ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi ʻUluaki Samiuelá

KO E taʻú ko e 1117 K.M. Kuo mahili mei ai ʻa e taʻu nai ʻe tolungeau talu mei hono fakakakato ʻe Siosiua ʻa hono ikunaʻi ʻa e Fonua ʻo e Talaʻofá. ʻOku haʻu ʻa e kau mātuʻa ʻo ʻIsilelí ki he palōfita ʻa Sihová mo ha kole anga-kehe. ʻOku lotu ʻa e palōfitá ʻo fekauʻaki mo e meʻá pea ʻoku fakaʻatā ʻe Sihova kinautolu ke fai ʻenau foungá. ʻOku fakaʻilongaʻi ʻe he meʻá ni ʻa e ngataʻanga ʻo e vahaʻa taimi ʻo e kau Fakamāú pea mo e kamataʻanga ʻo e kuonga ʻo e ngaahi tuʻi fakaetangatá. Ko e tohi Tohi Tapu ʻa ʻUluaki Samiuelá ʻoku fakamatala ai ki he ngaahi meʻa fakalotomāfana naʻe hoko takatakai ʻi he liliu mahuʻinga ko ia ʻi he hisitōlia ʻo e puleʻanga ʻIsilelí.

ʻI hono tohi ʻe Sāmiuela, Nētane, mo Katá, ʻoku kāpui ʻi he ʻUluaki Samiuelá ha vahaʻa taimi ko e taʻu ʻe 102—mei he 1180 ki he 1078 K.M. (1 Kalonikali 29:29) Ko ha talanoa ia fekauʻaki mo e kau taki ʻe toko fā ʻo ʻIsileli. Naʻe ngāue ʻa e toko ua ko e ongo fakamaau, ko e toko ua ko e ongo tuʻi; ʻoku talangofua ʻa e toko ua kia Sihova, ʻoku ʻikai talangofua ʻa e toko ua. ʻOku tau toe fetaulaki ai mo e ongo fefine alafaʻifaʻitakiʻanga pea mo ha pāteʻi tau toʻa kae anga-malū. Ko e ngaahi faʻifaʻitakiʻanga peheé ʻoku ʻomai ai ʻa e ngaahi lēsoni mahuʻinga fekauʻaki mo e ngaahi fakakaukau mo e tōʻonga ke faʻifaʻitaki ki ai pea ke fakaʻehiʻehi mei ai. Ko ia ko e meʻa ʻi loto ʻi he ʻUluaki Samiuelá ʻe lava ke ne ʻomai ʻa e mālohi ki heʻetau ngaahi fakakaukaú mo e ngaahi ngāué.—Hepelu 4:12.

FETONGI ʻE SĀMIUELA ʻA E TUʻUNGA FAKAMAAU ʻO ʻĪLAÍ

(1 Samiuela 1:1–​7:​17)

Ko e taimi eni ki he Kātoanga Utu-Taʻú, pea ko ʻAna, ʻa ia ʻoku nofo ʻi Lamá, ʻokú ne fiefia lahi.a Kuo tali ʻe Sihova ʻene ngaahi lotú pea kuó ne fanauʻi ha foha. Ke fakahoko ʻene fuakavá, ʻoku foaki ʻe ʻAna ʻa hono foha ko Sāmiuelá ki he ngāue ʻi he “fale ʻo Sihova.” ʻOku hoko ai ʻa e tamasiʻí ʻo “fai ʻa e tauhi ʻo Sihova ʻi he ʻao ʻo Ilai taulaʻeiki.” (1 Samiuela 1:24; 2:11) ʻI he kei taʻu siʻi ʻa Sāmiuelá, ʻoku folofola ai ʻa Sihova kiate ia, ʻo fakahaaʻi ʻa e fakamaau ki he fale ʻo ʻĪlaí. ʻI he tupu hake ʻo motuʻa ange ʻa Sāmiuelá, naʻe hoko ʻo ʻiloʻi kotoa ʻe he kakai ʻIsilelí ko ha palōfita ia ʻa Sihova.

ʻOku iku ʻo haʻu ʻa e kau Filisitiá ke tauʻi ʻa ʻIsileli. ʻOku nau puke ʻa e ʻAʻaké pea fakapoongi ʻa e ongo foha ʻo ʻĪlaí. ʻI he fanongo ki he ongoongo ko iá, ʻoku mate ʻa e vaivai ko ʻĪlaí, ʻi heʻene “fakamau ʻi Isileli, ʻo fangofulu taʻu.” (1 Samiuela 4:18) ʻOku fakamoʻoniʻi ʻa e hoko hono tauhi ʻa e ʻAʻaké ʻo fakatupu ʻauha ki he kau Filisitiá, ko ia naʻa nau fakafoki ai ia ki he kau ʻIsilelí. ʻOku fakamaau he taimi ko ení ʻa Sāmiuela ʻi ʻIsileli pea ʻoku melino ʻa e fonuá.

Tali ki he Ngaahi Fehuʻi Fakatohitapú:

2:​10​—Ko e hā naʻe lotu ai ʻa ʻAna kia Sihova ke ne “tuku malohi ki heʻene tuʻi” lolotonga ia naʻe ʻikai ha tuʻi fakaetangata ki ʻIsilelí? Ko e pau ko ia ke maʻu ʻe he kau ʻIsilelí ha tuʻi fakaetangatá naʻe tomuʻa tala ia ʻi he Lao ʻa Mōsesé. (Teutalonome 17:​14-18) ʻI heʻene kikite tala tukú, naʻe pehē ai ʻe Sēkope: “Ko e sepita [ko ha fakaʻilonga ʻo e mafai fakatuʻi] meia Siuta ʻe ʻikai ʻave.” (Senesi 49:10) ʻIkai ngata aí, ʻi he fekauʻaki mo Selá—ʻa e kui-fefine ʻa e kau ʻIsilelí—naʻe folofola ʻa Sihova: “ʻE tupu meiate ia ha ngaahi tuʻi ʻo ha ngaahi kakai.” (Senesi 17:16) Ko ia ai, naʻe lotu ʻa ʻAná ʻo fekauʻaki mo ha tuʻi ʻi he kahaʻú.

3:3​—Naʻe mohe moʻoni ʻa Sāmiuela ʻi he Potu Toputapú? ʻIkai, naʻe ʻikai te ne mohe ai. Ko Sāmiuelá ko ha Līvai ia ʻo e fāmili ʻikai taulaʻeiki ʻo e kau Kōhaté. (1 Kalonikali 6:​33-38) ʻI heʻene peheé, naʻe ʻikai fakaʻatā ia ke ne “hu . . . ʻo momoʻi hila ki he ngaahi meʻa tapu.” (Nomipa 4:​17-20) Ko e konga pē ʻo e temipalé naʻá ne hū ki aí ko e lotoʻā tāpanekalé. Ko e feituʻu ia kuo pau naʻá ne mohe aí. ʻOku hā mahino naʻe toe mohe ʻa ʻĪlai ʻi ha feituʻu ʻi he lotoʻaá. Ko e foʻi lea “ʻa ia naʻe ʻi ai ʻa e Aake” ʻoku hā mahino ko e ʻuhingá ki he feituʻu ʻo e tāpanekalé.

7:​7-9, 17​—Ko e hā naʻe foaki ai ʻe Sāmiuela ha feilaulau tutu ʻi Misipā pea fokotuʻu ha ʻōlita ʻi Lamá, koeʻuhi ko e ngaahi feilaulaú naʻe pau ke foaki ia ʻi ha tuʻunga tuʻumaʻu ʻi he feituʻu pē naʻe fili ʻe Sihová? (Teutalonome 12:​4-7, 13, 14; Siosiua 22:19) Hili hono toʻo ʻa e ʻAʻake toputapú mei he tāpanekale ʻi Sailó, naʻe ʻikai kei hā mahino ʻa e ʻi ai ʻa Sihová. Ko ia ʻi he tuʻunga ko e fakafofonga ʻa e ʻOtuá, naʻe foaki ai ʻe Sāmiuela ha feilaulau tutu ʻi Misipā pea toe fokotuʻu ha ʻōlita ʻi Lama. Naʻe hā mahino ʻa e hōifua ʻa Sihova ki he ngaahi ngāué ni.

Ngaahi Lēsoni kia Kitautolu:

1:​11, 12, 21-​23; 2:​19. Ko e fakakaukau ʻi he lotu ʻa ʻAná, ko ʻene anga-fakatōkilaló, ko ʻene houngaʻia ki he anga-lelei ʻa Sihová mo ʻene ʻofa fakafaʻē fuoloá ʻoku alafaʻifaʻitakiʻanga ia ki he kakai fefine manavahē-ʻOtua kotoa pē.

1:8. Ko ha faʻifaʻitakiʻanga moʻoni ē naʻe fokotuʻu ʻe ʻElikena ʻi hono fakaivimālohiʻi ʻa e niʻihi kehé ʻaki ʻa e ngaahi leá! (Siope 16:5) Naʻá ne ʻuluaki ʻeke ki he loto-mafasia ko ʻAná ʻa e fehuʻi ʻikai tukuakiʻi: “Ko e ha ʻoku hohaʻa ai ho loto?” Naʻe fakaʻaiʻai ʻa ʻAna ʻe he meʻá ni ke ne talanoa ai fekauʻaki mo ʻene ngaahi ongoʻí. Naʻe fakapapauʻi ange leva ai ʻe ʻElikena ʻa ʻene ʻofá, ʻi heʻene pehē: “ʻIkai ʻoku ou mahuʻinga kiate koe ʻi ha tama ʻe hongofulu?”

2:​26; 3:​5-8, 15, 19. ʻI he pipiki ki heʻetau ngāue kuo vaheʻi mai ʻe he ʻOtuá, ʻi he ngāueʻaongaʻaki ʻa e akoʻi fakalaumālié, pea ʻi he anga-fakaʻapaʻapa mo anga-ʻapasiá, ʻoku tau hoko ai ʻo “ʻofeina” fakatouʻosi ʻe he ʻOtuá pea ʻe he tangatá.

4:​3, 4, 10. Naʻa mo ha meʻa ʻoku māʻoniʻoni ʻo hangē ko e ʻaʻake ʻo e kovinānité naʻe ʻikai hoko ia ko ha meʻa ʻomi monū ki ha maluʻi. Kuo pau ke tau ‘taʻofi kitautolu mei he tauhi aitolí.’—1 Sione 5:21.

ʻULUAKI TUʻI ʻO ʻISILELÍ—KO HA LAVAMEʻA PE KO HA TAʻELAVAMEʻA?

(1 Samiuela 8:1–​15:35)

ʻOku faitōnunga ʻa Sāmiuela kia Sihova ʻi he kotoa ʻo ʻene moʻuí, ka ʻoku ʻikai ke ʻaʻeva ʻa hono ngaahi fohá ʻi he ngaahi founga fakaʻotuá. ʻI he kole ʻe he kau mātuʻa ʻIsilelí ha tuʻi fakaetangatá, ʻoku fakaʻatā ʻe Sihova ke ʻi ai hanau tuʻi. ʻOku muimui ʻa Sāmiuela ʻi he tataki ʻa Sihová pea pani ʻa Saula, ko ha Penisimani fakaʻofoʻofa, ke hoko ko e tuʻi. ʻOku fakaivimālohiʻi ʻe Saula ʻa hono tuʻunga ko e tuʻí ʻaki ʻene ikunaʻi ʻa e kau ʻĀmoní.

ʻOku taaʻi ʻe he foha loto-toʻa ʻo Saula ko Sionatané ha kau tau Filisitia. ʻOku haʻu ʻa e kau Filisitiá ki ʻIsileli mo ha fuʻu kau tau tokolahi fau. ʻOku ilifia ʻa Saula peá ne fai ʻe ia tonu ʻi he talangataʻa ha feilaulau tutu. ʻI hono ʻave pē ʻene tokotaha toʻo mahafu taú, ʻoku ʻohofi ʻe Sionatane ha toe nofoʻanga Filisitia ʻe taha. Kae kehe, ko e fuakava fakavave ʻa Saulá, ʻoku fakavaivaiʻi ai ʻa e ikuna ʻa e kau taú. ʻOku ʻalu ʻa Saula ʻo “fai tau ʻi he potu kotoa pe” ki hono ngaahi filí. (1 Samiuela 14:47) Neongo ia, ʻi hono ikunaʻi ʻa e kau ʻAmalekí, ʻokú ne talangataʻa ai kia Sihova ʻaki hono fakahaofi ʻa e meʻa naʻe “tuku liʻaki atu.” (Livitiko 27:​28, 29) Ko ia ai, ʻoku siʻaki ʻe Sihova ʻa Saula ʻi hono tuʻunga ko e tuʻí.

Tali ki he Ngaahi Fehuʻi Fakatohitapú:

9:9​—Ko e hā ʻoku mahuʻinga fekauʻaki mo e kupuʻi lea “ko e palofita ʻo onoponi naʻe ui muʻa ko e mataloloa”? ʻOku fakahaaʻi nai ʻi he ngaahi leá ni ʻi he hoko ʻa e kau palōfitá ʻo ʻiloa ange ʻi he ngaahi ʻaho ʻo Sāmiuelá pea ʻi he lolotonga ʻa e kuonga ʻo e ngaahi tuʻi ʻi ʻIsilelí, ko e foʻi lea “mataloloa” naʻe hoko ʻo fetongiʻaki ia ʻa e foʻi lea “palofita.” ʻOku vakai kia Sāmiuela ko e ʻuluaki ia ʻi he laine ʻo e kau palōfitá.​—Ngāue 3:​24.

14:​24-​32, 44, 45​—Naʻe mole meia Sionatane ʻa e hōifua ʻa e ʻOtuá ʻi heʻene kai hone ʻo maumauʻi ʻa e fuakava ʻa Saulá? Ko e tōʻonga ko ení ʻoku ʻikai hā ngali naʻá ne ʻai ʻa Sionatane ke ʻikai hōifua ki ai ʻa e ʻOtuá. ʻUluakí, naʻe ʻikai ke ʻilo ʻa Sionatane fekauʻaki mo e fuakava ʻa ʻene tamaí. ʻIkai ngata aí, ko e fuakavá, ʻi hono ueʻi ʻe ha faivelenga loi pe ʻe ha fakakaukau hala ki he mafai fakatuʻí, naʻá ne fakatupunga ʻa e ngaahi palopalema ki he kakaí. Naʻe lava fēfē ke maʻu ʻe ha fuakava pehē ʻa e hōifua ʻa e ʻOtuá? Neongo naʻe loto-lelei ʻa Sionatane ke ne tali ʻa e ngaahi nunuʻa ʻo hono maumauʻi ʻa e fuakavá, naʻe fakahaofi ʻa ʻene moʻuí.

15:6​—Ko e hā naʻe maʻu ai ʻe he haʻa Keiní ʻa e fakaʻatuʻi makehe meia Saulá? Ko e haʻa Keiní ko e ngaahi foha kinautolu ʻo e tamai-ʻi-he-fono ʻa Mōsesé. Naʻa nau tokoniʻi ʻa e kau ʻIsilelí hili ʻenau mavahe mei Moʻunga Sainaí. (Nomipa 10:​29-​32) ʻI he fonua ko Kēnaní, naʻe toe nofo ai ʻa e haʻa Keiní fakataha mo e ngaahi foha ʻo Siutá ʻi ha vahaʻa taimi. (Fakamaau 1:16) Neongo naʻa nau nofo ki mui ʻi he lotolotonga ʻo e kau ʻAmalekí mo e toe kakai kehekehe, naʻe kei ʻi he tuʻunga kaumeʻa ai pē ʻa e haʻa Keiní mo ʻIsileli. Naʻe ʻuhinga lelei leva ʻa hono fakahaofi ʻe Saula ʻa e haʻa Keiní.

Ngaahi Lēsoni kia Kitautolu:

9:​21; 10:​22, 27. Ko e anga-fakanānā mo e anga-fakatōkilalo naʻe maʻu ʻe Saula ʻi heʻene ʻuluaki hoko ko e tuʻí naʻá ne maluʻi ia mei he ngāue fakavave ʻi he taimi naʻe ʻikai ke tali ai ʻe ha “hakoʻi Pileali” ʻa hono tuʻunga-tuʻí. Ko ha maluʻi ē ko e fakakaukau peheé mei he ngaahi ngāue taʻeʻuhingá!

12:​20, 21. ʻOua ʻaupito ʻe fakaʻatā ʻa e “ngaahi ngeʻesi meʻa,” hangē ko e falala ki he tangatá, falala ki he mālohi fakakautau ʻo e ngaahi puleʻangá, pe tauhi-ʻaitolí, ke ne afeʻi koe mei he tauhi kia Sihová.

12:24. Ko ha kī ki hono tauhi maʻu ʻa e manavahē ʻapasia kia Sihova pea tauhi kiate ia ʻaki ʻa e kotoa ʻo hotau lotó ko e “vakai ʻene fai meʻa lahi” maʻa hono kakaí ʻi he kuonga muʻá pea pehē ki onopooni.

13:​10-​14; 15:​22-​25, 30. Maluʻi mei he ʻafungí—ʻi hono fakahaaʻi fakafou ʻi he ngaahi ngāue talangataʻá pe ʻi ha fakakaukau hīkisia.​—Palovepi 11:2.

FILI HA TAMASIʻI TAUHI-SIPI KI HE TUʻUNGA-TUʻÍ

(1 Samiuela 16:​1–31:13)

ʻOku pani ʻe Sāmiuela ʻa Tēvita ʻi he matakali Siutá ke hoko ko e tuʻi ʻi he kahaʻú. Taimi nounou mei ai, ʻoku tāmateʻi ʻe Tēvita ʻa e saiāniti Filisitia ko Kolaiaté ʻaki ha foʻi maka-tā pē ʻe taha. ʻOku hoko ha haʻi ʻo e kaumeʻa ʻi he vahaʻa ʻo Tēvita mo Sionatané. ʻOku tuku ʻe Saula ʻa Tēvita ki heʻene kau pāteʻi taú. ʻI he tali ki he ngaahi ikuna lahi ʻa Tēvitá, ʻoku hiva ʻa e kau fefine ʻIsilelí: “A e ta ʻe Saula ʻene tokoʻi afe, Mo e ngaahi mano ʻa Tevita e.” (1 Samiuela 18:7) ʻI he fonu he meheká, ʻoku feinga ʻa Saula ke tāmateʻi ʻa Tēvita. Hili hano ʻohofi tuʻo tolu ʻe Saula, ʻoku hola ai ʻa Tēvita ʻo ne hoko ko ha tokotaha hola takai holo.

Lolotonga hono ngaahi taʻu ʻi he tuʻunga ko ha tokotaha hola holó, ʻoku fakahaofi tuʻo ua ai ʻe Tēvita ʻa e moʻui ʻa Saulá. ʻOkú ne toe fetaulaki ai pea iku ʻo ne mali mo ʻApikale hoihoifua. ʻI he haʻu ʻa e kau Filisitiá ki ʻIsilelí, ʻoku huhū ai ʻa Saula kia Sihova. Ka kuo liʻaki ia ʻe Sihova. Kuo mate ʻa Sāmiuela. ʻI he feinga vavalé, ʻoku kumi faleʻi ai ʻa Saula ki ha fefine fakahaʻele faʻahikehe, ʻo tala ange ai ʻe he fefiné ʻe tāmateʻi ia ʻi he tau mo e kau Filisitiá. Lolotonga ʻa e tau ko iá, ʻoku kafo lahi ai ʻa Saula pea tāmateʻi ai mo hono ngaahi fohá. ʻOku ʻosi ʻa e talanoá ʻi he mate taʻelavameʻa ʻa Saulá. ʻOku kei toitoi pē ʻa Tēvita.

Tali ki he Ngaahi Fehuʻi Fakatohitapú:

16:14​—Ko e hā ʻa e laumālie kovi naʻá ne fakamanavaheeʻi ʻa Saulá? Ko e laumālie kovi naʻá ne toʻo meia Saula ʻa ʻene nongá ko e hehema kovi ʻa hono ʻatamaí mo e lotó—ko ʻene holi ʻi loto ke faihalá. ʻI hono toʻo ʻe Sihova ʻa hono laumālie māʻoniʻoní, naʻe mole ai meia Saula ʻa ʻene maluʻí pea hoko ai ʻo puleʻi ia ʻe hono laumālie koví tonu. Koeʻuhi naʻe fakaʻatā ʻe he ʻOtuá ʻa e laumālie ko iá ke ne fetongi ʻa Hono laumālie māʻoniʻoní, ʻoku ui ai ʻa e laumālie kovi ko ení ko “ha laumalie kovi meia Sihova.”

17:​55-58​—ʻI he vakai ki he 1 Samiuela 16:​17-23, ko e hā naʻe ʻeke ai ʻe Saula pe ko e foha ʻo hai ʻa Tēvitá? Ko e fakaʻekeʻeke ʻa Saulá naʻe ʻikai fekauʻaki pē mo e hingoa ʻo e tamai ʻa Tēvitá. ʻOku ngalingali, naʻá ne loto ke ʻiloʻi ʻa e faʻahinga tangata naʻá ne tauhi hake ha tamasiʻi ʻa ia naʻe toki ʻosi ʻene lavaʻi ʻa e ngāue kāfakafa ʻo hono fakapoongi ʻo e saiānití.

Ngaahi Lēsoni kia Kitautolu:

16:​6, 7. ʻI he ʻikai hoko ʻo ueʻi ʻe he fōtunga hāmai ʻo e niʻihi kehé pe fakamāuʻi fakavave kinautolú, kuo pau ke tau feinga ke sio kia kinautolu ʻi he anga ʻo e sio ʻa Sihova kia kinautolú.

17:​47-​50. ʻE lava ke tau fehangahangai loto-toʻa mo e fakafepakí pe fakatanga mei he ngaahi fili hangē ko Kolaiaté koeʻuhi “he ʻoku ʻa Sihova ʻa e tau.”

18:​1, 3; 20:​41, 42. ʻOku lava ke maʻu ʻa e ngaahi kaumeʻa moʻoni ʻi he lotolotonga ʻo e faʻahinga ʻoku nau ʻofa kia Sihová.

21:​12, 13. ʻOku ʻamanekina mai ʻe Sihova ke tau ngāueʻaki hotau ngaahi tufakanga mo e malava fakaʻatamaí ke fekuki ai mo e ngaahi tuʻunga faingataʻa ʻi he moʻuí. Kuó ne ʻomai kia kitautolu ʻa ʻene Folofola fakamānavaʻí, ʻa ia ʻoku ʻomai ai ʻa e fakapotopoto, ʻilo mo e malava fakaefakakaukau. (Palovepi 1:4) ʻOku tau toe maʻu foki ʻa e tokoni ʻa e kau mātuʻa Kalisitiane kuo fakanofó.

24:6; 26:11. Ko ha faʻifaʻitakiʻanga lelei moʻoni ē ʻo e ʻapasia moʻoni ʻoku ʻomai ʻe Tēvita ki he pani ʻa Sihová!

25:​23-​33. ʻOku alafaʻifaʻitakiʻanga ʻa e fakapotopoto ʻa ʻApikalé.

28:​8-​19. ʻI heʻenau ngaahi feinga ke takihalaʻi pe fakatupu maumau ki he kakaí, ʻoku lava ke fakangalingali ʻa e ngaahi laumālie fulikivanú ko ha faʻahinga tāutaha kuo mate moʻoni. Kuo pau ke tau hanganaki ʻatā mei he founga kotoa pē ʻo e fakahaʻele faʻahikehé.​—Teutalonome 18:​10-​12.

30:​23, 24. Ko e fili ko ení, makatuʻunga ʻi he Nomipa 31:​27, ʻoku fakahaaʻi ai ʻoku fakamahuʻingaʻi ʻe Sihova ʻa e faʻahinga ʻoku nau ngāue ʻi he ngaahi ngafa tokoni ʻi he fakatahaʻangá. Ko ia ai, ko e hā pē meʻa ʻoku tau faí, tau “ngaue fie ngaue ki ai, he ko e ngaue ki he ʻEiki, ʻo ʻikai ki he kakai.”—Kolose 3:23.

Ko e Hā ʻOku ‘Lelei Ange ʻi he Fai Feilaulaú’?

Ko e hā ʻa e moʻoni tefito ʻoku fakamamafaʻi ʻe he ngaahi meʻa naʻe hokosia ʻe ʻĪlai, Sāmiuela, Saula mo Tēvitá? Ko e meʻá ni: “ʻOku lelei ʻa e talangofua ʻi he fai feilaulau, pea ko e fakaongo ʻi he ngakoʻi sipi tangata. He ko e angahala fakafiemana ʻa e angatuʻu, pea ko e talangataʻa ko e fakahiteni tofu pe mo e tauhi aitoli.”—1 Samiuela 15:​22, 23.

Ko ha monū ē ʻoku tau maʻú ke kau ki he ngāue malangaʻi ʻo e Puleʻangá mo e ngaohi-ākongá ʻi māmani lahi! ʻI heʻetau ʻoatu kia Sihova ‘hotau loungutú ko e fetongi ʻo e fanga pulú,’ kuo pau ke tau fai ʻetau lelei tahá ke talangofua ki he tataki ʻokú ne ʻomai fakafou heʻene Folofola kuo tohí pea mo e konga fakaemāmani ʻo ʻene kautahá.—Hosea 14:2; Hepelu 13:15.

[Fakamatala ʻi lalo]

[Fakatātā ʻi he peesi 23]

Naʻe liliu ʻa e ʻuluaki tuʻi ʻo ʻIsilelí mei ha tokotaha-pule anga-fakatōkilalo mo anga-fakanānaá ki ha pule hīkisia mo ʻafungi

[Fakatātā ʻi he peesi 24]

Ko e hā ʻe lava ke tau falala ki ai ʻi heʻetau fehangahangai mo e fakafepaki mei he ngaahi fili hangē ko Kolaiaté?