Falala kia Sihova ʻi he Fekuki mo e Loto-Mafasiá

 1. Ko e hā kuo pau ai ke tau fanongo ki he fakatokanga ʻa Sīsuú?

ʻI HE kikite ʻa Sīsū fekauʻaki mo e ngaahi ʻaho fakaʻosí, naʻá ne pehē: “Tokanga kiate kimoutolu ke ʻoua ʻaupito naʻa hoko homou lotó ʻo mafatukituki ʻi he . . . ngaahi loto-moʻua ʻo e moʻuí.” (Luke 21:34) ʻOku fiemaʻu ke tau fanongo ki he fakatokanga ko iá. Ko e hā hono ʻuhingá? ʻI he lolotongá ni, kuo pau ke tau fekuki mo e ngaahi palopalema fakalotomafasia tatau mo ia ʻoku fehangahangai mo e tokotaha kotoa.

 2. Ko e hā ʻa e ngaahi palopalema fakalotomafasia ʻoku fehangahangai mo hotau fanga tokouá mo e fanga tuofāfiné?

² ʻI he taimi ʻe niʻihi, kuo pau ke tau fehangahangai mo e ngaahi palopalema fakalotomafasia lahi ʻi he taimi tatau. Fakakaukau ki he ngaahi fakatātā ko ení. Ko ha Fakamoʻoni ko John,b naʻá ne maʻu ha mahaki neave, naʻá ne loto-mamahi lahi ʻi hono liʻaki ia ʻe hono uaifí hili ʻena nofo mali ʻi he taʻu ʻe 19. Pea ko hono ongo ʻofefiné naʻe ʻikai ke na toe tauhi kia Sihova. Ko ha ongo meʻa mali ko Bob mo Linda naʻá na fehangahangai mo ha ngaahi pole kehe. Naʻe fakatou mole ʻena ngāué pea mole leva hona ʻapí. Tānaki atu ki he ngaahi palopalema ko iá, naʻe ʻiloʻi naʻe maʻu ʻe Linda ha mahaki mafu ʻa ia naʻe lava ke mate ai pea naʻe ʻi ai mo ha mahaki ʻe taha naʻe kamata ke ne uesia hono sisitemi maluʻí.

 3. Fakatatau ki he Filipai 4:6, 7, ko e hā ʻoku lava ke tau fakapapauʻí?

³ ʻE lava ke tau fakapapauʻi ko hotau Tokotaha-Fakatupú mo e Tamai ʻofá, ʻa Sihova, ʻokú ne mahinoʻi ʻa e anga hono uesia kitautolu ʻe he loto-mafasiá. Pea ʻokú ne loto ke tokoniʻi kitautolu ke fekuki mo e ngaahi pole ʻoku tau fehangahangai mo iá. (Lau ʻa e Filipai 4:6, 7.) ʻOku ʻi he Folofola ʻa e ʻOtuá ʻa e ngaahi fakamatala lahi ʻoku lave ai ki he ngaahi pole naʻe kātekina ʻe heʻene kau sevānití. ʻOku toe lēkooti ai ʻa e founga hono tokoniʻi kinautolu ʻe Sihova ke fekuki mo e ngaahi tuʻunga fakalotomafasia ko iá. Tau lāulea angé ki ha ngaahi fakatātā ʻe niʻihi.

 4. Ko e hā ʻa e ngaahi pole naʻe fehangahangai mo ʻIlaisiaá, pea naʻe anga-fēfē ʻene ongoʻi fekauʻaki mo Sihová?

⁴ Naʻe tauhi ʻa ʻIlaisiā kia Sihova ʻi ha taimi faingataʻa pea fehangahangai mo e ngaahi pole mafatukituki. Ko Tuʻi ʻĒhapi, ko e taha ia ʻo e ngaahi tuʻi taʻefaitōnunga ʻi he hisitōlia ʻo ʻIsilelí, naʻá ne mali mo Sisipeli, ko ha tokotaha lotu fulikivanu kia Pēali. Naʻá na fakafonu ʻa e fonuá ʻaki ʻa e lotu Pēalí pea tāmateʻi ʻa e kau palōfita tokolahi ʻa Sihova. Naʻe malava ke hola ʻa ʻIlaisiā. Naʻá ne toe hao ʻi ha honge lahi ʻaki ʻene falala kia Sihova. (1 Tuʻi 17:2-4, 14-16) Tānaki atu ki aí, naʻe falala ʻa ʻIlaisiā kia Sihova ʻi heʻene fehangahangai mo e kau palōfita mo e kau lotu kia Pēalí. Naʻá ne fakaʻaiʻai ʻa e kau ʻIsilelí ke nau tauhi kia Sihova. (1 Tuʻi 18:21-24, 36-38) Naʻe maʻu ʻe ʻIlaisiā ʻa e fakamoʻoni lahi naʻe poupouʻi ia ʻe Sihova ʻi he lolotonga ʻa e ngaahi taimi fakalotomafasia ko iá.

5-6. Fakatatau ki he 1 Tuʻi 19:1-4, naʻe anga-fēfē ongoʻi ʻa ʻIlaisiaá? Naʻe anga-fēfē hono fakahaaʻi ʻe Sihova naʻá ne ʻofa ʻia ʻIlaisiaá?

⁵ Lau ʻa e 1 Tuʻi 19:1-4. Neongo ia, naʻe ilifia ʻa ʻIlaisiā ʻi he taimi naʻe fakamanamanaʻi ai ʻe Kuini Sisipeli ke tāmateʻi iá. Ko ia naʻá ne hola ki he feituʻu ko Pea-sipa. Naʻá ne hoko ʻo loto-siʻi ʻaupito ʻo ne “kole ke ne mate.” Ko e hā naʻá ne ʻai ia ke ne ongoʻi peheé? Ko ʻIlaisiaá ko ha tangata taʻehaohaoa, “ko ha tangata ia naʻá ne maʻu ʻa e ngaahi ongo ʻo hangē pē ko kitautolú.” (Sēm. 5:17) Mahalo naʻá ne ongoʻi naʻe lōmekina ia ʻe he loto-mafasiá pea helaʻia lahi. ʻOku hā ngali naʻe fakakaukau ʻa ʻIlaisiā ko ʻene ngaahi feinga ke pouaki ʻa e lotu maʻá naʻe kulanoa, ʻikai ha meʻa ʻi ʻIsileli naʻe fakalakalaka, pea ko ia toko taha pē naʻe kei tauhi kia Sihová. (1 Tuʻi 18:3, 4, 13; 19:10, 14) Te tau ʻohovale nai ʻi he ongoʻi peheni ʻa e palōfita faitōnunga ko ení. Ka naʻe mahinoʻi ʻe Sihova ʻa e ngaahi ongoʻi ʻa ʻIlaisiaá.

⁶ Naʻe ʻikai ngāhiʻi ʻe Sihova ʻa ʻIlaisiā ʻi heʻene fakahaaʻi ʻene ngaahi ongoʻí. ʻI hono kehé, naʻá ne tokoniʻi ʻa ʻIlaisiā ke toe maʻu hono mālohí. (1 Tuʻi 19:5-7) Ki mui ai, naʻe fakatonutonu anga-ʻofa ʻe Sihova ʻa e fakakaukau ʻa ʻIlaisiaá ʻaki hono fakahaaʻi ange ʻa Hono mālohi fakaofó. Naʻe toe tala ange ʻe Sihova ʻoku kei ʻi ai ʻa e toko 7,000 ʻi ʻIsileli naʻa nau fakafisi ke lotu kia Pēali. (1 Tuʻi 19:11-18) ʻI he ngaahi founga ʻaonga, naʻe fakahaaʻi ange ʻe Sihova kia ʻIlaisiā ʻokú Ne ʻofa ʻiate ia.

 7. Ko e hā ʻa e fakapapau ʻoku tau maʻu mei he founga hono tokoniʻi ʻe Sihova ʻa ʻIlaisiaá?

⁷ ʻOkú ke fekuki mo ha tuʻunga fakalotomafasia? He fakafiemālie ē kiate kitautolu ke ʻiloʻi naʻe mahinoʻi ʻe Sihova ʻa e ngaahi ongoʻi ʻa ʻIlaisiaá! ʻOku fakapapauʻi mai ai kiate kitautolu ʻokú ne toe mahinoʻi ʻetau ngaahi fāinga fakaeongó. ʻOkú ne ʻiloʻi hotau ngātangá, pea ʻoku aʻu ʻo ne ʻiloʻi ʻa e meʻa ʻoku tau fakakaukau ki aí mo ʻetau ongoʻí. (Saame 103:14; 139:3, 4) Kapau ʻoku tau faʻifaʻitaki kia ʻIlaisiā ʻaki ʻetau falala kia Sihova, te ne tokoniʻi kitautolu ke fekuki mo e ngaahi palopalema ʻokú ne ʻai ke tau loto-mafasiá.​—Saame 55:22.

 8. ʻE anga-fēfē hono tokoniʻi koe ʻe Sihova ke fekuki mo e loto-mafasiá?

⁸ ʻOku lava ke ʻai koe ʻe he loto-mafasiá ke ke fakakaukau taʻepau, ʻo ʻai koe ke ke ongoʻi loto-siʻi. Kapau ʻe hoko ia, manatuʻi ʻe tokoniʻi koe ʻe Sihova ke ke fekuki mo e loto-mafasiá. ʻE anga-fēfē ʻene tokoniʻi koé? ʻOkú ne fakaafeʻi koe ke vahevahe ange kiate ia hoʻo ngaahi hohaʻá. Pea te ne tali hoʻo tangi ki ha tokoní. (Saame 5:3; 1 Pita 5:7) Ko ia lotu maʻu pē kia Sihova fekauʻaki mo hoʻo ngaahi palopalemá. Heʻikai te ne lea fakahangatonu atu kiate koe ʻo hangē ko ʻene lea kia ʻIlaisiaá, ka te ne lea atu kiate koe fakafou ʻi heʻene Folofolá, ʻa e Tohi Tapú, pea fakafou ʻi heʻene kautahá. Ko e ngaahi fakamatala ʻokú ke lau ʻi he Tohi Tapú ʻoku lava ke ne fakafiemālieʻi koe pea ʻoatu ʻa e ʻamanaki. Pehē foki, ko ho fanga tokouá mo e fanga tuofāfiné ʻe lava ke nau fakalototoʻaʻi koe.​—Loma 15:4; Hep. 10:24, 25.

 9. ʻE anga-fēfē nai hano tokoniʻi kitautolu ʻe ha kaungāmeʻa falalaʻanga?

⁹ ʻI he taimi naʻe tala ai ʻe Sihova kia ʻIlaisiā ke vahevahe hono fatongiá kia ʻIlaisá, naʻá Ne tokonaki ange heni kia ʻIlaisiaá ha kaumeʻa lelei, ʻa ia ʻoku ʻikai ha veiveiua naʻá ne tokoniʻi ia ke ne fuesia ʻene ngaahi mafasia fakaeongó. Pehē foki, ʻi he taimi ʻoku tau talanoa ai ki ha kaungāmeʻa falalaʻanga, ʻe lava ke ne tokoniʻi kitautolu ke fuesia ʻetau ngaahi mafasia fakaeongó. (2 Tuʻi 2:2; Pal. 17:17) Kapau ʻokú ke ongoʻi ʻoku ʻikai ha taha ke ke talanoa ki ai, lotu kia Sihova ke ne tokoniʻi koe ke maʻu ha Kalisitiane matuʻotuʻa ʻa ia ʻe lava ke ne poupouʻi fakaeongo koe.

10. ʻOku anga-fēfē hono ʻomai ʻe he hokosia ʻa ʻIlaisiaá ʻa e ʻamanakí, pea ʻoku lava fēfē ke tokoniʻi kitautolu ʻe he talaʻofa ʻi he ʻAisea 40:28, 29?

¹⁰ Naʻe tokoniʻi ʻe Sihova ʻa ʻIlaisiā ke fekuki mo e loto-mafasiá pea ke tauhi faitōnunga ʻi he laui taʻu. Ko e hokosia ʻa ʻIlaisiaá ʻoku ʻomai ai ʻa e ʻamanaki kiate kitautolu. Te tau fou nai ʻi he ngaahi taimi fakamafasia lahi ʻa ia ʻe ʻai ai ke tau mātuʻaki helaʻia fakaesino mo fakaeongo. Neongo ia, kapau ʻoku tau falala kia Sihova, te ne ʻomai ʻa e mālohi ʻoku fiemaʻu kiate kitautolu ke tauhi ai pē kiate iá.​—Lau ʻa e ʻAisea 40:28, 29.

11-13. Naʻe anga-fēfē hono uesia ʻe he loto-mafasiá ʻa e kau sevāniti ʻe toko tolu ʻa e ʻOtuá ʻi he kuohilí?

¹¹ Naʻe ʻi ai mo e faʻahinga kehe ʻi he Tohi Tapú naʻa nau fehangahangai foki mo e loto-mafasia lahi. Ko e fakatātaá, naʻe kātekina ʻe ʻAna ʻa e tuʻunga fakamā ʻo ʻene paʻá pehē foki ki hono lumaʻi anga-fakamamahi ia ʻe Pēniná. (1 Sām. 1:2, 6) Ko e loto-mafasia lahi ʻa ʻAná naʻe ʻai ai ke ne mātuʻaki loto-mamahi ʻo ne tangi pea aʻu ʻo ne taʻefiefie kai.​—1 Sām. 1:7, 10.

¹² ʻI he taimi ʻe niʻihi, naʻe lōmekina ʻe he loto-mafasiá ʻa Tuʻi Tēvita. Fakakaukau ki he ngaahi pole naʻá ne fehangahangai mo iá. Naʻe lōmekina ia ʻe he ongoʻi halaiá koeʻuhi ko e ngaahi fehālaaki lahi naʻá ne faí. (Saame 40:12) Naʻe fakafepakiʻi ia ʻe hono foha ʻofeina ko ʻApisalomé, ʻo taki atu ai ki he mate ʻa ʻApisalomé. (2 Sām. 15:13, 14; 18:33) Pea ko e taha ʻo e ngaahi kaumeʻa ofi taha ʻo Tēvitá naʻá ne lavakiʻi ia. (2 Sām. 16:23–17:2; Saame 55:12-14) Ko e lahi ʻo e ngaahi saame naʻe hiki ʻe Tēvitá ʻoku fakamatalaʻi ai ʻene ngaahi ongoʻi loto-siʻí pehē foki ki heʻene falala taʻetoeueʻia kia Sihová.​—Saame 38:5-10; 94:17-19.

¹³ Ki mui ai naʻe meheka ʻa e tokotaha-tohi-saame ʻe taha fekauʻaki mo e moʻui ʻa e kau fulikivanú. Kuo pau pē nai ko ha hako ia ʻo e Līvai ko ʻĒsafé, pea naʻá ne ngāue ʻi he “feituʻu toputapu maʻongoʻonga ʻo e ʻOtuá.” Naʻe tofanga ʻa e tokotaha-tohi-saame ko ení ʻi he mafasia fakaeongo, ʻo fakatupunga ai ia ke ne loto-mamahi mo taʻefiemālie. Naʻe aʻu ʻo kamata ke ne veiveiua ʻi he ngaahi tāpuaki naʻe haʻu mei he tauhi ki he ʻOtuá.​—Saame 73:2-5, 7, 12-14, 16, 17, 21.

14-15. Ko e hā ʻoku tau ako mei he fakatātā Fakatohitapu ʻe tolú fekauʻaki mo e hanga kia Sihova ki ha tokoní?

¹⁴ Ko e kau lotu moʻoni ʻe toko tolu naʻa tau toki lave ki aí naʻa nau falala kotoa ki he tokoni ʻa Sihová. Naʻa nau vahevahe ʻenau loto-moʻuá kiate ia fakafou ʻi he lotu tōtōivi. Naʻa nau lea tauʻatāina kiate ia fekauʻaki mo e ngaahi ʻuhinga naʻa nau mātuʻaki loto-mafasia aí. Pea naʻe hokohoko atu ʻenau ʻalu ki he feituʻu faiʻanga lotu ʻo Sihová.​—1 Sām. 1:9, 10; Saame 55:22; 73:17; 122:1.

¹⁵ Naʻe fakafeangai manavaʻofa ʻa Sihova ki he tokotaha taki taha ʻo kinautolú. Naʻe maʻu ʻe ʻAna ʻa e nonga ʻo e fakakaukaú. (1 Sām. 1:18) Naʻe tohi ʻe Tēvita: “ʻOku lahi ʻa e faingataʻaʻia ʻa e tokotaha māʻoniʻoní, ka ʻoku fakahaofi ia ʻe Sihova mei ai kotoa.” (Saame 34:19) Pea naʻe ongoʻi ʻe he tokotaha-tohi-sāmé ki mui ai ko Sihova naʻá ne “puke ʻa [hono] nima toʻomataʻú,” ʻo tataki ia ʻaki ʻa e faleʻi anga-ʻofa. Naʻá ne hiva: “Ko e meʻa kiate aú, ko e fakaofiofi ki he ʻOtuá ʻoku lelei ia kiate au. Kuó u ʻai ʻa e ʻEiki Hau ko Sihová ko hoku hūfangaʻanga.” (Saame 73:23, 24, 28) Ko e hā ʻoku tau ako mei he ngaahi fakatātā ko ení? ʻI he taimi ʻe niʻihi, te tau fuesia nai ʻa e ngaahi palopalema te ne ʻai ke tau loto-mafasia. Ka ʻe lava ke tau fekuki mo ia kapau te tau fakalaulauloto ki he founga kuo tokoniʻi ai ʻe Sihova ʻa e niʻihi kehé, falala kiate ia ʻi he lotu, pea talangofua kiate ia ʻaki hono fai ʻa e meʻa ʻokú ne kole mai ke tau faí.​—Saame 143:1, 4-8.

16-17. (a) Ko e hā ʻoku ʻikai totonu ai ke tau fakamavaheʻi kitautolú? (e) ʻE lava fēfē ke tau toe maʻu ʻa e mālohí?

¹⁶ Ko e fakatātā ʻe tolu ko iá ʻoku akoʻi mai ai ha lēsoni mahuʻinga ʻe taha​—ʻoku totonu ke ʻoua te tau fakamavaheʻi kitautolu meia Sihova mo ʻene kakaí. (Pal. 18:1) Ko Nancy, naʻá ne hokosia ʻa e loto-mafasia lahi ʻi hono liʻaki ia ʻe hono husepānití, ʻokú ne pehē: “Naʻe lahi ʻa e ngaahi ʻaho naʻe ʻikai pē te u loto ke sio pe lea ki ha taha. Ka, ko e lahi ange ʻeku fakamavaheʻi aú, ko e lahi ange ia ʻeku loto-mamahí.” Naʻe liliu ʻa e ngaahi meʻá ʻi he taimi naʻe kumi ai ʻe Nancy ki he ngaahi founga ke tokoni ai ki he niʻihi kehe ʻa ia naʻa nau hokosia ʻa e ngaahi palopalemá. ʻOkú ne pehē: “Naʻá ku fanongo ki hono fakamatalaʻi ʻe he niʻihi kehé ʻenau ngaahi fāingá. Naʻá ku fakatokangaʻi ʻi he taimi ʻoku ou ongoʻi kaungāongoʻi lahi ange ai mo kinautolú, naʻe siʻi ange ai ʻeku tokanga ki heʻeku ngaahi palopalemá.”

¹⁷ ʻE lava ke tau toe maʻu ʻa e mālohi ʻi heʻetau maʻu ʻa e ngaahi fakataha ʻa e fakatahaʻangá. ʻI heʻetau ʻi he ngaahi fakatahá, ʻoku tau ʻoatu ai kia Sihova ha toe ngaahi faingamālie ke ne hoko ko hotau “tokoní mo [hotau] fakafiemālié.” (Saame 86:17) ʻOkú ne fakaivimālohiʻi ai kitautolu fakafou ʻi hono laumālie māʻoniʻoní, ko ʻene Folofolá mo ʻene kakaí. Ko e ngaahi fakatahá ʻoku ʻomai ai ha faingamālie ke tau fiefia ʻi he “fefakalototoʻaʻaki.” (Loma 1:11, 12) Naʻe pehē ʻe ha tuofefine ko Sophia: “Kuo tokoniʻi au ʻe Sihova mo ʻetau fetokouaʻakí ke u kātaki. Ko e meʻa mahuʻinga taha kiate aú ko e ngaahi fakataha ʻa e fakatahaʻangá. Naʻá ku fakatokangaʻi ko e lahi ange ʻeku kau ki he ngāue fakafaifekaú mo e fakatahaʻangá, ko e lelei ange ia ʻa e malava ke u fekuki mo e loto-mafasiá mo e hohaʻá.”

18. Kapau ʻoku tau ongoʻi loto-siʻi, ko e hā ʻe lava ke ʻomai ʻe Sihová?

¹⁸ ʻI he taimi ʻoku tau ongoʻi loto-siʻi aí, tau manatuʻi ʻoku ʻikai ngata pē ʻi hono talaʻofa mai ʻe Sihova ha fakafiemālie tuʻuloa ʻi he kahaʻú ka ʻokú ne toe ʻomai ʻa e tokoni ke tau fekuki ai mo e loto-mafasiá he taimí ni. ʻOkú ne ʻomai kiate kitautolu “ʻa e holi mo e mālohi” ke ikuʻi ʻaki ʻa e ngaahi ongoʻi loto-siʻí mo e siva ʻa e ʻamanakí.​—Fil. 2:13.

19. Ko e hā ʻa e fakapapau ʻoku ʻomai kiate kitautolu ʻi he Loma 8:37-39?

¹⁹ Lau ʻa e Loma 8:37-39. ʻOku fakapapauʻi mai ʻe he ʻapositolo ko Paulá heʻikai ʻaupito lava ʻe ha meʻa ke ne fakamavaheʻi kitautolu mei he ʻofa ʻa e ʻOtuá. ʻE lava fēfē ke tau tokoniʻi hotau fanga tokoua mo e fanga tuofāfine ʻoku nau feinga ke fekuki mo e loto-mafasiá? Ko e kupu hono hokó ʻe sivisiviʻi ai ʻa e founga ʻe lava ke tau faʻifaʻitaki ai kia Sihova ʻi hono fakahāhā ʻa e manavaʻofá pea poupouʻi hotau fanga tokouá mo e fanga tuofāfiné ʻi he taimi ʻoku nau loto-mafasia aí.