ʻUluaki Kolinitō

15 Ko ia ʻoku ou fakamanatu atu kiate kimoutolu, fanga tokoua, ʻa e ongoongo lelei ko ia naʻá ku talaki atu kiate kimoutolú,+ ʻa ia foki naʻa mou talí, pea ko ia kuo mou tuʻu aí. 2 ʻOku fakafou foki ai homou fakahaofí ʻo kapau ʻoku mou piki maʻu ki he ongoongo lelei naʻá ku talaki atu kiate kimoutolú, tuku kehe kapau naʻe fai noaʻia pē hoʻomou hoko ko e kau tuí.

3 He ʻoku kau ʻi he ʻuluaki ngaahi meʻa naʻá ku tuku atu kiate kimoutolú ʻa e meʻa ko ia naʻá ku maʻu foki ʻe au, ʻa ia ko e pekia ʻa Kalaisi koeʻuhi ko ʻetau ngaahi angahalá ʻo fakatatau ki he Folofolá;+ 4 pea naʻe telio ia,+ ʻio, naʻe fokotuʻu hake ia+ ʻi he ʻaho hono tolú+ ʻo fakatatau ki he Folofolá;+ 5 pea naʻá ne hā kia Kīfasi,*+ pea hoko leva ai ki he toko Hongofulu-mā-uá.+ 6 Hili iá, naʻá ne hā ki he fanga tokoua ʻe toko 500 tupu ʻi he foʻi taimi pē ʻe taha,+ ʻa ia ko honau tokolahi tahá ʻoku nau kei ʻiate kitautolu, neongo kuo mohe ʻi he maté ʻa e niʻihi. 7 Hili iá naʻá ne hā kia Sēmisi,+ pea hoko ai ki he kau ʻapositoló kotoa.+ 8 Ka ko e fakamuimui tahá naʻá ne toe hā foki kiate au+ ʻo hangē ko ha hā ki ha taha fanauʻi taʻehokó.

9 He ko e siʻi taha au ʻi he kau ʻapositoló, pea ʻoku ʻikai te u taau mo hono ui ko ha ʻapositoló, koeʻuhi naʻá ku fakatangaʻi ʻa e fakatahaʻanga ʻa e ʻOtuá.+ 10 Ka ʻi he ʻofa maʻataʻatā ʻa e ʻOtuá ʻoku ou ʻi he tuʻunga ai ʻoku ou ʻi aí. Pea ko ʻene ʻofa maʻataʻatā kiate aú naʻe ʻikai ko e koto kulanoa, ka naʻá ku fakaongosia ʻo lahi ange ia ʻi he kotoa ʻo kinautolú; neongo ia naʻe ʻikai tupu ia ʻi ha mālohi pē ʻoʻoku ka ko e ʻofa maʻataʻatā ʻa e ʻOtuá ʻa ia ʻoku ʻiate aú. 11 Ko ia, pe ko au pe ko kinautolu ʻoku malangá, ʻoku mau leaʻaki kotoa ʻa e pōpoaki pē ʻe taha pea ko e founga ia naʻa mou tui aí.

12 Ko ia kapau leva kuo malangaʻaki ʻo pehē ko Kalaisí kuo fokotuʻu hake mei he maté,+ ʻoku anga-fēfē ai ʻa e pehē ʻe he niʻihi ʻi homou lotolotongá ʻoku ʻikai ha toetuʻu ʻa e maté? 13 Kapau, ko e moʻoni, ʻoku ʻikai ha toetuʻu ʻa e maté, tā kuo ʻikai ke fokotuʻu hake ʻa Kalaisi. 14 Ka ʻo kapau kuo ʻikai ke fokotuʻu hake ʻa Kalaisi, tā ko e koto kulanoa moʻoni pē ʻetau malangá, pea ko e kulanoa foki hoʻomou tuí. 15 ʻIkai ke ngata aí, ʻe lau ai kitautolu ia ko e kau fakamoʻoni loi fekauʻaki mo e ʻOtuá,+ koeʻuhí kuo tau faifakamoʻoni loi fekauʻaki mo e ʻOtuá ʻi heʻetau pehē naʻá ne fokotuʻu hake ʻa e Kalaisí,+ ʻa ia naʻe ʻikai te ne fokotuʻu hake ia ʻo kapau heʻikai moʻoni ke fokotuʻu hake ʻa e kau maté. 16 He kapau heʻikai ke fokotuʻu hake ʻa e maté, tā kuo ʻikai ke fokotuʻu hake ʻa Kalaisi. 17 ʻIkai ko ia pē, kapau kuo ʻikai ke fokotuʻu hake ʻa Kalaisi, tā ko hoʻomou tuí ʻoku taʻeʻaonga; ʻoku mou kei nofo pē ʻi hoʻomou ngaahi angahalá.+ 18 Pea ko e faʻahinga foki ko ia kuo nau mohe ʻi he maté ʻi he fāʻūtaha mo Kalaisí kuo nau ʻauha ʻo taʻengata.+ 19 Kapau ko ʻetau ʻamanaki kia Kalaisí ʻoku makatuʻunga ʻi he moʻui pē ko ení, ʻoku tau fakaʻofa ange kitautolu ʻi ha toe taha.

20 Ka ko eni kuo ʻosi fokotuʻu hake ʻa Kalaisi mei he maté, ko e ʻuluaki fua ia ʻi he faʻahinga kuo mohe ʻi he maté.+ 21 He koeʻuhi naʻe fou mai ʻa e maté ʻi ha tangata,+ ko e toetuʻu ʻa e maté ʻoku toe fou mai ia ʻi ha tangata.+ 22 ʻOku mate kotoa pē koeʻuhi ko ʻĀtama,+ pehē foki ʻe toetuʻu kotoa pē koeʻuhi ko Kalaisi.+ 23 Ka ko e tokotaha taki taha ʻi hono fakahokohoko totonu: Ko Kalaisi ʻa e ʻuluaki fuá,+ hili iá ko e faʻahinga ʻoku ʻo e Kalaisí ʻi he lolotonga ʻo ʻene ʻi hení.*+ 24 Pea ʻi he ngataʻangá, te ne tuku atu ai ʻa e Puleʻangá ki hono ʻOtuá mo e Tamaí, ʻi he ʻosi ia ʻene fakakaʻanga ʻa e founga-pule kotoa pē mo e mafai pea mo e mālohi kotoa pē.+ 25 He kuo pau ke ne pule ko e tuʻi kae ʻoua kuo tuku ʻe he ʻOtuá ʻa e ngaahi fili kotoa pē ki hono lalo vaʻé.+ 26 Pea ko e maté, hotau fili fakaʻosí, ʻe toʻo ʻosi atu ia.+ 27 He ko e ʻOtuá “naʻá ne fakamoʻulaloaʻi ʻa e ngaahi meʻa kotoa pē ki hono lalo vaʻé.”+ Ka ʻi heʻene pehē ko e ‘ngaahi meʻa kotoa pē kuo fakamoʻulaloaʻí,’+ ʻoku hā mahino ʻoku ʻikai ke fakakau heni ʻa e Tokotaha ko ia naʻá ne fakamoʻulaloaʻi ʻa e ngaahi meʻa kotoa pē kiate iá.+ 28 Ka ʻi he hili hono fakamoʻulaloaʻi ʻe he ʻOtuá ʻa e ngaahi meʻa kotoa pē ki hono ʻAló, ʻe hanga leva ʻe he ʻAló ʻo fakamoʻulaloaʻi foki mo ia tonu ki he ʻOtuá, ʻa ia naʻá ne fakamoʻulaloaʻi ʻa e ngaahi meʻa kotoa pē kiate iá,+ koeʻuhi ke hoko ʻa e ʻOtuá ʻo tāfataha ʻi he ngaahi meʻa kotoa pē ki he tokotaha kotoa pē.+

29 Ko ia ai, ko e hā ʻe fai ʻe he faʻahinga ko ia ʻoku papitaiso ki he maté?+ Kapau heʻikai teitei fokotuʻu hake ʻa e maté, ko e hā leva ʻoku nau papitaiso ai pē ki he maté? 30 Ko e hā leva hono ʻaonga ʻo ʻetau ʻi he tuʻunga fakatuʻutāmaki ʻi he houa* kotoa peé?+ 31 ʻOku ou fehangahangai fakaʻaho pē mo e maté. ʻOku pau ʻa e meʻá ni ʻo hangē pē ko ia ko ʻeku hākailangitau ʻiate kimoutolú, fanga tokoua, ʻa ia ʻoku ou maʻu ʻia Kalaisi Sīsū ko hotau ʻEikí. 32 Kapau kuó u tau mo e fanga manu fekai ʻi ʻEfesoó,+ ʻo hangē ko e kau tangata kehé, ko e hā hano lelei ia kiate au? Kapau heʻikai ke fokotuʻu hake ʻa e maté, “tuku ke tau kai ā mo inu, he ko ʻapongipongí te tau mate.”+ 33 ʻOua naʻa takihalaʻi kimoutolu. Ko e ngaahi feohi koví ʻokú ne maumauʻi ʻa e ngaahi anga ʻoku leleí.*+ 34 Mou hoko ʻo fakakaukau lelei ʻi ha founga māʻoniʻoni pea ʻoua te mou tōʻongaʻaki ʻa e angahalá, he ko e niʻihi ʻoku ʻikai haʻanau ʻilo ki he ʻOtuá. ʻOku ou lea atú ke ueʻi kimoutolu ke mou mā.

35 Ka neongo ia, ʻe pehē ʻe ha taha: “ʻE anga-fēfē hano fokotuʻu hake ʻa e maté? ʻIo, ko e faʻahinga sino fēfē ʻe fokotuʻu hake ai kinautolú?”+ 36 He ʻatamai-mūnoa ē ko koe! Ko e meʻa ʻokú ke toó ʻoku ʻikai ke hoko ia ʻo moʻui kae ʻoua ke tomuʻa mate. 37 Pea ʻi he fekauʻaki mo e meʻa ʻokú ke toó, ʻokú ke tō, ʻo ʻikai ko e sino ʻe hoko ki aí, ka ko ha foʻi tenga pē, pe ko e uite pe ko ha tengaʻi ʻakau kehe; 38 ka ʻoku foaki ki ai ʻe he ʻOtuá ha sino ʻo hangē pē ko ia kuó ne finangalo ki aí, pea foaki ki he tengaʻi ʻakau taki taha hano sino. 39 ʻOku ʻikai ke tatau ʻa e kakano kotoa pē, ka ʻoku kehe ʻa e kakano ia ʻo e faʻahinga ʻo e tangatá, ʻoku kakano kehe ʻa e fanga pulú ia, kakano kehe ʻa e fanga manupuná, pea kehe ʻa e fanga iká. 40 Pea ʻoku ʻi ai ʻa e ngaahi sino fakalangi+ mo e ngaahi sino fakaemāmani;+ ka ko e nāunauʻia ʻo e ngaahi sino fakalangí ʻoku kehe ia, pea ko e nāunauʻia ʻo e ngaahi sino fakaemāmaní ʻoku kehe foki mo ia. 41 Ko e nāunauʻia ʻo e laʻaá ʻoku kehe ia mei he nāunauʻia ʻo e māhiná,+ pea ko e nāunauʻia ʻo e ngaahi fetuʻú ʻoku kehe foki mo ia; ko hono moʻoní, ʻoku kehe ʻa e nāunauʻia ʻo e foʻi fetuʻu mei he foʻi fetuʻu.

42 Ko ia ʻoku pehē pē ʻa e toetuʻu ʻa e maté. ʻOku tō ʻi he ʻauʻauha; ʻoku fokotuʻu hake ʻi he taʻefaʻaʻauha.+ 43 ʻOku tō ʻi he taʻelāngilangiʻia; ʻoku fokotuʻu hake ʻi he lāngilangiʻia.+ ʻOku tō ʻi he koto vaivai; ʻoku fokotuʻu hake ʻi he koto mālohi.+ 44 ʻOku tō ko ha sino fakakakano; ʻoku fokotuʻu hake ko ha sino fakalaumālie. Kapau ʻoku ʻi ai ha sino fakakakano, ʻoku ʻi ai foki mo ha sino fakalaumālie. 45 Ko ia kuo tohi: “Ko e ʻuluaki tangata ko ʻĀtamá naʻe hoko ko ha tokotaha moʻui.”+ Ko e ʻĀtama fakamuimuí naʻe hoko ko ha laumālie foaki-moʻui.+ 46 Kae kehe, ko e meʻa ʻoku fakalaumālié ʻoku ʻikai ke muʻomuʻa ia. Ko e meʻa ʻoku fakakakanó ʻoku muʻomuʻá, pea hoko ai ʻa e meʻa ʻoku fakalaumālié. 47 Ko e ʻuluaki tangatá ʻoku mei he māmaní pea ngaohi mei he efú;+ ko e tangata hono uá ʻoku mei hēvani ia.+ 48 Ko e faʻahinga ne ngaohi ʻe he ʻOtuá mei he efú ʻoku nau hangē pē ko e tokotaha ne ngaohi ʻe he ʻOtuá mei he efú. Pea ko e faʻahinga ʻi hēvaní ʻoku nau hangē pē ko e tokotaha naʻe haʻu mei hēvaní.+ 49 Pea hangē pē ko ʻetau hokosi ʻa e ʻīmisi ʻo e tokotaha ne ngaohi mei he efú,+ te tau hokosi foki ʻa e ʻīmisi ʻo e tokotaha fakahēvaní.+

50 Ka ʻoku ou tala atu ʻa e meʻá ni kiate kimoutolu, fanga tokoua, heʻikai lava ke maʻu ʻe he kakanó mo e totó ʻa e Puleʻanga ʻo e ʻOtuá, pea heʻikai lava ke maʻu ʻe he ʻauʻauhá ʻa e taʻefaʻaʻauhá. 51 Vakai! ʻOku ou tala atu kiate kimoutolu ha fakalilolilo toputapu: ʻE ʻikai te tau mohe kotoa pē ʻi he maté, ka te tau liliu kotoa pē,+ 52 ʻi ha foʻi mōmeniti, ʻi ha foʻi kemo pē ʻa e matá, ʻi he lolotonga ʻa e ifi ʻa e talupite fakaʻosí. He ʻe ongo atu ʻa e talupité,+ pea ʻe fokotuʻu hake ʻa e kau maté ʻo taʻefaʻaʻauha, pea te tau liliu. 53 He ko e meʻa ko eni ʻoku ʻauhangofuá kuo pau ke liliu ia ki he taʻefaʻaʻauha,+ pea ko e meʻa ko eni ʻoku matengofuá kuo pau ke liliu ia ki he taʻefaʻamaté.+ 54 Ka ʻi he hoko ʻa e meʻa ko eni ʻoku ʻauhangofuá ʻo taʻefaʻaʻauhá pea hoko ʻa e meʻa ko eni ʻoku matengofuá ʻo taʻefaʻamaté, ʻe toki hoko leva ʻa e lea ko ia kuo tohi: “Kuo folofua ʻa mate ʻo taʻengata.”+ 55 “ʻE mate, ko fē hoʻo ikuná? ʻE mate, ko fē hoʻo huhu koná?”+ 56 Ko e huhu kona ʻokú ne ʻomai ʻa e maté ko e angahalá,+ pea ko e mālohi ki he angahalá ko e Laó.*+ 57 Kae fakafetaʻi ki he ʻOtuá, he ʻokú ne ʻomai kiate kitautolu ʻa e ikuná fakafou ʻi hotau ʻEiki ko Sīsū Kalaisí!+

58 Ko ia ai, siʻoku fanga tokoua ʻofeina, mou tuʻu maʻu,+ taʻengaue, ʻo mou femoʻuekina ai pē+ ʻi he ngāue ʻa e ʻEikí, ʻi hoʻomou ʻiloʻi ko hoʻomou fakaongosiá ʻoku ʻikai ko e koto laufānō+ ia ʻi he vakai ʻa e ʻEikí.