Ko e ʻAmanaki Moʻoni ki he Faʻahinga ʻOkú Ke ʻOfa Ai Kuo Nau Maté

1-3. Ko e hā ʻa e fili ʻokú ne tuli kotoa kitautolú, pea ko e hā ʻe ʻomai ai kiate kitautolu ha fiemālie ʻi he lāulea ki he meʻa ʻoku akoʻi ʻe he Tohi Tapú?

FAKAʻUTA ATU ʻokú ke hola mei ha fili fulikivanu. ʻOkú ne mālohi ange mo vave ange ʻiate koe. ʻOkú ke ʻiloʻi ʻokú ne taʻefaimeesi koeʻuhi kuó ke sio ʻi heʻene tāmateʻi ʻa e niʻihi ʻo ho ngaahi kaumeʻá. Tatau ai pē pe ko e hā hono mālohi ʻo hoʻo feinga ke hola meiate iá, ʻokú ne hoko ʻo ofi atu kiate koe. ʻOku hā ngali ʻikai ha ʻamanaki. Neongo ia, fakafokifā pē, ʻoku ʻasi mai ha tokotaha-faifakahaofi ʻi ho tafaʻakí. ʻOkú ne mālohi mamaʻo ange ia ʻi ho filí, pea ʻokú ne talaʻofa ke tokoniʻi koe. He ʻai moʻoni ē koe ʻe he meʻa ko iá ke ke fiemālie!

² ʻI ha ʻuhinga, ʻoku tuli koe ʻe ha fili pehē. ʻOku tuli kotoa kitautolu. Hangē ko ia kuo tau ako ʻi he vahe ki muʻá, ʻoku ui ai ʻe he Tohi Tapú ʻa e maté ko ha fili. ʻOku ʻikai ha taha ʻo kitautolu ʻe lava ke ne hola mei ai pe tauʻi ia. Ko e tokolahi taha ʻo kitautolú kuo tau sio ki he fili ko ení ʻi heʻene ʻave ʻa e moʻui ʻa e kakai ʻoku tau ʻofa aí. Ka ʻoku mālohi mamaʻo ange ʻa Sihova ʻi he maté. Ko e Tokotaha-Faifakahaofi ʻofa ia kuó ne ʻosi fakahaaʻi ʻe lava ke ne ikunaʻi ʻa e fili ko ení. Pea ʻokú ne talaʻofa ke fakaʻauha ʻa e fili ko ení, ʻa mate, ʻo tā tuʻo taha. ʻOku akoʻi ʻe he Tohi Tapú: “Ta kuo fakakaʻanga mo e fili fakamui, ʻa Mate.” (1 Kolinito 15:26) Ko ha ongoongo lelei ia!

³ Tau fai angé ha vakai nounou ki he anga hono uesia kitautolu ʻe he fili ko e maté ʻi he taimi ʻoku hoko aí. Ko hono fai ení ʻe tokoniʻi ai kitautolu ke tau mahinoʻi ʻa e meʻa ʻa ia te ne ʻai kitautolu ke tau fiefiá. Fakatokangaʻi, ʻoku talaʻofa ʻe Sihova ʻe toe moʻui ʻa e kau maté. (Aisea 26:19) ʻE toe fakafoki mai kinautolu ki he moʻuí. Ko e ʻamanaki ia ʻo e toetuʻú.

 4. (a) Ko e hā ʻoku akoʻi mai kiate kitautolu ʻe he tali ʻa Sīsū ki he mate ʻa ha tokotaha ʻofeina ʻo kau ki he ngaahi ongoʻi ʻa Sihová? (e) Ko e hā ʻa e kaumeʻa makehe naʻe fakatupulekina ʻe Sīsuú?

⁴ Kuo mole meiate koe ha taha ʻofeina ʻi he maté? Ko e langá mo e mamahí, mo e ongoʻi taʻeʻaongá ʻoku lava ke hā ngali taʻealamakātakiʻi. ʻI he ngaahi taimi peheé, ʻoku fiemaʻu ai ke tau kumi ki he Folofola ʻa e ʻOtuá ki ha fakafiemālie. (2 Kolinito 1:​3, 4) ʻOku tokoniʻi kitautolu ʻe he Tohi Tapú ke tau mahinoʻi ʻa e anga ʻo e ongoʻi ʻa Sihova mo Sīsū fekauʻaki mo e maté. Ko Sīsū, ʻa ia naʻá ne tapua haohaoa atu ʻa ʻene Tamaí, naʻá ne ʻiloʻi ʻa e mamahi ʻi he mole ha taha ʻi he maté. (Sione 14:9) ʻI he taimi naʻá ne ʻi Selusalema aí, naʻe faʻa ʻaʻahi ai ʻa Sīsū kia Lāsalosi mo hono ongo tuofāfiné, ʻa Mele mo Māʻata, ʻa ia naʻa nau nofo ʻi he kolo ofi mai ko Pētaní. Naʻa nau hoko ai ko e ngaahi kaumeʻa vāofi. ʻOku pehē ʻe he Tohi Tapú: “Naʻe ʻofa ʻa Sīsū kia Maata, mo hono tokoua, pea mo Lasalosi.” (Sione 11:5) Neongo ia, hangē ko ia naʻa tau ʻiloʻi ʻi he vahe ki muʻá, naʻe mate ʻa Lāsalosi.

5, 6. (a) Naʻe anga-fēfē ʻa e tali ʻa Sīsū ʻi he taimi naʻá ne ʻi he fāmili ai mo e ngaahi kaumeʻa mamahi ʻo Lāsalosí? (e) Ko e hā ʻoku fakalototoʻa ai kiate kitautolu ʻa e mamahi ʻa Sīsuú?

⁵ Naʻe anga-fēfē ʻa e ongoʻi ʻa Sīsū fekauʻaki mo e mole ʻa hono kaumeʻá? ʻOku tala mai ʻe he fakamatalá naʻe ʻalu ʻa Sīsū ki he kāinga mo e ngaahi kaumeʻa ʻo Lāsalosí lolotonga ʻenau mamahi ʻi he mole ko ení. ʻI he sio kiate kinautolú, naʻe ueʻi loloto ai ʻa Sīsū. Naʻá ne “toʻe ia i he laumalie, bea mamahi.” Naʻe pehē leva ʻe he fakamatalá, “Bea tagi a Jisu.” (Sione 11:​33, 35, PM) Naʻe ʻuhinga ʻa e mamahi ʻa Sīsuú naʻe ʻikai haʻane ʻamanaki? ʻIkai ʻaupito. Ko hono moʻoní, naʻe ʻiloʻi ʻe Sīsū ʻe hoko ha meʻa fakaofo. (Sione 11:​3, 4) Neongo ia, naʻá ne ongoʻi ʻa e langa mo e mamahi ʻoku ʻomai ʻe he maté.

⁶ ʻOku fakalototoʻa kiate kitautolu ʻi ha founga, ʻa e mamahi ʻa Sīsuú. ʻOkú ne akoʻi mai kiate kitautolu ko Sīsū mo ʻene Tamaí, ʻa Sihova, ʻokú na fehiʻa ʻi he maté. Ka ko Sihova ko e ʻOtuá ʻokú ne malava ke tauʻi pea ikuʻi ʻa e fili ko iá! Tau sio angé ki he meʻa naʻe ʻai ʻe he ʻOtuá ke malava ʻe Sīsū ʻo faí.

7, 8. Ko e hā nai naʻe hā ngali ʻikai ha toe ʻamanaki ai ʻa e tuʻunga ʻo Lāsalosí ki he kakai naʻe mamatá, ka ko e hā naʻe fai ʻe Sīsuú?

⁷ Naʻe tanu ʻa Lāsalosi ʻi ha ʻana, pea naʻe kole ʻe Sīsū ke toʻo ʻa e maka naʻá ne silaʻi ʻa e hūʻangá. Naʻe fakafepakiʻi ia ʻe Māʻata koeʻuhi ʻi he hili ʻa e ʻaho ʻe faá, kuo pau pē naʻe kamata ke ʻauʻaunga ʻa e sino ʻo Lāsalosí. (Sione 11:39) Mei he vakai ʻa e tangatá, ko e hā ha toe ʻamanaki?

⁸ Naʻe tekaʻi ʻa e maká, pea naʻe kaila atu ʻa Sīsū ʻi ha leʻo-lahi: “Lasalosi, tuʻu mai kituʻa.” Ko e hā naʻe hokó? “Pea hū kituʻa ʻa e pekia.” (Sione 11:​43, 44) ʻOku lava ke ke fakaʻuta atu ki he fiefia ʻa e kakai naʻe ʻi aí? Pe ko Lāsalosí ko honau tuongaʻane, kāinga, kaumeʻa, pe kaungāʻapi, naʻa nau ʻiloʻi naʻá ne mate. Neongo ia, ko ia eni—ʻa e tangata ʻofeina tatau⁠—ʻokú ne toe tuʻu ʻi honau haʻohaʻongá. Kuo pau pē ne hā ngali faingataʻa ke ala tui ki ai. ʻOku ʻikai ha veiveiua naʻe fāʻofua fiefia ʻa e tokolahi ʻia Lāsalosi. Ko ha ikunaʻi moʻoni ē ʻo e maté!

9, 10. (a) Naʻe anga-fēfē hono fakaeʻa ʻe Sīsū ʻa e Matavai ʻo hono mālohi ke fokotuʻu hake ʻa Lāsalosí? (e) Ko e hā ʻa e niʻihi ʻo e ngaahi ʻaonga ʻo hono lau ʻa e ngaahi fakamatala Fakatohitapu ki he toetuʻú?

⁹ Naʻe ʻikai taukaveʻi ʻe Sīsū naʻá ne fakahoko ʻa e mana fakaofó ni ʻiate ia pē. ʻI heʻene lotu ʻi he ki muʻa pē ke ne ui kia Lāsalosí, naʻá ne ʻai ai ke mahino ko Sihova ʻa e Matavai ʻo e toetuʻú. (Sione 11:​41, 42) Naʻe ʻikai ko e taimi pē eni ʻe taha naʻe ngāueʻaki ai ʻe Sihova ʻa hono mālohí ʻi he founga ko ení. Ko e toetuʻu ʻa Lāsalosí ko e taha pē ia ʻi he ngaahi mana ʻe hiva ʻo e toetuʻú naʻe lēkooti ʻi he Folofola ʻa e ʻOtuá.a Ke lau mo ako ʻa e ngaahi fakamatalá ni ko ha meʻa fakafiefia ia. ʻOku nau akoʻi mai ko e ʻOtuá ʻoku ʻikai filifilimānako, he ko e faʻahinga naʻe toetuʻú ʻoku kau ai ʻa e kei siʻi mo e taʻumotuʻa, tangata mo e fefine, ʻIsileli mo e ʻikai ʻIsileli. Pea he fiefia ē ʻoku fakamatalaʻi ʻi he ngaahi kupu ko ení! Ko e fakatātaá, ʻi he taimi naʻe fokotuʻu hake ai ʻe Sīsū ha kiʻi taʻahine mei he maté, ko ʻene ongo mātuʻá ‘naʻá na fakatumutumu.’ (Maake 5:​42, KF ) ʻIo, naʻe ʻoange ʻe Sihova kiate kinaua ha tupuʻanga ki ha fiefia ʻe ʻikai ʻaupito ngalo ʻiate kinaua.

¹⁰ Ko e moʻoni, ko e faʻahinga naʻe fokotuʻu hake ʻe Sīsuú naʻe faifai pē ʻo nau toe mate. ʻOku ʻuhinga ení naʻe taʻeʻaonga hono fokotuʻu hake kinautolú? ʻIkai ʻaupito. Ko e ngaahi fakamatala Fakatohitapu ko ení ʻoku fakapapauʻi mai ai ʻa e ngaahi moʻoni mahuʻinga pea ʻomai ai kiate kitautolu ʻa e ʻamanaki.

11. ʻOku anga-fēfē ʻa e tokoni ʻa e fakamatala ki he toetuʻu ʻa Lāsalosí ke fakapapauʻi ai ʻa e moʻoni naʻe lēkooti ʻi he Koheleti 9:5?

¹¹ ʻOku akoʻi ʻe he Tohi Tapú ko e kau maté “ʻoku ʻikai te nau ʻilo ha momoʻi meʻa.” ʻOku ʻikai te nau moʻui pea ʻoku ʻikai te nau ʻi ai ʻo ʻiloʻi ha meʻa ʻi ha feituʻu. Ko e fakamatala ʻo kau kia Lāsalosí ʻoku fakapapauʻi ai ʻa e meʻá ni. ʻI heʻene toe foki ʻo moʻuí, naʻe fakafiefiaʻi ʻe Lāsalosi ʻa e kakaí ʻaki ha ngaahi fakamatala ʻo kau ki hēvani? Pe naʻá ne fakailifiaʻi kinautolu ʻaki ha ngaahi talanoa fakalilifu fekauʻaki mo ha heli ʻoku vela? ʻIkai. ʻOku ʻikai ʻi he Tohi Tapú ha ngaahi lea pehē ʻa Lāsalosi. Lolotonga ʻa e ʻaho ʻe fā naʻá ne mate aí, naʻe ʻikai te ne “ʻilo ha momoʻi meʻa.” (Koheleti 9:5) Naʻe mohe pē ʻa Lāsalosi ʻi he maté.—Sione 11:11.

12. Ko e hā ʻoku lava ai ke tau fakapapauʻi ko e toetuʻu ʻa Lāsalosí naʻe hoko moʻoni?

¹² Ko e fakamatala kia Lāsalosí ʻoku toe akoʻi mai ai kiate kitautolu ko e toetuʻú ko ha meʻa moʻoni, ʻo ʻikai ko ha fananga pē. Naʻe fokotuʻu hake ʻe Sīsū ʻa Lāsalosi ʻi he ʻao ʻo ha fuʻu kau fakamoʻoni sio tonu. Naʻa mo e kau taki lotú, ʻa ia naʻa nau fehiʻa ʻia Sīsuú, naʻe ʻikai te nau fakaʻikaiʻi ʻa e mana ko ení. ʻI hono kehé, naʻa nau pehē: “Koeha oku tau fai? he oku fai e he tagata ni [Sīsū] ae gaahi mana lahi.” (Sione 11:​47, PM) Naʻe ʻalu ʻa e kakai tokolahi ke sio ki he tangata naʻe toetuʻú. Ko hono olá, naʻe tui kia Sīsū naʻa mo e tokolahi ʻo kinautolu. Naʻa nau ʻiloʻi ko Lāsalosí ko ha fakamoʻoni moʻui ia ko Sīsuú naʻe fekauʻi mai ʻe he ʻOtuá. Ko e fakamoʻoni ko ení naʻe fuʻu mālohi ʻo palani ai ʻa e niʻihi ʻo e kau taki lotu Siu loto-fefeká ke tāmateʻi fakatouʻosi ʻa Sīsū mo Lāsalosi.—Sione 11:53; 12:​9-11.

13. Ko e hā ʻa e makatuʻunga ʻoku tau maʻu ke tui ai ʻe lava moʻoni ʻe Sihova ke fokotuʻu hake ʻa e kau maté?

¹³ ʻOku taʻetotonu ke tali ko ha moʻoniʻi meʻa ʻa e toetuʻú? ʻIkai, he naʻe akoʻi ʻe Sīsū ʻe ʻi ai ʻa e ʻaho ʻe fokotuʻu hake ai ʻa e “kakai kotoa pe ʻoku ʻi he ngaahi faʻitoka [fakamanatú].” (Sione 5:28) Ko Sihova ʻa e Tokotaha-Fakatupu ʻo e moʻui kotoa pē. ʻE faingataʻa ke tui te ne lava ke toe fakatupu ʻa e moʻuí? Ko e moʻoni, ʻe fakatuʻunga ʻa e meʻa lahi ʻi he manatu ʻa Sihová. ʻE lava ke ne manatuʻi ʻa e faʻahinga naʻa tau ʻofa ai kuo nau maté? ʻOku fakafonu ʻe he ngaahi fetuʻu taʻefaʻalaua ʻe laui tiliona ʻa e ʻunivēsí, neongo ia ʻoku fakahingoa taki taha kinautolu ʻe he ʻOtuá! (Aisea 40:26) Ko ia, ʻoku lava ke manatuʻi ʻe Sihova ko e ʻOtuá ʻa e faʻahinga naʻa tau ʻofa ai kuo nau maté ʻi he fakaikiiki kotoa pē, pea ʻokú ne mateuteu ke toe fakafoki kinautolu ki he moʻuí.

14, 15. Hangē ko ia naʻe fakatātaaʻi ʻi he meʻa naʻe leaʻaki ʻe Siopé, ʻoku anga-fēfē ʻa e ongoʻi ʻa Sihova fekauʻaki mo hono toe fakafoki ʻa e kau maté ki he moʻuí?

¹⁴ Ko ia ai, ʻoku anga-fēfē ʻa e ongoʻi ʻa Sihova fekauʻaki mo hono fokotuʻu hake ʻa e kau maté? ʻOku akoʻi mai ʻe he Tohi Tapú ʻokú ne vēkeveke ke fokotuʻu hake ʻa e maté. Ko e tangata faitōnunga ko Siopé naʻá ne ʻeke: “Ka pekia ha tangata, te ne toe moʻui koa?” Naʻe lea ʻa Siopé ʻo fekauʻaki mo e tatali ʻi he faʻitoká kae ʻoua kuo aʻu ki he taimi ke manatuʻi ai ia ʻe he ʻOtuá. Naʻá ne pehē kia Sihova: “Te ke toki ui, pea te u tali atu ʻe au: ʻe kavea ho finangalo ki he fitaʻa ʻa ho nima.”​—Siope 14:​13-15.

¹⁵ Fakakaukau ange pē! ʻOku kāvea moʻoni ʻa Sihova ke fakafoki ʻa e kau maté ki he moʻuí. ʻIkai ʻoku fakalotomāfana ke ʻiloʻi ʻoku ongoʻi pehē ʻa Sihova? Ka ʻe fēfē ʻa e toetuʻu ko eni ʻi he kahaʻú? Ko hai ʻe toetuʻú, pea ʻi fē?

16. ʻE toe fokotuʻu hake ʻa e kau maté ke nau moʻui ʻi he ngaahi faʻahinga tuʻunga fē?

¹⁶ Ko e ngaahi fakamatala toetuʻu ʻa e Tohi Tapú ʻoku akoʻi mai ai kiate kitautolu ʻa e meʻa lahi fekauʻaki mo e toetuʻu ka hoko maí. Ko e kakai naʻe toe fakafoki ki he moʻuí ʻi heni tonu ʻi he māmaní naʻa nau toe fakataha mo e faʻahinga naʻa nau ʻofa aí. Ko e toetuʻu he kahaʻú ʻe meimei tatau—ka ʻe lelei lahi ange ia. Hangē ko ia kuo tau ako ʻi he Vahe 3, ko e taumuʻa ia ʻa e ʻOtuá ke ngaohi ʻa e māmaní fakakātoa ko ha palataisi. Ko ia ai, ʻe ʻikai fokotuʻu hake ʻa e kau maté ki he moʻuí ʻi ha māmani ʻoku fonu ʻi he taú, faihiá mo e mahamahakí. Te nau maʻu ha faingamālie ke moʻui taʻengata ʻi he māmani ko ení ʻi he ngaahi tuʻunga nonga mo fakafiefia.

17. ʻE lahi fēfē ʻa e toetuʻú?

¹⁷ Ko hai ʻe toetuʻú? Naʻe pehē ʻe Sīsū “ʻe fanongo ai ki hono leʻo [ʻo Sīsuú] ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai.” (Fakaʻītali ʻamautolu; Sione 5:​28, 29) ʻI he tuʻunga meimei tatau, ʻoku pehē ʻe he Fakahā 20:13: “Naʻe tukuange ʻe he tahi ʻa e pekia naʻe ʻi ai; pea mo Mate foki mo e Hetesi naʻa na tukuange ʻa e pekia naʻe ʻiate kinaua.” Ko “Hetesi” ʻoku ʻuhingá ki he faʻitoka anga-maheni ʻo e faʻahinga ʻo e tangatá. (Sio ki he ʻApenitiki “Ko e Hā ʻa Seoli mo Hētesi?”) Ko e faʻitoka fakakātoa ko ení ʻe fakamaha. Ko e laui piliona kotoa ko ē ʻoku mālōlō ʻi aí te nau toe moʻui. Naʻe pehē ʻe he ʻapositolo ko Paulá: “ʻE faifai pea hoko ha toetuʻu ʻa e angatonu mo e angahala fakatouʻosi.” (Ngāue 24:15) Ko e hā ʻoku ʻuhinga ki ai iá?

18. Ko hai ʻoku kau ʻi he lotolotonga ʻo e kau “angatonu” ʻa ia ʻe toetuʻú, pea ʻe anga-fēfē nai ʻa e kaunga fakafoʻituitui kiate koe ʻa e ʻamanaki ko ení?

¹⁸ ʻOku kau ki he “angatonu” ʻa e kakai tokolahi ʻoku tau lau fekauʻaki mo kinautolu ʻi he Tohi Tapú ʻa ia naʻa nau moʻui ki muʻa ke haʻu ʻa Sīsū ki he māmaní. Te ke fakakaukau nai fekauʻaki mo Noa, ʻĒpalahame, Sela, Mōsese, Lute, ʻĒseta mo e tokolahi kehe. Ko e niʻihi ʻo e kau tangata mo e kau fefine ko eni ʻo e tuí ʻoku lāulea ki ai ʻi he vahe hono 11 ʻo e Hepeluú. Ka ko e kau “angatonu” ʻoku toe kau ki ai ʻa e kau sevāniti ʻa Sihova ʻa ia ʻoku nau mate ʻi hotau taimí. Mālō mo e ʻamanaki ʻo e toetuʻú, ʻe lava ke tau ʻatā ai mei ha ilifia pē ki he maté.—Hepelu 2:15.

19. Ko hai ʻa e kau “angahala,” pea ko e hā ʻa e faingamālie ʻoku ʻoange maʻanautolu ʻi he anga-lelei ʻa Sihová?

¹⁹ Fēfē ʻa e kakai kotoa naʻe ʻikai te nau tauhi pe talangofua kia Sihova koeʻuhi naʻe ʻikai ʻaupito te nau ʻilo fekauʻaki mo iá? Ko e laui piliona ko eni ʻo e faʻahinga “angahala” ʻe ʻikai fakangaloʻi kinautolu. Ko kinautolu foki ʻe fokotuʻu hake pea ʻe ʻoange ʻa e taimi ke nau ako ai ʻo fekauʻaki mo e ʻOtua moʻoní pea tauhi kiate ia. Lolotonga ha vahaʻa taimi ʻo ha taʻu ʻe taha afe, ʻe fokotuʻu hake ai ʻa e kau maté pea ʻoange kiate kinautolu ha faingamālie ke nau kau fakataha mo e faʻahinga faitōnunga ʻo e tangatá ʻi he māmaní ʻi he tauhi kia Sihová. ʻE hoko ia ko ha taimi fakaofo. Ko e vahaʻa taimi ko ení ʻoku fakamatala ki ai ʻa e Tohi Tapú ko e ʻAho Fakamāú.b

20. Ko e hā ʻa Kīhena, pea ko hai ʻoku ʻalu ki aí?

²⁰ ʻOku ʻuhinga ení ko e faʻahinga kotoa ʻo e tangatá ʻa ia kuo nau moʻui ʻi ha taimí ʻe fokotuʻu hake kinautolu? ʻIkai. ʻOku pehē ʻe he Tohi Tapú ko e niʻihi ʻo e kau maté ʻoku nau ʻi “Kihena.” (Mātiu 5:22) ʻOku maʻu ʻa e hingoa Kīhená mei ha lingiʻanga veve naʻe tuʻu ʻi tuʻa Selusalema ʻo e kuonga muʻá. Naʻe tutu ai ʻa e ngaahi ʻangaʻangá mo e vevé. Ko e kau mate ʻa ia naʻe lī ki ai honau ngaahi ʻangaʻangá naʻe vakai ki ai ʻe he kau Siú ʻoku nau taʻetaau mo ha tanu pea mo ha toetuʻu. Ko ia ai, ko Kīhená ko ha fakatātā feʻungamālie ia ʻo e ʻauha taʻengatá. Neongo ʻe ʻi ai ha ngafa ʻo Sīsū ʻi hono fakamāuʻi ʻa e kau moʻuí mo e kau maté, ko Sihova ʻa e Fakamaau aofangatukú. (Ngāue 10:42) Heʻikai ʻaupito te ne fokotuʻu hake ʻa e faʻahinga ko ia ʻokú ne fakamāuʻi ʻoku nau fulikivanu pea ʻikai loto-lelei ke liliú.

21, 22. (a) Ko e hā ʻa e faʻahinga ʻe taha ʻo e toetuʻú? (e) Ko hai ʻa e ʻuluaki tokotaha ke ne maʻu ha toetuʻu ki he moʻui laumālié?

²¹ ʻOku toe lave ʻa e Tohi Tapú ki ha faʻahinga ʻe taha ʻo e toetuʻú, ko e taha ki he moʻui ko ha meʻamoʻui laumālie ʻi hēvani. Ko e fakatātā pē ʻe taha ʻo e faʻahinga ko eni ʻo e toetuʻú ʻoku lēkooti ʻi he Tohi Tapú, ʻa ia ko e toetuʻu ʻa Sīsū Kalaisí.

²² Hili hono tāmateʻi ʻa Sīsū ʻi hono tuʻunga ko ha tangatá, naʻe ʻikai fakaʻatā ʻe Sihova ʻa Hono ʻAlo faitōnungá ke ne nofo ai pē ʻi he faʻitoká. (Sāme 16:10; Ngāue 13:​34, 35) Naʻe fokotuʻu hake ʻe he ʻOtuá ʻa Sīsū, kae ʻikai ʻi he tuʻunga ko ha tangata. ʻOku fakamatala ʻa e ʻapositolo ko Pitá ʻo pehē ko Kalaisí “naʻe tamateʻi ʻi hono angakakano, ka naʻe fakamoʻui hake ʻi hono angalaumalie.” (1 Pita 3:18) Ko ha mana lahi moʻoni eni. Naʻe toe moʻui ʻa Sīsū ko ha tokotaha laumālie māfimafi! (1 Kolinito 15:​3-6) Ko Sīsū ʻa e ʻuluaki tokotaha ke ne maʻu ʻa e faʻahinga toetuʻu lāngilangiʻia ko ení. (Sione 3:13) Ka ʻe ʻikai ko ia ʻa e tokotaha fakamuimuí.

23, 24. Ko hai ʻoku faʻuʻaki ʻa e “fanga sipi toko siʻi” ʻa Sīsuú, pea te nau toko fiha?

²³ ʻI hono ʻiloʻi ʻe vave ʻa ʻene toe foki ki hēvaní, naʻe tala ange ʻe Sīsū ki hono kau muimui faitōnungá te ne “teuteu ha potu” maʻanautolu ʻi ai. (Sione 14:2) Naʻe ʻuhinga ʻa Sīsuú ki he faʻahinga ʻe ʻalu ki hēvani ʻi he tuʻunga ko ʻene “fanga sipi toko siʻi.” (Luke 12:32) Ko e toko fiha ʻe kau ʻi he kiʻi kulupu tokosiʻi ko eni ʻo e kau Kalisitiane faitōnungá? Fakatatau ki he Fakahā 14:​1, ʻoku pehē ai ʻe he ʻapositolo ko Sioné: “Pea u vakai, pea ta naʻe tuʻu ʻa e Lami [Sīsū Kalaisi] ʻi he funga moʻunga ko Saione, pea naʻe ʻiate ia ha toko taha kilu ma toko fa mano ma toko fa afe, ʻa ia kuo tohi ki honau laʻe ʻa hono huafa, mo e huafa oʻene Tamai.”

²⁴ Ko e kau Kalisitiane ko eni ʻe toko 144,000, ʻo kau ai ʻa e kau ʻapositolo faitōnunga ʻa Sīsuú, ʻoku fokotuʻu hake kinautolu ki he moʻui ʻi hēvaní. Ko fē ʻa e taimi ʻoku hoko ai ʻa ʻenau toetuʻú? Naʻe tohi ʻe he ʻapositolo ko Paulá ʻo pehē ʻe hoko ia lolotonga ʻa e taimi ʻo e ʻi ai ʻa Kalaisí. (1 Kolinito 15:23) Hangē ko ia te ke ako ki ai ʻi he Vahe 9, ʻoku tau lolotonga moʻui ʻi he taimi ko iá. Ko ia ai, ko e toenga tokosiʻi ko ia ʻo e toko 144,000 ʻoku nau mate ʻi hotau ʻahó ʻoku fokotuʻu hake kinautolu ʻi he taimi pē ko iá ki he moʻui ʻi hēvaní. (1 Kolinito 15:​51-55) Kae kehe, ko e fuʻu tokolahi kāfakafa ʻo e faʻahinga ʻo e tangatá, ʻoku nau maʻu ʻa e ʻamanaki ki hono fokotuʻu hake ʻi he kahaʻú ki he moʻui ʻi Palataisi ʻi he māmaní.

25. Ko e hā ʻe lāulea ki ai ʻi he vahe hokó?

²⁵ ʻIo, ʻe ikunaʻi moʻoni ʻe Sihova ʻa hotau fili ko e maté pea ʻe mole atu ia ʻo taʻengata! (Aisea 25:8) Neongo ia, te ke fifili nai, ‘Ko e hā ʻe fai ʻi hēvani ʻe he faʻahinga ʻoku fokotuʻu hake ki aí?’ ʻE faʻuʻaki kinautolu ʻa e konga ʻo ha Puleʻanga fakaofo ʻi hēvani. Te tau ako ʻa e meʻa lahi ange fekauʻaki mo e puleʻanga ko iá ʻi he vahe hokó.