ʻOfa mo e Fakamaau Totonu ʻi he Fakatahaʻanga Kalisitiané (Konga 2 ʻo e 4)

 1. Ko e hā ʻa e meʻa ʻe ua ʻoku lava ke tau fakapapauʻí?

ʻOKU ʻofa ʻa Sihova ko e ʻOtuá ʻi heʻene kau lotú. Kuó ne fai pehē, pea te ne fai pehē maʻu pē. ʻOkú ne toe ʻofa foki ʻi he fakamaau totonú. (Saame 33:5) Ko ia ʻoku lava ke tau fakapapauʻi ʻa e meʻa ʻe ua: (1) ʻOku fakamamahi kia Sihova ʻa e taimi ʻoku ngaohikovia taʻetotonu ai ʻa ʻene kau sevānití. (2) Te ne fakapapauʻi te nau maʻu ʻa e fakamaau totonú. ʻI he kupu ʻuluaki ʻi he kupu hokohoko ko ení,b naʻa tau ako ai ko e Lao naʻe ʻoange ʻe he ʻOtuá ki ʻIsileli fakafou ʻia Mōsesé naʻe makatuʻunga ia ʻi he ʻofa. ʻOku pouaki ai ʻa e fakamaau totonu​—fakamaau totonu ki he taha kotoa, naʻa mo e faʻahinga ʻoku ʻikai lava ke nau maluʻi kinautolú. (Teu. 10:18) ʻOku fakahaaʻi ʻi he Lao ko iá ʻa e anga ʻo e tokanga lahi mai ʻa Sihova ki heʻene kau lotú.

 2. Ko e hā ʻa e ngaahi fehuʻi te tau talí?

² Naʻe ngata ʻa e Lao ʻa Mōsesé ʻi he 33 T.S. ʻi he taimi naʻe fokotuʻu ai ʻa e fakatahaʻanga Kalisitiané. ʻA ia ʻe ʻikai ke maʻu ʻaonga ʻa e kau Kalisitiané ia mei ha lao ʻoku makatuʻunga ʻi he ʻofá pea pouaki ʻa e fakamaau totonú? ʻIkai! Naʻe maʻu ʻe he kau Kalisitiané ha lao foʻou. ʻI he kupu ko ení, te tau ʻuluaki lāulea ki he lao ko iá. Pea te tau tali leva ʻa e ngaahi fehuʻi ko ení: Ko e hā ʻe lava ke tau pehē ai ko e lao ko ení ʻoku makatuʻunga ʻi he ʻofá? Ko e hā ʻoku lava ai ke tau pehē ʻokú ne pouaki ʻa e fakamaau totonú? ʻI he malumalu ʻo e lao ko ení, ʻoku totonu ke fēfē ʻa e fakafeangai ʻa e faʻahinga ʻoku maʻu mafaí ki he niʻihi kehé?

 3. Ko e hā ʻoku kau ki he “lao ʻa e Kalaisí” hangē ko ia ʻoku lave ki ai ʻi he Kalētia 6:2?

³ Lau ʻa e Kalētia 6:2. Ko e kau Kalisitiané ʻoku nau ʻi he malumalu ʻo e “lao ʻa e Kalaisí.” Naʻe ʻikai ke hiki ʻe Sīsū ia ha lisi ʻo e ngaahi laó ki hono kau muimuí, ka naʻá ne ʻoange kiate kinautolu ʻa e ngaahi fakahinohino, fekau mo e tefitoʻi moʻoni ke nau moʻuiʻaki. Ko e “lao ʻa e Kalaisí” ʻoku kau ai ʻa e meʻa kotoa naʻe akoʻi ʻe Sīsuú. Ke mahinoʻi lelei ange ʻa e lao ko iá, te tau lāulea ki ai ʻi he ngaahi palakalafi hokó.

4-5. ʻI he ngaahi founga fē naʻe faiako ai ʻa Sīsuú, pea ko fē taimi naʻá ne faiako aí?

⁴ ʻI he ngaahi founga fē naʻe faiako ai ʻa Sīsuú? ʻUluakí, naʻá ne akoʻi ʻa e kakaí fakafou ʻi he meʻa naʻá ne leaʻakí. Naʻe ʻi ai ʻa e mālohi ʻi heʻene ngaahi leá koeʻuhi naʻe fakahaaʻi ai ʻa e moʻoni fekauʻaki mo e ʻOtuá, akoʻi ai ʻa e taumuʻa moʻoni ʻo e moʻuí, pea fakahanga ʻa e tokangá ki he Puleʻanga ʻo e ʻOtuá ko e fakaleleiʻanga ia ki he kotoa ʻo e faingataʻaʻia ʻa e faʻahinga ʻo e tangatá. (Luke 24:19) Naʻe toe faiako ʻa Sīsū fakafou ʻi heʻene faʻifaʻitakiʻangá. ʻI heʻene founga moʻuí, naʻá ne fakahaaʻi ai ki hono kau muimuí ʻa e founga ʻoku totonu ke nau moʻui aí.​—Sione 13:15.

⁵ Ko fē taimi naʻe faiako ai ʻa Sīsuú? Naʻá ne faiako ʻi he lolotonga ʻene ngāue fakafaifekau ʻi he māmaní. (Māt. 4:23) Naʻá ne toe akoʻi hono kau muimuí hili pē hono fokotuʻu hake iá. Ko e fakatātaá, naʻá ne hā ki ha kulupu ʻo e kau ākongá​—mahalo ko e toko 500 tupu—​pea ʻoange kiate kinautolu ʻa e fekau ke ‘ngaohi ākonga.’ (Māt. 28:19, 20; 1 Kol. 15:6) ʻI he tuʻunga ko e ʻulu ʻo e fakatahaʻangá, naʻe hokohoko atu hono fakahinohinoʻi ʻe Sīsū ʻene kau ākongá hili ʻene foki ki hēvaní. Ko e fakatātaá, ʻi he 96 T.S. nai, naʻe tataki ʻe Kalaisi ʻa e ʻapositolo ko Sioné ke ne ʻoange ʻa e fakalototoʻa mo e akonaki ki he kau Kalisitiane paní.​—Kol. 1:18; Fkh. 1:1.

6-7. (a) ʻOku lēkooti ʻi fē ʻa e ngaahi akonaki ʻa Sīsuú? (e) ʻOku anga-fēfē ʻetau talangofua ki he lao ʻa e Kalaisí?

⁶ ʻOku lēkooti ʻi fē ʻa e ngaahi akonaki ʻa Sīsuú? Ko e Kōsipeli ʻe faá ʻoku lēkooti ai ʻa e ngaahi meʻa lahi naʻe leaʻaki mo fai ʻe Sīsū ʻi he māmaní. Ko e toenga ʻo e Ngaahi Konga Tohi Tapu Faka-Kalisi Kalisitiané​—ʻa ia naʻe hiki ʻe he kau tangata naʻe fakamānavaʻi ʻe he laumālie māʻoniʻoní pea naʻa nau maʻu “ʻa e fakakaukau ʻa Kalaisí”—​ʻoku toe tokoniʻi lahi ange ai kitautolu ke mahinoʻi ʻa e fakakaukau ʻa Sīsū ʻo fekauʻaki mo e ngaahi meʻá.​—1 Kol. 2:16.

⁷ Lēsoní: Ko e ngaahi akonaki ʻa Sīsuú ʻokú ne kāpui ʻa e ngaahi tafaʻaki kotoa ʻo e moʻuí. Ko ia ʻoku tataki ʻe he lao ʻa e Kalaisí ʻa e meʻa ʻoku tau fai ʻi ʻapí, ʻi he ngāueʻangá pe ʻapiakó pea ʻi he fakatahaʻangá. ʻOku tau ako ʻa e lao ko ení ʻaki hono lau ʻa e Ngaahi Konga Tohi Tapu Faka-Kalisi Kalisitiané pea fakalaulauloto ki ai. ʻOku tau talangofua ki he lao ko ení ʻaki ʻetau moʻui ʻo fehoanaki mo e ngaahi fakahinohino, fekau mo e tefitoʻi moʻoni ʻoku maʻu ʻi he ngaahi tohi ko ia ʻo e Tohi Tapú. ʻI heʻetau talangofua ki he lao ʻa e Kalaisí, ʻoku tau talangofua ai ki hotau ʻOtua ʻofá, ʻa Sihova, ʻa e Matavai naʻe haʻu mei ai ʻa e meʻa kotoa naʻe akoʻi ʻe Sīsuú.​—Sione 8:28.

 8. Ko e hā ʻa e makatuʻunga ʻo e lao ʻa e Kalaisí?

⁸ Ko ha fale lelei naʻe fakatoka ʻi ha makatuʻunga fefeka ʻoku ʻai ai ʻa e faʻahinga ʻoku nofo aí ke nau ongoʻi malu. ʻI he tuʻunga meimei tatau, ko ha lao lelei naʻe fakatoka ʻi ha makatuʻunga fefeka ʻoku ʻai ai ʻa e faʻahinga ʻoku nau moʻuiʻaki iá ke nau ongoʻi malu. Ko e lao ʻa e Kalaisí ʻoku fakatoka ia ʻi he makatuʻunga lelei taha ʻoku ala lava ke maʻú​—ko e ʻofá. Ko e hā ʻoku lava ai ke tau lea peheé?

9-10. Ko e hā ʻa e ngaahi fakatātā ʻoku fakahaaʻi ai naʻe ueʻi ʻe he ʻofá ʻa Sīsū, pea ʻe lava fēfē ke tau faʻifaʻitaki kiate ia?

⁹ ʻUluakí, ko e meʻa kotoa naʻe fai ʻe Sīsuú naʻe ueʻi ʻe he ʻofá. Ko e ongoʻi fakaʻofaʻiá pe manavaʻofá, ko ha fakahāhā ia ʻo e ʻofá. ʻI hono ueʻi ʻe he ongoʻi fakaʻofaʻiá, naʻe akoʻi ʻe Sīsū ʻa e fuʻu kakaí, fakamoʻui ʻa e puké, fafanga ʻa e fiekaiá pea fokotuʻu ʻa e maté. (Māt. 14:14; 15:32-38; Mk. 6:34; Luke 7:11-15) Neongo ko hono fai ʻa e ngaahi meʻa ko iá naʻe fakamoleki ki ai ʻa e lahi hono taimí mo e iví, naʻe loto-lelei ʻa Sīsū ke fakamuʻomuʻa ʻa e fiemaʻu ʻa e niʻihi kehé ʻi haʻaná. Mahulu haké, naʻá ne fakahāhā ʻa e ʻofa lahi ʻaki hono tuku atu ʻene moʻuí maʻá e niʻihi kehé.​—Sione 15:13.

¹⁰ Lēsoní: ʻE lava ke tau faʻifaʻitaki kia Sīsū ʻaki hono fakamuʻomuʻa ʻa e fiemaʻu ʻa e niʻihi kehé ʻi haʻatautolú. ʻE lava ke tau toe faʻifaʻitaki kiate ia ʻaki hono fakatupulekina ʻa e manavaʻofa ki he kakai ʻi hotau feituʻu ngāué. ʻI hono ueʻi kitautolu ʻe he manavaʻofa ko iá ke malanga mo faiakoʻaki ʻa e ongoongo leleí, ʻoku tau talangofua ai ki he lao ʻa e Kalaisí.

11-12. (a) ʻOku fakahaaʻi fēfē ʻe Sihova ʻene tokanga lahi mai kiate kitautolú? (e) ʻE lava fēfē ke tau faʻifaʻitaki ki he ʻofa ʻa Sihová?

¹¹ Uá, naʻe fakahaaʻi ʻe Sīsū ʻa e ʻofa ʻa ʻene Tamaí. Lolotonga ʻene ngāue fakafaifekaú, naʻe fakahaaʻi ʻe Sīsū ʻa e tokanga lahi mai ʻa Sihova fekauʻaki mo ʻene kau lotú. Fakataha mo e ngaahi meʻa kehé, naʻe akoʻi ʻe Sīsū ʻa e meʻá ni: Ko kitautolu taki taha ʻoku tau mahuʻinga ki heʻetau Tamai fakahēvaní. (Māt. 10:31) ʻOku vēkeveke ʻa Sihova ke talitali lelei ha sipi mole ʻokú ne fakatomala pea foki mai ki he fakatahaʻangá. (Luke 15:7, 10) Naʻe fakamoʻoniʻi ʻe Sihova ʻene ʻofa ʻiate kitautolú ʻaki hono foaki mai hono ʻAló ko ha huhuʻi maʻatautolu.​—Sione 3:16.

¹² Lēsoní: ʻE lava fēfē ke tau faʻifaʻitaki ki he ʻofa ʻa Sihová? (ʻEf. 5:1, 2) ʻOku tau vakai ki hotau fanga tokouá mo e fanga tuofāfiné taki taha ʻoku nau mahuʻinga, pea ʻoku tau talitali lelei fiefia ‘ha sipi mole’ ʻoku foki mai kia Sihova. (Saame 119:176) ʻOku tau fakamoʻoniʻi ʻetau ʻofa ʻi hotau fanga tokouá mo e fanga tuofāfiné ʻaki ʻetau foaki atu kitautolu, hangē ko hono fai ha tokoni ʻi he taimi ʻoku nau fiemaʻu ai iá. (1 Sio. 3:17) ʻI heʻetau fakafeangai ki he niʻihi kehé ʻi he founga anga-ʻofá, ʻoku tau talangofua ai ki he lao ʻa e Kalaisí.

13-14. (a) Hangē ko ia ʻoku hiki ʻi he Sione 13:34, 35, ko e hā naʻe fekauʻi ʻe Sīsū ki hono kau muimuí ke fakahāhaá, pea ko e hā ko ha fekau foʻou ai ení? (e) ʻOku anga-fēfē ʻetau talangofua ki he fekau foʻoú?

¹³ Tolú, naʻe fekauʻi ʻe Sīsū hono kau muimuí ke nau fakahāhā ʻa e ʻofa feilaulauʻi-kitá. (Lau ʻa e Sione 13:34, 35.) ʻOku foʻou ʻa e fekau ʻa Sīsuú koeʻuhi ʻoku fiemaʻu ai ke tau fakahāhā ʻa e faʻahinga ʻofa naʻe ʻikai fiemaʻu ia ʻi he Lao naʻe ʻoange ʻe he ʻOtuá ki ʻIsilelí: ʻOfa ʻi ho kaungātuí ʻo hangē ko e ʻofa ʻa Sīsū ʻiate kimoutolú. ʻOku fiemaʻu ki ai ha ʻofa feilaulauʻi-kita.c ʻOku fiemaʻu ke tau ʻofa ʻi hotau fanga tokouá mo e fanga tuofāfiné ʻo laka ange ia ʻi heʻetau ʻofa ʻiate kitautolú. Kuo pau ke tau ʻofa ʻiate kinautolu ʻo aʻu ki ha tuʻunga ko ʻetau loto-lelei ke foaki ʻetau moʻuí koeʻuhi ko kinautolu, hangē ko ia naʻe fai ʻe Sīsū maʻatautolú.

¹⁴ Lēsoní: ʻOku anga-fēfē ʻetau talangofua ki he fekau foʻoú? Ko hono ʻai mahinó, ʻaki ʻetau fai ʻa e ngaahi feilaulau maʻa hotau fanga tokouá mo e fanga tuofāfiné. ʻOku tau loto-lelei ke ʻikai ngata pē ʻetau fai ʻa e ngaahi feilaulau lalahí​—ke foaki atu ʻetau moʻuí—​kae pehē foki ki he fanga kiʻi feilaulau iiki ange. Ko e fakatātaá, ʻi heʻetau fai ha feinga makehe ke ʻave ha tokoua pe tuofefine taʻumotuʻa ki he fakatahá, pe ko ʻetau loto-lelei ke tuku ʻetau saiʻia fakafoʻituituí kae ʻai ha taha ʻokú te ʻofa ai ke fiefia, pe ko ʻetau mālōlō mei he ngāue fakamāmaní ke tokoni ʻi ha fakatamaki, ʻoku tau talangofua ai ki he lao ʻa e Kalaisí. ʻOku tau toe tokoni ai ke ʻai ʻetau fakatahaʻangá ko ha feituʻu ʻe lava ke ongoʻi malu ai ʻa e tokotaha taki taha.

15-17. (a) Naʻe anga-fēfē hono fakahaaʻi ʻe he tōʻonga ʻa Sīsuú ʻene ongoʻi fekauʻaki mo e fakamaau totonú? (e) ʻE lava fēfē ke tau faʻifaʻitaki kia Sīsū?

¹⁵ Ko hono ngāueʻaki ʻa e “fakamaau totonú” ʻi he Tohi Tapú, ʻoku ʻuhinga tefitó ke fai ʻa e meʻa ʻoku lau ʻe he ʻOtuá ʻoku totonú pea fai pehē ʻo ʻikai filifilimānako. Ko e hā ʻoku lava ai ke tau pehē ʻoku pouaki ʻe he lao ʻa e Kalaisí ʻa e fakamaau totonú?

¹⁶ ʻUluakí, fakakaukau ki he anga hono fakahaaʻi ʻe he tōʻonga ʻa Sīsuú ʻene ongoʻi fekauʻaki mo e fakamaau totonú. ʻI hono taimí, ko e kau taki lotu Siú naʻa nau fehiʻa ʻi he faʻahinga ʻikai ko ha Siú, fehiʻanekinaʻi ʻa e kau Siu lāuvalé, pea taʻefakaʻapaʻapaʻi ʻa e kakai fefiné. Kae kehe, naʻe fakamaau totonu mo taʻefilifilimānako ʻa Sīsū ʻi heʻene fakafeangai ki he tokotaha kotoa. Naʻá ne tali ʻa e faʻahinga ʻikai ko ha Siu naʻa nau fakaofiofi kiate ia ʻi he tuí. (Māt. 8:5-10, 13) Naʻá ne malanga ʻo ʻikai tomuʻa fehiʻa ki he tokotaha kotoa, ʻa e koloaʻia mo e masiva. (Māt. 11:5; Luke 19:2, 9) Naʻe ʻikai ʻaupito te ne anga-fefeka pe anga-fakamamahi ʻi heʻene fakafeangai ki he kakai fefiné. ʻI hono kehé, naʻá ne anga-fakaʻapaʻapa mo anga-lelei ki he kakai fefiné, kau ai mo e faʻahinga naʻe vakai ki ai ʻoku nau taʻetāú.​—Luke 7:37-39, 44-50.

¹⁷ Lēsoní: ʻE lava ke tau faʻifaʻitaki kia Sīsū ʻaki ʻetau fakafeangai taʻefilifilimānako ki he niʻihi kehé pea malanga ki he tokotaha kotoa ʻoku nau loto-lelei ke fanongó​—tatau ai pē pe ko e hā honau puipuituʻa fakasōsiale pe fakalotú. ʻOku muimui ʻa e kau tangata Kalisitiané ki heʻene faʻifaʻitakiʻangá ʻaki ʻa e fakafeangai anga-fakaʻapaʻapa ki he kakai fefiné. ʻI heʻetau fai peheé, ʻoku tau talangofua ai ki he lao ʻa e Kalaisí.

18-19. Ko e hā naʻe akoʻi ʻe Sīsū fekauʻaki mo e fakamaau totonú, pea ko e hā ʻa e lēsoni ʻoku tau ako mei he meʻa naʻá ne akoʻí?

¹⁸ Uá, fakakaukau ki he meʻa naʻe akoʻi ʻe Sīsū fekauʻaki mo e fakamaau totonú. Naʻá ne akoʻi ʻa e ngaahi tefitoʻi moʻoni ʻe tokoni ki hono kau muimuí ke nau fakafeangai totonu ai ki he niʻihi kehé. Ko e fakatātaá, fakakaukau fekauʻaki mo e Lao Koulá. (Māt. 7:12) ʻOku tau loto kotoa ke fai mai ha fakafeangai totonu kiate kitautolu. Ko ia ai, ʻoku totonu ke tau fakafeangai totonu ki he niʻihi kehé. Kapau te tau fai pehē, ʻe ueʻi nai ai kinautolu ke nau fakafeangai totonu mai. Kae fēfē kapau kuo fai mai ha fakafeangai taʻetotonu kiate kitautolu? Naʻe toe akoʻi ʻe Sīsū hono kau muimuí ke nau falala ʻe ʻai ʻe Sihova “ke fakahoko ʻa e fakamaau totonú ki he faʻahinga [ko ia] ʻa ia ʻoku nau tangi kiate ia ʻi he ʻaho mo e pō.” (Luke 18:6, 7) Ko e ngaahi lea ko iá, ko ha talaʻofa: Ko hotau ʻOtua fakamaau totonú ʻokú ne lāuʻilo ki he ngaahi ʻahiʻahi ʻoku tau fehangahangai mo ia ʻi he ngaahi ʻaho fakaʻosi ko ení, pea te ne ʻai ke fakahoko ʻa e fakamaau totonú kiate kitautolu ʻi heʻene taimi totonú.​—2 Tes. 1:6.

¹⁹ Lēsoní: ʻI heʻetau muimui ʻi he ngaahi tefitoʻi moʻoni naʻe akoʻi mai ʻe Sīsuú, te tau fakafeangai ai ki he niʻihi kehé ʻi ha founga totonu. Pea kapau kuo maʻukovia kitautolu ʻi ha fakamaau taʻetotonu ʻi he māmani ʻo Sētané, ʻe lava ke tau maʻu ʻa e fiemālie ʻi hono ʻiloʻi ʻe ʻai ʻe Sihova ke fakahoko ʻa e fakamaau totonú kiate kitautolu.

20-21. (a) ʻOku totonu ke fēfē ʻa e fakafeangai ʻa e faʻahinga ʻoku maʻu mafaí ki he niʻihi kehé? (e) ʻE lava fēfē ke fakahāhā ʻe ha husepāniti ʻa e ʻofa feilaulauʻi-kitá, pea ʻoku totonu ke fēfē ʻa e fakafeangai ha tamai ki heʻene fānaú?

²⁰ ʻI he malumalu ʻo e lao ʻa e Kalaisí, ʻoku totonu ke fēfē ʻa e fakafeangai ʻa e faʻahinga ʻoku maʻu mafaí ki he niʻihi kehé? Koeʻuhi ko e ʻofá ʻa e makatuʻunga ki he lao ko iá, ko e faʻahinga ʻoku maʻu mafaí kuo pau ke nau fakangeingeiaʻi ʻa e faʻahinga ʻoku nau tokangaʻí pea fakafeangai kiate kinautolu ʻi ha founga anga-ʻofa. Kuo pau ke nau manatuʻi ʻoku fiemaʻu ʻe Kalaisi ke tau fakahāhā ʻa e ʻofá ʻi he meʻa kotoa ʻoku tau faí.

²¹ ʻI he fāmilí. Ko e husepānití ʻoku fiemaʻu ke ne ʻofa ʻi hono uaifí “ʻo hangē tofu pē ko ia ʻoku fai ʻe he Kalaisí ki he fakatahaʻangá.” (ʻEf. 5:25, 28, 29) Kuo pau ke faʻifaʻitaki ha husepāniti ki he ʻofa feilaulauʻi-kita ʻa Kalaisí ʻaki hono fakamuʻomuʻa ʻa e fiemaʻu mo e lelei ʻa hono uaifí ʻi haʻaná. ʻE faingataʻa nai ki he kau tangata ʻe niʻihi ke fakahāhā ʻa e ʻofa peheé, koeʻuhí mahalo naʻe ʻikai ʻohake kinautolu ʻi ha ʻātakai naʻe fakamahuʻingaʻi ai ʻa e fakafeangai totonú mo e anga-ʻofá. ʻE faingataʻa nai ke nau fakatonutonu ʻa e ngaahi tōʻonga koví, ka kuo pau ke nau fai ʻa e ngaahi liliu ko ení koeʻuhi ke talangofua ki he lao ʻa e Kalaisí. Ko ha husepāniti ʻokú ne fakahāhā ʻa e ʻofa feilaulauʻi-kitá ʻokú ne maʻu ʻa e fakaʻapaʻapa ʻa hono uaifí. Ko ha tamai ʻokú ne ʻofa moʻoni ʻi heʻene fānaú heʻikai ʻaupito te ne ngaohikoviʻi kinautolu ʻaki ʻa e meʻa ʻokú ne leaʻakí pe faí. (ʻEf. 4:31) ʻI hono kehé, ʻokú ne fakahaaʻi ʻene ʻofá mo e leleiʻiá ʻi he ngaahi founga ʻe ʻai ai ʻene fānaú ke nau ongoʻi malu. Ko ha tamai pehē ʻokú ne maʻu ʻa e ʻofa mo e falala ʻene fānaú.

22. Hangē ko ia ʻoku hā ʻi he 1 Pita 5:1-3, ko e “fanga sipi” ʻa hai, pea ʻoku totonu ke fēfē ʻa e fakafeangai kiate kinautolú?

²² ʻI he fakatahaʻangá. Kuo pau ke manatuʻi ʻe he kau mātuʻá ko e “fanga sipi” ʻoku ʻikai ʻanautolu. (Sione 10:16; lau ʻa e 1 Pita 5:1-3.) Ko e ngaahi kupuʻi lea “tākanga ʻa e ʻOtuá,” “ʻi he ʻao ʻo e ʻOtuá” mo e “tofiʻa ʻo e ʻOtuá” ʻoku fakamanatu ai ki he kau mātuʻá ko e fanga sipí ʻoku ʻa Sihova ia. ʻOkú ne loto ke nau fakafeangai ki heʻene fanga sipí ʻi he ʻofa mo e anga-fakaalaala. (1 Tes. 2:7, 8) Ko e kau mātuʻa ʻoku nau fakahoko honau fatongiá ʻi he ʻofá ʻoku nau maʻu ʻa e hōifua ʻa Sihová. ʻOku maʻu foki ʻe he kau mātuʻa ko iá ʻa e ʻofa mo e fakaʻapaʻapa ʻa honau fanga tokouá mo e fanga tuofāfiné.

23-24. (a) Ko e hā ʻa e fatongia ʻo e kau mātuʻá ʻi he ngāue ki ha faihala mafatukituki? (e) ʻI he ngāue ki he ngaahi faihala peheé, ko e hā ʻoku fiemaʻu ke manatuʻi ʻe he kau mātuʻá?

²³ Ko e hā ʻa e fatongia ʻo e kau mātuʻá ʻi he ngāue ki ha faihala mafatukituki? Ko honau fatongiá ʻoku kehe ia mei he kau fakamaau mo e kau mātuʻa naʻa nau ʻi he malumalu ʻo e Lao naʻe ʻoange ʻe he ʻOtuá ki ʻIsilelí. ʻI he Lao ko iá, ko e kau tangata ʻosi fakanofó naʻe ʻikai ke ngata pē ʻenau ngāue ki he ngaahi meʻa fakalaumālié kae toe pehē ki he ngaahi hopo sivile mo e hopo hiá. Ka ʻi he malumalu ʻo e lao ʻa e Kalaisí, ko e fatongia ʻo e kau mātuʻá ko hono tokangaʻi pē ʻa e ngaahi tafaʻaki fakalaumālie ʻo e faihalá. ʻOku nau lāuʻilo ko e kau maʻu mafai fakamāmaní ʻoku nau maʻu ʻa e fatongia kuo ʻoange ʻe he ʻOtuá ke nau ngāue ki he ngaahi hopo sivilé mo e hopo hiá. ʻOku kau ki ai hono hilifaki ʻe he kau maʻu mafaí ʻa e tautea paʻanga pe tuku pilīsone.​—Loma 13:1-4.

²⁴ Ko e hā ʻa e fatongia ʻo e kau mātuʻá ʻi hono fakahoko ʻe ha taha ʻi he fakatahaʻangá ha angahala mamafa? ʻOku nau ngāueʻaki ʻa e Folofolá ke sivisiviʻi ʻaki ʻa e ngaahi meʻá pea fai ʻa e filí. ʻOku nau manatuʻi ko e ʻofá ʻa e makatuʻunga ki he lao ʻa e Kalaisí. ʻOku ueʻi ʻe he ʻofá ʻa e kau mātuʻá ke nau fakakaukau: Ko e hā ʻoku fiemaʻu ke fai ke tokoni ai ki ha taha ʻi he fakatahaʻangá kuo maʻukovia ʻi ha faihala? ʻI he fekauʻaki mo e tokotaha faihalá, ko e ʻofá ʻokú ne ueʻi ʻa e kau mātuʻá ke nau fakakaukau: ʻOkú ne fakatomala? ʻE lava ke tau tokoni kiate ia ke fakaleleiʻi hono vahaʻangatae mo Sihová?

25. Ko e hā ʻe lāulea ki ai ʻa e kupu hoko maí?

²⁵ He houngaʻia ē ko kitautolu ʻi heʻetau ʻi he malumalu ʻo e lao ʻa e Kalaisí! ʻI heʻetau ngāue mālohi kotoa ke talangofua ki aí, ʻoku tau tokoni ai ke ʻai ʻetau fakatahaʻangá ko ha feituʻu ʻa ia ʻe lava ke ongoʻi ai ʻe he tokotaha taki taha ʻoku ʻofaʻi mo fakamahuʻingaʻi kinautolu pea malu ai. Neongo ia, ʻoku tau moʻui ʻi ha māmani ʻa ia ko e “kau tangata fulikivanú” kuo nau ʻalu “mei he kovi ki he kovi ange.” (2 Tīm. 3:13) Kuo pau ke tau hanganaki ʻāʻā. ʻE lava fēfē ke tapua atu ʻe he fakatahaʻanga Kalisitiané ʻa e fakamaau totonu ʻa e ʻOtuá ʻi he fekuki mo e ngaohikovia fakaefehokotaki fakasino ʻo e fānaú? Ko e kupu hoko maí ʻe tali ai ʻa e fehuʻi ko iá.