ʻAʻeva ʻi he ‘Hala ʻo e Anga-Tonú’

“ʻE LELEI pē ʻa e māʻoniʻoní,” ko e talaki ia ʻe he palōfita ko ʻAiseá, “he te nau kai ʻa e fua tofu pē ko ia ʻo ʻenau ngaahi feangaingá.” Naʻe toe pehē ʻe ʻAisea: “Ko e hala ʻo e tokotaha māʻoniʻoní ʻoku anga-tonu.” (Aisea 3:​10, NW; Aisea 26:​7, NW) ʻOku hā mahino, kapau ko ʻetau ngaahi feangaingá ke fakatupu ai ʻa e fua lelei, kuo pau ke tau fai ʻa e meʻa ʻoku tonu ʻi he vakai mai ʻa e ʻOtuá.

Ko ia ai, ʻe anga-fēfē ke tau ʻaʻeva ʻi he hala ʻo e anga-tonú? Ko e hā ʻa e ngaahi tāpuaki ʻe lava ke tau ʻamanekina mei hono fai iá? Pea ʻe anga-fēfē nai ʻa e maʻu ʻaonga ʻa e niʻihi kehé mei heʻetau liliu ki he ngaahi tuʻunga māʻoniʻoni ʻa e ʻOtuá? ʻI he vahe 10 ʻo e tohi Tohitapu ʻa Palovepí, ʻoku tokonaki mai ai ʻe Tuʻi Solomone ʻo ʻIsileli ʻo e kuonga muʻá ʻa e ngaahi tali ki he ngaahi fehuʻi ko ení ʻi heʻene fakafaikehekeheʻi ʻa e māʻoniʻoní mei he fulikivanú. ʻI hono fai iá, ʻokú ne ngāueʻaki ʻa e kupuʻi lea “māʻoniʻoni” ʻo tuʻo 13. Ko e tuʻo hiva ʻo ʻene hokó ʻoku ʻi he veesi 15 ki he 32. Ko e lāulea leva ki he Palovepi 10:​15-​32, ʻe fakamoʻoniʻi ʻa ʻene fakalototoʻá.a

Pikimaʻu ki he Akonakí

ʻOku fakahaaʻi ʻe Solomone ʻa e mahuʻinga ʻo e māʻoniʻoní. ʻOkú ne pehē: “Koe kolo malohi oe tagata koloaia ko ene koloa: ka e auha ae majiva koe nau majiva. Oku tautonu ki he moui ae gaue ae maonioni: ka koe fua oe kakai agakovi ki he agahala.”​—Palovepi 10:​15, 16, PM.

ʻOku lava ke ngāue ʻa e koloá ko ha maluʻi mei he ngaahi veiveiua ʻi he moʻuí, hangē pē ko hono tokonaki mai ʻe ha kolo tau ha tuʻunga ʻo e malu ki he faʻahinga ʻoku nau nofo ʻi aí. Pea ʻoku lava ke fakatupu ʻauha ʻa e masivá ʻi he hoko ʻa e ngaahi meʻa taʻeʻamanekiná. (Koheleti 7:​12) Kae kehe, naʻe toe lava pē ke huʻuhuʻu ʻa e tuʻi potó ki ha fakatuʻutāmaki ʻe kau fakatouʻosi ki ai ʻa e koloaʻiá mo e masivá. ʻE hehema nai ha tangata koloaʻia ke tuku ʻene falala kakató ki heʻene koloá, ʻo fakakaukauloto ko ʻene ngaahi meʻa mahuʻingá ʻoku hangē ha “fuʻu ʻa maʻolunga [“maluʻí,” NW].” (Palovepi 18:11) Pea ko ha tokotaha masiva te ne fakakaukau fehālaaki nai ʻoku ʻai ʻe heʻene masivá ke siva ai ʻa e ʻamanaki ki hono kahaʻú. Ko ia ai, ʻokú na fakatou taʻemalava ke ʻai ha hingoa lelei ki he ʻOtuá.

ʻI he tafaʻaki ʻe tahá, pe ʻoku maʻu ʻe he tokotaha māʻoniʻoní ha meʻa lahi pe siʻisiʻi ʻi he tuʻunga fakamatelié, ko ʻene ngāue anga-tonú ʻe iku ia ki he moʻuí. Anga-fēfē? Sai, ʻokú ne fiemālie ʻi he meʻa ʻokú ne maʻú. ʻOku ʻikai te ne fakaʻatā ʻa hono tuʻunga fakapaʻangá ke ne felei ʻa hono tuʻunga fakahōifua ki he ʻOtuá. Pe ʻoku koloaʻia pe masiva, ko e ʻalunga moʻui ʻa e tangata māʻoniʻoní ʻoku ʻomai ai kiate ia ʻa e fiefia ʻi he taimí ni pea mo e ʻamanaki ki he moʻui taʻengata ʻi he kahaʻú. (Siope 42:​10-​13) ʻOku ʻikai maʻu ʻe he tokotaha fulikivanú ha ʻaonga neongo kapau ʻokú ne maʻu ʻa e koloá. ʻI he ʻikai houngaʻia ʻi hono mahuʻinga fakaemaluʻangá pea moʻui ʻo fakatatau ki he finangalo ʻo e ʻOtuá, ʻokú ne ngāueʻaki ʻa ʻene koloá ke pouaki ha moʻui angahalaʻia.

“Koia oku ne maʻu ae [“akonakí,” NW] oku i he hala ki he moui” ko e hoko atu ia ʻa e tuʻi ʻo ʻIsilelí, “ka koia oku liaki ae valoki oku he ia.” (Palovepi 10:​17, PM) ʻOku pehē ʻe he mataotao Tohitapu ʻe taha ʻe lava ke mahino ʻa e foʻi veesi ko ení ʻi he founga ʻe ua. Ko e tuʻunga ʻe taha ko e tokotaha ko ia ʻoku fakamoʻulaloa ki he akonakí pea tuli ki he māʻoniʻoní ʻokú ne ʻi he hala ki he moʻuí, neongo ia ko e tokotaha ʻokú ne liʻaki ʻa e valokí ʻoku hē mamaʻo ia mei he hala ko iá. ʻOku toe lava ke ʻuhinga ʻa e foʻi vēsí “ko ia ʻoku tokanga ki he akonakí ʻokú ne fakahaaʻi ʻa e hala ki he moʻuí [ki he niʻihi kehé koeʻuhi ʻoku ʻaonga kiate kinautolu ʻa ʻene faʻifaʻitakiʻanga leleí], kae ʻilonga ia ʻokú ne tukunoaʻi ʻa e fakatonutonú ʻokú ne takiheeʻi ʻa e niʻihi kehé.” (Palovepi 10:​17, New International Version) Ko e hā pē ʻa e tuʻungá, he mātuʻaki mahuʻinga moʻoni ē ke tau pikimaʻu ki he akonakí pea ʻoua ʻe liʻaki ʻa e valokí!

Fetongi ʻa e Fehiʻá ʻAki ʻa e ʻOfá

ʻOku hoko atu ʻa Solomone ʻo ʻomai ha palōveepi konga ua ʻoku ʻomai ai ʻa e fakakaukau meimei tatau, ʻo fakafefekaʻi ʻe he konga hono uá ʻa e ʻuluakí. ʻOkú ne pehē: “Koia oku fufu ene fehia aki ae lougutu loi.” Kapau ʻoku maʻu ʻe ha tangata ha fehiʻa ʻi hono lotó ki ha taha pea ʻokú ne fufū ia ʻi ha ngaahi lea ongo lelei pe fakahekeheke, ʻokú ne hoko ai ʻo kākā​—ʻokú ne maʻu ʻa e “lougutu loi.” ʻI he meʻá ni ʻoku tānaki mai ʻe he tuʻi potó: “[Ko] ia oku leaaki ae mea fakakoviʻi [“līpooti kovi,” NW], oku . . . vale.” (Palovepi 10:​18, PM) ʻI he ʻikai ke fufū ʻenau fehiʻá, ʻoku fai ʻe he kakai ʻe niʻihi ʻa e ngaahi tukuakiʻi loi pe fakamafola ha ngaahi fakamatala māʻulalo ʻo fekauʻaki mo e tokotaha ʻoku nau fehiʻa aí. ʻOku fakasesele eni koeʻuhi ko e līpooti lauʻikovi loí ʻoku ʻikai moʻoni te ne liliu ʻe ia ʻa e tokotaha ko iá. Pea ko ha tokotaha fanongo ʻiloʻilo te ne hoko ʻo ʻiloʻi ʻa e loto-koví pea ʻe siʻi ai ʻa ʻene tokaʻi ʻa e tokotaha lauʻikovi loí. Ko ia ai, ko e tokotaha ʻokú ne fakamafola ha līpooti koví ʻokú ne fakatupu maumau kiate ia tonu.

Ko e ʻalunga māʻoniʻoní ko e ʻikai ke hanga ki he kākaá pe ki he lauʻikovi loí. Naʻe tala ʻe he ʻOtuá ki he kau ʻIsilelí: “ʻE ʻikai te ke tauhi ʻi ho loto ʻa e fehiʻa ki ho tokoua.” (Livitiko 19:17) Pea naʻe akonaki ʻa Sīsū ki heʻene kau fanongó: “Mou ʻofaʻi [naʻa mo] homou ngāhi fili, pea hufia ʻa kinautolu ʻoku nau fakatangaʻi kimoutolu. Koeʻuhi ke mou hokosi hoʻomou Tamai ʻoku ʻi Hevani.” (Mātiu 5:​44, 45) He lelei lahi ange ē ke fakafonu hotau lotó ʻaki ʻa e ʻofá kae ʻikai ko e fehiʻá!

‘Fakamaʻumaʻu ʻa e Loungutú’

ʻI hono fakamamafaʻi ʻa e fiemaʻu ke mapuleʻi ʻa e ʻeleló, ʻoku fakamatala ʻa e tuʻi potó: “Ka lahi ha lea ʻe ʻikai hala ha angahala: ka ko ia ʻoku fakamaʻumaʻu hono loungutu ko e poto ia.”​—Palovepi 10:19.

“Ko e vale ʻoku ne fakalahi lau.” (Koheleti 10:​14) Ko hono ngutu “ʻoku ne huhua atu ʻene sesele.” (Palovepi 15:2) ʻOku ʻikai ke pehē ia heni ko e tokotaha faʻa talanoa kotoa pē ko ha sesele. Ka ko e meʻa faingofua ē ki ha tokotaha ʻa ia ʻoku lahi ʻene talanoá ke ne hoko ko ha fouʻanga ia ki hono fakamafola ʻa e lau fakatupu maumaú pe ko e muhú! Ko ha ongoongo kuo maumauʻi, ngaahi ongoʻi lavea, ngaahi vā fetēleni, pea naʻa mo e maumauʻi fakaesinó ʻoku faʻa lava ke tupu ia ʻi he lea fakaseselé. “ʻI he lahi ʻa e ngaahi foʻi leá, ʻe ʻikai ke mamaʻo mei ai ʻa e angahalá.” (Palovepi 10:​19, An American Translation) ʻIkai ngata aí, ʻoku fakatupu ʻita ke ʻi he ʻao ʻo ha tokotaha ʻa ia ʻoku lea ʻi he meʻa kotoa pē. ʻOfa ke ʻoua ʻe lahi ʻetau leá.

Laka hake ʻi he fakaʻehiʻehi pē mei he loí, ko e tokotaha ʻoku fakamaʻumaʻu ʻa hono loungutú ʻokú ne fai fakapotopoto. ʻOkú ne fakakaukau ki muʻa ke ne leá. ʻI hono ueʻi ʻe he ʻofa ki he ngaahi founga ʻa Sihová pea mo ha holi moʻoni ke tokoniʻi ʻa hono kaungā faʻahinga ʻo e tangatá, ʻokú ne fakakaukau ki he ikuʻanga ʻo ʻene ngaahi leá ki he niʻihi kehé. Ko ʻene ngaahi fakamatalá ʻoku fai ʻofa mo anga-ʻofa. ʻOkú ne fakalaulauloto ki he founga ke ʻai ai ʻa e meʻa ʻokú ne leaʻakí ke fakamānako mo ʻaonga. Ko ʻene ngaahi leá ʻoku hangē ko e “apele koula ʻi he ainga siliva”​—ʻo pōtoʻi mo fakangeingeia ʻi he taimi kotoa pē.​​—Palovepi 25:11.

“Fafagaʻi ae Toko Lahi”

“Oku tatau moe siliva lelei ae elelo oe [“māʻoniʻoní,” NW],” ko e hoko atu ia ʻa Solomoné, “oku tae aoga ae loto oe agahala.” (Palovepi 10:​20, PM) Ko e meʻa ʻoku leaʻaki ʻe he māʻoniʻoní ʻoku maʻa​—ʻo hangē ko e siliva lelei, ʻosi sivi, ʻo ʻatā mei he ʻulí. ʻOku hoko moʻoni ʻaupito eni ʻi he kau sevāniti ʻa Sihová ʻi heʻenau ʻoatu ʻa e ʻilo fakahaofi moʻui ʻo e Folofola ʻa e ʻOtuá ki he niʻihi kehé. Ko honau Tokotaha-Faiako Maʻongoʻongá, ʻa Sihova ko e ʻOtuá, kuó ne akoʻi kinautolu pea ‘ʻomi kiate kinautolu ʻa e ʻelelo ʻo e faʻahinga akó, ke nau ʻilo ʻa e ngaahi lea ke tokoniʻaki ʻa e ongosiá.’ (Aisea 30:20; 50:4) Ko e moʻoni, ko honau ʻeleló ʻoku hangē ko e siliva leleí ʻi heʻene leaʻaki ʻa e moʻoni faka-Tohitapú. He mahuʻinga lahi taʻehanongataʻanga ē ko ʻenau ngaahi leá ki he faʻahinga loto-totonú ʻo laka ia ʻi he ngaahi taumuʻa ʻa e tokotaha fulikivanú! ʻAi ke tau vēkeveke ke lea fekauʻaki mo e Puleʻanga ʻo e ʻOtuá pea mo e ngaahi ngāue fakaofo ʻa e ʻOtuá.

Ko e tokotaha māʻoniʻoní ko ha tāpuaki ia ki he faʻahinga takatakai ʻiate iá. “Oku fafagaʻi ae toko lahi e he lougutu oe maonioni,” ko e hoko atu ia ʻa Solomoné, “ka oku mate ae kakai vale koe mea i he e nau majiva boto.”​—Palovepi 10:​21, PM.

ʻOku anga-fēfē ʻa e “fafagaʻi ae toko lahi e he . . . maonioni”? Ko e foʻi lea faka-Hepelū ʻoku ngāueʻaki hení ʻoku ʻomai ai ʻa e fakakaukau fekauʻaki mo e “ngāue tauhi-sipí.” (Palovepi 10:​21, NW, fakamatala ʻi laló) ʻOku ʻomai ai ʻa e fakakaukau ʻo e fakahinohino pea pehē ki he fafangaʻi, ʻo hangē pē ko e tokangaʻi ʻe ha tauhi-sipi ʻo e kuonga muʻá ʻa ʻene fanga sipí. (1 Samuela 16:11; Sāme 23:​1-3; Hiva o e Hiva 1:7) Ko e tokotaha māʻoniʻoní ʻokú ne fakahinohino pe tataki ʻa e niʻihi kehé ki he hala ʻo e māʻoniʻoní, ʻo fafangaʻi ʻe heʻene leá ʻa ʻene kau fanongó. Ko hono olá, ʻoku nau tataki ha moʻui fiefia ange, mo fakafiemālie ange, pea ʻau nai ai ʻo maʻu ʻa e moʻui taʻengatá.

Neongo ia, fēfē ʻa e tokotaha valé? ʻI he hoko ʻo masiva lotó, ʻokú ne fakahaaʻi ʻa e ʻikai ha taumuʻa lelei pe tokanga fekauʻaki mo e ngaahi nunuʻa ʻo hono ʻalungá. Ko ha tokotaha pehē ʻokú ne fai ʻa e meʻa ko ia ʻokú ne loto ki aí, ʻo ʻikai te ne tokanga ki hono ngaahi olá. Mei hení, ʻokú ne fuesia ai ʻa e ngaahi tautea ʻo ʻene tōʻongá. Lolotonga ʻoku tokoni ʻa e tokotaha māʻoniʻoní ke tauhi ke moʻui ʻa e niʻihi kehé, ko e tokotaha masiva lotó ʻoku ʻikai lava ke ne tauhi naʻa mo ia tonu ke moʻui.

Liʻaki ʻa e ʻUlungaanga Tākatuʻú

Ko e angaʻitangata ʻo ha tokotaha ʻoku faʻa fakaeʻa ia ʻe he ngaahi meʻa ʻokú ne saiʻia aí mo ia ʻokú ne fehiʻa aí. ʻI hono fakamatalaʻi ʻa e foʻi moʻoni ko ení, ʻoku pehē ʻe he tuʻi ʻo ʻIsilelí: “Ki he tokotaha valé ko e hokohoko atu ʻa e ʻulungaanga tākatuʻú ʻoku hangē ia ha sipotí, ka ko e potó ʻoku maʻá e tangata ʻiloʻiló ia.”​​—Palovepi 10:​23, NW.

ʻOku vakai ʻa e niʻihi ki he ʻulungaanga tākatuʻú ko ha sipoti, pe ko ha vaʻinga, pea kau ai ki heʻene “fakaoliʻiá” pē. ʻOku taʻetokaʻi ʻe he kakai peheé ʻa e ʻOtuá ʻi hono tuʻunga ko e tokotaha ʻa ia kuo pau ke fai ha fakamatala ki ai ʻa e tokotaha kotoa pea ʻoku nau fakakuikui ai pē ki he tuʻunga fehālaaki ʻo honau ʻalungá. (Loma 14:12) ʻOku nau hoko ʻo hē ʻi heʻenau fakaʻuhingá ʻo aʻu ki he tuʻunga ʻo e pehē ʻoku ʻikai ke sio mai ʻa e ʻOtuá ia ki heʻenau faihalá. ʻI heʻenau ngaahi tōʻongá, ko hono moʻoní ʻoku nau pehē: “Oku ʻikai ha ʻOtua.” (Sāme 14:​1-3; Aisea 29:​15, 16) He fakasesele moʻoni ē!

Ko e tangata ʻiloʻiló, ʻi he tafaʻaki ʻe tahá, ʻokú ne ʻiloʻi ko e ʻulungaanga tākatuʻú ʻoku ʻikai ko ha sipoti ia. ʻOkú ne ʻiloʻi ʻoku taʻefakahōifuaʻi ai ʻa e ʻOtuá pea ʻe lava ke ne fakaʻauha ʻa e vahaʻangatae ʻo ha tokotaha pea mo ia. Ko e ʻulungaanga peheé ʻoku fakasesele koeʻuhi ʻokú ne kaihaʻasi mei he kakaí ʻa e tokaʻi-kitá, maumauʻi ʻa e ngaahi nofo malí, maumauʻi fakatouʻosi ʻa e ʻatamaí mo e sinó, pea taki atu ai ki he mole ʻa e houngaʻia ki he meʻa fakalaumālié. ʻOku tau fakapotopoto ke liʻaki ʻa e ʻulungaanga tākatuʻú pea fakatupulekina ʻa e ʻofa ki he potó ʻo hangē ko e fai ki siʻa tuofefine ʻofeiná.​​—Palovepi 7:4.

Langa ʻi he Makatuʻunga Totonú

ʻI hono fakahaaʻi ʻa e mahuʻinga ʻo hono langa ʻa e moʻui ʻa ha taha ʻi ha makatuʻunga totonú, ʻoku fakamatala ʻa Solomone: “E hoko mai be ki he agahala a ene manavahe: ka e foaki ki he maonioni ae mea oku ne holi ki ai. O hage koe mole atu ae [“afā,” NW] oku behe ae agahala: ka oku i he maonioni ae [“maka,” NW] tuuga taegata.”​—Palovepi 10:​24, 25, PM.

ʻE fakatupunga nai ʻe he tokotaha fulikivanú ʻa e ilifia lahi ki he niʻihi kehé. Kae kehe, ʻi he ikuʻangá, ko e meʻa ʻokú ne manavahē ki aí ʻe hoko mai ia kiate ia. ʻI he ʻikai ha makatuʻunga ʻi he ngaahi tefitoʻi moʻoni māʻoniʻoní, ʻokú ne hangē ai ko ha langa ʻoku ʻikai fefeka ʻa ia ʻoku holofa ʻi ha afā mālohí. ʻOkú ne holo ʻi he malumalu ʻo e tengé. ʻI he tafaʻaki ʻe tahá, ko e tokotaha māʻoniʻoní ʻoku hangē ia ko e tangata ʻoku ngāue ʻo fehoanaki mo e ngaahi lea ʻa Sīsuú. Ko iá ko ha “tangata fakapotopoto, ʻa ia naʻa ne langa hono fale ki he maka.” “Pea,” naʻe pehē ʻe Sīsū, “naʻe to ʻa e ʻuha, pea tafe mai ʻa e ngāhi vai, pea angi ʻa e ngāhi matangi, ʻo nau faʻafaʻaki ki he fale ko ia: ka naʻe ʻikai holo, he ne tuʻunga ki he maka.” (Mātiu 7:​24, 25) Ko ha tokotaha pehē ʻoku fefeka ia​—ko ʻene fakakaukaú mo e ngaahi tōʻongá ʻoku makatuʻunga fefeka ia ʻi he ngaahi tefitoʻi moʻoni fakaʻotuá.

Ki muʻa ke hoko atu ki he faikehekehe ʻi he vahaʻa ʻo e fulikivanú mo e māʻoniʻoní, ʻoku ʻomai ʻe he tuʻi potó ha fakatokanga nounou kae mahuʻinga. ʻOkú ne pehē: “Hange ko e vinika ki he nifo, pea hange ko e ʻahu ki he mata, ʻoku pehe ʻa e [“tangata fakapikopikó,” NW] kiate kinautolu naʻe fekau ia.” (Palovepi 10:26) Ko e viniká ko ha tupuʻanga ia ʻo e taʻefiemālie ki he nifó. Ko e ʻēsiti mahi ʻoku ʻi aí ʻokú ne ʻomai ha ifo mahi ki he ngutú pea ʻoku lava ke ne fakatupunga hoto nifó ke maninia. ʻOku ʻai ʻe he ʻahú ke mamahi ʻa e matá pe lalave. Fakatatau ki ai, ʻilonga ia ʻokú ne totongi ha tokotaha fakapikopiko pe ngāueʻaki ia ko ha fakafofonga ʻoku pau ke hohaʻa ia peá ne fuesia ʻa e mole fakapaʻanga.

“Koe Hala o Jihova koe Kolo Malohi”

ʻOku hoko atu ʻa e tuʻi ʻo ʻIsilelí: “Oku fakalahi ae gaahi aho e he manavahe kia Jihova: ka e fakanounou ae gaahi taʻu oe agahala. Koe amanaki lelei oe maonioni koe fiefia ia: ka e auha ae amanaki oe agahala.”​—Palovepi 10:​27, 28, PM.

Ko e tokotaha māʻoniʻoní ʻoku tataki ia ʻe he manavahē fakaʻotuá pea ʻokú ne feinga ke fakahōifuaʻi ʻa Sihova ʻaki ʻene ngaahi fakakaukaú, ngaahi leá, mo e ngaahi ngāué. ʻOku tokanga ʻa e ʻOtuá kiate ia pea fakahoko ʻa ʻene ngaahi ʻamanaki māʻoniʻoní. Kae kehe, ʻoku nofo ʻa e tokotaha fulikivanú ʻi ha moʻui fakaʻotuamate. Ko ʻene ngaahi ʻamanakí ʻi he taimi ʻe niʻihi ʻoku hā kuo fakahoko ka ʻoku fakataimi pē, he ko hono ngaahi ʻahó ʻoku faʻa fakanounou ia ʻe he fakamālohí pe ko ha taʻemanonga ko e tupu mei he tōʻonga moʻuí. ʻI he ʻaho ʻo ʻene maté ʻoku movete ai ʻa e kotoa ʻo ʻene ngaahi ʻamanakí.​​—Palovepi 11:7.

“Koe hala o Jihova koe [“kolo,” NW] malohi ia ki he agatonu,” ko e lea ia ʻa Solomoné, “kae hoko ae fakaauha kiate kinautolu oku gaue i he agahala.” (Palovepi 10:​29, PM) Ko e hala ʻo Sihova ʻi hení ʻoku ʻuhinga ia, ʻo ʻikai ki he hala ʻo e moʻuí ʻa ia ʻoku totonu ke tau ʻaʻeva aí, ka ki he founga ʻo e feangainga ʻa e ʻOtuá mo e faʻahinga ʻo e tangatá. “Ko Makatuʻu ia​—ʻoku haohaoa ʻene ngaue,” ko e lea ia ʻa Mōsesé, “ko ʻene ngaahi founga kotoa ʻoku fakakonisitutone.” (Teutalonome 32:4) Ko e ngaahi founga totonu ʻa e ʻOtuá ʻoku ʻuhinga iá ko e maluʻanga ki he māʻoniʻoní pea mo e ʻauha ki he fulikivanú.

Ko ha kolo mālohi moʻoni ē ko Sihova ki hono kakaí! “E ikai aubito faa ueʻi ae maonioni o taegata: bea e ikai nofo i mamani ae kakai agahala. Oku omi mei he gutu oe [“māʻoniʻoní,” NW] ae boto: ka e motuhi ae elelo oe talagataa. Oku ilo e he lougutu oe maonioni ae mea oku lelei: ka oku leaaki ae kovi e he gutu oe agahala.”​—Palovepi 10:​30-32, PM.

ʻOku lavameʻa moʻoni ʻa e māʻoniʻoní pea ʻoku faitāpuekina koeʻuhi ko ʻenau ʻaʻeva ʻi he hala ʻo e anga-tonú. Ko e moʻoni, “ko e tapuaki ʻa Sihova, ko ia ia ʻoku fakakoloa: pea ʻoku ʻikai te ne ʻatu mo ia ha mamahi.” (Palovepi 10:22) Ko ia ai, ʻofa ke tau fakapapauʻi maʻu pē ke ngāue ʻo fehoanaki mo e ngaahi tefitoʻi moʻoni fakaʻotuá. Ke tau toe fakamaʻumaʻu foki hotau loungutú pea ngāueʻaki hotau ʻeleló ke akoʻi ʻa e niʻihi kehé ʻaki ʻa e moʻoni fakahaofi moʻui ʻo e Folofola ʻa e ʻOtuá pea tataki kinautolu ki he hala ʻo e māʻoniʻoní.

[Fakamatala ʻi lalo]

[Fakatātā ʻi he peesi 26]

ʻE lava ke hangē ʻa e ʻeleló ko e “siliva lelei”