ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi ʻUluaki Kalonikalí

KUO mahili atu ʻa e taʻu nai ʻe 77 mei he foki ʻa e kau Siú mei honau fakaheeʻi ki Pāpiloné, ki honau fonua tupuʻangá. Ko e temipale ko ia naʻe toe langa ʻe Kōvana Seluipēpelí kuo tuʻu ia he taimi ko ení ʻo feʻunga mo e taʻu ʻe 55. Ko e ʻuhinga tefito ki he toe foki ʻa e kau Siú ke toe fakafoʻou ʻa e lotu moʻoní ʻi Selusalema. Kae kehe, naʻe ʻikai ha faivelenga ʻa e kakaí ki he lotu ʻa Sihová. ʻOku ʻi ai ha fiemaʻu fakavavevave ʻo e fakalototoʻa, pea ko e meʻa tofu pē ia ʻoku ʻomai ʻi he tohi Fakatohitapu ʻo e ʻUluaki Kalonikalí.

Tuku kehe ʻa e ngaahi lēkooti laine hohokó, ʻoku kāpui ʻe he ʻUluaki Kalonikalí ha vahaʻa taimi ko e taʻu nai ʻe 40, mei he mate ʻa Tuʻi Saulá ki he mate ʻa Tuʻi Tēvitá. ʻOku ʻi ai ʻa e tui ko e taulaʻeiki ko ʻĒselá naʻá ne hiki ʻa e tohí ni ʻi he taʻu 460 K.M. Ko e ʻUluaki Kalonikalí ʻoku mahuʻinga ia kiate kitautolu koeʻuhí ʻokú ne ʻomai ʻa e fakamaama ki he lotu ʻi he temipalé pea ʻomai mo e ngaahi fakaikiiki fekauʻaki mo e laine hohoko ʻo e Mīsaiá. ʻI he hoko ko ha konga ʻo e Folofola fakamānavaʻi ʻa e ʻOtuá, ko ʻene pōpoakí ʻokú ne ʻai ke mālohi ʻetau tuí pea fakaleleiʻi ai ʻetau mahinoʻi ʻo e Tohi Tapú.—Hepelu 4:12.

KO HA LĒKOOTI MOHU ʻUHINGA ʻO E NGAAHI HINGOÁ

(1 Kalonikali 1:1–​9:​44)

Ko e hokohoko ʻo e tohi hohoko fakaikiiki ʻoku tānaki ʻe ʻĒselá ʻoku fiemaʻu ia ʻi ha ʻuhinga ʻikai siʻi hifo he tolú: ke fakapapauʻi ko e kau tangata pē kuo fakamafaiʻí ʻoku nau ngāue ʻi he tuʻunga taulaʻeikí, ke tokoni ki hono fakapapauʻi ʻo e tofiʻa fakamatakalí, pea ke fakatolonga ʻa e lēkooti ʻo e laine hohoko ʻoku taki atu ai ki he Mīsaiá. ʻOku fakafehokotaki ʻe he lēkōtí ʻa e kau Siú mo honau kuohilí ʻo foki ai ki he ʻuluaki tangatá. ʻOku ʻi ai ʻa e toʻutangata ʻe hongofulu meia ʻĀtama kia Noa, pea ko e toe toʻutangata ʻe hongofulu kia ʻĒpalahame. Hili hono fakahokohoko ʻa e ngaahi foha ʻo ʻIsimeʻelí, ko e ngaahi foha ʻo e sinifu ʻa ʻĒpalahame ko Kētulá, mo e ngaahi foha ʻo ʻĪsoá, ʻoku fakahangataha ʻa e fakamatalá ki he laine ʻo e hako ʻo e ngaahi foha ʻe toko 12 ʻo ʻIsilelí.—1 Kalonikali 2:1.

Ko e ngaahi hako ʻo Siutá ʻoku fai ki ai ʻa e fakamatala lahi koeʻuhi ʻoku haʻu mei ai ʻa e laine fakatuʻi ʻo Tuʻi Tēvitá. ʻOku ʻi ai ʻa e toʻutangata ʻe 14 meia ʻĒpalahame kia Tēvita pea ko e toe toʻutangata ʻe 14 ki he takiheeʻi ki Pāpiloné. (1 Kalonikali 1:​27, 34; 2:​1-15; 3:​1-17; Mātiu 1:17) ʻOku fakahokohoko leva ʻe ʻĒsela ʻa e ngaahi hako ʻo e ngaahi matakali ʻi he tafaʻaki hahake ʻo Sioataní, ʻo hoko atu ai ʻa e laine hohoko ʻo e ngaahi foha ʻo Līvaí. (1 Kalonikali 5:​1-24; 6:1) ʻOku hoko mai leva ai ha fakamatala fakanounou fakaikiiki ʻo e niʻihi ʻo e ngaahi matakali kehe ʻi he hihifo ʻo e Vaitafe Sioataní pea mo e laine ʻo Penisimaní. (1 Kalonikali 8:1) ʻOku toe fakahokohoko ai ʻa e ngaahi hingoa ʻo e ʻuluaki kau nofo ʻi Selusalema hili ʻa e nofo pōpula ʻi Pāpiloné.—1 Kalonikali 9:​1-16.

Tali ki he Ngaahi Fehuʻi Fakatohitapú:

1:​18​—Ko hai ʻa e tamai ʻa Salá​—ko Kēnani pe ko ʻAfakisate? (Luke 3:​35, 36) Ko ʻAfakisaté ko e tamai ia ʻa Salá. (Senesi 10:24; 11:12) Ko e foʻi lea “Kenani” ʻi he Luke 3:36 ʻoku ngalingali ko ha mioʻi ia ʻo e foʻi lea “Kalitiá.” Kapau ko ia, ko e muʻaki konga tohí naʻe pehē nai, “ko e foha ʻo e Kalitia ko ʻAfakisaté.” Pe mahalo nai ko e ongo hingoa Kēnani mo e ʻAfakisaté ʻoku ʻuhinga iá ki he tokotaha tatau. ʻOku ʻikai totonu ke tukunoaʻi ʻa e foʻi moʻoni ko ia ko e kupuʻi lea “foha ʻo Kēnani” ʻoku ʻikai ke maʻu ia ʻi he ngaahi maniusikilipi ʻe niʻihi.—Luke 3:36, NW, fakamatala ʻi laló.

2:​15​—Ko Tēvita ʻa e foha hono fitu ʻo Sesé? ʻIkai. Naʻe toko valu ʻa e ngaahi foha ʻo Sesé, pea ko Tēvita ʻa e siʻisiʻi tahá. (1 Samiuela 16:​10, 11; 17:12) Ko e taha ʻo e ngaahi foha ʻo Sesé ʻoku hā mahino naʻe mate ia ʻo ʻikai haʻane fānau. Koeʻuhi ko e foha ko iá ʻe ʻikai haʻane kaunga ki he ngaahi lēkooti laine hohokó, naʻe toʻo ʻe ʻĒsela ʻa hono hingoá.

3:​17​—Ko e hā ʻoku lave ai ʻi he Luke 3:​27 ki he foha ʻo Sēkonaia ko Saletilí ko e foha ʻo Nēlaí? Ko Sēkonaiá ko e tamai ia ʻa Saletilí. Kae kehe, ʻoku ngalingali naʻe ʻoange ʻe Nēlai ʻa hono ʻofefiné kia Saletili ke hoko ko hano uaifi. Naʻe lave ʻa Luke ki he foha-ʻi-he-fono ʻo Nēlaí ko e foha ʻo Nēlai, ʻo hangē pē ko ia naʻá ne fai ʻi he tuʻunga ʻo Siosefá, ʻi hono ui ia ko e foha ʻo e tamai ʻa Melé, ʻa Hēlai.—Luke 3:23.

3:​17-​19​—Naʻe anga-fēfē ʻa e felāveʻi ʻa Seluipēpeli, Petaia, pea mo Saletilí? Ko Seluipēpelí ko ha foha ia ʻo Petaia, ʻa ia ko ha tokoua ʻo Saletili. Neongo ia, ʻoku ui ʻi he taimi ʻe niʻihi ʻe he Tohi Tapú ʻa Seluipēpeli ko e foha ʻo Saletili. (Mātiu 1:12; Luke 3:27) Naʻe lava ke pehē ení koeʻuhi naʻe mate ʻa Petaia pea naʻe tauhi hake ʻe Saletili ʻa Seluipēpeli. Pe mahalo koeʻuhi naʻe mate ʻa Saletili ʻo ʻikai haʻane fānau, naʻe fakahoko ai ʻe Petaia ʻa e mali tokoua-ʻi-he-fonó, pea ko e ʻuluaki-fānau ʻa Seluipēpeli ʻi he mali ko iá.—Teutalonome 25:​5-10.

5:​1, 2​—Ko e hā ʻene ʻuhinga kia Siosifa ʻa hono maʻu ʻa e totonu ʻo e ʻuluaki fohá? Naʻe ʻuhinga iá naʻe maʻu ʻe Siosifa ha ʻinasi lōua ʻo e tofiʻá. (Teutalonome 21:17) Naʻá ne hoko ai ko e tamai ʻa e matakali ʻe ua—ko ʻIfalemi mo Manase. Ko e ngaahi foha kehe ʻo ʻIsilelí naʻa nau hoko ko e tamai taki taha ʻa e matakali taki taha.

Ngaahi Lēsoni kia Kitautolu:

1:1–9:​44. Ko e ngaahi laine hohoko ʻo e kakai moʻoní ʻoku fakamoʻoniʻi ai ko e fokotuʻutuʻu kotoa ʻo e lotu moʻoní ʻoku makatuʻunga ia, ʻikai ʻi he talatupuʻa, ka ʻi he moʻoniʻi meʻa.

4:​9, 10. Naʻe tali ʻe Sihova ʻa e lotu tōtōivi ʻa Siepesi ki hano fakalahi ʻi he tuʻunga melino ʻa hono vahefonuá koeʻuhi ke lava ʻo nofo ai ʻa e kakai manavahē-ʻOtua tokolahi ange. Ko kitautolu foki ʻoku fiemaʻu ke tau fai ha ngaahi lotu fakamātoato ki ha fakalahi ʻi heʻetau kau faivelenga ki he ngāue ngaohi-ākongá.

5:​10, 18-​22. ʻI he ngaahi ʻaho ʻo Tuʻi Saulá, ko e ngaahi matakali ʻi he hahake ʻo Sioataní naʻa nau ikunaʻi ʻa e haʻa Hekaʻaá neongo ko e ngaahi matakalí ni naʻe laka hake honau tokolahí ʻi he toko 2 ki he toko 1. Naʻe hoko ení koeʻuhi ko e kau tangata toʻa ʻo e ngaahi matakali ko ení naʻa nau falala kia Sihova pea hanga kiate ia ki ha tokoni. Tau falala kakato kia Sihova ʻi heʻetau fakahoko ʻetau faitau fakalaumālie ki he ngaahi fili ʻoku tokolahi mamaʻo ange ʻo ikuʻingataʻá.—Efeso 6:​10-17.

9:​26, 27. Ko e kau leʻo matapā Līvaí naʻa nau maʻu ha lakanga falalaʻanga lahi. Naʻe ʻoange kiate kinautolu ʻa e kī ki he hūʻanga ki he ngaahi feituʻu toputapu ʻo e temipalé. Naʻa nau falalaʻanga ʻi hono fakaava ʻa e ngaahi matapaá ʻi he ʻaho taki taha. Kuo tuku mai kiate kitautolu ʻa e fatongia ko hono kumi ʻa e kakai ʻi hotau feituʻu ngāué pea tokoniʻi kinautolu ke nau hoko ʻo lotu kia Sihova. ʻIkai ʻoku totonu ke tau hoko tatau tofu pē ʻo falala ki ai mo alafalalaʻanga ʻo hangē ko e kau leʻo matapā Līvaí?

PULE ʻA TĒVITA KO E TUʻI

(1 Kalonikali 10:1–​29:30)

ʻOku kamata ʻa e talanoá ʻaki ʻa e fakamatala kia Tuʻi Saula mo hono foha ʻe toko tolu naʻa nau mate ʻi he tau mo e kau Filisitiá ʻi Moʻunga Kilipoa. Ko Tēvita, ʻa e foha ʻo Sesé, ʻoku fakanofo tuʻi ia ki he matakali ʻo Siutá. ʻOku haʻu ʻa e kau tangata mei he ngaahi matakalí kotoa ki Hepeloni ʻo fakanofo tuʻi ia ki ʻIsileli kotoa. (1 Kalonikali 11:​1-3) Taimi nounou ʻi he hili iá, ʻokú ne kapa ʻa Selusalema. Ki mui ai, ʻoku ʻomai ʻe he kau ʻIsilelí ʻa e ʻaʻake ʻo e kovinānité ki Selusalema “mo e mavava, mo e ifi koaneti mo . . . ongo atu fakataha mo e helefilo mo e haape.”—1 Kalonikali 15:28.

ʻOku fakahaaʻi ʻe Tēvita ha holi ke langa ha fale maʻá e ʻOtua moʻoní. ʻI hono tuku ʻa e monū ko iá kia Solomoné, ʻoku fai ai ʻe Sihova ha fuakava mo Tēvita ki ha Puleʻanga. ʻI hono fakahoko ʻe Tēvita ʻa ʻene feingatau mo e ngaahi fili ʻo ʻIsilelí, ʻoku ʻoange ʻe Sihova ke ne ikuna hokohoko. Ko ha tohi-kakai taʻefakalao ʻoku iku ai ki he mate ʻa e toko 70,000. Hili hono maʻu ha tataki fakaeʻāngelo ke fokotuʻu ha ʻōlita kia Sihová, ʻoku fakatau ʻe Tēvita ha konga kelekele meia ʻOlanani ko e Siepusí. ʻOku kamata fai ʻe Tēvita ha ‘tokonaki lahi aubito’ ki hono langa ha fale “lelei lahi aubito” kia Sihova ʻi he feituʻu ko iá. (1 Kalonikali 22:​5, PM) ʻOku fokotuʻutuʻu ʻe Tēvita ʻa e ngaahi ngāue faka-Līvaí, ʻa ia ʻoku fakamatalaʻi fakaikiiki lahi ange heni ʻi ha toe feituʻu kehe ʻi he Tohi Tapú. ʻOku fai ʻe he tuʻí mo e kakaí ʻa e ngaahi tokoni nima-homo ki he temipalé. Hili ha pule taʻu ʻe 40, ʻoku mate ʻa Tēvita “kuo lahi hono aho, mo ne koloaia, mo ogoogolelei: bea [ʻoku] fetogi ia i he bule e hono foha ko Solomone.”—1 Kalonikali 29:​28, PM.

Tali ki he Ngaahi Fehuʻi Fakatohitapú:

11:11​—Ko e hā ʻoku toko 300 ai ʻa e tokolahi ʻo e faʻahinga naʻe tāmateʻí ʻo ʻikai ko e toko 800 ʻo hangē ko ia ʻoku ʻi he fakamatala tatau ʻi he 2 Samiuela 23:8? Ko e ʻulu ʻo e kau tangata toʻa taha ʻe toko tolu ʻa Tēvitá ko ʻIasopeami, pe Siosepi-posipati. Ko e ongo tangata toʻa kehe ʻe toko uá ko ʻEliesa mo Sama. (2 Samiuela 23:​8-11) Ko e ʻuhinga ki he faikehekehe ʻi he ongo fakamatalá ʻoku ngalingali ʻokú na ʻuhingá ki he ongo ngāue kehekehe naʻe fakahoko ʻe he tangata tatau.

11:​20, 21​—Ko e hā ʻa e tuʻunga ʻo ʻApisaí ʻi he fekauʻaki mo e kau tangata toʻa tefito ʻe toko tolu ʻa Tēvitá? Ko ʻApisaí naʻe ʻikai ko e taha ia ʻo e kau tangata toʻa taha ʻe toko tolu ʻa ia naʻa nau tauhi kia Tēvitá. Kae kehe, hangē ko ia ʻoku fakahaaʻi ʻi he 2 Samiuela 23:​18, 19 (NW), ko e ʻulu ia ʻo e kau pāteʻi tau ʻe toko 30 pea naʻá ne makehe lahi ange ʻi ha taha pē ʻo kinautolu. Ko e ongoongo ʻo ʻApisaí naʻe fetohotohoi mo e ongoongo ʻo e kau tangata toʻa tefito ʻe toko tolú koeʻuhí naʻá ne fakahoko ha ngāue mālohi meimei tatau mo ia naʻe fai ʻe ʻIasopeamí.

12:8 (PM)​—ʻI he founga fē naʻe hangē ai ʻa e mata ʻo e kau pāteʻi tau Katá ko e “mata oe faga laione”? Ko e kau tangata toʻa ko ení naʻa nau ʻi he faʻahi ʻa Tēvitá ʻi he toafá. Naʻe tupu honau ʻulú ʻo loloa. ʻI he fulufulua honau kiá naʻa nau maʻu ai ha fōtunga fakailifia hangē ha laioné.

13:5​—Ko e hā ʻa e “Sihoa [pe vaitafe] Isipite”? Kuo fakakaukau ʻa e niʻihi ko e kupuʻi lea ko ení ʻoku ʻuhinga iá ki ha vaʻa ʻo e Vaitafe Nailá. Kae kehe, ʻoku mahinoʻi lahi ko e ʻuhinga ia ki he ‘vaitafe [pe teleʻa tafe mālohi] ʻo Isipite’ ko ha teleʻa fāsiʻi lōloa naʻá ne fakaʻilongaʻi ʻa e ngataʻanga fakatonga-hihifo ʻo e Fonua ʻo e Talaʻofá.—Nomipa 34:​2, 5; Senesi 15:18.

16:30 (NW)​—Ko e hā ʻa e ʻuhinga ʻo e “ngaahi langa lahi” ʻi he fekauʻaki mo Sihová? Ko e foʻi lea “ngaahi langa” ʻoku ngāueʻaki fakaefakatātā ia heni ke ne fakahaaʻi ʻa e manavahē anga-fakaʻapaʻapa mo e ʻapasia loloto kia Sihova.

16:​1, 37-​40; 21:​29, 30; 22:19​—Ko e hā ʻa e fokotuʻutuʻu ki he lotú naʻe kei ngāue ʻi ʻIsileli mei he taimi naʻe ʻomai ai ʻa e ʻAʻaké ki Selusalema ʻo aʻu ki he taimi naʻe langa ai ʻa e temipalé? ʻI he taimi naʻe ʻomai ai ʻe Tēvita ʻa e ʻAʻaké ki Selusalema pea tuku ʻi he loto tēniti naʻá ne ngaohí, naʻe ʻikai ke ʻi he tāpanekalé ʻa e ʻAʻaké ʻi he ngaahi taʻu lahi. Hili hono hikí, naʻe nofo ai pē ʻa e ʻAʻaké ʻi he tēniti ko ia ʻi Selusalemá. Ko e tāpanekalé naʻe ʻi Kipione ia, ʻa ia naʻe fakahoko ai ʻe he Taulaʻeiki Lahi ko Sātokí mo hono fanga tokouá ʻa e ngaahi feilaulau naʻe fakahaaʻi ʻe he Laó. Naʻe hokohoko atu ʻa e fokotuʻutuʻu ko ení ʻo aʻu ki he kakato ʻa e temipale ʻi Selusalemá. ʻI he maau ʻa e temipalé, naʻe ʻomai ʻa e tāpanekalé mei Kipione ki Selusalema, pea naʻe tuku ʻa e ʻAʻaké ʻi he Potu Toputapu ʻo e temipalé.—1 Tuʻi 8:​4, 6.

Ngaahi Lēsoni kia Kitautolu:

13:11. ʻI he ʻikai ʻita pea tukuakiʻi ʻa Sihova ʻi he ʻikai lava ʻetau ngaahi feingá, kuo pau ke tau ʻanalaiso ʻa e tuʻungá pea feinga ke sio ki he meʻa naʻá ne fakatupunga ʻa e taʻemalavá. ʻOku ʻikai ha veiveiua, naʻe fai ia ʻe Tēvita. Naʻá ne ako mei heʻene fehālaakí pea lavameʻa ki mui ai ʻi hono ʻave ʻa e ʻAʻaké ki Selusalema ʻo ngāueʻaki ʻa e founga totonú.a

14:​10, 13-​16; 22:​17-​19. ʻOku totonu ke tau fakaofiofi maʻu pē kia Sihova ʻi he lotu pea kumi ki heʻene tatakí ki muʻa ke fai ha feinga pē ʻa ia te ne uesia fakalaumālie kitautolú.

16:​23-​29. Ko e lotu kia Sihová ʻoku totonu ke hoko ia ko e meʻa ke tau ʻuluaki tokanga ki ai ʻi he moʻuí.

18:3. Ko Sihova ʻa e Tokotaha-Fakahoko ʻo ʻene ngaahi talaʻofá. Fakafou ʻia Tēvita, naʻá ne fakahoko ʻa ʻene talaʻofa ke ʻoange ki he hako ʻo ʻĒpalahamé ʻa e fonua kotoa ko Kēnaní, ʻo lele “mei he vaitafe ʻo Isipite ʻo aʻu ki he vaitafe lahi ko Eufaletesi.”—Senesi 15:18; 1 Kalonikali 13:5.

21:​13-​15. Naʻe fekauʻi ʻe Sihova ʻa e ʻāngeló ke ne taʻofi ʻa e malá koeʻuhi ʻokú Ne ongongofua ki he faingataʻaʻia ʻa Hono kakaí. Ko e moʻoni, “ʻoku lahi ʻaupito haʻána ʻaloʻofa.”b

22:​5, 9; 29:3-5, 14-​16. Neongo naʻe ʻikai fekauʻi ia ke ne langa ʻa e temipale ʻo Sihová, naʻe fakahāhā ʻe Tēvita ha laumālie nima-homo. Ko e hā hono ʻuhingá? Koeʻuhí naʻá ne ʻiloʻi ko e meʻa kotoa naʻá ne maʻú naʻe tupu ia mei he anga-lelei ʻa Sihová. Ko e ngaahi ongoʻi meimei tatau ʻo e houngaʻiá ʻoku totonu ke ne ueʻi kitautolu ke tau maʻu ha laumālie nima-homo.

24:​7-​18. Ko e fokotuʻutuʻu ʻo e lakanga taulaʻeiki ʻe 24 naʻe fokotuʻu ʻe Tēvitá naʻe fakahoko ia ʻi he taimi naʻe hā ai ʻa e ʻāngelo ʻa Sihová kia Sākalaia, ko e tamai ʻa Sione Papitaisó, ʻo fanongonongo ʻa e fanauʻi ka hoko mai ʻo Sioné. ʻI he hoko ko ha mēmipa ʻo e “lakanga ʻo Apaia,” naʻe fakahoko ʻe Sākalaia ʻi he taimi ko iá ʻa ʻene ngāue ʻi he temipalé. (Luke 1:​5, 8, 9) Ko e lotu moʻoní ʻoku felāveʻi ia mo e faʻahinga fakahisitōlia—ʻikai ko e faʻahinga​—fakaetalatupuʻa. ʻOku hoko ʻa e ngaahi tāpuakí mei heʻetau fāitaha mateaki mo e “tamaioeiki agatonu mo boto” ʻi he fekauʻaki mo e lotu fokotuʻutuʻu lelei ʻa Sihova he ʻaho ní.—Mātiu 24:​45, PM.

Tauhi kia Sihova ʻAki ʻa e “Laumalie Tonunga”

Ko e ʻUluaki Kalonikalí ʻoku ʻikai fekauʻaki pē ia mo e ngaahi laine hohokó. Ko ha toe talanoa ia ki hono ʻomai ʻe Tēvita ʻa e ʻaʻake ʻo e kovinānité ki Selusalemá, ki heʻene ngaahi fuʻu ikuná, ki he teuteu ki hono langa ʻo e temipalé, pea mo hono fokotuʻu ʻa e ngaahi lakanga ʻo e ngāue taulaʻeiki faka-Līvaí. Ko e meʻa kotoa ʻoku fakamatalaʻi ʻe ʻĒsela ʻi he ʻUluaki Kalonikalí kuo pau pē naʻe ʻaonga ki he kau ʻIsilelí, ʻi hono tokoniʻi kinautolu ke nau fakafoʻou ʻenau faivelenga ki he lotu ʻa Sihova ʻi he temipalé.

Ko ha faʻifaʻitakiʻanga lelei ē naʻe fokotuʻu ʻe Tēvita ʻi hono tauhi ʻa e lotu kia Sihová ke muʻomuʻa taha ʻi heʻene moʻuí! ʻI he ʻikai feinga ki ha ngaahi monū makehe maʻaná, naʻe feinga ʻa Tēvita ke fai ʻa e finangalo ʻo e ʻOtuá. ʻOku fakalototoʻaʻi kitautolu ke ngāueʻaki ʻa ʻene faleʻí ke tau tauhi kia Sihova “ʻaki ʻa e loto haohaoa mo e laumalie tonunga.”—1 Kalonikali 28:9.

[Fakamatala ʻi lalo]

[Saati/Fakatātā ʻi he peesi 8]

(Ki he konga tohi kuo fokotuʻu kakato, sio ki he tohi)

Ko e toʻutangata meia ʻĀtama kia Noá (taʻu ʻe 1,056)

4026 K.M. ʻĀtama

taʻu ʻe 130 ⇩

Seti

105 ⇩

ʻĪnosi

90 ⇩

Kēnani

70 ⇩

Mahalaleli

65 ⇩

Sēleti

162 ⇩

ʻĪnoke

65 ⇩

Mētuisela

187 ⇩

Lēmeki

182 ⇩

2970 K.M. Noa fanauʻi ʻo NOÁ

Ko e toʻutangata meia Noa kia ʻĒpalahamé (taʻu ʻe 952)

2970 K.M. Noa

taʻu ʻe 502 ⇩

Semi

100 ⇩

KO E LŌMAKÍ 2370 K.M.

ʻAfakisate

35 ⇩

Sala

30 ⇩

ʻĪpela

34 ⇩

Peleki

30 ⇩

Leʻu

32 ⇩

Seluki

30 ⇩

Nēhoa

29 ⇩

Tela

130 ⇩

2018 K.M. fanauʻi ʻo ʻĒPALAHAMÉ

Meia ʻĒpalahame kia Tēvita: ko e toʻutangata ʻe 14 (taʻu ʻe 911)

2018 K.M.ʻĒpalahame

taʻu ʻe 100

ʻAisake

60 ⇩

Sēkope

88n. ⇩

Siuta

⇩

Felesi

⇩

Heseloni

⇩

Lame

⇩

ʻAminatape

⇩

Naʻasoni

⇩

Salemone

⇩

Pōasi

⇩

ʻŌpeti

⇩

Sese

⇩

1107 K.M. fanauʻi ʻo TĒVITÁ