‘Ko e ʻAho Eni Ke Ke Fakamanatu’

“Koe aho ni e iate kimoutolu ke fakamanatu: bea te mou tauhi ia o fai ae katoaga kia Jihova.”—ʻEKI. 12:14, PM.

ʻE LAVA KE KE FAKAMATALAʻI?

Ko e hā naʻe fekauʻi ke fai ʻe he kau ʻIsilelí ke teuteu mo kātoangaʻi ʻa e ʻuluaki Pāsová?

Naʻe fakahoko fakakū ʻe Sīsū mo ʻene kau ʻapositoló ʻa e kai ʻo e Pāsova fakamuimuí? Ko e hā e meʻa naʻe hoko ki mui he ʻaho ko iá?

Ko e hā ʻa e ngaahi lēsoni mahuʻinga ʻe lava ke tau ako mei he Pāsová mo e ngaahi fakamatala ʻi he ʻEkisotó?

1, 2. Ko e hā ʻa e fakamanatu ʻoku totonu ke mahuʻingaʻia tefito ai ʻa e kau Kalisitiané, pea ko e hā hono ʻuhingá?

ʻI HE taimi ʻokú ke fanongo ai ki he foʻi lea “fakamanatu,” ko e hā ʻokú ke fakakaukau ki aí? Kapau ʻokú ke mali, te ke fakakaukau nai fekauʻaki mo hono fakamanatu ho ʻaho malí. ʻOku fakakaukau nai ʻa e niʻihi fekauʻaki mo ha ʻaho mahuʻinga ʻi he hisitōliá ʻa ia ʻoku kātoangaʻi, hangē ko e taimi naʻe tauʻatāina ai honau fonuá. Ka ʻokú ke ʻiloʻi ko e hā ʻa e fakamanatu fakafonua kuo kātoangaʻi ʻo laka hake ʻi he taʻu ʻe 3,500?

² Ko e fakamanatu ko iá ko e Pāsová. Ko e kātoanga ia ʻo hono fakatauʻatāinaʻi ʻo e kau ʻIsilelí mei he nofo pōpula ʻi ʻIsipité. ʻOku totonu ke mahuʻinga kiate koe ʻa e Pāsová. Ko e hā hono ʻuhingá? Koeʻuhí he ʻoku kaunga ia ki hoʻo moʻuí ʻi he ngaahi founga mātuʻaki mahuʻinga ʻe niʻihi. Te ke fakakaukau nai: ‘Ko e Pāsová ko ha kātoanga faka-Siu, ka ko ha Kalisitiane au. Ko e hā ʻoku totonu ai ke u mahuʻingaʻia ʻi he Pāsová?’ Ko e talí ʻoku maʻu ia ʻi he ngaahi lea mahuʻinga ko ení: “Ko Kalaisi ko hotau pāsová kuo ʻosi feilaulauʻi.” (1 Kol. 5:7) Ko e hā ʻa e ʻuhinga tofu pē ʻo e meʻá ni? Ke maʻu ʻa e talí, ʻoku fiemaʻu ke tau ʻilo lahi ange fekauʻaki mo e Pāsova faka-Siú pea mo e kaunga ʻo e fakamanatu ko ení ki ha fekau naʻe ʻoange ki he kotoa ʻo e kau Kalisitiané.

KO E HĀ NAʻE KĀTOANGAʻI AI ʻE HE KAU ʻISILELÍ ʻA E PĀSOVÁ?

3, 4. Ko e hā ʻa e meʻa naʻe hoko ki muʻa ʻi he fuofua Pāsová?

³ Ko e kakai ʻe laui teau miliona takatakai he māmaní ʻa ia ʻoku ʻikai ko e kau Siú ʻoku nau ʻiloʻi ʻa e meʻa naʻe hoko ki muʻa ʻi he fuofua Pāsová. Kuo pau pē nai naʻa nau lau ʻa e meʻá ni ʻi he tohi ʻa ʻEkisotó ʻi he Tohi Tapú, fanongo ʻi hono talanoaʻi ʻe ha niʻihi, pe sio ai ʻi ha faiva. ʻOkú ke manatuʻi ʻa e meʻa naʻe hokó?

⁴ ʻI he taimi naʻe nofo pōpula ai ʻa e kau ʻIsilelí ʻi ʻIsipite ʻi he ngaahi taʻu lahi, naʻe fekau atu ʻe Sihova ʻa Mōsese mo ʻĒlone ke kole kia Felo ke fakatauʻatāinaʻi Hono kakaí. Ka naʻe hīkisia ʻa Felo ʻo ʻikai te ne tukuange ʻa e kau ʻIsilelí. Ko ia naʻe tauteaʻi ʻe Sihova ʻa e kau ʻIsipité ʻaki ʻa e mala fakalilifu ʻe hongofulu. Lolotonga ʻa e mala hono hongofulú, naʻe tāmateʻi ai e ʻuluaki foha ʻo e kau ʻIsipité. Hili iá, naʻe fili ʻa Felo ke tukuange ʻa e kau ʻIsilelí.—ʻEki. 1:11; 3:9, 10; 5:1, 2; 11:1, 5.

 5. Ko e hā naʻe fekau ke fai ʻe he kau ʻIsilelí ki muʻa ke fakatauʻatāinaʻi kinautolú? (Sio ki he ʻuluaki fakatātā ʻi he kupú ni.)

⁵ Ka ki muʻa ke fakatauʻatāinaʻi ʻa e kau ʻIsilelí, naʻe pau ke nau muimui ʻi ha ngaahi fakahinohino pau ʻe niʻihi. Naʻe hoko eni ʻi he faʻahitaʻu failau ʻo e taʻu 1513 ki muʻa ʻia Kalaisí, ʻi he māhina ko ʻĀpipi, ʻa ia naʻe ui ki mui ko Nīsaní.a Naʻe tala ange ʻe he ʻOtuá ke nau kamata teuteu ʻi Nīsani 10 ki ha meʻa ʻe hoko ʻi he tō ʻa e laʻaá ʻi Nīsani 14. Ko e hā ke fai ai ʻi he tō ʻa e laʻaá? Koeʻuhí naʻe kamata mo ngata ʻa e ngaahi ʻaho faka-Hepeluú ʻi he tō ʻa e laʻaá. ʻI he aʻu ki Nīsani 14, naʻe pau ki he fāmili taki taha ke nau tāmateʻi ha sipi (pe kosi) tangata pea afuhi ha konga ʻo e totó ʻi he kaumatapā ʻo e falé. (ʻEki. 12:3-7, 22, 23) Naʻe pau ke kai ʻe he fāmilí ha sipi tunu fakataha mo e mā taʻelēvani mo e fanga kiʻi ʻakau fakanamulelei. Naʻe laka atu ʻa e ʻāngelo ʻa e ʻOtuá ʻi he fonuá ʻo tāmateʻi ʻa e ʻuluaki foha ʻo e kau ʻIsipité, ka naʻe ʻikai ke tāmateʻi ʻa e ʻuluaki foha ʻo e kau ʻIsileli talangofuá. Naʻe fakatauʻatāinaʻi leva ʻa e kakai ʻa e ʻOtuá.—ʻEki. 12:8-13, 29-32.

 6. Ko e hā naʻe hokohoko atu ai ʻa e kau ʻIsilelí ke kātoangaʻi ʻa e Pāsová ʻi he taʻu taki taha?

⁶ Naʻe pau ki he kau ʻIsilelí ke nau manatuʻi ʻa e ʻaho naʻe fakatauʻatāinaʻi ai kinautolu ʻe he ʻOtuá mei ʻIsipité. Naʻe tala ange ʻe he ʻOtuá: “Koe aho ni e iate kimoutolu ke fakamanatu: bea te mou tauhi ia o fai ae katoaga kia Jihova i ho mou gaahi toutagata tuku fakaholo: te mou tauhi ia koe katoaga i he tuutuuni taegata.” Hili ʻa e kātoanga Pāsova ʻi Nīsani 14, naʻe toe kātoangaʻi ʻe he kau ʻIsilelí ha kātoanga ʻaho ʻe fitu naʻe ui ko e Kātoanga ʻo e Mā Taʻelēvani. ʻI hono fakatahaʻí, ko e ʻaho ʻe valu ko ení ʻe lava ke toe ui ia ko e Pāsova. (ʻEki. 12:14-17, PM; Luke 22:1; Sione 18:28; 19:14) Ko e Pāsová ko e taha ia ʻi he ngaahi kātoanga, pe “ngaahi fakamanatu,” naʻe fekau ki he kau ʻIsilelí ke nau kātoangaʻi ʻi he taʻu taki taha.—2 Kal. 8:13, The Bible in Living English.

 7. Ko e hā ʻa e kātoanga foʻou naʻe tala ange ʻe Sīsū ke kātoangaʻi ʻe hono kau muimuí?

⁷ Ko Sīsū mo e kau ʻapositoló ko e kau Siu pea naʻa nau talangofua ki he Lao ʻa Mōsesé, ko ia naʻa nau kātoangaʻi ʻa e Pāsová. (Māt. 26:17-19) ʻI heʻenau Pāsova fakataha fakamuimuí, naʻe pehē ʻe Sīsū ko hono kau muimuí te nau kātoangaʻi ha kātoanga foʻou ʻi he taʻu taki taha. Ko e kātoanga ko ení ʻoku ui ko e Kai Efiafi ʻa e ʻEikí. Ka ko e hā ʻa e ʻaho te nau kātoangaʻi aí?

KO E HĀ ʻA E ʻAHO NAʻE FAI AI ʻA E KAI EFIAFI ʻA E ʻEIKÍ?

 8. Ko e hā ʻa e fehuʻi ʻe ʻeke nai ʻe ha niʻihi fekauʻaki mo e Pāsová mo e Kai Efiafi ʻa e ʻEikí?

⁸ Naʻe ʻoange ʻe Sīsū ʻa e ngaahi fakahinohino ki he Kai Efiafi ʻa e ʻEikí ʻi he hili pē hono kātoangaʻi ʻa e Pāsová mo ʻene kau ʻapositoló. Ko ia ko e Kai Efiafi ʻa e ʻEikí naʻe fai ia ʻi he ʻaho tatau mo e Pāsová. Neongo ia, te ke fakatokangaʻi nai ko e kau Siu he ʻaho ní ʻoku ʻikai nai ke nau kātoangaʻi ʻa e Pāsová ʻi he ʻaho tofu pē ko ia ʻoku tau kātoangaʻi ai ʻa e Fakamanatu ʻo e pekia ʻa Kalaisí. Ko e hā ʻoku kehekehe aí? Ko e tuʻutuʻuni ʻa e ʻOtuá ki he kau ʻIsilelí fekauʻaki mo e kamata ʻo e Pāsová ʻoku tokoniʻi ai kitautolu ke tali ʻa e fehuʻi ko ení. Naʻe tala ange ʻe he ʻOtuá ki he kakaí ʻa e taimi ʻi Nīsani 14 ke tāmateʻi ai ʻa e sipi, ʻa ia ko e taimi ia ʻe kamata ai ʻa e Pāsová.—Lau ʻa e ʻEkisoto 12:5, 6.

 9. Fakatatau ki he ʻEkisoto 12:6, ko fē ʻa e taimi ke tāmateʻi ai ʻa e lami Pāsová? (Sio foki ki he puha “Ko e Taimi Fē ʻo e ʻAhó?”)

⁹ Ko e tohi faka-Siu ko e The Pentateuch and Haftorahs ʻoku pehē ai ʻi he ʻEkisoto 12:6 ko e sipí naʻe pau ke tāmateʻi “i he vahaʻa ʻo e ongo efiafi ʻe ua.” ʻOku ngāueʻaki tofu pē ʻe he ngaahi Tohi Tapu ʻe niʻihi ʻa e kupuʻi lea ko iá. Ko e ngaahi Tohi Tapu kehe, kau ai ʻa e Tohi Tapu faka-Siu ko e Tanakh, ʻoku liliu ia ai ko e “mamalu ʻa e poʻulí.” ʻOku toe ʻi ai ʻa e ngaahi Tohi Tapu ʻoku pehē ai ko e “fakapoʻupoʻuli,” “lolotonga ʻa e mamalu ʻa e poʻulí,” pe “ʻi he tō ʻa e laʻaá.” Ko ia naʻe pau ke tāmateʻi ʻa e sipí ʻi he kamataʻanga ʻo Nīsani 14, ʻa ia, ko e hili ʻa e tō ʻa e laʻaá kae kei ʻahoʻaho pē.

10. ʻOku tui ʻa e niʻihi naʻe tāmateʻi fakakū ʻa e lami Pāsová? Ka ko e hā ʻa e fehuʻi kuo pau ke tau ʻeké?

¹⁰ ʻI he ngaahi taimi ki muí, naʻe ongoʻi ʻe he kau Siu ʻe niʻihi ʻe fiemaʻu ʻa e taimi lahi ke tāmateʻi ai ʻa e lami kotoa naʻe ʻomai ki he temipalé. Ko ia naʻa nau tui ko e kupuʻi lea ko e “vahaʻa ʻo e ongo efiafi ʻe uá” ʻi he ʻEkisoto 12:6 (NW) naʻe lave ia ki he ngataʻanga ʻo Nīsani 14, ʻi he vahaʻa ʻo e kamata ke ʻalu hifo ʻa e laʻaá ʻi he hoʻataá mo e taimi naʻe tō ai ʻi he efiafí. Ka ʻo kapau naʻe tāmateʻi ʻa e lamí ʻi he ngataʻanga ʻo Nīsani 14, ko fē ʻa e taimi ʻe kai ai ʻe he kau ʻIsilelí ʻa e kai ʻo e Pāsová? Fakatatau kia Palōfesa Jonathan Klawans, ʻe kai ia ʻi Nīsani 15. Ka ʻokú ne fakahaaʻi naʻe ʻikai tala mai fakahangatonu eni ia ʻi he tohi ʻa ʻEkisoto ʻi he Tohi Tapú. ʻOkú ne toe pehē ko e ngaahi tohi ʻa e kau lāpaí ʻoku ʻikai lave ia ki he founga naʻe kātoangaʻi ai ʻa e Pāsová ki muʻa ʻi he taʻu 70, ʻa ia ko e taʻu ia naʻe fakaʻauha ai ʻa e temipalé.

11. (a) Ko e hā naʻe hoko kia Sīsū ʻi he ʻaho ʻo e Pāsová he taʻu 33? (e) Ko e hā naʻe ui ai ʻa Nīsani 15 ʻi he taʻu 33 ko ha Sāpate “lahi”? (Sio ki he fakamatala ʻi laló.)

¹¹ Ko e hā leva ʻa e ʻaho naʻe kātoangaʻi ai ʻa e kai Pāsová ʻi he taʻu 33? Sai, ʻi he ʻaho ki muʻa ʻi he Pāsová, ʻi Nīsani 13, naʻe tala ange ʻe Sīsū kia Pita mo Sione: “Mo ō ʻo teuteu ʻa e Pāsová maʻatautolu ke tau kai.” (Luke 22:7, 8) ʻI Nīsani 14 leva, ʻa ia ko e efiafi Tuʻapulelulu hili ʻa e tō ʻa e laʻaá, naʻe kai ʻe Sīsū mo ʻene kau ʻapositoló ʻa e kai ʻo e Pāsová. Hili ʻa e kai ko iá, naʻá ne ʻoange ai kia kinautolu ʻa e ngaahi fakahinohino fekauʻaki mo e Kai Efiafi ʻa e ʻEikí. (Luke 22:14, 15) Ko e pō ko iá naʻe puke ai ia pea fakamāuʻí. Naʻe tautau ʻa Sīsū ʻi ha ʻakau fakamamahi ofi ki he hoʻatā ʻo Nīsani 14, pea ko e hoʻatā ko iá naʻá ne pekia ai. (Sione 19:14) Ko ia “ko Kalaisi ko hotau pāsová” naʻá ne feilaulauʻi ʻene moʻuí ʻi he ʻaho tatau pē naʻe tāmateʻi ai ʻa e lami Pāsová. (Māt. 26:2; 1 Kol. 5:7; 11:23) Naʻe tanu ʻa Sīsū ki muʻa ʻi he kamata ʻa e ʻaho hono hokó, ʻa Nīsani 15.b—Liv. 23:5-7; Luke 23:54.

KO HA FAKAMANATU ʻE LAVA KE KE AKO MEI AI

12, 13. Naʻe anga-fēfē hoko ʻa e fānau ʻIsilelí ko ha konga ʻo e kātoanga Pāsová?

¹² ʻI he taimi ʻo e ʻuluaki Pāsova ʻi ʻIsipité, naʻe tuʻutuʻuni ai ʻe he ʻOtuá ki he kau ʻIsilelí ke nau kātoangaʻi ʻa e meʻa ko ení ʻi he taʻu kotoa pē “ʻo taʻengata.” ʻI he taʻu taki taha ʻi he Pāsová, ʻe ʻeke ai ʻe he fānaú ki heʻenau ngaahi mātuʻá ʻa e ʻuhinga ʻoku nau kātoangaʻi ai iá. (Lau ʻa e ʻEkisoto 12:24-27; Teu. 6:20-23) Ko e Pāsová ʻe hoko ko ha “fakamanatu” koeʻuhí naʻa mo e fānaú ʻe lava ke nau ako ha ngaahi lēsoni mei ai.—ʻEki. 12:14, PM.

¹³ Mei he toʻutangata ki he toʻutangata, naʻe akoʻi ʻe he kau ʻIsilelí ki heʻenau fānaú ʻa e ngaahi lēsoni mahuʻinga fekauʻaki mo e Pāsová. Ko e taha ʻe lava ke maluʻi ʻe Sihova ʻene kau lotú. Naʻe ako ʻe he fānaú ko Sihová ko e ʻOtua moʻoni mo moʻui ʻa ia ʻokú ne tokanga ki heʻene kakaí pea maluʻi kinautolu. Naʻá ne fakamoʻoniʻi eni ʻi he taimi naʻá ne fakahaofi ai ʻa e ʻuluaki foha ʻo e kau ʻIsilelí lolotonga ʻa e mala hono hongofulu ki ʻIsipité.

14. Ko e hā ʻa e lēsoni mei he Pāsová ʻe lava ke akoʻi ʻe he ngaahi mātuʻa Kalisitiané ki heʻenau fānaú?

¹⁴ ʻI he tuʻunga ko e ngaahi mātuʻa Kalisitiané, ʻoku ʻikai fekauʻi ia ke mou fakamatalaʻi ki hoʻomou fānaú ʻa e talanoa fekauʻaki mo e Pāsová he taʻu kotoa pē. Ka ʻoku mou akoʻi kia kinautolu ʻa e lēsoni ko eni mei he Pāsová, ko e ʻOtuá ʻokú ne maluʻi ʻene kakaí? ʻOku hā mahino ki hoʻo fānaú ʻokú ke tui moʻoni ʻoku kei maluʻi pē kitautolu ʻe he ʻOtuá he ʻahó ni? (Saame 27:11; ʻAi. 12:2) ʻOkú ke akoʻi kia kinautolu ʻa e lēsoni ko ení lolotonga ha fetalanoaʻaki fakafiefia kae ʻikai ko ha malanga? Ko e lēsoni ko ení te ne tokoniʻi ho fāmilí ke nau toe falala ange kia Sihova.

15, 16. Ko e hā ʻe lava ke tau ako fekauʻaki mo Sihova mei he Pāsová mo e ngaahi fakamatala ʻi he ʻEkisotó?

¹⁵ Ko ha lēsoni mahuʻinga ʻe taha ʻe lava ke tau ako mei he Pāsová ʻoku malava ʻe Sihova ʻo ʻikai ngata pē hono maluʻi ʻene kakaí kae toe fakahaofi kinautolu. Sioloto atu ki he tuʻunga naʻe hoko ki he kau ʻIsilelí ʻi he taimi naʻe fakahaofi ai kinautolu mei ʻIsipité. Naʻe tataki kinautolu ki he Tahi Kulokulá ʻe ha pou ʻao mo ha pou afi. Naʻa nau sio leva ki hono fakamavaeuaʻi ʻe Sihova ʻa e vaí ʻo tuʻu fakakauʻā. Hokó, naʻa nau lue atu ʻi he kelekele mōmoá. ʻI heʻenau hao atu ki he tafaʻaki ʻe tahá, naʻa nau sio ki hono fakaʻauha ʻe he vaí ʻa e kau tau ʻIsipité. Naʻe fakahīkihikiʻi ʻe he kau ʻIsilelí ʻa Sihova ʻi hono fakahaofi kinautolú pea nau hiva: “Te u hiva kia Sihova . . . Ko e hoosi mo hono angi kuo ne laku ki tahi. Ko hoku malohinga mo ʻeku taʻanga ʻa IAA; pea kuo ne hoko ko hoku fakamoʻuiʻanga.”—ʻEki. 13:14, 21, 22; 15:1, 2; Saame 136:11-15.

¹⁶ Kapau ʻoku ʻi ai haʻo fānau, ʻokú ke tokoniʻi kinautolu ke sio kia Sihova ko ha ʻOtua mālohi ʻa ia te ne fakahaofi ʻene kakaí? ʻI he taimi ʻokú ke fai ai ha ngaahi fili pe talanoa ki hoʻo fānaú, ʻoku nau sio ʻokú ke falala kia Sihova ke fakahaofi koe mo ho fāmilí? Mahalo ʻe lava ke mou lāulea fakataha lolotonga ʻa e lotu fakafāmilí ki he founga naʻe fakahaofi ai ʻe Sihova ʻene kakaí ʻi he ngaahi fakamatala ʻoku maʻu ʻi he ʻEkisoto vahe 12-15 pehē ki he Ngāue 7:30-36 pe ko e Taniela 3:16-18, 26-28. Ko kitautolu kotoa, ʻa e iiki mo e taʻumotuʻa, ʻoku totonu ke tau fakapapauʻi hangē pē ko hono fakahaofi ʻe Sihova ʻene kakaí ʻi he kuohilí, te ne fakahaofi kitautolu ʻi he kahaʻú.—Lau ʻa e 1 Tesalonaika 1:9, 10.

KE TAU MANATUʻI

17, 18. Ko e hā ʻoku mahuʻinga mamaʻo ange ai ʻa e taʻataʻa ʻo Sīsuú ʻi he toto ʻo e lami Pāsová?

¹⁷ ʻOku ʻikai kātoangaʻi ʻe he kau Kalisitiane moʻoní ʻa e Pāsová. Ko e fakamanatu ko iá ko e konga ia ʻo e Lao ʻa Mōsesé, pea ʻoku ʻikai ke tau muimui ki he Lao ko iá. (Loma 10:4; Kol. 2:13-16) ʻI hono kehé, ʻoku tau tauhi ha fakamanatu ʻe taha, ko e pekia ʻa e ʻAlo ʻo e ʻOtuá. Ka ʻe lava ke tau ako ʻa e meʻa lahi mei he kātoanga Pāsova naʻe kamata ʻi ʻIsipité.

¹⁸ Ko e toto ʻo e lami naʻe afuhi ʻe he kau ʻIsilelí ʻi honau ngaahi kaumatapaá naʻe fakahaofi ai ʻa e moʻui honau ʻuluaki fohá. ʻI he ʻahó ni, ʻoku ʻikai ke tau ʻoatu ʻa e toto ʻo e fanga monumanú ki he ʻOtuá ʻi he Pāsová pe ʻi ha faʻahinga taimi pē. Ka ko e toto ʻo e feilaulau ia ʻe taha ʻoku mahuʻinga mamaʻo ange ia. Ko e kakai ʻe fakahaofi aí ʻe lava ke nau moʻui taʻengata. Naʻe fakamatalaʻi ʻe he ʻapositolo ko Paulá ko e taʻataʻa ʻo Sīsuú, ʻa e “taʻataʻa naʻe afuhí,” naʻe ʻai ai ke malava ki he kau Kalisitiane paní ke nau moʻui taʻengata ʻi hēvani. Ko kinautolu ʻa e “ʻuluaki fānaú ʻa ia kuo tohi ʻi hēvaní.” (Hep. 12:23, 24) Ko e taʻataʻa ʻo Sīsuú ʻokú ne toe ʻai ke malava ki he fanga sipi kehé ke nau maʻu ʻa e ʻamanaki ʻo e moʻui taʻengata ʻi he māmaní. ʻOku totonu ke tau fakamanatu maʻu pē kia kitautolu kotoa ʻa e talaʻofa: “Ko e meʻa ʻiate ia ʻoku tau maʻu ai ʻa e fakatauʻatāina ʻi he huhuʻí fakafou ʻi he taʻataʻa ʻo e tokotaha ko iá, ʻio, ko e fakamolemole ʻo ʻetau ngaahi faihalá, ʻo fakatatau ki he hulu fau ʻo e ʻofa maʻataʻatā ʻa e ʻOtuá.”—ʻEf. 1:7.

19. ʻE lava fēfē ke fakaivimālohiʻi ʻetau falala-pau ki he kikite Fakatohitapú ʻi he founga naʻe pekia ai ʻa Sīsuú?

¹⁹ ʻI he taimi naʻe tāmateʻi ai ʻa e lamí ki he kai ʻo e Pāsová, naʻe pau ki he kau ʻIsilelí ke ʻoua naʻa fesiʻi hano hui. (ʻEki. 12:46; Nōm. 9:11, 12) Kae fēfē ʻa e hui ʻo e ‘Lami ʻa e ʻOtuá,’ ʻa Sīsū, ʻa ia naʻá ne foaki ʻene moʻuí ko ha huhuʻí? (Sione 1:29) Naʻe tautau ia ʻi ha ʻakau fakamamahi fakataha mo ha ongo faihia ʻi hono ongo tafaʻakí. Naʻe kole ʻe he kau Siú kia Pailato ke fesiʻi ʻa e hui ʻo Sīsū mo e ongo faihiá koeʻuhí ke vave ange ʻenau maté. ʻI he foungá ni, ʻe lava ke tuku hifo ai honau sinó mei he ʻakau fakamamahí ki muʻa ʻi Nīsani 15, ʻa e Sāpate lōuá. Naʻe fesiʻi ʻe he kau sōtiá ʻa e vaʻe ʻo e ongo tangata faihiá, “ka ʻi he hoko mai kia Sīsuú, ʻi heʻenau sio ne ʻosi pekia iá, naʻe ʻikai te nau fesiʻi hono ongo vaʻé.” (Sione 19:31-34) Hangē pē ko e hui ʻo e lami Pāsová, naʻe ʻikai fesiʻi ʻa e hui ʻo Sīsuú. Ko ia ko e lami Pāsová naʻe hangē ia “ha ʻata” ʻo e feilaulau ʻa Sīsū ʻi Nīsani 14 ʻo e taʻu 33. (Hep. 10:1) ʻOku fakahoko heni ʻa e ngaahi lea ʻi he Saame 34:20. ʻOku totonu ke fakaivimālohiʻi heni ʻetau falala-pau ki he kikite Fakatohitapú.

20. Ko e hā ha faikehekehe ʻe taha ʻi he Pāsová mo e Kai Efiafi ʻa e ʻEikí?

²⁰ Neongo ia, ʻoku ʻi ai ʻa e ngaahi faikehekehe ʻi he founga naʻe kātoangaʻi ai ʻe he kau Siú ʻa e Pāsová mo e founga naʻe tala ʻe Sīsū ki heʻene kau ākongá ke fakahoko ai ʻa e Kai Efiafi ʻa e ʻEikí. Ko e fakatātaá, naʻe kai ʻe he kau ʻIsilelí ʻa e kakanoʻi lamí kae ʻikai inu hono totó. ʻOku kehe ia mei he meʻa naʻe tala ʻe Sīsū ki heʻene kau ākongá ke nau faí. Naʻá ne pehē ko e faʻahinga te nau pule “ʻi he Puleʻanga ʻo e ʻOtuá” ʻoku totonu ke nau kai ʻa e maá mo inu ʻa e uainé, ʻa ia ʻokú ne fakafofongaʻi hono kakanó mo hono totó. Te tau toe ako lahi ange fekauʻaki mo e Fakamanatu ʻo e pekia ʻa Kalaisí ʻi he kupu hokó.—Mk. 14:22-25.

21. Ko e hā ʻoku totonu ai ke tau ʻilo fekauʻaki mo e Pāsová?

²¹ Ko e Pāsová naʻe hoko ia ko ha meʻa mahuʻinga ʻi he hisitōlia ʻo e kakai ʻa e ʻOtuá, pea ko kitautolu taki taha ʻe lava ke tau ako ha ngaahi lēsoni lahi mei ai. Ko ia neongo ko e Pāsová ko ha “fakamanatu” ia ki he kau Siú, ko kitautolu ʻi he tuʻunga ko e kau Kalisitiané ʻoku totonu ke tau ʻilo fekauʻaki mo ia pea ako hono ngaahi lēsoni mahuʻingá, koeʻuhí “ko e potu Folofola kotoa pē kuo fakamānavaʻi ia ʻe he ʻOtuá.”—2 Tīm. 3:16.

[Fakamatala ʻi lalo]

[Fakatātā ʻi he peesi 17]

[Fakatātā ʻi he peesi 19]

KO E TAIMI FĒ ʻO E ʻAHÓ?

Naʻe tohi ʻe he faiongoongo Siu ko Marcus Kalisch (1828-1885): “Ko e fakakaukau tatau naʻe fakahaaʻi mahino ange ʻe Ebn Ezra [ko e lāpai Sipeini ʻiloa, 1092-1167]: ‘ʻOku tau maʻu ʻa e efiafi ʻe ua; ko e ʻuluakí, ko e tō ʻa e laʻaá . . . pea ko e uá, ko e ngata ʻa e māmá ʻa ia ʻoku tapua mai ʻi he ngaahi ʻaó; pea ko e foʻi vahaʻa ko iá ko e houa ʻe taha mo e miniti ʻe 20 nai;’ pea ko e fakamatala ko ení, ʻa ia ʻoku hā ko e fakaʻuhinga totonu tahá ia ʻa ia ʻoku toe fai ʻe he kau Kalaité mo e kau Samēliá, pea ohi ʻe he niʻihi tokolahi.” Ko e fakamatala ko eni naʻe tāmateʻi ʻa e lamí ʻi he kamataʻanga ʻo Nīsani 14 ʻoku faitatau ia mo e tuʻutuʻuni naʻe maʻu ʻe he kau ʻIsilelí ʻa ia ʻoku lēkooti ʻi he Teutalōnome 16:6: “Te ke tamateʻi ai ʻa e pasova, efiafi, ʻi he ʻalu hifo ʻa e laʻa, ʻi he faʻahitaʻu naʻa ke haʻu ai mei Isipite.”—ʻEki. 30:8; Nōm. 9:3-5, 11.

[Fakatātā ʻi he peesi 20]

Ko e hā ʻa e ngaahi lēsoni mei he Pāsová ʻe lava ke ke akoʻi ki hoʻo fānaú? (Sio ki he palakalafi 14)