Kau Mātuʻa Kalisitiané​—‘Ko e Kau Kaungāngāue Ke Tau Fiefia Ai’

 1. Ko e hā naʻá ne fakatupunga ʻa Paula ke fiefia ai ʻi he kau Kalisitiane ʻi Kolinitoó?

KO E taʻu 55 T.S. ia. Ko e ʻapositolo ko Paulá naʻá ne ʻi he kolo taulanga ʻo Taloasí, ka ʻoku ʻikai malava ke taʻofi ʻene fakakaukau ki Kolinitoó. Ki muʻa ange ʻi he taʻu ko iá, naʻá ne loto-mamahi ke ʻilo ko e fanga tokoua ʻi aí naʻa nau fakakikihi ʻiate kinautolu. Ko ia ʻi he tokanga fakatamaí, naʻá ne ʻave ha tohi ke fakatonutonu ʻaki kinautolu. (1 Kol. 1:11; 4:15) Kuó ne toe fekau atu hono kaungāngāue ko Taitusí kia kinautolu pea fokotuʻutuʻu mo Taitusi ke ne ʻomai ha līpooti kiate ia ʻi Taloasi. Naʻe tatali eni ʻa Paula kia Taitusi ʻi Taloasi, ʻo fakaʻamu ke fanongo pe naʻe fēfē ʻa e kau Kolinitoó. Ka ʻi he loto-mamahi lahi ʻa Paulá, naʻe ʻikai ke aʻu mai ʻa Taitusi. Ko e hā ʻe lava ke fai ʻe Paulá? Naʻá ne tukufolau ki Masitōnia, pea ʻi heʻene fiefiá, naʻá na fetaulaki ʻi ai. Naʻe fakamatala ʻa Taitusi ko e fanga tokoua ʻi Kolinitoó kuo nau tali lelei ʻa e tohi ʻa Paulá pea nau fakaʻamu ke sio kiate ia. ʻI he taimi naʻe fanongo ai ʻa Paula ki he līpooti lelei ko iá, naʻe ‘ʻāsili ai ʻene fiefiá.’—2 Kol. 2:12, 13; 7:5-9.

 2. (a) Ko e hā naʻe tohi ʻe Paula ki he kau Kolinitoó fekauʻaki mo e tuí mo e fiefiá? (e) Ko e hā e ongo fehuʻi te tau lāulea ki aí?

² Taimi nounou hili iá, naʻe tohi ʻe Paula ha tohi hono ua ki he kau Kolinitoó. Naʻá ne tala ange kia kinautolu: “ʻO ʻikai ko e pehē ko e kau pule kimautolu ki hoʻomou tuí, ka ko e kau kaungāngāue kimautolu ke mou fiefia ai, he ʻoku mou tuʻú ko e meʻa ʻi hoʻomou tuí.” (2 Kol. 1:24) Ko e hā naʻe ʻuhinga ki ai ʻa Paulá? Pea ʻoku totonu ke fēfē hono ueʻi ʻe he ngaahi lea ko iá ʻa e kau mātuʻa Kalisitiane he ʻaho ní?

 3. (a) Ko e hā naʻe ʻuhinga ki ai ʻa Paula ʻi heʻene tohi: “ʻOku mou tuʻú . . . ʻi hoʻomou tuí”? (e) ʻOku anga-fēfē muimui ʻa e kau mātuʻa he ʻaho ní ki he faʻifaʻitakiʻanga ʻa Paulá?

³ Naʻe lave ʻa Paula ki he tafaʻaki mātuʻaki mahuʻinga ʻe ua ʻo ʻetau lotú—ko e tui mo e fiefia. ʻI he manatu fekauʻaki mo e tuí, naʻá ne tohi: “ʻO ʻikai ko e pehē ko e kau pule kimautolu ki hoʻomou tuí, . . . he ʻoku mou tuʻú ko e meʻa ʻi hoʻomou tuí.” ʻI he ngaahi lea ko ení, naʻe ʻiloʻi ʻe Paula ko e fanga tokoua ʻi Kolinitoó naʻa nau tuʻu maʻu, ʻo ʻikai koeʻuhí ko ia pe ko ha tangata kehe, ka koeʻuhí ko ʻenau tui tonu ki he ʻOtuá. Ko ia ai, naʻe sio ʻa Paula ki he ʻikai fiemaʻu ke puleʻi ʻa e tui hono fanga tokouá, pea naʻe ʻikai haʻane holi ke fai pehē. Naʻá ne falala-pau ko e kau Kalisitiane faitōnunga kinautolu ʻa ia naʻa nau fiemaʻu ke fai ʻa e meʻa naʻe totonú. (2 Kol. 2:3) ʻI he ʻahó ni, ʻoku muimui ʻa e kau mātuʻá ʻi he faʻifaʻitakiʻanga ʻa Paulá ʻaki hono fakahāhā ʻa e falala-pau ki he tui mo e ngaahi taumuʻa ʻa honau fanga tokouá ʻi heʻenau tauhi ki he ʻOtuá. (2 Tes. 3:4) ʻI he ʻikai ʻai ha ngaahi lao fefeka ki he fakatahaʻangá, ʻoku falala ʻa e kau mātuʻá ki he ngaahi tefitoʻi moʻoni Fakatohitapú mo e fakahinohino mei he kautaha ʻa Sihová. He ko ē, ko e kau mātuʻa ʻi onopōní ʻoku ʻikai ko e kau pule kinautolu ki he tui ʻa honau fanga tokouá.—1 Pita 5:2, 3.

 4. (a) Ko e hā naʻe ʻuhinga ki ai ʻa Paula ʻi heʻene tohi: “Ko e kau kaungāngāue kimautolu ke mou fiefia ai”? (e) ʻOku faʻifaʻitaki fēfē ʻa e kau mātuʻa he ʻaho ní ki he fakakaukau ʻa Paulá?

⁴ Naʻe toe pehē ʻe Paula: “Ko e kau kaungāngāue kimautolu ke mou fiefia ai.” ʻI he kupuʻi lea ko iá, naʻá ne lave ai kiate ia tonu pea ki hono ngaahi kaungāmeʻa ofí. Ko e hā ʻoku tau maʻu ai ʻa e fakamulituku ko iá? Sai, ʻi he tohi tatau, naʻe fakamanatu ai ʻe Paula ki he kau Kolinitoó fekauʻaki mo e toko ua ʻo e ngaahi kaungāmeʻa ko ení ʻi he taimi naʻá ne tohi ai: ‘Ko Sīsū naʻe malangaʻi ʻi homou haʻohaʻongá fakafou ʻiate kimautolú, ʻa ia, fakafou ʻiate au mo Silivēnusi mo Tīmote.’ (2 Kol. 1:19) ʻIkai ko ia pē, ʻi ha taimi pē naʻe ngāueʻaki ai ʻe Paula ʻa e kupuʻi lea “kau kaungāngāue” ʻi heʻene ongo tohí, ʻoku lave maʻu pē ia ki hono ngaahi kaungāmeʻa ofí, hangē ko ʻApolosi, ʻAkuila, Pīsila, Tīmote, Taitusi, mo e niʻihi kehe. (Loma 16:3, 21; 1 Kol. 3:6-9; 2 Kol. 8:23) Ko ia ai, ʻi he pehē: “Ko e kau kaungāngāue kimautolu ke mou fiefia ai,” naʻe fakapapauʻi ai ʻe Paula ki he kau Kolinitoó ko ia mo hono ngaahi kaungāmeʻá naʻa nau fiemaʻu ke fai e meʻa kotoa te nau malavá ke pouaki ʻa e fiefia ʻa e kau mēmipa kotoa pē ʻo e fakatahaʻangá. ʻI he ʻahó ni, ko e kau mātuʻa Kalisitiané ʻoku nau maʻu ʻa e holi tatau. ʻOku nau fiemaʻu ke fai ʻa e meʻa kotoa te nau malavá ke tokoniʻi honau fanga tokouá ke “tauhi ʻa Sihova ʻaki ʻa e fiefia.”—Saame 100:2; Fil. 1:25.

 5. Te tau lāulea ki he ngaahi tali ki he fehuʻi fē, pea ko e hā ʻoku totonu ke tau fakakaukau ki aí?

⁵ Ki muí ni mai, ko ha kulupu ʻo e fanga tokoua mo e fanga tuofāfine faivelenga ʻoku nau nofo ʻi he ngaahi feituʻu kehekehe ʻo e māmaní naʻe fakaafeʻi ke nau tali ʻa e fehuʻi, “Ko e hā ʻa e ngaahi lea mo e ngaahi ngāue ʻa ha mātuʻa naʻe tānaki atu ki hoʻomou fiefiá?” ʻI heʻetau fakakaukau he taimí ni ki he ngaahi fakamatala naʻe fai ʻe he kulupu ko ia ʻo e ngaahi kaungātuí, sio angé ki he founga ʻe fakahoa ai ʻenau ngaahi fakamatalá ki he founga te ke tali nai aí. ʻIkai ko ia pē, tuku ki he kotoa ʻo kitautolú ke tau fakakaukau ki he founga ʻe lava ke tau tokoni ai ki ha laumālie fiefia ʻi heʻetau fakatahaʻanga fakalotofonuá.a

6, 7. (a) Ko e hā ʻa e founga ʻe taha ʻe lava ai ʻa e kau mātuʻá ʻo faʻifaʻitaki kia Sīsū, Paula, mo e kau sevāniti kehe ʻa e ʻOtuá? (e) Ko e hā ʻoku hanga ʻe hono manatuʻi ʻa e ngaahi hingoa hotau fanga tokouá ʻo tānaki atu ki heʻenau fiefiá?

⁶ ʻOku pehē ʻe hotau fanga tokoua mo e fanga tuofāfine tokolahi ko ʻenau fiefiá ʻoku fakalahi ia ʻi he taimi ʻoku fakahāhā ai ʻe he kau mātuʻá ha mahuʻingaʻia fakafoʻituitui ʻia kinautolu. Ko e founga tefito ʻe taha ʻoku fai pehē ai ʻa e kau mātuʻá ko e muimui ʻi he faʻifaʻitakiʻanga naʻe fokotuʻu ʻe Tēvita, ʻIlaiū, pea mo Sīsuú tonu. (Lau ʻa e 2 Sāmiuela 9:6; Siope 33:1; Luke 19:5.) Ko e kau sevāniti taki taha ko eni ʻa Sihová naʻa nau fakahāhā ʻa e mahuʻingaʻia loto-moʻoni ʻi he tokotaha ʻe tahá ʻaki hono ngāueʻaki ʻa e hingoa ʻo e tokotaha tāutaha. Naʻe houngaʻia foki ʻa Paula ʻi he mahuʻinga hono manatuʻi pea ngāueʻaki ʻa e ngaahi hingoa ʻo e ngaahi kaungātuí. Naʻá ne fakaʻosiʻaki ha taha ʻo ʻene ngaahi tohí ʻaki ʻene tala hono ʻofa ki he fanga tokoua mo e fanga tuofāfine ʻe toko 25 tupu ʻo ngāueʻaki honau hingoá, kau ai ʻa Pēsisi, ko ha tuofefine Kalisitiane ʻa ia naʻe pehē ʻe Paula: “ʻOfa atu kia Pēsisi ko hotau kaungāmeʻa ʻofeiná.”—Loma 16:3-15.

⁷ ʻOku faingataʻa ki he kau mātuʻa ʻe niʻihi ke manatuʻi ha ngaahi hingoa. Ka, ʻi he taimi ʻoku nau fai ai ha feinga moʻoni ke fai peheé, ko hono moʻoní, ʻoku nau tala ki honau kaungātuí, ‘ʻOku mou mahuʻinga kiate au.’ (ʻEki. 33:17) ʻE tautefito ʻa e tānaki atu ʻe he kau mātuʻá ki he fiefia ʻa honau fanga tokouá ʻi he taimi ʻoku nau manatuʻi ai honau ngaahi hingoá ʻi heʻenau uiʻaki kinautolu ʻi heʻenau tali lolotonga ʻa e Ako Taua Leʻo pe ko e ngaahi fakataha kehé.—Fakafehoanaki mo e Sione 10:3.

 8. Ko e hā e founga mahuʻinga ʻe taha naʻe muimui ai ʻa Paula ʻi he faʻifaʻitakiʻanga naʻe fokotuʻu ʻe Sihova mo Sīsuú?

⁸ Naʻe toe fakahāhā ʻe Paula ʻene mahuʻingaʻia ʻi he niʻihi kehé ʻaki hono ʻoatu ʻa e fakaongoongolelei loto-moʻoni, ʻa ia ko e founga tefito ia ʻe taha ke fakalahi ki he fiefia ʻa e ngaahi kaungātuí. Ko ia, ʻi he tohi tatau ʻa ia naʻá ne fakahā ai ʻene holi ke ngāue ki he fiefia ʻa hono fanga tokouá, naʻe tohi ʻe Paula: “ʻOku ou pōlepole lahi ʻi he fekauʻaki mo kimoutolú.” (2 Kol. 7:4) Ko e ngaahi lea fakaongoongolelei ko iá kuo pau naʻe māfana ai ʻa e loto ʻo e fanga tokoua ʻi Kolinitoó. Naʻe fakahaaʻi ʻe Paula ʻa e ngaahi ongoʻi meimei tatau ki he ngaahi fakatahaʻanga kehé. (Loma 1:8; Fil. 1:3-5; 1 Tes. 1:8) Ko e moʻoni, hili ʻene lave kia Pēsisi ʻi heʻene tohi ki he fakatahaʻanga ʻi Lomá, naʻe toe tānaki mai ʻe Paula: “Kuo lahi ʻa e ngaahi fakaongosia kuó ne fai ʻi he ʻEikí.” (Loma 16:12) He fakalototoʻa ē ko e fakaongoongolelei kuo pau naʻe hoko ki he tuofefine faitōnunga ko iá! ʻI hono fakaongoongoleleiʻi ʻa e niʻihi kehé, naʻe muimui ai ʻa Paula ki he faʻifaʻitakiʻanga naʻe fokotuʻu ʻe Sihova mo Sīsuú fakatouʻosi.—Lau ʻa e Maʻake 1:9-11; Sione 1:47; Fkh. 2:2, 13, 19.

 9. Ko e hā ʻoku tānaki atu ai ki ha laumālie fiefia ʻi he fakatahaʻangá ʻa hono fai mo maʻu ha fakaongoongoleleí?

⁹ ʻOku toe sio ʻa e kau mātuʻa he ʻaho ní ki he mahuʻinga ʻo hono fakahāhā ʻenau ngaahi ongoʻi houngaʻia ki honau fanga tokouá. (Pal. 3:27; 15:23) ʻI he taimi pē ʻoku fai pehē ai ha mātuʻa, ko hono moʻoní, ʻokú ne tala ange ki hono fanga tokouá: ‘Naʻá ku fakatokangaʻi e meʻa naʻá ke faí. ʻOku ou tokanga fekauʻaki mo koe.’ Pea ʻoku fiemaʻu moʻoni ke fanongo ʻa e ngaahi kaungātuí ki he ngaahi lea fakafiemālie ʻa e kau mātuʻá. Ko ha tuofefine ʻi hono taʻu 50 tupu lotolotó naʻá ne talanoa ki he tokolahi ʻi heʻene pehē: “ʻI he ngāueʻangá ʻoku tātātaha haʻaku maʻu ha fakaongoongolelei. ʻOku ʻi ai e ʻātakai taʻefakakaumeʻa mo e feʻauʻauhi. Ko ia ʻi he taimi ʻoku fakaongoongoleleiʻi ai au ʻe ha mātuʻa ʻi ha meʻa kuó u fai ʻi he fakatahaʻangá, ʻoku mātuʻaki fakaivifoʻou mo fakaivimālohi ʻaupito! ʻOku ʻai ai ke u ongoʻi ʻoku ʻofaʻi au ʻe heʻeku Tamai fakahēvaní.” Ko ha tokoua ʻa ia ko ha mātuʻa taʻehoa ʻokú ne ʻohake ʻa e fānau ʻe toko ua naʻá ne ongoʻi pehē. Naʻe fakaongoongoleleiʻi loto-moʻoni ia ki muí ni ʻe ha mātuʻa. Naʻe kaunga fēfē ia ki hotau tokouá? ʻOkú ne pehē: “Ko e ngaahi lea ʻa e mātuʻá naʻe ʻomai ai kiate au ha loto-toʻa moʻoni!” Ko e moʻoni, ʻi hono fakaongoongoleleiʻi loto-moʻoni ʻa e ngaahi kaungātuí, ʻoku hiki hake ai ʻe ha mātuʻa honau laumālié pea fakalolotoʻi ʻenau fiefiá. Pea ko e meʻa leva ko iá, te ne ʻoange kia kinautolu ʻa e mālohi lahi ange ke nau hanganaki ʻaʻeva ʻi he hala ki he moʻuí “ʻo ʻikai vaivai.”—ʻAi. 40:31.

10, 11. (a) ʻE lava fēfē ke muimui ʻa e kau mātuʻá ki he faʻifaʻitakiʻanga naʻe fokotuʻu ʻe Nehemaiá? (e) Ko e hā te ne tokoniʻi ha mātuʻa ke ne ʻoatu ha meʻaʻofa fakalaumālie ʻi hono fai ha ngaahi ʻaʻahi fakatauhisipi?

¹⁰ Ko e hā ʻa e founga mātuʻaki mahuʻinga tefito ʻe fakahāhā ai ʻe he kau mātuʻá ʻa e mahuʻingaʻia fakafoʻituitui ʻi honau fanga tokouá pea tānaki atu ki he fiefia ʻa e fakatahaʻangá? Ko e tamuʻomuʻa ke kakapa atu ki he faʻahinga ʻoku nau fiemaʻu ʻa e fakalototoʻá. (Lau ʻa e Ngāue 20:28.) ʻI he taimi ʻoku fai pehē ai ʻa e kau mātuʻá, ʻoku nau faʻifaʻitaki ai ki he kau tauhi-sipi fakalaumālie ʻi he kuonga muʻá. Hangē ko ení, fakatokangaʻi e meʻa naʻe fai ʻe he ʻovasia faitōnunga ko Nehemaiá ʻi he taimi naʻá ne sio ai ko e niʻihi hono fanga tokoua Siú naʻa nau vaivai fakalaumālié. ʻOku pehē ʻi he fakamatalá naʻá ne tuʻu hake leva ʻo fakalototoʻaʻi kinautolu. (Nehe. 4:14) ʻI he ʻahó ni, ʻoku fiemaʻu ki he kau mātuʻá ke nau fai e meʻa tatau. ʻOku nau “tuʻu” hake—ʻo tamuʻomuʻa—ʻi hono tokoniʻi ʻa e ngaahi kaungātuí ke nau tuʻu maʻu ʻi he tuí. Ke fai e fakalototoʻa fakafoʻituitui peheé, ʻoku nau ʻaʻahi ki he ngaahi ʻapi ʻo honau fanga tokouá mo e fanga tuofāfiné kapau ʻoku fakaʻatā ʻe honau ngaahi tuʻungá. Lolotonga ʻa e ngaahi ʻaʻahi fakatauhisipi peheé, ʻoku fiemaʻu ke nau “ʻoatu ha meʻaʻofa fakalaumālie” kia kinautolu. (Loma 1:11) Ko e hā te ne tokoniʻi ʻa e kau mātuʻá ke fai peheé?

¹¹ Ki muʻa ke fai ha ʻaʻahi fakatauhisipí, ʻe fiemaʻu ki ha mātuʻa ke ne vaheʻi ha kiʻi taimi ke fakakaukau ai fekauʻaki mo e tokotaha te ne ʻaʻahi ki aí. Ko e hā ʻa e ngaahi pole ʻa e tokotahá? Ko e hā e ngaahi fakakaukau ʻe lava ke langa hake ai ʻa e tokotaha ko iá? Ko e hā e potu folofola pe hokosia ʻa ha taha ʻi he Tohi Tapú ʻe feʻungamālie ki he ngaahi tuʻunga ʻo e tokotaha ko iá? Ko e tomuʻa fakakaukau peheé ʻe tokoni ia ki ha mātuʻa ke ne fai ha fetalanoaʻaki ʻe hoko ai ʻo mohu ʻuhinga kae ʻikai fakamaʻamaʻaʻi. Lolotonga e ngaahi ʻaʻahi fakatauhisipí, ʻe fakaʻatā ai ʻe he mātuʻá hono fanga tokouá mo e fanga tuofāfiné ke nau fakahaaʻi ʻenau fakakaukaú lolotonga ia ʻene fanongo tokangá. (Sēm. 1:19) Naʻe pehē ʻe ha tuofefine ʻe taha: “ʻOku mātuʻaki fakafiemālie ʻa e taimi ʻoku fanongo fakamātoato ai ha mātuʻa.”—Luke 8:18.

12. Ko hai ʻi he fakatahaʻangá ʻokú ne fiemaʻu ʻa e fakalototoʻá, pea ko e hā hono ʻuhingá?

¹² Ko hai te ne maʻu ʻaonga mei ha ngaahi ʻaʻahi fakatauhisipi? Naʻe naʻinaʻi ʻa Paula ki hono kau kaungāmātuʻa Kalisitiané ke nau “tokanga . . . ki he kotoa ʻo e tākangá.” Ko e moʻoni, ʻoku fiemaʻu ki he kau mēmipa kotoa ʻo e fakatahaʻangá ke nau tali ha fakalototoʻa, kau ai ʻa e faʻahinga ko e kau malanga mo e kau tāimuʻa kuo nau faitōnunga ʻi hono fakahoko ʻenau ngāue fakafaifekaú ʻi he taʻu ki he taʻu. Ko e hā ʻoku fiemaʻu ai kia kinautolu ʻa e poupou ʻa e kau tauhi-sipi fakalaumālié? Koeʻuhí ʻi he taimi ʻe niʻihi ko e kau mālohi fakalaumālie peheé foki ʻoku meimei lōmekina kinautolu ʻe he ngaahi tenge ʻoku ngāueʻaki ʻe he māmani fulikivanu ko ení. Ke fakatātaaʻi ʻa e ʻuhinga ʻoku fiemaʻu tokoni nai ai naʻa mo ha sevāniti mālohi ʻa e ʻOtuá, ʻi he taimi ʻe niʻihi, mei ha kaungāmeʻa, tau lāulea angé ki ha meʻa naʻe hoko ʻi he moʻui ʻa Tuʻi Tēvitá.

13. (a) Naʻe ngāueʻaongaʻaki fēfē ʻe ʻIsipipenopi ʻa e tuʻunga ʻo Tēvitá? (e) Naʻe malava fēfē ke fakahaofi ʻe ʻApisai ʻa Tēvitá?

¹³ Taimi nounou mei hono pani ʻa kiʻi Tēvita ke hoko ko e tuʻí, naʻá ne tuʻu fehangahangai mo Kolaiate, ʻa e taha ʻo e kau Lifaimí, ko ha matakali ʻo e kau saianiti. Naʻe tāmateʻi ʻe Tēvita loto-toʻa ʻa e saianití. (1 Sām. 17:4, 48-51; 1 Kal. 20:5, 8) ʻI he ngaahi taʻu ki mui ange aí, lolotonga ha tau mo e kau Filisitiá, naʻe toe tuʻu fehangahangai ai ʻa Tēvita mo ha saianiti. Ko hono hingoá ko ʻIsipipenopi, ko ha toe Lifaimi ia ʻe taha. (2 Sām. 21:16) Kae kehe, ʻi he taimi ko ení, naʻe mei tāmateʻi ai ʻe he saianití ʻa Tēvita. Ko e hā hono ʻuhingá? Naʻe ʻikai koeʻuhí ko e mole ʻa e loto-toʻa ʻa Tēvitá ka koeʻuhí ko e mole hono mālohí. ʻOku pehē ʻe he fakamatalá: “Nae fakaaau ke vaivai a Tevita.” ʻI he fakatokangaʻi pē ʻe ʻIsipipenopi ʻa e vaivai fakaesino ʻa Tēvitá, naʻá ne “amanaki ke tamateʻi a Tevita.” Ka ki muʻa pē ke hokaʻiʻaki ʻe he saianití ʻene meʻataú ʻa Tēvitá, “nae tokoni kiate ia [Tēvita] e Abisai koe tama o Seluia, o ne taʻi ae tagata Filisitia, o ne tamateʻi ia.” (2 Sām. 21:15-17, PM) He mālō ʻene hao! He houngaʻia ē kuo pau naʻe maʻu ʻe Tēvitá ʻi hono siofi ia ʻe ʻApisai pea tokoniʻi vave ia ʻi he taimi naʻe ʻi he tuʻunga fakatuʻutāmaki ai ʻene moʻuí! Ko e hā e ngaahi lēsoni ʻe lava ke tau maʻu mei he fakamatala ko ení?

14. (a) ʻOku malava fēfē ke tau ikuʻi ʻa e ngaahi pole hangē ha Kolaiaté? (e) ʻE lava fēfē ke tokoniʻi ʻe he kau mātuʻá ʻa e niʻihi kehé ke nau toe maʻu honau mālohí mo ʻenau fiefiá? ʻOmai ha faʻifaʻitakiʻanga.

¹⁴ ʻI māmani lahi, ko kitautolu ʻa e kakai ʻa Sihová ʻoku tau fakahoko ʻetau ngāue fakafaifekaú neongo ʻa e ngaahi fakafaingataʻaʻiaʻanga ʻoku tuku ʻe Sētane mo ʻene kau fakafofongá ʻi hotau halá. Kuo tuʻu fehangahangai ʻa e niʻihi ʻo kitautolu mo e ngaahi pole hangē ha saianití, ka ʻi he falala kakato kia Sihová, ʻoku tau fakafepakiʻi ai ʻa e “kau Kolaiate” ko iá pea ikunaʻi kinautolu. Kae kehe, ʻi he taimi ʻe niʻihi, ko e faitau hokohoko ke fakafepakiʻi ʻa e ngaahi tenge ʻo e māmani ko ení ʻoku ʻai ai kitautolu ke tau vaivai mo loto-siʻi. ʻI he tuʻunga vaivai ko iá, ʻoku tau tuʻu laveangofua ai mo ʻi he tuʻunga fakatuʻutāmaki ʻo e hoko ʻo ‘tamateʻi’ ʻe he ngaahi tenge naʻa tau mei fekuki lavameʻa mo iá. ʻI he ngaahi mōmeniti peheé, ko e poupou taimi tonu kuo ʻomai ʻe ha mātuʻa ʻe lava ke ne tokoniʻi kitautolu ke toe maʻu ʻetau fiefiá mo hotau mālohí, hangē ko ia kuo hokosia ʻe he tokolahi. Naʻe pehē ʻe ha tāimuʻa ʻi hono taʻu 60 tupu lotolotó: “ʻI he taimi ʻe niʻihi he kuohilí, naʻe ʻikai ai te u ongoʻi lelei, pea ko e ngāue fakamalangá naʻá ne ʻai au ke u vaivai. Naʻe fakatokangaʻi ʻe ha mātuʻa ʻa e siʻi hoku iví ʻo ne fakaofiofi mai. Naʻá ma maʻu ha fetalanoaʻaki fakalototoʻa makatuʻunga ʻi ha konga Tohi Tapu. Naʻá ku ngāueʻaki e ngaahi fokotuʻu naʻá ne ʻomaí, pea naʻá ku maʻu ʻaonga mei ai.” Naʻá ne tānaki mai: “He anga-ʻofa ē ko e mātuʻa ko iá ʻi heʻene fakatokangaʻi hoku tuʻunga vaivaí pea fai mai ha tokoni!” ʻIo, ʻoku fakalototoʻa ke ʻilo ʻoku tau maʻu ʻa e kau mātuʻa ʻoku nau siofi anga-ʻofa kitautolu pea ʻoku nau hangē ko ʻApisai ʻo e kuonga muʻá, ʻo tuʻu mateuteu ke ‘tokoniʻi kitautolu.’

15, 16. (a) Ko e hā naʻe ʻofaʻi lahi ai ʻa Paula ʻe hono ngaahi kaungātuí? (e) Ko e hā ke tau ʻofa ai ʻi heʻetau kau mātuʻa tokanga ʻi he fakatahaʻangá?

¹⁵ Ko e hoko ko ha tauhi-sipí ʻoku kau ki ai ʻa e ngāue lahi. ʻI he taimi ʻe niʻihi, ʻoku fakamoleki ai ʻe he kau mātuʻá ʻa e ngaahi pō taʻemamohe ʻi he tokanga faʻa lotu ki he tākanga ʻa e ʻOtuá pe ʻi hono fai ʻa e poupou fakalaumālie ki he ngaahi kaungātuí. (2 Kol. 11:27, 28) Neongo ia, ʻoku fakahoko kakato mo fiefia ʻe he kau mātuʻá honau fatongiá, hangē pē ko Paulá. Naʻá ne tohi ki he kau Kolinitoó: “Te u fai ha foaki ʻi he fiefia lahi pea ke foaki atu au ke ʻosiʻosingamālie maʻamoutolu.” (2 Kol. 12:15) Ko e moʻoni, ʻi he ʻofa ki hono fanga tokouá, naʻe foaki kakato atu ʻe Paula ʻa ia tonu ki hono fakaivimālohiʻi kinautolú. (Lau ʻa e 2 Kolinitō 2:4; Fil. 2:17; 1 Tes. 2:8) Tā neʻineʻi ke ʻofa lahi ʻa e fanga tokouá ʻia Paula!—Ngā. 20:31-38.

¹⁶ Ko kitautolu ʻi he tuʻunga ko e kau sevāniti ʻa e ʻOtuá he ʻaho ní ʻoku tau toe ʻofa ʻi heʻetau kau mātuʻa Kalisitiane tokangá pea fakamālō kia Sihova ʻi heʻetau ngaahi lotu fakafoʻituituí ʻi hono tokonaki mai kinautolú. ʻOku tānaki mai ki heʻetau fiefiá ʻa ʻenau fakahāhā ʻa e mahuʻingaʻia fakafoʻituitui ʻia kitautolu. ʻOku tau ongoʻi koloaʻia ʻi heʻenau ngaahi ʻaʻahi fakatauhisipí. ʻIkai ko ia pē, ʻoku tau houngaʻia ʻi heʻenau tuʻu mateuteu ke tokoniʻi kitautolu ʻi he ngaahi mōmeniti ʻoku tau ongoʻi lōmekina ai koeʻuhí ko e ngaahi tenge ʻo e māmani ko ení. ʻIo, ko e kau mātuʻa Kalisitiane tokanga peheé ko e moʻoni ‘ko e kau kaungāngāue kinautolu ke tau fiefia ai.’