“ʻOku Foaki ʻe Sihova Tonu ʻa e Poto”

KO E HĀ ʻa e ngaahi ngāue ʻokú ne keina ho taimí mo ho mālohí? Ko e ʻai ko ia ha hingoa lelei maʻaú ko e meʻa ia ʻokú ke tokanga ki aí? ʻOkú ke līʻoa atu koe ki hono tānaki ʻo e ngaahi koloá? Fēfē ʻa e tuli ki ha ngāue ʻi ha malaʻe pau ʻo e feingá pe fakatupulekina ha taukei ʻi ha vaʻa ʻe taha pe lahi ange ʻo e akó? ʻOku mahuʻinga kiate koe ʻa hono fakatupulekina ko ia ha ngaahi vahaʻangatae lelei mo e niʻihi kehé? Ko hoʻo tokanga tefitó pē ʻaʻau ke tauhi maʻu ha moʻui lelei?

Kātoa ʻa e ngaahi meʻa ʻoku lave ki ai ʻi muʻá ʻoku hā nai ʻoku ʻi ai hanau kiʻi mahuʻinga. Ka ko e hā ʻa e meʻa ʻoku mahuʻinga muʻomuʻá? ʻOku tali mai ʻe he Tohitapú: “Ko e potó koe meʻa muʻomuʻá ia. Maʻu ʻa e potó.” (Palovepi 4:7, NW) Ko ia, ʻe lava fēfē ke tau maʻu ʻa e potó, pea ko e hā hono ngaahi ʻaongá? Ko e vahe hono ua ʻo e tohi ʻa Palovepi ʻi he Tohitapú ʻokú ne tokonaki mai ʻa e talí.

“Tokanga ki he Potó”

ʻI ha ngaahi lea ʻofa ʻa ha tamai, ʻoku pehē ʻe he poto ko Tuʻi Solomone ʻo ʻIsileli ʻo e kuonga muʻá: “E hoku foha, kapau te ke maʻu ʻa ʻeku ngaahi leá pea tuku tauhi ʻeku ngaahi fekaú tonu ʻiate koe, koeʻuhiā ke ke tokanga ki he potó ʻaki ho telingá, ʻo ke ofeʻi ai ho lotó kia ʻiloʻilo; ʻikai ngata aí, kapau te ke ui kia mahino tonu mo ke tuku atu ho leʻó kia ʻiloʻilo tonu, kapau te ke hanganaki kumi ki ai ʻo hangē ki ha siliva, pea hangē ki ha ngaahi koloa fufū ʻa hoʻo hanganaki haʻao ki aí, ʻi he tuʻunga ko iá te ke toki mahinoʻi ai ʻa e manavahē kia Sihová, pea te ke toki maʻu ai ʻa e ʻiloʻi tonu ʻo e ʻOtuá.”​—Palovepi 2:​1-5, NW.

ʻOkú ke sio ki he fatongia ʻe maʻu ai ʻa e potó? ʻI he ngaahi veesi ko ení, ʻoku hā tuʻo tolu ai ʻa e kupuʻi lea “kapau te ke.” ʻOku hā mahino, ko e meʻa ia ki he tokotaha taki taha ʻo kitautolu ke kumi ki he potó mo hono ongo tokoní​—ʻa ʻiloʻilo mo mahino. Ka ko e ʻuluakí, ʻoku fiemaʻu ke tau “maʻu” pea “tuku tauhi” ʻi he manatú ʻa e ngaahi lea ʻo e potó ʻa ia ʻoku hiki ʻi he ngaahi Konga Tohitapú. Ki he meʻá ni ʻoku fiemaʻu ke tau ako ʻa e Tohitapú.

Ko e potó ko e malava ke ngāuetotonuʻaki ʻa e ʻilo kuo foaki mei he ʻOtuá. Pea ʻoku fakaofo moʻoni ʻa hono ʻai ʻe he Tohitapú ke ala maʻu ʻa e potó! ʻIo, ʻoku maʻu ai ʻa e ngaahi lea ʻo e potó, ʻo hangē ko ia ko e ngaahi meʻa ʻoku hiki ʻi he ongo tohi ʻa Palovepi mo Koheletí, pea ʻoku fiemaʻu ke tau tokanga ki he ngaahi lea ko ení. ʻOku tau toe maʻu ʻi he ngaahi peesi ʻo e Tohitapú ʻa e ngaahi faʻifaʻitakiʻanga lahi ʻa ia ʻoku fakahaaʻi ai ʻa e ngaahi ʻaonga ʻo hono ngāueʻaki ʻo e ngaahi tefitoʻi moʻoni fakaʻotuá pea mo e ngaahi tauhele ʻi hono taʻetokangaʻi ko ia kinautolú. (Loma 15:4; 1 Kolinito 10:11) Hangē ko ení, fakakaukau atu ki he talanoa fekauʻaki mo Kēhesi mānumanú, ʻa e tokotaha tauhi ʻo e palōfita ko ʻIlaisá. (2 Tuʻi 5:​20-​27) ʻIkai ʻokú ne akoʻi mai kiate kitautolu ʻa e poto ʻi he fakaʻehiʻehi mei he mānumanú? Pea fēfē ʻa e ola fakamamahi ʻo e ngaahi ʻaʻahi hā ngali ʻikai maumau naʻe fai ʻe he ʻofefine ʻo Sēkope ko Tainá ki he “kau taʻahine ʻo e fonua” ko Kēnaní? (Senesi 34:​1-​31) ʻIkai kuo tau toka ʻiloʻilo ai ki he taʻefakapotopoto ʻo e kaungāmeʻa koví?​—Palovepi 13:20; 1 Kolinito 15:33.

Ko e tokanga ki he potó ʻoku kau ki ai ʻa hono maʻu mai ʻa e ʻiloʻiló mo e mahinó. Fakatatau ki he Webster’s Revised Unabridged Dictionary, ko e ʻiloʻiló ko e “mālohi ia pe mafai ʻo e ʻatamaí ʻa ia ʻokú ne fakafaikehekeheʻi ha meʻa ʻe taha mei he meʻa ʻe taha.” Ko e ʻiloʻilo fakaʻotuá ko e malava ke fakafaikehekeheʻi ʻa e tonú mei he halá pea toki fili leva ʻa e ʻalunga totonú. Ka ʻikai ke ‘ofeʻi hotau lotó’ ki he ʻiloʻiló pe loto-vēkeveke ke maʻu ia, ʻe lava fēfē ke tau nofo ʻi he “hala, ʻoku fakatau ki he moʻui”? (Mātiu 7:​14; fakafehoanaki mo Teutalonome 30:​19, 20.) Ko hono ako mo ngāueʻaki ʻa e Folofola ʻa e ʻOtuá ʻoku ʻomai ai ʻa e ʻiloʻiló.

ʻE anga-fēfē nai haʻatau “ui kia mahino”​—ʻa e malava ko ia ke sio ki he anga ʻo e felāveʻi ʻa e ngaahi tafaʻaki ʻo ha meʻa pea ki hono fakalūkufuá? Ko e moʻoni, ko e taʻumotuʻá mo e taukeí, ko e ongo tefitoʻi meʻa ia ʻe lava ke na tokoniʻi kitautolu ke fakatupulekina ha mahino lahi ange​—ka ʻoku ʻikai fiemaʻu ia ke pehē. (Siope 12:12; 32:​6-​12) “ʻI he lahi ange ʻeku mahinó ʻi he kau mātuʻá ʻoku ou anga-lelei aí,” ko e lea ia ʻa e tokotaha-tohi-sāmé, “koeʻuhi kuó u tauhi hoʻo [Sihova] ngaahi fekaú tonu.” Naʻá ne toe hiva: “Ko hono fakaeʻa tonu hoʻo folofolá ʻoku ʻomi maama, ʻo ngaohi ai ʻa e faʻahinga taʻetaukeí ke mahino.” (Sāme 119:​100, 130, NW) Ko Sihova ʻa “Talumeimuʻa,” pea ʻokú ne maʻu ʻa e mahino ʻoku māʻolunga taʻefakangatangata ʻi he kotoa ʻo e faʻahinga ʻo e tangatá. (Taniela 7:​13) ʻOku lava ke ʻomai ʻe he ʻOtuá ʻa e mahino ki ha taha taʻetaukei, ʻo fakamafeia ia ke ne hulu atu ʻi he tuʻunga ko iá ʻo aʻu pē ki he faʻahinga ʻoku taʻumotuʻa angé. Ko ia ai, ʻoku totonu ke tau tōtōivi ʻi hono ako mo ngāueʻaki ʻa e Folofola ʻa e ʻOtuá, ʻa e Tohitapú.

Ko e kupuʻi lea ʻoku toutou leaʻaki “kapau te ke” ʻi he konga kamata ʻo e vahe hono ua ʻo e Palovepí, ʻoku hoko atu ai ʻa e ngaahi kupuʻi lea hangē ko e “maʻu,” “tuku tauhi,” “ui,” “hanganaki kumi,” “hanganaki haʻao.” Ko e hā ʻoku ngāueʻaki ai ʻe he tokotaha-tohí ʻa e ngaahi kupuʻi lea mālohi fakautuutu ko ení? Ko e lau eni ʻa ha tohi maʻuʻanga fakamatala ʻe taha: “Ko e tokotaha poto [hení] ʻokú ne fakamamafaʻi ʻa e fiemaʻu ʻo e fakamātoato ʻi he tuli ki he potó.” ʻIo, kuo pau ke tau tuli fakamātoato ki he potó mo hono ongo anga felāveʻi mo iá​—ʻa e ʻiloʻiló mo e mahinó.

Te Ke Fai ha Feinga?

Ko ha tefitoʻi meʻa mahuʻinga ʻi he tuli ki he potó ko hono ako tōtōivi ʻa e Tohitapú. Kae kehe, ko e ako ko ení, ʻoku totonu ke hoko ia ko e meʻa lahi ange ʻi hono lau pē ke maʻu ha fakamatalá. Ko e fakalaulauloto mohu taumuʻa ki he meʻa ʻoku tau laú ko ha konga mahuʻinga ia ʻo hono ako ʻo e ngaahi Konga Tohitapú. Ko hono maʻu ʻo e potó mo e ʻiloʻiló, ʻoku kau ki ai ʻa e fakalaulauloto ki he founga ʻe lava ke tau ngāueʻaki ai ʻa e meʻa ʻoku tau akó ʻi hono solova ʻo e ngaahi palopalemá, pea ʻi he fai ʻo e ngaahi filí. Ko hono maʻu ʻo e mahinó ʻoku fiemaʻu ai ʻa e fakakaukauloto atu ki he founga ʻoku feʻunga ai ʻa e fakamatala foʻoú mo e meʻa kuo tau ʻosi ʻiló. Ko hai ia te ne toe fakaʻikaiʻi ko hano ako fakahangatonu pehē ʻo e Tohitapú ʻoku fiemaʻu ki ai ʻa e taimi mo e feinga mālohi? Ko hono maʻu mai ʻa e taimí mo e iví ʻoku meimei tatau ia mo e meʻa ko ia ʻoku fakamoleki ʻi he ‘kumi ki he silivá mo haʻao ki ha koloa fufuú.’ Te ke fai ʻa e feinga ʻoku fiemaʻú? Te ke ‘lamalama ʻa e faingamalié’ ke fai ia?​—Efeso 5:​15, 16.

Fakakaukau atu ki he ngaahi koloa lahi ʻoku fakatatali mai kiate kitautolú kapau te tau keli loloto ʻaki ha loto faitotonu ki he Tohitapú. Ko ia, te tau maʻu ai ʻa e “ʻiloʻi tonu ʻo e Otuá”​—ʻa e ʻilo foaki moʻui mālohi, mo fefeka ki hotau Tokotaha-Fakatupú! (Sione 17:3) Ko e “manavahē kia Sihová” ko e toe koloa ia ke maʻu. He mahuʻinga ē ko e manavahē anga fakaʻapaʻapa kiate iá! Ko e manavahē lelei naʻa taʻefakahōifuaʻi iá kuo pau ke ne puleʻi ʻa e tafaʻaki kotoa ʻo ʻetau moʻuí, ʻo tānaki mai ai ha ʻuhinga fakalaumālie ki he meʻa kotoa ʻoku tau faí.​—Koheleti 12:13.

Ko ha holi loto-vēkeveke ke haʻao mo keli ki he ngaahi koloa fakalaumālié ʻoku totonu ke mālohi ia ʻi loto ʻiate kitautolu. Ke faingofua ange ʻetau haʻaó, kuo tokonaki mai ʻe Sihova ʻa e ngaahi meʻangāue keli lelei ʻaupito​—ʻa e ongo tohi taimi tonu ʻo e moʻoní ko e Taua Leʻo mo e Awake!, pea pehē ki he ngaahi tohi kehe ʻoku makatuʻunga ʻi he Tohitapú. (Mātiu 24:​45-​47) Ki hono akoʻi kitautolu ʻi heʻene Folofolá mo ʻene ngaahi foungá, kuo toe tokonaki mai ʻe Sihova ʻa e ngaahi fakataha faka-Kalisitiané. ʻOku fiemaʻu ke tau maʻu maʻu pē eni, fanongo lelei ki he meʻa ʻoku leaʻakí, ʻo fai ha feinga fakamātoato ke tokanga ʻo tuku tauhi ʻa e ngaahi fakakaukau tefitó, pea fakakaukau loloto ʻo fekauʻaki mo hotau vahaʻangatae mo Sihová.​—Hepelu 10:​24, 25.

ʻE ʻIkai Te Ke Taʻelavaʻi

ʻOku faʻa hoko, ko ha haʻao ki ha ngaahi maka koloa, koula, pe siliva ʻoku tanú, ʻoku fakamoʻoniʻi ʻene taʻelavameʻá. ʻOku ʻikai fiemaʻu ke pehē eni ʻi he fekauʻaki mo e haʻao ki he ngaahi koloa fakalaumālié. Ko e hā ʻoku ʻikai aí? “ʻOku foaki mai ʻe Sihova ʻa e potó,” ko e fakapapauʻi mai ia ʻe Solomoné, “ʻoku haʻu mei hono ngutú ʻa e ʻilo mo e ʻiloʻilo.”​—Palovepi 2:6, NW.

Naʻe ʻiloa ʻa Tuʻi Solomone ʻi heʻene potó. (1 Tuʻi 4:​30-​32) ʻOku fakahaaʻi ʻe he ngaahi Konga Tohitapú naʻá ne ʻiloʻi ʻa e ngaahi kaveinga kehekehe, kau ai ʻa e ngaahi ʻakaú, fanga manú, natula ʻo e tangatá, mo e Folofola ʻa e ʻOtuá. Ko e ʻiloʻilo naʻá ne fakahāhā ʻi heʻene tuʻi kei talavoú ʻi hono fakaleleiʻi ko ia ʻa e vākovi ʻi he vahaʻa ʻo ha ongo fefine, ʻa ia naʻá na tauʻaki taukaveʻi ko e faʻē ia ʻa e kiʻi tama tatau, naʻe tokoni ia ki hono ʻai ia ke ongoongoa fakavahaʻapuleʻangá. (1 Tuʻi 3:​16-​28) Ko e hā ʻa e matavai ʻo ʻene ʻilo lahí? Naʻe lotu ʻa Solomone kia Sihova ki ha “poto mo ha mahino” pea mo ha malava ke “ʻiloʻilo ki he leleí mo e koví.” Naʻe foaki ange ʻe Sihova kiate ia ʻa e ngaahi meʻá ni.​—2 Kalonikali 1:​10-​12, NW; 1 Tuʻi 3:9, NW.

Ko kitautolu foki ʻoku totonu ke tau lotu ki he tokoni ʻa Sihová ʻi heʻetau ako tōtōivi ko ia ʻa ʻene Folofolá. Naʻe lotu ʻa e tokotaha-tohi-sāmé: “Huluhulu au ʻi ho hala, ʻEiki; kau haʻele ʻi hoʻo moʻoni. Ko hoku loto e ke ke faʻūtaha ke ʻapasia ki ho huafa.” (Sāme 86:11) Naʻe hōifua ʻa Sihova ki he lotu ko iá, he naʻá ne ʻai ia ke hiki ʻi he Tohitapú. ʻOku lava ke tau falala pau ko ʻetau ngaahi lotu fakamātoato mo toutou fai ki heʻene tokoní ke maʻu ai ʻa e ngaahi koloa fakalaumālie ʻi he Tohitapú ʻe ʻikai ke taʻetali.​—Luke 18:​1-8.

ʻOku fakahaaʻi mai ʻe Solomone: “Ki he faʻahinga faitotonú te ne tuku tauhi ai ʻa e poto ʻaonga; ki he faʻahinga ʻoku ʻaʻeva ʻi he anga-tonú ʻokú ne hoko ko e fakaū, ʻi hono tauhi ʻa e ngaahi hala ʻo e fakamāú, pea te ne leʻohi ʻa e hala tofu pē ko ia ʻo ʻene faʻahinga mateakí. ʻI he tuʻunga ko iá te ke mahinoʻi ai ʻa e māʻoniʻoní mo e fakamāú mo e faitotonú, ʻa e ʻalunga kotoa ʻo e meʻa ʻoku leleí.” (Palovepi 2:​7-9, NW) He meʻa pau moʻoni ko e meʻá ni! ʻOku ʻikai ngata pē ʻi he foaki ʻe Sihova ʻa e poto moʻoní ki he faʻahinga ʻoku nau kumi loto-moʻoni ki aí ka ʻoku toe hoko moʻoni ko ha fakaū malu ia ki he faʻahinga faitotonú koeʻuhi ko ʻenau fakahāhā ʻa e poto moʻoní pea mo liliu fai mateaki ki heʻene ngaahi tuʻunga māʻoniʻoní. ʻOfa ke tau ʻi he haʻohaʻonga ʻo e faʻahinga ko ia ʻoku tokoniʻi ʻe Sihova ke mahinoʻi ʻa e “ʻalunga kotoa ʻo e meʻa ʻoku leleí.”

ʻI he “Hoko ʻa e ʻIló Tonu ʻo Lelei”

Ko e ako fakafoʻituitui ʻo e Tohitapú​—ko ha fiemaʻu mahuʻinga ia ʻi he kumi ko ia ki he potó—ʻoku ʻikai ko ha ʻamanaki lelei pau ia ki he kakai tokolahi. Ko e fakatātaá, ʻoku pehē ʻe Lawrence, taʻu 58: “Kuó u ngāue maʻu pē ʻaki hoku ongo nimá. Ko e akó ʻoku faingataʻa ia kiate au.” Pea ko Michael, taʻu 24, ʻa ia naʻe ʻikai ke fiefia ʻi he ako ʻi he ʻapiakó, ʻokú ne pehē: “Naʻe pau ke u fakamālohiʻi au ke tangutu hifo ʻo ako.” Ka neongo ia, ko ha holi ke akó ʻe lava ke fakatupulekina.

Vakai ange ki he meʻa naʻe fai ʻe Michael. ʻOkú ne fakamatala: “Naʻá ku akonekina au ke ako ʻi ha haafe houa ʻi he ʻaho kotoa pē. Naʻe vave ʻa e lava ke u sio ki hono olá ʻi heʻeku fakakaukaú, ko ʻeku ngaahi tali ʻi he ngaahi fakataha faka-Kalisitiané, pea mo ʻeku ngaahi fetalanoaʻaki mo e niʻihi kehé. ʻOku ou hanga atu he taimí ni ki heʻeku ngaahi piliote akó, pea ʻoku ou fehiʻa ke toe hanga ʻe ha meʻa ʻo uesia ia.” ʻIo, ʻoku hoko ʻa e ako fakafoʻituituí ko ha meʻa fakafiefia ʻi heʻetau sio ki he fakalakalaka ʻoku tau faí. Ko Lawrence foki naʻá ne ʻai ia ke ne ako ʻa e Tohitapú, pea ʻi he faai mai ʻa e taimí, naʻá ne hoko ai ʻo ngāue ko ha tokotaha mātuʻa ʻi ha fakatahaʻanga ʻa e Kau Fakamoʻoni ʻa Sihová.

Ke ʻai ʻa e ako fakafoʻituituí ko ha meʻa fakafiefiá ʻoku fiemaʻu ki ai ʻa e feinga hokohoko. Kae kehe, ko e ngaahi ʻaongá, ʻoku lahi. “ʻI he hū ʻa e potó ki ho lotó pea hoko ʻa e ʻiló tonu ʻo lelei ki ho soulú tonu,” ko e lea ia ʻa Solomoné, “ko e mafai fakaefakakaukaú tonu te ne hanganaki leʻohi koe, ko e ʻiloʻiló tonu te ne maluʻi koe.”​—Palovepi 2:​10, 11, NW.

“Ke Fakahaofi Koe mei he Hala Koví”

ʻI he founga fē ʻe fakamoʻoniʻi ai ko ha maluʻi ʻa e potó, ʻiló, mafai fakaefakakaukaú, mo e ʻiloʻiló? “[Ko ʻenau ʻi aí] ke fakahaofi koe mei he hala koví,” ko e lea ia ʻa Solomoné, “mei he tangata ʻokú ne leaʻaki ʻa e ngaahi meʻa talakehe, mei he faʻahinga ʻoku nau siʻaki ʻa e ngaahi hala ʻo e faitotonú ke ʻaʻeva ʻi he ngaahi hala ʻo e fakapoʻulí, mei he faʻahinga ʻoku fiefia ʻi he fai koví, ʻa ia ʻoku nau fiefia ʻi he ngaahi meʻa talakehe ʻo e koví; ʻa e faʻahinga ko honau ngaahi halá ʻoku pikopiko pea ʻoku femamioʻaki honau ʻalungá fakalūkufua.”​—Palovepi 2:​12-​15, NW.

ʻIo, ko e faʻahinga ʻoku nau tukulotoa ʻa e poto moʻoní ʻoku nau fakaʻehiʻehi mei he feohi mo ha taha pē “ʻokú ne leaʻaki ʻa e ngaahi meʻa talakehe,” ʻa ia ko e ngaahi meʻa ʻoku kehe mei he meʻa ko ia ʻoku moʻoni mo totonú. Ko e mafai fakaefakakaukaú mo e ʻiloʻiló ʻokú na tokonaki ʻa e maluʻi mei he faʻahinga ko ia ʻoku nau talitekeʻi ʻa e moʻoní ʻo ʻaʻeva pē ʻi he ngaahi hala ʻo e fakapoʻulí pea mei he faʻahinga ko ia ʻoku nau femamioʻaki pea mo nau maʻu ʻa e fiefia ʻi he ngaahi ngāue koví.​—Palovepi 3:​32.

He houngaʻia ē ʻoku lava ke tau maʻu, ʻi hono toe hanga ʻe he potó mo hono ngaahi ʻulungaanga felāveʻi mo iá ʻo maluʻi kitautolu mei he hala kovi ʻo e kau tangata mo e kau fefine anga taʻetāú! ʻOku tānaki mai ʻe Solomone ko e ngaahi anga ko ení ʻoku nau ʻi aí “ke fakahaofi koe mei he fefine solá, mei he fefine muli kuó ne ʻai ʻene ngaahi leá tonu ke momolé, ʻa ia ʻokú ne siʻaki hono kaumeʻa fekoekoeʻi ʻo ʻene finemuí pea kuó ne fakangaloʻi ʻa e fuakava tonu ʻa hono ʻOtuá. ʻOku ngoto hifo ki he maté hono falé pea hifo ki he maté hono ngaahi halá ki he faʻahinga ʻoku mātuʻaki vaivaí. ʻE ʻikai toe foki mai ha taha ʻiate kinautolu ʻoku fehokotaki mo iá, pea ʻikai te nau toe maʻu ʻa e ngaahi hala ʻo e faʻahinga ʻoku moʻuí.”—Palovepi 2:​16-​19, NW.

Ko e “fefine solá,” ʻa e paʻumutú, ʻoku fakatātaaʻi ia ko ha taha ʻokú ne siʻaki “hono kaumeʻa fekoekoeʻi ʻo ʻene finemuí”​—ngalingali ko e husepāniti ʻo ʻene finemuí.a (Fakafehoanaki mo Malakai 2:​14.) Kuo ngalo ʻiate ia ʻa e tapui ʻo e tonó ʻa ia ko ha konga ia ʻo e fuakava Laó. (Ekisoto 20:14) Ko hono ngaahi halá ʻoku iku atu ki he mate. Ko e faʻahinga ko ia ʻoku nau feohi mo iá ʻe ʻikai ʻaupito te nau “maʻu ʻa e ngaahi hala ʻo e faʻahinga ʻoku moʻuí,” koeʻuhi he ʻi ha taimi te nau aʻu nai ki ha tuʻunga ʻo e ʻikai toe foki, ʻa ia ko e mate, ʻa e feituʻu ʻe ʻikai lava ke nau toe foki mai mei ai. Ko ha tangata ʻa ia ʻoku ʻiloʻilo mo mafai fakaefakakaukaú ʻokú ne lāuʻilo ki he ngaahi fakatauele ʻo e ʻulungaanga taʻetāú pea ʻokú ne fakaʻehiʻehi fakapotopoto mei he hoko ʻo fihia ʻiate kinautolú.

‘Ko e Kau Faitotonú Te Nau Nofoʻia ʻa e Māmaní’

Ko hono fakamāʻopoʻopo ʻa e taumuʻa ʻo ʻene akonaki ki he potó, ʻoku pehē ai ʻe Solomone “Ko e taumuʻá ke ke lava ai ʻo ʻaʻeva ʻi he hala ʻo e kakai leleí mo ke lava ʻo tauhi ʻa e ngaahi hala ʻo e faʻahinga ʻoku faitotonú.” (Palovepi 2:​20, NW) He taumuʻa fakaofo moʻoni ʻoku ʻomai ʻe he potó! ʻOkú ne tokoniʻi kitautolu ke tataki ha moʻui fiefia mo fiemālie ʻa ia ʻokú ne aʻusia ʻa e hōifua ʻa e ʻOtuá.

Toe fakakaukau atu ki he ngaahi tāpuaki maʻongoʻonga ʻoku tukutauhi mai maʻá e faʻahinga ʻoku nau “ʻaʻeva ʻi he hala ʻo e kakai leleí.” ʻOku hoko atu ʻa Solomone: “Ko e faitotonú ko kinautolu ia te nau nofoʻia ʻa e māmaní, pea ko e taʻemelé ko e faʻahinga ia ʻe tuku ʻi aí. ʻI he fekauʻaki mo e fulikivanú, ʻe tuʻusi kinautolu mei he māmaní tonu; pea ko e meʻa ki he kākaá, ʻe taʻaki kinautolu mei ai.” (Palovepi 2:​21, 22, NW) ʻOfa ke ke ʻi he haʻohaʻonga ʻo e kau taʻemele ko ia te nau nofoʻia ʻo taʻengata ʻa e māmani foʻou māʻoniʻoni ʻa e ʻOtuá.​—2 Pita 3:13.

[Fakamatala ʻi lalo]

[Fakatātā ʻi he peesi 26]

Naʻe lotu ʻa Solomone ki ha poto. ʻOku totonu ke tau fai pehē mo kitautolu