Palōveepi

Ko ha foha poto ʻokú ne fakafiefiaʻi ʻa ʻene tamaí,+

Ka ko ha foha vale ko e mamahiʻanga ia ʻo ʻene faʻeé.

 2 Ko e koloa ʻoku maʻu ʻi he fulikivanú ʻe ʻikai hano ʻaonga,

Ka ʻoku fai ʻe he māʻoniʻoní ʻa e fakahaofi mei he maté.+

 3 ʻE ʻikai tuku ʻe Sihova ʻa e tokotaha māʻoniʻoní ke ʻalu fiekaia,+

Ka te ne taʻofi mei he kau fulikivanú ʻa e meʻa ʻoku nau havala ki aí.

 4 Ko e nima fakapikopikó te ne fakatupunga ʻa e masiva,+

Ka ko e nima faʻa ngāué ʻokú ne ʻomai ʻa e koloa.+

 5 Ko e foha ʻokú ne maʻu ʻa e vavanga fakaefakakaukaú ʻokú ne tānaki fua ʻi he faʻahitaʻu māfaná,

Ka ko e foha ʻoku mohe maʻu ʻi he lolotonga ʻa e taimi utu-taʻú ʻokú ne ʻomi kiate ia ʻa e tuʻunga fakamā.+

 6 ʻOku ʻi he ʻulu ʻo e tokotaha māʻoniʻoní ʻa e ngaahi tāpuaki,+

Ka ko e ngutu ʻo e kau fulikivanú ʻokú ne fufū ʻenau ngaahi taumuʻa fakamālohí.

 7 Ko e manatu ki he* tokotaha māʻoniʻoní ʻoku tuha ia mo ha tāpuaki,+

Ka ko e hingoa ʻo e kau fulikivanú ʻe popo.+

 8 Ko e tokotaha loto-potó te ne tali ʻa e ngaahi fakahinohinó,*+

Ka ko e tokotaha ʻoku lea valé ʻe tāmalaki.+

 9 Ko e tokotaha ʻoku ʻaʻeva ʻi he anga-tonú te ne ʻaʻeva ʻi he malu,+

Ka ko e tokotaha ʻokú ne pikoʻi hono ngaahi ʻalungá ʻe ʻiloʻi.+

10 Ko e tokotaha ʻoku kakamo kākā hono matá ʻokú ne fakatupunga ʻa e mamahi,+

Pea ko e tokotaha ʻoku lea valé ʻe tāmalaki.+

11 Ko e ngutu ʻo e tokotaha māʻoniʻoní ko ha matavai ia ʻo e moʻuí,+

Ka ko e ngutu ʻo e kau fulikivanú ʻokú ne fufū ʻenau ngaahi taumuʻa fakamālohí.+

12 Ko e tāufehiʻá ʻokú ne langaʻi ʻa e māvahevahé,

Ka ko e ʻofá ʻokú ne ʻufiʻufi ʻa e laka hala kotoa pē.+

13 ʻOku maʻu ʻa e potó ʻi he loungutu ʻo e tokotaha ʻiloʻiló,+

Ka ko e vaʻakaú ʻoku ʻai ia ki he tuʻa ʻo e tokotaha ʻoku ʻikai ke fakakaukau leleí.*+

14 Ko e faʻahinga ʻoku potó ʻoku nau tuku tauhi ʻa e ʻiló,+

Ka ko e ngutu ʻo e valé ʻokú ne fakaafeʻi mai ʻa e ʻauhá.+

16 Ko e ngāue ʻa e tokotaha māʻoniʻoní ʻoku iku atu ki he moʻui;

Ka ko e fua ʻoku maʻu ʻe he tokotaha fulikivanú ʻoku iku atu ki he angahala.+

17 Ko e tokotaha ʻoku tokanga ki he akonakí ko ha hala ia ki he moʻuí,*

Ka ko e tokotaha ʻokú ne tukunoaʻi ʻa e valokí ʻokú ne takiheeʻi ʻa e niʻihi kehé.

18 Ko e tokotaha ʻokú ne fufū ʻene tāufehiʻá ʻokú ne lea loi,+

Pea ko e tokotaha ʻokú ne fakamafola ʻa e ngaahi fakamatala fakalotokoví* ko e vale ia.

19 ʻI he lahi ʻa e leá, heʻikai lava ke hao ai mei he laka halá,+

Kae ʻilonga ʻa ia ʻokú ne mapuleʻi ʻa hono loungutú ʻokú ne fai fakapotopoto.+

20 Ko e ʻelelo ʻo e tokotaha māʻoniʻoní ʻoku hangē ia ko e siliva lelei tahá,+

Ka ko e loto ʻo e tokotaha fulikivanú ʻoku ʻikai meimei ʻi ai hano mahuʻinga.

21 Ko e loungutu ʻo e tokotaha māʻoniʻoní ʻokú ne fafangaʻi* ʻa e tokolahi,+

Ka ko e valé ʻokú ne mate ʻi he masiva fakakaukaú.+

22 Ko e tāpuaki ʻa Sihová ʻa ia ʻokú ne fakakoloa ha tahá,+

Pea ʻoku ʻikai te Ne tānaki atu ki ai mo ha mamahi.*

23 Ko e kau ʻi he tōʻonga fakamaá ʻoku hangē ia ha vaʻinga ki he tokotaha valé,

Ka ko e potó ʻoku maʻá e tangata ia ʻoku ʻiloʻiló.+

24 Ko e meʻa ʻoku manavahē ki ai ʻa e tokotaha fulikivanú ʻe hoko mai ia kiate ia;

Ka ko e holi ʻa e māʻoniʻoní ʻe fakalato.+

25 ʻI he mavahe atu ʻa e matangi mālohí, ʻe ʻikai ke toe ʻi ai ʻa e tokotaha fulikivanú,+

Ka ko e tokotaha māʻoniʻoní ko ha makatuʻunga taʻengata ia.+

26 Hangē ko e viniká ki he nifó mo e ʻahú ki he matá,

ʻOku pehē pē ʻa e tokotaha fakapikopikó ki he tokotaha ʻokú ne fekauʻi atu iá.*

27 Ko e manavahē kia Sihová ʻokú ne fakalōloa atu ʻa e moʻuí,+

Ka ko e ngaahi taʻu ʻo e kau fulikivanú ʻe fakanounou.+

28 Ko e fakatuʻamelie* ʻa e kau māʻoniʻoní ʻokú ne ʻomai ʻa e fiefia,+

Ka ko e ʻamanaki ʻa e kau fulikivanú ʻe ʻauha.+

29 Ko e ʻalunga ʻo Sihová ko ha maluʻanga ia ki he tokotaha taʻemelé,+

Ka ʻoku ʻuhinga iá ko e ʻauha ki he kau faikoví.+

30 Ko e tokotaha māʻoniʻoní ʻe ʻikai teitei ʻai ia ke ne tō,+

Ka ko e kau fulikivanú ʻe ʻikai te nau kei nofo ʻi he māmaní.+

31 Ko e ngutu ʻo e tokotaha māʻoniʻoní ʻokú ne fakatupu mai ʻa e* poto,

Ka ko e ʻelelo mioʻí ʻe tuʻusi.

32 Ko e loungutu ʻo e tokotaha māʻoniʻoní ʻokú ne ʻiloʻi ʻa e meʻa ʻoku fakahōifuá,

Ka ko e ngutu ʻo e kau fulikivanú ʻoku mioʻi.