2 Tokoni ke Fakaleleiʻi ʻa e Ngaahi Palopalemá

ʻOku pehē ʻe Rosie, “ʻOku ou loto-moʻua hokohoko fekauʻaki mo e ngaahi meʻa ne kovi ange ia ʻi heʻeku fakakaukau atu ki aí ʻi hono tuʻunga totonú.” Ko e hā ha ngaahi veesi Tohi Tapu naʻe tokoni? Ko e taha ʻo kinautolu ko e Mātiu 6:34: “ʻOua ʻaupito naʻa mou loto-moʻua ʻo fekauʻaki mo e ʻaho hono hokó, he ko e ʻaho hono hokó ʻe ʻi ai pē hono ngaahi loto-moʻua ʻoʻona. ʻOku feʻunga pē ki he ʻaho taki taha ʻa hono ngaahi faingataʻa ʻoʻoná.” ʻOku pehē ʻe Rosie ko e ngaahi lea ʻa Sīsuú naʻá ne tokoniʻi ia ke tuku ʻene loto-moʻua ʻo fekauʻaki mo e meʻa ʻe hoko nai ʻapongipongí. ʻOkú ne hoko atu, “Naʻe ʻosi feʻunga pē ʻa e ngaahi faingataʻa naʻá ku maʻú, ʻo ʻikai kau ai ʻa e ngaahi loto-moʻua fekauʻaki mo e ngaahi tuʻunga naʻe teʻeki ai ke hoko pea heʻikai nai ke hoko.”

Naʻe ongoʻi foki ʻe Yasmine ne puleʻi ia ʻe heʻene loto-moʻuá. “Ne u tangi ʻi ha ngaahi ʻaho he lolotonga ʻa e uiké, pea naʻe ʻikai lava ke u mohe ʻi he pō ʻe niʻihi. Naʻá ku ongoʻi ne hanga ʻe he ngaahi fakakaukau ʻikai leleí ʻo keina moʻui pē au.” Ko e hā ha konga Tohi Tapu naʻe tokoni? ʻOkú ne lave ki he 1 Pita 5:7: “Lī atu ʻa e kotoa hoʻomou loto-moʻuá [ki he ʻOtuá], koeʻuhí he ʻokú ne tokanga mai kiate kimoutolu.” ʻOku pehē ʻe Yasmine: “ʻI he faai mai ʻa e taimí, naʻá ku hanganaki lotu kia Sihova, pea naʻá ne tali ʻeku ngaahi lotú. Naʻá ku ongoʻi ne hangē ne toʻo atu ha fuʻu kavenga mamafa mei hoku umá. ʻOku toutou foki mai ʻa e ngaahi fakakaukau ʻikai lelei naʻá ku maʻú, ka ʻi he taimi ní ʻoku ou ʻilo ʻa e founga ke fakaleleiʻi ai iá.”

Ko ha finemui ko hono hingoá ko Isabella ʻokú ne pehē: “ʻOku ou tui ko e toloi-meʻá ʻoku tukufakaholo koeʻuhí naʻe pehē pē mo ʻeku tamaí. Naʻá ku liʻaki ʻa e ngaahi meʻa mahuʻingá koeʻuhi kau nofo noa pē​—ʻo mālōlō pē mo sio TV. Ko ha tōʻonga fakatupu maumau ia koeʻuhi ʻokú ne fakatupulekina ʻa e loto-mafasiá pea ʻai ha taha ke ʻoua te ne fakahoko lelei ʻa e ngāué.” Ko ha tefitoʻi moʻoni naʻá ne tokoniʻi iá ʻoku hā ʻi he 2 Tīmote 2:15, ʻa ia ʻoku pehē: “Fai ho tūkuingatá ke fakahāhaaʻi atu koe ʻokú ke fakahōifua ki he ʻOtuá, ko ha tangata ngāue ʻoku ʻikai ha meʻa ke mā ai.” ʻOku pehē ʻe Isabella, “Naʻe ʻikai te u loto ke fakamaaʻi ʻa Sihova ʻaki ʻeku ngāué koeʻuhi pē ko ʻeku toloi-meʻá.” Kuó ne fakalakalaka lahi.

ʻI he founga meimei tatau, ʻoku fakamatala ʻa Kelsey: “Naʻe ʻi ai ha ngāue ke u fai pea naʻá ku tuku fakatatali ia ʻo aʻu ki he mōmeniti fakaʻosí. Ne u tangi, mole ʻa e taimi mohé mo loto-moʻua. Naʻe ʻikai lelei ia kiate au.” Naʻe maʻu ʻe Kelsey ha tokoni ʻi he Palōveepi 13:16: “Ko e tokotaha fakapotopotó ʻokú ne ngāue ʻi he ʻilo, ka ko e valé ʻokú ne fakaeʻa atu ʻa ʻene seselé.” ʻOkú ne fakamatala ki he meʻa naʻe akoʻi kiate ia ʻe heʻene fakalaulauloto ki he konga Tohi Tapú ni: “ʻOku fakapotopoto ke ngāue ʻaonga mo palani tokamuʻa. ʻI he taimi ní ʻoku ou ʻai ha tohi ʻo hili ʻi heʻeku funga tesí ke fakataimitēpileʻi ai ʻeku ngāue ʻe hoko maí, pea ʻoku tokoni eni kiate au ke u fakataimitēpileʻi mo au, ʻo ʻikai tuku ʻa e ngaahi meʻá ki he mōmeniti fakaʻosí.”

“Ne tukuange ʻe hoku husepānití ʻema nofo malí, ʻo liʻaki au mo e fānau ʻe toko fā,” ko e lau ia ʻa Kirsten. Ko e hā ʻa e tefitoi moʻoni Fakatohitapu naʻe tokoni kiate iá? ʻOku pehē ʻe he Palōveepi 17:17: “Ko ha kaumeʻa moʻoni ʻokú ne ʻofa ʻi he taimi kotoa pē pea ko ha tokoua ia ʻoku fanauʻi mai ki he taimi faingataʻá.” Naʻe kumi tokoni ʻa Kirsten ki he faʻahinga ʻoku nau tauhi kia Sihová. Ko e hā naʻá ne maʻú? “Naʻe poupou hoku ngaahi kaungāmeʻá kiate au ʻi he ngaahi founga lahi! Ko e niʻihi naʻa nau tuku ha meʻakai mo ha ngaahi matalaʻiʻakau ʻi hoku matapaá. Naʻe tuʻo tolu hono tokoniʻi ʻe ha kiʻi falukunga kakai ʻeku fānaú mo au ke mau hiki mei ha fale ʻe taha ki ha toe fale ʻe taha. Naʻe tokoni mai ha taha ke kumi haʻaku ngāue. Naʻe ʻi ai maʻu pē ʻa hoku ngaahi kaungāmeʻá ke tokoniʻi au.”

Ko Delphine naʻe lave ki ai ki muʻá, naʻá ne fekuki tatau pē mo e tuēnoá. ʻOkú ne manatuʻi ʻi he hili ʻa e mole ʻa e meimei meʻa kotoa meiate iá: “Naʻá ku ongoʻi ne hangē ne moʻui mo fāʻūtaha ʻa e niʻihi kehé ia ka u nofo tokotaha pē au mo tuēnoa.” Ko e konga Tohi Tapu ʻe taha naʻá ne tokoniʻi iá ko e Saame 68:6: “ʻOku foaki ʻe he ʻOtuá ki he faʻahinga ʻoku tuēnoá ha ʻapi ke nau nofo ai.” ʻOkú ne fakamatala: “Naʻá ku ʻilo naʻe ʻikai ʻuhinga ʻa e vēsí ia ki ha ʻapi moʻoni ʻi he taimí ni. Ka, naʻá ku mahinoʻi ʻoku ʻomai ʻe he ʻOtuá kiate kitautolu ha ʻapi fakalaumālie, ko ha feituʻu malu moʻoni ʻokú ne ʻomai ʻa e fepikitaki moʻoni mo e fehokotaki fakaeongo ki he niʻihi kehe ʻoku ʻofa ʻia Sihová. Ka naʻá ku ʻilo heʻikai lava ke u ofi ange ki he niʻihi kehé kae ʻoua ko u tōmuʻa ofi ange kia Sihova. Ko ia naʻe tokoniʻi ai au ʻe he Saame 37:4: ‘Maʻu ʻa e fiefia lahi ʻia Sihova, pea te ne ʻoatu kiate koe ʻa e ngaahi holi ʻo ho lotó.’”

ʻOkú ne fakaʻosiʻaki: “Naʻá ku fakatokangaʻi naʻe fiemaʻu ke u ʻai au ke u piki maʻu ange kia Sihova. Ko ia ʻa e tokotaha lelei tahá. Naʻá ku ʻai leva ha lisi ʻo e ngaahi ngāue ʻe lava ke u fiefia ai mo e niʻihi kehé, koeʻuhi ke u kaumeʻa mo kinautolu ʻo makatuʻunga ʻi he ngaahi meʻa mahuʻinga fakalaumālié. Naʻá ku ako ke u sio ki he lelei ʻi he niʻihi kehé pea ke fakafeangai kiate kinautolu ʻo hangē ko e meʻa pē ia naʻe lava ke u sio ʻo ʻilo ʻiate kinautolú.”

Ko e moʻoni, ko e ngaahi kaumeʻa ʻoku tauhi kia Sihová ʻoku nau kei taʻehaohaoa. ʻOku fāinga ʻa e Kau Fakamoʻoni ʻa Sihová mo e ngaahi palopalema ʻo hangē pē ko e tokotaha kotoa. Ka ko hono ako ʻo e Tohi Tapú ʻoku ueʻi ai ʻa e kakaí ke nau tokoniʻi ʻa e niʻihi kehé ʻi ha taimi pē ʻoku malava ai. ʻOku fakapotopoto ke ʻai ha ngaahi kaungāmeʻa pehē. Kae kehe, ʻe lava ʻa e ngaahi tefitoʻi moʻoni ʻi he Tohi Tapú ʻo toe tokoni ʻi ha ngaahi palopalema ʻoku ʻikai lava ke fakaleleiʻi ʻi he ʻahó ni, ʻo hangē ko e mahaki tauhí mo e mamahí?