Founga ke Maʻu Ai ʻa e Mālohi mei he Folofolá

 1. Ko e hā ʻa e ngaahi ʻahiʻahi ʻe fehangahangai nai mo e kakai ʻa Sihová?

ʻOKÚ KE tofanga ʻi ha ʻahiʻahi faingataʻa? Mahalo kuo fakalotomamahiʻi koe ʻe ha taha ʻi he fakatahaʻangá. (Sēm. 3:2) Pe mahalo ʻoku manukiʻi koe ʻe ho kaungāngāué pe kaungāakó koeʻuhi ko hoʻo tauhi kia Sihová. (1 Pita 4:3, 4) Pe ʻoku feinga nai ʻa e ngaahi mēmipa ʻo e fāmilí ke taʻofi hoʻo maʻu ʻa e ngaahi fakatahá pe ko hoʻo talanoa ki he niʻihi kehé fekauʻaki mo hoʻo tuí. (Māt. 10:35, 36) Kapau ʻoku mātuʻaki faingataʻa ha ʻahiʻahi, te ke ongoʻi foʻi nai. Ka ʻe lava ke ke tuipau neongo pe ko e hā ha pole ʻokú ke fehangahangai mo ia, ʻe ʻoatu ʻe Sihova ʻa e poto ke fekuki mo ia pea mo e mālohi ke kātekina ia.

 2. Fakatatau ki he Loma 15:4, ko e hā ʻa e ʻaonga kiate kitautolu hono lau ʻa e Folofola ʻa e ʻOtuá?

² ʻI he Folofola ʻa Sihová, naʻá ne fakakau ai ʻa e ngaahi fakaikiiki fekauʻaki mo e founga ʻo e fekuki ʻa e faʻahinga taʻehaohaoá mo e ngaahi ʻahiʻahi faingataʻá. Ko e hā hono ʻuhingá? Koeʻuhi ke lava ʻo tau ako meiate kinautolu. Ko e meʻa ia naʻe ueʻi ʻe Sihova ʻa e ʻapositolo ko Paulá ke ne hikí. (Lau ʻa e Loma 15:4.) ʻI hono lau ʻa e ngaahi fakamatala ko ení ʻe lava ke tau maʻu ai ha fakafiemālie mo e ʻamanaki. Kae kehe, ke tau maʻu ʻaongá, ʻoku fiemaʻu ke tau fai ʻa e meʻa lahi ange ʻi hono lau pē ʻa e Tohi Tapú. Kuo pau ke tau fakaʻatā ʻa e Folofolá ke ne fakafuo ʻetau fakakaukaú mo aʻu ki hotau lotó. Ko e hā ʻe lava ke tau fai kapau ʻoku tau kumi ki ha tataki ke fekuki ai mo ha pole? ʻE lava ke tau ngāueʻaki ʻa e founga ʻe fā ko ení: (1) Lotu, (2) Sioloto, (3) Fakalaulauloto mo e (4) Ngāueʻaki. Tau lāulea angé ki he meʻa ʻoku kaunga ki he founga taki taha ko iá.b Te tau ngāueʻaki leva ʻa e founga ako ko ení ke ako mei he meʻa naʻe hoko ʻi he moʻui ʻa Tuʻi Tēvita mo e ʻapositolo ko Paulá.

 3. Ki muʻa ke ke lau ʻa e Tohi Tapú, ko e hā ʻoku totonu ke ke faí, pea ko e hā hono ʻuhingá?

³ (1) Lotu. Ki muʻa ke ke lau ʻa e Tohi Tapú, kole kia Sihova ke ne tokoniʻi koe ke vakai ki he founga ke maʻu ʻaonga ai mei he meʻa ʻokú ke laú. Ko e fakatātaá, kapau ʻokú ke kumi ki ha faleʻi ki he founga ke fekuki ai mo ha palopalema, kole kia Sihova ke ne tokoniʻi koe ke maʻu ʻa e ngaahi tefitoʻi moʻoni ʻi heʻene Folofolá ʻe lava ke ne tataki koe.​—Fil. 4:6, 7; Sēm. 1:5.

 4. Ko e hā te ne tokoniʻi koe ke ʻai ha fakamatala ʻi he Tohi Tapú ke hoko ʻo moʻoni mo moʻuí?

⁴ (2) Sioloto. Kuo ʻomai ʻe Sihova kiate kitautolu ʻa e malava fakaofo ko e siolotó. Ke tokoni ke hoko ʻo moʻoni mo moʻui ʻa e fakamatala ʻi he Tohi Tapú kiate koé, feinga ke sioloto ki he meʻa ʻoku hokó pea ʻai ʻa koe tonu ki he tuʻunga ʻo e tokotaha ʻoku fai ki ai ʻa e talanoá. Feinga ke sio ki he ngaahi meʻa naʻá ne sio ki aí pea feinga ke maʻu ʻene ngaahi ongoʻí.

 5. Ko e hā ʻa e fakalaulauloto, pea ʻe lava fēfē ke ke fakalaulaulotó?

⁵ (3) Fakalaulauloto. ʻOku ʻuhinga ʻa e fakalaulaulotó ki he fakakaukau fakalelei fekauʻaki mo e meʻa ʻokú ke laú pea mo e kaunga ʻa e fakamatalá kiate koé. ʻOku tokoni ia ke ke fakafekauʻaki ʻa e ngaahi fakakaukaú pea maʻu ʻa e mahino loloto ange fekauʻaki mo ha kaveinga. ʻI hono lau ʻa e Tohi Tapú ʻo ʻikai fakalaulauloto ki aí ʻoku hangē ia ha sio ki ha kongokonga ʻo ha pāsolo ʻoku movetevete ʻi ha funga tēpile. Ko e fakalaulaulotó ʻoku hangē ia ko hono fokotuʻutuʻu ʻa e ngaahi kongokonga ko iá ke lava ʻo ke sio ki he fakatātā kakató. Ke tokoni ki hoʻo fakalaulaulotó, ʻe lava ke ke ʻeke pea tali ʻa e ngaahi fehuʻi hangē ko ení: ‘Ko e hā naʻe fai ʻe he tokotaha naʻe fai ki ai ʻa e talanoá ke fakaleleiʻi ʻene palopalemá? Naʻe anga-fēfē hono tokoniʻi ia ʻe Sihová? ʻE lava fēfē ke u ngāueʻaki ʻa e lēsoni kuó u akó ke kātekina ai ʻa e ngaahi ʻahiʻahí?’

 6. Ko e hā kuo pau ke tau ngāueʻaki ai ʻa e meʻa ʻoku tau akó?

⁶ (4) Ngāueʻaki. Naʻe pehē ʻe Sīsū kapau ʻoku ʻikai ke tau ngāueʻaki ʻa e meʻa ʻoku tau akó, ʻoku tau hangē ko ha tangata ʻokú ne langa hono falé ʻi he ʻoneʻoné. ʻOkú ne ngāue mālohi, ka ʻoku kulanoa ʻene feingá. Ko e hā hono ʻuhingá? Koeʻuhi ʻi he taimi ʻoku tō mai ai ha afā mo ha tāfea, ʻe holo hono falé. (Māt. 7:24-27) ʻI he tuʻunga meimei tatau, kapau ʻoku tau lotu, sioloto pea fakalaulauloto kae ʻikai ke tau ngāueʻaki ʻa e meʻa ʻoku tau akó, ko e kulanoa pē ʻetau feingá. ʻI hono siviʻi ʻetau tuí ʻe he ʻahiʻahí pe fakatangá, heʻikai ke mālohi feʻunga ia. ʻI he tafaʻaki ʻe tahá, ʻi heʻetau ngāueʻaki ʻa e meʻa ʻoku tau akó, ʻoku tau fai ai ʻa e ngaahi fili lelei ange, maʻu ʻa e nonga lahi ange pea tau fakatupulekina ha tui mālohi ange. (ʻAi. 48:17, 18) ʻI hono ngāueʻaki ʻa e founga ʻe fā naʻa tau toki lāulea ki aí, tau vakai angé ki he meʻa ʻe lava ke tau ako mei he meʻa naʻe hoko ʻi he moʻui ʻa Tuʻi Tēvitá.

 7. Ko e hā ʻa e talanoa Fakatohitapu te tau lāulea ki ai he taimi ní?

⁷ Kuo hanga ʻe ha kaumeʻa pe ko ha mēmipa ʻo e fāmilí ʻo lavakiʻi hoʻo falalá? Kapau ko ia, te ke maʻu ʻaonga mei hono fakamanatu ʻa e talanoa ki he foha ʻo Tuʻi Tēvita ko ʻApisalomé, naʻá ne lavakiʻi ʻene tamaí pea feinga ke faʻao ʻa e puleʻangá meiate ia.​—2 Sām. 15:5-14, 31; 18:6-14.

 8. Ko e hā ʻe lava ke ke fai ke maʻu ai ʻa e tokoni ʻa Sihová?

⁸ (1) Lotu. ʻI he fakakaukau ki he talanoá, tala ange hangatonu kia Sihova ʻa e anga hoʻo ongoʻi fekauʻaki mo hono ngaohikoviʻi koé. (Saame 6:6-9) Pea kole leva kia Sihova ke ne tokoniʻi koe ke maʻu ʻa e ngaahi tefitoʻi moʻoni ʻe lava ke ne tataki koe ʻi hoʻo fekuki mo e pole faingataʻa ko ení.

 9. ʻE anga-fēfē haʻo fakanounouʻi ʻa e talanoa kia Tēvita mo ʻApisalomé?

⁹ (2) Sioloto. Fakakaukau fekauʻaki mo e ngaahi meʻa ʻoku hoko ʻi he talanoa ko ení, pea sioloto atu ki he anga hono uesia ʻo Tuʻi Tēvitá. Ko e foha ʻo Tēvita ko ʻApisalomé ʻokú ne ngāue ʻi he ngaahi taʻu ke ʻai ʻa e kakaí ke nau ʻofeina ia. (2 Sām. 15:7) ʻI he ongoʻi ʻe ʻApisalome ko e taimi totonú eni, ʻokú ne fekauʻi atu ʻa e kau asiasi ki he kotoa ʻo ʻIsilelí ke fakalotoʻi ʻa e kakaí ke nau tali ia ko honau pule. ʻOku aʻu ʻo ne fakalotoʻi ʻa e taha ʻo e ngaahi kaumeʻa ofi mo e tokotaha faleʻi ʻa Tēvitá, ko ʻAhitofelí, ke kau ʻi he angatuʻú. ʻOku talaki ʻe ʻApisalome ko ia ʻa e tuʻí, pea feinga leva ke puke pea tāmateʻi ʻa Tēvita, ʻa ia naʻe puke lahi nai ʻi he taimi ko iá. (Saame 41:1-9) ʻOku ʻiloʻi ʻe Tēvita ʻa e faʻufaʻú pea hola mei Selusalema. Faai atu pē, ʻoku fepaki ʻa e kau tau ʻa ʻApisalomé mo e kau tau mateaki ʻa Tēvitá. ʻOku ʻulungia ʻa e kau tau angatuʻú, pea ko e foha ʻo Tēvita ko ʻApisalomé naʻe tāmateʻi.

10. Naʻe mei anga-fēfē ʻa e fakafeangai ʻa Tuʻi Tēvitá?

¹⁰ Hokó, sioloto atu ki he anga ʻo e ongoʻi ʻa Tēvita ki he ngaahi meʻa kotoa ko eni naʻe hoko kiate iá. Naʻá ne ʻofa ʻia ʻApisalome pea falala kia ʻAhitofeli. Neongo ia, naʻe lavakiʻi ia ʻe he ongo kaumeʻa ofi ko ení. Naʻá na mātuʻaki fakalotomamahiʻi ia pea aʻu ʻo feinga ke tāmateʻi ia. Naʻe mei mole ʻa e falala ʻa Tēvita ki hono ngaahi kaumeʻa kehé, ʻo huʻuhuʻu kuo nau kau fakataha mo ʻApisalome. Naʻá ne mei fakakaukau pē kiate ia pea feinga ke hola toko taha mei he fonuá. Pe ko e siva moʻoni ʻene ʻamanakí. Ka naʻe ʻikai ke fai ʻe Tēvita ha taha ʻo e ngaahi meʻá ni. ʻI hono kehé, naʻá ne ikuʻi ʻa e ʻahiʻahi faingataʻa ko ení. Ko e hā naʻe malava ai ke ne fai peheé?

11. Naʻe anga-fēfē fakafeangai ʻa Tēvita ki he faingataʻá?

¹¹ (3) Fakalaulauloto. Ko e hā ʻa e ngaahi tefitoʻi moʻoni ʻe lava ke ke ako mei he talanoá? Tali ʻa e fehuʻi, “Ko e hā naʻe fai ʻe Tēvita ke fakaleleiʻi ʻene palopalemá?” Naʻe ʻikai ke puputuʻu ʻa Tēvita pea fai ha fili fakavave mo taʻefakapotopoto. Naʻe ʻikai foki ke ne tautoloi, koeʻuhi ko e lōmekina ia ʻe he ilifiá. ʻI hono kehé, naʻá ne lotu kia Sihova ki ha tokoni. Naʻá ne toe kole tokoni foki ki hono ngaahi kaumeʻá. Pea naʻá ne ngāue vave ke fakahoko ʻa e ngaahi fili naʻá ne faí. Neongo naʻe mātuʻaki loto-mamahi ʻa Tēvita, naʻe ʻikai ke mole ʻene falala ki he niʻihi kehé pea ʻikai loto-kona. Naʻe hokohoko atu ʻene falala kia Sihova pea falala ki hono ngaahi kaumeʻá.

12. Ko e hā naʻe fai ʻe Sihova ke tokoniʻi ʻa Tēvitá?

¹² Naʻe anga-fēfē hono tokoniʻi ʻe Sihova ʻa Tēvitá? ʻI hono fai ha fekumi, te ke ʻiloʻi ai naʻe ʻoange ʻe Sihova kia Tēvita ʻa e mālohi naʻá ne fiemaʻu ke kātekina ai ʻa e ʻahiʻahi ko ení. (Saame 3:1-8; fakamatala talateu) Naʻe tāpuakiʻi ʻe Sihova ʻa e ngaahi fili naʻe fai ʻe Tēvitá. Pea naʻá ne poupouʻi ʻa e ngaahi kaumeʻa mateaki ʻo Tēvitá ʻi heʻenau faitau ke maluʻi honau tuʻí.

13. ʻE lava fēfē ke ke faʻifaʻitaki kia Tēvita kapau ʻoku fakalotomamahiʻi lahi koe ʻe ha tokotaha? (Mātiu 18:15-17)

¹³ (4) Ngāueʻaki. ʻEke hifo, ‘ʻE lava fēfē ke u faʻifaʻitaki kia Tēvita?’ ʻE fiemaʻu ke ke ngāue vave ke fakaleleiʻi ʻa e palopalemá. Fakatatau ki he ngaahi tuʻungá, ʻe lava ke ke ngāueʻaki fakahangatonu ʻa e faleʻi ʻa Sīsū ʻoku hiki ʻi he Mātiu vahe 18 pe ko ha tefitoʻi moʻoni mei ai. (Lau ʻa e Mātiu 18:15-17.) Ka ʻoku ʻikai totonu ke ke fai ʻa e ngaahi fili fakavave ʻo makatuʻunga ʻi he anga hoʻo ongoʻí. ʻOku totonu ke ke lotu kia Sihova ke ne ʻoatu ha loto nonga mo e poto ʻoku fiemaʻu ke ke fekuki ai mo e meʻa ʻoku hokó. ʻOua ʻe mole hoʻo falala ki ho ngaahi kaumeʻá. ʻI hono kehé, loto-lelei ke tali ʻa e tokoni ʻoku nau ʻoatú. (Pal. 17:17) Ko e mahuʻinga tahá, muimui ʻi he faleʻi ʻa Sihova ʻokú ne ʻoatu ʻi heʻene Folofolá.​—Pal. 3:5, 6.

14. Ko e hā nai ʻa e ngaahi tuʻunga te ne ʻai koe ke tokangataha ki he 2 Tīmote 1:12-16; 4:6-11, 17-22?

¹⁴ ʻOkú ke fekuki mo ha fakafepaki mei he ngaahi mēmipa ho fāmilí? Pe ʻokú ke nofo ʻi ha fonua ʻoku mātuʻaki fakangatangata pe tapui ai ʻa e ngāue ʻa e kakai ʻa Sihová? Kapau ko ia, ʻe lava ke fakalototoʻa kiate koe ʻa hono lau ʻa e 2 Tīmote 1:12-16 mo e 4:6-11, 17-22.c Naʻe hiki ʻe Paula ʻa e konga ko eni ʻo e Tohi Tapú lolotonga ʻene ʻi he pilīsoné.

15. Ko e hā ʻe lava ke ke kole kia Sihová?

¹⁵ (1) Lotu. Ki muʻa ke ke lau ʻa e ngaahi veesi ko iá, tala ange hangatonu kia Sihova hoʻo palopalemá mo e anga hoʻo ongoʻí. Pea kole leva kia Sihova ke ne tokoniʻi koe ke ʻiloʻi ʻa e ngaahi tefitoʻi moʻoni ʻi he fakamatala fekauʻaki mo e ngaahi ʻahiʻahi ʻo Paulá ʻa ia ʻe tokoniʻi ai koe ke ʻiloʻi ʻa e founga ke fakafeangai ai ki he pole ʻokú ke fehangahangai mo iá.

16. ʻE anga-fēfē haʻo fakanounouʻi ʻa e tuʻunga ʻo Paulá?

¹⁶ (2) Sioloto. Sioloto atu kiate koe ʻi he tuʻunga ʻo Paulá. ʻOku haʻi sēini ia ʻo tuku pilīsone ʻi Loma. Naʻe ʻosi tuku pilīsone ia ki muʻa, ka ko e taimi ko ení ʻokú ne fakapapauʻi ʻe tāmateʻi ia. Kuo liʻaki ia ʻe he niʻihi hono ngaahi kaumeʻá, pea ʻokú ne ongosia fakaesino.​—2 Tīm. 1:15.

17. Naʻe mei anga-fēfē nai ʻa e fakafeangai ʻa Paulá?

¹⁷ Naʻe mei tokangataha ʻa Paula ki he kuohilí, ʻo fakakaukau kapau naʻá ne fai ha fili kehe, naʻe ʻikai nai ke mei tuku pilīsone ia. Naʻá ne mei ʻita ʻi he kau tangata ʻi he vahefonua ʻo ʻĒsiá ʻa ia naʻa nau liʻaki ia, pea naʻe mei mole ai ʻene falala ki hono ngaahi kaumeʻa kehé. Ka naʻe ʻikai ke fai ʻe Paula ha taha ʻo e ngaahi meʻá ni. Ko e hā naʻá ne hanganaki tuipau ai mo ʻamanakí?

18. Naʻe anga-fēfē fakafeangai ʻa Paula ki he ʻahiʻahi naʻá ne fehangahangai mo iá?

¹⁸ (3) Fakalaulauloto. Tali ʻa e fehuʻi, “Naʻe anga-fēfē hono fakaleleiʻi ʻe Paula ʻene palopalemá?” Naʻa mo e tuʻunuku mai ʻa e maté kia Paulá, naʻe ʻikai mole ai ʻene vakai ki he ʻīsiu mātuʻaki mahuʻingá​—ke ʻoatu ʻa e lāngilangí kia Sihova. Pea naʻe hokohoko atu ʻene fakakaukau ki he founga ke fakalototoʻaʻi ai ʻa e niʻihi kehé. Naʻá ne falala kia Sihova fakafou ʻi he lotu maʻu pē. (2 Tīm. 1:3) ʻI he ʻikai tokanga tōtuʻa ki he faʻahinga naʻa nau liʻaki iá, naʻá ne fakahaaʻi ʻa e houngaʻia lahi ʻi he poupou anga-ʻofa ʻa hono ngaahi kaumeʻa mateaki naʻa nau tokoni kiate ia ʻi he ngaahi founga ʻaonga. ʻIkai ko ia pē, naʻe hokohoko atu hono ako ʻe Paula ʻa e Folofola ʻa e ʻOtuá. (2 Tīm. 3:16, 17; 4:13) Ko e mahuʻinga tahá, naʻá ne falala pau kakato naʻe ʻofa ʻa Sihova mo Sīsū ʻiate ia. Naʻe ʻikai te na liʻaki ia, pea te na fakapaleʻi ia ki heʻene ngāue mateakí.

19. Naʻe anga-fēfē hono tokoniʻi ʻe Sihova ʻa Paulá?

¹⁹ Naʻe fakatokanga ʻa Sihova kia Paula te ne kātekina ʻa e fakatanga koeʻuhi ko ʻene hoko ko ha Kalisitiané. (Ngā. 21:11-13) Naʻe anga-fēfē hono tokoniʻi ʻe Sihova ʻa Paulá? Naʻá ne tali ʻa e ngaahi lotu ʻa Paulá pea ʻi he faai atu ʻa e taimí naʻá ne ʻoange kiate ia ʻa e mālohi. (2 Tīm. 4:17) Naʻe fakapapauʻi kia Paula te ne maʻu ʻa e pale naʻá ne ngāue mālohi ki aí. Naʻe toe ueʻi ʻe Sihova ʻa e ngaahi kaumeʻa mateaki ʻo Paulá ke nau fai ha tokoni ʻaonga kiate ia.

20. ʻI he fakakaukau ki he Loma 8:38, 39, ʻe lava fēfē ke ke faʻifaʻitaki kia Paula?

²⁰ (4) Ngāueʻaki. ʻEke hifo, ‘ʻE lava fēfē ke u faʻifaʻitaki kia Paula?’ Hangē ko Paulá, ʻoku totonu ke tau ʻamanekina ʻe fakatangaʻi kitautolu koeʻuhi ko ʻetau tuí. (Mk. 10:29, 30) Ke tauhi maʻu ʻetau anga-tonu ʻi he malumalu ʻo e ʻahiʻahí, ʻoku fiemaʻu ke tau falala kia Sihova ʻi he lotu pea tauhi maʻu ha taimi-tēpile ako lelei. Pea kuo pau ke tau manatuʻi maʻu pē ko e taha ʻo e ngaahi meʻa mahuʻinga taha ʻe lava ke tau faí ko hono ʻoatu ʻa e lāngilangí kia Sihova. ʻE lava ke tau fakapapauʻi heʻikai ʻaupito liʻaki kitautolu ʻe Sihova pea ʻoku halaʻatā ha meʻa ʻe lava ke fai ʻe ha taha ke fakamavaheʻi kitautolu mei heʻene ʻofá.​—Lau ʻa e Loma 8:38, 39; Hep. 13:5, 6.

21. Ko e hā naʻe tokoni kia Aya mo Hector ke ikuʻi ʻa e ngaahi pole naʻá na fehangahangai mo iá?

²¹ Tatau ai pē pe ko e hā hotau tuʻungá, ʻe lava ke tau maʻu ʻa e mālohi mei he ngaahi faʻifaʻitakiʻanga Fakatohitapú. Ko e fakatātaá, ko Aya, ko ha tāimuʻa ʻi Siapani, ʻokú ne pehē ko e talanoa kia Sioná naʻá ne tokoniʻi ia ke ikuʻi ʻene manavahē ʻi he faifakamoʻoni ʻi he feituʻu kakaí. Ko Hector, ko ha talavou ʻi ʻInitonēsia ʻa ia ʻoku ʻikai tauhi ʻene ongo mātuʻá kia Sihova, ʻoku maongo kiate ia ʻa e faʻifaʻitakiʻanga ʻa Luté ke ako fekauʻaki mo Sihova pea tauhi kiate ia.

22. ʻE lava fēfē ke ke maʻu ʻa e ʻaonga lahi taha mei he ngaahi tulama Fakatohitapú pe ko e ngaahi kupu “Faʻifaʻitaki ki Heʻenau Tuí”?

²² Te ke maʻu mei fē ʻa e ngaahi faʻifaʻitakiʻanga Fakatohitapu ʻe lava ke ne fakaivimālohiʻi koé? Ko ʻetau ngaahi vitioó mo e tulama hiki-leʻó mo e ngaahi kupu “Faʻifaʻitaki ki Heʻenau Tuí” ʻe tokoni ke ne ʻai ke moʻoni mo moʻui ʻa e ngaahi meʻa naʻe hoko ʻi he Tohi Tapú. Ki muʻa ke ke sio, fanongo pe lau ʻa e ngaahi fakamatala ko eni kuo fai ha fekumi lelei ki aí, kole kia Sihova ke ne tokoniʻi koe ke maʻu ʻa e ngaahi poini pau ʻe lava ke ke ngāueʻaki. Sioloto atu kiate koe ʻi he tuʻunga ʻo e tokotaha ʻoku fai ki ai ʻa e talanoá. Fakalaulauloto ki he meʻa naʻe fai ʻe he kau sevāniti ʻofeina ko eni ʻa Sihová mo e founga naʻá ne tokoniʻi ai kinautolu ke ikuʻi ʻa e ngaahi faingataʻá. Ngāueʻaki leva ʻa e ngaahi lēsoní ʻi ho tuʻungá. Fakamālō kia Sihova ki he tokoni kuó ne ʻosi ʻoatu kiate koé. Pea fakahaaʻi ʻokú ke houngaʻia ʻi he tokoní ʻaki ʻa e kumi ki he ngaahi faingamālie ke fakalototoʻaʻi mo poupouʻi ʻa e niʻihi kehé.

23. Fakatatau ki he ʻAisea 41:10, 13, ko e hā ʻoku talaʻofa ʻe Sihova te ne fai maʻa kitautolú?

²³ Ko e moʻui ʻi he māmani ko eni ʻoku puleʻi ʻe Sētané ʻoku faingataʻa ke fekuki mo ia, pea taulōfuʻu ʻi he taimi ʻe niʻihi. (2 Tīm. 3:1) Ka ʻoku ʻikai fiemaʻu ia ke tau hohaʻa pe ilifia. ʻOku ʻafioʻi ʻe Sihova ʻa e meʻa ʻoku tau fouá. ʻI heʻetau toó, ʻokú ne talaʻofa mai te ne piki maʻu kiate kitautolu ʻaki hono nima toʻomataʻu mālohí. (Lau ʻa e ʻAisea 41:10, 13.) ʻI he falala pau kakato ki heʻene poupoú, ʻe lava ke tau maʻu ai ʻa e mālohi mei he Folofolá pea ikuʻi ha faʻahinga pole pē.