Poupouʻi Mateaki ʻa e Fanga Tokoua ʻo Kalaisí

“Ko hoʻomou fai ia ki ha taha ʻo e kau siʻi taha ʻo e faʻahingá ni ʻa ia ko hoku fanga tokouá, ko hoʻomou fai ia kiate aú.”—MĀT. 25:40.

ʻE FĒFĒ HAʻO TALI?

Kuo anga-fēfē hono tokoniʻi kitautolu ʻe Sihova ke mahinoʻi ʻa e pealapeli fekauʻaki mo e fanga sipí mo e fanga kosí?

Ko hai ʻoku fekauʻi ke malangá?

Ko e hā ʻoku mahuʻinga ai ke mateaki he taimí ni ki he fanga tokoua ʻo Kalaisí?

1, 2. (a) Ko e hā ʻa e ngaahi pealapeli naʻe tala ange ʻe Sīsū ki hono ngaahi kaumeʻa ofí? (Sio ki he ʻuluaki fakatātā ʻi he kupú ni.) (e) Ko e hā ʻoku fiemaʻu ke tau ʻilo fekauʻaki mo e pealapeli ʻo e fanga sipí mo e fanga kosí?

NAʻE talanoa ʻe Sīsū ki hono kaumeʻa ofi ko Pita, ʻAnitelū, Sēmisi mo Sioné ha meʻa mātuʻaki mahuʻinga. Hili hono tala ange kia kinautolu ʻa e pealapeli fekauʻaki mo e tamaioʻeiki anga-tonu mo potó, kau tāupoʻou ʻe toko hongofulú mo e talēnití, naʻe tala ange ʻe Sīsū ki hono ngaahi kaumeʻá ha pealapeli ʻe taha. Naʻá ne lea fekauʻaki mo ha taimi ʻe fakamāuʻi ai ʻe he “Foha ʻo e tangatá” ʻa e “ngaahi puleʻanga kotoa pē.” Naʻá ne pehē ko e “Foha ʻo e tangatá” te ne vaheʻi ʻa e kakaí ki he kulupu ʻe ua, ko e taha naʻe fakamatalaʻi ko e fanga sipi pea ko e taha ko e fanga kosi. Pea naʻá ne fakamatalaʻi ʻa e kulupu mahuʻinga hono tolu, ko e “fanga tokoua” ʻo e Tuʻí.—Lau ʻa e Mātiu 25:31-46.

² Hangē ko e kau ʻapositoló, ko e kau sevāniti ʻa Sihova ʻi hotau taimí kuo nau toe mahuʻingaʻia ʻi he pealapeli ko ení koeʻuhí he ʻoku kaunga ki ai ʻa e moʻui ʻa e kakaí. Naʻe pehē ʻe Sīsū ʻe maʻu ʻe he niʻihi ʻa e moʻui taʻengatá kae fakaʻauha ʻa e niʻihi. Ko e ʻuhinga ia ʻoku mātuʻaki mahuʻinga ai ke tau ʻiloʻi ʻa e ʻuhinga ʻo e pealapelí mo e meʻa kuo pau ke tau fai ke maʻu ai ʻa e moʻui taʻengatá. Ko ia ʻi he kupu ko ení, te tau tali ai ʻa e ngaahi fehuʻi ko ení: “Kuo anga-fēfē hono tokoniʻi kitautolu ʻe Sihova ke mahinoʻi ʻa e pealapeli ko ení? ʻOku anga-fēfē ʻetau ʻiloʻi ʻoku fakamamafaʻi ʻe he pealapelí ʻa e ngāue fakamalangá? Ko hai ʻoku totonu ke malangá? Pea ko e hā ʻoku mahuʻinga ai ki he kakaí ke nau mateaki he taimí ni ki he “Tuʻí” mo hono “fanga tokouá”?

KUO ANGA-FĒFĒ HONO TOKONIʻI KITAUTOLU ʻE SIHOVA KE MAHINOʻI ʻA E PEALAPELÍ?

3, 4. (a) Ko e hā ʻoku fiemaʻu ke tau ʻiloʻi kae mahinoʻi ʻa e pealapeli ko ení? (e) ʻI he 1881, naʻe anga-fēfē hono fakamatalaʻi ʻi he Watch Tower ʻa e pealapeli ko ení?

³ Ke mahinoʻi ʻa e ʻuhinga ʻo e pealapeli fekauʻaki mo e fanga sipí mo e fanga kosí, ʻoku fiemaʻu ke tau ʻiloʻi (1) ko hai ʻa e “Foha ʻo e tangatá,” pe ko e “Tuʻí,” ko hai ʻa e fanga sipí mo e fanga kosí, pea ko hai ʻa e ‘fanga tokoua’ ʻo e Tuʻí? (2) ko fē ʻa e taimi ʻe fakamavaheʻi, pe fakamāuʻi ai ʻe he “Foha ʻo e tangatá” ʻa e fanga sipí mo e fanga kosí? pea (3) ko e hā ʻoku ui ai ʻa e niʻihi ko e fanga sipi pea ui ʻa e niʻihi ko e fanga kosí?

⁴ ʻI he 1881, naʻe pehē ʻi he Watch Tower ko e “Foha ʻo e tangatá,” pe ko e “Tuʻí,” ko Sīsū. Pea naʻe fakamatalaʻi ai ko e ‘fanga tokoua’ ʻo e Tuʻí naʻe ʻikai ko e faʻahinga pē ʻe pule ʻi hēvani fakataha mo Sīsuú kae toe pehē foki ki he kakai kotoa te nau moʻui ʻi he māmaní ʻi he taimi te nau hoko ai ʻo haohaoá. Naʻe pehē ʻe he Watch Tower ʻe fakamavaheʻi ʻa e kakaí lolotonga ʻa e Pule Taʻu ʻe Afe ʻa Kalaisí pea ko e faʻahinga naʻa nau faʻifaʻitaki ki he ʻofa ʻa e ʻOtuá ʻi he meʻa kotoa naʻa nau faí ʻe ui kinautolu ko e fanga sipi.

 5. ʻI he 1923, naʻe anga-fēfē hono mahinoʻi ʻe he kakai ʻa e ʻOtuá ʻa e pealapelí?

⁵ Ki mui ai, naʻe tokoniʻi ʻe Sihova hono kakaí ke nau mahinoʻi māʻalaʻala ange ʻa e pealapeli ko ení. ʻI he 1923, naʻe pehē ʻi he Watch Tower ʻo ʻOkatopa 15, ko e “Foha ʻo e tangatá” ko Sīsū. Ka naʻe ngāueʻaki ai ʻa e ngaahi veesi Tohi Tapu ke fakamatalaʻi ko e ‘fanga tokoua’ ʻi he pealapelí ʻoku ʻuhinga pē ia ki he faʻahinga te nau pule fakataha mo Sīsuú pea te nau ʻi hēvani kotoa lolotonga ʻa e Pule Taʻu ʻe Afé. Naʻe toe pehē ai ko e fanga sipí ʻoku ʻuhinga ia ki he faʻahinga te nau moʻui ʻi he māmaní ʻi he malumalu ʻo e pule ʻa Sīsū mo hono fanga tokouá. Pea koeʻuhí ʻoku pehē ʻe he pealapelí ko e faʻahinga ko ení te nau tokoni ki he fanga tokoua ʻo e Tuʻí, ko e fakamavaheʻí, pe fakamāuʻí, ʻe pau ke hoko ia lolotonga ʻa e kei ʻi he māmaní ʻa e fanga tokoua pani ko eni ʻo Sīsuú, ki muʻa ke kamata ʻa e Pule Taʻu ʻe Afé. Naʻe toe pehē ʻi he kupú ko e fanga sipí ko e faʻahinga ia ʻoku tui kia Sīsū mo tui ko e Puleʻangá te ne ʻomai ha moʻui lelei ange.

 6. ʻI he 1995, naʻe anga-fēfē liliu ʻetau mahinoʻi ʻa e pealapelí?

⁶ ʻI he laui taʻu naʻa tau fakakaukau naʻe fakamāuʻi ʻa e kakaí fakafou ʻi he ngāue fakamalangá ʻi he taimi ko eni ʻo e ngataʻangá. Kapau naʻa nau tali ʻetau pōpoakí, ko e fanga sipi kinautolu, pea kapau naʻa nau talitekeʻi ʻa e pōpoakí, ko e fanga kosi kinautolu. Ka ʻi he 1995 naʻe liliu ʻetau mahinoʻi ʻa e pealapelí. Naʻe fakahoa ʻe he Watchtower ʻa e Mātiu 24:29-31 (lau) mo e Mātiu 25:31, 32 (lau), pea fakamatalaʻi ʻe fakamāuʻi ʻe Sīsū ʻa e kakaí lolotonga ʻa e fuʻu mamahi lahí ʻi he taimi ʻe “aʻu mai ʻa e Foha ʻo e tangatá ʻi hono lāngilangí.”a

 7. ʻOku ʻuhinga ki he hā ʻa e pealapelí?

⁷ ʻI he ʻahó ni, ʻoku tau mahinoʻi māʻalaʻala ʻa e pealapeli fekauʻaki mo e fanga sipí mo e fanga kosí. ʻOku tau ʻiloʻi ko e “Foha ʻo e tangatá,” pe ko e “Tuʻí,” ko Sīsū. Ko e ‘fanga tokoua’ ʻo e Tuʻí ko e faʻahinga ʻoku pani ʻaki ʻa e laumālie māʻoniʻoní pea te nau pule fakataha ʻi hēvani mo Sīsū. (Loma 8:16, 17) Ko e “fanga sipí” mo e “fanga kosí” ko e kakai mei he ngaahi puleʻanga kotoa pē. ʻE fakamāuʻi kinautolu ʻi he ofi ki he ngataʻanga ʻo e fuʻu mamahi lahí ʻa ia ʻe vavé ni ke kamatá. Pea ʻoku tau ʻiloʻi ʻe fakamāuʻi ʻe Sīsū ʻa e kakaí ʻo fakatatau ki he founga ʻenau fakafeangai ki he kau pani ʻa ia ʻoku nau kei ʻi he māmaní. ʻOku tau houngaʻia ʻaupito ʻi hono tokoniʻi kitautolu ʻe Sihova ʻi he faai mai ʻa e ngaahi taʻú ke tau mahinoʻi ʻa e pealapeli ko ení mo e ngaahi pealapeli kehe ʻi he Mātiu vahe 24 mo e 25!

ʻOKU AKOʻI MAI ʻE HE PEALAPELÍ ʻA E MĀTUʻAKI MAHUʻINGA ʻA E NGĀUE FAKAMALANGÁ

8, 9. Ko e hā naʻe ui ai ʻe Sīsū ʻa e fanga sipí ʻoku nau “māʻoniʻoni”?

⁸ Naʻe ʻikai ke ngāueʻaki ʻe Sīsū ʻa e foʻi lea ko e “malanga” pe “ngāue fakamalanga” ʻi he pealapeli fekauʻaki mo e fanga sipí mo e fanga kosí. Ko ia ʻoku anga-fēfē ʻetau ʻiloʻi ʻoku akoʻi mai ʻe he pealapelí ʻa e mātuʻaki mahuʻinga ʻa e ngāue fakamalangá?

⁹ Ke maʻu ʻa e talí, ʻoku tomuʻa fiemaʻu ke tau manatuʻi naʻe akoʻi ʻe Sīsū ha lēsoni fakafou ʻi he pealapelí. Naʻe ʻikai ke ne talanoa fekauʻaki mo ha fanga sipi mo e fanga kosi moʻoni. Ko ia ʻi he founga tatau, naʻe ʻikai ke ne ʻuhingá ko e tokotaha kotoa pē ʻe fakamāuʻi ko ha sipi ʻoku totonu ke ne ʻoange ha meʻakai mo ha vala ki he kau paní, tokangaʻi kinautolu ʻi heʻenau puké, pe ʻaʻahi kia kinautolu ʻi he pilīsoné. Ka, naʻe fakamatalaʻi ʻe Sīsū ʻa e fanga sipí ʻoku nau “māʻoniʻoni” koeʻuhí ʻoku nau vakai ki he kau paní ko hono fanga tokoua pea koeʻuhí ʻoku nau mateaki ki he kau paní lolotonga ʻa e ngaahi ʻaho fakaʻosi faingataʻa ko ení.—Māt. 10:40-42; 25:40, 46; 2 Tīm. 3:1-5.

10. ʻE lava fēfē ke tokoni ʻa e fanga sipí ki he fanga tokoua ʻo Kalaisí?

¹⁰ ʻI he taimi naʻe lave ai ʻa Sīsū ki he pealapeli fekauʻaki mo e fanga sipí mo e fanga kosí, naʻá ne toki talanoa fekauʻaki mo e meʻa ʻe hoko ʻi he taimi ʻo e ngataʻangá. (Māt. 24:3) Ko e fakatātaá, naʻá ne pehē: “Ko e ongoongo lelei ko ʻeni ʻo e Puleʻangá ʻe malangaʻi ia ʻi he kotoa ʻo e māmani kuo nofoʻí.” (Māt. 24:14) Pea ki muʻa pē ke ne lave fekauʻaki mo e fanga sipí mo e fanga kosí, naʻá ne talanoa ki he pealapeli fekauʻaki mo e talēnití. Naʻe talanoa ʻa Sīsū ki he pealapeli ko ení ke akoʻi ki he kau paní ʻa e pau ke nau ngāue mālohi ʻi he ngāue fakamalangá. Ka ko e tokosiʻi pē ʻo kinautolu naʻe toe ʻi he māmaní, pea lahi fau ʻa e ngāue ke faí! Naʻe tala ki he kau paní ke nau malanga ki he “ngaahi puleʻanga kotoa pē” ki muʻa ʻi he ngataʻangá. Hangē ko ia ʻoku tau ako ʻi he pealapeli fekauʻaki mo e fanga sipí mo e fanga kosí, ko e “fanga sipí” ʻoku nau tokoni ki he fanga tokoua ʻo Sīsuú. Pea ko e taha ʻo e ngaahi founga lelei taha ʻe lava ke nau fai ai ení ko e tokoni ki he fanga tokoua ʻo Sīsuú ʻi he ngāue fakamalangá. Ka ʻoku feʻunga pē ke fai ha tokoni fakapaʻanga ki he ngāué pe fakalototoʻaʻi kinautolu ke fai ʻa e ngāue fakamalangá?

KO HAI ʻOKU TOTONU KE MALANGÁ?

11. Ko e hā ʻa e fehuʻi ʻe ʻeke nai ʻe he niʻihi, pea ko e hā hono ʻuhingá?

¹¹ ʻI he ʻahó ni, ʻoku ʻi ai ʻa e kau ākonga ʻa Sīsū ʻe toko valu miliona, pea ko e tokolahi taha ʻo kinautolú ʻoku ʻikai ko e kau pani. Naʻe ʻikai ke ʻoange ʻe Sīsū kia kinautolu ʻa e talēnití. Naʻá ne ʻoange ʻa e talēnití ki hono fanga tokoua paní. (Māt. 25:14-18) Ko ia ʻe ʻeke nai ʻe he niʻihi, ‘Kapau naʻe ʻikai ke ʻoange ʻe Sīsū kia kinautolu ʻa e talēnití, ʻoku fiemaʻu moʻoni ke nau malanga?’ ʻIo. Tau sio angé ki hono ʻuhingá.

12. Ko e hā ʻoku tau ako mei he ngaahi lea ʻa Sīsū ʻi he Mātiu 28:19, 20?

¹² Naʻe fekauʻi ʻe Sīsū ʻa e kotoa ʻene kau ākongá ke malanga. Hili ʻa e toetuʻu ʻa Sīsuú, naʻá ne tala ange ki hono kau muimuí ke ‘ngaohi ākonga’ pea akoʻi kia kinautolu ʻa e “ngaahi meʻa kotoa pē” naʻá ne fekaú. Ko ia ko e kau ākonga ko ení naʻe pau ke nau toe talangofua ki he fekau ʻa Sīsū ke malangá. (Lau ʻa e Mātiu 28:19, 20.) ʻOku hā mahino ko e kotoa ʻo kitautolú kuo pau ke tau malanga, ʻo tatau ai pē pe ʻoku tau ʻamanaki ke moʻui ʻi hēvani pe ʻi he māmaní.—Ngā. 10:42.

13. Ko e hā ʻoku tau ako mei he vīsone naʻe sio ki ai ʻa Sioné?

¹³ Mei he tohi ʻa Fakahaá, ʻoku tau ako ai ko e ngāue fakamalangá ʻe fai ia ʻe he kau paní mo e niʻihi kehé. Naʻe ʻoange ʻe Sīsū ki he ʻapositolo ko Sioné ha vīsone fekauʻaki mo e “taʻahine malí” ʻa ia ʻokú ne fakaafeʻi ʻa e kakaí ke haʻu ʻo inu ʻa e vai ʻo e moʻuí. Ko e taʻahine malí ʻoku ʻuhinga ia ki he kau pani ʻe toko 144,000 te nau pule fakataha mo Sīsū ʻi hēvaní. (Fkh. 14:1, 3; 22:17) Ko e vaí ʻoku ʻuhinga ia ki he feilaulau huhuʻi ʻa Sīsuú ʻa ia te ne tokoniʻi ʻa e kakaí ke maʻu ʻa e moʻui ʻo ʻikai ha angahala mo e mate. (Māt. 20:28; Sione 3:16; 1 Sio. 4:9, 10) ʻOku akoʻi faivelenga ʻe he kau paní ʻa e kakaí fekauʻaki mo e huhuʻí mo e founga ʻe lava ke nau maʻu ʻaonga mei aí. (1 Kol. 1:23) Ka ʻoku lave ʻa e vīsoné ki ha toe kulupu ʻo e kakai ʻa ia ʻoku ʻikai ke pani ka ʻoku nau maʻu ʻa e ʻamanaki ʻo e moʻui ʻi he māmaní. Ko kinautolu foki ʻoku fekauʻi ke nau tala ki he kakaí: “Haʻu!” Pea ʻoku nau talangofua ki he fekau ko iá ʻaki hono akoʻi ʻa e ongoongo leleí ki he niʻihi kehé. Ko ia ʻoku fakahaaʻi ʻi he vīsone ko ení ko e faʻahinga kotoa ʻoku nau tali ʻa e pōpoaki ʻo e ongoongo leleí kuo pau ke nau malanga ki he niʻihi kehé.

14. ʻOku anga-fēfē ʻetau talangofua ki he “lao ʻa e Kalaisí”?

¹⁴ Ko e faʻahinga kotoa ʻoku talangofua ki he “lao ʻa e Kalaisí” kuo pau ke nau malanga. (Kalētia 6:2) ʻOku ʻamanekina ʻe Sihova ʻa e faʻahinga kotoa ʻoku lotu kiate iá ke nau talangofua ki he ngaahi lao tatau. ʻI he kuohilí, naʻá ne ʻamanekina ʻa e kau ʻIsilelí mo e kau muli naʻe nofo mo kinautolú ke nau talangofua ki heʻene ngaahi laó. (ʻEki. 12:49; Liv. 24:22) Ko e moʻoni, ʻoku ʻikai fiemaʻu he ʻahó ni ke tau talangofua ki he ngaahi lao kotoa naʻe ʻoange ki he kau ʻIsilelí. Kae tatau ai pē pe ko e kau pani kitautolu pe ʻikai, kuo pau ke tau talangofua ki he “lao ʻa e Kalaisí.” Ko e taha ʻo e ngaahi meʻa mahuʻinga taha naʻe akoʻi mai ʻe Sīsuú ko e ʻofá. (Sione 13:35; Sēm. 2:8) Kuo pau ke tau ʻofa kia Sihova, Sīsū pea mo e kakaí. Pea ko e founga lelei taha ke tau fakahāhā ai ʻa e ʻofa ko iá ko hono tala ki he kakaí ʻa e ongoongo lelei fekauʻaki mo e Puleʻangá.—Sione 15:10; Ngā. 1:8.

15. Ko e hā ʻe lava ai ke tau pehē naʻe fekauʻi ʻe Sīsū ʻa e kotoa ʻo ʻene kau ākongá ke malanga?

¹⁵ Ko e meʻa naʻe leaʻaki ʻe Sīsū ki he tokosiʻi ʻo ʻene kau ākongá ʻe lava ke ʻuhinga ʻi he taimi ʻe niʻihi ki he kau ākonga tokolahi. Ko e fakatātaá, naʻe fai ʻe Sīsū ha fuakava mo e toko 11 pē ʻo ʻene kau ākongá pea talaʻofa kia kinautolu te nau pule ʻi hono Puleʻangá. Ka ko e toko 144,000 te nau pule fakataha mo iá. (Luke 22:29, 30; Fkh. 5:10; 7:4-8) Pea hili ʻa e toetuʻu ʻa Sīsuú, ko e tokosiʻi pē ʻo ʻene kau ākongá naʻa nau fanongo ki heʻene fekau ke malangá. (Ngā. 10:40-42; 1 Kol. 15:6) Ka naʻe talangofua ʻa e kotoa ʻo e kau ākonga ʻa Sīsū ʻi he ʻuluaki senitulí ki he fekau ko iá. (Ngā. 8:4; 1 Pita 1:8) ʻI he ʻahó ni foki, ʻoku tau ʻiloʻi kuo pau ke tau malanga, neongo ʻoku ʻikai ke tau fanongo ki he leʻo ʻo Sīsuú ʻi heʻene tala mai ke fai ʻa e ngāue ko ení. Ko hono moʻoní, ko e toko valu miliona ʻo kitautolu ʻoku tau fai ʻa e ngāue fakamalangá. ʻOku tau ʻilo ʻi he ngāue fakamalangá, ʻoku tau fakahaaʻi ai ʻoku tau tui moʻoni kia Sīsū.—Sēm. 2:18.

KO E TAIMI ENI KE MATEAKI AÍ

16-18. ʻE lava fēfē ke tau tokoni mateaki ki he fanga tokoua ʻo Kalaisí, pea ko e hā ʻoku totonu ai ke tau fai eni he taimi ní?

¹⁶ ʻOku toe lahi ange hono fakafepakiʻi ʻe Sētane ʻa e fanga tokoua pani ʻo Kalaisi ʻoku kei ʻi he māmaní, pea ʻokú ne ʻiloʻi “ʻoku toe siʻi pē hono taimí.” (Fkh. 12:9, 12, 17) Ka neongo ʻa e ngaahi ʻoho ʻa Sētané, ʻoku hokohoko atu ʻa e kau paní ke takimuʻa ʻi he ngāue fakamalangá pea ʻoku tokolahi ange ʻi ha toe taimi ʻa e kakai ʻoku nau fanongo ki he ongoongo leleí. ʻOku hā mahino, ko Sīsū ʻokú ne ʻi he kau paní, pea ʻokú ne tataki kinautolu.—Māt. 28:20.

¹⁷ ʻOku tau ongoʻi ko ha lāngilangi ia ke tokoni ki he fanga tokoua ʻo Kalaisí ʻi he ngāue fakamalangá. ʻOku tau toe fai ʻa e tokoni fakapaʻanga pea ngāue mālohi ke langa ʻa e ngaahi Fale Fakatahaʻanga, Holo ʻAsemipilī mo e ngaahi ʻōfisi vaʻa. ʻI he taimi ʻoku tau talangofua mateaki ai ki he kau mātuʻá mo e fanga tokoua kehe kuo fakanofo ʻe he “tamaioʻeiki anga-tonu mo potó,” ʻoku tau fakahaaʻi ai ʻoku tau loto ke tokoni ki he fanga tokoua ʻo Kalaisí.—Māt. 24:45-47; Hep. 13:17.

¹⁸ ʻOku vavé ni ke maʻu ʻe he toenga ʻo e kau paní honau silaʻi fakaʻosí. ʻE tukuange leva ʻe he kau ʻāngeló ʻa e “ngaahi matangi ʻe fā ʻo e māmaní,” pea ʻe kamata ʻa e fuʻu mamahi lahí. (Fkh. 7:1-3) Ki muʻa ke kamata ʻa ʻĀmaketoné, ʻe ʻohake ʻe Sīsū ʻa e kau paní ki hēvani. (Māt. 13:41-43) Ko ia kapau ʻoku tau loto ke fakamāuʻi ko ha sipi ʻi he taimi ʻe haʻu ai ʻa Sīsuú, ko e taimi eni ke mateaki ai ki he fanga tokoua pani ʻo Kalaisí.

[Fakamatala ʻi lalo]

[Fakatātā ʻi he peesi 28]

ʻOku tau tokoni ki he fanga tokoua ʻo Kalaisí ʻi he ngaahi founga kehekehe (Sio ki he palakalafi 17)