“Ko e ʻOtua Ia . . . ʻo e Kau Moʻuí”

ʻOku mālohi ange ʻa e maté ʻi he ʻOtuá? ʻIkai ʻaupito! ʻE lava fēfē ʻa e maté—pe ko ha toe “fili”—ke mālohi ange ʻi he “ʻOtua” Māfimafi-Aoniú? (1 Kolinitō 15:26; ʻEkisoto 6:3) ʻOku ʻi he ʻOtuá ʻa e mālohi ke toʻo atu ʻa e maté fakafou ʻi he toetuʻú pea ʻokú ne talaʻofa ke fai ia ʻi heʻene māmani foʻoú.aʻOku papau fēfē ʻa e talaʻofa ko iá? Ko e ʻAlo tonu ʻo e ʻOtuá, ʻa Sīsū ʻokú ne fakamatalaʻi mai kiate kitautolu ʻi he lea ʻoku lava ke fakafonu ai hotau lotó ʻi he ʻamanakí.—Lau ʻa e Mātiu 22:31, 32.

ʻI he lea ki he kau Sātusí, ʻa ia naʻe ʻikai ke nau tui ki he toetuʻú, naʻe pehē ʻe Sīsū: “ʻI he fekauʻaki mo e toetuʻu ʻa e kau maté, naʻe ʻikai koā te mou lau ʻa e meʻa naʻe folofolaʻaki kiate kimoutolu ʻe he ʻOtuá, ʻo pehē: ‘Ko e ʻOtua au ʻo ʻEpalahame pea ko e ʻOtua ʻo ʻAisake pea ko e ʻOtua ʻo Sēkope’? Ko e ʻOtua ia, ʻikai ʻo e kau maté, ka ʻo e kau moʻuí.” Naʻe lave heni ʻa Sīsū ki he fetalanoaʻaki ʻa e ʻOtuá mo Mōsese ʻi he talatalaʻāmoa velá ʻi he 1514 K.M. nai. (ʻEkisoto 3:1-6) Fakatatau kia Sīsuú, ko e lea ʻa Sihova kia Mōsesé—“Ko Au ko e ʻOtua ʻo ho tupuʻanga, ko e ʻOtua ʻo ʻEpalahame, ko e ʻOtua ʻo Aisake, pea ko e ʻOtua ʻo Sekope.”—ʻoku fakahaaʻi ai ko e toetuʻú ko ha talaʻofa papau ʻe fakahoko. Anga-fēfē?

ʻUluaki fakakaukau angé ki he tuʻungá. ʻI he taimi naʻe lea ai ʻa Sihova kia Mōsesé, ko e pēteliake ko ʻĒpalahame, ʻAisake mo Sēkopé kuo fuoloa ʻenau mate—ʻĒpalahame ʻi he taʻu ʻe 329, ʻAisake ʻi he taʻu ʻe 224 mo Sēkope ʻi he taʻu ʻe 197. Neongo ia, naʻe pehē ʻe Sihova “ʻOku ou”—ʻikai ko e “Naʻá ku”—hoko ko honau ʻOtuá. Naʻe lea ʻa Sihova fekauʻaki mo e kau pēteliake ʻe toko tolú ʻo hangē ʻoku nau kei moʻuí. Ko e hā hono ʻuhingá?

Naʻe pehē ʻe Sīsū: “Ko e [Sihova] ʻOtua ia, ʻikai ʻo e kau maté, ka ʻo e kau moʻuí.” Fakakaukau angé ʻi ha mōmeniti ki he fakahuʻunga ʻo e lea ko ia ʻa Sīsuú. Kapau naʻe ʻikai ke ʻi ai ha toetuʻu, ko ʻĒpalahame leva, ʻAisake mo Sēkope te nau mate ai pē ʻo ʻikai ha toe foki mai. Kapau ko e tuʻungá ia, ko Sihová ko e ʻOtua ia ʻo e kau maté. ʻA ia ʻe ʻuhinga leva ia ko e maté ʻoku mālohi ange ia ʻia Sihova—ʻo hangē ʻokú ne fuʻu vaivai ke fakatauʻatāinaʻi ʻene kau sevāniti faitōnungá mei he haʻisia ʻa maté.

Ko e hā leva te tau fakamulitukuʻaki fekauʻaki mo ʻĒpalahame, ʻAisake, Sēkope mo e kotoa ʻo e kau sevāniti faitōnunga ʻa Sihova kuo nau maté? Naʻe fai ʻe Sīsū ʻa e fakamatala mālohi ko ení: “ʻOku nau moʻui kotoa pē kiate ia.” (Luke 20:38) Ko e moʻoni, ko e talaʻofa ʻa Sihova ke fokotuʻu hake ʻene kau sevāniti faitōnunga kuo nau maté ʻoku papau ʻaupito ke fakahoko ʻo ne fakakaukau ai kiate kinautolu hangē ʻoku nau moʻuí. (Loma 4:16,17) ʻE tauhi ʻe Sihova ʻa e faʻahinga kotoa ko iá ʻi heʻene manatu haohaoá kae ʻoua ke aʻu ki heʻene taimí ke fakafoki mai ai kinautolu ki he moʻuí.

Ko e ʻamanaki ʻo e hoko ʻo toe fakataha mo hao ʻofaʻanga kuo maté ʻoku fakamānako kiate koe? Kapau ko ia, manatuʻi ko Sihová ʻoku mālohi mamaʻo ange ia ʻi he maté. ʻOku ʻikai ha meʻa te ne lava ke taʻofi ia mei hono fakahoko ʻene talaʻofa ke fokotuʻu ʻa e maté. Ko e hā ʻoku ʻikai te ke ako lahi ange ai fekauʻaki mo e talaʻofa ʻo e toetuʻú mo e ʻOtua te ne fai iá? Ko hono fai iá ʻe tohoakiʻi ai koe ke ke ofi ange kia Sihova, “ko e ʻOtua . . . ʻo e kau moʻuí.”