ʻe he Tohi Tapú “ka ai ha toko taha ʻi he kau lotu ʻoku feʻauaki, pe manumanu, pe lotu ki he aitoli, pe kapekape, pe faʻa konā, pe fai fakamalohi, ke ʻoua te mou feʻiloaki mo ha toko taha pehe, ʻio, pea ʻoua naʻa keinanga mo ia.” (1 Kol. 5:11, 13) ʻOkú na toe ʻilo ko e foʻi lea “ha toko taha” ʻi he veesi ko ení ʻoku kau ai e ngaahi mēmipa ʻo e fāmilí ʻoku ʻikai ke nofo ʻi hona falé. Ka ʻokú na ʻofa lahi ʻaupito ʻi hona fohá! Ko e ngaahi ongoʻi mālohí te ne fakatupunga nai kinaua ke fakaʻuhinga: ‘ʻE fēfē haʻama tokoni ki heʻema tamasiʻí ke foki kia Sihova kapau ʻoku mātuʻaki fakangatangata ʻema feohi mo ia? ʻIkai te ma aʻusia e meʻa lahi ange ʻaki ʻema tauhi maʻu ha fetuʻutaki tuʻumaʻu mo ia?’c

14, 15. Ko e hā ʻa e fili moʻoni kuo pau ke fai ʻe he ngaahi mātuʻa ko ia kuo tuʻusi ʻenau fānaú?

¹⁴ ʻOku tau mātuʻaki fakaʻofaʻia he ongo mātuʻa ko iá. He ko ē, kuo fai ʻe hona fohá ha fili, pea naʻá ne fili ke tuli ki heʻene founga moʻui taʻefakakalisitiané kae ʻikai ko e hokohoko atu ke fiefia he feohi vāofi mo ʻene ongo mātuʻá mo e ngaahi kaungātui kehé. ʻI he tafaʻaki ʻe tahá, ko e ongo mātuʻá, kuo ʻikai haʻana lau ki he meʻá. Tāneʻineʻi ke na ongoʻi tuēnoa!

¹⁵ Ka ko e hā ʻe fai ʻe he siʻi ongo mātuʻa ko iá? Te na talangofua ki he fakahinohino mahino ʻa Sihová? Pe te na kumi kalofanga ʻe lava pē ke na feohi tuʻumaʻu mo ʻena tama kuo tuʻusí pea lau ia ko ha “meʻa ʻoku fiemaʻu fakafāmili”? ʻI hono fai ʻena filí, kuo pau ke ʻoua naʻa ngalo ke fakakaukau ki he anga ʻo e ngaahi ongoʻi ʻa Sihova fekauʻaki mo e meʻa ʻokú na faí. Ko ʻene taumuʻá ke tauhi e kautahá ke maʻa pea, kapau ʻe malava, ke fakaʻaiʻai e kau faihalá ke foki mai honau ʻatamaí. ʻE lava fēfē ʻa e ngaahi mātuʻa Kalisitiané ʻo poupouʻi e taumuʻa ko iá?

16, 17. Ko e hā ʻe lava ke tau ako ʻi heʻetau fakalaulauloto ki he faʻifaʻitakiʻanga ʻa ʻĒloné?

¹⁶ Ko e tokoua ʻo Mōsesé, ʻa ʻĒlone, naʻá ne fehangahangai mo e tuʻunga faingataʻa ʻi he fekauʻaki mo e toko ua ʻo hono ngaahi fohá. Fakakaukau ki he anga ʻo e ongo kuo pau naʻá ne maʻu he taimi naʻe hanga ai hono ongo fohá ʻa Nātapi mo ʻĀpiu ʻo feilaulauʻaki ʻa e afi kehe kia Sihova peá Ne taaʻi kinaua ʻo na mate. Ko e moʻoni, naʻe fakangata ʻe he meʻa ko iá ha toe feohi naʻe mei malava ʻe he ongo tangata ko iá mo ʻena ongo mātuʻá. Ka ʻoku ʻi ai mo e meʻa lahi ange. Naʻe fakahinohinoʻi ʻe Sihova ʻa ʻĒlone mo hono ngaahi foha faitōnunga: “ʻOua ʻe tuku mafue homou ʻulu, pea ʻoua ʻe hae homou kofu [ʻi he fakamamahi]; koeʻuhi ke ʻoua te mou mate, pea ke ʻoua ʻe to ha houhau [ʻa Sihova] ki he fakataha kotoa.” (Liv. 10:1-6) ʻOku māʻalaʻala ʻa e fekaú. Ko ʻetau ʻofa kia Sihová kuo pau ke mālohi ange ia heʻetau ʻofa ki he ngaahi mēmipa taʻefaitōnunga hotau fāmilí.

¹⁷ ʻI he ʻahó ni, heʻikai fakaʻauha leva ʻe Sihova ʻa e faʻahinga ko ia ʻoku nau maumauʻi ʻene ngaahi laó. ʻOkú ne ʻoange anga-ʻofa kia kinautolu ha faingamālie ke fakatomala mei heʻenau ngaahi ngāue taʻetotonú. Kae kehe, ʻe fēfē ongoʻi ʻa Sihová, kapau ʻoku toutou ʻahiʻahiʻi Ia ʻe he ongo mātuʻa ha tokotaha faihala taʻefakatomala ʻaki ʻena feohi taʻefiemaʻu mo hona foha pe ʻofefine kuo tuʻusí?

18, 19. Ko e hā e ngaahi tāpuaki ʻe lava ke ʻomi ki he ngaahi mēmipa ʻo e fāmili ʻoku nau ngāue fakataha mo e ngaahi fakahinohino ʻa Sihova fekauʻaki mo e faʻahinga kuo tuʻusí?

¹⁸ Ko e tokolahi ne tuʻusi ki muʻa kuo nau fakahaaʻi tauʻatāina he taimí ni ko e tuʻu mālohi naʻe fai honau ngaahi kaungāmeʻá mo e ngaahi mēmipa honau fāmilí naʻe tokoni ia kia kinautolu ke foki mai ai honau ʻatamaí. ʻI hono fakaongoongoleleiʻi hano toe fakafoki mai ha finemui ʻe taha, naʻe faitohi e kau mātuʻá ʻo pehē kuó ne fakamaʻa ʻene moʻuí “koeʻuhí naʻe kaunga lahi ki ai hono tokaʻi ʻe hono tuongaʻane fakakakanó ʻa e fokotuʻutuʻu ʻo e tuʻusí.” Naʻá ne pehē “ko e pīkitai faitōnunga hono tuongaʻané ki he ngaahi tataki Fakatohitapú naʻe tokoniʻi ai ia ke ne loto ke toe foki.”

¹⁹ Ko e hā e fakamulituku ʻoku totonu ke tau aʻu ki aí? ʻOku fiemaʻu ke tau faitau fekauʻaki mo e hehema mo hotau ngaahi loto-taʻehaohaoá ke angatuʻu ki he akonaki Fakatohitapú. Kuo pau ke tau mātuʻaki tuipau ko e founga feangainga ʻa e ʻOtuá mo ʻetau ngaahi palopalemá ko e lelei tahá maʻu pē ia.

“Ko e Folofola ʻa e ʻOtua, ko e Koto Moʻui”

20. ʻI he ongo founga fē ʻe lava ke ngāueʻaki ai e Hepelu 4:12? (Sio ki he fakamatala ʻi laló.)

²⁰ ʻI he taimi naʻe tohi ai ʻe Paula “ko e folofola ʻa e ʻOtua, ko e koto moʻui” naʻe ʻikai ko ʻene lave fakatefito pē ki he Folofola kuo tohi ʻa e ʻOtuá, ʻa e Tohi Tapú.d ʻOku fakahaaʻi ʻe he potutohí naʻá ne lave ki he ngaahi folofola ʻa e ʻOtuá fekauʻaki mo ʻene talaʻofá. Ko e poini ʻa Paulá ko e ʻOtuá ʻoku ʻikai te ne fai ha talaʻofa peá ne fakangaloʻi leva ia. Naʻe fakapapauʻi eni ʻe Sihova ʻo fakafou ʻi he palōfita ko ʻAiseá: “ʻE pehe pe mo ʻeku lea . . . ʻe ʻikai foki ngeʻesi mai, kaeʻoua ke ne fai ʻa e meʻa ne u loto ki ai, mo fakaaʻu ʻa e meʻa ne u fekau atu ai ia.” (Ai. 55:11) Ko ia ai, ʻoku ʻikai fiemaʻu ia kia kitautolu ke hoko ʻo ʻikai faʻa tatali he taimi ʻoku ʻikai laka vave ki muʻa e ngaahi meʻá hangē ko ʻetau fakaʻamú. ʻOku “kei gaue ni” pē ʻa Sihova mo ha fakakaukau ke fakahoko ʻene taumuʻá ki ha aofangatuku lavameʻa.—Sione 5:17, PM.

21. ʻE lava fēfē ke hoko ʻa e Hepelu 4:12 ko ha fakalototoʻa ki he kau mēmipa faitōnunga motuʻa ange ʻo e “fuʻu kakai lahi”?

²¹ Ko e kau mēmipa faitōnunga motuʻa ange ʻo e “fuʻu kakai lahi” kuo nau tauhi kia Sihova he laui hongofuluʻi taʻu. (Fkh. 7:9) Naʻe ʻikai ʻaupito ʻamanekina ʻe he tokolahi te nau tupu ʻo motuʻa he fokotuʻutuʻu ʻo e ngaahi meʻa ko ení. Neongo ia, kuo ʻikai te nau ʻulutukua ki he loto-foʻí. (Sāme 92:14) ʻOku nau ʻilo ko e folofola ʻa e ʻOtuá fekauʻaki mo e talaʻofá ʻoku ʻikai ko ha ʻīsiu ʻoku mate—ʻoku moʻui ia, pea ʻoku ngāue ʻa Sihova fekauʻaki mo hono fakahoko iá. Koeʻuhi ko e talaʻofa ʻa e ʻOtuá ʻoku mahuʻinga ki hono lotó, ʻoku tau ʻoatu ʻa e fiefia kiate ia he taimi ʻoku tau tauhi ai ke muʻomuʻa taha ia ʻi hotau ʻatamaí. Lolotonga e ʻaho hono fitu ko ení, kuo mālōlō ai ʻa Sihova, ʻi he ʻiloʻi pau ʻe fakahoko ʻene taumuʻá pea ko hono kakaí, he tuʻunga ko ha kulupú, te nau poupouʻi ia. Fēfē koe? Kuó ke hū fakafoʻituitui ki he mālōlōʻanga ʻo e ʻOtuá?

[Fakamatala ʻi lalo]

ʻOua Naʻa Tō mei he Taumuʻá

• Ko e hā ʻoku fiemaʻú ka tau lava ke hū ai ki he mālōlōʻanga ʻo e ʻOtuá he ʻaho ní?

• Ko e hā ʻa e fehokotaki he vahaʻa ʻo e taumuʻa ʻa e ʻOtuá mo ʻetau loto-lelei ke tali e akonaki Fakatohitapú?

• ʻI he ngaahi ʻēlia fē ʻe hoko nai ai e talangofua ki he ngaahi fakahinohino Fakatohitapú ʻo faingataʻá, ka ko e hā ʻoku mahuʻinga ai ke tau talangofuá?

• ʻI he ongo founga fē ʻe lava ke ngāueʻaki ai ʻa e Hepelu 4:12?

[Fakatātā ʻi he peesi 31]

Kuo moʻutāfuʻua e ongo mātuʻá!