Tauhi Maʻu ʻa e Fāʻūtahá ʻi he Fakatahaʻangá

ʻI heʻetau feohi mo hotau kaungātuí, ʻoku tau ongoʻi ʻo hangē ko Tuʻi Tēvitá: “Hono ʻikai lelei pea hono ʻikai fakaʻofoʻofa ke nofo fakataha ʻa e fanga tokouá ʻo fāʻūtaha!” (Saame 133:1) Ko ʻetau fāʻūtahá ʻoku ʻikai ke hokonoa mai pē. Ko e tokotaha taki taha ʻo kitautolu kuo pau ke poupou ki ai.

1. Ko e hā ʻoku makehe atu ʻi he haʻohaʻonga ʻo e kakai ʻa e ʻOtuá?

Kapau ʻokú ke maʻu ha fakataha ʻa e fakatahaʻangá ʻi ha fonua kehe, heʻikai nai ke ke mahinoʻi ʻa e leá ka te ke kei ongoʻi fiemālie mo ʻofaʻi. Ko e hā hono ʻuhingá? Koeʻuhí ʻoku tau ako ʻa e Tohi Tapú ʻo ngāueʻaki ʻa e ʻū tohi tatau ʻi he feituʻu kotoa pē. Pea ʻoku tau feinga mālohi ke fefakahāhāʻaki ʻa e ʻofá. Tatau ai pē pe ʻoku tau nofo ʻi fē, ʻoku tau “ui kotoa ki he huafa ʻo Sihová, ke lotu kiate ia ʻi he fāʻūtaha.”​—Sēfanaia 3:9, fakamatala ʻi lalo.

2. Ko e hā ʻoku lava ke ke fai ke pouaki ʻa e fāʻūtahá?

“Mou maʻu ā ʻa e ʻofa lahi ki he tokotaha taki taha mei he lotó.” (1 Pita 1:22) ʻE anga-fēfē haʻo ngāueʻaki ʻa e akonaki ko ení? ʻI he ʻikai tokangataha ki he taʻehaohaoa ʻa e niʻihi kehé, tokangataha ki honau ngaahi ʻulungaanga leleí. ʻI he ʻikai feohi pē mo e faʻahinga ʻoku mou saiʻia ʻi he meʻa tataú, feinga ke ʻiloʻi ʻa e fanga tokoua mo e fanga tuofāfine ʻoku nau haʻu mei ha ngaahi puipuituʻa kehekehe. ʻOku toe lava ke tau ngāue mālohi ke taʻakifuʻu ha faʻahinga ongoʻi pē ʻo e tomuʻa fehiʻá ʻoku tau maʻu.​—Lau ʻa e 1 Pita 2:17.a

3. Ko e hā te ke fai ʻi haʻo taʻefelotoi mo ha kaungā-Kalisitiane?

ʻOku tau fāʻūtaha, ka ʻoku tau toe taʻehaohaoa. ʻI he taimi ʻe niʻihi ʻoku tau loto-mamahi pea aʻu ʻo fakamamahiʻi ʻa e niʻihi kehé. Ko ia ʻoku tala mai ʻe he Folofola ʻa e ʻOtuá ke “hokohoko atu ʻa e . . . fefakamolemoleʻaki,” pea hoko atu: “Hangē tofu pē ko ia ne fakamolemoleʻi loto-lelei kimoutolu ʻe Sihová, kuo pau foki ke mou fai ʻa e meʻa tatau.” (Lau ʻa e Kolose 3:13.) Kuo tau fakamamahiʻi ʻa Sihova ʻo tā-tuʻo-lahi, neongo ia kuó ne fakamolemoleʻi kitautolu. Ko ia ʻokú ne fiemaʻu mai ke tau fakamolemoleʻi hotau fanga tokouá. Kapau ʻokú ke ʻiloʻi kuó ke fakamamahiʻi ha taha, tamuʻomuʻa ke fakaleleiʻi ʻa e palopalemá.​—Lau ʻa e Mātiu 5:23, 24.b

KELI LOLOTO ANGE

4. Ikuʻi ʻa e tomuʻa fehiʻá

ʻOku tau loto ke ʻofa ki he kotoa hotau fanga tokouá. Ka ʻe faingataʻa nai ke tau ʻofa ki ha taha ʻoku hā ngali kehe meiate kitautolu. Ko e hā ʻe tokoní? Lau ʻa e Ngāue 10:34, 35, pea lāulea leva ki he ongo fehuʻi ko ení:

• ʻOku tali ʻe Sihova ʻa e faʻahinga kakai kotoa pē ko ʻene Kau Fakamoʻoni. ʻOku lava fēfē ke ke faʻifaʻitaki kia Sihova ʻi he anga hoʻo ongoʻi ki he faʻahinga ʻoku kehe meiate koé?

• Ko e hā ʻa e faʻahinga tomuʻa fehiʻa ʻoku anga-maheni ʻi ho feituʻú ʻokú ke loto ke fakaʻehiʻehi mei aí?

Lau ʻa e 2 Kolinitō 6:11-13, pea lāulea leva ki he fehuʻi ko ení:

• ʻOku lava fēfē ke ke ʻunuʻunu ofi ange ki ho fanga tokoua mo e fanga tuofāfine ʻoku kehe honau puipuituʻá?

5. Fakamolemole loto-lelei mo fakamelino

ʻOku fakamolemoleʻi loto-lelei kitautolu ʻe Sihova neongo heʻikai ʻaupito te ne fiemaʻu kitautolu ke fakamolemoleʻi ia. Lau ʻa e Saame 86:5, pea lāulea leva ki he ngaahi fehuʻi ko ení:

• ʻOku lahi fēfē ʻa e fakamolemole ʻa Sihová?

• ʻOkú ke houngaʻia ʻi heʻene fakamolemolé? Ko e hā hono ʻuhingá?

• Ko e hā ʻa e ngaahi tuʻunga te ne ʻai ai ke faingataʻa kiate kitautolu ke nofo melino mo e niʻihi kehé?

ʻOku lava fēfē ke tau faʻifaʻitaki kia Sihova pea hanganaki fāʻūtaha mo hotau fanga tokouá mo e fanga tuofāfiné? Lau ʻa e Palōveepi 19:11, pea lāulea leva ki he fehuʻi ko ení:

• ʻI hono fakaʻitaʻi pe fakamamahiʻi koe ʻe ha taha, ko e hā ʻoku lava ke ke faí ke fakaleleiʻi ai ʻa e palopalemá?

ʻI he taimi ʻe niʻihi, ʻoku tau fakaʻitaʻi ʻa e niʻihi kehé. ʻI he hoko iá, ko e hā ʻoku totonu ke tau faí? Huluʻi ʻa e VITIOÓ, pea lāulea leva ki he fehuʻi hokó.

VITIŌ: Fakamelinó ʻOku Maʻu Ai ʻa e Tāpuaki (5:58)

• ʻI he vitioó, ko e hā naʻe fai ʻe he tuofefiné ke fakamelinó?

6. Kumi ki he lelei ʻi ho fanga tokouá mo e fanga tuofāfiné

ʻI heʻetau hoko ʻo ʻiloʻi hotau fanga tokouá mo e fanga tuofāfiné, ʻoku tau hoko ai ʻo ʻiloʻi honau ngaahi ʻulungaanga leleí mo honau ngaahi vaivaiʻangá. ʻOku lava fēfē ke tau tokangataha ki honau ngaahi ʻulungaanga leleí? Huluʻi ʻa e VITIOÓ, pea lāulea leva ki he fehuʻi hokó.

VITIŌ: Hoko ʻo Fakaʻofoʻofa Ange! (5:11)

• Ko e hā te ne tokoniʻi koe ke ke sio ki he ngaahi ʻulungaanga lelei ho fanga tokouá mo e fanga tuofāfiné?

ʻOku tokangataha ʻa Sihova ki hotau ngaahi ʻulungaanga leleí. Lau ʻa e 2 Kalonikali 16:9a, pea lāulea leva ki he fehuʻi ko ení:

• ʻOku fēfē hoʻo ongoʻí ʻi hoʻo ʻiloʻi ʻoku tokangataha ʻa Sihova ki ho ngaahi ʻulungaanga leleí?

FAKANOUNOU

ʻE lava ke ke tokoni ki hono tauhi ʻa e fāʻūtaha ʻi he fakatahaʻangá ʻaki ʻa e hoko ʻo faʻa fakamolemole pea fakahaaʻi ʻa e ʻofa ki he kotoa ho fanga tokouá mo e fanga tuofāfiné.

Fakamanatu

• ʻE anga-fēfē haʻo ikuʻi ʻa e tomuʻa fehiʻá?

• Ko e hā te ke faí kapau te ke taʻefelotoi mo ha kaungā-Kalisitiane?

• ʻOkú ke loto ke faʻifaʻitaki ki he faʻifaʻitakiʻanga ʻa Sihová ʻi hono fakamolemoleʻi ʻa e niʻihi kehé? Ko e hā hono ʻuhingá?

AKO LAHI ANGE

Ako ki he anga hono tokoniʻi kitautolu ʻe ha taha ʻo e ngaahi talanoa fakatātā ʻa Sīsuú ke tau fakaʻehiʻehi mei hono fakamāuʻi ʻa e niʻihi kehé.

Toʻo ʻa e Kupuʻi ʻAkaú (7:01)

ʻOku fiemaʻu ke tau kole fakamolemole kapau ʻoku tau ongoʻi kuo ʻikai ke tau fai ha meʻa ʻoku hala?

“Kole Fakamolemolé​—Ko ha Kī ki he Fakamelinó” (Ko e Taua Leʻo, Nōvema 1, 2002)

Ako ki he founga kuo ako ai ʻa e niʻihi ke fakafeangai taʻefilifilimānako ki he niʻihi kehé.

ʻOua ʻe Fakamaauʻaki ʻa e Meʻa ʻOku Hā ki Tuʻá (5:06)

Ako ki he founga ke ke fakaleleiʻi ai ha palopalema mo ha taha ki muʻa ke ne uesia ʻa e melino ʻa e fakatahaʻangá.

“Fakaleleiʻi ʻa e Ngaahi Fefaikehekeheʻakí ʻi he Laumālie ʻo e ʻOfá” (Ko e Taua Leʻo, Mē 2016)