ʻE Lava Ke Ke Hoko ko e Kaumeʻa ʻo Sihova

ʻOku finangalo ʻa Sihova ke ke hoko ʻo ʻiloʻi lelei ange ia. Ko e hā hono ʻuhingá? ʻOkú ne ʻamanaki ko e lahi ange hoʻo ako fekauʻaki mo hono ʻulungāngá, ko ʻene ngaahi foungá mo ʻene taumuʻá, ko e lahi ange ia hoʻo loto ke hoko ko hono kaumeʻá. ʻE lava moʻoni ke ke hoko ko e kaumeʻa ʻo e ʻOtuá? (Lau ʻa e Saame 25:14.) Ko e hā ʻe lava ke ke fai ke hoko ai ko hono kaumeʻá? ʻOku tali ʻe he Tohi Tapú ʻa e ongo fehuʻi ko iá pea fakahaaʻi mai ai ʻa e ʻuhinga ʻoku hoko ai ʻa e kaumeʻa mo Sihová ko e vahaʻangatae mahuʻinga taha ia ʻe lava ke ke maʻú.

1. Ko e hā ʻa e fakaafe kuo ʻoatu kiate koe ʻe Sihová?

“ʻUnuʻunu ofi ki he ʻOtuá, pea te ne ʻunuʻunu ofi mai kiate kimoutolu.” (Sēmisi 4:8) ʻOku ʻuhinga ení ki he hā? ʻOku fakaafeʻi mai heni koe ʻe Sihova ke ke hoko ko hono kaumeʻa. ʻE ongoʻi nai ʻe he niʻihi ʻoku faingataʻa ke fakakaukau atu ʻe lava ke nau hoko ʻo kaumeʻa mo ha taha ʻoku ʻikai ke nau lava ʻo sio ki ai, tautautefito ki he ʻOtuá tonu. Neongo ia, ʻi heʻene Folofolá, ʻa e Tohi Tapú, ʻoku fakahaaʻi mai ai ʻe Sihova ʻa e meʻa kotoa ʻoku fiemaʻu ke tau ʻilo fekauʻaki mo hono ʻulungāngá kae lava ke tau ʻunuʻunu ofi ange kiate ia. ʻI heʻetau lau ʻa e pōpoaki ʻa e ʻOtuá kiate kitautolu ʻi he Tohi Tapú, ʻoku tupulekina ai ʻetau kaumeʻa mo Sihová neongo kuo teʻeki ai ʻaupito ke tau sio kiate ia.

2. Ko e hā ko Sihova ai ʻa e Kaumeʻa lelei taha ʻe lava ke ke maʻú?

ʻOku ʻikai ha taha ʻe laka ange ʻene ʻofa ʻiate koé ʻia Sihova. ʻOkú ne finangalo ke ke fiefia pea hanga ange kiate ia ʻi ha taimi pē ʻokú ke fiemaʻu ai ha tokoni. ʻE lava ke ke “lī atu ʻa e kotoa [hoʻo] loto-moʻuá kiate ia, koeʻuhí he ʻokú ne tokanga mai kiate [koe].” (1 Pita 5:7) ʻOku mateuteu maʻu pē ʻa Sihova ke ne poupouʻi, fakafiemālieʻi mo fanongo mai ki hono ngaahi kaumeʻá.​​—Lau ʻa e Saame 94:​18, 19.

3. Ko e hā ʻoku ʻamanekina ʻe Sihova mei hono ngaahi kaumeʻá?

ʻOku ʻofa ʻa Sihova ki he kakai kotoa pē, “ka ʻokú Ne kaumeʻa ofi mo e faitotonú.” (Palōveepi 3:​32) ʻOku ʻamanekina ʻe Sihova hono ngaahi kaumeʻá ke nau feinga ke fai ʻa e ngaahi meʻa ʻokú ne vakai ki ai ʻoku leleí pea fakaʻehiʻehi mei he ngaahi meʻa ʻokú ne pehē ʻoku koví. ʻE ongoʻi nai ʻe he niʻihi heʻikai ʻaupito pē lava ke nau moʻui ʻo fakatatau ki he ngaahi tuʻunga ʻa Sihova ki he leleí mo e koví. Kae kehe, ko Sihová ʻokú ne mohu meesi. ʻOkú ne tali ʻa e tokotaha kotoa pē ʻoku ʻofa moʻoni ʻiate Ia mo fai hono lelei tahá ke fakahōifuaʻi Iá.​​—Saame 147:11; Ngāue 10:​34, 35.

KELI LOLOTO ANGE

4. Naʻe hoko ʻa ʻĒpalahame ko e kaumeʻa ʻo Sihova

Ko e fakamatala ʻa e Tohi Tapú fekauʻaki mo ʻĒpalahamé (ʻa ia naʻe toe ui ko ʻEpalamé) ʻoku tomuʻa fakaʻali mai ai ʻa e ʻuhinga ʻo e hoko ko e kaumeʻa ʻo e ʻOtuá. Lau fekauʻaki mo ʻĒpalahame ʻi he Sēnesi 12:​1-4. Lāulea leva ki he ngaahi fehuʻi ko ení:

• Ko e hā naʻe kole ʻe Sihova kia ʻĒpalahame ke ne faí?

• Ko e hā naʻe talaʻofa ange ʻe Sihova kiate iá?

• Naʻe anga-fēfē ʻa e fakafeangai ʻa ʻĒpalahame ki he ngaahi fakahinohino ʻa Sihová?

5. Meʻa ʻoku ʻamanekina ʻe Sihova mei hono ngaahi kaumeʻá

ʻOku tau faʻa ʻamanekina ha ngaahi meʻa pau mei hotau ngaahi kaumeʻá.

• Ko e hā ʻa e ngaahi meʻa ʻe niʻihi te ke loto ke fai ʻe ho ngaahi kaumeʻá maʻaú?

Lau ʻa e 1 Sione 5:​3, pea lāulea leva ki he fehuʻi ko ení:

• Ko e hā ʻoku ʻamanekina ʻe Sihova mei hono ngaahi kaumeʻá?

Ke talangofua kia Sihová, ʻe fiemaʻu nai ke tau liliu ʻetau tōʻongá pe angaʻitangatá. Lau ʻa e ʻAisea 48:​17, 18, pea lāulea leva ki he fehuʻi ko ení:

• Ko e hā ʻoku kole ai ʻe Sihova ki hono ngaahi kaumeʻá ke nau fai ha liliú?

6. Meʻa ʻoku fai ʻe Sihova maʻa hono ngaahi kaumeʻá

VITIŌ: Kuo Fai ʻe Sihova ʻa e Meʻa Lahi Maʻaku (3:​20)

• Naʻe anga-fēfē hono tokoniʻi ʻe Sihova ʻa e fefine ʻi he vitioó ke ne fekuki mo ʻene ngaahi fakakaukau mo e ngaahi ongoʻi ʻikai leleí?

Lau ʻa e ʻAisea 41:​10, 13, pea lāulea leva ki he ngaahi fehuʻi ko ení:

• Ko e hā ʻoku talaʻofa ʻe Sihova te ne fai maʻá e kotoa hono ngaahi kaumeʻá?

• ʻOkú ke fakakaukau ʻe hoko nai ʻa Sihova ko ha Kaumeʻa lelei? Ko e hā hono ʻuhingá?

7. Ko e kaumeʻa mo Sihová ʻoku kau ki ai ʻa e fetuʻutaki

Ko e fetuʻutakí ʻokú ne fakaivimālohiʻi ʻa e haʻi ʻo e kaumeʻá. Lau ʻa e Saame 86:​6, 11, pea lāulea leva ki he ongo fehuʻi ko ení:

• ʻE lava fēfē ke tau fetuʻutaki mo Sihova?

• ʻOku anga-fēfē ʻa e fetuʻutaki mai ʻa Sihova kiate kitautolú?

FAKANOUNOU

ʻOku finangalo ʻa Sihova ke hoko ko ho Kaumeʻa, pea te ne tokoniʻi koe ke ke ʻunuʻunu ofi ange kiate ia.

Fakamanatu

• ʻOku anga-fēfē hono tokoniʻi ʻe Sihova hono ngaahi kaumeʻá?

• Ko e hā ʻoku fakahinohinoʻi ai ʻe Sihova hono ngaahi kaumeʻá ke nau fai ha liliú?

• ʻOkú ke fakakaukau ʻoku fuʻu lahi ʻa e meʻa ʻoku ʻamanekina ʻe Sihova mei hono ngaahi kaumeʻá? Ko e hā hono ʻuhingá pe ko e hā ʻoku ʻikai pehē aí?

AKO LAHI ANGE

ʻE lava fēfē ke tākiekina ʻe he kaumeʻa mo e ʻOtuá hoʻo moʻuí?

“Ko Sihová​—Ko ha ʻOtua Ia ʻOku Taau ke ʻIloʻi” (Ko e Taua Leʻo, Fepueli 15, 2003)

Ako ki he founga ke fakatupulekina ai ʻa e kaumeʻa mo e ʻOtuá.

“ʻE Lava Fēfē Ke U Hoko ko e Kaumeʻa ʻo e ʻOtuá?” (Ngaahi Fehuʻi ʻOku ʻEke ʻe he Toʻutupú​—Tali ʻOku ʻAongá, Voliume 2, vahe 35)

Vakai ki he ʻuhinga naʻe ongoʻi ai ʻe ha fefine ʻe taha naʻe fakahaofi ia ʻe he kaumeʻa mo Sihová.

“Naʻe ʻIkai Ke U Fie Mate!” (Ko e Taua Leʻo Fika 1 2017)

Fanongo ki hono fakahaaʻi ʻe he toʻutupú ʻenau ongoʻi fekauʻaki mo Sihová.

ʻOku ʻUhinga ki he Hā ʻa e Kaumeʻa mo e ʻOtuá? (1:46)