Fakahalaiaʻi ʻe he Tui ʻa Noá ʻa e Māmaní

KUÓ KE fanongo ʻia Noa, ko ha tangata manavahē-ʻOtua ʻa ia naʻá ne langa ha ʻaʻake ki hono fakahaofi ʻo e moʻuí ʻi he lolotonga ʻo ha lōmaki ʻi he foʻi kolopé? Neongo ʻa ʻene motuʻá, ko e talanoa ko ení ʻoku alāanga ki ai ʻa e laui miliona. Kae kehe, ko e meʻa ʻoku ʻikai ke fakatokangaʻi ʻe he tokolahi, ko e ʻi ai ko ia ʻa e ʻuhinga ʻo e moʻui ʻa Noá ki hono kotoa ʻo kitautolú.

Ko e hā ʻoku totonu ai ke tau hoko ʻo mahuʻingaʻia ʻi ha fakamatala ʻa ia ʻoku laui afeʻi taʻu ʻa hono motuʻá? ʻOku ʻi ai ha tuʻunga meimei tatau ʻi he vahaʻa ʻo e tuʻunga ʻo Noá mo hoʻotautolú? Kapau ʻoku ʻi ai, ʻe lava fēfē ke tau maʻu ʻaonga mei heʻene faʻifaʻitakiʻangá?

Ko e Māmani ʻo e ʻAho ʻo Noá

Ko e lau taimi ʻa e Tohitapú ʻoku fokotuʻu ai ʻa e fāʻeleʻi ʻo Noá ʻi he 2970 K.M.​​—ko e taʻu ia ʻe 126 ʻi he hili ʻa e mate ʻa ʻĀtamá. ʻI he aʻu mai ki he ʻaho ʻo Noá, naʻe fonu ai ʻa e māmaní ʻi he fakamālohí, pea ko e tokolahi taha ʻo e hako ʻo ʻĀtamá naʻa nau fili ke muimui ʻi he faʻifaʻitakiʻanga talangataʻa ʻa ʻenau fanga kuí. Ko ia ai, “naʻe ʻafioʻi ʻe Sihova kuo fakautuutu ʻa e kovi ʻa e tangata ʻi mamani, pea ʻoku kovi ʻatā ʻa e filioʻi kotoa pe ʻo e ngaahi fakakaukau ʻa hono loto maʻuaipe.”​—Senesi 6:​5, 11, 12.

Ko e angatuʻu ʻa e tangatá naʻe ʻikai ko e ʻuhinga pē ia ki he taʻehōifua mai ʻa Sihová. ʻOku fakamatalaʻi ʻe he fakamatala ʻa Senesí: “Naʻe sio ʻe he ngaahi foha ʻo e ʻOtua ki he ngaahi ʻofefine ʻo e Tangata ʻoku nau hoihoifua; pea nau hanga ʻo mali mo ha niʻihi, ʻa ia pe naʻa nau loto ki ai. . . . Ko e taimi ko ia naʻe ʻi mamani ʻa e kakai lalahi [“Nefilimi,” NW], kaeʻumaʻa hili ʻa e ʻalu ʻa e ngaahi foha ʻo e ʻOtua ki he ngaahi ʻofefine ʻo e Tangata, pea nau fānau kiate kinautolu; ko e kau toʻa ia ʻo onoʻaho, ko e faʻahinga ongoongo.” (Senesi 6:​2-4) ʻI hono fakahoa ʻo e ngaahi vēsí ni mo ha fakamatala naʻe hiki ʻe he ʻapositolo ko Pitá ʻoku fakahaaʻi ai ko e “ngaahi foha ʻo e ʻOtua [“moʻoní,” NW]” ko e kau ʻāngelo talangataʻa. Ko e kau Nefilimí ko e fānau fekolosiʻaki ia ʻo e ngaahi fehokotaki fakasino taʻefakalao ʻi he vahaʻa ʻo e kakai fefiné mo e kau ʻāngelo liliu kakano, tafoki mei he moʻoní.​​—1 Pita 3:​19, 20.

Ko e “Nefilimí,” ko hono ʻuhingá ko e “Kau Fakatooki,” ʻoku fakahaaʻi ai ʻa e faʻahinga tāutaha ʻa ia ʻoku nau fakatupunga ʻa e niʻihi kehé ke nau tō ki lalo. Ko e kau houtamaki anga-fakamamahi kinautolu, pea ko e angahala ʻenau ngaahi tamai fakalusá ʻoku fakatatau ia ki he ngaahi tōʻonga fehokotaki fakasino taʻefakanatula ʻa Sōtoma mo Komolá. (Siutasi 6, 7) Naʻa nau fakataha ʻo fakaʻaiʻai ʻa e fulikivanu hulu fau ʻi he māmaní.

“Haohaoa . . . i Hono Toutagata”

Naʻa fuʻu lahi ʻa e koví ʻo fakapapauʻi ai ʻe he ʻOtuá ke fakaʻauha ʻa e faʻahinga ʻo e tangatá. Ka ʻoku pehē ʻe he fakamatala fakamānavaʻí: “Nae ofeina a Noa i he ao o Jihova. . . . koe tagata agatonu mo haohaoa a Noa i hono toutagata, bea nae aeva a Noa moe Otua.” (Senesi 6:​8, 9, PM) Naʻe malava fēfē ke ‘aeva moe Otuá’ ʻi ha māmani fakaʻotuamate naʻe tuha pē mo e fakaʻauhá?

ʻOku ʻikai ha veiveiua, naʻe ako ʻe Noa ʻa e meʻa lahi mei heʻene tamai ko Lēmekí, ko ha tangata ʻo e tuí, pea ko ha toʻutangata ʻo ʻĀtama. ʻI hono ʻoange ki hono fohá ʻa e hingoa ko e Noá (ʻoku fakakaukau ko hono ʻuhingá ko e “Mālōlō,” pe “Fakafiemālie”), naʻe kikite ʻa Lēmeki: “Ko eni ia te ne fakafiemalie kitautolu mei heʻetau ngaue mo e mamahi ʻa hotau nima, ʻa ia ʻoku tupu mei he kelekele ne fakamalaʻia ʻe Sihova.” Naʻe fakahoko ʻa e kikite ko iá ʻi hono toʻo ʻe he ʻOtuá ʻa e fakamalaʻia naʻá ne fai ki he kelekelé.​—Senesi 5:29; 8:21.

ʻI hono maʻu ʻa e ngaahi mātuʻa manavahē-ʻOtuá ʻoku ʻikai ko ha fakapapauʻiʻanga ia ʻo e tuʻunga fakalaumālie leleí, he ko e tokotaha tāutaha kuo pau ke ne fokotuʻu ʻa hono vahaʻangatae tonu mo Sihova. Naʻe ‘aeva [ʻa Noa] moe Otuá’ ʻaki ʻa e tuli ki ha ʻalunga ʻa ia naʻe ʻi ai ʻa e hōifua fakaʻotuá. Ko e meʻa naʻe ako ʻe Noa fekauʻaki mo e ʻOtuá naʻá ne ueʻi ia ke ne tauhi ai kiate Ia. Naʻe ʻikai ke ngaue ʻa e tui ʻa Noá ʻi he taimi naʻe fakahā ange ai kiate ia ʻa e taumuʻa ʻa e ʻOtuá ‘ke fakaʻauha ʻa e kakano kotoa pe ʻi he lomakí.’​​—Senesi 6:​13, 17.

ʻI he falala ʻe hoko ʻa e fakatamaki ko eni naʻe teʻeki ʻaupito ke hoko ki muʻá, naʻe talangofua ai ʻa Noa ki he fekau ʻa Sihová: “Ke ke faʻu moʻou ha aake ʻaki ʻa e ʻakau ko e kofa; te ke ngaohi ʻa e aake ke ʻanaʻia, pea te ke vali ʻaki ha pulu mei loto mo tuʻa.” (Senesi 6:14) Ko hono fakahoko ʻa e ngaahi fakaikiiki ʻa e ʻOtuá ki he ʻaʻaké naʻe ʻikai ko ha ngāue siʻisiʻi. Ka neongo ia, “naʻe fai ʻe Noa ʻo fakatatau ki he meʻa kotoa pē naʻe fekau kiate ia ʻe he ʻOtuá.” Ko hono moʻoní, “naʻá ne fai ʻa e meʻa tofu pē ko iá.” (Senesi 6:​22, NW) Naʻe fai eni ʻe Noa ʻi he tokoni ʻa hono uaifí mo hona ngaahi fohá ʻa Semi, Hami mo Sēfeti pea mo honau ngaahi uaifí. Naʻe tāpuakiʻi ʻe Sihova ʻa e tui peheé. Ko ha ngaahi faʻifaʻitakiʻanga lelei ʻaupito ē ki he ngaahi fāmili ʻi he ʻaho ní!

Ko e hā naʻe kau ki hono langa ʻo e ʻaʻaké? Naʻe fakahinohino ʻe Sihova ʻa Noa ke ne faʻu ha fuʻu puha papa lahi, fungavaka tolu ke ʻoua ʻe hū ki ai ʻa e vaí, ko e mita ʻe 133 hono lōloá, mita ʻe 22 hono fālahí pea mita ʻe 13 hono māʻolungá. (Senesi 6:​15, 16) Ko ha fuʻu vaka pehē naʻá ne mei maʻu ʻa e malava meimei tatau mo ia ʻo e ngaahi vaka uta koloa kehekehe ʻi he ʻaho ní.

Ko ha ngāue kāfakafa moʻoni ē! ʻOku mātuʻaki ngalingali, naʻe ʻuhinga iá ko hono tā hifo ʻa e ʻuluʻakau ʻe laui afe, toho kinautolu ki he feituʻu langá, pea tutuʻu kinautolu ki he ngaahi fuʻu papa matolu mamafa pe ngaahi pimi. Naʻe ʻuhinga iá ko hono langa ʻa e papa tuʻuʻanga, ngaohi ʻa e ngaahi pine pe ngaahi meʻa fakamaʻu, ʻomai ʻa e pulu ki he silaʻi ke malu mei he vaí, ʻomai ʻa e ngaahi fuʻu ʻaiʻanga meʻa mo e ngaahi meʻangāue mo e alā meʻa pehē. Naʻe fiemaʻu nai ʻi he ngāué ʻa e ngaahi alea mo e kau mēsianiti mo e totongi ʻa e ngaahi koloá pea mo e ngaahi ngāué. Ngalingali naʻe fiemaʻu ki ai ʻa e pōtoʻi ʻi he tufungá koeʻuhi ke ʻai ke feʻunga totonu ʻa e ngaahi papá pea faʻu ha langa mālohi feʻunga. Pea fakakaukau atu pē​—hangehangē naʻe ʻosi ʻa e langá ʻo fakafuofua ki he taʻu ʻe 50 pe 60!

Ko e tokanga ʻa Noá naʻe fakahanga leva ia ki he teuteu ʻa e meʻakai feʻunga pea mo e meʻakai ki he fanga manú. (Senesi 6:​21) Naʻe pau ke ne fakatahatahaʻi mo tataki ha fuʻu fanga manu ki he ʻaʻaké. Naʻe fakahoko ʻe Noa ʻa e meʻa kotoa naʻe fekau ʻe he ʻOtuá, pea naʻe ʻosi ʻa e ngāué. (Senesi 6:​22) Ko e tāpuaki ʻa Sihová naʻá ne fakapapauʻi ʻa ʻene lavameʻa kakató.

“Ko ha Tokotaha Malanga ʻo e Māʻoniʻoní”

Tuku kehe ʻa hono langa ha ʻaʻaké, naʻe fakaongo atu ʻe Noa ha fakatokanga pea tauhi faitōnunga ki he ʻOtuá ʻi he tuʻunga “ko ha tokotaha malanga ʻo e māʻoniʻoní.” Ka ko e kakaí “naʻe ʻikai te nau ʻaloʻiloa kaeʻoua ke hoko mai ʻa e Lomaki, ʻo ʻave kinautolu fulipe.”​—2 Pita 2:​5, NW; Mātiu 24:​38, 39.

ʻI he fakakaukau atu ki he masiva fakalaumālie mo fakaeʻulungaanga ʻo e ngaahi ʻaho ko iá, ʻoku faingofua ke mahino ʻa e lava ke hoko ʻa e fāmili ʻo Noá ko e meʻa fakakata ʻa e ngaahi kaungāʻapi tuingataʻá pea leakovia mo manukia. Kuo pau pē naʻe fakakaukau ʻa e kakaí ʻoku nau fakasesele. Kae kehe, naʻe lavameʻa ʻa Noa ʻi hono fai ʻa e fakalototoʻa mo e poupou fakalaumālie ki hono fāmilí, he naʻe ʻikai ʻaupito te nau ohi mai ʻa e ngaahi founga fakamālohi, taʻetaau mo angatuʻu ʻa honau ngaahi toʻutangata fakaʻotuamaté. ʻI heʻene leá mo e ngaahi tōʻongá, ʻa ia naʻe fakahāhaaʻi ai ʻa ʻene tuí, naʻe fakahalaiaʻi ai ʻe Noa ʻa e māmani ʻo e taimi ko iá.​​—Hepelu 11:7.

Fakahaofi ʻi he Lōmakí

Taimi nounou ki muʻa pea tō hifo ʻa e fuʻu ʻuhá, naʻe tala ai ʻe he ʻOtuá kia Noa ke ne hū ki he ʻaʻake kuo kakató. ʻI he heka ki loto ʻa e fāmili ʻo Noá pea mo e fanga manú, “nae tabuni ia i ai e Jihova,” ʻo tāpuni ai ʻi tuʻa ʻa e kau kata manukí. ʻI he hoko mai ʻa e Lōmakí, ʻoku hā mahino naʻe toe liliu sino ʻa e kau ʻāngelo talangataʻá ʻo nau hao ai ʻi he fakaʻauhá. Kae fēfē ʻa e niʻihi kehé? Ko ē, naʻe ʻauha ʻa e meʻamoʻui kotoa pē ʻi he kelekele mōmoa ʻi tuʻa ʻi he ʻaʻaké, ʻo kau ai ʻa e kau Nefilimí! Ko Noa pē mo hono fāmilí naʻe haó.​​—Senesi 7:​1-​23, PM.

Ko Noa mo e faʻahinga ʻi hono falé naʻa nau fakamoleki ha taʻu lau-māhina ʻe taha mo e ʻaho ʻe hongofulu ʻi he ʻaʻaké. Naʻa nau femoʻuekina ʻi hono fafanga mo fakainu ʻa e fanga manú, fakamaʻa ʻa e teʻemanú, mo hanganaki vakai ki he taimí. ʻOku fokotuʻu fakaʻaho tonu mātē ʻe he Senesí ʻa e ngaahi tuʻunga kotoa pē ʻo e Lōmakí, ʻi he hangē ha tohi fakamatala folau ʻo ha vaká, ʻo tapua mai ai ʻa e tuʻunga moʻoni ʻo e fakamatalá.​​—Senesi 7:​11, 17, 24; 8:​3-​14.

Lolotonga ʻene ʻi he ʻaʻaké, ʻoku ʻikai ha veiveiua naʻe tataki ʻe Noa ʻa hono fāmilí ʻi he ngaahi fetalanoaʻaki fakalaumālie pea mo e fai ʻo e fakamālō ki he ʻOtuá. ʻOku hā mahino, fakafou ʻia Noa mo hono fāmilí, naʻe fakatolonga mai ai ʻa e hisitōlia ʻo e Lōmaki naʻe hoko ki muʻá. Ko e ngaahi talatukufakaholo tala ngutu alafalalaʻangá pe ngaahi tohi fakahisitōlia naʻe hiki ʻa ia naʻa nau maʻú naʻe ala maʻu ai ʻa e fakamatala lelei ki ha fetalanoaʻaki ʻaonga lolotonga ʻa e Lōvaí.

He fiefia ē kuo pau naʻe ʻi ai ʻa Noa mo hono fāmilí ʻi he toe tuʻu ki he fonua mōmoá! Ko e ʻuluaki meʻa naʻá ne faí ko hono fokotuʻu ha ʻōlita pea ngāue ʻi ha tuʻunga fakataulaʻeiki maʻa hono fāmilí, ʻi hono fai ʻa e ngaahi feilaulau ki he Tokotaha ʻa ia naʻá ne fakahaofi kinautolú.​​—Senesi 8:​18-​20.

“Hange ko e Taimi ʻo Noa”

Naʻe pehē ʻe Sīsū Kalaisi: “Kae hange ko e taimi ʻo Noa, ʻe pehe foki ʻa e hoko mai ʻae Fanautama ʻa Tangata.” (Mātiu 24:37) ʻI he ʻahó ni, ko e kau Kalisitiané ko e kau faifekau tatau pē mo kinautolu ʻo e māʻoniʻoní, ʻi hono uki ʻa e kakaí ke nau fakatomalá. (2 Pita 3:​5-9) ʻI he pehē ko ia ʻe tataú, ʻoku tau fifili nai ai pe ko e hā naʻe ʻi he fakakaukau ʻa Noá ki muʻa ʻi he Lōvaí. Naʻe faifai ange peá ne ongoʻi naʻe taʻeʻaonga ʻa ʻene malangá? Naʻá ne helaʻia ʻi ha ngaahi taimi? ʻOku ʻikai ha lau ki ai ʻa e Tohitapú. ʻOku tala mai pē kiate kitautolu naʻe talangofua ʻa Noa ki he ʻOtuá.

ʻOkú ke sio ki he kaunga ʻo e tuʻunga ʻo Noá ki hoʻotautolú? Naʻá ne talangofua kia Sihova neongo ʻa e fakafepakí mo e faingataʻá. Ko e ʻuhinga ia naʻe fakamāuʻi ai ia ʻe Sihova ʻokú ne māʻoniʻoní. Naʻe ʻikai ke ʻiloʻi ʻe he fāmili ʻo Noá ʻa e taimi tonu ʻe ʻomai ai ʻe he ʻOtuá ʻa e Lōvaí, ka naʻa nau ʻilo ʻe hoko mai. Ko e tui ki he folofola ʻa e ʻOtuá naʻá ne fakaivia ʻa Noa ʻi he kotoa ʻo e ngaahi taʻu ʻo e ngāué pea mo e meʻa ko ia ne hā ngali ko e malanga taʻeʻiai hano fuá. Ko e moʻoni, ʻoku tala mai kiate kitautolu: “Ko tui naʻe ngaue ai ʻa Noa, ʻi hono valokia ki ha ngaahi meʻa kuo teʻeki hamai; pea ʻi heʻene manavahe ki ai, naʻa ne faʻu ʻa e Aake moʻo fakamoʻui hono ʻapi: ʻio, ko ia ia naʻa ne fakahalaia ai ʻa mamani, ʻo ne hoko ko e ʻea ki he maʻoniʻoni fakatui.”​—Hepelu 11:7.

Naʻe anga-fēfē hono maʻu ʻe Noa ʻa e tui peheé? ʻOku mahino mai naʻá ne vaheʻi ʻa e taimi ke fakalaulauloto ai ki he meʻa kotoa pē naʻá ne ʻiloʻi fekauʻaki mo Sihová pea tuku ke tataki ia tonu ʻe he ʻilo ko iá. ʻOku ʻikai ha veiveiua, naʻe talanoa ʻa Noa ki he ʻOtuá ʻi he lotu. Ko hono moʻoní, naʻá ne hoko ʻo mātuʻaki maheni fekoekoeʻi mo Sihova ʻo ne ‘aeva ai moe Otuá.’ ʻI he tuʻunga ko e ʻuluʻi fāmilí, naʻe līʻoa fiefia ʻe Noa ʻa e taimi mo e tokanga ʻofa ki hono fāmilí. Naʻe kau heni ʻa e tokanga ki he ngaahi meʻa fakalaumālie ʻa hono uaifí, ko hono foha ʻe toko tolú pea mo hono ngaahi ʻofefine-ʻi-he-fonó.

ʻI he hangē ko Noá, ʻoku ʻiloʻi ʻe he kau Kalisitiane moʻoni ʻi he ʻaho ní ʻe vavé ni ke ʻomai ʻe Sihova ha ngataʻanga ki he fokotuʻutuʻu ʻo e ngaahi meʻa fakaʻotuamate ko ení. ʻOku ʻikai te tau ʻilo ʻa e ʻaho pe houa ko iá, ka ʻoku tau ʻiloʻi ko e faʻifaʻitaki ki he tui mo e talangofua ʻa e “tokotaha malanga ʻo e māʻoniʻoni” ko ení ʻe iku ia ki he “maʻu mai hota laumalie.”​—Hepelu 10:​36-39.

[Puha ʻi he peesi 29]

Naʻe Hoko Moʻoni Ia?

Ko e kau saienisi ki he anga ʻo e tangatá kuo nau tānaki ʻa e ngaahi fananga ʻoku aʻu hono lahí ki he 270 mei he meimei ngaahi matakali mo e puleʻanga kotoa pē. “Ko e talanoa ʻo e lōmakí ʻoku maʻu ia ʻi he kotoa ʻo e māmaní,” ko e lau ia ʻa e mataotao ko Claus Westermann. “ʻI he hangē ko e talanoa ki he fakatupú, ko e konga ia ʻo e tukufakaholo ʻo hotau anga fakafonua tefitó. ʻOku fakaofo moʻoni ia: ʻi he feituʻu kotoa ʻi he māmaní ʻoku tau maʻu ai ʻa e ngaahi talanoa ʻo kau ki ha lōmaki lahi ʻi he kuonga muʻá.” Ko e fakamatalá? ʻOku pehē ʻe he faiongoongo ko Enrico Galbiati: “Ko e ʻi ai moʻoni ha talatukufakaholo ki he lōmakí ʻi he kakai kehekehe pea ʻoku nau movete takaí ko ha fakaʻilonga ia ʻo e totonu fakahisitōlia ʻo e moʻoniʻi meʻa ko ia ʻoku faʻuʻaki ʻa e makatuʻunga ʻo e ngaahi talatukufakaholo peheé.” Kae kehe, ʻoku mahuʻinga lahi ange ki he kau Kalisitiané ʻi he ngaahi fakamatala fakaemataotaó, ʻa e ʻiloʻi naʻe lea ʻa Sīsū tonu ʻo fekauʻaki mo e Lōmakí ko ha meʻa moʻoni naʻe hoko ʻi he hisitōlia ʻo e faʻahinga ʻo e tangatá.​​—Luke 17:​26, 27.

[Puha ʻi he peesi 30]

Ko e Nefilimi ʻi he Fananga?

Ko e ngaahi talanoa fekauʻaki mo e ngaahi fehokotaki fakasino ʻi he vahaʻa ʻo e ngaahi ʻotuá mo e tangatá​—pea ko e “kau helo” pe “faʻahinga meimei ʻotua” naʻe fanauʻi ʻi he ngaahi fehokotaki ko ení​—naʻe lahi ia ʻi he teolosia faka-Kalisi, faka-ʻIsipite, faka-ʻIukaliti, faka-Hūlia mo e faka-Mesopotēmiá. Ko e ngaahi ʻotua ʻo e fananga faka-Kalisí naʻe ʻi ai honau faʻunga fakaetangata mo fakaʻofoʻofa lahi. Naʻa nau kai, inu, mohe, fai ʻa e fehokotaki fakasino, kē, tau, fakatauele mo tohotoho. Neongo ʻa e pehē naʻa nau māʻoniʻoní, naʻe malava ke nau kākā mo faihia. Ko e kau helo hangē ko ʻAkilisí naʻe pehē naʻe fakatou tupu fakaʻotua ia mo fakaetangata pea naʻe ʻoange kiate ia ʻa e malava naʻe mahulu hake ʻi he anga ʻo e tangatá kae ʻikai ko e taʻefaʻamate. Ko ia, ko e meʻa ʻoku leaʻaki ʻi he Senesí fekauʻaki mo e kau Nefilimí ʻokú ne fakamaama kitautolu ki he malava ke pehē pe naʻa mo e ngalingali ko e tupuʻanga ia ʻo e ngaahi fananga peheé.