Toetuʻú​—Ko ha ʻAmanaki Papau!

1-2. Ko e hā ʻa e ʻamanaki fakaofo ʻoku maʻu ʻe he kau lotu moʻoní?

KO E ʻamanakí ʻoku mātuʻaki mahuʻinga. Ko e ʻamanaki ʻa e kakai ʻe niʻihi ʻoku fakatefito ʻi hono maʻu ha nofo mali lavameʻa, ʻohake ha fānau moʻui lelei pe ko e fakaakeake mei ha puke lahi. Ko kitautolu Kalisitiané ʻoku tau fakaʻamua nai ʻa e ngaahi meʻa tatau. Ka ko e ʻamanaki ʻoku tau koloaʻaki lahi tahá ʻoku mahulu atu ia ai; ʻoku kau ki ai hotau kahaʻu tuʻuloá pehē ki he kahaʻu hotau ngaahi ʻofaʻanga kuo maté.

² Naʻe pehē ʻe he ʻapositolo ko Paulá: “ʻOku ou maʻu ʻa e ʻamanaki ki he ʻOtuá . . . ʻe ʻi ai ʻa e toetuʻu fakatouʻosi ʻa e māʻoniʻoní mo e taʻemāʻoniʻoní.” (Ngā. 24:15) Naʻe ʻikai ko Paula ʻa e tokotaha ke ne fuofua lave fekauʻaki mo e ʻamanaki ʻo e toetuʻú. Naʻe lave foki ki ai ʻa e pēteliake ko Siopé. Naʻá ne tuipau ʻe manatua ia ʻe he ʻOtuá pea toe fokotuʻu hake ia.​—Siope 14:7-10, 12-15.

 3. Ko e hā ʻe lava ai ke tau maʻu ʻaonga mei he 1 Kolinitō vahe 15?

³ “Ko e toetuʻu ʻa e kau maté” ko e konga ia ʻo e “ngaahi akonaki,” pe “tokāteline tefito” ʻa e kau Kalisitiané. (Hep. 6:1, 2) Ko e fakamatala ʻa Paula ki he toetuʻú ʻoku hiki ia ʻi he 1 Kolinitō vahe 15. Ko e meʻa naʻá ne tohí kuo pau pē naʻá ne langa hake ʻa e kau Kalisitiane ʻi he ʻuluaki senitulí. Pea te ne langa hake kitautolu pea ʻai ke mālohi ʻa e ʻamanaki kuo fuoloa nai ʻetau maʻú.

 4. Ko e hā ʻa e kī ki heʻetau ʻamanaki ki hotau ngaahi ʻofaʻanga kuo maté?

⁴ Ko e toetuʻu ʻa Sīsū Kalaisí ko e kī ia ki heʻetau ʻamanaki ki hotau ngaahi ʻofaʻanga kuo maté. Naʻe hoko ia ko e konga ʻo e “ongoongo lelei” naʻe talaki ʻe Paula ki he kau Kolinitoó. (1 Kol. 15:1, 2) Ko hono moʻoní, naʻá ne pehē kapau heʻikai tui ha Kalisitiane ki he toetuʻu ko iá, ko ʻene tuí ʻe taʻeʻaonga. (1 Kol. 15:17) Ko e tui ki he toetuʻu ʻa Sīsuú ʻoku mātuʻaki mahuʻinga ki heʻetau ʻamanaki faka-Kalisitiané.

5-6. Ko e hā ʻa e ʻuhinga kiate kitautolu ʻa e ngaahi lea ʻi he 1 Kolinitō 15:3, 4?

⁵ ʻI he kamata ʻo e fakamatala ʻa Paula ki he toetuʻú, naʻá ne ʻohake ai ha moʻoniʻi meʻa ʻe tolu. (1) Naʻe “pekia ʻa Kalaisi koeʻuhi ko ʻetau ngaahi angahalá.” (2) “Naʻe telio ia.” (3) “Naʻe fokotuʻu hake ia ʻi he ʻaho hono tolú ʻo fakatatau ki he Folofolá.”​—Lau ʻa e 1 Kolinitō 15:3, 4.

⁶ Ko e hā ʻa e ʻuhinga kiate kitautolu ʻa e pekia, telio mo e toetuʻu ʻa Sīsuú? Naʻe tomuʻa tala ʻe he palōfita ko ʻAiseá ko e Mīsaiá ʻe “tuʻusi ia mei he fonua ʻo e kau moʻuí” pea “foaki kiate ia ha tanuʻanga ʻi he tanuʻanga ʻo e kau fulikivanú.” Neongo ia, naʻe kau ki ai ʻa e meʻa lahi ange. Naʻe toe pehē ʻe ʻAisea ko e Mīsaiá te ne “ʻave ʻa e angahala ʻa e kakai tokolahi.” Naʻe fai eni ʻe Sīsū fakafou ʻi he huhuʻí. (ʻAi. 53:8, 9, 12; Māt. 20:28; Loma 5:8) Ko ia ko e pekia, telio mo e toetuʻu ʻa Sīsuú ʻoku tokonaki mai ai ha makatuʻunga fefeka ki heʻetau ʻamanaki ke fakatauʻatāinaʻi mei he angahalá mo e maté pea toe fakataha mo hotau ngaahi ʻofaʻanga kuo maté.

7-8. Ko e hā ʻoku tokoni ki he kau Kalisitiané ke fakapapauʻi naʻe toetuʻu ʻa Sīsuú?

⁷ Ko ʻetau ʻamanaki ki he toetuʻú ʻoku fehoanaki ia mo e toetuʻu ʻa Sīsuú, ko ia ʻoku fiemaʻu ke tau tuipau naʻe toetuʻu ʻa Sīsū. Ko e hā ʻe lava ke tau fakapapauʻi ai naʻe toe fokotuʻu mai ʻe Sihova ʻa Sīsuú?

⁸ Naʻe tokolahi ʻa e kau fakamoʻoni sio tonu naʻa nau fakapapauʻi naʻe toetuʻu ʻa Sīsū. (1 Kol. 15:5-7) Ko e fuofua fakamoʻoni naʻe lave ki ai ʻa Paulá ko e ʻapositolo ko Pitá (Kīfasi). Naʻe fakapapauʻi ʻe ha kulupu ʻo e kau ākongá naʻe sio ʻa Pita kia Sīsū naʻe toetuʻú. (Luke 24:33, 34) ʻIkai ko ia pē, ko e “toko Hongofulu-mā-uá,” ʻa e kau ʻapositoló, naʻa nau sio kia Sīsū hili hono fokotuʻu hake iá. Pea naʻe “hā [ʻa Kalaisi] ki he fanga tokoua ʻe toko 500 tupu ʻi he foʻi taimi pē ʻe taha,” mahalo ʻi he fakatahataha fakafiefia ʻi Kāleli ʻoku lave ki ai ʻi he Mātiu 28:16-20. Ko Sīsū naʻá ne toe “hā kia Sēmisi,” ʻoku ngalingali ko e tokoua faʻē taha ʻo Sīsuú, ʻa ia ʻi he kamatá naʻe ʻikai ke ne tui kia Sīsū ko e Mīsaiá. (Sione 7:5) Hili ʻa e sio kia Sīsū naʻe toetuʻú, naʻe tuipau ai ʻa Sēmisi. Ko e meʻa ʻoku fakatupu tokangá, ʻi he 55 T.S. nai ʻi hono hiki ʻe Paula ʻa e tohi ko ení, ko e tokolahi ʻo e kau fakamoʻoni sio tonu ʻi he toetuʻú naʻa nau kei moʻui, ko ia ko ha taha pē naʻe veiveiua naʻe lava ke ne talanoa ki he kau fakamoʻoni alafalalaʻanga ko ení.

 9. ʻI heʻetau lau ʻa e Ngāue 9:3-5, naʻe lava fēfē ke toe tānaki atu ʻe Paula ha fakamoʻoni fekauʻaki mo e toetuʻu ʻa Sīsuú?

⁹ Ki mui ai, naʻe hā ʻa Sīsū kia Paula. (1 Kol. 15:8) Ko Paula (Saula) naʻá ne fononga atu ki Tāmasikusi ʻi he taimi naʻá ne fanongo ai ki he leʻo ʻo Sīsū naʻe toetuʻú pea mamata kiate ia ʻi ha vīsone ʻi he lāngilangi fakahēvaní. (Lau ʻa e Ngāue 9:3-5.) Ko e hokosia ʻa Paulá naʻe toe tānaki atu ia ki he fakamoʻoni ko e toetuʻu ʻa Sīsuú ʻoku ʻikai ko ha talatupuʻa.​—Ngā. 26:12-15.

10. Ko e hā naʻe fai ʻe Paula ʻi heʻene tuipau naʻe fokotuʻu hake ʻa Sīsū mei he maté?

¹⁰ Ko e fakamoʻoni ʻa Paulá ʻe mātuʻaki fakatupu tokanga ki he niʻihi koeʻuhi naʻá ne fakatangaʻi ʻa e kau Kalisitiané ʻi ha taimi. ʻI he tuipau pē ʻa Paula naʻe fokotuʻu hake ʻa Sīsuú, naʻá ne fakaongosia ke fakatuipauʻi ʻa e moʻoni ko ení ki he niʻihi kehé. Naʻá ne kātekina ʻa e haha, tuku pōpula mo e vaka tūkia ʻi heʻene fakamafola ʻa e moʻoni ko Sīsū naʻe pekia ka naʻá ne toe moʻui. (1 Kol. 15:9-11; 2 Kol. 11:23-27) Naʻe fakapapauʻi moʻoni ʻe Paula ko Sīsū naʻe fokotuʻu hake mei he pekiá pea naʻá ne loto-lelei ke mate ʻi hono taukapoʻi ʻene tuí. ʻIkai ʻoku fakatuipauʻi koe ʻe he fakamoʻoni ko ení naʻe fokotuʻu hake ʻa Sīsū mei he maté? Pea ʻikai ʻoku fakaivimālohiʻi ai hoʻo tui ki he toetuʻú?

11. Ko e hā nai ʻa e ʻuhinga naʻe maʻu ai ʻe he niʻihi ʻi Kolinitō ʻa e fakakaukau hala fekauʻaki mo e toetuʻú?

¹¹ Ko e niʻihi ʻi he kolo Kalisi ko Kolinitoó naʻa nau maʻu ʻa e fakakaukau hala fekauʻaki mo e toetuʻú, ʻo aʻu ʻo nau pehē “ʻoku ʻikai ha toetuʻu ʻa e maté.” Ko e hā hono ʻuhingá? (1 Kol. 15:12) Ko e kau filōsefa ʻi ha kolo Kalisi ʻe taha, ko ʻAtenisi, naʻa nau lumaʻi ʻa e fakakaukau ko ia naʻe toetuʻu ʻa Sīsuú. Ko e fakakaukau peheé naʻe uesia nai ai ʻa e niʻihi ʻi Kolinitō. (Ngā. 17:18, 31, 32) Ko e niʻihi naʻa nau fakakaukau nai ki he toetuʻú ʻi ha ʻuhinga fakaefakatātā, ʻo pehē ko ha tokotaha ki muʻá naʻá ne “mate” ʻi he angahalá ka kuó ne toe “moʻui” ʻi he hoko ko ha Kalisitiane. Pe ko e hā pē ʻenau fakaʻuhingá, ko hono fakaʻikaiʻi ʻa e toetuʻú naʻe ʻuhinga iá ko ʻenau tuí naʻe taʻeʻaonga. Kapau naʻe ʻikai ke fokotuʻu hake ʻe he ʻOtuá ʻa Sīsū, naʻe ʻikai ha huhuʻi naʻe totongi pea naʻe kei angahala pē ʻa e taha kotoa. Ko ia ko e faʻahinga naʻa nau talitekeʻi ʻa e toetuʻú naʻe ʻikai haʻanau ʻamanaki papau.​—1 Kol. 15:13-19; Hep. 9:12, 14.

12. ʻI he fekauʻaki mo e 1 Pita 3:18, 22, naʻe anga-fēfē ʻa e kehe ʻa e toetuʻu ʻa Sīsuú mei he ngaahi toetuʻu ki muʻa ange aí?

¹² Naʻe ʻiloʻi tonu ʻe Paula naʻe “ʻosi fokotuʻu hake ʻa Kalaisi mei he maté.” Ko e toetuʻu ko iá naʻe māʻolunga ange ia ʻi he toetuʻu ʻa e faʻahinga naʻe fokotuʻu mai ki muʻa ange ke moʻui ʻi he māmaní pea nau toe mate. Naʻe pehē ʻe Paula ko Sīsū “ko e ʻuluaki fua ia ʻi he faʻahinga kuo mohe ʻi he maté.” ʻI he ʻuhinga fē naʻe hoko ai ʻa Sīsū ko e ʻuluaki fuá? Ko ia ʻa e ʻuluaki tokotaha ke fokotuʻu ko ha meʻamoʻui laumālie pea ko e ʻuluaki tokotaha ia ʻi he faʻahinga ʻo e tangatá ke ʻalu hake ki hēvaní.​—1 Kol. 15:20; Ngā. 26:23; lau ʻa e 1 Pita 3:18, 22.

13. Ko e hā ʻa e kehekehe ʻia ʻĀtama mo Sīsū naʻe lave ki ai ʻa Paulá?

¹³ ʻE lava fēfē ke toetuʻu mai ʻa e laui miliona ʻi he mate ʻa e tangata pē ʻe taha? ʻOku ʻomai ʻe Paula ha tali mahino ki he fehuʻi ko iá. ʻOkú ne lave ki he kehekehe ʻi he meʻa naʻe ʻomai ʻe ʻĀtama ki he faʻahinga ʻo e tangatá mo e meʻa ʻoku malava fakafou ʻia Kalaisí. ʻI he fekauʻaki mo ʻĀtamá, naʻe tohi ʻe Paula: “Naʻe fou mai ʻa e maté ʻi ha tangata.” ʻI he faiangahala ʻa ʻĀtamá, naʻá ne ʻomai ai ʻa e fakatamaki kiate ia mo hono hakó. ʻOku tau kei ongoʻi pē ʻa e nunuʻa fakamamahi ʻo ʻene talangataʻá. He kehe ē ko e ola ʻoku malava ke tau maʻu koeʻuhi ko hono fokotuʻu hake ʻe he ʻOtuá hono ʻAló! “Ko e toetuʻu ʻa e maté ʻoku toe fou mai ia ʻi ha tangata,” ko Sīsū. “ʻOku mate kotoa pē koeʻuhi ko ʻĀtama,” ko e fakaʻuhinga ia ʻa Paulá, “pehē foki ʻe toetuʻu kotoa pē koeʻuhi ko Kalaisi.”​—1 Kol. 15:21, 22.

14. ʻE fokotuʻu mai ʻa ʻĀtama? Fakamatalaʻi.

¹⁴ Ko e hā naʻe ʻuhinga ki ai ʻa Paula ʻi heʻene pehē “ʻoku mate kotoa pē koeʻuhi ko ʻĀtama”? Naʻe fakakaukau ʻa Paula ki he hako ʻo ʻĀtamá, ʻa ia naʻa nau maʻu tukufakaholo ʻa e angahalá mo e taʻehaohaoá meia ʻĀtama pea ko ia ai te nau mate. (Loma 5:12) Ko ʻĀtama heʻikai ke kau ʻi he faʻahinga “ʻe toetuʻu.” Ko e huhuʻi ʻa Kalaisí ʻoku ʻikai ʻufiʻufi ai ʻa e angahala ʻa ʻĀtamá, he ko ha tangata haohaoa ia naʻá ne talangataʻa loto-lelei ki he ʻOtuá. Ko e ola ʻo e talangataʻa ʻa ʻĀtamá ʻoku tatau pē mo e meʻa ʻe hoko ki he faʻahinga ʻe fakamāuʻi ʻe he “Foha ʻo e tangatá” “ko e fanga kosí” ʻa ia ʻe “tuʻusi taʻengata.”​—Māt. 25:31-33, 46; Hep. 5:9.

15. Ko hai ʻoku kau ʻi he “kotoa” ʻe “toetuʻu”?

¹⁵ Fakatokangaʻi naʻe pehē ʻe Paula “ʻe toetuʻu kotoa pē koeʻuhi ko Kalaisi.” (1 Kol. 15:22) Naʻe fai ʻe Paula ʻa e tohi ko ení ki he kau Kalisitiane pani ʻi Kolinitoó, ʻa ia ʻe fokotuʻu hake ki hēvani. Ko e kau Kalisitiane ko iá naʻe “fakatoputapuʻi ʻo fāʻūtaha mo Kalaisi Sīsuú, ʻa ia kuo ui ke hoko ko e kakai tapu.” Pea naʻe lave ʻa Paula ki he “faʻahinga . . . ko ia kuo nau mohe ʻi he maté ʻi he fāʻūtaha mo Kalaisí.” (1 Kol. 1:2; 15:18; 2 Kol. 5:17) ʻI ha tohi fakamānavaʻi ʻe taha, naʻe tohi ʻe Paula ko e faʻahinga ko ia ʻoku nau “mate hangē ko [Sīsuú]” te nau “toetuʻu foki hangē ko iá, pea ʻi he ongo foungá ni ʻoku tau fāʻūtaha ai mo ia.” (Loma 6:3-5) Naʻe fokotuʻu hake ʻa Sīsū ko ha laumālie pea ʻalu hake ki hēvani. Ko ia ko e meʻa tofu pē ia ʻe hoko ki he kotoa ʻoku “fāʻūtaha mo Kalaisí,” ʻa ia, ko e kotoa ia ʻo e kau Kalisitiane kuo pani ʻe he laumālié.

16. Ko e hā naʻe ʻuhinga ki ai ʻa Paula ʻi hono ui ʻa Sīsū “ko e ʻuluaki fua”?

¹⁶ Naʻe tohi ʻe Paula ko Kalaisi naʻe fokotuʻu hake “ko e ʻuluaki fua ia ʻi he faʻahinga kuo mohe ʻi he maté.” Manatuʻi ko e niʻihi kehe, hangē ko Lāsalosi, naʻe fokotuʻu mai ke moʻui he māmaní, ka ko Sīsū ʻa e ʻuluaki tokotaha naʻe fokotuʻu mei he maté ko ha laumālie pea maʻu ʻa e moʻui taʻengatá. ʻE lava ke fakahoa ia ki he ʻuluaki fua ʻo e utu-taʻu naʻe foaki ʻe he kau ʻIsilelí ki he ʻOtuá. ʻIkai ko ia pē, ʻi hono ui ʻa Sīsū “ko e ʻuluaki fua,” naʻe ʻuhinga ʻa Paula ʻe ʻi ai ʻa e niʻihi kehe ki mui ai ʻe fokotuʻu hake mei he maté ke moʻui ʻi hēvani. Ko e kau ʻapositolo mo e niʻihi kehe ʻoku “fāʻūtaha mo Kalaisí” te nau hangē ko Sīsuú. ʻI he taimi kotofá, te nau hokosia ha toetuʻu meimei tatau mo Sīsuú.

17. Ko fē ʻa e taimi naʻe maʻu ai ʻe he faʻahinga ʻoku “fāʻūtaha mo Kalaisí” honau pale fakahēvaní?

¹⁷ Ko e toetuʻu ki hēvani ʻa e faʻahinga ʻoku “fāʻūtaha mo Kalaisí” naʻe teʻeki ke kamata ia ʻi he taimi naʻe tohi ai ʻa Paula ki he kau Kolinitoó. ʻI hono kehé, naʻe tuhu ʻa Paula ki ha taimi ʻi he kahaʻú: “Ko e tokotaha taki taha ʻi hono fakahokohoko totonu: Ko Kalaisi ʻa e ʻuluaki fuá, hili iá ko e faʻahinga ʻoku ʻo e Kalaisí ʻi he lolotonga ʻo ʻene ʻi hení.” (1 Kol. 15:23; 1 Tes. 4:15, 16) ʻI he ʻahó ni ʻoku tau moʻui ʻi he lolotonga ʻo e ‘ʻi heni’ ʻa Kalaisi naʻe tomuʻa talá. ʻIo, ko e kau ʻapositolo mo e niʻihi ʻo e kau Kalisitiane pani ʻe he laumālié naʻa nau maté naʻe pau ke nau tatali ki he ʻi heni ʻa Kalaisí ke maʻu honau pale fakahēvaní pea toetuʻu hangē ko Sīsuú ʻo “fāʻūtaha ai mo ia.”

18. (a) Ko e hā ʻe lava ke tau pehē ai ʻe ʻi ai ha toetuʻu ʻe taha hili ʻa e toetuʻu ki hēvaní? (e) Hangē ko ia ʻoku fakahaaʻi ʻi he 1 Kolinitō 15:24-26, ko e hā ʻe hoko ʻi hēvaní?

¹⁸ Kae fēfē ʻa e kau Kalisitiane mateaki kotoa ʻoku ʻikai ke nau maʻu ʻa e ʻamanaki ʻo e moʻui ʻi hēvani mo Kalaisí? ʻOku nau maʻu foki ʻa e ʻamanaki ki ha toetuʻu. ʻOku pehē ʻi he Tohi Tapú ko Paula mo e niʻihi kehe ʻoku nau ʻalu ki hēvaní ʻoku nau kau ʻi ha “ʻuluaki toetuʻu mei he maté.” (Fil. 3:11) ʻIkai ʻoku fakahaaʻi ai ʻe ʻi ai ha toetuʻu ʻe taha? ʻE fehoanaki ia mo e meʻa naʻe leaʻaki ʻe Siope fekauʻaki mo hono kahaʻú. (Siope 14:15) “Ko e faʻahinga ʻoku ʻo e Kalaisí ʻi he lolotonga ʻo ʻene ʻi hení” te nau ʻi hēvani mo Sīsū ʻi he taimi te ne fakakaʻanga ai ʻa e founga-pule kotoa pē mo e mafai pea mo e mālohi kotoa pē. Naʻa mo e “maté, hotau fili fakaʻosí,” ʻe toʻo ʻosi atu. Ko hono moʻoní, ko e mate tukufakaholó heʻikai te ne toe uesia ʻa e faʻahinga ʻe fokotuʻu hake ki hēvaní. Kae fēfē ʻa e niʻihi kehé?​—Lau ʻa e 1 Kolinitō 15:24-26.

19. Ko e hā ʻoku lava ke ʻamanekina ʻe he faʻahinga ʻoku nau ʻamanaki ke moʻui he māmaní?

¹⁹ Ko e hā ʻoku lava ke ʻamanekina ʻe he faʻahinga ʻoku nau ʻamanaki ke moʻui he māmaní? ʻOku lava ke nau maʻu ʻa e ʻamanaki mei he lea ʻa Paulá: “ʻOku ou maʻu ʻa e ʻamanaki . . . ʻe ʻi ai ʻa e toetuʻu fakatouʻosi ʻa e māʻoniʻoní mo e taʻemāʻoniʻoní.” (Ngā. 24:15) ʻOku hā mahino, heʻikai lava ha tokotaha taʻemāʻoniʻoni ʻo hū ki hēvani, ko ia ʻoku tuhu ʻa e ngaahi lea ko iá ki ha toetuʻu ʻi he kahaʻú ʻi he māmaní.

20. Kuo anga-fēfē hono ʻai ke mālohi hoʻo ʻamanakí?

²⁰ ʻOku ʻikai ha veiveiua, “ʻe ʻi ai ʻa e toetuʻu”! Ko e faʻahinga ko ia ʻe fokotuʻu mai ke moʻui ʻi he māmaní te nau maʻu ʻa e ʻamanaki ke moʻui taʻengata ʻi heni. ʻE lava ke ke falala ki he talaʻofa ko iá. Ko e ʻamanaki ko iá ʻoku lava ke ne ʻoatu ʻa e fakafiemālie ʻi hoʻo fakakaukau atu ki ho ngaahi ʻofaʻanga kuo maté. ʻE fokotuʻu hake kinautolu mei he maté ʻi he lolotonga ʻa e pule ʻa Kalaisi mo e niʻihi kehe “ko e ngaahi tuʻi . . . ʻi he taʻu ʻe 1,000.” (Fkh. 20:6) ʻE lava foki ke ke tauhi maʻu ʻa e ʻamanaki papau kapau te ke mate ki muʻa ke kamata ʻa e Taʻu ʻe Taha Afé, ko ho kahaʻú ʻoku papau. Ko e ʻamanaki ko ení “ʻoku ʻikai iku ia ki he loto-mamahi.” (Loma 5:5) ʻE lava ke ne ʻai koe ke ke mālohi he taimí ni pea tokoni ki hoʻo fiefia ʻi he tauhi ki he ʻOtuá. Ka ʻoku ʻi ai ʻa e meʻa lahi ange ʻe lava ke tau ako mei he 1 Kolinitō vahe 15, hangē ko ia ʻe fakahaaʻi ʻi he kupu hono hokó.