Tokoniʻi ʻa e Niʻihi Kehé ke Fekuki mo e Loto-Mafasiá

 1. ʻE lava fēfē ke tau faʻifaʻitaki ki heʻetau Tamai anga-ʻofá, ʻa Sihova?

ʻOKU ʻofa lahi ʻa Sihova ʻiate kitautolu. (Sione 3:16) ʻOku tau loto ke faʻifaʻitaki ki heʻetau Tamai anga-ʻofá. Ko ia ʻoku tau feinga ke fakahāhā ʻa e “kaungāongoʻi, ʻofa fakatokoua, [mo e] manavaʻofa” ki he tokotaha kotoa kae tautautefito ki he faʻahinga “ʻoku fekauʻaki mo kitautolu ʻi he tuí.” (1 Pita 3:8; Kal. 6:10) ʻI he taimi ʻoku fehangahangai ai hotau fāmili fakalaumālié mo e ngaahi pole fakalotomafasiá, ʻoku tau loto ke tokoni kiate kinautolu.

 2. Ko e hā te tau lāulea ki ai ʻi he kupu ko ení?

² Ko e faʻahinga kotoa ʻoku nau loto ke hoko ko e konga ʻo e fāmili ʻo Sihová te nau fehangahangai mo e ngaahi tuʻunga fakalotomafasia. (Mk. 10:29, 30) Ngalingali te tau fekuki mo e ngaahi ʻahiʻahi lahi ange ʻi he ofi ʻa e ngataʻanga ʻo e fokotuʻutuʻu ko ení. ʻE lava fēfē ke tau fetokoniʻaki? Tau lāulea angé ki he meʻa ʻe lava ke tau ako mei he fakamatala Fakatohitapu fekauʻaki mo Lote, Siope mo Nāomi. Te tau toe lāulea ki he niʻihi ʻo e ngaahi pole ʻoku fehangahangai mo hotau fanga tokoua mo e fanga tuofāfine ʻi he ʻaho ní pea sio ki he founga ʻe lava ke tau tokoniʻi ai kinautolu ke fekuki mo e ngaahi palopalemá.

 3. Hangē ko ia ʻoku fakamoʻoniʻi ʻi he 2 Pita 2:7, 8, ko e hā ʻa e fili fakavalevale naʻe fai ʻe Loté, pea ko e hā hono olá?

³ Naʻe fai ʻe Lote ha fili fakavalevale ʻi heʻene fili ke nofo ʻi he lotolotonga ʻo e kakai mātuʻaki ʻulungaanga taʻetaau ʻo Sōtomá. (Lau ʻa e 2 Pita 2:7, 8.) Naʻe lakalakaimonū ʻa e feituʻú, ka naʻe hokosia ʻe Lote ʻa e ngaahi faingataʻa lahi ʻi heʻene hiki ki Sōtomá. (Sēn. 13:8-13; 14:12) Ngalingali naʻe hoko hono uaifí ʻo saiʻia ʻaupito ʻi he koló pe ko e niʻihi ʻo e kakai naʻe nofo ʻi aí ʻo ne talangataʻa ai kia Sihova. Naʻe mole ʻene moʻuí ʻi hono ʻohifo ʻe he ʻOtuá ʻa e ʻuha afi mo e sūlifa ki he feituʻú. Pea fakakaukau ki he ongo ʻofefine ʻo Loté. Naʻá na fakamaʻu mo e ongo tangata ʻa ia naʻá na mate ʻi Sōtoma. Naʻe mole meia Lote ʻa hono ʻapí, ko ʻene koloá pea ko e fakamamahi tahá, ko hono uaifí. (Sēn. 19:12-14, 17, 26) Lolotonga ʻa e vahaʻa taimi fakalotomafasia ko ení, naʻe mole ʻa e anga-kātaki ʻa Sihova kia Loté? ʻIkai.

 4. Naʻe anga-fēfē hono fakamoʻoniʻi ʻe Sihova ʻene anga-kātaki kia Loté? (Sio ki he fakatātā ʻi he takafí.)

⁴ Neongo naʻe fili ʻa Lote ke nofo ʻi Sōtoma, naʻe manavaʻofa ʻa Sihova ʻo fekauʻi atu ha ongo ʻāngelo ke fakahaofi ia mo hono fāmilí. Kae kehe, ʻi he ʻikai ke talangofua he taimi pē ko iá ki he fekau fakavavevave ʻa e ongo ʻāngeló ke mavahe mei Sōtomá, naʻe ‘kei fakatuotuai’ pē ʻa Lote. Naʻe pau ke puke ʻe he ongo ʻāngeló ʻa hono nimá pea tokoni kiate ia mo hono fāmilí ke hola mei he koló. (Sēn. 19:15, 16) Naʻe tala ange leva ʻe he ongo ʻāngeló kiate ia ke hola ki he feituʻu moʻungaʻiá. Ka ʻi he ʻikai talangofua kia Sihová, naʻe kole ʻe Lote ke ne hola pē ki he kolo ofi maí. (Sēn. 19:17-20) Naʻe fanongo anga-kātaki ʻa Sihova pea fakaʻatā ʻa Lote ke ʻalu ki he kolo ko iá. Naʻe hoko ki mui ʻa Lote ʻo ilifia ʻi he nofo ʻi aí pea hiki ki he feituʻu moʻungaʻiá, ki he feituʻu tofu pē naʻe tala ange ʻe Sihova ke ne hiki ki ai ʻi he ʻuluaki taimí. (Sēn. 19:30) He anga-kātaki fakaofo ē naʻe fakahaaʻi ʻe Sihová! ʻE lava fēfē ke tau faʻifaʻitaki kiate ia?

5-6. ʻE lava fēfē ke tau ngāueʻaki ʻa e 1 Tesalonaika 5:14 ʻi heʻetau faʻifaʻitaki ki he ʻOtuá?

⁵ Hangē ko Loté, ʻe fai nai ʻe ha taha ʻi hotau fāmili fakalaumālié ha fili fakavalevale pea fakatupunga ai ʻa e ngaahi palopalema mafatukituki kiate ia. Kapau ʻe hoko ia, ʻe fēfē haʻo fakafeangai? ʻE fakataueleʻi nai kitautolu ke tala ange kiate ia ʻokú ne utu pē ʻa e meʻa kuó ne toó, ʻa ia ko e moʻoni ia. (Kal. 6:7) Kae kehe, ʻe lelei ange kapau te tau tokoniʻi ia ʻo hangē ko e founga naʻe tokoniʻi ai ʻe Sihova ʻa Loté. Anga-fēfē?

⁶ Naʻe fekauʻi atu ʻe Sihova ʻa e ongo ʻāngeló ʻo ʻikai ke fakatokanga pē kia Lote ka ke toe tokoni kiate ia ke hao mei he fakatamaki naʻe tō ki Sōtomá. Pehē pē, ʻe fiemaʻu nai ke tau fakatokanga ki hotau tokouá kapau ʻoku tau sio ʻokú ne huʻu atu ki ha faingataʻa. Ka ʻoku tau toe loto nai ke malava ʻo tokoni kiate ia. Neongo kapau ʻoku tuai ʻene ngāueʻaki ʻa e akonaki Fakatohitapu ʻokú ne maʻú, ʻoku fiemaʻu ke tau anga-kātaki. Hoko ʻo hangē ko e ongo ʻāngeló. ʻI he ʻikai ke foʻi pea mavahe mei hotau tokouá, ʻoku totonu ke tau kumi ki ha ngaahi founga ʻaonga ke tokoni ai kiate ia. (1 Sio. 3:18) ʻE fiemaʻu nai ke tau puke hono nimá, hangē ko e laú, pea tokoniʻi ia ke ne ngāueʻaki ʻa e faleʻi lelei kuo ʻoange kiate iá.​—Lau ʻa e 1 Tesalonaika 5:14.

 7. ʻE lava fēfē ke tau faʻifaʻitaki ki he anga ʻo e vakai ʻa Sihova kia Loté?

⁷ Naʻe mei lava ke tokangataha ʻa Sihova ki he ngaahi taʻehaohaoa ʻa Loté. ʻI hono kehé, naʻá ne fakamānavaʻi ki mui ʻa e ʻapositolo ko Pitá ke ne lave kia Lote ko ha tangata māʻoniʻoni. He fiefia ē ko kitautolu ʻi hono fakangaloʻi ʻe Sihova ʻetau ngaahi fehālaakí! (Saame 130:3) ʻE lava ke tau faʻifaʻitaki ki he anga ʻo e vakai ʻa Sihova kia Loté? Kapau te tau tokangataha ki he ngaahi ʻulungaanga lelei ʻa hotau fanga tokouá mo e fanga tuofāfiné, te tau hoko ai ʻo anga-kātaki lahi ange kiate kinautolu. Pea ngalingali ʻe faingofua ange ai ke nau tali ʻa e tokoni ʻoku tau ʻoatú.

 8. Ko e hā ʻe ueʻi kitautolu ʻe he manavaʻofá ke faí?

⁸ ʻI he ʻikai hangē ko Loté, ko Siope naʻe ʻikai ke ne faingataʻaʻia ko haʻane fili fakavalevale naʻe fai. Ka, naʻá ne hokosia ha ngaahi palopalema mafatukituki, mole ʻene koloá, ko hono tuʻunga ʻi he feituʻú pea mo ʻene tuʻunga moʻui leleí. Ko e kovi tahá, ko ia mo hono uaifí naʻe mole kotoa ʻena fānaú ʻi he mate. Naʻe toe tukuakiʻi ʻa Siope ʻe hono ngaahi kaungāmeʻa loi ʻe toko tolu. Ko e hā ʻa e ʻuhinga ʻe taha naʻe ʻikai ke fakahāhā ai ʻe he kau fakafiemālie loi ʻe toko tolu ʻo Siopé ʻa e manavaʻofá kiate iá? Naʻe ʻikai ke nau feinga ke mahinoʻi ʻa e meʻa naʻe hoko moʻoni kiate iá. Ko hono olá, naʻa nau maʻu ʻa e fakamulituku hala pea fakamāuʻi anga-fefeka ʻa Siope. ʻE lava fēfē ke tau fakaʻehiʻehi mei hono fai ha fehālaaki meimei tatau? Hoko ʻo ʻiloʻi ko Sihova pē ʻokú ne ʻilo ʻa e moʻoni kotoa fekauʻaki mo e meʻa ʻoku hoko ki ha taha. Fanongo tokanga ki he meʻa ʻoku leaʻaki ʻe ha tokotaha faingataʻaʻia. Fai ʻa e meʻa lahi ange ʻi he fanongo pē ki heʻene ngaahi leá; feinga foki ke ke ongoʻi ʻene mamahí. Ko e toki taimi pē ia ʻe lava ai ke ke fakahaaʻi ʻa e kaungāongoʻi ki ho tokouá pe tuofefiné.

 9. Ko e hā ʻe taʻofi kitautolu ʻe he manavaʻofá mei hono faí, pea ko e hā hono ʻuhingá?

⁹ Ko e manavaʻofá te ne taʻofi kitautolu mei hono fakamafola ha ngaahi lau fakatupu maumau fekauʻaki mo e ngaahi palopalema ʻoku fehangahangai mo e niʻihi kehé. Ko ha tokotaha ngutu-lau ʻoku ʻikai te ne langa hake ʻa e fakatahaʻangá; ʻokú ne holoki hifo ia. (Pal. 20:19; Loma 14:19) ʻOku ʻikai te ne anga-lelei ka ʻokú ne taʻefakakaukau, pea ko ʻene ngaahi leá ʻoku lava ke fakatupu maumau ki ha tokotaha ʻokú ne lolotonga faingataʻaʻia. (Pal. 12:18; ʻEf. 4:31, 32) He lelei ange ē ke tau fakasio ʻa e ngaahi ʻulungaanga lelei ʻo ha tokotaha pea fakakaukau fekauʻaki mo e founga ʻe lava ke tau tokoniʻi ai ia ke fekuki mo e ngaahi ʻahiʻahí!

10. Ko e hā ʻoku akoʻi mai ʻe he fakamatala ʻi he Siope 6:2, 3?

¹⁰ Lau ʻa e Siope 6:2, 3. ʻI he taimi ʻe niʻihi, naʻe fai ʻe Siope ha ‘lea taʻefakakaukauʻi.’ Ka ki mui ange naʻá ne fakafoki ʻa e ngaahi meʻa ʻe niʻihi naʻá ne leaʻakí. (Siope 42:6) Hangē ko Siopé, ko ha tokotaha he ʻahó ni ʻokú ne kātekina ha palopalema fakalotomafasia te ne fai nai ha lea taʻefakakaukauʻi, ʻo leaʻaki ʻa e ngaahi meʻa te ne fakaʻiseʻisa nai ai ʻamui ange. ʻOku totonu ke fēfē ʻetau fakafeangaí? ʻI he ʻikai ke hoko ʻo fakaangá, ʻoku totonu ke tau hoko ʻo manavaʻofa. Manatuʻi naʻe ʻikai fakataumuʻa ʻe Sihova ki ha taha ʻo kitautolu ke hokosia ʻa e ngaahi palopalema mo e loto-mafasia ʻoku tau fehangahangai mo ia he ʻaho ní. Ko ia ʻoku ʻuhinga lelei leva kapau ʻe lea taʻefakakaukauʻi ha sevāniti faitōnunga ʻa Sihova ʻi heʻene fekuki mo ha loto-mafasia lahi. Neongo kapau te ne leaʻaki ʻa e ngaahi meʻa ʻoku ʻikai tonu fekauʻaki mo Sihova pe ko kitautolu, ʻoku totonu ke ʻoua te tau vave ke ʻita ʻiate ia pe fakamāuʻi ia ʻi heʻene lea peheé.​—Pal. 19:11.

11. ʻE lava fēfē ke faʻifaʻitaki ʻa e kau mātuʻá kia ʻIlaiū ʻi hono ʻoatu ʻa e faleʻí?

¹¹ ʻI he taimi ʻe niʻihi, ko ha tokotaha ʻokú ne fekuki mo ha palopalema fakalotomafasia ʻoku fiemaʻu foki kiate ia ha faleʻi ʻe niʻihi pe ko ha akonaki ʻaonga. (Kal. 6:1) ʻE lava fēfē ke fakahoko eni ʻe he kau mātuʻá? ʻOku lelei ke nau faʻifaʻitaki kia ʻIlaiū, ʻa ia naʻá ne fanongo kia Siope fakataha mo e kaungāongoʻi lahi. (Siope 33:6, 7) Naʻe toki ʻoatu ʻe ʻIlaiū ʻa e faleʻí ʻi he hili ʻene mahinoʻi ʻa e fakakaukau ʻa Siopé. Ko e kau mātuʻa ʻoku nau muimui ki he faʻifaʻitakiʻanga ʻa ʻIlaiuú te nau fanongo tokanga pea feinga ke mahinoʻi ʻa e meʻa ʻoku hoko ki he tokotahá. Pea ʻi heʻenau ʻoatu ʻa e faleʻí, ʻoku ngalingali ange ai te nau aʻu ki he loto ʻo e tokotaha fanongó.

12. Naʻe anga-fēfē hono uesia ʻa Nāomi ʻi he mate hono husepānití mo ʻene ongo tamá?

¹² Ko Nāomí ko ha fefine mateaki naʻá ne ʻofa kia Sihova. Ka ʻi he hili ʻa e mate hono husepānití mo ʻene ongo tamá, naʻá ne loto ke liliu hono hingoá mei he Nāomí ki he “Mala,” ʻoku ʻuhingá ko e “Kona.” (Lute 1:3, 5, 20, fkm. ʻi lalo, 21) Ko Lute ko e uaifi ʻo e tama ʻa Nāomí naʻá ne pīkitai kiate ia ʻi heʻene fekuki mo e ngaahi ʻahiʻahí. Naʻe ʻikai ngata pē hono tokonaki ʻe Lute ʻa e tokoni ʻaonga ka naʻá ne toe lea fakanonga kia Nāomi. Naʻe fakahaaʻi ʻe Lute ʻene ʻofa mo e poupou kia Nāomí ʻaki ʻa e ngaahi lea faingofua mo loto-moʻoni.​—Lute 1:16, 17.

13. Ko e hā ʻoku fiemaʻu ai ʻe he faʻahinga ʻoku mole honau hoa malí ʻi he maté ʻetau tokoní?

¹³ ʻI he taimi ʻoku mole ai ʻi he maté ha hoa mali ʻo ha taha ʻi hotau fāmili fakalaumālié, ʻokú ne fiemaʻu ʻetau poupoú. Ko ha ongo meʻa mali ʻe lava ke fakahoa kinaua ki ha ongo fuʻu ʻakau ʻokú na tupu vāofi fakataha. ʻI he faai atu ʻa e ngaahi taʻú, kuo kamata ke fetuiaki ʻa e ngaahi aka ʻo e ongo fuʻu ʻakaú. ʻI he taimi ʻoku taʻaki ai ha fuʻu ʻakau ʻe taha pea maté, ko e fuʻu ʻakau ʻe tahá ʻe lava ke uesia lahi ʻaupito. ʻI he tuʻunga meimei tatau, ʻi he taimi ʻoku mole ai ha hoa ʻo ha taha ʻi he maté, te ne ongoʻi nai ʻa e mamahi fakaeongo lahi ʻi ha taimi fuoloa. Ko Pola,b ʻa ia naʻe mate fakafokifā hono husepānití, ʻokú ne pehē: “Naʻe liliu fakaʻaufuli ʻeku moʻuí, pea siva ʻeku ʻamanakí. Naʻe mole hoku kaumeʻa lelei tahá. Naʻá ku talanoa ki hoku husepānití ʻa e meʻa kotoa pē. Naʻá ma fiefia fakataha peá ne tokoniʻi au ʻi he ngaahi taimi faingataʻá. Naʻá ne fakafiemālieʻi au ʻi heʻeku mamahí. Ko e tā moʻoni ia naʻe oʻo kiate au.”

14-15. ʻE lava fēfē ke tau fai ha fakanonga ki ha tokotaha kuo mate hono hoa malí?

¹⁴ ʻE lava fēfē ke tau fai ha fakanonga ki ha tokotaha kuo mate hono hoa malí? Ko e fuofua meʻa ʻoku totonu ke tau faí ko e lea kiate ia, neongo te ke ongoʻi mā nai pe taʻepauʻia ʻi he meʻa ke leaʻakí. Ko Pola, naʻe lave ki ai ki muʻá, ʻokú ne pehē: “ʻOku ou mahinoʻi ko e maté ʻokú ne ʻai ʻa e kakaí ke nau ongoʻi taʻefiemālie. ʻOku nau hohaʻa naʻa hala nai ʻa e meʻa te nau leaʻakí. Ka ʻoku kovi ange ʻa e ʻikai leaʻaki ha meʻá ʻi he leaʻaki ha meʻa ʻoku ongo faikehé.” ʻOku ʻikai nai ke ʻamanekina ʻe ha tokotaha mamahi ke tau leaʻaki ha meʻa makehe. ʻOku pehē ʻe Pola: “ʻOku ou houngaʻia moʻoni ʻi he pehē mai pē ʻe he ngaahi kaumeʻá, ‘ʻOku ou ongoʻi moʻoni hoʻo mamahí.’”

¹⁵ Ko William, ʻa ia naʻe mate hono uaifí ʻi he ngaahi taʻu kuo maliu atú, ʻokú ne pehē: “ʻOku ou houngaʻia ʻi hono fakalau mai ʻe he niʻihi kehé ʻa e ngaahi manatu melie fekauʻaki mo hoku uaifí; ʻoku fakapapauʻi mai ai kiate au naʻe ʻofeina ia mo fakaʻapaʻapaʻi. Ko e poupou ko ení ko ha tokoni lahi ia kiate au. Naʻá ku ongoʻi fiemālie moʻoni, koeʻuhi naʻe mahuʻinga ʻaupito ʻa hoku uaifí kiate au peá ne hoko ko ha konga lahi ʻo ʻeku moʻuí.” ʻOku fakamatala ha uitou ko Bianca: “ʻOku ou ongoʻi fiemālie ʻi he taimi ʻoku lotu ai ha taha mo au pea vahevahe mai ha veesi Tohi Tapu ʻe taha pe ua. ʻOku tokoni ʻenau talanoa fekauʻaki mo hoku husepānití pea mo e taimi ʻoku nau fanongo mai ai kiate au ʻi heʻeku talanoa fekauʻaki mo iá.”

16. (a) Ko e hā ʻoku totonu ke tau tokonaki maʻa ha tokotaha kuo mole hano ʻofaʻanga ʻi he maté? (e) Fakatatau ki he Sēmisi 1:27, ko e hā ʻa e fatongia ʻoku tau maʻú?

¹⁶ Hangē pē ko e pīkitai ʻa Lute ki he uitou ko Nāomí, ʻoku fiemaʻu ke tau tokonaki ʻa e poupou hokohoko ki he faʻahinga ʻoku mole hanau ʻofaʻanga ʻi he maté. Ko Pola, naʻe lave ki ai ki muʻá, ʻokú ne pehē: “ʻI he hili pē mate hoku husepānití, naʻá ku maʻu ʻa e ngaahi poupou lahi. ʻI he faai atu ʻa e taimí, naʻe kamata ke foki ʻa e kakaí ki heʻenau moʻui anga-mahení. Kae kehe, naʻe liliu fakaʻaufuli ʻeku moʻuí. Ko ha tokoni lahi ia ʻi hono ʻiloʻi ʻe he niʻihi kehé ko ha tokotaha mamahi ʻoku fiemaʻu kiate ia ʻa e poupou ʻi he laui māhina​—naʻa mo e laui taʻu—​hili ʻa e mate hono hoá.” Ko e moʻoni, ʻoku kehekehe ʻa e tokotaha taki taha. Ko e niʻihi ʻoku hā ngali vave ʻenau feʻunuʻaki ki honau ngaahi tuʻunga foʻoú. Kae kehe, ki he niʻihi, ko e ngāue kotoa pē naʻa nau fai ki muʻa mo honau ʻofaʻangá ʻoku hoko ia ko ha langaʻi mamahi kiate kinautolu. ʻOku kehekehe pē ʻa e mamahi ʻa e kakaí. Tau manatuʻi ʻoku ʻomai ʻe Sihova ʻa e monū mo e fatongia ke tau tokanga ki he faʻahinga kuo mole honau hoá ʻi he maté.​—Lau ʻa e Sēmisi 1:27.

17. Ko e hā ʻoku fiemaʻu ai ʻe he faʻahinga kuo liʻaki kinautolu ʻe honau ngaahi hoá ʻetau poupoú?

¹⁷ Ko e ngaahi hoa mali ʻe niʻihi kuo pau ke nau fekuki mo e mamahi mo e loto-mafasia lahi tupu mei hono liʻaki kinautolu ʻe honau hoá. Ko Joyce, naʻe liʻaki ia ʻe hono husepānití kae ʻalu mo ha fefine ʻe taha, ʻokú ne pehē: “Ko e mamahi ʻi he veté naʻe meimei kovi ange ia ʻi ha mate hoku husepānití. Kapau naʻá ne mate ʻi ha fakatuʻutāmaki pe ʻi haʻane puke, naʻe ʻikai nai toe ʻi ai haʻane fili ʻi he tuʻunga ko iá. Ka ʻi he tuʻunga ko ení, naʻe fili hoku husepānití ke ne liʻaki au. Naʻá ku ongoʻi fakamāʻia mo ngalivale.”

18. Ko e hā ʻe lava ke tau fai ke tokoni ai ki he faʻahinga ʻoku ʻikai ke toe ʻi ai hanau hoa malí?

¹⁸ ʻI he taimi ʻoku tau fai ai ʻa e fanga kiʻi ngāue anga-lelei ki he faʻahinga ʻoku ʻikai ke toe ʻi ai hanau hoa malí, ʻoku tau fakapapauʻi ai kiate kinautolu ʻetau ʻofá. ʻOku nau fiemaʻu he taimí ni ʻa e ngaahi kaumeʻa lelei ʻo laka ange ia ʻi ha toe taimi ki muʻa. (Pal. 17:17) ʻE lava fēfē ke ke fakamoʻoniʻi hoʻo hoko ko honau kaumeʻá? ʻE lava ke ke fakaafeʻi kinautolu ki ha houa kai maʻamaʻa. Pea ʻe lava ke ke fakamoleki nai ha taimi mo kinautolu ʻi ha fakafiefia pe ʻi he ngāue fakafaifekaú. ʻE lava foki ke ke fakaafeʻi kinautolu mei he taimi ki he taimi ke kau fakataha mo koe ʻi he lotu fakafāmilí. Kapau te ke fai pehē, te ke ʻai ai ʻa Sihova ke fiefia, he ʻokú ne “ofi . . . ki he loto-laveá” pea ʻokú ne hoko “ko ha tokotaha maluʻi ʻo e kau uitoú.”​—Saame 34:18; 68:5.

19. ʻI he fakakaukau ki he 1 Pita 3:8, ko e hā ʻoku tau fakapapauʻi ke faí?

¹⁹ ʻOku vavé ni ke “ngalo ʻa e ngaahi mamahi” kotoa, ʻi he taimi ʻe pule mai ai ʻa e Puleʻanga ʻo e ʻOtuá ki he māmaní. ʻOku tau fakatuʻotuʻa atu ki he taimi ʻa ia “ʻe ʻikai toe manatua ʻa e ngaahi meʻa muʻá, pea ʻe ʻikai ke ʻalu hake ia ʻi he lotó.” (ʻAi. 65:16, 17) Ka ʻi he teʻeki ai ke aʻu ki he ʻaho ko iá, tau fepoupouaki pea fakamoʻoniʻi ʻi heʻetau leá mo ʻetau ngāué ʻoku tau ʻofa ʻi he faʻahinga kotoa ʻi hotau fāmili fakalaumālié.​—Lau ʻa e 1 Pita 3:8.