Tauhi Maʻu ha Fakakaukau Pau ki Hoʻo Ngāue Fakafaifekaú

 1. Ko e hā ʻa e faʻifaʻitakiʻanga naʻe fokotuʻu ʻe Sīsū ki hono kau muimuí, pea naʻe anga-fēfē ʻenau talí? (Sio ki he tā ʻi he takafí.)

NAʻE tauhi maʻu ʻe Sīsū ha fakakaukau pau ki heʻene ngāue fakafaifekau ʻi he māmaní, pea ʻokú ne loto foki ke tauhi maʻu ʻe hono kau muimuí ʻa e fakakaukau pau ki he ngāue fakafaifekaú. (Sione 4:35, 36) Lolotonga ʻa e ngāue ʻa Sīsū mo ʻene kau ākongá, naʻa nau vēkeveke fekauʻaki mo e ngāue fakamalangá. (Luke 10:1, 5-11, 17) Kae kehe, ʻi hono puke pea aʻu ʻo pekia ʻa Sīsuú, naʻe mole fakataimi ʻa e holi ʻa e kau ākongá ke malangá. (Sione 16:32) Hili ʻa e toetuʻu ʻa Sīsuú, naʻá ne ekinaki kiate kinautolu ke tokangataha ki he malangá. Pea hili ʻene ʻalu hake ki hēvaní, naʻa nau malanga mo e faivelenga lahi ʻo lāunga ai honau ngaahi filí: “Vakai, kuo mou fakafonu ʻa Selusalema ʻaki hoʻomou akonakí.”​—Ngā. 5:28.

 2. Kuo anga-fēfē hono tāpuakiʻi ʻe Sihova ʻa e ngāue fakamalangá?

² Naʻe tataki ʻe Sīsū ʻa e ngāue naʻe fakahoko ʻe he kau Kalisitiane ʻi he ʻuluaki senitulí, pea naʻe tāpuakiʻi kinautolu ʻe Sihova ʻaki ʻa e tupulaki. Ko e fakatātaá, ʻi he Penitekosi 33 T.S., naʻe papitaiso ʻa e toko 3,000 nai. (Ngā. 2:41) Pea naʻe mātuʻaki tupulekina ai pē ʻa e tokolahi ʻo e kau ākongá. (Ngā. 6:7) Neongo ia, naʻe tomuʻa tala ʻe Sīsū ko e ngāue fakamalangá ʻe toe ola lelei ange ʻi he ngaahi ʻaho fakaʻosí.​—Sione 14:12; Ngā. 1:8.

3-4. Ko e hā nai ʻoku hoko ai ʻa e ngāue fakamalangá ko ha pole ki he niʻihi, pea ko e hā te tau lāulea ki ai ʻi he kupu ko ení?

³ Ko kitautolu kotoa ʻoku tau feinga ke tauhi ha vakai pau ki he ngāue fakafaifekaú. ʻI he ngaahi fonua ʻe niʻihi, ʻoku faingofua ke fai pehē. Ko e hā hono ʻuhingá? Koeʻuhi ko e fuʻu tokolahi ʻa e faʻahinga ʻoku nau fie ako Tohi Tapú ʻoku ʻi ai ʻa e niʻihi kuo pau ke hiki ʻi ha lisi ʻo fakatatali ke faingamālie ha Fakamoʻoni! Ka ʻi he ngaahi feituʻu ʻe niʻihi ʻi he māmaní, ʻoku hoko ʻa e ngāue fakamalangá ko ha pole lahi ki he kau malangá; ʻoku tātātaha ke ʻi ʻapi ʻa e kakaí, pea ko e faʻahinga ʻoku ʻi ʻapí ʻoku ʻikai nai ke nau fakahāhā ha mahuʻingaʻia ʻi he Tohi Tapú.

⁴ Kapau ʻokú ke nofo ʻi ha feituʻu ʻoku hoko ai ʻa e ngāue fakamalangá ko ha pole, ko e ngaahi fokotuʻu ʻi he kupu ko ení ʻoku ngalingali ʻe tokoni kiate koe. Te tau lāulea ki he meʻa kuo fai ʻe he niʻihi ke fetuʻutaki ai mo e kakai tokolahi ange ʻi heʻenau ngāue fakafaifekaú. Pea te tau sivisiviʻi ʻa e ʻuhinga ʻoku lava ke tau tauhi maʻu ai ha fakakaukau pau neongo pe ʻoku tali ʻe he kakaí ʻetau pōpoakí pe ʻikai.

 5. Ko e hā ʻa e ngaahi pole ʻoku fetaulaki mo e Kau Fakamoʻoni tokolahi?

⁵ Ko e tokolahi ʻo e Kau Fakamoʻoní ʻoku nau ʻilo ʻoku fakautuutu ange ʻa e faingataʻa ke aʻu ki he kakaí ʻi honau ʻapí. ʻOku nofo ʻa e kau malanga ʻe niʻihi ʻi he ngaahi feituʻu ʻoku lahi ai ʻa e ngaahi ʻapaatimeni leʻohi malu pe feituʻu ʻā malu. ʻE ʻi ai nai ha leʻo pe ko ha sikiulitī ʻokú ne taʻofi ʻa e hū ʻa ha taha naʻe ʻikai fakaafeʻi ʻe ha tokotaha-ʻapi pau. Ko e kau malanga ʻe niʻihi ʻoku lava ke nau ʻalu mei he fale ki he fale ʻo ʻikai ha fakafeʻātungia, ka ʻoku tokosiʻi pē ʻa e kakai ʻoku ʻi ʻapí. Ka ko e kau malanga ʻe niʻihi ʻoku nau malanga ʻi he feituʻu ʻuta pe tuʻu mavahe ʻa ia ʻoku tokosiʻi ʻa e kakai ʻoku nofo aí. ʻOku fononga lōloa nai ʻa e kau malangá ʻi he feinga pē ke aʻu ki ha tokotaha-ʻapi ʻe taha​—ʻa ia ʻoku ʻikai nai ke ʻi ʻapi! Kapau ʻoku tau fetaulaki mo e ngaahi pole ko ení, kuo pau ke ʻoua te tau foʻi. Ko e hā ʻe lava ke tau fai ke ikuʻi ʻa e ngaahi fakafaingataʻaʻiaʻanga peheé pea hoko ʻo ola lelei ai ʻetau ngāue fakafaifekaú?

 6. ʻOku anga-fēfē ʻa e tatau ʻa e kau malangá mo e kau tangata toutaí?

⁶ Naʻe fakahoa ʻe Sīsū ʻa e ngāue fakamalangá ki he ngāue ʻa ha tangata toutai. (Mk. 1:17) Ko e kau tangata toutai ʻe niʻihi ʻoku nau ʻalu nai ʻi ha ngaahi ʻaho ʻo ʻikai maʻu ha ika. Ka ʻoku ʻikai te nau foʻi; ʻoku nau feʻunuʻaki. ʻOku nau liliu ʻa e taimi, feituʻu pe founga toutaí. ʻE lava ke tau fai ʻa e ngaahi feʻunuʻaki meimei tatau ʻi heʻetau ngāue fakafaifekaú. Fakakaukau ki he ngaahi fokotuʻu ko ení.

 7. Ko e hā nai ʻa e ola kapau te tau malanga ʻi ha taimi kehekehe?

⁷ Feinga ke aʻu ki he kakaí ʻi ha taimi kehekehe. Te tau maʻu ʻa e kakai tokolahi ange kapau te tau malanga ʻi he taimi ʻoku ngalingali te nau ʻi ʻapi aí. He ko ē, ko e tokotaha kotoa kuo pau ke nau foki ki ʻapi! Ko e fanga tokoua mo e fanga tuofāfine tokolahi ʻoku nau ʻiloʻi ʻoku lelei ke malanga ʻi he hoʻataá pe efiafí koeʻuhi ʻoku maʻu ai ʻa e kakai tokolahi ange. ʻIkai ko ia pē, ko e faʻahinga ʻi he ngaahi ʻapí ʻoku nau ongoʻi fiemālie ange pea mateuteu ke talanoa lolotonga ʻa e taimi ko iá. Pe mahalo te ke ʻiloʻi ʻoku ʻaonga ke ngāueʻaki ʻa e fokotuʻu mei ha tokotaha mātuʻa ko David. ʻOkú ne pehē ʻi he hili ha malanga ʻi ha vahaʻa taimi ʻi ha feituʻu ngāue, ko ia mo hono hoa ngāué naʻá na toe foki ki he ngaahi ʻapi naʻe ʻikai ke ʻi ai ha taha ʻi heʻena ʻuluaki ʻaʻahi ki aí. ʻOkú ne pehē, “Naʻá ku ʻohovale ʻi he tokolahi ʻa e faʻahinga naʻe ʻi he ngaahi ʻapí ʻi heʻema toe ʻaʻahi ki aí.”b

 8. ʻE lava fēfē ke tau ngāueʻaki ʻa e Tangata Malanga 11:6 ʻi heʻetau ngāue fakafaifekaú?

⁸ ʻOku totonu ke ʻoua te tau foʻi. ʻOku fakamanatu mai ʻe heʻetau konga tohi ʻo e kaveingá ʻa e fakakaukau ʻoku fiemaʻu ke tau maʻú. (Lau ʻa e Tangata Malanga 11:6.) Ko David, naʻe lave ki ai ki muʻá, naʻe ʻikai te ne foʻi. ʻI ha ʻapi ʻe taha, naʻe faifai pē ʻo ne maʻu ʻa e tokotaha-ʻapí hili haʻane toutou foki ki ai. Naʻe mahuʻingaʻia ʻa e tangatá ʻi he talanoa ki he Tohi Tapú peá ne pehē, “Kuó u nofo heni ʻi he taʻu nai ʻe valu, pea kuo teʻeki ai ke u fetaulaki mo ha taha ʻo e Kau Fakamoʻoni ʻa Sihová ʻi hoku matapaá.” ʻOku pehē ʻe David, “Kuó u ʻiloʻi ʻi he taimi ʻokú ke aʻu ai ki he kakaí ʻi honau ʻapí, ʻoku nau faʻa tali ʻa e pōpoaki ʻoku tau malangaʻí.”

 9. Kuo anga-fēfē ʻa e aʻu ʻa e Kau Fakamoʻoni ʻe niʻihi ki he kakai ʻoku faingataʻa ke maʻu ki ʻapí?

⁹ ʻAhiʻahiʻi ha feituʻu kehe. Koeʻuhi ke aʻu ki he kakai ʻoku faingataʻa ke maʻu ki ʻapí, ko e kau malanga ʻe niʻihi kuo nau liliu ʻa e feituʻu ʻoku nau malanga aí. Ko e fakatātaá, ko e ngāue ʻi he halá mo e ngāueʻaki ʻa e ngaahi papa tuʻuaki tohí kuo fakamoʻoniʻi ko ha founga ola lelei ia ke fetaulaki ai mo e kakai ʻoku nau nofo ʻi he ngaahi ʻapaatimeni lalahi ʻa ia ʻoku ʻikai ke ngofua ai ʻa e faifakamoʻoni fale ki he falé. ʻOku lava heni ke fetalanoaʻaki mata ki he mata ʻa e Kau Fakamoʻoní mo e kakai ʻoku ʻikai lava ke fai ha aʻu ki aí. Pehē foki, kuo ʻiloʻi ʻe he kau malanga tokolahi ko e kakaí ʻoku nau saiʻia ange ke talanoa pe tali ʻa e ʻū tohí ʻi he ngaahi paʻake, māketi mo e ngaahi feituʻu pisinisí. Ko Floiran, ko ha ʻovasia sēketi ʻi Polivia, ʻokú ne pehē: “ʻOku mau ʻalu ki he ngaahi māketí mo e feituʻu pisinisí ʻi he 1:00 hoʻatā ki he 3:00 efiafi ʻi he taimi ʻoku ʻikai ke fuʻu femoʻuekina ai ʻa e kau faifakataú. ʻOku mau faʻa fetalanoaʻaki lelei pea aʻu ʻo kamata ha ngaahi ako Tohi Tapu.”

10. Ko e hā ʻa e ngaahi founga ʻe lava ke ke ngāueʻaki ke aʻu ai ki he kakaí?

¹⁰ ʻAhiʻahiʻi ha founga kehe. Tau pehē pē kuó ke toutou feinga ke aʻu tonu ki ha tokotaha. Kuó ke toutou ʻaʻahi ki ai ʻi he taimi kehekehe ka ʻoku ʻikai ke ne ʻi ʻapi. ʻOku toe ʻi ai ha founga kehe ke aʻu ai ki he tokotaha ko iá? ʻOku pehē ʻe Katarína, “ʻOku ou fai ha tohi ki he faʻahinga ʻoku ʻikai ke u maʻu ki honau ʻapí, ʻo fakahaaʻi ai ʻa e meʻa naʻá ku mei tala ange hangatonu kiate kinautolú.” Ko e hā ʻa e poiní? Feinga ke aʻu ki he tokotaha kotoa ʻi ho feituʻu ngāué ʻi ha faʻahinga founga pē ʻi hoʻo fakahoko hoʻo ngāue fakafaifekaú.

11. Ko e hā ʻoku ʻikai mahuʻingaʻia ai ʻa e kakai ʻe niʻihi ʻi heʻetau pōpoakí?

¹¹ Ko e kakai ʻe niʻihi ʻoku ʻikai ke nau mahuʻingaʻia ʻi heʻetau pōpoakí. ʻOku ʻikai ke nau vakai ki he fiemaʻu ke nau ʻilo ki he ʻOtuá pe ko e Tohi Tapú. ʻOku ʻikai ke nau tui ki he ʻOtuá koeʻuhí ko ʻenau sio ki he lahi fau ʻa e faingataʻá ʻi he māmaní. ʻOku nau talitekeʻi ʻa e Tohi Tapú koeʻuhí ko ʻenau sio ki he mālualoi ʻa e kau taki lotu ʻa ia ʻoku nau taukaveʻi ʻoku nau moʻui ʻo fakatatau ki he tohi ko iá. Ko e niʻihi ʻoku nau femoʻuekina ʻi heʻenau ngāué, fāmilí pe ngaahi palopalema fakafoʻituituí, pea ʻikai ke nau sio ki he founga ʻe lava ke tokoniʻi ai kinautolu ʻe he Tohi Tapú. ʻE lava fēfē ke tau tauhi maʻu ʻetau fiefiá ʻi he taimi ʻoku fakasiʻia ai ʻe he faʻahinga ʻoku tau malanga ki aí ʻa e mahuʻinga ʻetau pōpoakí?

12. ʻE lava fēfē ke tau ngāueʻaki ʻa e lea ʻi he Filipai 2:4 ke tokoniʻi kitautolu ʻi he ngāue fakafaifekaú?

¹² Fakahāhā ʻa e mahuʻingaʻia fakafoʻituitui. Ko e tokolahi naʻe ʻikai ke nau mahuʻingaʻia ki muʻa ka naʻa nau tali ʻa e ongoongo leleí ʻi he taimi naʻa nau ongoʻi ai naʻe mahuʻingaʻia moʻoni ha tokotaha malanga ʻiate kinautolu. (Lau ʻa e Filipai 2:4.) Ko e fakatātaá, ko David, naʻe lave ki ai ki muʻá, ʻokú ne pehē, “Kapau ʻoku pehē ʻe ha taha ʻoku ʻikai ke ne mahuʻingaʻia, ʻokú ma tuku ki tafaʻaki ʻema Tohi Tapú pe ko e ʻū tohí pea pehē: ‘ʻOku ou mahuʻingaʻia ke ʻiloʻi ʻa e ʻuhinga ʻokú ke ongoʻi pehē aí.’” ʻOku lava ke ongoʻi ʻe he kakaí ʻa e tokanga ange ha taha fekauʻaki mo kinautolu. ʻE lava ke ngalo ʻiate kinautolu ʻa e meʻa naʻa tau leaʻakí, ka ʻoku ngalingali te nau manatuʻi ʻa e anga ʻetau fakafeangai kiate kinautolú. Neongo kapau ʻoku ʻikai fakaʻatā ʻe he faʻahinga ʻi he ngaahi ʻapí ke tau lea, ʻe lava ke tau fakahāhā ʻi heʻetau tōʻongá mo ʻetau fakafōtungá ʻoku tau tokanga fekauʻaki mo kinautolu.

13. ʻE lava fēfē ke tau feʻunuʻaki ʻetau pōpoakí ʻo fakatatau ki he fiemaʻu ʻa e tokotaha-ʻapi taki taha?

¹³ ʻOku tau fakahāhā ʻa e mahuʻingaʻia fakafoʻituituí ʻi hono feʻunuʻaki ʻetau pōpoakí ʻo fakatatau ki he fiemaʻu mo e meʻa ʻoku mahuʻingaʻia ai ʻa e tokotaha-ʻapí. Ko e fakatātaá, ʻoku tau sio ki ha fakaʻilonga ʻoku nofo ha fānau ʻi he ʻapí? ʻE mahuʻingaʻia nai ʻa e ongo mātuʻá ʻi he faleʻi ʻa e Tohi Tapú ki hono ʻohake ʻa e fānaú pe ko e ngaahi fokotuʻu ʻaonga mei ai ki he founga hono maʻu ha moʻui fakafāmili fiefia ange. ʻOku tau sio ki ha ngaahi loka ʻi he matapaá? Te tau fili nai ke talanoa fekauʻaki mo e faihiá mo e ilifia ʻoku hokolahia ʻi he māmaní, ʻa ia ʻe houngaʻia nai ʻa e tokotaha-ʻapí ʻi hono ʻiloʻi ʻa e fakaleleiʻanga tuʻuloa ki he faihiá. Pe ko e hā pē ʻa e tuʻungá, feinga ke tokoniʻi ʻa e faʻahinga ʻoku fiefanongó ke nau ʻiloʻi ʻa e founga ʻe lava ke tokoniʻi ai kinautolu ʻe he faleʻi ʻa e Tohi Tapú. Ko Katarína, naʻe lave ki ai ki muʻá, ʻokú ne pehē, “ʻOku ou fakakaukau ki he anga hono ʻai ʻe he moʻoní ʻeku moʻuí ke toe lelei angé.” Ko hono olá, ʻoku lea ʻa Katarína fakataha mo e tuipau, pea ko e kakai ʻokú ne talanoa ki aí ʻoku ʻikai ha veiveiua ʻoku nau ongoʻi ia.

14. Makatuʻunga ʻi he Palōveepi 27:17, ʻe lava fēfē ke fetokoniʻaki ʻa e ongo meʻa malangá?

¹⁴ Maʻu ʻaonga mei he tokoni ʻa e niʻihi kehé. ʻI he ʻuluaki senitulí, naʻe vahevahe ʻe Paula ʻene ngaahi founga malangá mo e founga faiakó kia Tīmote, pea naʻá ne fakalototoʻaʻi ʻa Tīmote ke ngāueʻaki ʻa e ngaahi founga ko iá ke tokoniʻi ʻa e niʻihi kehé. (1 Kol. 4:17) Hangē ko Tīmoté, ʻoku lava ke tau maʻu ʻaonga mei he faʻahinga taukei ʻi heʻetau fakatahaʻangá. (Lau ʻa e Palōveepi 27:17.) Fakakaukau ki he faʻifaʻitakiʻanga ʻa ha tokoua ko Shawn. Naʻá ne tāimuʻa ʻi ha vahaʻa taimi ʻi ha feituʻu ʻuta ko e tokolahi taha ʻo e kakaí naʻa nau fiemālie pē ʻi heʻenau lotú. Naʻe anga-fēfē ʻene tauhi maʻu ʻene fiefiá? ʻOkú ne pehē, “Naʻá ku ngāue mo ha tokotaha, ʻi he taimi ʻoku ala maʻu aí.” Naʻá ma ngāueʻaki ʻa e taimi ʻi he fononga mei he vahaʻa ʻo e ngaahi falé ke ma fetokoniʻaki ai ke fakaleleiʻi ʻema pōtoʻi fakafaiakó. Ko e fakatātaá, te ma vakaiʻi ʻa e founga naʻá ma fakahoko ai ha ʻaʻahi. Pea naʻá ma lāulea ki he founga te ma fakafeangai lelei ange ai kapau te ma toe fehangahangai mo ha tuʻunga tatau.”

15. Ko e hā ʻoku mātuʻaki mahuʻinga ai ʻa e lotú ki heʻetau ngāue fakafaifekaú?

¹⁵ Lotu kia Sihova ki ha tokoni. Hanga kia Sihova ki ha tataki ʻi he taimi kotoa ʻokú ke kau ai ʻi he ngāue fakafaifekaú. Ka ne ʻikai ʻa e tokoni ʻa hono laumālie māʻoniʻoni mālohí, heʻikai malava ha taha ʻo kitautolu ʻo fakahoko ha meʻa. (Saame 127:1; Luke 11:13) ʻI hoʻo kole kia Sihova ha tokoni ʻi he lotú, lave ki he ngaahi meʻa pau. Ko e fakatātaá, kole kiate ia ke tataki koe ki ha taha ʻoku hehema totonu nai pea mateuteu ke fanongo. Ngāue leva ʻo fehoanaki mo hoʻo lotú ʻaki ʻa e malanga ki he tokotaha kotoa ʻokú ke fetaulaki mo iá.

16. Ko e hā ʻoku mātuʻaki mahuʻinga ai ʻa e ako fakafoʻituituí ki heʻetau ngāue fakafaifekaú?

¹⁶ Vaheʻi ha taimi ki he ako fakafoʻituituí. ʻOku pehē ʻe he Folofola ʻa e ʻOtuá: “Fakamoʻoniʻi kiate kimoutolu ʻa e finangalo lelei mo fakahōifua mo haohaoa ʻo e ʻOtuá.” (Loma 12:2) Ko e lahi ange ʻetau tuipau ʻoku tau ʻiloʻi ʻa e moʻoni fekauʻaki mo e ʻOtuá, ko e lahi ange ia ʻetau talanoa fakataha mo e tuipau ki he niʻihi kehé ʻi he ngāue fakafaifekaú. Ko Katarína, naʻe lave ki ai ki muʻá, ʻokú ne pehē: “ʻI ha taimi siʻi ki muʻa ange, naʻá ku ʻiloʻi naʻe fiemaʻu ke u fakaivimālohiʻi ʻeku tui fekauʻaki mo e ngaahi akonaki Fakatohitapu tefito ʻe niʻihi. Ko ia naʻá ku ako ʻa e fakaikiiki ʻo e fakamoʻoni fekauʻaki mo e ʻi ai ha Tokotaha-Fakatupú, ko e Tohi Tapú ko e Folofola moʻoni ʻa e ʻOtuá, pea ko e ʻOtuá ʻoku ʻi ai ʻene kautaha ʻokú ne fakafofongaʻi ia he ʻahó ni.” ʻOku pehē ʻe Katarína ko ʻene ako fakafoʻituituí naʻá ne fakaivimālohiʻi ʻene tuí pea fakalahi ʻene fiefia ʻi he ngāue fakafaifekaú.

17. Ko e hā naʻe tauhi maʻu ai ʻe Sīsū ha fakakaukau pau ʻi heʻene ngāue fakafaifekaú?

¹⁷ Naʻe tauhi maʻu ʻe Sīsū ʻa e fakakaukau pau pea hanganaki malanga neongo naʻe ʻikai mahuʻingaʻia ʻa e niʻihi ʻi heʻene pōpoakí. Ko e hā hono ʻuhingá? Naʻá ne ʻiloʻi naʻe fiemaʻu lahi ke ʻiloʻi ʻe he kakaí ʻa e moʻoní, pea naʻá ne loto ke maʻu ʻe he tokolahi taha ʻe ala lavá ha faingamālie ke tali ʻa e pōpoaki ʻo e Puleʻangá. Naʻá ne ʻiloʻi foki ko e niʻihi naʻe ʻikai ke nau mahuʻingaʻia ʻi he kamatá ʻe faai atu pē ʻo nau tali ia. Fakakaukau ki he meʻa naʻe hoko tonu ʻi hono fāmilí. Lolotonga ʻa e ngāue fakafaifekau ʻa Sīsū ʻi he taʻu ʻe tolu mo e kongá, naʻe ʻikai ha taha ʻi hono fanga tokouá naʻe hoko ko ʻene ākonga. (Sione 7:5) Neongo ia, hili ʻene toetuʻú, naʻa nau hoko ko e kau Kalisitiane.​—Ngā. 1:14.

18. Ko e hā ʻoku tau hokohoko atu ai ke malangá?

¹⁸ ʻOku ʻikai ke tau ʻiloʻi pe ko hai ʻe faai atu ʻo ne tali ʻa e ngaahi moʻoni Fakatohitapu ʻoku tau akoʻí. Ko e kakai ʻe niʻihi ʻoku fuoloa ange ke nau tali ʻetau pōpoakí. Naʻa mo e faʻahinga ʻoku ʻikai ke nau fiefanongó ʻoku nau sio ki heʻetau tōʻonga leleí mo e fakakaukau paú, pea ʻe faai atu pē nai ʻo nau kamata ke “fakalāngilangiʻi ai ʻa e ʻOtuá.”​—1 Pita 2:12.

19. Fakatatau ki he 1 Kolinitō 3:6, 7, ko e hā kuo pau ke tau ʻiloʻí?

¹⁹ ʻI heʻetau tō mo fuʻifuʻí, kuo pau ke tau ʻiloʻi ʻa e ngafa ʻoku fakahoko ʻe he ʻOtuá. (Lau ʻa e 1 Kolinitō 3:6, 7.) Ko Getahun, ko ha tokoua ʻoku ngāue ʻi ʻItiopea, ʻokú ne pehē: “Laka hake ʻi he taʻu ʻe 20, ko au toko taha pē ʻa e Fakamoʻoni ʻi ha feituʻu naʻe tātātaha hono ngāueʻí. Ka ʻi he taimí ni ʻoku ʻi ai ʻa e kau malanga ʻe toko 14. Ko e toko 13 ʻo kinautolu naʻa nau papitaiso, kau ai ʻa hoku uaifí mo ʻema fānau ʻe toko tolu. ʻOku fakaʻavalisi ki he toko 32 ʻoku nau maʻu ʻa e ngaahi fakatahá.” ʻOku fiefia ʻa Getahun ʻi heʻene hokohoko atu ke malanga lolotonga ʻene tatali anga-kātaki kia Sihova ke tohoaki mai ʻa e kakai hehema totonú ki Heʻene kautahá!​—Sione 6:44.

20. ʻI he founga fē ʻoku tau hangē ai ko ha kau fakahaofi moʻui?

²⁰ ʻOku vakai ʻa Sihova ki he moʻui ʻa e tangata kotoa ʻoku mahuʻinga. ʻOkú ne ʻomai ʻa e monū ke tau ngāue fakataha mo hono ʻAló ʻi hono fakatahatahaʻi mai ʻa e kakai mei he kotoa ʻo e ngaahi puleʻangá ki muʻa ke ngata ʻa e fokotuʻutuʻu ko ení. (Hāk. 2:7) Ko ʻetau ngāue fakamalangá ʻe lava ke fakatatau ia ki ha ngāue fakahaofi moʻui. Pea ʻoku tau hangē ai ko ha timi fakahaofi moʻui ʻoku fekauʻi atu ke fakahaofi ha kakai ʻoku fihia ʻi ha keliʻanga malala. Neongo ko e tokosiʻi pē ʻo e kau keli malala ʻe maʻu ʻoku nau kei moʻuí, ko e ngāue naʻe fai ʻe he kotoa ʻo e kau fakahaofi moʻuí ʻoku mahuʻinga. ʻOku tatau pē ia mo ʻetau ngāue fakafaifekaú. ʻOku ʻikai ke tau ʻiloʻi pe ko e toko fiha ʻoku toe ke fakahaofi mei he fokotuʻutuʻu ʻa Sētané. Ka ʻoku lava ke ngāueʻaki ʻe Sihova ha taha ʻo kitautolu ke tokoniʻi kinautolu. Ko Andreas, ʻoku nofo ʻi Polivia, ʻokú ne pehē: “ʻOku ou vakai ki he tokotaha taki taha ʻokú ne ako ʻa e moʻoni Fakatohitapú pea papitaiso ko e ola ia ʻo e ngāue ʻa ha kulupu.” ʻOfa ke tau tauhi maʻu ha fakakaukau pau meimei tatau fekauʻaki mo ʻetau ngāue fakafaifekaú. Kapau te tau fai ia, ʻe tāpuakiʻi kitautolu ʻe Sihova, pea ʻe hoko ʻetau ngāue fakafaifekaú ko ha matavai moʻoni ʻo e fiefia.