ʻUluaki Kolinitō

3 Ko ia fanga tokoua, naʻe ʻikai te u malava ke lea atu kiate kimoutolu ʻo hangē ko haʻaku fai ki ha kau tangata fakalaumālié,+ ka naʻe hangē ia ko haʻaku fai ki ha kau tangata fakakakanó, ʻo hangē ko haʻaku fai ki ha kau valevale+ ʻia Kalaisí. 2 Naʻá ku fafanga huʻakau kimoutolu, ʻo ʻikai ko e meʻakai mālohi, he naʻe teʻeki ai ke mou mālohi feʻunga. Ko hono moʻoní, naʻa mo e taimí ni ʻoku teʻeki ai pē ke mou mālohi feʻunga,+ 3 he ʻoku mou kei fakakakano pē.+ Koeʻuhi ko e ʻi ai ʻa e meheka mo e fekeʻikeʻi ʻi homou haʻohaʻongá, ʻikai ʻoku mou fakakakano+ pea ʻikai ʻoku mou ʻaʻeva ʻo hangē ko ia ʻoku fai ʻe he tangatá? 4 He ʻi he pehē ʻe ha taha, “ʻOku ʻo Paula au,” kae pehē ʻe ha taha kehe ia, “ʻOku ʻo ʻApolosi au,”+ ʻikai ʻoku mou tōʻonga ʻo hangē ko ha kau tangata peé?

5 Ko e hā leva ʻa ʻApolosi? ʻIo, ko e hā ʻa Paula? Ko e ongo faifekau*+ ʻa ia naʻe fakafou ai hoʻomou hoko ko e kau tuí, ʻo hangē tofu pē ko ia kuo foaki ange ʻe he ʻEikí ki he tokotaha taki taha. 6 Naʻá ku tō ʻe au,+ naʻe fuʻifuʻi ʻe ʻApolosi,+ ka ko e ʻOtuá naʻá ne hanganaki ʻai ia ke tupú, 7 ko ia ko e tokotaha ʻoku mahuʻingá ʻoku ʻikai ko ia ʻokú ne tō ha meʻá pe ko ia ʻokú ne fuʻifuʻí, ka ko e ʻOtuá, ʻa ia ʻokú ne ʻai ia ke tupú.+ 8 Pea ko e tokotaha ʻokú ne toó mo e tokotaha ʻokú ne fuʻifuʻí ʻokú na taha,* ka ko e tokotaha taki taha te ne maʻu ʻene totongi ʻaʻaná ʻo fakatatau pē ki heʻene ngāué.+ 9 He ko e ongo kaungāngāue kimaua ʻo e ʻOtuá. Ko kimoutolú ko e ngoueʻanga ʻa e ʻOtuá ʻokú ne ngoueʻi, ko e fale ʻo e ʻOtuá ʻokú ne langa.+

10 Fakatatau ki he ʻofa maʻataʻatā ʻa e ʻOtuá ʻa ia naʻe ʻomi kiate aú, naʻá ku fakatoka ha fakavaʻe+ ʻi he tuʻunga ko ha pule tufunga mataotao,* ka ʻoku langa ai ha taha kehe ia. Kae tuku muʻa ki he tokotaha taki taha ke ne hanganaki vakaiʻi ʻa e anga ʻo ʻene langa ʻoku fai aí. 11 He ʻoku ʻikai ha taha ʻe lava ke ne fakatoka ha toe fakavaʻe kehe mei he meʻa kuo fakatoká, ʻa ia ko Sīsū Kalaisi.+ 12 Pea kapau ʻoku langa ha taha pē ʻi he fakavaʻé ʻaki ʻa e koula, siliva, maka mahuʻinga, papa, mohuku, pe saafa, 13 ko e ngāue ʻa e tokotaha taki taha ʻe fakahaaʻi ʻa hono tuʻunga totonú,* he ʻe fakahaaʻi ia ʻi he ʻaho ko iá, koeʻuhi ʻe fakaeʻa ia ʻaki ʻa e afi,+ pea ko e afí tonu te ne fakamoʻoniʻi pe ko e faʻahinga langa fēfē kuo fai ʻe he tokotaha taki taha. 14 Kapau ʻe ʻikai vela ʻi he afí ʻa e meʻa kuo langa ʻe ha taha ʻi he fakavaʻé, ʻe tāpuakiʻi ia; 15 kapau ʻe vela ʻo ʻosi ʻa e ngāue ʻa ha taha, te ne tofanga ʻi ha mole, ka ko ia tonu te ne hao; ka ʻe hangē ko haʻane hao mei he afí.

16 ʻOku ʻikai koā te mou ʻilo ko kimoutolú ko e temipale ʻo e ʻOtuá+ pea ʻoku nofo ʻa e laumālie ʻo e ʻOtuá ʻiate kimoutolu?+ 17 Kapau ʻoku fakaʻauha ʻe ha taha ʻa e temipale ʻo e ʻOtuá, ʻe fakaʻauha ia ʻe he ʻOtuá; he ko e temipale ʻo e ʻOtuá ʻoku toputapu, pea ko kimoutolu ʻa e temipale ko iá.+

18 Tuku ke ʻoua naʻa kākaaʻi pē ʻe ha taha ʻa ia tonu: Kapau ʻe fakakaukau ha taha ʻiate kimoutolu ʻokú ne poto ʻi he fokotuʻutuʻu ko ení,* tuku ke ne hoko muʻa ko e vale, koeʻuhí ke ne hoko ai ko e poto. 19 He ko e poto ʻo e māmani ko ʻení ko e vale ia ki he ʻOtuá, he kuo tohi: “ʻOkú ne maʻungamālie ʻa e kau potó ʻi heʻenau filioʻi kākā pē ʻa kinautolú.”+ 20 Pea ʻikai ko ia pē: “ʻOku ʻafioʻi ʻe Sihova* ko e ngaahi fakaʻuhinga ʻa e kau tangata potó ko e koto muna pē.”+ 21 Ko ia tuku ke ʻoua naʻa ʻi ai ha taha ʻe pōlepole ʻi ha tangata; he ko e meʻa kotoa pē ʻoku ʻa kimoutolu ia, 22 ʻo tatau ai pē pe ko Paula pe ko ʻApolosi pe ko Kīfasi*+ pe ko e māmaní pe ko e moʻuí pe ko e maté pe ko e ngaahi meʻa ʻoku ʻi hení pe ko e ngaahi meʻa ka hoko maí, ko e ngaahi meʻa kotoa pē ʻoku ʻa kimoutolu ia; 23 ko kimoutolú leva ʻoku ʻo Kalaisi;+ ko Kalaisí leva, ʻoku ʻa e ʻOtuá ia.