Faʻifaʻitaki ki Heʻenau Tuí

Naʻá Ne Lilingi Hono Lotó ki he ʻOtuá ʻi he Lotu

NAʻE fakafemoʻuekinaʻi ʻe ʻAna ʻa ia tonu ʻi he ngaahi teuteu ki he fonongá, ʻo ne feinga ke fakafemoʻuekinaʻi ʻene fakakaukaú. Naʻe totonu ke hoko ia ko ha taimi fakafiefia; ko ʻElikena, ʻa hono husepānití, naʻá ne tōʻongaʻaki hono ʻave ʻa e fāmilí kotoa ʻi he ngaahi fononga fakataʻu ko eni ke lotu ʻi he tāpanekalé ʻi Sailo. Naʻe fakataumuʻa ʻe Sihova ʻa e ngaahi kātoanga peheé ke fakafiefia. (Teutalonome 16:15) Pea ʻoku ʻikai ha veiveiua ʻi heʻene kei siʻí naʻe fiefia ʻa ʻAna ʻi he ngaahi kātoanga ko iá. Ka naʻe liliu ʻa e ngaahi meʻá kiate ia ʻi he ngaahi taʻu ki muí.

Naʻe tāpuekina ia heʻene maʻu ha husepāniti naʻe ʻofa ai. Kae kehe, naʻe toe maʻu ʻe ʻElikena ha uaifi ʻe taha. Ko hono hingoá ko Pēnina, pea naʻe hā ngali naʻá ne nofo taha ki hono ʻai ʻa e moʻui ʻa ʻAná ke fakamamahi. Naʻe ʻiloʻi ʻe Pēnina ha founga ke ʻai ai ʻa e ngaahi kātoanga fakataʻu ko ení ko ha tupuʻanga ia ʻo e mamahi lahi kia ʻAna. Anga-fēfē? Pea ko e mahuʻinga angé, naʻe anga-fēfē hono tokoniʻi ʻa ʻAna ʻe heʻene tui kia Sihová ke fekuki ai mo e meʻa naʻe faʻa hā ngali ko ha tuʻunga faingataʻá? Kapau ʻokú ke fehangahangai mo ha ngaahi pole ʻokú ne toʻo ʻa hoʻo fiefia ʻi he moʻuí, te ke toki ʻilo nai ʻoku fakaueʻiloto moʻoni ʻa e talanoa fekauʻaki mo ʻAná.

“Ko e Ha ʻOku Hohaʻa Ai Ho Loto?”

ʻOku fakaeʻa ʻe he Tohi Tapú ʻa e palopalema lalahi ʻe ua fekauʻaki mo e moʻui ʻa ʻAná. Naʻá ne kiʻi mapuleʻi ʻa e tuʻunga ʻuluakí kae ʻikai ʻaupito ʻi he tuʻunga hono uá. ʻI he tuʻunga ʻuluakí, naʻá ne kau ʻi ha nofo mali tokolahi, fakataha mo ha uaifi fakavahavahaʻa ʻa ia naʻá ne fehiʻa ange kiate ia. ʻI he tuʻunga hono uá, ko iá naʻá ne paʻa. Ko e tuʻunga ko iá ʻoku faingataʻa ia ki ha faʻahinga uaifi pē ʻokú ne fakaʻamua mai ke maʻu haʻane fānau; ka ʻi he taimi ʻo ʻAná mo e anga-fakafonuá, ko ha tupuʻanga ia ʻo e mamahi tōtuʻa. Ko e fāmili taki taha naʻa nau fakatuʻotuʻa ki ha hako ke ne hoko atu ʻa e hingoa fakafāmilí. Ko e paʻá naʻe hā ngali ko ha manukiaʻanga lahi ia mo fakamā.

Naʻe mei kātekina lavameʻa nai ʻe ʻAna ʻa hono tuʻungá ka ne ʻikai ʻa Pēnina. Ko e mali tokolahí naʻe ʻikai ʻaupito ko ha meʻa fakapotopoto ia. Ko e fakavahavahaʻá, fekeʻikeʻí, mo e loto-mamahí ko e ngaahi meʻa ia naʻe fuʻu anga-maheni ʻaupito ia ai. Naʻe kehe ʻaupito ʻa e tōʻongá mei he tuʻunga ʻo e mali mo ha tokotahá ʻa ia naʻe fokotuʻu ʻe he ʻOtuá ʻi he ngoue ʻo ʻĪtení.a (Senesi 2:24) Ko e Tohi Tapú ʻokú ne fakalika mai ha foʻi ʻata kovi ʻo e mali tokolahí, pea ko e fakamatala fakalotomamahi fekauʻaki mo e moʻui ʻi he fāmili ʻo ʻElikená ko ha fakatātā lelei ia ʻo hono kovi ʻo e mali tokolahí.

ʻOkú ke ʻilo, ko ʻAná ko e tokotaha ia naʻe ʻofa lahi taha ai ʻa ʻElikená. ʻI he fai ʻo fakatatau ki he talatukufakaholo faka-Siú naʻá ne ʻuluaki mali mo ʻAna pea toki hoko mai ʻa Pēnina ʻi ha ngaahi taʻu ki mui ai. ʻI ha faʻahinga tuʻunga pē, ko Pēnina, ʻa ia naʻá ne fuaʻa ʻaupito ʻia ʻAná, naʻá ne maʻu ha ngaahi founga ke ʻai ai ʻa ʻAna ke faingataʻaʻia. Ko e tuʻunga naʻe mahulu hake ai ʻa Pēnina ʻia ʻAná naʻe felāveʻi ia mo e fakafanaú. Naʻe fanau hokohoko pē ʻa Pēnina, pea naʻe fakautuutu ʻene fakamāhikí ʻi he kiʻi tama foʻou taki taha. ʻI he ʻikai ke ne ongoʻi fakaʻofaʻia ʻia ʻAna mo fakafiemālieʻi ia ʻi heʻene loto-mamahí, naʻe ngāuekoviʻaki ʻe Pēnina ʻa e tuʻunga pelepelengesi ko iá. ʻOku pehē ʻe he Tohi Tapú naʻe fakamamahiʻi lahi ʻa ʻAna ʻe Pēnina “koeʻuhi ke ne mamahi.” (1 Samiuela 1:6) Ko e ngaahi tōʻonga ʻa Pēniná naʻe fai fakakaukauʻi. Naʻá ne loto ke fakalotomamahiʻi ʻa ʻAna, pea naʻá ne lavameʻa.

Ko e faingamālie naʻe saiʻia taha ai ʻa Pēniná, ʻoku ngalingali, naʻe hoko ia ʻi he taimi ʻo e fononga pilikimi fakataʻu ki Sailó. Ki he tokotaha taki taha ʻo e fānau tokolahi ʻa Pēniná—ʻa e “fanau tangata mo fanau fefine kotoa pe”—naʻe ʻoange ʻe ʻElikena kiate kinautolu ʻa e ngaahi konga ʻo e feilaulau naʻe fai kia Sihová. Neongo ia, ko e taʻefanau ko ʻAná, naʻá ne maʻu ʻa e konga pē ʻaʻaná. Naʻe fakafeangai fiemāʻolunga leva ʻa Pēnina kia ʻAna peá ne fakamanatu ange kiate ia ʻa ʻene paʻá ʻo tangi ai siʻi ʻAná pea aʻu ai ʻo ne taʻefiefie kai. Naʻe ʻikai puli meia ʻElikena ka ne fakatokangaʻi ʻa e loto-mamahi ʻa hono ʻofaʻanga ko ʻAná mo e ʻikai te ne kaí, ko ia naʻá ne feinga ke fakafiemālieʻi ia. “Ana,” ko ʻene ʻeké ia, “ko e ha ʻoku ke tangi ai? pea ko e ha ʻoku ʻikai te ke kai ai? pea ko e ha ʻoku hohaʻa ai ho loto? ʻikai ʻoku ou mahuʻinga kiate koe ʻi ha tama ʻe hongofulu?”—1 Samiuela 1:4-8.

Ko hono moʻoní, naʻe ʻiloʻi ʻe ʻElikena ko e loto-mamahi ʻa ʻAná naʻe felāveʻi ia mo ʻene paʻá. Pea naʻe tukulotoa moʻoni ʻe ʻAna ʻa ʻene lea anga-ʻofa angé.b Ka naʻe ʻikai ke lave ʻa ʻElikena ki he anga-kovi ʻa Pēniná, pea ʻoku ʻikai ʻasi ia ʻi he lēkōtí ʻo pehē naʻe tala ange ʻe ʻAna ʻa e meʻa ko iá kiate ia. Mahalo naʻá ne ʻilo ko hono talatalaakiʻi ʻo Pēniná ʻe ʻai pē ai hono tuʻungá ke kovi ange. ʻE fakaleleiʻi moʻoni koā ʻe ʻElikena ʻa e ngaahi meʻá? ʻIkai ko e meʻa pē ʻe hoko aí ko e toe lahi ange ai ʻa e tōʻonga anga-kovi ʻa Pēnina kia ʻAná, pea ʻikai ʻe toe fai pehē ai pē mo e fānau mo e kau sevāniti ʻa e fefine tōʻonga anga-kovi ko iá? Naʻe toe fakalalahi ange ʻa e ongoʻi ʻe ʻAna ʻoku hangē ia ha kehé ʻi hono loto-falé tonu.

Pe naʻe ʻiloʻi ʻe ʻElikena ʻa e meʻa kotoa fekauʻaki mo e fanga kiʻi anga-kovi ʻa Pēniná pe ʻikai, naʻe ʻafioʻi kotoa ia ʻe Sihova ko e ʻOtuá. ʻOku fakaeʻa ʻe heʻene Folofolá ʻa e foʻi ʻata kotoa ko iá, ʻo ʻomai ai ha fakatokanga mamafa ki ha niʻihi ʻoku nau angaʻaki lahi nai ʻa e ngaahi tōʻonga meheka mo tāufehiʻa ʻa ia ʻoku hā ngali ko ha meʻa siʻi pē iá. ʻI he tafaʻaki ʻe tahá, ko e tokotaha tonuhia mo fakamelinó, hangē ko ʻAná, ʻe lava ke ne maʻu ha fiemālie ʻi hono ʻiloʻi ko e ʻOtua ʻo e fakamaau totonú te ne fakatonutonu ʻa e ngaahi meʻá kotoa ʻi heʻene taimi pē ʻaʻana pea ʻi heʻene founga pē ʻaʻana. (Teutalonome 32:4) Mahalo pē naʻe ʻilo ʻe ʻAna ʻa e meʻa tofu pē ko iá, he ko Sihova naʻá ne hanga ki ai ki ha tokoní.

“Nae Ikai Kei Matabeko”

ʻI he ngaahi houa ki muʻá, naʻe femoʻuekina ʻa e fāmilí. Naʻe teuteu ʻa e tokotaha kotoa ki he fonongá, naʻa mo e fānaú. Ko e fononga ki Sailo ʻa e fāmili tokolahi ko ení ʻe kolosi atu ai ʻi he kilomita ʻe 30 tupu nai ʻi he fonua tafungofunga ʻo ʻIfalemí.c ʻI he lue laló, ko e fonongá ʻe aʻu ki he ʻaho ʻe taha pe ua. Naʻe ʻilo ʻe ʻAna ʻa e meʻa ʻe fai ʻe hono kaungā uaifi fakavahavahaʻá. Kae kehe, naʻe ʻikai ke nofo ai ʻi ʻapi ʻa ʻAna. Ko ia naʻá ne fokotuʻu ha faʻifaʻitakiʻanga fisifisimuʻa ki he kau lotu ʻa e ʻOtuá ʻi he ʻaho ní. ʻOku ʻikai ʻaupito fakapotopoto ke tuku ʻa e tōʻonga kovi ʻa e niʻihi kehé ke ne fakaleluʻi ʻetau lotu ki he ʻOtuá. Kapau te tau fai peheé, te tau tō ai mei he ngaahi tāpuaki tonu ʻa ia te ne fakaivimālohiʻi ai kitautolu ke tau kātakí.

Hili ʻenau fononga ʻaho kakato ʻi ha ngaahi hala pikopiko, naʻe faifai pē ʻo fakaofi atu ʻa e fāmili tokolahí ni ki Sailo. Ko Sailó, naʻe tuʻu ia ʻi ha foʻi tafunga ʻa ia naʻe meimei ʻātakaiʻi ʻe ha ngaahi tafungofunga māʻolunga ange. ʻI heʻenau ofi atú, ngalingali naʻe fakakaukau lahi ʻa ʻAna ki he ngaahi meʻa te ne leaʻaki ʻi heʻene lotu kia Sihová. ʻI heʻenau aʻú atu pē, naʻe kai ʻa e fāmilí. Naʻe mavahe ʻa ʻAna mei he kulupú ʻi he vave taha naʻá ne malavá ʻo ne ʻalu ki he tāpanekale ʻo Sihová. Naʻe ʻi ai ʻa e Taulaʻeiki Lahi ko ʻĪlaí, ʻo ne tangutu ofi ki he kaumatapā ʻo e temipalé. Ka naʻe tokangataha ʻa ʻAna ia ki hono ʻOtuá. ʻI ai ʻi he temipalé, naʻá ne falala-pau ʻe ongona ʻene lotú. Kapau ʻe ʻikai lava ʻe ha taha ke ne mahinoʻi kakato ʻa ʻene loto-mafasiá, ʻe lava ia ʻe heʻene Tamai ʻi hēvaní. Ko ʻene loto-mamahí naʻe fakalalahi ia ʻi loto ʻiate ia, ʻo ne kamata tangi ai.

ʻI he faingataʻaʻia lahi hono sinó ʻi heʻene tangí, naʻe talanoa loto pē ʻa ʻAna kia Sihova. Naʻe lamulamu hono loungutú ʻi heʻene fakakaukauʻi ʻa e ngaahi lea ke fakahaaʻi ʻaki ʻa ʻene mamahí. Pea naʻá ne lotu fuoloa, ʻo ne huaʻi atu hono lotó ki heʻene Tamaí. Neongo iá, naʻá ne fai ʻa e meʻa lahi ange ʻi he kōlenga pē ki he ʻOtuá ke fakahoko ʻa ʻene kole fakamātoato ke ne maʻu ha fānaú. Naʻe vēkeveke ʻa ʻAna ʻo ʻikai ngata pē ʻi hono maʻu ha ngaahi tāpuaki mei he ʻOtuá ka ke ʻoange foki kiate ia ha meʻa pē te ne malavá. Ko ia naʻá ne fai ha tukumoʻui, ʻo pehē kapau te ne maʻu ha foha, te ne ʻoatu ʻa ʻene tamá ke ngāue kia Sihova ʻi he kotoa ʻo ʻene moʻuí.—1 Samiuela 1:9-11.

Ko ia naʻe fokotuʻu ʻe ʻAna ha faʻifaʻitakiʻanga ki he kotoa ʻo e kau sevāniti ʻa e ʻOtuá ʻi he fekauʻaki mo e lotú. ʻOku fakaafeʻi anga-ʻofa ʻe Sihova hono kakaí ke nau lea tauʻatāina ange kiate ia, ʻo ʻikai toumoua, ʻi hono lilingi atu ʻenau ngaahi hohaʻá ʻi hono ʻaó ʻo hangē pē ko ia ʻoku fai ʻe ha kiʻi tama ʻokú ne falala ki ha mātuʻa anga-ʻofa. (Sāme 62:8; 1 Tesalonaika 5:17) Naʻe fakamānavaʻi ʻa e ʻapositolo ko Pitá ke ne tohi ʻa e ngaahi lea fakafiemālie ko eni fekauʻaki mo e lotu kia Sihová: “Li atu ā hono kotoa ʻo hoʻomou lotomoʻua ki he ʻEne ʻAfio; he ʻoku ne mamahiʻi kimoutolu.”—1 Pita 5:7.

Kae kehe, ko e tangatá, ʻoku ʻikai te nau maʻu ʻa e mahinó mo kaungāongoʻi hangē ko ia ko Sihová. ʻI he tangi mo e lotu ʻa ʻAná, naʻe fakaʻohovaleʻi ia ʻe ha leʻo naʻe ongo mai. Ko ʻĪlai ia, ko e taulaʻeiki lahí, ʻa ia naʻá ne siofi mai ia. Naʻá ne pehē: “ʻE ʻosi ʻafē hoʻo tuku ke ha hoʻo kona? fai ha meʻa ke mole ʻa e uaine meiate koe.” Naʻe fakatokangaʻi ʻe ʻĪlai ʻa e lamulamu ʻa e loungutu ʻo ʻAná, ʻa ʻene tangí, pea mo e anga ʻo e hā ki tuʻa ʻo ʻene ongoʻí. ʻI he ʻikai te ne ʻeke pe ko e hā ʻa e meʻa ʻoku hokó, naʻe vave ʻene fakamulitukuʻaki ʻo pehē naʻá ne konā.—1 Samiuela 1:12-14.

He fakalotomamahi lahi ē kia ʻAna, ʻi he taimi faingataʻa ko iá, ke ne fehangahangai ai mo ha tukuakiʻi taʻetotonu pehē—pea mei ha tangata naʻá ne maʻu ha tuʻunga fakaʻapaʻapaʻiaʻi! Ka neongo ia, naʻá ne toe fokotuʻu ha faʻifaʻitakiʻanga fisifisimuʻa ʻo e tuí. Naʻe ʻikai te ne fakaʻatā ʻa e taʻehaohaoa ʻa e tangatá ke ne fakaleluʻi ʻene lotu kia Sihová. Naʻá ne tali anga-fakaʻapaʻapa kia ʻĪlai pea fakamatalaʻi ʻa hono tuʻungá. Naʻe tali anga-vaivai mo anga-malū ange ʻa ʻĪlai: “ʻAlu fiemalie pe: pea tauange mo e ʻOtua ʻo Isileli ke ne tali ʻa e kole kuo ke fai kiate ia.”—1 Samiuela 1:15-17.

Ko e hā ʻa e ola ʻi hono lilingi atu ʻe ʻAna hono lotó kia Sihová pea mo ʻene lotu kiate ia ʻi ai ʻi hono tāpanekalé? ʻOku pehē ʻe he fakamatalá: “Nae alu ae fefine i hono hala, bea kai, bea nae ikai kei matabeko ia.” (1 Samiuela 1:18, PM) ʻOku pehē heni ʻi he Jerusalem Bible: “Ko hono fofongá naʻe ʻikai toe mamahi.” Naʻe ongoʻi fiemālie ʻa ʻAna. Naʻe hangē ia kuó ne toʻo atu ʻa e fuʻu mafasia ko iá ʻo hili ʻi ha uma lahi mo mālohi ange ia ʻiate iá tonu, ʻa ia ko e uma ʻo ʻene Tamai fakahēvaní. (Sāme 55:22) ʻOku fuʻu faingataʻa nai ha palopalema kiate ia? ʻIkai—naʻe ʻikai, ʻoku ʻikai, pea heʻikai ʻaupito!

ʻI he taimi ʻoku tau ongoʻi mafasia ai, lōmekina, pe tāpalasia ʻe he loto-mamahí, ʻoku lelei ke tau muimui ʻi he faʻifaʻitakiʻanga ʻa ʻAná pea talanoa tauʻatāina ki he Tokotaha ʻa ia ʻoku ui ʻi he Tohi Tapú ko e “tali lotu.” (Sāme 65:2) Kapau te tau fai pehē ʻi he tui, te tau toki ʻilo foki ai ko ʻetau mamahí ʻe fetongiʻaki ia ʻa e “nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe.”—Filipai 4:6, 7.

“ʻOku ʻIkai ha Makatuʻu Hange ko Hotau ʻOtua”

ʻI he pongipongi hono hokó, naʻe foki ʻa ʻAna ki he tāpanekalé mo ʻElikena. Ngalingali naʻá ne tala ange kiate ia ʻa ʻene kolé pea mo ʻene tukupaá, he naʻe pehē ʻi he Lao ʻa Mōsesé, naʻe maʻu ʻe ha husepāniti ʻa e totonu ke fakataʻeʻaongaʻi ha tukumoʻui naʻe fai ʻe hono uaifí ʻo ʻikai te ne ʻilo ki ai. (Nomipa 30:10-15) Ka ko e tangata faitōnunga ko iá naʻe halaʻatā haʻane fai ha meʻa. ʻI hono kehé, ko ia mo ʻAna naʻá na lotu fakataha kia Sihova ʻi he tāpanekalé ki muʻa ke na foki ki ʻapí.

Ka naʻe ʻilo fakakū ʻe Pēnina kuo mole hono mālohi ke fakalotomamahiʻi ʻa ʻAná? ʻOku ʻikai ha lave ʻa e fakamatalá ki ai, ka ko e kupuʻi lea “ikai kei matabeko” ʻoku fakahuʻunga mai ai naʻe kamata ke fiefia ange ʻa ʻAna mei he taimi ko iá ʻo faai atu. ʻI ha tuʻunga pē, naʻe toki ʻiloʻi ʻe Pēnina ko ʻene tōʻonga anga-koví naʻe ʻikai toe ʻaonga. ʻOku ʻikai ʻaupito ke toe lave ʻa e Tohi Tapú ʻo fekauʻaki mo hono hingoá.

ʻI he ʻosi atu ha ngaahi māhina, ko e nonga ʻa ʻAná naʻe ʻai ai ia ke ne fiefia lahi ʻaupito. Naʻá ne feitama! ʻI heʻene fiefiá, naʻe ʻikai ʻaupito ngalo ʻia ʻAna ʻi ha taimi ʻa e feituʻu naʻe haʻu mei ai ʻa e tāpuaki ko ení. ʻI hono fanauʻi ʻo e tamasiʻí, naʻá ne fili ʻa e hingoa Sāmiuelá, ʻa ia ʻoku ʻuhingá “Huafa ʻo e ʻOtuá” pea ʻoku hā mahino mei ai ʻoku ʻuhingá ke ui ki he huafa fakaʻotuá, ʻo hangē ko ia naʻe fai ʻe ʻAná. ʻI he taʻu ko iá, naʻe ʻikai te ne kau fakataha mo ʻElikena pea mo e fāmilí ʻi he fononga ki Sailó. Naʻá ne nofo ʻi ʻapi fakataha mo e kiʻi tamá ʻi he taʻu ʻe tolu, kae ʻoua kuó ne mavae. Naʻá ne maʻu leva ʻa e mālohi ki he ʻaho ʻa ia kuo pau ke na māvae ai mo hono foha ʻofaʻangá.

ʻOku pau pē naʻe ʻikai ke faingofua ʻa e māvaé. Ko hono moʻoní, naʻe ʻilo ʻe ʻAna ʻe tokangaʻi lelei ʻa Sāmiuela ʻi Sailo, ʻe he kau fefine nai ʻe niʻihi naʻa nau ngāue ʻi he tāpanekalé. Naʻá ne kei valevale pē, pea ko hai ia ha faʻē ʻe taʻefakaʻamu ke nofo mo ʻene tamá? Kae kehe, naʻe ʻomai ʻe ʻAna mo ʻElikena ʻa e tamasiʻí, ʻo ʻikai toe nanaʻi, ka ʻi heʻena lotoʻaki. Naʻá na fai ha ngaahi feilaulau ʻi he fale ʻo e ʻOtuá, pea naʻá na foaki atu ʻa Sāmiuela kia ʻĪlai, ʻo fakamanatu kiate ia ʻa e tukumoʻui ʻa ʻAna naʻe fai ʻi he ngaahi taʻu ki muʻá.

Naʻe fai leva ʻe ʻAna ha lotu ʻo ongoʻi ai ʻe he ʻOtuá ʻoku tuha ke fakakau ia ʻi heʻene Folofola fakamānavaʻí. ʻI hoʻo lau ʻene ngaahi lea ʻoku lēkooti ʻi he 1 Samiuela 2:1-10, te ke ʻilo ai ʻa e loloto ʻo ʻene tuí ʻa ia naʻe fakahaaʻi ʻi he sētesi kotoa pē. Naʻá ne fakahīkihikiʻi ʻa Sihova ʻi heʻene ngāueʻaki fakaofo hono mālohí—ʻi hono ʻulungaanga taʻealafakatataua ʻi heʻene fakavaivaiʻi ʻa e hīkisiá, tāpuakiʻi ʻa e lōmekiná, pea mo hono fakangata ʻa e moʻuí pe naʻa mo hono fakahaofi ia mei he maté. Naʻá ne fakahīkihikiʻi ʻa ʻene Tamaí koeʻuhi ko ʻene māʻoniʻoni laulōtahá, ko ʻene fakamaau totonú, pea mo ʻene faitōnungá. ʻI he ʻuhinga lelei, ʻoku lava ke pehē ʻe ʻAna: “ʻOku ʻikai ha makatuʻu hange ko hotau ʻOtua.” ʻOku alafalalaʻanga fakaʻaufuli ʻa Sihova, ʻikai ke liliu, pea ko ha hūfanga ia ki he lōmekina mo e loto-mafasia kotoa pē ʻoku hanga kiate ia ki ha tokoní.

Naʻe monūʻia moʻoni ʻa kiʻi Sāmiuela ke maʻu ha faʻē ʻoku tui moʻoni kia Sihova. Neongo naʻá ne ʻofa lahi kiate ia ʻi heʻene tupu haké, naʻe ʻikai ʻaupito haʻane ongoʻi tuēnoa. ʻI he taʻu ki he taʻu, naʻe ʻalu ʻa ʻAna ki Sailo, ʻo ʻave ha kiʻi kofu tōtōlofa ʻikai hano nima ke ne ngāueʻaki ʻi he tāpanekalé. Ko e mataʻi-tuitui kotoa pē ʻoku hā mei ai ʻa ʻene ʻofa mo e tokanga ki hono fohá. (1 Samiuela 2:19) ʻE lava ke tau sioloto atu ki heʻene fakatui ʻa e kiʻi kofu tōtōlofa foʻoú ʻi he tamasiʻí, ʻo fakatokaleleiʻi ia, pea sio ongoʻi anga-ʻofa kiate ia lolotonga ʻa ʻene leaʻaki ʻa e ngaahi lea anga-ʻofa mo fakalototoʻa. Naʻe monūʻia ʻa Sāmiuela ke maʻu ha faʻē pehē, pea naʻá ne tupu hake ʻo hoko ko ha tāpuaki ki heʻene ongo mātuʻá pea ki ʻIsileli kātoa.

Naʻe ʻikai foki ngalo ʻa ʻAna. Naʻe tāpuakiʻi ʻe Sihova hono manavá, pea naʻá ne fanauʻi ʻa e fānau ʻe toko nima kia ʻElikena. (1 Samiuela 2:21) Ko ia ai, mahalo ko e tāpuaki lahi taha kia ʻAná, ko hono vahaʻangatae mo ʻene Tamaí, ʻa Sihova, ʻa ia naʻe fakautuutu ʻene mālohí ʻi he faai mai ʻa e ngaahi taʻú. ʻOfa ke hoko ʻa e meʻa tatau kiate koe, ʻi hoʻo faʻifaʻitaki ki he tui ʻa ʻAná.

[Fakamatala ʻi lalo]

[Puha ʻi he peesi 24]

Ongo Lotu Tuʻu-ki-Muʻa ʻe Ua

Ko e ongo lotu ʻe ua ʻa ʻAná, ʻoku lēkooti ʻi he 1 Samiuela 1:11 mo e 2:1-10, ʻoku ʻi ai ha ngaahi tafaʻaki fisifisimuʻa lahi. Fakakaukau ki ha niʻihi:

◼ ʻI he ongo lotu ʻe ua ʻa ʻAná naʻá ne fakahanga ʻa e ʻuluakí kia “Sihova Sapaoti.” Ko ia ʻa e fuofua tokotaha ʻi he lēkooti ʻo e Tohi Tapú ke ne leaʻaki ʻa e hingoa fakalakanga ko iá. ʻOku hā tuʻo 285 fakakātoa ia ʻi he Tohi Tapú pea ʻoku ʻuhinga ia ki hono puleʻi ʻe he ʻOtuá ha fuʻu kau tau tokolahi ʻo e ngaahi foha fakalaumālié.

◼ Fakatokangaʻi hono leaʻaki ʻe ʻAna ʻa e lotu hono uá, ʻo ʻikai ʻi he taimi naʻe fāʻeleʻi ai hono fohá, ka ʻi he taimi naʻá ne foaki atu ai mo ʻElikena ʻa hona fohá ki he ngāue ʻa e ʻOtuá ʻi Sailó. Ko ia ko e fiefia lahi ʻa ʻAná naʻe fakatuʻunga ia, ʻo ʻikai ʻi hono fakalongolongoʻi ʻa hono filí, ʻa Pēnina, ka ʻi hono tāpuakiʻi ia ʻe Sihová.

◼ ʻI he taimi naʻe pehē ai ʻe ʻAna, “ʻOku maʻolunga hoku nifo pe meʻatuí ʻia Sihova,” mahalo naʻe ʻi heʻene fakakaukaú ha fuʻu pulu, ko ha manu fua kavenga mālohi ʻokú ne ngāueʻaki mālohi hono ongo meʻatuí. Ko hono moʻoní, naʻe pehē ʻe ʻAna: ‘ʻE Sihova, kuó ke ʻai au ke u mālohi.’—1 Samiuela 2:1.

◼ Ko e ngaahi lea ʻa ʻAna fekauʻaki mo e “pani” ʻa e ʻOtuá ʻoku fai ʻa e fakakaukau ki ai ʻoku fakaekikite. Ko e kupuʻi lea tatau pē ia ʻoku fakalea ko e “mīsaiá,” pea ko ʻAna ʻa e fuofua tokotaha ʻi he lēkooti ʻo e Tohi Tapú ke ne ngāueʻaki ia ke lave ki ha tuʻi ʻi he kahaʻú kuo pani.—1 Samiuela 2:10.

◼ ʻI he taʻu ʻe 1,000 ki muí, ko e faʻē ʻa Sīsū ko Melé, naʻá ne toe leaʻaki ʻa e niʻihi ʻo e ngaahi lea ʻa ʻAná ʻi heʻene ngaahi lea pē ʻaʻana ko e fakahīkihiki kia Sihova.—Luke 1:46-55.

[Fakatātā ʻi he peesi 25]

Naʻe faingataʻaʻia lahi ʻa ʻAna koeʻuhi ko ʻene paʻá, pea naʻe fai ʻe Pēnina ʻa e meʻa kotoa te ne malavá ke ʻai ʻa e ongoʻi ʻa ʻAná ke toe mamahi ange

[Fakatātā ʻi he peesi 25]

ʻE lava ke ke faʻifaʻitaki ki he faʻifaʻitakiʻanga ʻa ʻAna fekauʻaki mo e lotu mei he lotó?

[Fakatātā ʻi he peesi 25]

Neongo e maʻuhala ʻa ʻĪlaí, naʻe ʻikai ke ʻita ai ʻa ʻAna