“ʻI Heʻeku Vaivaí, ʻOku Ou Toki Mālohi Leva”

 1. Ko e hā naʻe fakahaaʻi mahino ʻe he ʻapositolo ko Paulá?

NAʻE fakahaaʻi mahino ʻe he ʻapositolo ko Paulá ʻi he taimi ʻe niʻihi naʻá ne ongoʻi vaivai. Naʻá ne pehē ko hono sinó naʻe “fakaʻaʻau ke mole atu,” naʻe pau ke ne fāinga ke fai ʻa e meʻa naʻe totonú, pea naʻe ʻikai ke tali maʻu pē ʻe Sihova ʻene ngaahi lotú ʻi he founga naʻá ne ʻamanekiná. (2 Kol. 4:16; 12:7-9; Loma 7:21-23) Naʻe fakahaaʻi foki ʻe Paula ko hono kau fakafepakí naʻa nau vakai kiate ia ko ha tokotaha vaivai.b Ka naʻe ʻikai ke ne fakaʻatā ʻa e vakai ʻikai lelei ʻa e niʻihi kehé pe ko hono vaivaiʻangá ke ʻai ia ke ne ongoʻi ʻoku ʻikai hano ʻaonga.​—2 Kol. 10:10-12, 17, 18.

 2. Fakatatau ki he 2 Kolinitō 12:9, 10, ko e hā ʻa e lēsoni mahuʻinga naʻe ako ʻe Paulá?

² Naʻe ako ʻe Paula ha lēsoni mahuʻinga​—ʻe lava ke mālohi ha tokotaha naʻa mo e taimi ʻokú ne ongoʻi vaivai aí. (Lau ʻa e 2 Kolinitō 12:9, 10.) Naʻe tala ange ʻe Sihova kia Paula ko Hono mālohí ʻoku “fakahaohaoaʻi ia [ʻi he] hoko ʻo vaivaí,” ʻoku ʻuhinga iá ko e mālohi ʻo Sihová te ne fakaivimālohiʻi ʻa Paula. ʻUluakí, tau vakai angé ki he ʻuhinga ʻoku ʻikai totonu ai ke tau hohaʻa ʻi hono taʻetokaʻi kitautolu ʻe hotau kau fakafepakí.

 3. Ko e hā ʻe lava ke tau fiefia ai ʻi he ngaahi taʻetokaʻí?

³ ʻOku ʻikai ha taha ʻo kitautolu ʻe saiʻia ke taʻetokaʻi. Neongo ia, kapau ʻoku taʻetokaʻi kitautolu ʻe hotau ngaahi filí pea tau hohaʻa tōtuʻa fekauʻaki mo e meʻa ʻoku nau leaʻakí, ʻe lava ke tau hoko ai ʻo loto-siʻi. (Pal. 24:10) ʻOku totonu ke fēfē leva ʻetau vakai ki hono taʻetokaʻi kitautolu ʻe he kau fakafepakí? ʻI he hangē ko Paulá, ʻe lava ke tau ‘fiefia ʻi he ngaahi taʻetokaʻí.’ (2 Kol. 12:10) Ko e hā hono ʻuhingá? Koeʻuhi ko e ngaahi taʻetokaʻí mo e fakafepakí ko e fakaʻilonga ia ko e kau ākonga moʻoni kitautolu ʻa Sīsū. (1 Pita 4:14) Naʻe pehē ʻe Sīsū ko hono kau muimuí ʻe fakatangaʻi. (Sione 15:18-20) Naʻe hoko moʻoni ia ʻi he ʻuluaki senitulí. ʻI he taimi ko iá, ko e faʻahinga naʻe tākiekina ʻe he anga fakafonua faka-Kalisí naʻa nau vakai ki he kau Kalisitiané naʻe ʻikai ke nau poto pea vaivai. Pea ʻi he haʻohaʻonga ʻo e kau Siú, naʻe vakai ki he kau Kalisitiané naʻa nau “taʻeako mo lāuvale,” hangē ko e ʻapositolo ko Pita mo Sioné. (Ngā. 4:13) Naʻe hā ngali naʻe vaivai ʻa e kau Kalisitiané; naʻe ʻikai ke ʻi ai hanau mafai fakapolitikale pe mālohi fakakautau, pea naʻe liʻekina kinautolu ʻi he sōsaietí.

 4. Naʻe anga-fēfē fakafeangai ʻa e muʻaki kau Kalisitiané ki he vakai ʻikai lelei honau kau fakafepakí?

⁴ Naʻe fakaʻatā ʻe he muʻaki kau Kalisitiane ko iá ʻa e vakai ʻikai lelei honau kau fakafepakí ke ne taʻofi kinautolu? ʻIkai. Ko e fakatātaá, ko e ʻapositolo ko Pita mo Sioné, naʻá na vakai ko ha monū ia ke fakatangaʻi koeʻuhi ko e muimui kia Sīsū pea vahevahe atu ʻene ngaahi akonakí. (Ngā. 4:18-21; 5:27-29, 40-42) Naʻe ʻikai ha ʻuhinga ki he kau ākongá ke nau ongoʻi mā. ʻI he lele lōloá, ko e muʻaki kau Kalisitiane anga-fakatōkilalo ko iá naʻa nau fai ʻa e meʻa lelei lahi ange maʻá e faʻahinga ʻo e tangatá ʻi he meʻa naʻe fai ʻe honau kau fakafepakí. Ko e fakatātaá, ko e ngaahi tohi fakamānavaʻi naʻe hiki ʻe he niʻihi ʻo e kau Kalisitiane ko iá ʻoku hokohoko atu ʻene ʻoatu ʻa e tokoni mo e ʻamanaki ki he kakai ʻe laui miliona. Pea ko e Puleʻanga naʻa nau poupou ki aí kuo kamata pule he taimí ni pea kuo vavé ni ke ne pule mai ki he kotoa ʻo e faʻahinga ʻo e tangatá. (Māt. 24:14) ʻI hono kehé, ko e mafai fakapolitikale naʻá ne fakatangaʻi ʻa e kau Kalisitiané kuo ʻikai ke toe ʻi ai, ka ko e kau ākonga mateaki ko iá kuo nau hoko he taimí ni ko e ngaahi tuʻi ʻi hēvani. Kae kehe, ko honau kau fakafepakí kuo nau mate; pea kapau ʻe faifai ange ʻo nau toetuʻu te nau ʻi he malumalu ʻo e Puleʻanga naʻe pouaki ʻe he kau Kalisitiane naʻa nau fehiʻa aí.​—Fkh. 5:10.

 5. Fakatatau ki he Sione 15:19, ko e hā ʻoku siolalo ai ʻa e kakaí ki he kakai ʻa Sihová?

⁵ ʻI he ʻahó ni, ʻi he tuʻunga ko e kakai ʻa Sihová, ʻoku faʻa siolalo mai ʻa e kakaí pea manukiʻi kitautolu ʻoku ʻikai ke tau poto pea ʻoku tau vaivai. Ko e hā hono ʻuhingá? Koeʻuhi ʻoku ʻikai ke tau fakakaukau tatau mo e faʻahinga takatakai ʻiate kitautolú. ʻOku tau feinga ke anga-fakatōkilalo, anga-vaivai mo talangofua. ʻI he tafaʻaki ʻe tahá, ko e māmaní ʻoku nau saiʻia ʻi he pōlepolé, hīkisiá mo e angatuʻú. Pehē foki, ʻoku ʻikai ke tau kau ʻi he ngaahi meʻa fakapolitikalé mo e ngāue fakakautau ʻi ha faʻahinga fonua pē. ʻOku ʻikai ke tau fakaʻatā kitautolu ke fakafuo ʻe he māmaní, ko ia ʻoku nau vakai mai ʻoku tau māʻulalo ange ʻi he niʻihi kehé.​—Lau ʻa e Sione 15:19; Loma 12:2.

 6. Ko e hā ʻa e ngāue lahi ʻoku tokoniʻi ʻe Sihova ʻene kakaí ke nau fakahokó?

⁶ Neongo ʻa e vakai ʻikai lelei mai ʻa e māmaní, ʻoku ngāueʻaki kitautolu ʻe Sihova ke fakahoko ʻa e ngaahi meʻa lahi. ʻOkú ne fakahoko ʻa e ngāue fakamalanga lahi taha ʻi he hisitōlia ʻo e tangatá. Ko ʻene kau sevāniti ʻi he ʻaho ní ʻoku nau faʻu ʻa e makasini kuo liliu mo tufaki lahi taha ʻi he māmaní pea ʻoku nau ngāueʻaki ʻa e Tohi Tapú ke tokoniʻi ʻa e laui miliona ke fakaleleiʻi ʻenau moʻuí. Ko e lāngilangi kotoa ki he ngaahi lavameʻa fakaofo ko ení ʻoku ʻave ia kia Sihova, ʻa ia ʻokú ne ngāueʻaki ʻa e kakai hā ngali vaivai ke fakahoko ʻa e ngāue fakaofo ko ení. Kae fēfē kitautolu taki taha? ʻE lava ke tokoniʻi kitautolu ʻe Sihova ke tau hoko ʻo mālohi? Kapau ko ia, ko e hā kuo pau ke tau fai ke maʻu ʻene tokoní? Tau lāulea angé ki he meʻa pau ʻe tolu ʻe lava ke tau ako mei he faʻifaʻitakiʻanga ʻa e ʻapositolo ko Paulá.

 7. Ko e hā ʻa e lēsoni ʻe taha ʻoku tau ako mei he faʻifaʻitakiʻanga ʻa Paulá?

⁷ Ko e lēsoni eni ʻe taha ʻoku tau ako mei he faʻifaʻitakiʻanga ʻa Paulá: ʻOua ʻe falala ki ho mālohí pe malavá ʻi he tauhi kia Sihová. ʻI he vakai fakaetangatá, naʻe maʻu ʻe Paula ha ʻuhinga ke pōlepole mo falala kia kita. Naʻá ne tupu hake ʻi Tāsusi, ko e kolomuʻa ʻo ha vahefonua Loma. Ko Tāsusí ko ha kolo lakalakaimonū pea ʻiloa ʻi he akó. Naʻe ako lelei ʻa Paula​—naʻe akoʻi ia ʻe he taha ʻi he kau taki Siu naʻe fakaʻapaʻapaʻi lahi taha ʻi hono taimí, ko ha tangata ko Kāmelieli. (Ngā. 5:34; 22:3) Pea ʻi he taimi ʻe taha, naʻe hoko ʻa Paula ko ha tokotaha mahuʻinga ʻi he komiunitī Siú. Naʻá ne pehē: “Naʻá ku fai ʻa e fakalakalaka ʻi he lotu faka-Siú ʻo lahi ange ia ʻi he tokolahi ʻo hoku toʻumeʻa ʻi hoku fonuá.” (Kal. 1:13, 14; Ngā. 26:4) Ka naʻe ʻikai ke falala ʻa Paula kiate ia.

 8. Fakatatau ki he Filipai 3:8 mo e fakamatala ʻi lalo, naʻe anga-fēfē vakai ʻa Paula ki he ngaahi meʻa naʻá ne tuku angé, pea ko e hā naʻá ne ‘fiefia ai ʻi hono ngaahi vaivaiʻangá’?

⁸ Naʻe fiefia ʻa Paula ke tuku ange ʻa e ngaahi meʻa naʻá ne ʻai ia ke mālohi ʻi he ngaahi tuʻunga ʻa e māmaní. Ko hono moʻoní, naʻá ne vakai ki he ngaahi meʻa hā ngali lelei naʻá ne maʻu ki muʻá “ko e fuʻu koto veve.” (Lau ʻa e Filipai 3:8 mo e fakamatala ʻi lalo.) Naʻe hokosia ʻe Paula ʻa e ngaahi faingataʻa ʻi heʻene hoko ko ha muimui ʻo Kalaisí. Naʻe fehiʻanekinaʻi ia ʻe hono fonuá tonu. (Ngā. 23:12-14) Pea naʻe tā mo tuku pilīsone ia ʻe hono kaungā-tangataʻifonuá, ʻa e kau Lomá. (Ngā. 16:19-24, 37) Pehē foki, naʻe ʻiloʻi lelei ʻe Paula hono ngaahi fakangatangatá. (Loma 7:21-25) Ka ʻi he ʻikai ke fakaʻatā hono kau fakafepakí pe ko ʻene ngaahi tōnounoú ke lōmekina iá, naʻá ne ‘fiefia ʻi hono ngaahi vaivaiʻangá.’ Ko e hā hono ʻuhingá? Koeʻuhi ʻi heʻene vaivaí naʻá ne sio ai ki he ngāue ʻa e mālohi ʻo e ʻOtuá ʻi heʻene moʻuí.​—2 Kol. 4:7; 12:10.

 9. ʻOku totonu ke fēfē ʻetau vakai ki he ngaahi meʻa ʻoku hā ngali ʻikai leleí?

⁹ Kapau ʻoku tau loto ke maʻu ha mālohi meia Sihova, kuo pau ke ʻoua te tau fakakaukau ko hotau mahuʻingá ʻoku fakatuʻunga ia ʻi he mālohi fakaesinó, akó, anga fakafonuá pe ko e koloa fakamatelié. ʻOku ʻikai ke ʻai kitautolu ʻe he ngaahi meʻá ni ke tau ʻaonga kia Sihova. Ko hono moʻoní, ko e tokolahi ʻi he kakai ʻa e ʻOtuá ʻoku ʻikai ko ha “faʻahinga ʻoku poto ʻi he tuʻunga fakaekakanó, ʻoku ʻikai tokolahi ʻa e faʻahinga ʻoku mālohí, ʻoku ʻikai tokolahi ʻa e faʻahinga ʻoku tupuʻi-ʻeikí.” ʻI hono kehé, kuo fili ʻe Sihova ke ngāueʻaki “ʻa e ngaahi meʻa ʻo e māmaní ʻoku hā vaivaí.” (1 Kol. 1:26, 27) Ko ia ʻoua ʻe vakai ki he ngaahi meʻa hā ngali ʻikai lelei ko iá, ko ha fakafaingataʻaʻiaʻanga ki he tauhi kia Sihová. ʻI hono kehé, vakai ki ai ko ha faingamālie ke vakai ki he ngāue ʻa e mālohi ʻo Sihová ʻiate koé. Ko e fakatātaá, kapau ʻokú ke ilifia ʻi he faʻahinga ʻoku nau feinga ke ʻai koe ke veiveiua ʻi hoʻo tuí, lotu kia Sihova ke ʻoatu ʻa e loto-toʻa ʻi hoʻo taukapoʻi hoʻo tuí. (ʻEf. 6:19, 20) Kapau ʻokú ke fāinga mo ha mahaki tauhi, kole kia Sihova ke ʻoatu ʻa e mālohi ʻoku fiemaʻu kiate koé ke hanganaki femoʻuekina ʻi heʻene ngāué. Ko e taimi taki taha ʻokú ke vakai ai ki hono tokoniʻi koe ʻe Sihová, ʻoku tupulaki ai hoʻo tuí pea ʻokú ke hoko ʻo mālohi ange.

10. Ko e hā ʻoku totonu ai ke tau ako ʻa e ngaahi faʻifaʻitakiʻanga ʻa e faʻahinga faitōnunga ʻi he Tohi Tapú, hangē ko ia ʻoku lave ki ai ʻi he Hepelū 11:32-34?

¹⁰ Ko Paulá ko ha tokotaha ako fakamātoato ia ʻo e Folofolá. Naʻá ne ako ʻa e ngaahi moʻoniʻi meʻa lahi, ka naʻá ne toe ako foki mei he faʻifaʻitakiʻanga ʻa e kakai ʻa ia ko ʻenau ngaahi hokosiá ʻoku hiki ʻi he Folofola ʻa e ʻOtuá. ʻI he tohi ʻa Paula ki he kau Kalisitiane ʻi Hepeluú, naʻá ne kole ange ke nau fakakaukau ki he ngaahi faʻifaʻitakiʻanga naʻe fokotuʻu mai ʻe he kau sevāniti faitōnunga tokolahi ʻa Sihová. (Lau ʻa e Hepelū 11:32-34.) Fakakaukau ki he taha ʻo e kau sevāniti ko ení, ko Tuʻi Tēvita. Naʻe pau ke ne fekuki mo e fakafepaki ʻo ʻikai mei hono ngaahi filí pē kae pehē foki ki he niʻihi naʻa nau hoko ko hono ngaahi kaumeʻá. ʻI heʻetau vakai ki he faʻifaʻitakiʻanga ʻa Tēvitá, te tau sio ai ki he mālohi naʻe maʻu nai ʻe Paula mei heʻene fakalaulauloto ki he moʻui ʻa Tēvitá pea mo e founga ʻe lava ke tau faʻifaʻitaki ai kia Paulá.

11. Ko e hā naʻe hā ngali vaivai ai ʻa Tēvitá? (Sio ki he tā ʻi he takafí.)

¹¹ Naʻe vakai ʻa e toʻa mālohi ko Kolaiaté kia Tēvita ko ha tokotaha naʻe vaivai. ʻI he sio ʻa Kolaiate kia Tēvitá, naʻá ne “manumanukiʻi ia.” He ko ē, naʻe kaukaua ange ʻa Kolaiate, teunga tau kakato pea kuo teuʻi ki he taú. ʻI he tafaʻaki ʻe tahá, ko Tēvita, ko ha kiʻi tamasiʻi taʻetaukei pē ʻa ia naʻe hā ngali naʻe ʻikai ʻi ai hano teunga tau. Ka naʻe liliu ʻe Tēvita ʻa e tuʻunga naʻe hā ngali vaivaí ke mālohi. Naʻá ne falala ki he mālohi ʻo Sihová, peá ne ikunaʻi hono filí.​—1 Sām. 17:41-45, 50.

12. Ko e hā ʻa e pole ʻe taha naʻe fekuki mo Tēvitá?

¹² Naʻe pau ke fekuki ʻa Tēvita mo ha pole ʻe taha ʻa ia naʻá ne ʻai nai ia ke ne ongoʻi vaivai mo ʻikai hano mālohi. Naʻe ngāue mateaki ʻa Tēvita ki he toko taha naʻe fakanofo ʻe Sihova ko e tuʻi ʻo ʻIsilelí, ʻa Saula. ʻI he kamatá naʻe fakaʻapaʻapaʻi ʻe Tuʻi Saula ʻa Tēvita. Ki mui ai, naʻe ʻai ʻe he pōlepolé ʻa Saula ke ne meheka kia Tēvita. Naʻe fakafeangai kovi ʻa Saula kia Tēvita, ʻo aʻu ʻo ne feinga ke tāmateʻi ia.​—1 Sām. 18:6-9, 29; 19:9-11.

13. Naʻe anga-fēfē tali ʻa Tēvita ki he fakafeangai taʻetotonu ange ʻa Tuʻi Saulá?

¹³ Neongo ʻa e fakafeangai taʻetotonu ʻa Tuʻi Saula kia Tēvitá, naʻá ne hokohoko atu ke fakahāhā ʻa e fakaʻapaʻapa ki he tuʻi fakanofo ʻa Sihová. (1 Sām. 24:6) Naʻe ʻikai ke tukuakiʻi ʻe Tēvita ʻa Sihova ki he ngaahi meʻa kovi naʻe fai ange ʻe Saulá. ʻI hono kehé, naʻe falala ʻa Tēvita kia Sihova ke ne ʻoange ʻa e mālohi naʻe fiemaʻú ke kātekinaʻaki ʻa e ʻahiʻahi faingataʻa ko ení.​—Saame 18:1, fakamatala talateu.

14. Ko e hā ʻa e tuʻunga naʻe fehangahangai mo e ʻapositolo ko Paulá ʻa ia naʻe meimei tatau mo Tēvita?

¹⁴ Naʻe fehangahangai ʻa e ʻapositolo ko Paulá mo ha tuʻunga meimei tatau mo Tēvita. Naʻe fuʻu mālohi lahi ange ʻa e ngaahi fili ʻo Paulá ʻiate ia. Ko e tokolahi ʻo e kau taki tuʻu-ki-muʻa ʻi hono taimí naʻa nau fehiʻa ʻiate ia. Naʻe faʻa haha ia pea tuku pilīsone. Hangē ko Tēvitá, ko Paula naʻe fakafeangai kovi kiate ia ʻa e kakai naʻe totonu ke nau hoko ko hono ngaahi kaumeʻá. Naʻe aʻu ʻo fakafepakiʻi ia ʻe he niʻihi ʻi he fakatahaʻanga Kalisitiané. (2 Kol. 12:11; Fil. 3:18) Ka naʻe ikunaʻi kotoa ʻe Paula ʻa e faʻahinga naʻa nau fakafepakiʻi iá. Anga-fēfē? Naʻá ne hokohoko atu ke malanga neongo ʻa e fakafepakí. Naʻá ne nofoʻaki mateaki ki hono fanga tokouá mo e fanga tuofāfiné naʻa mo e taimi naʻa nau fakalotomamahiʻi ai iá. Hiliō he meʻa kotoa, naʻá ne faitōnunga ki he ʻOtuá ʻo aʻu ki he ngataʻanga ʻene moʻuí. (2 Tīm. 4:8) Naʻá ne ikuʻi ʻa e ngaahi faingataʻa lahi, ʻo ʻikai koeʻuhí ko hono mālohi fakaesinó, ka koeʻuhí naʻá ne falala kia Sihova.

15. Ko e hā ʻetau taumuʻá, pea ʻe lava fēfē ke tau aʻusia ia?

¹⁵ ʻOkú ke fekuki nai mo e ngaahi taʻetokaʻi pe fakatanga mei he kaungāakó, kaungāngāué pe kāinga ʻikai Fakamoʻoní? Kuo fakafeangai kovi atu ha taha ʻi he fakatahaʻangá kiate koe? Kapau ʻoku pehē, manatuʻi ʻa e faʻifaʻitakiʻanga ʻa Tēvita mo Paulá. ʻE lava ke ke “hanganaki ikunaʻi ʻa e koví ʻaki ʻa e leleí.” (Loma 12:21) Ko hoʻo taumuʻá ke ʻai ʻa e Folofola ʻa e ʻOtuá ke aʻu ki he ʻatamai mo e loto ʻo e faʻahinga fie fanongó, ʻo hangē ko Tēvitá, kae ʻikai ko hono makataaʻi ha maka ke ngalo ʻi he laʻe ʻo ha taha. ʻE lava ke ke aʻusia ʻa e taumuʻa ko iá ʻaki ʻa e falala ki he Tohi Tapú ke ne tali ʻa e fehuʻi ʻa e kakaí, hoko ʻo fakaʻapaʻapa mo anga-lelei ki he faʻahinga ʻoku nau fakafeangai kovi atú, pea failelei ki he tokotaha kotoa, naʻa mo ho ngaahi filí.​—Māt. 5:44; 1 Pita 3:15-17.

16-17. Ko e hā naʻe ʻikai ʻaupito ke ngalo ʻia Paulá?

¹⁶ Ki muʻa ke hoko ʻa e ʻapositolo ko Paulá ko ha ākonga ʻa Kalaisí, ko ha kiʻi talavou anga-taʻetokaʻi ia naʻá ne fakatangaʻi ʻa e kau muimui ʻo Sīsuú. (Ngā. 7:58; 1 Tīm. 1:13) Ko Sīsū tonu naʻá ne taʻofi ʻa Paula, ʻa ia naʻe ʻiloa he taimi ko iá ko Saula, mei heʻene fakamamahiʻi ʻa e fakatahaʻanga Kalisitiané. Naʻe lea hifo ʻa Sīsū mei hēvani kia Paula pea ʻai ia ke ne kui. Ka ke toe lava ʻa Paula ʻo sió, naʻe fiemaʻu ke ne kumi tokoni ki he kakai ko ia naʻá ne fakatangaʻí. Naʻá ne tali anga-fakatōkilalo ʻa e tokoni mei ha ākonga ko ʻAnanaia ʻa ia naʻá ne toe fakaʻā ʻa e mata ʻo Paulá.​—Ngā. 9:3-9, 17, 18.

¹⁷ Ki mui ai, naʻe hoko ʻa Paula ko ha mēmipa tuʻu-ki-muʻa ʻo e fakatahaʻanga Kalisitiané, ka naʻe ʻikai ʻaupito ke ngalo ʻiate ia ʻa e lēsoni naʻe akoʻi ange ʻe Sīsū ʻi he hala ki Tāmasikusí. Naʻe hanganaki anga-fakatōkilalo ʻa Paula, pea naʻá ne loto-lelei ke tali ʻa e tokoni mei hono fanga tokouá mo e fanga tuofāfiné. Naʻá ne fakahaaʻi naʻa nau hoko “ko ha tokoni fakaivimālohi” kiate ia.​—Kol. 4:10, 11, fkm. ʻi lalo.

18. Ko e hā te tau toumoua nai ai ke tali ʻa e tokoni mei he niʻihi kehé?

¹⁸ Ko e hā ʻe lava ke tau ako meia Paulá? ʻI heʻetau fuofua feohi mo e kakai ʻa Sihová, naʻa tau vēkeveke nai ke tali ʻa e tokoni mei he niʻihi kehé, ʻo ʻiloʻi naʻa tau kei valevale fakalaumālie pea lahi mo e meʻa ke tau ako. (1 Kol. 3:1, 2) Kae fēfē taimí ni? Kapau kuo tau tauhi kia Sihova ʻi he laui taʻu pea maʻu ʻa e taukei lahi, heʻikai nai ke tau loto-lelei ke tali ʻa e tokoní, tautefito kapau ʻoku ʻomai ia ʻe ha taha naʻe toki haʻu ki he moʻoní. Kae kehe, ʻoku faʻa ngāueʻaki ʻe Sihova hotau fanga tokouá mo e fanga tuofāfiné ke fakaivimālohiʻi kitautolu. (Loma 1:11, 12) Kuo pau ke tau lāuʻilo ki he moʻoniʻi meʻa ko iá kapau ʻoku tau fiemaʻu ʻa e mālohi ʻoku tokonaki mai ʻe Sihová.

19. Ko e hā naʻe lavameʻa ai ʻa Paulá?

¹⁹ Naʻe fakahoko ʻe Paula ʻa e ngaahi meʻa fakaofo ʻe niʻihi hili ʻene hoko ko ha Kalisitiané. Ko e hā hono ʻuhingá? Koeʻuhi naʻá ne ʻiloʻi ko e lavameʻá ʻoku ʻikai makatuʻunga ia ʻi he mālohi fakaesino, ako, koloa pe puipuituʻa fakasōsiale ʻo ha taha, ka ʻi he anga-fakatōkilalo mo e falala kia Sihová. ʻOfa ke tau faʻifaʻitaki kotoa kia Paula (1) ʻaki ʻa e falala kia Sihova, (2) ʻaki ʻa e ako mei he ngaahi faʻifaʻitakiʻanga Fakatohitapú pea (3) ʻaki hono tali ʻa e tokoni mei he kaungātuí. Pea tatau ai pē pe te tau ongoʻi vaivai nai, ʻe ʻai kitautolu ʻe Sihova ke tau mālohi!