“Neongo Naʻá Ne Mate, ʻOkú Ne Kei Lea Pē”

NAʻE vakai atu ʻa ʻĒpeli ki heʻene fanga sipí ʻoku nau kaikai mai ʻi he melino ʻi he veʻe tafa moʻungá. Mahalo ʻokú ne sio fakalaka atu leva heʻene fanga sipí ki ha feituʻu ʻoku mamaʻo atu ʻa ia ʻoku ʻasi siʻisiʻi mai. Naʻá ne ʻilo ko e feituʻu ia ʻoku vilovilo taʻetuku ai ha heletā ulo, ke leʻohi ʻa e hala ki he ngoue ʻo ʻĪtení. Ko ʻene ongo mātuʻá naʻá na nofo ai ki muʻa, ka ko kinaua fakatouʻosi mo ʻena fānaú ʻe ʻikai lava ke nau toe hū ki ai he taimí ni. Fakakaukau atu ki he vilingia ʻa e louʻulu ʻo ʻĒpelí ʻi he ʻea mokomoko ʻo e malu efiafí heʻene hanga hake ʻo sio fakamamaʻu ki ʻolunga mo fakakaukau fekauʻaki mo hono Tokotaha-Fakatupú. ʻE toe lava ke fakaleleiʻi ʻa e maumau ʻi he vahaʻa ʻo e tangatá mo e ʻOtuá? Naʻe ʻikai toe fiemaʻu ʻe ʻĒpeli ha meʻa lahi ange ai.

ʻOku lea atu ʻa ʻĒpeli kiate koe he ʻahó ni. ʻOku lava ke ke fanongo ki ai? Te ke pehē nai ʻoku ʻikai malava ha meʻa pehē. He ko ē, ko e foha fika ua ko eni ʻo ʻĀtamá naʻe mate fuoloa ia. ʻOku ʻikai toe ʻi ai hano konga, kuo tuifio mo e efú ʻo meimei senituli ʻe 60. Fekauʻaki mo e maté, ʻoku akoʻi kitautolu ʻe he Tohi Tapú: “ʻOku ʻikai te nau ʻilo ha momoʻi meʻa.” (Koheleti 9: 5, 10) ʻIkai ko ia pē, naʻe ʻikai ʻaupito ke leaʻaki ʻe ʻĒpeli ia ha foʻi lea ʻe taha ʻoku hiki ʻi he Tohi Tapú. Ko ia ʻe lava fēfē ke ne lea mai kiate kitautolu?

Naʻe fakamānavaʻi ʻa e ʻapositolo ko Paulá ke ne leaʻaki eni fekauʻaki mo ʻĒpeli: “Neongo naʻá ne mate ʻokú ne kei lea pē fakafou ʻi heʻene tuí.” (Hepelū 11:4) Naʻe fakafou ʻi he hā ʻa e lea ʻa ʻĒpelí? Fakafou he tuí. Ko ʻĒpeli ʻa e ʻuluaki tangata ke ne fakatupulekina ʻa e ʻulungaanga lelei ko iá. Naʻe fuʻu mālohi ʻene fakahāhā ʻa e tui ko iá ʻo moʻui ai ʻene faʻifaʻitakiʻangá, ko ha tuʻunga longomoʻui ʻoku lava ke tau ngāueʻaki he ʻahó ni. Kapau te tau ako mei heʻene tuí pea kumi ke faʻifaʻitaki ki ai, ʻe hoko leva ai ʻa e lēkooti ʻo ʻĒpelí ʻo lea mai kiate kitautolu ʻi ha founga moʻoni mo ʻaonga.

Ko e hā ʻoku lava ke tau ako meia ʻĒpeli mo ʻene tuí neongo ʻoku siʻi ʻa e lave ki ai ʻi he Tohi Tapú? Tau sio angé.

Naʻe fāʻeleʻi ʻa ʻĒpeli ʻi he taimi siʻi pē mei he kamataʻanga ʻo e faʻahinga ʻo e tangatá. Naʻe fakakau ʻe Sīsū ki mui ʻa ʻĒpeli ʻi he “talu mei he tanupou ʻo e māmaní.” (Luke 11:50, 51) Naʻe ʻuhinga ʻa Sīsū ki he kakai ʻi he māmaní ʻa ia ʻoku ʻi ai ʻenau ʻamanaki ke huhuʻi mei he angahalá. Lolotonga ko ʻĒpeli ʻa e tangata hono fā ke moʻui mai ki māmaní, ngalingali ko ia ʻa e ʻuluaki tokotaha naʻe vakai ki ai ʻa e ʻOtuá ʻoku tuha mo e huhuʻí.a ʻOku hā mahino, naʻe ʻikai tupu hake ʻa ʻĒpeli ʻi he haʻohaʻonga ʻo e tākiekina lelei tahá.

Neongo naʻe kei tokosiʻi ʻa e māmaní, naʻe fehangahangai ʻa e ngaahi fāmili fakaetangatá mo e ngaahi tuʻunga fakamamahi. Ko e ongo mātuʻa ʻa ʻĒpelí, ʻa ʻĀtama mo ʻIvi naʻá na fakaʻofoʻofa mo longomoʻui. Ka naʻá na fai ʻa e fehālaaki lahi ʻi heʻena moʻuí pea naʻá na ʻiloʻi ia. Naʻe ʻi ai ʻa e taimi naʻá na haohaoa ai, mo ha ʻamanaki ki ha moʻui taʻengata ʻi muʻa ʻiate kinaua. Peá na fakafepaki leva ki he ʻOtua ko Sihová pea naʻe kapusi kinaua mei hona ʻapi Palataisi ʻi he ngoue ʻo ʻĪtení. ʻI he ʻai ʻena ngaahi holí tonu ʻo muʻomuʻa ia ʻi he meʻa kotoá—naʻa mo e fiemaʻu ʻa hona hakó—naʻá na fakamoleki ʻa e haohaoá mo e moʻui taʻengatá.—Sēnesi 2:15–3:24.

ʻI hono kapusi ke moʻui ʻi tuʻa mei he ngoué, naʻe ʻiloʻi ai ʻe ʻĀtama mo ʻIvi naʻe faingataʻa ʻa e moʻuí. Neongo ia, ʻi he taimi naʻe fāʻeleʻi ai ʻena ʻuluaki tamá, naʻá na fakahingoa ia ko Keini pe “Ko Maʻu,” pea naʻe pehē ʻe ʻIvi: “Kuo u maʻu ha tangata ʻia Sihova.” Ko ʻene ngaahi leá ʻoku fakahuʻunga naʻe ʻi heʻene fakakaukaú nai ʻa e talaʻofa ʻa Sihova naʻe fai ʻi he ngoué, ʻo tomuʻa tala ko ha fefine te ne ʻomai ha “hako” ʻa ia ʻi ha ʻaho ʻe taha te ne fakaʻauha ʻa e tokotaha fulikivanú ʻa ia naʻá ne taki hē ʻa ʻĀtama mo ʻIví. (Sēnesi 3:15; 4:1) Naʻe fakakaukau atu ʻa ʻIvi ko ia ʻa e fefine ʻi he kikité pea ko Keini ko e “hako” ia naʻe talaʻofá?

Kapau ko ia, naʻá ne maʻu hala. Ko e toe kovi angé, kapau ko ia mo ʻĀtamá naʻá na fafangaʻi ʻa Keini ʻaki ʻa e ngaahi fakakaukau ko iá ʻi heʻene tupu haké, naʻá na ʻoange moʻoni ki hono tuʻunga taʻehaohaoa loto-pōlepolé ha meʻa ʻoku kovi. ʻI he faai atu ʻa e taimí, naʻe fanauʻi mai ʻe ʻIvi ha foha hono ua, ka ʻoku ʻikai ke tau maʻu ʻa e ngaahi fakalea ko iá fekauʻaki mo ia. Naʻá na fakahingoa ia ko ʻĒpeli, ʻa ia ʻoku ʻuhinga nai ko e “Hanga Hake,” pe “Muna.” (Sēnesi 4:2) Ko e fili ʻo e hingoa ko iá naʻe tapua mei ai ha ngaahi ʻamanekina siʻisiʻi ange, ʻo hangē ʻoku siʻisiʻi ange ʻena ʻamanaki kia ʻĒpelí ʻia Keiní? ʻOku ʻikai lava ke tau fakapapauʻi.

ʻI ha tuʻunga pē, ko e ngaahi mātuʻa he ʻaho ní ʻoku lava ke nau ako nai ʻa e meʻa lahi mei he ʻuluaki ongo mātuʻá. Fakafou ʻi hoʻo leá mo e ngaahi ngāué, te ke fafangaʻi ai ʻa e pōlepole, sio tuʻunga mo e siokita ʻa hoʻo fānaú? Pe te ke akoʻi kiate kinautolu ke ʻofa kia Sihova ko e ʻOtuá mo kumi ke kaumeʻa mo ia? Ko e meʻa fakamamahí, ko e ʻuluaki ongo mātuʻá naʻe ʻikai lava ke na fakahoko hona fatongiá. Neongo ia, naʻe ʻi ai ʻa e ʻamanaki ki hona hakó.

ʻI he tupu hake ʻa e ongo tamaiki tangatá, hangehangē naʻe akoʻi ʻe ʻĀtama kinaua ki ha ngāue ke fai ai ha tokonaki maʻá e fāmilí. Naʻe hoko ʻa Keini ko ha tama ngoue; kae hoko ʻa ʻĒpeli ko ha tauhi-sipi.

Kae kehe, naʻe fai ʻe ʻĒpeli ʻa e meʻa naʻe toe mahuʻinga ange. ʻI he faai atu ʻa e ngaahi taʻú, naʻá ne fakatupulekina ʻa e tuí—ko e ʻulungaanga fakaʻofoʻofa ia naʻe tohi ki mui ʻe Paula. Fakakaukau ange ki aí. Naʻe ʻikai ke ʻi ai ha faʻifaʻitakiʻanga fakaetangata ke hanga ki ai ʻa ʻĒpeli. Naʻe anga-fēfē leva, ʻene fakatupulekina ha tui kia Sihova ko e ʻOtuá? Fakakaukau ki he ngaahi makatuʻunga fefeka ʻe tolu ʻa ia naʻe fakatuʻunga mei ai ʻa e mālohi ʻene tuí.

Fakatupu ʻa Sihová.

Ko e moʻoni naʻe tuku ʻe Sihova ha mala ki he kelekelé, ʻo ne ʻai ia ke tupu ha ʻakau talatala mo e talatalaʻāmoa ʻo faingataʻa ai ʻa e ngoué. Kae kehe, naʻe kei ʻomai pē ʻe he fua ʻo e fonuá ʻa e meʻakai ke moʻui ai ʻa e fāmili ʻo ʻĒpelí. Pea naʻe ʻikai ke malaʻia ai ʻa e fanga monumanú, kau ai ʻa e fanga manupuná mo e iká; kae pehē ki he ngaahi moʻungá, ngaahi anovaí, ngaahi vaitafé mo e tahí; kae pehē ki he ngaahi langí mo e ngaahi ʻaó, laʻā, māhina mo e ngaahi fetuʻú. ʻI he feituʻu kotoa naʻe vakai ki ai ʻa ʻĒpelí, naʻá ne fakatokangaʻi ʻa e fakamoʻoni lahi ʻo e ʻofá, potó mo e lelei ʻa Sihova ko e ʻOtuá, ʻa e tokotaha naʻá ne fakatupu ʻa e meʻa kotoa pē. (Loma 1: 20) Ko e fakalaulauloto ʻi he houngaʻia ʻi he ngaahi meʻa peheé naʻe fakaivimālohiʻi ai ʻene tuí.

Naʻe vaheʻi moʻoni ʻe ʻĒpeli ha taimi ke fakalaulauloto ai ki he ngaahi meʻa fakalaumālié. Fakakaukau atu kiate ia ʻokú ne tokangaʻi ʻene fanga sipí. Ko e moʻui ʻa ha tokotaha tauhi-sipi ʻoku fiemaʻu ki ai ha fononga lōloa. Naʻá ne tataki ʻa e ngaahi meʻamoʻui anga-vaivaí ke hake he ngaahi moʻungá, fou atu he ngaahi teleʻá, kolosi atu ʻi he ngaahi vaitafé—ʻi he kumi maʻu pē ki he mohuku lanu matá, feituʻu lelei taha ki he vai inú mo e feituʻu lelei ʻoku malu taha ki he mālōlōʻangá. ʻI he kotoa ʻo e ngaahi meʻa fakatupu ʻa e ʻOtuá, ko e sipí ʻoku hā ngāvaivai tahá, ʻo hangē naʻe fakataumuʻa kinautolu ke fiemaʻu ha tangata ke tataki mo maluʻi kinautolu. Naʻe vakai ʻa ʻĒpeli ko iá foki ʻokú ne fiemaʻu ha tataki, maluʻi mo e tokangaekina mei ha Tokotaha ʻoku poto ange mo mālohi ange ʻi ha faʻahinga tangata pē? Naʻe ʻikai ha veiveiua naʻá ne fakahāhā ʻa e ngaahi fakakaukau peheé ʻi he lotu pea ko hono olá ko ʻene tuí naʻe hokohoko atu ʻene tupulakí.

Ngaahi talaʻofa ʻa Sihová.

Kuo pau pē naʻe fakamatala ʻe ʻĀtama mo ʻIvi ki hona ngaahi fohá ʻa e ngaahi meʻa naʻe hoko ʻi he ngoue ʻo ʻĪtení ʻa ia naʻe iku atu ki hono kapusi kinauá. Ko ia ai, ko ʻĒpelí naʻe lahi ʻa e meʻakai fakalaumālie ke fakalaulauloto ki ai.

Naʻe pehē ʻe Sihova ko e kelekelé ʻe malaʻia. Naʻe sio lelei ʻa ʻĒpeli ki he talatalá mo e talatalaʻāmoá ʻa ia ko e fakahoko ia ʻo e ngaahi lea ko iá. Naʻe toe tomuʻa tala ʻe Sihova ko ʻIvi ʻe faingataʻaʻia ʻi he mamahi ʻo e feitamá mo e fāʻelé. ʻI hono fanauʻi ʻa e fanga tokoua mo e tuofāfine ʻo ʻĒpelí, naʻe ʻikai ha veiveiua ʻene ʻiloʻi ai ʻa e moʻoni ʻo e ngaahi lea ko iá foki. Naʻe tomuʻa ʻafioʻi ʻe Sihova ko ʻIví te ne ongoʻi ʻa e ʻikai mafamafatatau ʻa ʻene fiemaʻu ki he ʻofa mo e tokanga ʻa hono husepānití pea ʻe iku atu ʻo puleʻi ia ʻe ʻĀtama. Naʻe fakatokangaʻi ʻe ʻĒpeli ʻa e mamahi moʻoni naʻe hokosia heʻene ongo mātuʻá. ʻI he tuʻunga kotoa, naʻe ʻiloʻi ʻe ʻĒpeli ko e folofola ʻa Sihová ʻoku alafalalaʻanga moʻoni. Ko ia, ko ʻĒpelí naʻe ʻi ai ʻene ngaahi ʻuhinga mālohi ke tui ai ki he talaʻofa ʻa e ʻOtuá fekauʻaki mo ha “hako” ʻa ia ʻe ʻi ai ha ʻaho te ne fakatonutonu ai ʻa e ngaahi fehālaaki naʻe kamata ʻi ʻĪtení.—Sēnesi 3:15-19.

Kau sevāniti ʻa Sihová.

Naʻe ʻikai maʻu ʻe ʻĒpeli ha faʻifaʻitakiʻanga lelei ʻi he fāmili ʻo e tangatá, ka naʻe ʻikai ko e faʻahinga pē ʻo e tangatá ʻa e meʻamoʻui ʻatamaiʻia ʻi he māmaní ʻi he taimi ko iá. ʻI he taimi naʻe kapusi ai ʻa ʻĀtama mo ʻIvi mei he ngoué, naʻe fakapapauʻi ʻe Sihova ʻe ʻikai ha taha ʻiate kinaua pē pe ko hona hakó ʻe lava ke toe hū ki he Palataisi fakaemāmaní. Ke maluʻi ʻa e hūʻangá, naʻe fokotuʻu ai ʻe Sihova ha ongo selupimi—ko ha ʻāngelo tuʻunga-māʻolunga—fakataha mo ha heletā ulo naʻe tavilovilo hokohoko.—Sēnesi 3:24.

Sioloto atu ki he sio ʻa ʻĒpeli ki he ongo selupimi ko iá ʻi heʻene kei tamasiʻí. ʻI hona sino fakaetangatá, naʻe hā mahino ʻena fuʻu mālohi lahí. Pea ko e “heleta” ko iá, ʻene uloulo, vilovilo hokohokó mo fakaofo foki. ʻI he tupu hake ʻa ʻĒpelí, naʻe faifai ange peá ne sio ki he ongo selupimí naʻá na pipikoʻia pea liʻaki ʻena ngāué? ʻIkai. ʻI he ʻaho mo e pō, taʻu ki he taʻu, hongofuluʻi taʻu ki he hongofuluʻi taʻu, ko e ongo meʻamoʻui ʻatamaiʻia mālohi ko iá, naʻá na nofo pē ʻi he feituʻu ko iá. Naʻe hoko ʻo ʻilo ʻe ʻĒpeli ko Sihova ko e ʻOtuá ʻoku ʻi ai ʻene kau sevāniti māʻoniʻoni mo tuʻumaʻu. ʻI he ongo selupimi ko iá, naʻe sio ai ʻa ʻĒpeli ki ha faʻahinga ʻo e mateakí mo e talangofua kia Sihová ʻa ia naʻe ʻikai ke ne maʻu ia ʻi hono fāmilí tonu. Ko hono moʻoní, ko e faʻifaʻitakiʻanga fakaeʻāngelo ko iá naʻe fakaivimālohiʻi ai ʻene tuí.

Ko e fakalaulauloto ki he meʻa kotoa naʻe fakaeʻa ʻe Sihova fekauʻaki mo ia fakafou ʻi he fakatupú, ngaahi talaʻofa fakaʻotuá mo e ngaahi faʻifaʻitakiʻanga ʻo ʻEne kau sevānití, naʻe ʻilo ʻe ʻĒpeli naʻe tupu mālohi ange ai ʻene tuí. ʻOku lea mai ʻene ngaahi faʻifaʻitakiʻangá kiate kitautolu, ʻikai ko ia? Tautefito ki he toʻutupú ʻoku nau maʻu nai ʻa e fakafiemālie ke ʻiloʻi ʻoku lava ke nau fakatupulekina ha tui moʻoni kia Sihova ko e ʻOtuá ʻo tatau ai pē pe ko e hā ʻoku fai ʻe he ngaahi mēmipa ʻi honau fāmilí. Fakataha mo e fakaofo ʻo e fakatupu takatakai ʻiate kitautolú mo e Tohi Tapú kakato ʻoku tau maʻú pea pehē ki he ngaahi faʻifaʻitakiʻanga ʻo e kau tangata ʻo e tuí, ʻoku tau maʻu ʻa e ngaahi makatuʻunga hulu fau ke langa hake ai ʻa e tuí he ʻahó ni.

ʻI he tupulaki ʻa e tui ʻa ʻĒpeli kia Sihová, naʻá ne loto ke maʻu ha founga ke fakahāhā ai ʻa e tui ko iá ʻi he ngāué. Neongo ia, ko e hā ʻe lava ke ʻoatu ʻe ha tangata ki he Tokotaha-Fakatupu ʻo e ʻunivēsí? Ko hono moʻoní, ʻoku ʻikai fiemaʻu ʻe he ʻOtuá ha faʻahinga meʻaʻofa pe tokoni mei he tangatá. ʻI he faai atu ʻa e taimí, naʻe hoko ʻa ʻĒpeli ʻo maʻu ʻa e moʻoni lolotó: Kapau—ko e faiʻaki ʻa e fakaueʻiloto totonu—te ne ʻoatu pē kia Sihova ʻa e lelei taha ʻokú ne maʻú, ʻe hōifua ki ai ʻene Tamai ʻofa fakahēvaní.

Ko ia naʻe teuteu ʻa ʻĒpeli ke ʻoatu ha niʻihi ʻo e sipi mei heʻene tākangá. Naʻá ne fili ʻa e lelei tahá, ko e ʻuluaki ʻuhikí pea ʻoatu ʻa ia naʻe hā ko e ngaahi konga lelei tahá ia. Lolotonga iá, naʻe toe kumi foki ʻe Keini ʻa e tāpuaki mo e hōifua ʻa e ʻOtuá, ʻo teuteu ʻa e feilaulau mei heʻene ngoué. Ka ko ʻene ngaahi fakaueʻilotó naʻe ʻikai hangē ko ia naʻe maʻu ʻe ʻĒpelí. Naʻe hoko ʻo hā mahino ʻa e faikehekehé ʻi he taimi naʻe ʻoatu ai ʻe he ongo tautehiná ʻena feilaulaú.

Fakatouʻosi ʻa e ongo foha ʻo ʻĀtamá kuó na ngāueʻaki nai ha ʻōlita mo e afi ki heʻena feilaulaú, mahalo ʻo vakai atu ki ai ʻa e ongo selupimí, ʻa ia ko e ongo fakafofonga moʻui pē ia ʻo Sihova ʻi he māmaní ʻi he taimi ko iá. Ko e tali ʻa Sihova! ʻOku tau lau: “Naʻe hangaifofonga ʻa Sihova kia Epeli mo ʻene feilaulau.” (Sēnesi 4:4) ʻOku ʻikai lave ʻa e fakamatalá ki he founga hono hanga ʻe Sihova ʻo ʻai ʻene hōifuá ke hā mahinó. Ka ko e hā naʻá ne hōifua ai kia ʻĒpelí?

Ko e feilaulaú ʻiate ia pē? Naʻe feilaulauʻaki ʻe ʻĒpeli ha meʻamoʻui, ha monumanu, ʻo lilingi hono totó ko e fakafofongaʻi ʻo e moʻuí. Naʻe ʻilo ʻe ʻĒpeli ʻa e mahuʻinga ʻo ha feilaulau peheé? Hili ha ngaahi senituli mei he taimi ʻo ʻĒpelí, naʻe ngāueʻaki ʻe he ʻOtuá ha feilaulau ʻo ha lami taʻemele ke fakatātāʻaki ʻa e feilaulau ʻo Hono ʻAlo haohaoá tonu, “ko e Lami ē ʻa e ʻOtuá” ʻa ia ko hono toto taʻehalaia ʻe lilingi. (Sione 1:29; ʻEkisoto 12:5-7) Kae kehe, ko e ngaahi meʻa papau ko iá naʻe ʻikai mahinoʻi kakato ia ʻe ʻĒpeli.

Ko e meʻa eni ʻoku tau ʻilo papaú: Naʻe feilaulauʻaki ʻe ʻĒpeli ʻa e lelei taha ʻo e meʻa naʻá ne maʻú. Naʻe hāngaifofonga hifo ʻa Sihova ʻo ʻikai ki he feilaulaú pē ka ki he tangatá tonu. Naʻe fai ʻe ʻĒpeli ʻene feilaulaú, ʻaki hono ueʻi ia ʻe he ʻofa kia Sihová mo e tui moʻoni kiate iá.

Naʻe kehe ia meia Keini. “Ka ko Keini mo e feilaulau aʻana naʻe ʻikai te ne fofonga ki ai” ʻa Sihova. (Sēnesi 4:5) Naʻe ʻikai ko e feilaulau ʻa Keiní naʻe mele ʻiate ia pē; ko e Lao ʻa e ʻOtuá naʻá ne fakaʻatā ki mui ke feilaulauʻaki ʻa e fua ʻo e kelekelé. (Livitiko 6:14,15) Ka ʻoku pehē ʻe he Tohi Tapú fekauʻaki mo Keini “ko ʻene ngaahi ngāue ʻaʻaná naʻe fulikivanu.” (1 Sione 3:12) Hangē ko e kakai tokolahi he ʻahó ni, naʻe fakakaukau pē ʻa Keini ko ha kiʻi fakangalingali ʻo e līʻoa ki he ʻOtuá naʻe ʻosi feʻunga. Ko e siʻi ʻene tui moʻoní pe ʻofa kia Sihová naʻe vave ʻene hā mahino ʻo fakafou ʻi heʻene ngaahi ngāué.

ʻI he sio ʻa Keini naʻe ʻikai ke ne maʻu ʻa e hōifua ʻa Sihová, naʻá ne kumi ke ako mei he faʻifaʻitakiʻanga ʻa ʻĒpelí? ʻIkai. Naʻá ne ʻita tōlili ki hono tokouá. Naʻe vakai hifo ʻa Sihova ki he loto ʻo Keiní pea fakaʻuhinga anga-kātaki mo ia. Naʻá ne fakatokanga kia Keini ko hono ʻalungá naʻe taki atu ki he angahala mamafa, pea naʻá Ne ʻoange ha ʻamanaki “hanga hake” pe fiefia kapau pē ʻe liliu ʻe Keini ʻene ngaahi foungá.—Sēnesi 4:6, 7.

Naʻe tukunoaʻi ʻe Keini ʻa e fakatokanga ʻa e ʻOtuá. ʻI hono kehé, naʻá ne fakaafeʻi ʻa hono tehina falalaʻangá ke fononga mo ia ki ʻuta. ʻI aí naʻe tāmateʻi ai ʻe Keini ʻa ʻĒpeli. (Sēnesi 4:8) ʻI ha ʻuhinga, naʻe hoko ʻa ʻĒpeli ko e ʻuluaki tokotaha maʻukovia ʻo e fakatanga fakalotú, ko e ʻuluaki mate fakamāʻatá. Naʻá ne mate ka ko hono talanoá naʻe ʻikai ʻosi.

ʻI he tuʻu fakaefakatātaá, ko e toto ʻo ʻĒpelí ʻoku tangi kia Sihova ki ha sāuni pe fakamaau totonu. Pea naʻe fakahoko ʻe Sihova ʻa e fakamaau totonú, ʻo tautea ʻa Keini fulikivanu ki heʻene hiá. (Sēnesi 4:9-12) Ko e meʻa mahuʻinga angé, ko e lēkooti ʻo e tui ʻa ʻĒpelí ʻoku lea mai kiate kitautolu he ʻahó ni. Ko e lōloa ʻene moʻuí—mahalo ko ha senituli nai—naʻe nounou ia ki he moʻui ʻa e faʻahinga ʻo e tangatá he taimi ko iá, ka naʻe ʻai ʻe ʻĒpeli ia ʻene moʻuí ke fakahōifua ki he ʻOtuá. Naʻá ne mate ka naʻá ne ʻiloʻi kuó ne maʻu ʻa e ʻofa mo e hōifua ʻa ʻene Tamai fakahēvaní ʻa Sihova. (Hepelū 11:4) ʻOku lava ke tau falala-pau leva ʻokú ne malu ʻi he manatu taʻefakangatangata ʻa Sihová, ʻo tatali ai ki ha toetuʻu ki he moʻui ʻi he māmani palataisí. (Sione 5:28, 29) Te ke fetaulaki mo ia ai? Te ke lava kapau ʻokú ke fakapapauʻi ke fanongo ki he ngaahi lea ʻa ʻĒpelí pea faʻifaʻitaki ki heʻene tui tuʻu-ki-muʻá.