Ongo Tautehina Loto-Mamahi Naʻá Na “Langa ʻa e Fale ʻo Isileli”

ʻI HE ofi ke maʻefu ʻa e ʻahó, naʻe ʻiloʻi ʻe Lia ʻe vavé ni ke ʻiloʻi ia. Ko Sēkope, ʻa ia naʻá ne ʻolunga ʻi hono nimá, ʻe vavé ni ʻene ʻiloʻi naʻe ʻikai ko Lesieli ia, ʻa hono tehiná. ʻI he kole ange ʻa ʻene tamaí, ʻoku ngalingali naʻe tui ʻe Lia ha veili matolu, ʻo ne tokoto ʻi he pō ki muʻá ʻi he mohenga mali naʻe ngaohi kia Sēkope mo Lesielí.

Fakaʻuta atu ki he ongoʻi kuo pau naʻe maʻu ʻe Sēkope ʻi hono fakahaaʻi ʻa e moʻoní ʻe he maama hake ʻa e pongipongí! ʻI heʻene ʻitá, naʻá ne fekīhiaki ai mo Lēpani, ko e tamai ʻa Liá. Lolotonga iá, kuo pau pē naʻe fakalaulauloto ʻa Lia ki hono ngafa ʻoʻona ʻi he fakangalingali naʻe faí pea mo e ngaahi nunuʻa ʻe hoko nai ʻi he lele lōloá. Ko e talanoa kia Lia mo Lesielí ko ha konga mātuʻaki mahuʻinga ia ʻo e hisitōlia ʻi he Tohi Tapú. ʻOku toe ʻomai ai ʻa e fakamaama ki he fakapotopoto ʻo e mali pē mo e toko tahá pea mo e mateaki ʻi he nofo malí.

Ko ha Sola ʻi he Vaikeli

ʻI he taʻu ʻe fitu ki muʻá, naʻe lele ai ʻa Lesieli ke tala ki heʻene tamaí naʻá ne fetaulaki mo ha sola ʻi he vaikelí ʻa ia naʻá ne fakakaukau ko ha kāinga ia. Tā ko ē ko Sēkope ia naʻá ne tuongaʻaneʻakí, ko e tamasiʻi ʻa e tuofefine ʻo ʻene tamaí pea ko ha tokotaha lotu kia Sihova. ʻI ha māhina ʻe taha ki mui ai, naʻe fokotuʻu ange ai ʻe Sēkope te ne ngāue kia Lēpani ʻi he taʻu ʻe fitu kae tuku ange ʻa Lesieli ke na mali. ʻI he sio ki he ngāue lelei ʻa hono ʻilamutú pea ʻi heʻene ʻiloʻi ko e anga fakafonua ia ʻi he lotolotonga ʻo honau kakaí ke mali kāinga, naʻe tali ʻe Lēpani ʻa e fokotuʻú.​—Senesi 29:​1-​19.

Ko e ʻofa ʻa Sēkope kia Lesielí naʻe ʻikai ko ha ʻāvangā. Ko ʻena fakamaʻu taʻu ʻe fitú “naʻe hange kiate ia ko e ngahi ʻaho siʻi pe, koeʻuhi ko ʻene ʻofa kiate ia.” (Senesi 29:20) Ko e ʻofa ko ia ʻa Sēkope ʻia Lesieli ʻo aʻu ki heʻene maté ʻoku fakahuʻunga ai kuo pau pē naʻá ne maʻu ha ngaahi ʻulungāanga fakatupu ʻofeina lahi.

Naʻe loto mo Lia foki ke mali mo ha tokotaha lotu faitōnunga kia Sihova? ʻOku ʻikai ha lau ki ai ʻi he Tohi Tapú. Ko e ngaahi fakakaukau ʻa Lēpani fekauʻaki mo ʻene malí ʻoku māʻalaʻala ange ʻi he fakamatalá. ʻI he ngataʻanga ʻo e fakamaʻu ʻa Lesielí, naʻe fai ai ʻe Lēpani ha kātoanga kai ʻo e malí. Ka ʻi he lolotonga ʻa e efiafí, ko e lau ia ʻa e fakamatala ʻi he Tohi Tapú, naʻá ne ʻomai ʻa Lia kia Sēkope ke ne “ʻalu ki ai” pe mohe mo ia.—Senesi 29:23.

Naʻe faʻufaʻu ʻa Lia ke ne kākaaʻi ʻa Sēkope? Pe naʻá ne fai pē ko e talangofua ki heʻene tamaí? Pea naʻe ʻi fē ʻa Lesieli ia? Naʻá ne ʻiloʻi nai ʻa e meʻa naʻe hokó? Kapau ko ia, naʻe fēfē ʻene ongoʻí? Naʻe lava nai ke ne fakafetau ki he loto ʻo ʻene tamai anga-fefeká? ʻOku ʻikai ʻomai ʻe he Tohi Tapú ha tali ki he ngaahi fehuʻí ni. Pe ko e hā ʻa e fakakaukau ʻa Lesieli mo Lia fekauʻaki mo e meʻá ni, ʻi he hili iá naʻe fakaʻitaʻi ʻe he faʻufaʻú ʻa Sēkope. Pea ko Lēpani, ʻo ʻikai ko hono ongo ʻofefiné naʻe fekīhiaki mo Sēkopé: “ʻIkai ko Lesieli naʻa ku ngaue ai kiate koe? pea ko e ha kuo ke kākāʻi ai au?” Ko e hā e tali ʻa Lēpaní? “ʻOku ʻikai ha fai pehe ʻi homau feituʻu, ke tomuʻa mali ʻa e tehina ʻi he taʻokete. Fakakakato ʻa e uike oʻeni, pea te mau toki ʻatu mo ʻena foki, koeʻuhi ko e ngaue te ke fai kiate au, ʻo toe taʻu ʻe fitu atu.” (Senesi 29:​25-27) Ko ia naʻe kākaaʻi ai ʻa Sēkope ke mali tokolahi ʻa ia ne fakatupunga ai ha meheka loto-ʻita.

Ko ha Fāmili Mamahi

Naʻe ʻofa ʻa Sēkope ʻia Lesieli. ʻI he vakai mai ʻa e ʻOtuá ʻo fakahoa ʻa e “fehiʻa” ne fai kia Liá, naʻá ne fakafua hono manavá, lolotonga ia naʻe paʻa ai pē ʻa Lesieli. Ka naʻe fiemaʻu ʻe Lia ia ʻa e meʻa lahi ange ʻi ha kiʻi tama; naʻá ne loto ke maʻu ʻa e ʻofa ʻa Sēkopé. ʻI heʻene sio naʻe ʻofa ʻa Sēkope ia ʻia Lesielí, naʻá ne ongoʻi mamahi. Kae kehe, naʻe ʻamanaki ʻa Lia ʻe ʻofa ai ʻa Sēkope koeʻuhi ko ʻene fanauʻi ʻa hono ʻuluaki fohá, ʻa Lūpeni, ko hono ʻuhingá ko e “Vakai-ko-e-tama.” Ne ʻi ai ʻa e ʻuhinga ʻa Lia ki heʻene fakahingoa ko ia ʻa ʻene tamá: “Koeʻuhiā kuo vakai ʻe Sihova ki hoku ngaohikoviʻi, he ko eni ʻe ʻofa kiate au ʻa hoku husepaniti.” Ka naʻe ʻikai ʻofa ʻiate ia ʻa Sēkope; pea aʻu ki hono fanauʻi ha toe foha ʻe taha. Naʻe ui ʻe Lia ʻa e foha ko iá ko Simione, ko hono ʻuhingá ko e “Fanongo.” Naʻá ne fakaʻuhinga: “Ta kuo fanongo ʻe Sihova ʻoku fai ha fehiʻa kiate au, pea kuo ne foaki mai mo e meʻa ni foki.”—Senesi 29:​30-33.

Ko e fanongo mai ko ia ʻa e ʻOtuá naʻe ʻuhinga iá naʻe lotu ʻa Lia fekauʻaki mo hono tuʻungá. Naʻe hā ngali ko ha fefine faitōnunga ia. Neongo ia, naʻá ne kei ongoʻi mamahi pē naʻa mo e hili ʻene fanauʻi ha foha hono tolu ko Līvai. Ko hono hingoá, ʻoku ʻuhingá ko e “Fakapiki,” pe “Pīkitai,” ʻoku fakamatalaʻi ia ʻi he ngaahi lea ʻa Lia: “Ko e taimi ko eni ʻe pikitai ʻa hoku husepaniti kiate au, he kuo u faʻeleʻi maʻana ha tangata ʻe toko tolu.” Neongo ia, ʻoku hā mahino, naʻe ʻikai ongoʻi ofi ange ai ʻa Sēkope kiate ia. Mahalo pē naʻe tali ʻe Lia ʻa e moʻoniʻi meʻa ko iá, he ko e hingoa ʻo hono foha fika faá naʻe ʻikai ha lave ai ki heʻene ngaahi ʻamanaki ki ha vahaʻangatae lelei ange mo Sēkopé. ʻI hono kehé, ko hono ui ko Siutá naʻe fakahaaʻi ai ʻa ʻene fakamālō ki he ʻOtuá. Ko e hingoa “Siuta” ʻoku ʻuhingá ko e “Fakamalo,” pe “Meʻa ʻOku Fai ki Ai ʻa e Fakamālōʻia.” Naʻe pehē pē ʻe Lia: “Ko e taimi ni te u fakamalo kia Sihova.”—Senesi 29:​34, 35.

Kapau naʻe ongoʻi loto-mamahi ʻa Lia, naʻe ʻangeʻange ia ʻia Lesieli. Naʻá ne kōlenga kia Sēkope: “Fei mo ʻomi haʻaku fānau; he ka ʻikai, te u mate.” (Senesi 30:1) Naʻe maʻu ʻe Lesieli ʻa e ʻofa ʻa Sēkopé, ka naʻá ne feinga ke maʻu haʻane fānau. Naʻe maʻu ʻe Lia ʻa e fānaú, ka naʻá ne feinga ke maʻu ʻa e ʻofá. Naʻá na taki taha holi ki he meʻa naʻe maʻu ʻe he toko taha ʻe tahá, pea naʻe ʻikai ha taha ʻia kinaua ʻe fiefia. Naʻá na fakatou ʻofa ʻia Sēkope pea fakaʻamu ke fanauʻi ha fānau kiate ia. Naʻá na femehekaʻaki. Ko ha tuʻunga fakamamahi moʻoni ē ki he fāmili ko iá!

Ne ʻi Ai ha Fānau ʻa Lesieli?

ʻI he taimi ko iá, naʻe vakai ai ki he paʻá ko ha mala. Naʻe talaʻofa ʻa e ʻOtuá kia ʻĒpalahame, ʻAisake, mo Sēkope ko honau fāmilí ʻe haʻu mei ai ʻa e “hako” ʻa ia ʻe monūʻia ai ʻa e ngaahi fāmili kotoa pē. (Senesi 26:4; 28:14) Kae kehe, naʻe paʻa ʻa Lesieli. Naʻe fakaʻuhinga ʻa Sēkope ko e ʻOtuá pē ʻe lava ke ne ʻoange ha fānau ʻa Lesieli, ʻo fakamafeia ia ke ʻi ai hano ngafa ʻi he ngaahi monūʻia ko iá. Neongo ia, naʻe taʻefaʻakātaki ʻa Lesieli. “Ko ʻena ʻeku kaunanga ko Pilaa,” ko ʻene leá ia. “Ke ke ʻalu kiate ia; ke ne fanau ki hoku funga, kau maʻu fanau foki ʻe au ʻiate ia.”—Senesi 30:​2, 3.

Ko e fakakaukau ʻa Lesielí ʻe faingataʻa nai ke tau mahinoʻi. Kae kehe, ko e ngaahi aleapau mali ʻi he kuonga muʻá naʻe ʻiloʻi ʻi he kotoa ʻo e Hahake Ofí ʻoku fakahaaʻi ai ko ha tōʻonga ia naʻe tali ki ha uaifi paʻa ke ne ʻoange ki hono husepānití ha taʻahine kaunanga koeʻuhi ke ne fanauʻi ha ʻea.a (Senesi 16:​1-3) ʻI he ngaahi tuʻunga ʻe niʻihi, ko e fānau ʻa e taʻahine kaunangá ʻe fai leva ʻa e vakai ki ai ko e fānau kinautolu ʻa e uaifí.

ʻI he taimi naʻe maʻu ai ha tamasiʻi ʻa Pilaá, naʻe fakahaaʻi ʻe Lesieli ʻi heʻene fiefiá: “Kuo fakamāuʻi ʻeku meʻa ʻe he ʻOtua, pea kuo ne fanongo foki ki hoku leʻo, pea kuo ne foaki mai ha tama tangata.” Naʻá ne ui ia ko Tani, ko hono ʻuhingá ko e “Fakamaau.” Naʻá ne lotu mo ia foki fekauʻaki mo ʻene faingataʻaʻiá. ʻI hono fanauʻi ʻo e foha hono ua ʻo Pilā, ko Nafitalai, ko hono ʻuhingá “Ko ʻEku Fefaʻuhi,” naʻe pehē ʻe Lesieli: “Ko e ngaahi fefaʻuhi lalahi kuo u fefaʻuhi ai mo hoku taʻokete, pea kuo u lava foki.” ʻOku fakahaaʻi ʻi he ngaahi hingoá ʻa e fepaki ʻi he ongo feʻauhi naʻe faí.—Senesi 30:​5-8.

Mahalo pē naʻe fakakaukau ʻa Lesieli naʻá ne ngāue ʻo fehoanaki mo ʻene ngaahi lotú ʻi heʻene ʻoange ʻa Pilā kia Sēkopé, ka naʻe ʻikai ko e founga ia ʻa e ʻOtuá ki hono ʻoange kiate ia ha fānaú. ʻOku ʻi ai ha lēsoni ʻi he meʻá ni. ʻOku ʻikai totonu ke tau hoko ʻo taʻefaʻakātaki ʻi he taimi ʻoku tau kole ai kia Sihová. ʻOku lava ke ne tali ʻetau ngaahi lotú ʻi he ngaahi founga taʻeʻamanekina pea ʻi he taimi ʻoku siʻi ai ʻetau ʻamanekina iá.

Ke fakafepaki ki aí, naʻe ʻoange foki ʻe Lia kia Sēkope ʻene kaunanga ko Silipá. Naʻá ne ʻuluaki fanauʻi ʻa Kata, pea hoko ai ʻa ʻĀseli.​—Senesi 30:​9-​13.

Ko ha meʻa naʻe hoko ʻoku fakaeʻa ai ʻa e feʻauhi ʻi he vahaʻa ʻo Lesieli mo Liá naʻe kau ki ai ha ʻakau fakafanau naʻe maʻu ʻe he foha ʻo Lia ko Lūpení. Ko e fuaʻiʻakaú ni naʻe pehē ʻe tokoni ia ke hoko ai ʻo feitama. ʻI he kole ʻa Lesieli ke ʻoange haʻaná, naʻe tali ʻita ange ʻa Lia: “Ko e meʻa siʻi koā hoʻo ʻave hoku husepaniti, pea te ke ʻave foki ʻa e ngahi ʻakau fakafanau ʻa ʻeku tama?” ʻOku mahinoʻi ʻe he niʻihi ʻene ngaahi leá ko e ʻuhingá naʻe lahi ange ʻa e feohi ʻa Sēkope mo Lesielí ʻi heʻene feohi mo Liá. Mahalo pē naʻe ʻiloʻi ʻe Lesieli ʻa e ʻuhinga ʻo e mamahi ʻa Liá, he naʻá ne tali ange: “Ka meʻa, pea ne mohe mo koe ʻapō ko e totongi ʻo e ngaahi ʻakau fakafanau ʻa hoʻo tama.” Ko ia ʻi he foki mai ʻa Sēkope ʻi he efiafi ko iá, naʻe fakahā ange ʻe Lia: “Te ke haʻu kiate au; he kuo u matuʻaki unga koe ʻaki ʻa e ngaahi ʻakau fakafanau ʻa ʻeku tama.”​—Senesi 30:​15, 16.

Naʻe maʻu ʻe Lia ha ongo foha ko hono nimá ia mo hono onó, ko ʻĪsaka mo Sepulone. Hili iá, naʻá ne fakahaaʻi: “Kuo pau eni ke nofo mai hoku husepaniti kiate au; he kuo u faʻeleʻi kiate ia ha fanau tangata ʻe toko ono.”b—Senesi 30:​17-20.

Naʻe ʻikai ke tokoni ʻa e ʻakau fakafanaú. ʻI he hili ʻa e taʻu ʻe ono ʻo e nofo malí naʻe faifai pē ʻo feitama ʻa Lesieli peá ne fāʻeleʻi ʻa Siosifa, pea naʻe peheé koeʻuhi naʻe “manatu” ʻa Sihova kiate ia pea tali ʻene lotú. Ko e toki taimi eni naʻe lava ai ke pehē ʻe Lesieli: “Kuo hiki ʻe he ʻOtua hoku māʻanga!”—Senesi 30:​22-24.

Mate mo e Tofiʻa

Lolotonga ʻene fanauʻi ʻa hono foha hono ua ko Penisimaní, naʻe mate ai ʻa Lesieli. Naʻe ʻofa moʻoni ʻa Sēkope ʻia Lesieli, pea naʻá ne ʻofeina ʻa ʻene ongo tamaikí. ʻI he ngaahi taʻu ki mui ai, ʻi he ofi ki heʻene mate ʻaʻaná, naʻá ne toe fakamanatu ʻa e mate mutukia ʻa hono ʻofaʻanga ko Lesielí. (Senesi 30:1; 35:​16-​19; 48:7) ʻI he mate ʻa Liá, ʻoku ʻikai ke tau ʻiloʻi ha meʻa fekauʻaki mo ia tuku kehe pē hono tanu ia ʻe Sēkope ʻi he ʻana ʻa ia naʻá ne loto mo ia foki ke tanu ia aí.​—Senesi 49:​29-​32.

ʻI he aʻuaʻú naʻe fakahaaʻi ai ʻe Sēkope ko ʻene moʻuí—ʻo kau ai ʻene ngaahi meʻa fakafāmilí—naʻe fakamamahi. (Senesi 47:9) ʻOku ʻikai ha veiveiua naʻe fakamamahi ʻa e moʻuí kia Lia mo Lesieli foki. Ko ʻena ngaahi hokosiá ʻoku fakaeʻa ai ʻa e ngaahi nunuʻa fakamamahi ʻo e mali tokolahí pea fakatātaaʻi ai ʻa e ʻuhinga naʻe fokotuʻu ai ʻe Sihova ki he tangatá ʻa e totonu ke ne maʻu ʻa e uaifi pē ʻe tahá. (Mātiu 19:​4-8; 1 Timote 3:​2, 12) Ko e meheká ʻoku hoko ia ʻi he taimi ʻoku ʻikai fakangatangata ai ʻa e mahuʻingaʻia fakaemanako pe fakaefehokotaki fakasino ʻa ha husepāniti pe ko ha uaifi ki he tokotaha pē—ko hono hoa malí. Ko e ʻuhinga ia ʻe taha ʻoku tapui ai ʻe he ʻOtuá ʻa e feʻauakí mo e tonó.—1 Kolinito 6:​18; Hepelu 13:4.

Ko e hā pē ʻa e tuʻungá, naʻe hokohoko atu ʻa e ʻOtuá​—pea ʻokú ne kei hokohoko atu​—ke fakahoko ʻene taumuʻá, ʻo ngāueʻaki ʻa e kau tangata mo e kau fefine taʻehaohaoa kae faitōnunga. Ko e ongo tautehiná naʻe fakatou ʻi ai hona ngaahi vaivaiʻanga, ʻo hangē pē ko kitautolú. Kae kehe, fakafou ʻi he ongo fefine ko ení, naʻe kamata fakahoko ai ʻe Sihova ʻene talaʻofa kia ʻĒpalahamé. ʻOku feʻungamālie ai ʻa e pehē ko Lesieli mo Liá “naʻa na langa ʻa e fale ʻo Isileli.”​—Lute 4:​11.

[Fakamatala ʻi lalo]

[Fakatātā ʻi he peesi 9]

Naʻe holi taki taha ʻa Lia mo Lesieli ki he meʻa naʻe maʻu ʻe he toko taha ʻe tahá, pea naʻe ʻikai ha taha ʻia kinaua ʻe fiefia

[Fakatātā ʻi he peesi 10]

Naʻe tukuʻau mai ʻa e puleʻanga ʻIsilelí mei he foha ʻe toko 12 ʻo Sēkopé