‘ʻI he Potó ʻe Fakalahi Ai Hotau Ngaahi ʻAhó’

KO HAI ia te ne fakaʻikaiʻi ʻoku ʻikai ala tuku ʻa e potó ʻi he taimi ʻoku hoko mai ai ki he fekuki mo e ngaahi palopalema ʻi he moʻuí? Ko e poto moʻoní ʻa e malava ke ngāueʻaki totonu ʻa e ʻiló mo e mahinó. Ko e fehangahangai tofu pē ia ʻo e seselé, valé, mo e fahá. Ko ia ʻoku enginaki mai ʻe he ngaahi Konga Tohitapú kiate kitautolu ke tau maʻu ʻa e potó. (Palovepi 4:7) Ko hono moʻoní, ko e tohi Tohitapu ʻa Palovepí naʻe tohi tefito ia ke ʻomai ai ʻa e poto mo e akonaki. Ko hono lea kamatá ʻoku pehē: “Ko e ngaahi palovepi ʻa Solomone, ko e ʻAlo ʻo Tevita, ko e Tuʻi Isileli. Ko e meʻa ke ʻilo poto ai mo e akonaki.”—Palovepi 1:​1, 2.

Tau lāulea ange pē ki he ngaahi akonaki lelei ʻa e ngaahi ʻuluaki vahe siʻi ʻo e Palovepí. ʻI he hangē ha tamai ʻofa ʻokú ne fakaʻaiʻai ʻa hono fohá, ʻoku kole ʻa Solomone ki heʻene kau lautohí ke nau tali ʻa e akonakí pea tokanga ki he potó. (Vahe 1 mo e 2) ʻOkú ne fakahā mai kiate kitautolu ʻa e founga ke fakatupu ai ʻa e fekoekoeʻi mo Sihová pea mo e founga ke maluʻi ai hotau lotó. (Vahe 3 mo e 4) ʻOku enginakiʻi kitautolu ke tau ʻulungaanga maʻa ai pē. (Vahe 5 mo e 6) ʻIo, ʻoku mahuʻinga taʻehanotatau kiate kitautolu ʻa hono fakaeʻa ʻo e founga ʻo e ngāue ʻa ha tokotaha ʻulungaanga taʻetaau. (Vahe 7) Pea ko e meʻa fakaʻofoʻofa moʻoni ē ki he tokotaha kotoa ʻa e kole fakamātoato mai ʻa e fakasino ʻa potó! (Vahe 8) Ki muʻa ke hoko atu ki he ngaahi paloveepi nounou tāutaha ʻi he ngaahi vahe ki muí, ʻoku ʻomai ʻe Tuʻi Solomone ha fakanounou fakaueʻiloto ʻo e meʻa kuó ne ʻosi lāulea ki aí.​—Vahe 9.

‘Haʻu, o Kai i he Eku Maá, mo Inu Eku Uainé’

Ko e fakamulituku ʻo e ʻuluaki konga ʻo e Palovepí ʻoku ʻikai ko ha fakanounou fakapipiko ia ʻoku fokotuʻu mai pē ai ʻa e fakahinohino naʻe lave ki ai ki muʻá. Ka, ʻoku ʻomai ia ko ha talanoa fakatātā fakalotomāfana mo fakaueʻiloto, ʻo ne ueʻi ai ʻa e tokotaha lautohí ke tuli ki he potó.

Ko e vahe hono 9 ʻo e tohi Tohitapu ʻa Palovepí ʻoku kamata ʻaki ia ʻa e leá ni: “Kuo laga e he boto a hono fale, bea kuo ne ta mai a hono bou e fitu.” (Palovepi 9:​1, PM) Ko e kupuʻi lea “bou e fitu,” ko e lau ia ʻa ha mataotao ʻe taha, ʻoku “fakahaaʻi ai ha fale ʻoku langa takatakai ʻi ha lotoʻā, ko hono faʻungá ʻoku poupou ia ʻe he pou ʻe tolu ʻi hono tafaʻakí taki taha pea mo e taha ʻi lotomālie ʻi he tafaʻaki hono tolu ʻoku fehangahangai mo e ʻatā ʻoku ava ʻa ia ko e hūʻangá.” Tatau ai pē pe ko e hā, kuo langa ʻe he poto moʻoní ha fale fefeka ki hono talitali ʻo e kau fakaafe tokolahi.

ʻOku maau ʻa e meʻa kotoa pē ki ha kātoanga kai. ʻOku ʻi ai ʻa e kakanoʻi manú, pea pehē ki he uainé. Kuo fai ʻe poto ha tokanga fakafoʻituitui ki hono teuteu ʻo e meʻakaí pea ki hono seti ʻo e tēpilé. “Kuo ne tamateʻi ene faga manu; kuo ne huʻi ene uaine; kuo ne teuteu foki [ʻene tēpilé].” (Palovepi 9:​2, PM) ʻOku hā mahino ʻoku ala maʻu ʻa e meʻakai fakamaama fakalaumālie ke fai ha fakakaukau ki ai ʻi he tēpile fakaefakatātaá.​—Aisea 55:​1, 2.

Ko hai ʻoku fakaafeʻi ki he kātoanga kai kuo teuteu ʻe poto moʻoní? “Kuo ne fekau atu ene kau kaunaga; oku kalaga ia mei he gaahi botu maoluga oe kolo, Kohai ia oku tae [taukeí] ke afe mai ia ki heni: bea oku lea ia, o behe, kiate ia oku [“masiva lotó,” NW], Haʻu, o kai i he eku ma, o inu i he uaine kuou huiʻi e au. Liaki ae kau vale, ka ke moui; bea ke alu i he hala [mahinó].”—Palovepi 9:​3-6, PM.

Kuo fekauʻi atu ʻe poto ʻene kau kaunangá ke nau ʻoatu ha fakaafe. Kuo nau ō ki he ngaahi feituʻu kakaí ʻa ia ʻe lava ke nau ui atu ai ki he fuʻu kakai tokolahi tahá. ʻOku fakaafeʻi ʻa e tokotaha kotoa—ko e faʻahinga ʻoku “masiva lotó,” pe ko e faʻahinga ʻoku ʻikai te nau maʻu ʻa e mahinó, pea pehē ki he faʻahinga ʻoku ʻikai haʻanau taukeí. (Palovepi 9:4) Pea ʻoku tuku atu kiate kinautolu ha talaʻofa ki he moʻuí. Ko e poto ʻoku ʻi he Folofola ʻa e ʻOtuá, ʻo kau ai ʻa ia ʻoku ʻi he tohi ʻa Palovepí, ʻoku ala maʻu moʻoni ia ki he meimei tokotaha kotoa pē. ʻI he ʻahó ni, ʻi he femoʻuekina ʻa e kau talafekau ʻo e poto moʻoní, ʻa e Kau Fakamoʻoni ʻa Sihová ʻi hono fakaafeʻi ʻo e kakaí, ʻi ha feituʻu pē ʻoku maʻu ai kinautolu, ke ako ʻa e Tohitapú. Ko e moʻoni, ko hono maʻu ʻa e ʻilo ko ení, ʻoku lava ke taki atu ia ki he moʻui taʻengatá.​—Sione 17:3.

Kuo pau ke tali anga-fakatōkilalo ʻe he kau Kalisitiané ʻa e akonaki ʻa potó. ʻOku moʻoni eni tautefito ʻi he kau talavoú pea mo e faʻahinga kuo nau toki kamata ke ako ki muí ni ʻo fekauʻaki mo Sihová. Koeʻuhi ko e fakangatangata ʻa e taukei ʻi he ngaahi founga ʻa e ʻOtuá, ʻoku nau “masiva loto” nai. ʻOku ʻikai ʻuhinga ia ko e kotoa ʻo ʻenau ngaahi fakaueʻilotó ʻoku kovi, ka ʻoku fiemaʻu ʻa e taimi mo e feinga ke ʻomai ʻa e lotó ki ha tuʻunga ʻa ia ʻoku fakahōifuaʻi moʻoni ai ʻa Sihova ko e ʻOtuá. ʻOku fiemaʻu ki he meʻá ni ʻa hono ʻomai ʻa e ngaahi fakakaukaú, ngaahi holí, ngaahi manakó, mo e ngaahi taumuʻá ke fehoanaki mo e meʻa ʻoku hōifua ki ai ʻa e ʻOtuá. He mātuʻaki mahuʻinga ē ke nau “holi lahi, o hage koe fānau toki faeleʻi, ki he hua huhu taekākā oe folofola.”—1 Pita 2:​2, PM.

Ko hono moʻoní, ʻikai ʻoku totonu kiate kitautolu hono kotoa ke tau fakalaka atu ʻi he “tokāteline tefitó”? Ko e moʻoni ʻoku fiemaʻu ke tau fakatupu ha mahuʻingaʻia ʻi he “gaahi mea loloto [ʻa e] Otua” pea maʻu ʻa e meʻakai mei he meʻakai mālohi ʻoku maʻá e kakai matuʻotuʻá. (Hepelu 5:12–​6:​1, NW; 1 Kolinito 2:​10, PM) Ko e “tamaioeiki agatonu mo boto,” ʻa ia ʻoku tokangaʻi fakahangatonu ʻe Sīsū Kalaisí, ʻoku nau tokonaki tōtōivi ʻa e meʻakai fakalaumālie taimi totonu ki he tokotaha kotoa. (Mātiu 24:​45-47, PM) ʻOfa ke tau kai ʻi he tēpile ʻa potó ʻaki ʻetau ako tōtōivi ʻa e Folofola ʻa e ʻOtuá pea mo e ngaahi tohi makatuʻunga ʻi he Tohitapú kuo tokonaki mai ʻe he kalasi tamaioʻeikí.

“ʻOua ʻe Valokiʻi ha Taha Manuki”

Ko e ngaahi akonaki ʻa potó ʻoku toe kau ai ʻa e fakatonutonu mo e valoki. Ko e tafaʻaki ko eni ʻo e potó ʻoku ʻikai ke tali lelei ia ʻe he tokotaha kotoa. Ko ia ai, ko e fakaʻosi ʻo e ʻuluaki konga ʻo e tohi ʻa Palovepí ʻoku ʻi ai ha fakatokanga: “Ko ia ʻoku ne akonakiʻi ha taha ʻoku manuki, ko ʻene kole pe ha taukae maʻana. Pea ko ia ʻoku ne valokiʻi ha pauʻu, talu ai ʻene mele. ʻOua ʻe valokiʻi ha taha manuki, naʻa ne fehiʻa kiate koe.”—Palovepi 9:​7, 8a.

ʻOku tātānaki ʻe he tokotaha manukí ʻa e ʻita mo e tāufehiʻa ki he tokotaha ʻoku feinga ki ha tokoni ke ʻai ke hangatonu ʻa hono halá. Ko e tokotaha fulikivanú ʻoku ʻikai haʻane houngaʻia ki he mahuʻinga ʻo e valokí. He taʻefakapotopoto ē ke feinga ke akoʻi ʻa e moʻoni fakaʻofoʻofa ʻo e Folofola ʻa e ʻOtuá ki ha taha ʻoku fehiʻa ʻi he moʻoní pe ʻoku feinga pē ke manukiʻi ia! ʻI he taimi naʻe malanga ai ʻa e ʻapositolo ko Paulá ʻi ʻAniteoké, naʻá ne fetaulaki ai mo ha kulupu ʻo e kau Siú ʻa ia naʻe ʻikai haʻanau ʻofa ki he moʻoní. Naʻa nau feinga ke fakakau mai ia ʻi ha fakakikihi ʻaki hono fakafepakiʻi kovi ia, ka naʻe pehē pē ʻe Paula: “ʻI he ʻiloange kuo mou fakataleʻi [ʻa e Folofola ʻa e ʻOtuá], pea mou fakamoʻoni ai ʻe kimoutolu ki hoʻomou taʻe tau mo e moʻui taʻengata, vakai, ko ʻema hiki ʻeni ki he Senitaile.”—Ngāue 13:​45, 46.

ʻI heʻetau feinga ke aʻu ki he faʻahinga loto-totonú mo e ongoongo lelei ʻo e Puleʻangá, ʻofa ke tau tokanga ke ʻoua ʻe kau ʻi he ngaahi tipeiti mo e ngaahi fakakikihi mo e kau manukí. Naʻe fakahinohino ʻe Kalaisi Sīsū ki heʻene kau ākongá: “ʻI hoʻomou hū ki he fale, tapuakiʻi ia. Pea kapau ʻoku tāu moʻoni ʻa e fale, ʻe toka ai hoʻomou tāpuaki; pea kapau ʻoku ʻikai tāu, pea ko hoʻomou tāpuaki ʻe foki mai. Pea ʻilonga ʻa ia ʻe ʻikai te ne tali kimoutolu, pe maʻu hoʻomou ngāhi lea, pea ka mou ka hū mai mei he fale ko ia, pe ko e kolo, mou tūtūʻi hono efu mei homou vaʻe.”—Mātiu 10:​12-14.

Ko e tali ʻa e tokotaha potó ki he valokí ʻoku fehangahangai ia mo e tali ʻa ha tokotaha manuki. ʻOku pehē ʻe Solomone: “Valokiʻi ha taha poto, pea te ne ʻofa kiate koe. ʻAtu ha poto ki ha taha ʻoku poto, pea ʻe fakautuutu ʻene poto.” (Palovepi 9:8e, 9a) ʻOku ʻiloʻi ʻe ha tokotaha poto “ka fai ha [akonaki], talaʻehai ʻoku tau ongoʻi leva ko e meʻa fakafiefia ia, kaekehe, ko e meʻa fakamamahi: ka ʻe faifai pea tupu ai kiate kinautolu kuo ʻosi ʻa ako ai, ha fua ʻoku hoa mo e melino, ko e koto maʻoniʻoni.” (Hepelu 12:11) Neongo ʻe hā ngali fakamamahi ʻa e faleʻí, ko e hā ke tau fakafepakiʻi ai pe feinga ke fakaʻehiʻehi mei ai kapau ko hono tali iá te ne ʻai ai kitautolu ke tau toe poto lahi ange?

“ʻOatu ʻa e ʻiló ki ha taha māʻoniʻoni pea te ne tupulekina ʻi he meʻa ʻokú ne ʻiló,” ko e hoko atu ia ʻa e tuʻi potó. (Palovepi 9:9e, NW) ʻOku ʻikai ha taha ʻe fuʻu poto pe fuʻu motuʻa ke hokohoko atu ʻene akó. He meʻa fakafiefia ē ke sio ki he faʻahinga naʻa mo e ʻi honau taʻumotuʻá ʻoku nau tali ʻa e moʻoní pea fai ha fakatapui kia Sihova! ʻOfa ke tau feinga mo kitautolu foki ke tauhi maʻu ʻa e loto-lelei ke ako pea tauhi ke longomoʻui ʻa e ʻatamaí.

“E Fakalahi moe Taʻu o Hoo Moui”

Ko hono fakamamafaʻi ʻa e poini tefito ʻo e kaveinga ʻoku fai ki ai ʻa e lāuleá, ʻoku fakakau ai ʻe Solomone ʻa e meʻa ʻoku ʻikai ala tuku ʻa hono fiemaʻu ki he potó. ʻOkú ne tohi: “Koe manavhe kia Jihova koe kamataaga ia oe boto: bea koe ilo oe [Tokotaha Fungani Māʻoniʻoní] ko e maʻu ʻatamai ia.” (Palovepi 9:​10, PM) ʻE ʻikai lava ke ʻi ai ha poto fakaʻotua ʻo taʻekau ai ha manavahē anga-ʻapasia lahi, ki he ʻOtua moʻoní. ʻOku maʻu nai ʻe ha taha ha ʻatamai kuo fakafonu lelei ʻaki ʻa e ʻiló, ka ʻo kapau ʻoku ʻikai te ne manavahē kia Sihova, ʻe ʻikai malava ke ne ngāueʻaki ʻa e ʻilo ko iá ʻi ha founga ʻoku fakalāngilangiʻi ai ʻa e Tokotaha-Fakatupú. ʻE aʻu nai ʻo ne aʻu ki ha ngaahi fakamulituku fehālaaki mei he ngaahi moʻoniʻi meʻa ʻokú ne ʻiló, ʻo ʻai ia ke ne hā ngali sesele. ʻIkai ngata aí, ko e ʻiloʻi ʻo Sihová, ʻa e Tokotaha Fungani Māʻoniʻoní, ʻoku ʻikai ala tuku ia ki hono maʻu ʻa e mahinó, ko ha anga ʻiloa ia ʻo e potó.

Ko e hā ʻa e fua ʻoku ʻomai ʻe potó? (Palovepi 8:​12-​21, 35) ʻOku pehē ʻe he tuʻi ʻo ʻIsilelí: “He koe mea iate au e fakalahi ho gaahi aho, bea e fakalahi moe taʻu o hoo moui.” (Palovepi 9:​11, PM) Ko e ngaahi ʻaho mo e ngaahi taʻu lōloa ʻo e moʻuí ʻa e ola ʻo e feohi mo e potó. ʻIo, “oku foaki e he boto ae moui kiate kinautolu oku maʻu ia.”—Koheleti 7:​12, PM.

Ko e fai ha feinga ke maʻu ʻa e potó ko hotau fatongia fakafoʻituitui ia. ʻI hono fakamamafaʻi ʻo e moʻoniʻi meʻa ko ení, ʻoku pehē ʻe Solomone: “Kapau ʻoku ke poto, ko e poto maʻau; pea kapau ʻoku ke [manuki], ko koe pe ʻe to ki ai.” (Palovepi 9:12) Ko e tokotaha potó ʻoku ʻaonga pē kiate ia ʻa ʻene potó, pea ko e tokotaha manukí pē ʻe tukuakiʻi ki heʻene faingataʻaʻia ʻaʻaná. Ko e moʻoni, ʻoku tau utu pē ʻa e meʻa ʻoku tau toó. ʻOfa ke tau ‘tokaga [leva] ki he botó.’​—Palovepi 2:​2, PM.

“Oku Faa Logoaa ae Fefine Vale”

ʻI he founga mātuʻaki kehé, ʻoku hoko atu ʻa Solomone ʻo pehē: “Oku faa logoaa ae fefine vale: oku tae boto ia, oku ikai te ne ilo ha mea. He oku nofo ia i he mataba o hono fale, i he hekaaga i he gaahi botu maoluga oe kolo, Ke ui ki he kakai fonoga, akinautolu oku alu totonu atu i ho nau hala: Kohai ia oku tae [taukei], ke afe mai ia ki heni.”—Palovepi 9:​13-16, PM.

ʻOku fakatātaaʻi ʻa e valé ko ha fefine longoaʻa, taʻemataʻofi, mo taʻeʻilo. Ko ia foki kuó ne langa ha fale. Pea kuó ne fai ʻe ia tonu ʻa e ngāue ʻa ia ko e ui ki ha taha pē ʻoku taʻetaukei. Ko ia ko e kau fononga hake aí ʻoku ʻi ai ʻa e fili ke nau fai. Te nau tali ʻa e fakaafe ʻa potó pe ko e fakaafe ʻa valé?

“Koe Vai Oku Kaihaaji Oku Melie Ia”

Ko e potó mo e valé fakatouʻosi ʻokú na fakaafeʻi ʻa e kau fanongó ke nau ‘afe mai ki heni.’ Kae kehe, ko e kolé, ʻoku kehekehe. ʻOku fakaafeʻi ʻe poto ʻa e kakaí ki ha kātoanga ʻo e uaine, kakanoʻi manu, mo e mā. Ko e fakaʻofoʻofa ʻoku tuʻuaki mai ʻe valé ʻoku fakamanatu mai ai kiate kitautolu ʻa e ngaahi founga ʻa e fefine ʻikai ʻulungaanga maʻá. ʻOku pehē ʻe Solomone: “Oku ne lea, o behe kiate ia, oku [“masiva lotó,” NW], Koe vai oku kaihaaji oku melie ia, bea oku ifoifo lelei ae ma oku kai fakafufu.”—Palovepi 9:​16e, 17, PM.

ʻI he ʻikai ko e uaine kuo huʻí, ʻoku tuʻuaki ʻe he “fefine Taʻepotó” ʻa e vai kuo kaihaʻasi. (Palovepi 9:​13, New International Version) ʻI he ngaahi Konga Tohitapú, ko e hokosia ʻa e fiefia ʻi he fehokotaki fakasino mo ha uaifi ʻofeiná ʻoku fakatatau ia ki he inu mei he vai fakaivifoʻou. (Palovepi 5:​15-​17) Ko e vai ʻoku kaihaʻasí leva, ʻokú ne fakafofongaʻi ʻa e ngaahi vā fakaefehokotaki fakasino taʻetaau ʻoku fakahoko ʻi he fakapulipulí. Ko e ngaahi vai peheé ʻoku ʻai ia ke hā melie—ʻo lelei ange ʻi he uainé—koeʻuhi ʻoku kaihaʻasi kinautolu pea fakahoko ai ʻa e foʻi fakakaukau ʻo e hola ʻo hao mei ha meʻa. Ko e mā ʻoku kai fakapulipulí ʻokú ne ʻai ke hā ʻoku ifo ange ia ʻi he mā mo e kakanoʻi manu ʻa potó tonu koeʻuhi ʻoku maʻu ia ʻi he ngaahi founga taʻetotonu. Ko e vakai ʻoku fakaʻofoʻofa ʻa e meʻa ʻoku tapui mo fakapulipulí ko ha fakaʻilonga ia ʻo e valé.

Lolotonga ʻoku kau ʻi he fakaafe ʻa potó ʻa e talaʻofa ki he moʻuí, ʻoku ʻikai ke fai ha lave ʻa e fefine valé ki he ngaahi nunuʻa ʻo e muimui ki heʻene ngaahi foungá. Ka ʻoku fakatokanga mai ʻa Solomone: “Ka koloto ke ne ʻilo koni ʻangaʻanga hena; pea ko ʻene kau fakaafe ʻoku ʻi he takele ʻo Hetesi.” (Palovepi 9:18) “Ko e fale ʻo e fefine Taʻepotó ʻoku ʻikai ko ha ʻapi ia ka ko ha fonualoto,” ko e tohi ia ʻa ha mataotao ʻe taha. “Kapau te ke hū ki ai ʻe ʻikai te ke mavahe moʻui mai mei ai.” Ko e muimui ʻi ha sīpinga moʻui taʻetāú ʻoku ʻikai ke fakapotopoto; ʻoku fakatupu mate ia.

Naʻe pehē ʻe Sīsū Kalaisi: “Mou hu ʻi he matapa fāsiʻi: he ʻoku fālahi ʻa e matapa, pea ʻatā ʻa e hala, ʻoku fakatau ki mala, pea toko lahi ʻa e kakai ʻoku hū atu ai: koeʻuhi ʻoku fāsiʻi ʻa e matapa, pea ʻefiʻefi ʻa e hala, ʻoku fakatau ki he moʻui; pea tokosiʻi ʻa e kakai ʻoku ʻilo ia.” (Mātiu 7:​13, 14) ʻOfa ke tau kai maʻu pē ʻi he tēpile ʻa potó pea hoko ʻo ʻi he lotolotonga ʻo e faʻahinga ko ia ʻoku nau ʻi he hala ʻoku taki atu ki he moʻuí.

[Fakatātā ʻi he peesi 31]

ʻOku talitali lelei ʻe ha tokotaha poto ʻa e fakatonutonú

[Fakatātā ʻi he peesi 31]

Ko hono maʻu ʻa e potó ko ha fatongia fakafoʻituitui ia