Faʻifaʻitaki ki Heʻenau Tuí

Naʻá Ne “Tubu i he Ao o Jihova”

NAʻE sivisiviʻi ʻe Sāmiuela ʻa e mata ʻo hono kakaí. Naʻe fakatahataha ʻa e puleʻangá ʻi he kolo ko Kilikalí, ʻi he fekauʻi atu ʻe he tangata faitōnunga ko eni ʻa ia naʻá ne ngāue ko ha palōfita mo e fakamaau ʻi he laui hongofuluʻi taʻu. Ko Mē ia pe ko Sune ʻi heʻetau tohimāhina ʻi onopōní; naʻe ʻosi kamata ai ʻa e faʻahitaʻu laʻalaʻaá. Ko e ngaahi ngoue ʻi he feituʻú naʻe fua lahi ai ʻa e uite kuo taimi ke toli. Naʻe sīlongo ʻa e fuʻu kakaí. ʻE lava fēfē ke aʻu ʻa Sāmiuela ki honau lotó?

Naʻe ʻikai ke mahinoʻi ʻe he kakaí ʻa e mafatukituki ʻo honau tuʻungá. Naʻa nau vilitaki ke ʻi ai ha tuʻi fakaetangata ke pule mai kia kinautolu. Naʻe ʻikai te nau mahinoʻi naʻa nau fakahāhā ʻa e taʻefakaʻapaʻapa lahi ki honau ʻOtuá, ʻa Sihova, pea ki heʻene palōfitá. Ko hono moʻoní, naʻa nau talitekeʻi ʻa Sihova ko honau Tuʻí! Naʻe lava fēfē ke ueʻi kinautolu ʻe Sāmiuela ke nau fakatomala?

Naʻe lea ʻa Sāmiuela. “Kuo u motuʻa mo hinā,” ko ʻene tala ia ki he fuʻu kakaí. Ko hono ʻulu hinaá naʻe ʻai ai ke mahuʻinga ʻene ngaahi leá. Naʻá ne pehē leva: “Kuo u taka ʻi homou ʻao talu ʻeku talavou ʻo aʻu ki he ʻaho ni.” (1 Samiuela 11:14, 15; 12:2) Neongo naʻe motuʻa ʻa Sāmiuela, naʻe ʻikai ngalo ʻiate ia ʻa hono taimi talavoú. Naʻá ne kei manatu lelei pē ki he muʻaki ngaahi ʻaho ko iá. Ko e ngaahi fili naʻá ne fai ʻi he taimi ko iá, ʻi he tuʻunga ko ha tamasiʻi kei tupu haké, naʻe tataki ai ia ki ha moʻui ʻo e tui mo e līʻoa ki hono ʻOtuá, ʻa Sihova.

ʻI he taimi ki he taimi, naʻe pau ke langa hake ai mo tauhi maʻu ʻe Sāmiuela ʻa e tuí, neongo ʻa e takatakaiʻi ia ʻe he kakai naʻa nau taʻetui mo taʻemateaki. ʻI he ʻahó ni, ko ha pole tatau pē ia ke langa hake ʻa e tuí, he ʻoku tau moʻui ʻi ha māmani taʻetui mo taʻefaitotonu. Tau sio angé ki he meʻa ʻe lava ke tau ako mei he faʻifaʻitakiʻanga ʻa Sāmiuelá, ʻo kamata mei heʻene kei siʻí.

“Ngaue ʻi he ʻAo ʻo Sihova, ko e Tamasiʻi Pe”

Naʻe makehe ʻa e kei siʻi ʻa Sāmiuelá. Taimi nounou pē mei hono mavaé, ʻi hono taʻu faá nai pe ofi ki ai, naʻá ne kamata ha moʻui ʻo e ngāue ʻi he tāpanekale toputapu ʻo Sihova ʻi Sailó, ʻa ia naʻe mamaʻo ʻaki ʻa e kilomita ʻe 30 tupu mei hono ʻapí ʻi Lama. Ko ʻene ongo mātuʻá, ʻa ʻElikena mo ʻAna, naʻá na foaki atu ʻena tamasiʻí kia Sihova ki ha founga makehe ʻo e ngāué, ʻo ʻai ai ia ko ha Nāsili ʻi he kotoa ʻo ʻene moʻuí.a Naʻe ʻuhinga ení naʻe liʻaki ʻa Sāmiuela, ʻo ʻikai ʻofa ai ʻene ongo mātuʻá?

ʻIkai ʻaupito! Naʻá na ʻiloʻi ko hona fohá ʻe tokangaʻi ʻi Sailo. Ko e Taulaʻeiki Lahi ko ʻĪlaí ʻoku ʻikai ha veiveiua naʻá ne tokangaʻi ʻa e ngaahi meʻá, he naʻe ngāue vāofi mo ia ʻa Sāmiuela. Naʻe toe ʻi ai foki ʻa e kau fefine naʻa nau ngāue ki he ngaahi meʻa felāveʻi mo e tāpanekalé, ʻo hā mahino naʻe ʻi ha founga fokotuʻutuʻu maau.—Ekisoto 38:8.

ʻIkai ko ia pē, naʻe ʻikai ʻaupito ngalo ʻia ʻAna mo ʻElikena ʻa ʻena ʻuluaki tama ʻofeiná, ʻa ia ko hono fanauʻí tonu ko ha tali ia ki ha lotu. Naʻe kole ʻe ʻAna ki he ʻOtuá ha foha, ʻo palōmesi ke foaki ʻa e tamasiʻí ki he ʻOtuá ki ha moʻui ʻo e ngāue toputapu. ʻI he ʻaʻahi ki ai he taʻu taki taha, naʻe ʻave ai ʻe ʻAna kia Sāmiuela ha kofu foʻou taʻenima ʻa ia naʻá ne tuitui ki heʻene ngāue ʻi he tāpanekalé. Naʻe mahuʻinga moʻoni ki he kiʻi tamasiʻí ʻa e ngaahi ʻaʻahi ko iá. ʻOku ʻikai ha veiveiua naʻá ne laka ki muʻa koeʻuhi ko e fakalototoʻa mo e fakahinohino anga-ʻofa ʻa ʻene ongo mātuʻá ʻi heʻena akoʻi ange ko ha monū ia ʻa e ngāue kia Sihova ʻi he feituʻu makehe ko iá.

ʻOku lava ke ako ʻe he ngaahi mātuʻa he ʻaho ní ha meʻa lahi meia ʻAna mo ʻElikena. Ko e meʻa anga-maheni ia ki he ngaahi mātuʻá ke fakahangataha ʻenau ngaahi feinga kotoa ʻi hono tauhi hake ʻa e fānaú ʻi he tokanga ki he ngaahi meʻa fakamatelié lolotonga ia ʻoku tukunoaʻi ʻa e ngaahi fiemaʻu fakalaumālié. Ka ko e ongo mātuʻa ʻa Sāmiuelá naʻá na fakamuʻomuʻa ʻa e ngaahi meʻa fakalaumālié, pea naʻe ʻi ai ha tākiekina lahi ki he faʻahinga tangata ʻe tupu hake hona fohá ʻo hoko ki aí.—Palovepi 22:6.

ʻOku lava ke tau sioloto atu ki he tamasiʻí ʻi heʻene tupu ʻo lahi haké pea ʻi heʻene fononga holo ʻi he ngaahi tafungofunga takatakai ʻi Sailó. ʻI heʻene sio fakamamaʻu hifo ki he koló mo e teleʻa ʻoku mafola atu ʻi lalo ʻi he tafaʻaki ʻe tahá, ʻoku ngalingali naʻe fonu hono lotó ʻi he fiefia mo e laukau ʻi heʻene sio atu ki he tāpanekale ʻo Sihová. Ko e tāpanekale ko iá ko ha feituʻu toputapu moʻoni.b ʻI hono langa ʻi he meimei taʻu ʻe 400 ki muʻa ʻi he malumalu ʻo e tataki ʻa Mōsesé tonu, ko e senitā pē ia ʻe taha ki he lotu maʻa ʻa Sihová ʻi he kotoa ʻo e māmaní.

Naʻe tupu hake ʻa kiʻi Sāmiuela ʻo saiʻia ʻi he tāpanekalé. ʻI he fakamatala naʻá ne hiki ki mui aí, ʻoku tau lau: “Ko Samiuela naʻe fai ngaue ʻi he ʻao ʻo Sihova, ko e tamasiʻi pe, ʻo kofu ʻi ha efoti tupenu.” (1 Samiuela 2:18) Ko e kiʻi kofu taʻenima ko iá naʻe hā mahino ko ha fakaʻilonga ia naʻe tokoni ʻa Sāmiuela ki he kau taulaʻeikí ʻi he tāpanekalé. Neongo naʻe ʻikai te ne ʻi he kalasi taulaʻeikí, naʻe maʻu ʻe Sāmiuela ʻa e ngaahi fatongia naʻe kau ai ʻa hono fakaava ʻa e ngaahi matapā ki he lotoʻā tāpanekalé ʻi he pongipongí pea tokangaʻi ʻa e taʻumotuʻa ko ʻĪlaí. Neongo naʻá ne fiefia lahi ʻi he ngaahi monuú, naʻe faifai atu pē ʻo fakahohaʻasi ʻa hono loto-tonuhiá. Naʻe ʻi ai ha meʻa naʻe fehālaaki lahi fakaʻulia ʻi he fale ʻo Sihová.

Hanganaki Maʻa ʻi he Fehangahangai mo e Taʻefaitotonú

ʻI he kei taʻu siʻí, naʻe siotonu ai ʻa Sāmiuela ʻi he fulikivanu mo e taʻefaitotonu moʻoni. Naʻe ʻi ai ʻa e ongo foha ʻo ʻĪlai, ko Hofinai mo Fineasi. ʻOku pehē ʻi he fakamatala ʻa Sāmiuelá: “Koe fānau oe agakovi ae ogo foha o Ilai; nae ikai te na ilo a Jihova.” (1 Samiuela 2:12, PM) Naʻe fekauʻaki vāofi ʻa e ongo fakakaukau ʻi he veesi ko ení. Ko Hofinai mo Fineasí naʻá na “agakovi”—ʻa ia ʻoku ʻuhinga fakafoʻileá ko e “ongo foha taʻeʻaonga”—koeʻuhi he naʻe ʻikai te na tokaʻi ʻa Sihova. Naʻe halaʻatā haʻana fakakaukau ki heʻene ngaahi tuʻunga mo e ngaahi fiemaʻu māʻoniʻoní. Mei he fehālaaki ʻe taha ko iá naʻe tupu mei ai ʻa e kotoa ʻo ʻena ngaahi angahala kehé.

Ko e Lao ʻa e ʻOtuá naʻe fekauʻaki hangatonu ia mo e ngaahi fatongia ʻo e kau taulaʻeikí pea mo e founga naʻe pau ke nau foaki ai ʻa e ngaahi feilaulau ʻi hono tāpanekalé. Ki ha ʻuhinga lelei! Naʻe fakafofongaʻi ʻe he ngaahi feilaulau ko iá ʻa e ngaahi tokonaki ʻa e ʻOtuá ke fakamolemoleʻi ʻa e ngaahi angahalá koeʻuhi ke lava ai ʻa e kakaí ʻo maʻa ʻi hono ʻaó, pea taau ke maʻu ʻa ʻene tāpuakí mo e tatakí. Ka ko Hofinai mo Fineasi naʻá na tataki hona kaungā taulaʻeikí ke nau tōʻongafai taʻefakaʻapaʻapa lahi ki he ngaahi feilaulaú.c

Fakaʻuta atu kia kiʻi Sāmiuela ʻi heʻene siofi, ʻo ʻohovale ʻi he hokohoko atu ʻo ʻikai fakatonutonu ʻa e ngāue hala lahi ko iá. Ko e kakai ʻe toko fiha naʻá ne sio ki aí—kau ai ʻa e kakai masiva, māʻulalo mo lōmekina—naʻa nau fakaofiofi ki he tāpanekale toputapu ko iá ʻi he ʻamanaki ke maʻu ha fakafiemālie mo e fakaivimālohi fakalaumālie, ka ko e foki loto-siʻi pē, loto-mamahi, pe mā? Pea naʻe fēfē ʻene ongoʻi ʻi heʻene ʻilo ko Hofinai mo Fineasí naʻá na toe taʻetokaʻi ʻa e ngaahi lao ʻa Sihova fekauʻaki mo e ʻulungaanga fakaefehokotaki fakasinó, ʻi heʻena nonofo mo e niʻihi ʻo e kakai fefine naʻa nau ngāue ai ʻi he tāpanekalé? (1 Samiuela 2:22) Naʻá ne fakatuʻamelie nai ke fai ʻe ʻĪlai ha meʻa fekauʻaki mo ia.

Ko ʻĪlai naʻe ʻi he tuʻunga lelei taha ke ne fakatonutonu ʻa e palopalema naʻe fakautuutú. ʻI he tuʻunga ko e taulaʻeiki lahí, ko ia naʻe tukuakiʻi ki he meʻa naʻe hoko ʻi he tāpanekalé. ʻI hono tuʻunga ko ha tamaí, naʻe ʻi ai hono fatongia ke fakatonutonu ʻa hono ongo fohá. He ko ē, naʻá na fakatupunga ʻa e mamahi kia kinaua tonu pea pehē ki he niʻihi kehe taʻefaʻalaua ʻi he fonuá. Kae kehe, naʻe ʻikai ke fai ʻe ʻĪlai ʻa e ongo tafaʻakí fakatouʻosi, ʻi he tuʻunga ko e tamai pea ko e taulaʻeiki lahi. Naʻá ne fakanainai mo fakavaivai ʻi hono tafuluʻi ʻa hono ongo fohá. (1 Samiuela 2:23-25) Ka naʻe fiemaʻu ki hono ongo fohá ʻa e akonaki fefeka ange. Naʻá na fai ʻa e ngaahi angahala naʻe tuha mo e mate!

Naʻe aʻu ʻa e ngaahi meʻá ki ha tuʻunga ʻo fekauʻi atu ai ʻe Sihova “ha tangata ʻo Elohimi,” ko ha palōfita naʻe ʻikai fakahaaʻi hono hingoá, kia ʻĪlai mo ha pōpoaki fakaefakamaau fefeka. Naʻe tala ʻe Sihova kia ʻĪlai: “ʻOku mamafa ange kiate koe hoʻo fanau ʻiate au.” Ko ia naʻe tomuʻa tala ʻe he ʻOtuá ko e ongo foha fulikivanu ʻo ʻĪlaí te na mate ʻi he ʻaho tatau pea ko e fāmili ʻo ʻĪlaí te nau faingataʻaʻia lahi, pea aʻu ʻo mole honau tuʻunga monū ʻi he kalasi taulaʻeikí. Naʻe fakahoko ʻe he fakatokanga mālohi ko ení ha liliu ʻi he fāmili ko iá? ʻOku ʻikai fakahaaʻi ʻi he fakamatalá ha liliu pehē ʻo e lotó.—1 Samiuela 2:27–3:1.

Naʻe anga-fēfē hono uesia ʻe he taʻefaitotonu kotoa ko ení ʻa kiʻi Sāmiuela? ʻI he konga ʻe niʻihi ʻo e fakamatala fakamamahi ko ení, ʻoku tau maʻu ai ha fakamatala fakafiefia, ko e ongoongo lelei fekauʻaki mo e tupu hake pea mo e laka ki muʻa ʻa Sāmiuelá. Manatuʻi ʻi he 1 Samiuela 2:18, ʻoku tau lau ai naʻe faitōnunga ʻa Sāmiuela he “ngaue ʻi he ʻao ʻo Sihova, ko e tamasiʻi pe.” Naʻa mo e taʻu siʻi ko iá, naʻe fakahangataha ʻe Sāmiuela ʻa ʻene moʻuí ki heʻene ngāue ki he ʻOtuá. ʻI he veesi 21 ʻo e vahe tatau, ʻoku tau lau ai ha meʻa naʻe aʻu ʻo toe fakalotomāfana ange: “Nae tubu be ae tamajii ko Samuela i he ao o Jihova.” ʻI heʻene tupu haké, ko hono vā mo ʻene Tamai fakahēvaní naʻe toe mālohi ange. Ko ha vā fakafoʻituitui vāofi pehē mo Sihova ʻa e maluʻi pau taha mei ha faʻahinga founga pē ʻo e taʻefaitotonú.

Naʻe mei faingofua kia Sāmiuela ke fakaʻuhinga kapau ko e taulaʻeiki lahí ē mo hono ongo fohá naʻa nau fakavaivai ki he angahalá, naʻe mei lelei nai ke ne fai ha meʻa pē naʻá ne loto ki ai. Ka ko e taʻefaitotonu ʻa e niʻihi kehé, kau ai ʻa e faʻahinga ʻi he ngaahi tuʻunga mafaí, ʻoku ʻikai ʻaupito ko ha kalofanga ia ki he angahalá. ʻI he ʻahó ni, ko e toʻutupu Kalisitiane tokolahi ʻoku nau muimui ʻi he faʻifaʻitakiʻanga ʻa Sāmiuelá pea hanganaki ‘tubu i he ao o Jihová’—neongo ʻe ʻi ai ha faʻahinga takatakai ʻia kinautolu ʻoku ʻikai malava ke nau fokotuʻu ha faʻifaʻitakiʻanga lelei.

Naʻe ʻaonga fēfē kia Sāmiuela ha ʻalunga pehē? ʻOku tau lau: “Ka ka tupu ai pe ʻa e tamasiʻi ko Samiuela, pea naʻe ʻofeina ʻia Sihova mo e kakai foki.” (1 Samiuela 2:26) Ko ia ko Sāmiuelá, naʻe saiʻia lahi ai ʻa e tokolahi ʻa ia naʻe mahuʻinga ʻa ʻenau fakakaukaú. Naʻe ʻofeina ʻe Sihova tonu ʻa e tamasiʻi ko ení koeʻuhi ko hono ʻalunga faitōnungá. Pea naʻe ʻiloʻi moʻoni ʻe Sāmiuela ko hono ʻOtuá te ne fai ha meʻa ki he kovi kotoa pē ʻoku hoko ʻi Sailó, ka naʻá ne fifili pe ko ʻafē nai.

“Fai Mai Haʻo Folofola, he ʻOku Fakaongo Atu ʻe Hoʻo Tamaioʻeiki”

ʻI he pō ʻe taha, ko e ngaahi fehuʻi ko iá naʻe maʻu ai hano tali. Ko e fakaofiofi eni ki he pongipongí ka naʻe kei fakapoʻuli pē; naʻe kei ulo tateme pē ʻa e maama lahi ʻi he tēnití. ʻI he tuʻunga lōngonoá, naʻe fanongo ai ʻa Sāmiuela ki ha leʻo ʻoku ui mai ki hono hingoá. Naʻá ne fakakaukau ko ʻĪlai, ʻa ia naʻe fuʻu motuʻa pea meimei kui ʻi he taimi ko ení. Naʻe tuʻu hake ʻa Sāmiuela pea “ne lele” ki he tangataʻeikí. ʻE lava ke ke sioloto atu ki he tamasiʻí, ʻi heʻene fakavave taʻesū atu ke sio pe ko e hā naʻe fiemaʻu ʻe ʻĪlaí? ʻOku fakaueʻiloto ke ʻiloʻi ʻa e fakafeangai anga-fakaʻapaʻapa mo anga-lelei ʻa Sāmiuela kia ʻĪlaí. Neongo ʻa ʻene ngaahi angahalá kotoa, naʻe kei hoko pē ʻa ʻĪlai ko e taulaʻeiki lahi ʻa Sihova.—1 Samiuela 3:2-5.

Naʻe fafangu ʻe Sāmiuela ʻa ʻĪlai, ʻo ne pehē: “Ko au eni: he naʻa ke ui au.” Ka naʻe pehē ʻe ʻĪlai naʻe ʻikai te ne ui peá ne fekau ʻa e tamasiʻí ke foki ʻo mohe. Ko ia, naʻe toutou hoko ʻa e meʻa tatau! Faifai atu pē, naʻe ʻilo ʻe ʻĪlai ʻa e meʻa naʻe hokó. Naʻe hoko ʻo tātātaha kia Sihova ke ne ʻomai ha vīsone pe ko ha pōpoaki fakaekikite ki hono kakaí, pea ʻoku ʻikai faingataʻa ke ʻilo hono ʻuhingá. Ka naʻe ʻiloʻi ʻe ʻĪlai naʻe toe folofola mai ʻa Sihova—ʻi he taimi ko ení ki he tamasiʻí ni! Naʻe tala ange ʻe ʻĪlai ki Sāmiuela ke ʻalu ʻo mohe pea fakahinohinoʻi ia ki he founga ke tali totonu aí. Naʻe talangofua ʻa Sāmiuela. ʻIkai fuoloa naʻá ne fanongo ki he leʻó ʻoku ui: “Samiuela, Samiuela.” Naʻe tali ʻa e tamasiʻí: “Fai mai haʻo folofola, he ʻoku fakaongo atu ʻe hoʻo tamaioʻeiki.”—1 Samiuela 3:1, 5-10.

Faifai atu pē, naʻe ʻi ai ha sevāniti ʻa Sihova ʻi Sailo ʻa ia naʻe fanongo. Naʻe hoko ia ko e sīpinga moʻui ʻa Sāmiuelá. ʻOkú ke pehē mo koe? ʻOku ʻikai fiemaʻu ia ke tau tatali ki ha leʻo fakaʻotua ʻi he poʻulí ke lea mai kia kitautolu. ʻI he ʻahó ni, ko e leʻo ʻo e ʻOtuá ʻoku ʻi ai maʻu pē maʻatautolu ʻi ha ʻuhinga. ʻOku ʻi ai ia ʻi heʻene Folofolá kakato, ʻa e Tohi Tapú. Ko e lahi ange ʻo ʻetau fanongo ki he ʻOtuá pea tali iá, ko e lahi ange ia ʻa e tupulekina ʻa ʻetau tuí. Ko ia naʻe pehē pē ʻa Sāmiuela.

ʻI he pō ko iá ʻi Sailo ko ha meʻa ia naʻe mahuʻinga ʻi he moʻui ʻa Sāmiuelá, he ʻi he taimi ko iá, naʻá ne kamata ʻilo ai kia Sihova ʻi ha ʻuhinga makehe, ʻi heʻene hoko ko e palōfita mo e tangata-lea ʻa e ʻOtuá tonu. ʻI he ʻuluaki taimí, naʻe ilifia ʻa e tamasiʻí ke fakahoko ʻa e pōpoaki ʻa Sihová kia ʻĪlai, he ko hano fakahaaʻi fakaʻosi ia ko e kikite ki he fāmili ko iá kuo vave ke hoko moʻoni. Ka naʻe langaʻi ʻe Sāmiuela ʻa e loto-toʻa—pea naʻe tali anga-fakatōkilalo ʻe ʻĪlai ʻa e fakamaau fakaʻotuá. ʻIkai fuoloa mei ai, naʻe fakahoko ʻa e meʻa kotoa pē naʻe folofolaʻaki ʻe Sihová. Naʻe tau ʻa ʻIsileli mo e kau Filisitiá, pea ko Hofinai mo Fineasí naʻe tāmateʻi kinaua ʻi he ʻaho tatau. Ko ʻĪlai tonu naʻe mate ʻi heʻene ʻilo kuo puke ʻo ʻave ʻa e ʻAʻake toputapu ʻa Sihová.—1 Samiuela 3:10-18; 4:1-18.

Kae kehe, naʻe tupulaki ai pē ʻa e ongoongo ʻo Sāmiuela ʻi he tuʻunga ko ha palōfita faitōnungá. “Naʻe ʻiate ia ʻa Sihova,” ko e lau ia ʻa e fakamatalá, pea hoko atu ʻo pehē naʻe ʻikai tuku ʻe Sihova ke tō kelekele ha taha ʻo e ngaahi kikite ʻa Sāmiuelá.—1 Samiuela 3:19.

‘Naʻe Ui ʻa Samiuela kia Sihova’

Kae kehe, naʻe ʻuhinga iá, naʻe muimui ʻa e kau ʻIsilelí ʻi he tataki ʻa Sāmiuelá pea nau hoko ko e kakai fakalaumālie mo faitōnunga? ʻIkai. ʻI he faai mai ʻa e taimí, naʻa nau fakapapauʻi naʻe ʻikai te nau fiemaʻu ke fakamāuʻi kinautolu ʻe ha palōfita pē. Naʻa nau loto ke hangē ko e ngaahi fonua kehé ʻo maʻu ha tuʻi fakaetangata ke pule kia kinautolu. ʻI he fakahinohino ʻa Sihová, naʻe fai ki ai ʻa Sāmiuela. Ka naʻe pau ke ne tala ki ʻIsileli ʻa e lahi ʻo ʻenau angahalá. Naʻa nau talitekeʻi, ʻo ʻikai ko ha tangata pē, ka ko Sihova tonu! Ko ia naʻá ne fekauʻi ʻa e kakaí ke nau ō ki Kilikali.

Tau kau fakataha mo ia ʻi he mōmeniti faingataʻa ko ia ʻo ʻene lea ki ʻIsileli ʻi Kilikalí. ʻI aí, naʻe fakamanatu ai ʻe he tangataʻeiki ko Sāmiuelá ki ʻIsileli ʻa hono lēkooti faitōnunga ʻo e anga-tonú. Tau lau leva: ‘Naʻe ui ʻa Samiuela kia Sihova.’ Naʻá ne kole kia Sihova ki ha afā mana mo e ʻuhila.—1 Samiuela 12:17, 18.

Ko ha afā mana mo e ʻuhila? ʻI he faʻahitaʻu laʻalaʻaá? ʻOku fakaʻohovalé, naʻe teʻeki fanongoa ha meʻa pehē! Kapau naʻe ʻi ai naʻa mo ha kiʻi tui veiveiua pe manuki ʻi he lotolotonga ʻo e kakaí, naʻe ʻikai fuoloa ia. Naʻe fakapoʻuli fakafokifā ʻa e langí ʻi ha ngaahi konga ʻao. Naʻe haveki ʻe he matangí ʻa e uite ʻi he ngaahi ngoué. Naʻe pā mai mo e maná ʻo ʻuʻulu fakatutuli. Pea naʻe tō mo e ʻuha. Ko e hā ʻa e talí? Naʻe “manavahe lahi ʻa e kakai kia Sihova pea kia Samiuela.” Naʻe faifai pē ʻo nau sio ki he mafatukituki ʻo ʻenau faiangahalá.—1 Samiuela 12:18, 19.

ʻOku ʻikai ko Sāmiuela, ka ko hono ʻOtuá, ʻa Sihova, naʻe aʻu ki honau loto angatuʻú. Mei heʻene kei talavoú ʻo aʻu ki heʻene motuʻá, naʻe tui ʻa Sāmiuela ki hono ʻOtuá. Pea naʻe fakapaleʻi ia ʻe Sihova. ʻI he aʻu mai ki he ʻaho ní, kuo ʻikai liliu ʻa Sihova. ʻOkú ne kei poupouʻi pē ʻa e faʻahinga ʻoku nau faʻifaʻitaki ki he tui ʻa Sāmiuelá.

[Fakamatala ʻi lalo]

[Fakatātā ʻi he peesi 25]

Neongo ʻene manavaheé, naʻe toe tala faitōnunga atu ʻe Sāmiuela ʻa e pōpoaki fakaefakamaau ʻa Sihová kia ʻĪlai

[Fakatātā ʻi he peesi 26]

Naʻe lotu ʻa Sāmiuela ʻi he tui, pea naʻe tali mai ʻaki ʻe Sihova ha afā mana mo e ʻuhila