Ko e Vakai ʻa e Tohi Tapú

ʻOku Fakamakehekeheʻi ʻe he Tohi Tapú ʻa e Kakai Fefiné?

KO Tetuliané, ko ha teolosia ʻi he senituli hono tolú, naʻá ne fakamatalaʻi ʻi he taimi ʻe taha ʻa e kakai fefiné “ko e matapā ʻo e tēvoló.” Kuo ngāueʻaki ʻe he niʻihi ʻa e Tohi Tapú ke fakahāhā ai ko e kakai fefiné ʻoku siʻi ange ʻa honau mahuʻingá ʻi he kakai tangatá. Ko hono olá, ʻoku tui ai ʻa e kakai tokolahi ʻoku fakamakehekeheʻi ʻe he Tohi Tapú ia ʻa e kakai fefiné.

Ko Elizabeth Cady Stanton, ko ha paionia ʻi he senituli hono 19 ki he ngaahi totonu ʻa e kakai fefine ʻi he ʻIunaite Seteté, naʻá ne tui “ko e Tohi Tapú mo e Siasí ʻa e ongo maka tūkiaʻanga lalahi taha ki he tauʻatāina ʻa e kakai fefiné.” Fekauʻaki mo e ʻuluaki ngaahi tohi ʻe nima ʻo e Tohi Tapú, naʻe pehē ʻe Stanton ʻi he taimi ʻe taha: “ʻOku ʻikai te u ʻiloʻi ha toe ngaahi tohi kehe ʻoku akoʻi mātuʻaki fakaʻaufuli ai ʻa hono fakamoʻulaloaʻi mo hono tuku hifo ʻo e fefiné.”

Lolotonga ʻoku maʻu nai ʻe he niʻihi he ʻahó ni ʻa e ngaahi fakakaukau tōtuʻa peheé, ʻoku kei tui pē ʻa e tokolahi ʻoku poupouʻi ʻe he ngaahi konga ʻe niʻihi ʻo e Tohi Tapú ʻa e fakamakehekeheʻi ʻo e kakai fefiné. ʻOku fakatonuhiaʻi ha fakamulituku pehē?

Anga ʻo e Vakai ki he Kakai Fefiné ʻi he Ngaahi Konga Tohi Tapu Faka-Hepeluú

“Kae to hoʻo holi ki ho husepaniti, pea ʻe aʻana ʻa e pule kiate koe.” (Senesi 3:16) ʻOku tuhu ʻa e kau fakaangá ki he meʻá ni ko ha fakamāuʻi ia ʻo ʻIvi ʻe he ʻOtuá pea ko e hōifua fakaʻotua ia ki hono fakamoʻulaloaʻi ʻo e fefiné ʻe he tangatá. Kae kehe, ʻi he ʻikai ko hono fakamatalaʻi ia ʻo e taumuʻa ʻa e ʻOtuá, ko ha fakamatala totonu eni ʻo fekauʻaki mo e ngaahi nunuʻa fakamamahi ʻo e angahalá mo hono siʻaki ʻa e tuʻunga-hau ʻo e ʻOtuá. Ko e ngaohikovia ʻo e kakai fefiné ko e ola fakahangatonu ia ʻo e natula kuo hinga ʻo e faʻahinga ʻo e tangatá, ʻo ʻikai ko e finangalo ia ʻo e ʻOtuá. Ko e ngaahi uaifí ʻi he ngaahi anga fakafonua lahi kuo puleʻi moʻoni kinautolu ʻe honau ngaahi husepānití, ʻo faʻa ʻi he ngaahi founga fefeka ʻaupito. Ka naʻe ʻikai ko e taumuʻa eni ʻa e ʻOtuá.

Ko ʻĀtama mo ʻIví naʻe ngaohi fakatouʻosi kinaua ʻi he ʻīmisi ʻo e ʻOtuá. ʻIkai ngata aí, naʻá na maʻu ʻa e fekau tatau mei he ʻOtuá ke na hoko ʻo fanafanau, fakafonu ʻa e māmaní pea pule ki ai. Naʻe fiemaʻu ke na ngāue fakataha ko ha timi. (Senesi 1:​27, 28) ʻOku hā mahino, ʻi he taimi ko iá, naʻe ʻikai puleʻi fefeka ʻe ha taha ʻa e tokotaha ʻe tahá. ʻOku pehē ʻe he Senesi 1:31: “Naʻe ʻafio ʻa e ʻOtua ki he meʻa kotoa pe kuo ne ngaohi, pea tā kuo lelei ʻaupito.”

ʻI he ngaahi tuʻunga ʻe niʻihi ʻoku ʻikai ke fakahaaʻi ʻi he ngaahi fakamatala Fakatohitapú ʻa e vakai ʻa e ʻOtuá ki ha meʻá. Ko ha talanoa fakahisitōlia nai pē ia. Ko e talanoa kia Lote ʻi heʻene meʻaʻofaʻaki ʻa hono ongo ʻofefiné ki he kau Sōtomá ʻoku fakahaaʻi ia ʻo ʻikai ha fakamatala fakaeʻulungāanga ki ai pe ko hano fakamāuʻi ia ʻe he ʻOtuá.a​—Senesi 19:​6-8.

Ko hono moʻoní, ʻoku fehiʻa ʻa e ʻOtuá ʻi he founga kotoa pē ʻo e taʻefaitotonú mo e ngaohikoviá. (Ekisoto 22:22; Teutalonome 27:19; Aisea 10:​1, 2) Ko e Lao ʻa Mōsesé naʻe fakahalaiaʻi ai ʻa e tohotohó mo e paʻumutú. (Livitiko 19:29; Teutalonome 22:​23-​29) Naʻe tapui ʻa e tonó, pea ko e tauteá ko e mate ki he ongo tafaʻakí fakatouʻosi. (Livitiko 20:10) ʻI he ʻikai fakamakehekeheʻi ʻa e kakai fefiné, naʻe fakamāʻolungaʻi ʻe he Laó mo maluʻi kinautolu mei he ngāue taʻefaitotonu failahia naʻe anga-maheniʻaki ʻi he ngaahi puleʻanga takatakaí. Ko ha uaifi Siu lavameʻa ko ha tokotaha ia naʻe fakaʻapaʻapaʻi māʻolunga pea fakamahuʻingaʻi. (Palovepi 31:​10, 28-30) Ko e taʻemalava ʻa e kau ʻIsilelí ke muimui ʻi he ngaahi lao ʻa e ʻOtuá ki hono fakahaaʻi ʻa e fakaʻapaʻapa ki he kakai fefiné ko e foʻui pē ia ʻo kinautolu, ʻo ʻikai ko e finangalo ʻo e ʻOtuá. (Teutalonome 32:5) Faifai atu pē, naʻe fakamāuʻi mo tautea ʻe he ʻOtuá ʻa e puleʻangá fakakātoa ʻi heʻenau talangataʻa mataʻāʻaá.

Ko e Fakamakehekeheʻi ʻa e Fakamoʻulaloá?

ʻE lava ke lele lelei ha faʻahinga sōsaieti pē ʻi he taimi pē ʻoku ʻi ai ai ʻa e tuʻunga māú. ʻOku fiemaʻu ki heni ʻa e ngāueʻi ʻo e mafaí. Ko ʻene ʻikaí pē ko e maveuveú ia. “Ko e ʻOtua ʻoku ʻikai ko e fakatupu maveuveu, ka ko e fakatupu melino.”—1 Kolinito 14:33.

ʻOku fakamatalaʻi ʻe he ʻapositolo ko Paulá ʻa e fokotuʻutuʻu ʻo e tuʻunga-ʻulu ʻi he fāmilí: “Ko e ʻulu ʻo e tangata kotoa pe ko Kalaisi; pea ko e ʻulu ʻo e fefine ko e tangata; pea ko e ʻulu ʻo Kalaisi ko e ʻOtua.” (1 Kolinito 11:3) Ko e tokotaha kotoa pē tuku kehe ʻa e ʻOtuá ʻoku fakamoʻulaloa ia ki ha mafai māʻolunga ange. Ko e moʻoniʻi meʻa ko ia ʻo e ʻi ai ha ʻulu ʻo Sīsuú ʻoku ʻuhinga ai iá ʻoku fakamakehekeheʻi ia? Ko e moʻoni ʻoku ʻikai! Ko e moʻoniʻi meʻa ko ia hono vaheʻi Fakatohitapu ʻa e kakai tangatá ke nau takimuʻa ʻi he fakatahaʻangá mo e fāmilí ʻoku ʻikai ʻuhinga ia aí ʻoku fakamakehekeheʻi ʻa e kakai fefiné. Ke lakalakaimonū, ʻoku fiemaʻu fakatouʻosi ʻe he fāmilí mo e fakatahaʻangá ʻa e kakai fefiné mo e kakai tangatá ke nau fakahoko honau ngaahi ngafá taki taha ʻaki ʻa e ʻofa mo e fakaʻapaʻapa.—Efeso 5:​21-​25, 28, 29, 33.

Naʻe tōʻongafai maʻu pē ʻa Sīsū ki he kakai fefiné ʻaki ʻa e fakaʻapaʻapa. Naʻá ne fakafisi ke muimui ʻi he ngaahi tala tukufakaholo mo e ngaahi lao fakatupu fakamakehekehe naʻe akoʻi ʻe he kau Fālesí. Naʻá ne talanoa ki he kakai fefine ʻikai ko e Siú. (Mātiu 15:​22-​28; Sione 4:​7-9) Naʻá ne akoʻi ʻa e kakai fefiné. (Luke 10:​38-42) Naʻá ne maluʻi ʻa e kakai fefiné mei hono liʻaki kinautolú. (Maake 10:​11, 12) Mahalo ko e sitepu fakaeliukava lahi taha ʻi hono taimí ko hono tali ko ia ʻe Sīsū ʻa e kakai fefiné ko hono ngaahi kaumeʻa ofí. (Luke 8:​1-3) ʻI he tuʻunga ko ha fakasino haohaoa ʻo e ngaahi ʻulungāanga kotoa ʻo e ʻOtuá, naʻe fakahaaʻi ai ʻe Sīsū ko e faʻahinga tāutaha ʻo e fefiné mo e tangatá fakatouʻosi ʻoku nau maʻu ʻa e mahuʻinga tatau ʻi he vakai mai ʻa e ʻOtuá. Ko hono moʻoní, ʻi he lotolotonga ʻo e muʻaki kau Kalisitiané, ko e kakai tangatá mo e kakai fefiné fakatouʻosi naʻa nau maʻu ʻa e meʻaʻofa ko e laumālie māʻoniʻoní. (Ngāue 2:​1-4, 17, 18) Ki he faʻahinga ko ia kuo paní, ʻa ia ʻoku nau maʻu ʻa e ʻamanaki ko e ngāue ko e ngaahi tuʻi mo e kau taulaʻeiki fakataha mo Kalaisí, ʻe ʻikai ha fakafaikehekehe ia ai ʻi he tangatá mo e fefiné ʻi he taimi pē ʻoku nau toetuʻu ai ki he moʻui fakahēvaní. (Kaletia 3:28) Ko e Faʻu-Tohi ʻo e Tohi Tapú, ʻa Sihova, ʻoku ʻikai te ne fakamakehekeheʻi ʻa e kakai fefiné.

[Fakamatala ʻi lalo]

[Fakatātā ʻi he peesi 18]

ʻI he ʻikai hangē ko e tokolahi ʻo hono ngaahi toʻumeʻá, naʻe tōʻongafai fakaʻapaʻapa ʻa Sīsū ki he kakai fefiné