ʻOku Moʻoni Kiate Koe ʻa e ʻOtuá?

ʻI HE taimi ʻokú ke aʻusia ai ha ngaahi palopalema fakamamahi, ʻokú ke ʻunuʻunu loto-lelei ki he ʻOtuá ʻi ha lotu? Kapau ko ia, ʻokú ke ongoʻi ʻokú ke talanoa ki ha tokotaha moʻoni?

ʻI he lave ki heʻene Tamai fakahēvaní, naʻe pehē ʻe Sīsū Kalaisi: “ʻOku ʻi ai ha toko taha, ko e moʻoni, naʻa ne fekau mai au.” (Sione 7:​28) ʻIo, ko e tokotaha moʻoni ʻa e ʻOtua ko Sihová, pea ko e lotu kiate iá ʻoku hangē ia ko haʻate hanga ki hato kaumeʻa mātuʻaki ofi fakaetangata ki ha tokoni pe faleʻi. Ko e moʻoni, ke fanongo mai ʻa e ʻOtuá, kuo pau ke aʻusia ʻe heʻetau ngaahi lotú ʻa e ngaahi fiemaʻu Fakatohitapu ki he lotu ʻoku fakahōifuá. Hangē ko ení, kuo pau ke tau ʻunuʻunu fakatōkilalo ki he “Tokotaha-Fanongo ki he lotú” ʻo fakafou ʻi hono ʻAló, ʻa Sīsū Kalaisi.​—Sāme 65:​2, NW; 138:6; Sione 14:​6.

ʻE ongoʻi nai ʻe he niʻihi koeʻuhi ko e taʻehāmai ʻa e ʻOtuá, ʻoku ʻikai ko ha tokotaha ia. Kiate kinautolu, ʻe hā ngali ʻoku ʻikai ko ha tokotaha ʻa e ʻOtuá. Naʻa mo e kau Kalisitiane ʻe niʻihi ʻa ia kuo nau ako fekauʻaki mo e ngaahi ʻulungaanga fakaofo ʻo e ʻOtuá, te nau ʻilo nai ʻi he taimi ʻe niʻihi ʻoku faingataʻa ke mahino ko e tokotaha moʻoni ia. Ko e meʻa eni kuó ke hokosiá? Kapau ko ia, ko e hā ʻe lava ke tokoni ke ʻai ʻa e ʻOtua ko Sihová ke moʻoni kiate koé?

Ako ʻa e Ngaahi Konga Tohitapú

ʻOkú ke ako maʻu pē ʻa e ngaahi Konga Tohitapu Māʻoniʻoní? Ko ʻene hokohoko ange mo lahi ange ho taimi ʻokú ke ako ai ʻa e Tohitapú, ko ʻene moʻoni lahi ange ia ʻa e ʻOtua ko Sihová kiate koé. ʻE fakaivimālohi ai ʻa hoʻo tuí, ʻo ne ʻai ai koe ke ke malava ʻo ‘sio ki he Tuʻi Taʻehamaí.’ (Hepelu 11:​6, 27) ʻI he tafaʻaki ʻe tahá, ko hono ako tātātaha pe fakataimi pē ʻa e Tohitapú ʻoku ngalingali ʻe ʻikai te ne uesia mālohi ʻe ia ʻa hoʻo tuí.

Ke fakatātaaʻi: Sioloto atu naʻe fakahinohino koe ʻe hoʻo toketaá ke vali tuʻo ua ʻi he ʻaho ha kilimi pau ke ne toʻo atu ha petepete faitoʻongataʻa. ʻE mole ho petepeté kapau te ke ngāueʻaki tuʻo taha pē pe tuʻo ua ʻa e kilimí he māhina? ʻOku ngalingali ʻe ʻikai ke pehē ia. ʻI he tuʻunga meimei tatau, ʻoku ʻomai ʻe he tokotaha-tohi-sāmé kiate kitautolu ha “tohi tala-vai” ki he moʻui lelei fakalaumālié. Lau ʻa e Folofola ʻa e ʻOtuá ʻo “fakalaulauloto ʻaho mo e po.” (Sāme 1:​1, 2) Ke fiefia ʻi he maʻu ha ʻaonga lahi, ʻoku fiemaʻu ke tau muimui fakaʻaho​—ʻi he “tohi tala-vaí,”​—ʻo fakakaukau ki he Folofola ʻa e ʻOtuá ʻaki ʻa e tokoni ʻa e ngaahi tohi faka-Kalisitiané.​—Siosiua 1:8.

Te ke saiʻia ke ʻai ho ngaahi taimi akó ke fakatuimālohi lahi ange? Ko e fokotuʻu eni ʻe taha: Hili hono lau ha vahe ʻi he New World Translation of the Holy Scriptures pe ko ha Tohitapu ʻe taha ʻoku ʻi ai ʻa e ngaahi maʻuʻanga fakamatala felāveʻiʻakí, fili ha veesi fakamānako pea kumi ki he ngaahi konga Tohitapu felāveʻiʻaki ʻoku haá. ʻE ʻai ʻe he meʻá ni ke ifo hoʻo akó, pea ʻoku ʻikai ha veiveiua ʻe maongo kiate koe ʻa e feongoongoi ʻi loto ʻi he Tohitapú. ʻE hoko ai, ʻo ʻai ʻe he meʻá ni ʻa hono Tokotaha-Faʻutohí, ʻa Sihova ko e ʻOtuá ʻo toe moʻoni lahi ange ai kiate koe.

Ko hono ngāueʻaki ʻa e ngaahi maʻuʻanga fakamatala felāveʻiʻakí ʻe lava ai ke ne toe ʻai koe ke ke alāanga mo e ngaahi kikite ʻi he Tohitapú pea mo honau fakahokó. Mahalo pē kuó ke maheni koe mo e ngaahi kikite lalahi ʻi he Tohitapú, hangē ko ia ko e ngaahi kikite felāveʻi mo hono fakaʻauha ʻo Selusalema ʻe he kau Pāpiloné. Ka neongo ia, ʻoku ʻi he Tohitapú ha fehokotakiʻanga ʻo e ngaahi kikite ʻoku nau felāveʻiʻakí mo honau fakahokó. Ko e niʻihi ʻo e ngaahi meʻá ni ʻoku ʻikai ke ʻiloa.

Ko e fakatātaá, lau ʻa e kikite fekauʻaki mo e tautea ki hono toe langa ʻo Sielikoó pea vakai leva ki hono fakahokó. ʻOku pehē ʻi he Siosiua 6:​26: “Pea lea tuki ʻa Siosiua ʻi he taimi ko ia, ʻo pehe, Ke malaʻia ʻi he ʻao ʻo Sihova ʻa e tangata te ne hanga ʻo toe langa kolo ʻa Sieliko ni: te ne fai ʻaki hono ʻuluaki ʻa e tanupou, pea te ne fokotuʻu ʻaki hono foha kimui ʻa e matanikolo.” Ko hono fakahokó naʻe hoko mai ia ʻi he taʻu ʻe 500 ki mui ai, he ʻoku tau lau ʻi he 1 Tuʻi 16:34: “ʻI hono taimi oʻona [tuʻi ʻĒhapi] naʻe langa kolo ʻa Sieliko ʻe Hieli ko e tangata Peteli: naʻe fai hono tanu pou ʻaki hono ʻuluaki foha ko Apilami, ʻo ne fokotuʻu ʻaki hono ngaahi matanikolo hono foha ki mui ko Sekupi; ʻo hange ko e folofola ʻa Sihova naʻa ne fakafai ʻia Siosiua foha ʻo Nuni.”a Ko ha ʻOtua moʻoni pē ʻe lava ke ne fakamānavaʻi ha ngaahi kikite pehē pea ʻai ke fakahoko kinautolu.

Lolotonga hono lau ʻo e Tohitapú, te ke hoko nai ʻo fieʻilo fekauʻaki mo ha foʻi poini pau. Hangē ko ení, te ke fifili nai pe ko e taʻu ʻe fiha ʻa e vahaʻa taimi ʻi he vahaʻa ʻo e kikité mo hono fakahokó. ʻI he ʻikai ke ʻeke pē ki ha tahá, ko e hā ʻoku ʻikai te ke feinga ai ke kumi pē ia ʻe koé? ʻI hono ngāueʻaki ʻo e ngaahi sātí mo e tokoni ʻa e Tohitapú, fakatotoloʻi ke maʻu ʻa e ngaahi talí ʻo ngāue mālohi hangē pē ko haʻo feinga ke mahinoʻi ha mape ki ha koloa mahuʻinga. (Palovepi 2:​4, 5) Ko hono maʻu ʻa e ngaahi talí ʻe ʻi ai hono ola lelei lahi ki hoʻo tuí pea te ne ʻai ʻa Sihova ko e ʻOtuá ke toe moʻoni lahi ange ai kiate koe.

Lotu Maʻu Pē mo Faivelenga

ʻOua ʻe taʻetokangaʻi ʻa e mahuʻinga ʻo e lotú mo e tuí. Naʻe fai ʻe he kau ākonga ʻa Sīsuú ʻa e kole fakahangatonu ko ení: “Fakalahi ʻemau tui.” (Luke 17:5) Kapau kuo ʻikai ke hā ngali moʻoni ʻa Sihova kiate koe, ko e hā ʻoku ʻikai ai te ke lotu kiate ia fekauʻaki mo hoʻo fiemaʻu ha tui lahi angé? Kole loto-falala ki hoʻo Tamai fakahēvaní ki heʻene tokoní ʻi hono ʻai ia tonu ke moʻoni kiate koé.

Kapau ʻoku fakahohaʻasi ʻe ha palopalema ho ʻatamaí, vaheʻi ʻa e taimi ʻoku fiemaʻú ke fakahaaʻi ai koe tonu ki ho Kaumeʻa fakahēvaní ʻo fai mei ho lotó. ʻI he taimi naʻe ofi ai ʻa Sīsū ke maté, naʻá ne mātuʻaki lotu. Neongo naʻá ne fakahalaiaʻi ʻa e tōʻonga fakalotu ʻo e leaʻaki ʻa e ngaahi lotu lōloá koeʻuhi ke fakahāhā ki he kakaí, naʻá ne fakamoleki ha pō kakato ʻi he lotu fakaeia pē ki muʻa ke ne fili ʻene kau ʻapositolo ʻe toko 12. (Maake 12:​38-​40; Luke 6:​12-​16) Te tau toe ako nai ha lēsoni meia ʻAna, ʻa ia naʻe hoko ko e faʻē ʻa e palōfita ko Sāmiuelá. ʻI heʻene fakaʻānaua ha tama tangatá, naʻe “fai atu . . . ʻene hu ʻo fuoloa ʻi he ʻao ʻo Sihova.”​—1 Samiuela 1:​12.

Ko e hā ʻa e lēsoni tefito ʻo e ngaahi meʻá ni kotoa? Kapau ʻokú ke ʻamanaki ke maʻu ha ngaahi tali ki hoʻo ngaahi lotú, kuo pau ke ke lotu fakamātoato, faivelenga, taʻetuku​—pea, ke feongoongoi foki mo e finangalo ʻo e ʻOtuá. (Luke 22:44; Loma 12:12; 1 Tesalonaika 5:​17; 1 Sione 5:​13-​15) Ko hono fai ení ʻe tokoni ia ke moʻoni ai kiate koe ʻa e ʻOtuá.

Siofi ʻa e Fakatupú

ʻE lava ke fakahaaʻi ʻa e ʻulungaanga ʻo e tokotaha tā fakatātaá ʻi heʻene ngaahi tā-valivalí. ʻI ha tuʻunga meimei tatau, ko e “ngaahi ʻulungaanga taʻehāmai” ʻo Sihova, ʻa e Tokotaha-Faʻufaʻu mo e Tokotaha-Fakatupu ʻo e ʻunivēsí, ʻoku hā mahino ia ʻi he fakatupú. (Loma 1:​20, NW) ʻI he taimi ʻoku tau siofi fakalelei ai ʻa e ngāue ʻa Sihová, ʻoku tau maʻu ai ha mahino lelei ange ki hono ʻulungāngá, pea ʻokú ne hoko ai ʻo moʻoni lahi ange kiate kitautolu.

Kapau ʻokú ke siofi ofi ʻa e ngaahi meʻa naʻe fakatupu ʻe he ʻOtuá, ʻe maongo loloto nai ai kiate koe ʻa e moʻoni ʻo hono ngaahi ʻulungāngá. Ko e fakatātaá, ko e fakamatala fekauʻaki mo e ngaahi malava fakaefaifolau ʻa e fanga manupuná te ne fakalahiʻi lelei ʻa hoʻo houngaʻia ʻi he poto ʻo Sihová. ʻI hoʻo lau fekauʻaki mo e ʻunivēsí, te ke ako nai ai ʻo ʻilo ko e Milky Way, ʻa ia ko e ngaahi taʻu maama nai ia ʻe 100,000 ke aʻu ai ki he tafaʻaki ʻe tahá, ko e taha pē ia ʻi he ngaahi kaniva ʻe laui piliona ʻoku ʻi he vavaá kotoa. ʻIkai ʻoku maongo kiate koe ʻi he meʻa ko iá ʻa e moʻoni ʻo e poto ʻo e Tokotaha-Fakatupú?

Ko e moʻoni, ko e poto ʻo Sihová ʻoku moʻoni! Ka ko e hā ʻene ʻuhinga kiate koé? Sai, ko e moʻoni ʻe ʻikai lava ke fakapuputuʻuʻi ia ʻe he ngaahi palopalema ʻe ʻave kiate ia ʻe ha taha pē ʻo kitautolu ʻi he lotú. ʻIo, naʻa mo ha kiʻi ʻilo siʻisiʻi ki he fakatupú ʻe lava ke ne ʻai ke toe moʻoni lahi ange ai kiate koe ʻa Sihova.

ʻAʻeva mo Sihova

ʻE lava ke ke aʻusia fakafoʻituitui ʻa e anga ʻo e moʻoni ʻo Sihová? ʻIo, kapau ʻokú ke tatau mo e pēteliake anga-tonu ko Noá. Naʻá ne talangofua maʻu pē kia Sihova ʻo mātuʻaki lahi, ko ia ai, ʻe lava ke pehē: “Naʻe takaua ʻa Noa mo e ʻOtua.” (Senesi 6:9) Naʻe moʻui ʻa Noa ʻo hangē pē naʻe ʻi hono tafaʻakí tonu ʻa Sihová. ʻE lava ke moʻoni pehē ʻa e ʻOtuá kiate koe.

Kapau ʻokú ke ʻaʻeva mo e ʻOtuá, ʻokú ke falala ki he ngaahi talaʻofa Fakatohitapú pea ngāue ʻo fehoanaki mo kinautolu. Hangē ko ení, ʻokú ke tui ki he ngaahi lea ʻa Sīsuú: “Hanganaki . . . fuofua kumi ʻa e puleʻangá mo ʻene [ʻOtua] māʻoniʻoní, pea ko e kotoa ʻo e ngaahi meʻa kehe ko ení [ngaahi fiemaʻu fakamatelié] ʻe tānaki atu ia kiate koe.” (Mātiu 6:​25-​33, NW) Ko e moʻoni, ʻe ʻikai nai ke tokonaki maʻu mai pē ʻe Sihova ʻa e meʻa ʻokú ke fiemaʻú ʻi he founga ʻokú ke ʻamanekiná. Ka, ʻi he taimi ʻokú ke lotu ai pea toki aʻusia ʻa e tokoni ʻa e ʻOtuá, te ne hoko ai ʻo moʻoni kiate koe ʻo hangē pē ha taha ʻoku ʻi ho tafaʻakí.

Ko ha vahaʻangatae ofi pehē mo Sihová ʻoku tupu ia ʻi heʻete kīvoi ʻi he ʻaʻeva mo e ʻOtuá. Fakakaukau atu kia Manuela, ko ha tokotaha Fakamoʻoni lea faka-Sipeini, ʻa ia kuó ne kātekina ʻa e ngaahi ʻahiʻahi lahi. ʻOkú ne pehē: “ʻI he taimi pē ʻoku ou faingataʻaʻia ai pe masivá, ʻoku ou ngāueʻaki leva ʻa e tefitoʻi moʻoni ʻoku ʻi he Palovepi 18:10. ʻOku ou lele kia Sihova ki ha tokoni. Kuó ne hoko maʻu pē ko ha ‘taua malohi’ kiate au.” ʻOku lava ke leaʻaki eni ʻe Manuela hili ʻa e taʻu ʻe 36 ʻo e falala kia Sihova mo aʻusia ʻene tokoní.

Ko hoʻo toki kamata pē eni ke ʻai ʻa Sihova ko ho falalaʻangá? ʻOua ʻe loto-siʻi kapau ko ho vahaʻangatae mo iá ʻoku teʻeki ke aʻu ki he meʻa ʻokú ke loto ki aí. Moʻui ʻi he ʻaho taki taha ko ha tokotaha ʻoku ʻaʻeva mo e ʻOtuá. ʻI hoʻo langa ha sīpinga moʻui ʻo e tauhi anga-tonú, te ke hoko ai ʻo fiefia ʻi he vahaʻangatae vāofi ange mo Sihova.​—Sāme 25:14; Palovepi 3:​26, 32.

Ko e toe founga ʻe taha ke ʻaʻeva ai mo e ʻOtuá ko e femoʻuekina ʻi heʻene ngāué. ʻI he taimi ʻokú ke kau ai ʻi he ngāue malangaʻi ʻo e Puleʻangá, ʻokú ke kaungāngāue ai mo Sihova. (1 Kolinito 3:9) Ko e hoko ʻo lāuʻilo ki he meʻá ni ʻoku tokoni ia ke ʻai ʻa e ʻOtuá ke mātuʻaki moʻoni kiate koe.

ʻOku enginaki ʻa e tokotaha-tohi-sāmé: “Tekaki kia Sihova ho ʻalunga; ʻio falala ki ai, pea te ne fai ʻe ia.” (Sāme 37:5) ʻOua ʻaupito ʻe taʻetekaki ki he ʻOtuá ha ngaahi kavenga pe ngaahi loto-hohaʻa ʻokú ke maʻu. Hanga maʻu pē kiate ia ki ha tokoni mo ha tataki. Kapau ʻokú ke falala ʻo faʻa lotu kia Sihova ko e ʻOtuá pea falala taʻetoeveiveiua maʻu pē kiate ia, te ke ongoʻi malu ai koeʻuhi ʻokú ke ʻilo heʻikai taʻemalava ke ne ngāue mai maʻau. ʻOkú ke loto-falala ʻi he taimi ʻokú ke ʻunuʻunu ai kia Sihova mo hoʻo ngaahi loto-moʻua fakafoʻituituí? Te ke pehē​—kapau ʻoku moʻoni kiate koe ʻa e ʻOtuá.

[Fakamatala ʻi lalo]

[Fakatātā ʻi he peesi 21]

ʻAi ho ngaahi taimi akó ke fakatuimālohi

[Fakatātā ʻi he peesi 22]

Vaheʻi ha taimi ke lotu maʻu pē ai, pea faivelenga

[Fakatātā ʻi he peesi 23]

Siofi ʻa e anga hono fakahāhā ʻa e ngaahi ʻulungaanga ʻo e ʻOtuá ʻi he fakatupú

[Maʻuʻanga ʻo e Tā]

Manupuna: U.S. Fish and Wildlife Service, Washington, D.C./Dean Biggins; ngaahi fetuʻu: Tā: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands