ʻOku Moʻui ʻa e Folofola ʻa Sihová
Ngaahi Meʻa Mahuʻinga mei he Tohi Ekisotó
KO HA talanoa moʻoni ʻo hono fakahaofi ʻo e faʻahinga ʻa ia naʻe “fakangaue mamafa.” (Ekisoto 1:13) Ko ha toe fakamatala fakalotomāfana ʻo e fanauʻi ʻo ha puleʻanga. ʻOku kau ʻi hono ngaahi tafaʻaki fakatoʻoalotó ʻa e ngaahi mana fakaofo, tuʻunga lao māʻolunga mo hono faʻu ʻo e tāpanekalé. ʻI hono tefitó, ko e meʻa eni ʻoku ʻi he tohi Tohi Tapu ʻa Ekisotó.
ʻI hono tohi ʻe he palōfita Hepelū ko Mōsesé, ʻoku fakamatala ʻa e Ekisotó ki he ngaahi meʻa naʻe hokosia ʻe he kau ʻIsilelí ʻi ha vahaʻa taimi ko e taʻu ʻe 145—mei he mate ʻa Siosifa ʻi he 1657 K.M. ki he kakato ʻo e tāpanekalé ʻi he 1512 K.M. Neongo ia, ko e fakamatalá ʻoku lahi ange ia ʻi he meʻa fakahisitōliá pē. Ko ha konga ia ʻo e folofola, pe pōpoaki ʻa e ʻOtuá ki he faʻahinga ʻo e tangatá. ʻI heʻene peheé, ko e “koto moʻui mo e koto malohi” ia. (Hepelu 4:12) Ko e Ekisotó leva, ʻoku ʻi ai hono ʻuhinga moʻoni kia kitautolu.
“NAʻE ONGOʻI ʻE HE ʻOTUA ʻENAU TOʻE”
Ko e hako ʻo Sēkope ʻoku nofo ʻi ʻIsipité ʻoku tupu ia ʻo mātuʻaki vave ʻaupito pea ʻi he tuʻutuʻuni fakatuʻí ʻoku ngaohikoviʻi ai kinautolu ko e kau pōpula. ʻOku aʻu ʻo tuʻutuʻuni ʻe Felo ha mate ki he fanga kiʻi valevale tangata ʻIsileli kotoa pē. ʻOku hao mei he ikuʻanga ko iá ha pēpē māhina tolu, ko Mōsese, ʻa ia ʻoku pusiakiʻi ʻe he ʻofefine ʻo Feló. Neongo ʻoku ʻohake ia ʻi he fāmili fakatuʻí, ʻi hono taʻu 40, ʻoku kau ai ʻa Mōsese mo hono kakaí tonu ʻo ne tāmateʻi ai ha toko taha ʻIsipite. (Ngāue 7:23, 24) ʻI hono fakamālohiʻi ia ke ne holá, ʻokú ne ʻalu ki Mitiani. ʻOkú ne mali ai pea moʻui ko ha tauhi-sipi. ʻI ha fuʻu ʻakau vela fakaemana, ʻoku fekauʻi ai ʻe Sihova ʻa Mōsese ke ne foki ki ʻIsipite ke taki ʻa e kau ʻIsilelí ki tuʻa mei he nofo pōpulá. Ko hono taʻoketé, ʻa ʻĒlone, ʻoku fakanofo ia ke hoko ko ʻene tangata-lea.
Tali ki he Ngaahi Fehuʻi Fakatohitapú:
3:1—Ko e faʻahinga taulaʻeiki fēfē ʻa Setelō? ʻI he ngaahi taimi fakapēteliaké naʻe ngāue ai ʻa e ʻuluʻi fāmilí ko ha taulaʻeiki maʻa hono fāmilí. Naʻe hā mahino ko Setelō ʻa e ʻulu fakapēteliake ʻo ha matakali ʻo e kau Mitianí. Koeʻuhi ko e kau Mitianí ko e hako ʻo ʻĒpalahame ʻia Kētula, mahalo pē naʻa nau ʻilo ki he lotu kia Sihová.—Senesi 25:1, 2.
4:11—ʻI he ʻuhinga fē ʻoku hanga ai ʻe Sihova ʻo ‘ngaohi ʻa e noá, ko e tulí pea mo e kuí’? Neongo kuo fakatupunga ʻe Sihova ʻi ha taimi ha kui mo ha noa, ʻoku ʻikai tupu meiate ia ʻa e tuʻunga kotoa pē ʻo e ngaahi faingataʻaʻia fakasino peheé. (Senesi 19:11; Luke 1:20-22, 62-64) Ko e ngaahi ola eni ʻo e angahala tukufakaholó. (Siope 14:4; Loma 5:12) Kae kehe, koeʻuhi kuo fakaʻatā ʻe he ʻOtuá ke hoko ʻa e tuʻungá ni, ʻoku lava ai ke ne lea ʻo kau kiate ia ʻokú ne “ngaohi” ʻa e noá, ko e tulí pea mo e kuí.
4:16—Naʻe anga-fēfē ʻa e pau kia Mōsese ke ne “fetongi ʻa e ʻOtua” kia ʻĒloné? Ko Mōsesé ko ha fakafofonga ia ʻo e ʻOtuá. Ko ia ai, naʻe hoko ʻa Mōsese ko e “ʻOtua” kia ʻĒlone, ʻa ia naʻá ne lea ko e fakafofonga kia Mōsese.
Ngaahi Lēsoni kia Kitautolu:
1:7, 14. Naʻe tokoniʻi ʻe Sihova ʻa hono kakaí ʻi he taimi naʻe lōmekina ai kinautolu ʻi ʻIsipité. ʻOku pehē pē ʻene fakaivia ʻa ʻene Kau Fakamoʻoni ʻi onopōní, naʻa mo e ʻi he fehangahangai mo e fakatanga lahí.
1:17-21. ʻOku manatuʻi kitautolu ʻe Sihova ke tau “lelei ai.”—Nehemaia 13:31 (Nehe 13:30), PM.
3:7-10. ʻOku maongongofua kia Sihova ʻa e tangi ʻa hono kakaí.
3:14. ʻOku fakahoko maʻu pē ʻe Sihova ʻa ʻene ngaahi taumuʻá. Ko ia, ʻoku lava ai ke tau tuipau te ne liliu ʻa ʻetau ngaahi ʻamanaki makatuʻunga ʻi he Tohi Tapú ki he tuʻunga moʻoní.
4:10, 13. Naʻe fakahāhā ʻe Mōsese ʻa e taʻefalala lahi ki heʻene malava ke leá ʻo aʻu ki hono fakapapauʻi ange ʻa e poupou fakaʻotuá, naʻá ne kōlenga ki he ʻOtuá ke ʻave ha taha kehe ke lea kia Felo. Neongo ia, naʻe ngāueʻaki ʻe Sihova ʻa Mōsese ʻo ne ʻoange kiate ia ʻa e poto mo e mālohi naʻe fiemaʻu ke fakahokoʻaki ʻa ʻene ngāué. ʻI he ʻikai tokangataha ki heʻetau ngaahi taʻefeʻungá, ʻofa ke tau falala kia Sihova pea fakahoko faitōnunga ʻa hotau fatongia ke malanga pea ke faiakó.—Mātiu 24:14; 28:19, 20.
KO E NGAAHI MANA FAKAOFÓ ʻOKU ʻOMAI AI ʻA E FAKAHAOFI
ʻOku hā ʻa Mōsese mo ʻĒlone ʻi he ʻao ʻo Feló, ʻo kole ke fakangofua ʻa e kau ʻIsilelí ke nau fakahoko ha kātoanga kia Sihova ʻi he toafá. ʻOku fakafisi fefeka ʻa e pule ʻIsipité. ʻOku ngāueʻaki ʻe Sihova ʻa Mōsese ke ne ʻoatu ha tā mālohi hokohoko. Ko e toki hili ʻa e mala hono hongofulú pea tukuange ai ʻe Felo ke ʻalu ʻa e kau ʻIsilelí. Kae kehe, ʻikai fuoloa, ko ia mo ʻene ngaahi kongakaú ʻoku nau tuli vave atu. Ka ʻoku fakaava ʻe Sihova ha hala ko e holaʻanga ʻi he loto Tahi Kulokulá ʻo ne fakahaofi ʻa hono kakaí. Ko e kau ʻIsipite tulimuí ʻoku nau melemo ʻi he foki mai kia kinautolu ʻa e tahí .
Tali ki he Ngaahi Fehuʻi Fakatohitapú:
6:3—ʻI he founga fē naʻe ʻikai ʻai ai ke ʻiloa ʻa e huafa ʻo e ʻOtuá kia ʻĒpalahame, ʻAisake mo Sēkopé? Ko e kau pēteliaké ni naʻa nau ngāueʻaki ʻa e huafa fakaʻotuá pea maʻu ʻa e ngaahi talaʻofa meia Sihova. Neongo ia, naʻe ʻikai te nau ʻiloʻi pe hokosia ʻa e hoko ʻa Sihova ko e toko taha naʻá ne fakatupunga ke hoko ʻa e ngaahi talaʻofá ni.—Senesi 12:1, 2; 15:7, 13-16; 26:24; 28:10-15.
7:1—Naʻe anga-fēfē hono ʻai ʻa Mōsese ko e “ʻOtua kia Felo”? Naʻe ʻoange kia Mōsese ʻa e mālohi fakaʻotua mo e mafai kia Felo. Ko ia ai, naʻe ʻikai ha fiemaʻu ke ilifia ki he tuʻi ko iá.
7:22—Naʻe maʻu mei fē ʻe he kau maki ʻIsipité ʻa e vai naʻe ʻikai liliu ki he totó? Naʻe lava ke nau ngāueʻaki ha vai ʻa ia naʻe toʻo mei he Vaitafe Nailá ki muʻa ʻi he mala ko ení. Ngalingali naʻe lava ke toe tānaki ʻa e vai naʻe ʻikai uesiá ʻaki hono keli ha ngaahi vaitupu ʻi he kelekele hauhau ofi ki he Vaitafe Nailá.—Ekisoto 7:24.
8:26, 27 (PM)—Ko e hā naʻe pehē ai ʻe Mōsese ʻe hoko ʻa e ngaahi feilaulau ʻa ʻIsilelí ʻo “fakalilia ai ae kakai Ijibite”? Naʻe fai ʻi ʻIsipite ʻa e lotu ki he fanga manu kehekehe lahi. Ko ia ai, ko e lave ki he ngaahi feilaulaú naʻe tānaki atu ai ʻa e mālohi mo e fakalotoʻi ki he vilitaki ʻa Mōsese ke fakaʻatā ʻa ʻIsileli ke ʻalu ʻo feilaulau kia Sihová.
12:29—Ko hai naʻe lau ko e ʻuluaki tamá? Ko e ʻuluaki tamá naʻe kau ki ai ʻa e kakai tangatá pē. (Nomipa 3:40-51) Ko Felo tonu ko ha ʻuluaki tama ia, naʻe ʻikai ke tāmateʻi. Naʻá ne maʻu hano fāmili pē ʻoʻona. Naʻe ʻikai ko e ʻuluʻi fāmilí ka ko e foha ʻa ia ko e ʻuluaki tama ʻo e fāmilí naʻe mate ia ko e tupu mei he mala hono hongofulú.
12:40 (NW)—Ko e hā hono lōloa ʻo e nofo ʻa e kau ʻIsilelí ʻi he fonua ko ʻIsipité? Ko e taʻu ʻe 430 ʻoku lave ki ai hení ʻoku kau ki ai ʻa e taimi naʻe fakamoleki ʻe he ngaahi foha ʻo ʻIsilelí “ʻi he fonua ko ʻIsipité pea ʻi he fonua ko Kēnaní.” (Reference Bible, fakamatala ʻi laló) Naʻe kolosi ʻa e taʻu 75 ko ʻĒpalahamé ʻi he Vaitafe ʻIufaletesí ʻi he 1943 K.M. ʻi heʻene fononga ki Kēnaní. (Senesi 12:4) Mei he taimi ko iá ʻo aʻu mai ki he taimi naʻe hū ai ʻa e taʻu 130 ko Sēkopé ki ʻIsipité ko e taʻu ʻe 215. (Senesi 21:5; 25:26; 47:9) ʻOku ʻuhinga ení naʻe fakamoleki ai ʻe he kau ʻIsilelí ha vahaʻa taimi tatau ko e taʻu ʻe 215 ʻi ʻIsipite.
15:8—Ko e ngaahi vai “fefeka” ʻo e Tahi Kulokulá ko e ngaahi vai poloka moʻoni? Ko e foʻi veape faka-Hepelū naʻe liliu ko e “fefeka” ʻoku ʻuhingá ko e mingi pe fatu. ʻI he Siope 10:10, ʻoku ngāueʻaki ai ʻa e foʻi leá ʻi he fekauʻaki mo e huʻakau fatú. Mei hení, ko e ngaahi vai fefeká ʻoku ʻikai ke fokotuʻu moʻoni mai ai ha ngaahi vai poloka, ʻaisi ia. Kapau ko e “matangi malohi mei hahake” naʻe lave ki ai ʻi he Ekisoto 14:21 naʻe momoko feʻunga ke ne fakapolokaʻi ʻa e vaí, ʻoku ʻikai ha veiveiua naʻe fai ha lave ki ha momoko fakaʻulia. Koeʻuhi naʻe ʻikai ha meʻa hāmai naʻá ne pukepuke ʻa e ngaahi vaí, ne nau hā ai hangē ʻoku fefeká, fakafefeka pe fatú.
Ngaahi Lēsoni kia Kitautolu:
7:14–12:30. Ko e Mala ʻe Hongofulú naʻe ʻikai ko ha ngaahi meʻa hokonoa pē ia. Naʻe tomuʻa tala ia pea hoko totonu mai pē ʻo hangē ko hono fakahāʻí. He fakahāhaaʻi mataʻāʻā ē ʻe he ngaahi malá ʻa e pule ʻa e Tokotaha-Fakatupú ki he vaí, maama ʻo e laʻaá, fanga ʻinisēkité, fanga manú pea mo e tangatá! ʻOku toe fakahaaʻi ʻe he ngaahi malá ʻoku lava ke filifili ʻe he ʻOtuá ʻa hono ʻomai ʻa e faingataʻa ki hono ngaahi filí lolotonga ia ʻene maluʻi ʻa ʻene kau lotú.
11:2; 12:36. ʻOku tāpuakiʻi ʻe Sihova ʻa hono kakaí. ʻOku hā mahino naʻá ne fakapapauʻi naʻe ʻoange he taimi ko ení ki he kau ʻIsilelí ʻa e totongi ki heʻenau ngāue ʻi ʻIsipité. Naʻa nau hū ki he fonuá ko e kakai tauʻatāina, ʻo ʻikai ko ha faʻahinga maʻu pōpula ʻi he taú ke fakapōpulaʻi.
14:30. ʻOku lava ke tau falala ʻe fakahaofi ʻe Sihova ʻa ʻene kau lotú ʻi he “mamahi lahi” ka hoko maí.—Mātiu 24:20-22; Fakahā 7:9, 14.
FOKOTUʻUTUʻU ʻE SIHOVA HA PULEʻANGA FAKATEOKALATI
ʻI he māhina hono tolu hili honau fakatauʻatāinaʻi mei ʻIsipité, ʻoku ʻapitanga ai ʻa e kau ʻIsilelí ʻi he veʻe Moʻunga Sainaí. ʻOku nau maʻu ai ʻa e Fekau ʻe Hongofulú mo e ngaahi lao kehe, hū ki ha fuakava mo Sihova pea hoko ko ha puleʻanga fakateokalati. ʻOku fakamoleki ʻe Mōsese ʻa e ʻaho ʻe 40 ʻi he moʻungá, ʻo ne maʻu ai ʻa e ngaahi fakahinohino fekauʻaki mo e lotu moʻoní pea mo e faʻu ʻo e tāpanekale ʻo Sihová, ko ha temipale ʻoku hiki holo. Lolotonga iá, ʻoku faʻu ʻo lotu ki ha ʻuhikiʻi pulu koula ʻa e kau ʻIsilelí. ʻI he hifo mei he moʻungá, ʻoku sio ai ʻa Mōsese ki he meʻá ni pea langaʻi ai ʻene tōtōlili ʻo ne fahiʻi ʻa e ongo maka lafalafa naʻe ʻoange kiate ia ʻe he ʻOtuá. Hili hono ʻoange ʻa e tautea totonu ki he kau faihalá, ʻokú ne toe ʻalu hake ki he moʻungá ʻo maʻu mai ha toe seti maka lafalafa ʻe taha. ʻI he foki mai ʻa Mōsesé, ʻoku kamata ʻa e faʻu ʻo e tāpanekalé. ʻI he ngataʻanga ʻo e ʻuluaki taʻu ʻo e tauʻatāina ʻa ʻIsilelí, ʻoku kakato pea tuʻu ʻa e tēniti fakaofo ko ení mo hono ngaahi teuteú kotoa. ʻOku fakafonu leva ʻe Sihova ʻa e tēnití ʻaki hono lāngilangí.
Tali ki he Ngaahi Fehuʻi Fakatohitapú:
20:5 (PM)—ʻOku anga-fēfē hono ʻomai ʻe Sihova ʻa e “totogi ae hia ae gaahi tamai” ki he ngaahi toʻutangata ʻi he kahaʻú? Hili ʻa e aʻu ki he taʻu ʻo e fua fatongiá, ʻoku fakamāuʻi ai ʻa e toko taha taki taha ʻo makatuʻunga ʻi hono ʻulungāangá mo ʻene fakakaukaú tonu. Ka ʻi he taimi naʻe tafoki ai ʻa e puleʻanga ʻIsilelí ki he tauhi ʻaitolí, naʻá ne fuesia ai ʻa e ngaahi nunuʻa ʻo e meʻá ni ʻi he ngaahi toʻutangata ʻi he hili iá. Naʻa mo e kau ʻIsileli faitōnungá naʻa nau ongoʻi ʻa hono ngaahi nunuʻá ʻi hono ʻai ʻe he maumau-lao fakalotú ʻa e puleʻangá ke faingataʻa kia kinautolu ʻa e nofo ʻi he ʻalunga ʻo e anga-tonú.
23:19; 34:26—Ko e hā ʻa e ʻuhinga ʻo e fekau ke ʻoua ʻe haka ha ʻuhikiʻi kosi ʻi he huʻakau ʻo ʻene faʻeé? Ko hono haka ha ʻuhikiʻi kosi (pe ʻuhiki ʻo ha monumanu kehe) ʻi he huʻakau ʻo ʻene faʻeé naʻe fakahaaʻi ko ha ouau fakapangani ia ne pehē tokua ʻoku ʻomai ai ʻa e ʻuhá. ʻIkai ngata aí, koeʻuhi ko e huʻakau ʻo e faʻeé ki hono fafanga ʻa hono ʻuhikí, ko hono haka ai ʻa hono ʻuhikí ʻe hoko ia ko ha tōʻonga fakamamahi. Naʻe tokoni ʻa e laó ni ke fakahāhā ki he kakai ʻa e ʻOtuá ʻoku totonu ke nau manavaʻofa.
23:20-23—Ko hai ʻa e ʻāngelo naʻe lave ki ai hení, pea naʻe anga-fēfē ʻa e “ʻiate ia” ʻa e huafa ʻo Sihová? Ngalingali, ko e ʻāngeló ni ko Sīsū ia ʻi hono fōtunga ki muʻa ke hoko ko e tangatá. Naʻe ngāueʻaki ia ke ne tataki ʻa e kau ʻIsilelí ʻi heʻenau fononga ki he Fonua ʻo e Talaʻofá. (1 Kolinito 10:1-4) ʻOku “ʻiate ia” ʻa e huafa ʻo Sihová ʻi he hoko ko ia ʻa Sīsū ko e toko taha tefito ʻa ia ʻokú ne pouaki mo fakamāʻoniʻoniʻi ʻa e huafa ʻo ʻene Tamaí.
32:1-8, 25-35—Ko e hā naʻe ʻikai tautea ai ʻa ʻĒlone ʻi hono ngaohi ʻa e ʻuhikiʻi pulu koulá? Naʻe ʻikai loto moʻoni ʻa ʻĒlone ki he lotu ʻaitolí. Ki mui ai, ʻoku ngalingali naʻá ne kau fakataha mo hono kaungā Līvaí ʻi he tuʻu maʻá e ʻOtuá mo fakafepakiʻi ʻa e faʻahinga naʻa nau talitekeʻi ʻa Mōsesé. Hili hono tāmateʻi ʻa e halaiá, naʻe fakamanatu ʻe Mōsese ki he kakaí naʻa nau faiangahala lahi, ʻo fakahaaʻi ai naʻe toe maʻu ʻe he niʻihi kehe tuku kehe ʻa ʻĒlone ʻa e meesi ʻa Sihová.
33:11, 20 (PM)—Naʻe anga-fēfē ʻa e fefolofolai “mata ki he mata” ʻa e ʻOtuá mo Mōsesé? Ko e kupuʻi leá ni ʻoku fakahaaʻi ai ʻa e fetalanoaʻaki tafaʻaki-ua fekoekoeʻi. Naʻe talanoa ʻa Mōsese mo e fakafofonga ʻo e ʻOtuá pea maʻu ʻi he lea ʻa e fakahinohino meia Sihova fakafou ʻiate ia. Ka naʻe ʻikai ke sio ʻa Mōsese kia Sihova, koeʻuhi ‘oku ʻikai ha tagata te ne mamata ki he ʻOtuá, bea moui.’ Ko hono moʻoní, naʻe ʻikai ke folofola tonu hifo ʻa Sihova kia Mōsese. Ko e Laó “naʻe talafono ʻaki [pe fakahoko mai] ʻe ha kau angelo, ʻo fakafai ʻi ha fakalaloa,” ko e fakamatala ia ʻa e Kaletia 3:19.
Ngaahi Lēsoni kia Kitautolu:
15:25; 16:12. ʻOku tokonaki ʻa Sihova maʻa hono kakaí.
18:21. Ko e kau tangata ʻoku fili ki he ngaahi tuʻunga fua fatongia ʻi he fakatahaʻanga Kalisitiané kuo pau ke nau toe lavameʻa, manavahē-ʻOtua, alafalalaʻanga pea taʻesiokita.
20:1–23:33. Ko Sihova ʻa e Tokotaha-Foaki Lao aoniú. ʻI he talangofua ki aí, naʻe ʻai ʻe heʻene ngaahi laó ʻa e kau ʻIsilelí ke nau lotu kiate ia ʻi ha founga maau mo fakafiefia. ʻOku maʻu ʻe Sihova ha kautaha fakateokalati he ʻahó ni. Ko e fāitaha mo iá ʻoku iku ia ki heʻetau fiefia mo e malu.
ʻUhinga Moʻoni kia Kitautolú
Ko e hā ʻoku fakahaaʻi ʻe he tohi Ekisotó fekauʻaki mo Sihová? ʻOku fakahaaʻi ai ia ko e Tokotaha-Tokonaki ʻofa, ko e Tokotaha-Faifakahaofi taʻealafakatataua, pea ko e Tokotaha-Fakahoko ʻo ʻene ngaahi taumuʻá. Ko iá ko e ʻOtua ʻo e kautaha fakateokalati.
ʻI hoʻo fai hoʻo lau Tohi Tapu fakauiké ʻi he teuteu ki he Ako Fakafaifekau Fakateokalatí, ʻoku ʻikai ha veiveiua ʻe ueʻi loloto koe ʻe he meʻa ʻokú ke ako mei he Ekisotó. ʻI hoʻo fakakaukau ki he meʻa ʻoku fakahaaʻi ʻi he konga “Tali ki he Ngaahi Fehuʻi Fakatohitapú,” te ke maʻu ai ʻa e vavanga lahi ange ki he ngaahi kupu Fakatohitapu ʻe niʻihi. Ko e fakamatala ʻi he “Ngaahi Lēsoni kia Kitautolu” ʻe fakahaaʻi atu ai kia koe ʻa e founga ʻe lava ke ke maʻu ʻaonga ai mei he lau Tohi Tapu ki he uiké.
[Fakatātā ʻi he peesi 24, 25]
Naʻe fekauʻi ʻe Sihova ʻa e tangata anga-vaivai ko Mōsesé ke ne taki ʻa e kau ʻIsilelí ki tuʻa mei he nofo pōpulá
[Fakatātā ʻi he peesi 25]
Naʻe fakahāhaaʻi ʻe he Mala ʻe Hongofulú ʻa e pule ʻa e Tokotaha-Fakatupú ki he vaí, maama ʻo e laʻaá, fanga ʻinisēkité, fanga manú pea mo e tangatá
[Fakatātā ʻi he peesi 26, 27]
Fakafou ʻia Mōsese, naʻe fokotuʻutuʻu ʻe Sihova ʻa e kau ʻIsilelí ki ha puleʻanga fakateokalati