ʻAlunga Fakafiefia ʻo e Anga-Talitali Kakaí​—ʻOku Mātuʻaki Fiemaʻu!

 1. Ko e hā ʻa e ngaahi faingataʻa naʻe tofanga ai ʻa e kau Kalisitiane ʻi he ʻuluaki senitulí?

ʻI HA taimi ʻi he vahaʻa ʻo e taʻu 62 mo e 64, naʻe tohi ai ʻa e ʻapositolo ko Pitá “ki he kau nofo fakataimi ʻoku movetevete holo ʻi Ponitō, Kalētia, Kapatōsia, ʻĒsia, mo Pitiniá.” (1 Pita 1:1) Naʻe haʻu ʻa e fanga tokoua mo e fanga tuofāfine ko ení mei he ngaahi feituʻu kehekehe. Naʻa nau fehangahangai mo e “ngaahi ʻahiʻahi vela kakaha,” pe fakatanga, pea naʻa nau fiemaʻu ha fakalototoʻa mo e tataki. Naʻa nau toe moʻui lolotonga ha taimi mātuʻaki fakatuʻutāmaki. Naʻe tohi ʻa Pita: “Ko e ngataʻanga ʻo e ngaahi meʻa kotoa pē kuo ofi.” Siʻi hifo ʻi he taʻu ʻe hongofulu mei ai, ʻe fakaʻauha ʻa Selusalema. Ko e hā te ne tokoniʻi ʻa e kau Kalisitiane ʻi he feituʻu kotoa pē ke nau matuʻuaki ʻa e ngaahi taimi faingataʻa ko iá?​—1 Pita 4:4, 7, 12.

2, 3. Ko e hā naʻe fakaʻaiʻai ai ʻe Pita hono fanga tokouá ke nau hoko ʻo anga-talitali kakaí? (Sio ki he ʻuluaki fakatātā ʻi he kupú ni.)

² Ko e meʻa ʻe taha naʻe fakaʻaiʻai ʻe Pita ʻa hono fanga tokouá ke nau faí ko e “hoko ʻo fetalitalikakaiʻaki.” (1 Pita 4:9) Ko e foʻi lea faka-Kalisi ki he “anga-talitali kakaí” ʻoku ʻuhinga fakafoʻileá ko e “ʻofa, pe anga-lelei ki he kau solá.” Ka naʻe fakaʻaiʻai ʻe Pita ʻa hono fanga tokouá mo e fanga tuofāfiné ke nau “fetalitalikakaiʻaki,” neongo naʻa nau ʻosi feʻilongaki mo ngāue fakataha. ʻE tokoniʻi fēfē kinautolu ʻi he hoko ʻo anga-talitali kakaí?

³ ʻE tohoakiʻi ai kinautolu ke nau toe vāofi ange. Fēfē koe? ʻOkú ke manatuʻi ʻa e taimi fakafiefia naʻá ke maʻu ʻi hano fakaafeʻi koe ʻe ha taha ki hono ʻapí? Pea ʻi he taimi naʻá ke fakaafeʻi ai ha taha ki ho ʻapí, naʻe ʻai ʻe he meʻá ni ke mo toe vāofi ange ai. Ko ha founga lelei ke hoko ai ʻo ʻiloʻi hotau fanga tokouá mo e fanga tuofāfiné ko e hoko ʻo anga-talitali kakai kiate kinautolu. Ko e kau Kalisitiane naʻa nau moʻui ʻi he taimi ʻo Pitá naʻe fiemaʻu ke nau ʻunuʻunu ke toe vāofi ange fakaekinautolu ʻi he ʻalu ke toe kovi ange ʻa e ngaahi palopalemá. ʻI he lolotonga ko eni ʻa e “ngaahi ʻaho fakaʻosí,” ʻoku fiemaʻu ke tau fai ʻa e meʻa tatau.​—2 Tīm. 3:1.

 4. Ko e hā ʻa e ngaahi fehuʻi te tau lāulea ki ai ʻi he kupu ko ení?

⁴ ʻI he ngaahi founga fē ʻe lava ke tau hoko ai ʻo “fetalitalikakaiʻaki”? Ko e hā ʻe lava ke ne taʻofi kitautolu mei he hoko ʻo anga-talitali kakaí, pea ʻe lava fēfē ke tau fakalakalaka? Ko e hā ʻe lava ke ne tokoniʻi kitautolu ke tau hoko ko ha kau fakaafe lelei?

 5. ʻE lava fēfē ke tau hoko ʻo anga-talitali kakai ʻi heʻetau ngaahi fakataha faka-Kalisitiané?

⁵ ʻI he fakatahá: ʻOku fakaafeʻi kitautolu ʻe Sihova mo ʻene kautahá ki he ngaahi fakatahá. ʻOku tau loto ke ongoʻi ʻe he tokotaha kotoa ʻoku nau maʻu ʻetau ngaahi fakatahá ʻoku talitali lelei kinautolu, tautefito ki he faʻahinga foʻoú. (Loma 15:7) Ko e kau fakaafe foki kinautolu ʻa Sihova, ko ia ʻoku fiemaʻu ke tau ʻai ke nau ongoʻi fiemālie, ʻo tatau ai pē pe ʻoku fēfē honau fōtungá pe ko e anga ʻo ʻenau ʻai valá. (Sēm. 2:1-4) Kapau ʻokú ke fakatokangaʻi ʻoku nofo toko taha ha tokotaha ʻaʻahi, ʻe lava ke ke fakaafeʻi ke mo tangutu fakataha? Te ne houngaʻia nai kapau te ke tokoniʻi ia ke ne mahinoʻi ʻa e meʻa ʻe fai ʻi he lolotonga ʻa e polokalamá pe ʻi hono kumi ʻa e ngaahi konga Tohi Tapu ʻoku laú. ʻE hoko eni ko ha founga lelei ʻaupito ʻo e “muimui ʻi he ʻalunga ʻo e anga-talitali kakaí.”​—Loma 12:13.

 6. Ko hai ʻoku totonu ke tau hoko ʻo anga-talitali kakai lahi taha ki aí?

⁶ ʻI ha kiʻi kai maʻamaʻa pe houa kai: Ko e kakai ʻi he taimi ʻo e Tohi Tapú naʻa nau faʻa fakahāhā ʻa e anga-talitali kakaí ʻaki hono fakaafeʻi ʻa e niʻihi kehé ki honau ʻapí ki ha houa kai, ʻo fakahāhā naʻa nau loto ke hoko ko e ngaahi kaumeʻa pea maʻu ʻa e nonga. (Sēn. 18:1-8; Fkm. 13:15; Luke 24:28-30) Ko hai ʻoku totonu ke tau hoko ʻo anga-talitali kakai lahi taha ki aí? ʻOku totonu ko e fanga tokoua mo e fanga tuofāfine ʻi heʻetau fakatahaʻangá. ʻI he ʻalu ke toe kovi ange ʻa e fokotuʻutuʻu ko ení, ʻe fiemaʻu ke tau falala ki hotau fanga tokouá mo e fanga tuofāfiné pea hoko ko honau ngaahi kaumeʻa mateaki. ʻI he 2011, naʻe liliu ai ʻe he Kulupu Pulé ʻa e taimi ʻo e Ako Taua Leʻo ʻa e fāmili Pēteli ʻi ʻAmeliká mei he 6:45 efiafi ki he 6:15 efiafi. Ko e hā hono ʻuhingá? Naʻe pehē ʻi he fanongonongó ʻoku ngalingali ʻe faingofua ange ai ki he kau Pētelí ke nau tali mo fefakahāhāʻaki ʻa e anga-talitali kakaí kapau ʻe tuku vave ange ʻa e fakatahá. Kuo fai ʻi ha ngaahi vaʻa kehe ʻa e meʻa tatau. Kuo hoko eni ko ha faingamālie lahi ki he faʻahinga ʻi he fāmili Pētelí ke nau feʻilongaki ai.

7, 8. ʻE lava fēfē ke tau hoko ʻo anga-talitali kakai ki he kau malanga ʻaʻahí?

⁷ ʻI he taimi ʻe niʻihi ʻoku fai ai ʻe he fanga tokoua mei he ngaahi fakatahaʻanga kehé, kau ʻovasia sēketi, pe ko e kau fakafofonga mei he Pētelí ha malanga ʻi heʻetau fakatahaʻangá. ʻE lava ke tau ngāueʻaki ʻa e ngaahi taimi ko ení ke hoko ai ʻo anga-talitali kakai ki he fanga tokoua ko ení? (Lau ʻa e 3 Sione 5-8.) Ko e founga ʻe taha ke fai ai ení ko hono fakaafeʻi kinautolu ki hotau ʻapí ki ha kiʻi kai maʻamaʻa pe ki ha houa kai.

⁸ ʻOku manatuʻi ʻe ha tuofefine ʻi ʻAmelika: “ʻI he faai mai ʻa e ngaahi taʻú, kuó u maʻu ai mo hoku husepānití ʻa e faingamālie ke ma fai ai ha tokonaki anga-talitali kakai ʻi homa ʻapí ki he kau malanga tokolahi mo honau uaifí.” ʻOkú ne tui ko e hokosia kotoa pē naʻe fakaivimālohiʻi ai ʻena tuí pea ʻi he taimi tatau naʻe fakafiefia. ʻOkú ne pehē: “Kuo ʻikai ʻaupito te ma fakaʻiseʻisa ai.”

9, 10. (a) Ko hai nai ʻe fiemaʻu ke ne nofo mo kitautolu ʻi ha vahaʻa taimi fuoloa angé? (e) ʻE lava ke tokoni ʻa e faʻahinga ʻoku siʻisiʻi ange honau falé? ʻOmai ha fakatātā.

⁹ Kau fakaafe ʻoku nau nofo fuoloa angé: ʻI he taimi ʻo e Tohi Tapú, naʻe angamaheniʻaki ai ʻa hono ʻoange ki ha kau ʻaʻahi ha feituʻu ke nau nofo ai. (Siope 31:32; Flm. 22) ʻI he ʻahó ni, ʻe fiemaʻu nai ai ke tau fai ʻa e meʻa tatau. ʻOku faʻa fiemaʻu ʻe he kau ʻovasia sēketí ha feituʻu ke nau nofo ai ʻi he taimi ʻoku nau ʻaʻahi ai ki he ngaahi fakatahaʻangá. ʻE toe hoko nai ko e tuʻungá eni ʻi he kau ako ʻi he ngaahi ako fakateokalatí mo e kau ngāue pole ʻi he langá. Pea fēfē ʻa e faʻahinga kuo ʻikai hanau ʻapi hili ha fakatamaki fakanatulá? Te nau fiemaʻu nai ha feituʻu ke nofo ai kae ʻoua kuo toe langa honau falé. ʻOku ʻikai totonu ke tau pehē ko e faʻahinga pē ʻoku ʻi ai honau ngaahi fale lalahí ʻe lava ke nau tokoní. Kuo nau ʻosi fai tuʻo lahi nai ia ki muʻa. ʻE lava ke ke tokonaki ki ha taha ha feituʻu ke nofo ai, ʻo tatau ai pē pe ʻoku siʻisiʻi ho falé?

¹⁰ ʻOku manatuʻi ʻe ha tokoua ʻi Kōlea Tonga ʻa e taimi naʻe nofo ai mo ia ha kau ako naʻa nau kau ʻi he ngaahi ako fakateokalatí. Ko ʻene tohí eni: “Naʻá ku muʻaki toumoua koeʻuhí naʻá ma toki ʻosi mali peá ma nofo ʻi ha kiʻi fale siʻisiʻi. Ka ʻi heʻema nofo mo e kau akó naʻe hoko moʻoni ia ko ha hokosia fakafiefia. ʻI heʻema toki ʻosi malí, naʻe malava ai ke ma sio ki he founga ʻoku lava ke fiefia ai ha ongo meʻa mali ʻi heʻena tauhi kia Sihova mo tuli fakataha ki he ngaahi taumuʻa fakalaumālié.”

11. Ko e hā ʻe fiemaʻu nai ai ʻe he faʻahinga ʻoku foʻou ki hoʻo fakatahaʻangá ʻa e anga-talitali kakaí?

¹¹ Fanga tokoua mo e fanga tuofāfine foʻou ʻi he fakatahaʻangá: ʻE hiki mai nai ha fanga tokoua mo e fanga tuofāfine pe ngaahi fāmili mei ha ngaahi fakatahaʻanga kehe ki ho feituʻú. Ko ʻenau haʻú nai koeʻuhi naʻe fiemaʻu ʻe hoʻo fakatahaʻangá ha tokoni. Pe ko e kau tāimuʻa nai kinautolu naʻe vaheʻi atu ki hoʻo fakatahaʻangá. Ko ha liliu lahi eni kiate kinautolu. ʻE fiemaʻu nai ke nau feʻunuʻaki ki ha feituʻu foʻou, ko ha fakatahaʻanga foʻou, pea naʻa mo ha lea pe anga fakafonua foʻou. ʻE lava ke ke fakaafeʻi kinautolu ki ha kiʻi kai maʻamaʻa pe ko ha houa kai pe ke ō ki ha feituʻu? ʻE tokoniʻi kinautolu ʻe he meʻá ni ke nau maʻu ha ngaahi kaumeʻa foʻou pea feʻunuʻaki ki honau ngaahi tuʻunga feliuliuakí.

12. Ko e hā ʻa e hokosia ʻoku fakahaaʻi ai ʻoku ʻikai fiemaʻu ke ke teuteu ha ngaahi meʻa lahi ke hoko ai ʻo anga-talitali kakaí?

¹² ʻOku ʻikai fiemaʻu ia ke ke teuteu ha ngaahi meʻa lahi ke hoko ai ʻo anga-talitali kakai. (Lau ʻa e Luke 10:41, 42.) ʻOku manatuʻi ʻe ha tokoua ʻe taha ʻa e meʻa naʻe hoko ʻi heʻene ʻuluaki hoko mo hono uaifí ko e ongo misinalé. ʻOkú ne pehē: “Naʻá ma kei siʻi, taʻetaukei, mo taʻelata. ʻI he efiafi ʻe taha naʻe mātuʻaki taʻelata ai ʻa hoku uaifí, pea naʻe ʻikai ola lelei ʻeku feinga ke tokoní. Pea ʻi he 7:30 poʻulí nai, naʻá ma fanongo ki ha tukituki ʻi he matapaá. Naʻe tuʻu mai ai ha tokotaha ako Tohi Tapu naʻá ne haʻu mo ʻema foʻi moli ʻe tolu. Naʻá ne haʻú ke talitali ʻa e ongo misinale foʻoú. Naʻá ma fakaafeʻi ia ki loto pea ʻoange kiate ia ha ipu vai. ʻI he hili iá naʻá ma ngaohi ha tī mo e inu sokaleti mafana. Naʻe teʻeki ai ke ma poto ʻi he lea faka-Suahilí, pea naʻe ʻikai te ne poto ʻi he lea faka-Pilitāniá.” Naʻe pehē ʻe he tokouá naʻe tokoniʻi kinaua ʻe he hokosia ko ení ke na kamata ke anga-fakakaumeʻa ki he fanga tokoua ʻi he feituʻú peá na hoko ai ʻo fiefia ange.

13. ʻOku anga-fēfē hono tokoniʻi koe ʻe he anga-talitali kakaí?

¹³ Kuo faifai ange peá ke toumoua ke hoko ʻo anga-talitali kakai? Kapau ko ia, kuó ke tō nai ai mei he faingamālie ke maʻu ha taimi fakafiefia pea ke maʻu ha ngaahi kaumeʻa ʻa ia te ke maʻu ʻo taʻengata. Ko e hoko ʻo anga-talitali kakaí ʻa e taha ʻo e founga lelei taha ke taʻofi ai hoʻo ongoʻi taʻelatá. Ko ia ko e hā nai ʻe toumoua ai ha taha ke hoko ʻo anga-talitali kakaí? ʻOku ʻi ai ha ngaahi ʻuhinga ʻe niʻihi.

14. Ko e hā ʻe lava ke tau fai kapau ʻoku ʻikai ke tau maʻu ha taimi mo e ivi feʻunga ke fakahāhā ai pe tali ʻa e anga-talitali kakaí?

¹⁴ Taimi mo e ivi: Ko e kakai ʻa Sihová ʻoku nau femoʻuekina ʻaupito pea ʻoku lahi honau ngaahi fatongiá. ʻE ongoʻi nai ʻe he niʻihi ʻoku ʻikai hanau taimi pe ivi feʻunga ke hoko ai ʻo anga-talitali kakai. Kapau ʻokú ke ongoʻi peheni, ʻe fiemaʻu nai ke liliu hoʻo taimi-tēpilé ke ke malava ʻo fakahāhā mo tali ʻa e anga-talitali kakaí. ʻOku mātuʻaki mahuʻinga eni koeʻuhí ʻoku enginaki mai ʻa e Tohi Tapú ke tau anga-talitali kakai. (Hep. 13:2) Ko ia ko e anga-talitali kakaí ko e meʻa totonu ia ke fai. Ka ke fakahāhā ʻa e anga-talitali kakaí, ʻe fiemaʻu nai ke ke fakasiʻisiʻi ʻa e taimi ʻo hono fai ʻa e ngaahi meʻa ʻoku ʻikai loko mahuʻingá.

15. Ko e hā ʻe ongoʻi nai ai ʻe he niʻihi heʻikai lava ke nau hoko ʻo anga-talitali kakaí?

¹⁵ Anga hoʻo ongoʻi fekauʻaki mo koé: Kuo faifai ange peá ke loto ke hoko ʻo anga-talitali kakai ka ʻokú ke ongoʻi heʻikai lava ke ke fai ia? Mahalo pē ʻokú ke mā mo hohaʻa nai naʻa taʻeoliʻia ʻa hoʻo kau fakaafé. Pe mahalo pē ʻoku ʻikai ke lahi hoʻo paʻangá pea ʻokú ke hohaʻa naʻa ʻikai lava ke ke tokonaki maʻa hoʻo kau fakaafé ʻa e meʻa ʻoku malava ʻe he fanga tokoua mo e fanga tuofāfine kehé. Kae manatuʻi ʻoku ʻikai fiemaʻu ia ke fuʻu masani ha ʻapi. ʻE fiefia hoʻo kau fakaafé kapau ʻoku maʻa mo maau ho ʻapí pea kapau ʻokú ke anga-fakakaumeʻa.

16, 17. Ko e hā ʻe lava ke ke fai kapau ʻokú ke ongoʻi loto-moʻua ʻi hano talitali ha kau fakaafe?

¹⁶ Kapau ʻokú ke ongoʻi loto-moʻua ʻi hano talitali ha kau fakaafe, ʻoku ʻikai ko koe pē toko taha. ʻOku fakahaaʻi ʻe ha mātuʻa ʻi Pilitānia: “ʻOku lava ke ʻi ai ha kiʻi manavasiʻi ʻi he teuteu ki ha kau fakaafe. Ka ʻi ha meʻa pē ʻoku felāveʻi mo e tauhi kia Sihová, ko e ngaahi ʻaonga mo e fiemālie ʻoku tupu mei aí ʻoku laka mamaʻo ia ʻi ha loto-moʻua pē. Kuó u fiefia ʻi he tangutu fakataha pē mo e kau fakaafé ʻo inu kofi mo talanoá.” ʻOku lelei maʻu pē ke fakahāhā ʻa e mahuʻingaʻia fakafoʻituitui ʻi hoʻo kau fakaafé. (Fil. 2:4) Ko e tokolahi taha ʻo e kakaí ʻoku nau fiefia ʻi he talanoa ki heʻenau ngaahi hokosia ʻi he moʻuí. ʻOku tau fanongo pē nai ki heʻenau hokosiá ʻi he taimi ʻoku tau fakatahataha ai mo kinautolú. ʻOku tohi ha mātuʻa ʻe taha: “Ko e haʻu ki hoku ʻapí ʻa e ngaahi kaumeʻa mei he fakatahaʻangá ʻoku tokoniʻi ai au ke u mahinoʻi lelei ange kinautolu peá u maʻu ai ʻa e taimi ke ʻiloʻi kinautolu, tautefito ki he founga naʻa nau haʻu ai ki he moʻoní.” Kapau ʻokú ke fakahāhā ʻa e mahuʻingaʻia fakafoʻituitui ʻi hoʻo kau fakaafé, ʻe lava ke ke fakapapauʻi ai ʻe fiefia ʻa e tokotaha kotoa pē.

¹⁷ Ko ha tuofefine tāimuʻa ʻokú ne faʻa nofo mo e kau ako mei ha ngaahi ako fakateokalati kehekehe naʻá ne fakahaaʻi: “Naʻá ku muʻaki hohaʻa he ko hoku nofoʻangá ʻoku ʻi ha tuʻunga anga-maheni pē pea ʻi ai ha ngaahi naunau fale ʻosi ngāueʻaki. Naʻe ʻai moʻoni ʻe he uaifi ʻo e taha ʻo e kau faiakó ke u ongoʻi fiemālie. Naʻá ne pehē ʻi he taimi ʻokú ne ngāue ai mo hono husepānití ʻi he ngāue fefonongaʻakí, ko hona ngaahi uike lelei tahá ʻa e taimi ʻokú na nofo ai mo ha tokotaha fakalaumālie ʻoku ʻikai nai te ne maʻu ha meʻa fakamatelie lahi ka ʻokú ne taumuʻa tatau mo kinaua​—ʻi he tauhi kia Sihova mo tauhi ke faingofua ʻa e moʻuí. Naʻe fakamanatu mai ʻe he meʻá ni ʻa e meʻa naʻe faʻa lea mai ʻaki ʻe heʻemau faʻeé kiate kimautolu fānaú: ‘ʻOku lelei ange ha tisi vesitapolo ʻoku ʻi ai ʻa e ʻofá.’” (Pal. 15:17) ʻOku ʻikai ha fiemaʻu ke hohaʻa, he ko e meʻa ʻoku mahuʻinga moʻoní ko ʻetau fakahāhā ʻa e ʻofa ki heʻetau kau fakaafé.

18, 19. ʻE lava fēfē ke tokoniʻi kitautolu ʻe he anga-talitali kakaí ke tau ikuʻi ʻetau ongoʻi ʻikai lelei fekauʻaki mo e niʻihi kehé?

¹⁸ Anga hoʻo ongoʻi ki he niʻihi kehé: ʻOku ʻi ai ha taha ʻi hoʻo fakatahaʻangá ʻokú ne fakaʻitaʻi koe? Kapau ʻoku ʻikai te ke feinga ke ikuʻi ʻa e ngaahi ongoʻi ʻikai lelei ko ení, heʻikai ke liliu hoʻo ngaahi ongoʻí. Heʻikai nai te ke loto ke fakaafeʻi mai ha taha ki ho ʻapí kapau ʻoku ʻikai te ke saiʻia ʻi hono ʻulungāngá. Pe mahalo pē ʻoku ʻi ai ha taha naʻá ne fakalotomamahiʻi koe ʻi he kuohilí, pea ʻoku faingataʻa ke ke fakangaloʻi.

¹⁹ ʻOku pehē ʻe he Tohi Tapú ʻe lava ke ke fakaleleiʻi ho vahaʻangatae mo e niʻihi kehé, naʻa mo ho ngaahi filí, kapau ʻokú ke anga-talitali kakai. (Lau ʻa e Palōveepi 25:21, 22.) Kapau ʻokú ke fakaafeʻi ha taha ki ho ʻapí, ʻe lava nai ai ke ke ikuʻi ʻa e ngaahi ongoʻi ʻoku ʻikai leleí pea fakatupulekina ha vahaʻangatae melino ange mo ia. ʻE kamata nai ai ke ke sio ki hono ngaahi ʻulungaanga lelei tatau mo ia naʻe vakai mai ki ai ʻa Sihova ʻi Heʻene tohoakiʻi ia ki he moʻoní. (Sione 6:44) ʻI hono ueʻi koe ʻe he ʻofá ke ke fakaafeʻi taʻeʻamanekina ha tahá, ʻe lava ke kamata heni ha kaumeʻa lelei. ʻE lava fēfē ke ke fakapapauʻi ko e ʻofá ʻa hoʻo fakaueʻiloto moʻoní? Ko e founga ʻe taha ko hono ngāueʻaki ʻa e akonaki ʻi he Filipai 2:3: “ʻAki ʻa e anga-fakatōkilalo ʻo mou vakai ki he niʻihi kehé ʻoku nau māʻolunga ange ʻiate kimoutolu.” ʻOku totonu ke tau fakakaukau ki he ngaahi tafaʻaki ʻoku māʻolunga ange ai ʻiate kitautolu ʻa hotau fanga tokouá mo e fanga tuofāfiné. Mahalo pē ʻe lava ke tau ako mei heʻenau tuí, kātakí, pe ko ha ʻulungaanga faka-Kalisitiane kehe. Ko e fakakaukau fekauʻaki mo honau ngaahi ʻulungaanga leleí ʻe ʻai ai ke lahi ʻetau ʻofa kiate kinautolú pea ʻai ai ke faingofua ange ʻa e hoko ʻo anga-talitali kakaí.

20. Ko e hā pea ʻoku anga-fēfē ʻa e totonu ke tau alafalalaʻanga ʻi he taimi ʻoku tau tali ai ha fakaafe?

²⁰ Naʻe ʻeke ʻe he tokotaha-tohi-saame ko Tēvitá: “ʻE Sihova, ko hai nai ʻe hoko ko ha tokotaha fakaafe ʻi ho tēnití?” (Saame 15:1) ʻI he hili iá, naʻe lāulea ʻa Tēvita ki he ngaahi ʻulungaanga ʻoku fiemaʻu ʻe Sihova ke maʻu ʻe heʻene kau fakaafé. Ko e taha ʻo e ngaahi ʻulungaanga ko ení ko e hoko ʻo alafalalaʻanga: “ʻOku ʻikai te ne fakafoki ʻa ʻene palōmesí, neongo kapau ʻe kovi kiate ia.” (Saame 15:4) Kapau ʻoku tau tali ha fakaafe, ʻoku totonu ke ʻoua te tau kaniseli tuku kehe kapau ʻoku mātuʻaki fiemaʻu. Kuo ʻosi teuteu nai ʻa e tokotaha ʻokú ne fai ʻa e fakaafé ki heʻetau ʻaʻahí, pea kapau te tau kaniseli, ʻe mole noaʻia ʻa e kotoa ʻo ʻene ngāué. (Māt. 5:37) ʻOku kaniseli ʻe he kakai ʻe niʻihi ʻa e fakaafe ʻe taha koeʻuhí ke lava ʻo nau tali ha fakaafe ʻoku nau ongoʻi ʻoku lelei ange. Ko e anga-ʻofa mo e anga-fakaʻapaʻapa ia? ʻOku totonu ke tau houngaʻia ʻi ha meʻa pē ʻoku teuteu ʻe he tokotaha ʻokú ne fakaafeʻi kitautolú. (Luke 10:7) Kapau kuo pau ke tau kaniseli, ko ha anga-ʻofa mo e fakakaukau lelei ia ʻa hono tala ke ʻiloʻi ʻe he tokotaha ʻokú ne fai ʻa e fakaafé ʻi he vave tahá.

21. ʻE lava fēfē ke tokoniʻi kitautolu ʻe hono fakaʻapaʻapaʻi ʻa e anga fakafonua ʻa e feituʻú ke tau hoko ko e kau fakaafe lelei?

²¹ ʻOku toe mahuʻinga foki ke fakaʻapaʻapaʻi ʻa e anga fakafonua ʻa e feituʻú. ʻI he anga fakafonua ʻe niʻihi, ʻoku talitali lelei ai ʻa e faʻahinga ʻoku nau haʻu taʻeʻamanekiná. ʻI he anga fakafonua ʻe niʻihi, ʻoku lelei ange ai ke fai ha ngaahi fokotuʻutuʻu ki muʻa ke tau fai ha ʻaʻahi. ʻI he ngaahi feituʻu ʻe niʻihi, ʻoku ʻoange ai ʻe he tokotaha ʻokú ne fai ʻa e fakaafé ki heʻene kau fakaafé ʻa e meʻakai lelei taha ʻokú ne maʻú, pea toki fika ua ʻa hono fāmilí. ʻI he anga fakafonua ʻe niʻihi, ʻoku tatau ai ʻa e fakafeangai ki he tokotaha kotoa. ʻI he ngaahi feituʻu ʻe niʻihi, ʻoku angamaheniʻaki ai ʻa e haʻu ʻa e kau fakaafé mo ha meʻa ke tokoni ki he kaí. ʻI he feituʻu ʻe niʻihi, ʻoku saiʻia ange ʻa e faʻahinga ʻoku nau fai ʻa e fakaafé ke ʻoua ʻe haʻu ʻa ʻenau kau fakaafé mo ha meʻa. ʻI he anga fakafonua ʻe niʻihi, ʻoku fakafisi anga-fakaʻapaʻapa ai ʻa e kau fakaafé ke tali ʻa e ʻuluaki fakaafé pe ko e fakaafe hono uá. Ka ʻi he ngaahi feituʻu ʻe niʻihi, ko ha anga-taʻefakaʻapaʻapa ʻa e ʻikai ke tali ʻa e ʻuluaki fakaafé. ʻOku totonu ke tau fai maʻu pē hotau lelei tahá ke fakapapauʻi ʻe fiefia ʻa e tokotaha ʻokú ne fai ʻa e fakaafé ʻi heʻene fakaafeʻi kitautolú.

22. Ko e hā ʻoku mātuʻaki mahuʻinga ai ke “hoko ʻo fetalitalikakaiʻaki”?

²² Naʻe pehē ʻe Pita: “Ko e ngataʻanga ʻo e ngaahi meʻa kotoa pē kuo ofi.” (1 Pita 4:7) ʻI he ʻahó ni, ʻoku tau fehangahangai mo e fuʻu mamahi lahi taha ʻe faifai ange pea hokosia ʻe he māmaní. ʻI he ʻalu ke toe kovi ange ʻa e fokotuʻutuʻu ko ení, ʻe fiemaʻu ai ke tau maʻu ha ʻofa lahi ki hotau fanga tokouá mo e fanga tuofāfiné. Ko e akonaki ʻa Pitá ʻoku kaunga lahi ange ia ki he taimí ni ʻi ha toe taimi ki muʻa: “Hoko ʻo fetalitalikakaiʻaki.” (1 Pita 4:9) ʻIo, ko e anga-talitali kakaí ʻoku fakafiefia pea ʻoku fiemaʻu pau ia ʻi he taimí ni pea taʻengata.