Ko e Hā ʻa e Tofiʻa ʻOkú Ke Moʻuaʻaki ki Hoʻo Fānaú?

KO Pavlos, ko ha tangata maʻu fāmili ia ʻi he fakatonga ʻo ʻIulopé, ʻa ia ʻoku tātātaha ʻene ʻi ʻapi ke fakamoleki ha taimi maʻa hono uaifí pea mo ʻene fānaú—ko e ongo ʻofefine ʻe toko ua, taʻu 13 mo e taʻu 11 pea mo ha foha taʻu 7. ʻOku ngāue ʻaho ʻe fitu he uike ʻa Pavlos ʻi ha sifi lōloa ʻe ua, ʻi he feinga ke maʻu ha paʻanga feʻunga ke fakahoko ʻaki ʻa e meʻa ʻokú ne fakaʻānaua ki aí. ʻOkú ne loto ke fakatau mai ha ʻapātimeni maʻa hono ongo ʻofefiné taki taha pea ʻokú ne loto ke kamata ha kiʻi pisinisi maʻa hono fohá. Ko hono uaifí, ko Sofia, ʻokú ne ngāue mālohi ke tānaki ha ngaahi līneni, naunau peito, ʻū ipu maka pea mo e ʻū huhu, hele mo e sēpuni ki he ngaahi fale ko ia ʻi he kahaʻú. ʻI hono ʻeke ange pe ko e hā ʻokú na ngāue mālohi ʻaupito aí, ʻokú na tali fakataha, “Koeʻuhi pē ko ʻema fānaú!”

ʻI he hangē ko Pavlos mo Sofia, ko e ngaahi mātuʻa lahi ʻi he māmaní kotoa ʻoku nau fai ʻenau lelei tahá ke ʻoange ki heʻenau fānaú ha kamata lelei ʻi he moʻuí. ʻOku tuku mavahe ʻe he niʻihi ʻa e paʻanga ke ngāueʻaki ʻe he fānaú ʻi he kahaʻú. ʻOku fakapapauʻi ʻe he niʻihi ke maʻu ʻe heʻenau fānaú ha ako feʻunga pea mo ako ha ngaahi pōtoʻi ʻa ia ʻe ʻaonga ʻamui ange ʻi he moʻuí. Neongo ʻoku vakai ʻa e tokolahi taha ʻo e ngaahi mātuʻá ki he ngaahi meʻaʻofa peheé ko ha fakahāhā ia ʻo e ʻofá, ko hono fai ʻo e ngaahi tokonaki peheé ʻoku faʻa ʻai ai ʻa e ngaahi mātuʻá ke ʻi ha malumalu ʻo ha faingataʻa lahi ke fakahoko ʻa e ngaahi ʻamanaki ʻa e kāingá, kaungāmeʻá pea mo e kolo ʻoku nau nofo aí. Ko ia ai, ko e ngaahi mātuʻa tokangá ʻoku nau ʻeke totonu, ‘Ko e hā ʻa e lahi ʻo e meʻa ʻoku mau moʻuaʻaki ki heʻemau fānaú?’

Fai ʻo e Ngaahi Tokonaki ki he Kahaʻú

ʻOku ʻikai ke fakanatula pē ka ʻoku toe Fakatohitapu ki he ngaahi mātuʻa Kalisitiané ke nau fai ha ngaahi tokonaki maʻa ʻenau fānaú. Naʻe tala ʻe he ʻapositolo ko Paulá ki he kau Kalisitiane ʻi hono ʻahó: “ʻOku totonu ke fai ʻe he ngaahi mātuʻá ʻa e tokonaki ki heʻenau fānaú, ʻo ʻikai ko e fānaú ki heʻenau ngaahi mātuʻá.” (2 Kolinito 12:14, The New English Bible) Naʻe toe fakahaaʻi ʻe Paula ko hono fai ʻo e tokangaʻi fakaemātuʻá ko ha fatongia mafatukituki ia. Naʻá ne tohi: “Ka ʻo ka ai ha taha ʻoku ʻikai tokanga ki hono kainga, kaeʻumaʻā hono famili, ʻoku ne fakaʻikaiʻi ʻene lotu, ʻio, ʻoku ne koviange ʻi ha hiteni.” (1 Timote 5:8) ʻOku fakahaaʻi mahino ʻi he ngaahi fakamatala Fakatohitapu lahi ko e ngaahi meʻa fekauʻaki mo e tofiʻá naʻe mahuʻinga ia ʻi he lotolotonga ʻo e kau sevāniti ʻa e ʻOtuá ʻi he taimi ʻo e Tohi Tapú.​—Lute 2:​19, 20; 3:​9-​13; 4:​1-​22; Siope 42:15.

Kae kehe, ʻi he taimi ʻe niʻihi, ʻoku hoko ai ʻa e ngaahi mātuʻá ʻo nōfoʻi ʻi hono tokonaki ha tofiʻa lahi maʻa ʻenau fānaú. Ko e hā hono ʻuhingá? Ko Manolis, ʻa ia ko ha tamai naʻe hiki mei he fakatonga ʻo ʻIulopé ki he ʻIunaite Seteté, ʻokú ne fakahaaʻi ʻa e ʻuhinga ʻe taha: “Ko e ngaahi mātuʻa naʻa nau faingataʻaʻia ʻi he fakaʻauha ʻo e Tau II ʻa Māmaní, hongé mo e masivá, ʻoku nau fakapapauʻi ke fakaleleiʻi ʻa e meʻa lahi maʻa ʻenau fānaú.” ʻOkú ne tānaki mai: “Koeʻuhi ko ʻenau ongoʻi tōtuʻa ʻa e fatongiá mo ha holi ke ʻoange ki heʻenau fānaú ʻa e kamata lelei taha ʻe malava ʻi he moʻuí, ʻoku fakatupunga ai ʻe he ngaahi mātuʻá ʻi he taimi ʻe niʻihi ʻa e maumau kia kinautolu tonu.” Ko e moʻoni, ʻoku fakamasivaʻi ʻe he ngaahi mātuʻa ʻe niʻihi meia kinautolu ʻa e ngaahi meʻa ʻoku fiemaʻu ʻi he moʻuí pe tataki ha moʻui fefeka koeʻuhi ke tuku tauhi ʻa e ngaahi koloa fakamatelié maʻa ʻenau fānaú. Ka ʻoku fakapotopoto ki he ngaahi mātuʻá ke nau tuli ki ha ʻalunga pehē?

“Ko e Muna mo Ia Foki mo e Kovi Lahi”

Ko Tuʻi Solomone ʻo ʻIsileli ʻo e kuonga muʻá naʻe ʻi ai ʻene lea fakatokanga fekauʻaki mo e ngaahi tofiʻá. Naʻá ne tohi: “Pea u fehiʻa ki he ngaue kehekehe kuo u fakafitaʻa ai ʻi he lalo laʻa: koeʻuhi ke u tuku ia ki he tangata ʻe hoko mo au, pea naʻe ʻilo ʻehai pe ko e poto ia pe ko e vale? Ka te ne pule pe ki he meʻa kotoa kuo u fakafitefitaʻa ai, mo fai ʻaki ʻeku poto ʻi he lalo laʻa. Ko e muna mo eni foki. . . . He ʻoku ai ha tangata, ʻa ia ko ʻene ngaue naʻe fai poto, pea naʻe fai ʻilo pea naʻe fai ke mafai; ka te ne tuku ia ki ha tangata naʻe ʻikai te ne ngaue ki ai mono tofiʻa. Ko e muna mo ia foki mo e kovi lahi.”—Koheleti 2:​18-21.

Hangē ko e fakamatala ʻa Solomoné, ko e faʻahinga ʻoku nau maʻu ha tofiʻá ʻoku ʻikai nai te nau ʻiloʻi ʻa hono mahuʻinga kakató koeʻuhi ko kinautolú tonu naʻe ʻikai te nau ngāue mālohi ki ai. Ko ia ai, ʻe tōʻongafai fakavalevale nai ʻa e ngaahi ʻeá ki he meʻa naʻe feinga mālohi ʻa e ngaahi mātuʻá ke tānaki maʻanautolú. ʻE aʻu nai ʻo nau tolovekaʻaki ʻa e ngaahi koloa naʻe maʻu ʻi he ngāue mālohi peheé. (Luke 15:​11-​16) Ko ha “muna mo ia foki mo e kovi lahi” ʻe hokó!

Tofiʻá mo e Mānumanú

ʻOku toe ʻi ai ʻa e meʻa kehe ʻoku fiemaʻu ke fakakaukau ki ai ʻa e ngaahi mātuʻá. ʻI he ngaahi tōʻonga fakafonua ʻa ia ʻoku kau lahi ki ai ʻa e ngaahi koloa tukufakaholó mo e ngaahi totongi ʻo e fefine malí, ʻoku hoko nai ai ʻa e fānaú ʻo mānumanu, ʻi hono kounaʻi ha kelekele, pe ko ha koloa ʻa e fefine malí, ʻo māʻolunga ia ʻi he meʻa ʻoku lava lelei ke tokonaki ʻe he ongo mātuʻá. “Fakaʻofa ē ko e tamai ʻoku toko ua pe toko tolu ʻa hono ngaahi ʻofefiné,” ko e fakakata ia ʻa Loukas, ko ha tamai mei Kalisi. ʻOkú ne pehē: “ʻOku fakahoa nai ʻe he ngaahi ʻofefiné ʻa e meʻa ʻoku malava ke foaki ʻe heʻenau tamaí ki he meʻa ʻoku tānaki ‘lahi’ ʻe he ngaahi mātuʻa kehé maʻa ʻenau fānaú. Te nau fakahaaʻi nai ko ʻenau ngaahi ʻamanaki ki he malí ʻe hōloa ia kapau ʻe ʻikai lava ke nau maʻu ha koloa fakafiemālie.”

Ko Manolis, naʻe lave ki ai ki muʻá, ʻokú ne fakamatala: “ʻE fakalōloa nai ʻe ha talavou ʻa e faisoó kae ʻoua ke palōmesi ange kiate ia ʻa e tamai ʻa e fefine mali ki he kahaʻú ha meʻa maʻá e fefine malí, ʻa ia ʻoku faʻa hoko ko e kelekele pe ko ha paʻanga lahi. ʻOku lava ke hoko ia ko ha faʻahinga totongi fakamālohi.”

ʻOku fakatokanga ʻa e Tohi Tapú fekauʻaki mo e founga kotoa pē ʻo e mānumanú. Naʻe tohi ʻe Solomone: “E faa maʻu fakavave [he mānumanú] ha tofia i he kamataaga; ka e ikai fakamonuia ia i hono ikuaga.” (Palovepi 20:​21, PM) Naʻe fakamamafaʻi ʻe he ʻapositolo ko Paulá: “Ko e ʻofa ki he paʻanga ko e aka ʻoku tupu mei ai ʻa e ngaahi kovi kotoa pe.”—1 Timote 6:10; Efeso 5:5.

“Poto ʻOku Ō mo ha Tofiʻa”

Ko hono moʻoní, ko ha tofiʻa ʻoku ʻi ai hono mahuʻinga, ka ko e potó ʻoku mahuʻinga lahi ange ia ʻi he koloa fakamatelié. Naʻe tohi ʻe Tuʻi Solomone: “Ko e meʻa lelei ʻa e poto ʻoku ō mo ha tofiʻa: pea ko e meʻa ʻaonga . . . He ko e poto ko e maluʻanga, ko e paʻanga ko e maluʻanga: ka ʻoku hulu ʻa e ʻilo, he ʻoku fakahaofi ʻe he poto ʻa e tangata ʻoku maʻu ia.” (Koheleti 7:​11, 12; Palovepi 2:7; 3:​21) Lolotonga ʻoku ʻomai ʻe he paʻangá ha tuʻunga maluʻanga, ʻo ʻai ʻa e tokotaha ʻoku ʻaʻaná ke ne maʻu ʻa e meʻa ʻokú ne fiemaʻú, ʻe kei lava pē ke mole ia. ʻI he tafaʻaki ʻe tahá, ko e potó—ʻa e malava ke ngāueʻaki ʻa e ʻiló ʻi hono solova ʻo e ngaahi palopalemá pe ʻi hono maʻu ʻa e ngaahi taumuʻa paú—ʻe lava ke ne maluʻi ha tokotaha mei hono fai ha ngaahi meʻa fakatuʻutāmaki fakavalevale. ʻI he makatuʻunga he manavahē fakaʻotua totonú, ʻe tokoniʻi nai ai ia ke ne maʻu ʻa e moʻui taʻengata ʻi he māmani foʻou ʻa e ʻOtuá ʻoku vavé ni ke hoko maí—ko ha tofiʻa mahuʻinga moʻoni!​—2 Pita 3:​13.

Ko e ngaahi mātuʻa Kalisitiané ʻoku nau ngāueʻi ʻa e poto peheé ʻaki hono fokotuʻu ʻa e ngaahi meʻa muʻomuʻa totonu maʻanautolu mo ʻenau fānaú. (Filipai 1:​10) Ko e ngaahi meʻa fakamatelie ʻoku tānaki ke ngāueʻaki ʻe he fānaú ʻoku ʻikai totonu ke muʻomuʻa ia ʻi he ngaahi meʻa fakalaumālié. Naʻe fakalototoʻaʻi ʻe Sīsū ʻa hono kau muimuí: “Mou kumi muʻa ki hono puleʻanga [ʻo e ʻOtuá], mo e maʻoniʻoni aʻana, pea ʻe ʻatu mo ia foki ʻa e ngāhi meʻa ko ia kotoa.” (Mātiu 6:33) Ko e ngaahi mātuʻa ʻoku nau fokotuʻu ʻa e ngaahi taumuʻa fakalaumālie ki honau fāmili Kalisitiané ʻe lava ke nau ʻamanekina ʻe fakapaleʻi lahi kinautolu. Naʻe tohi ʻe Tuʻi Solomone poto: “ʻE matuʻaki tomeʻe ʻa e tamai ʻa ha tangata faitotonu: pea ko ia kuo ne fakatupu ha poto, te ne fiefia ʻiate ia. ʻOfa ke fiefia hoʻo tamai mo hoʻo faʻe, ʻio, ke tomeʻe ʻa ia naʻa ne faʻeleʻi koe.”—Palovepi 23:​24, 25.

Ko ha Tofiʻa Tuʻuloa

Ki he kau ʻIsileli ʻo e kuonga muʻá, ko e ngaahi meʻa fekauʻaki mo e koloa tukufakaholó naʻe mahuʻinga ʻaupito. (1 Tuʻi 21:​2-6) Kae kehe, naʻe naʻinaʻi ʻa Sihova kia kinautolu: “Ko e ngaahi foʻi folofola ko ʻeni ʻoku ou kouna atu he ʻaho ni ʻe fuesia ʻe ho loto: pea te ke uhuʻi ki hoʻo fanau, pea te ke lea ki ai ʻi hoʻo nofo ʻi ho fale, pea ʻi hoʻo ʻalu ʻi he hala, pea ʻi hoʻo tokoto hifo, pea ʻi hoʻo tuʻu hake.” (Teutalonome 6:​6, 7) ʻOku tala ʻa e meʻa meimei tatau ki he ngaahi mātuʻa Kalisitiané: “Hanganaki tauhi hake [hoʻomou fānaú] ʻi he akonaki mo e fakatonutonu-fakaʻatamai ʻa Sihová.”—Efeso 6:​4, NW.

Ko e ngaahi mātuʻa ʻoku ʻi ai ʻenau vakai fakalaumālié ʻoku nau ʻiloʻi ko e tokonaki maʻa honau fāmilí ʻoku kau ki ai ʻa hono fai ʻo e fakahinohino mei he Tohi Tapú. Ko e fakamatala eni ʻa Andreas, ko ha tamai ʻa e toko tolu: “Kapau ʻe ako ʻa e fānaú ke nau ngāueʻaki ʻa e ngaahi tefitoʻi moʻoni fakaʻotuá ʻi heʻenau moʻuí, te nau mateuteu lelei ange ai ki he kahaʻú.” Ko ha tofiʻa pehē ʻoku toe fakahangataha ia ki hono tokoniʻi kinautolu ke fokotuʻu mo fakatupulekina ha vahaʻangatae fakafoʻituitui mo honau Tokotaha-Fakatupú.​—1 Timote 6:​19.

Kuó ke fai ha fakakaukau ki he tokonaki maʻá e kahaʻu fakalaumālie ʻa hoʻo tamá? Ko e fakatātaá, ko e hā ʻe lava ke fai ʻe he ngaahi mātuʻá kapau ʻoku tuli ʻenau kiʻi tamá ki he ngāue fakafaifekau taimi-kakató? Lolotonga ʻoku ʻikai totonu ki ha faifekau taimi-kakato ke ne kounaʻi pe ʻamanekina ha poupou fakapaʻanga, ko e ngaahi mātuʻa ʻofá te nau fili nai ke ‘vahevahe kiate ia ʻo fakatatau ki heʻene fiemaʻú’ koeʻuhi ke tokoniʻi ai ia ke ne nofo maʻu ʻi he ngāue taimi-kakató. (Loma 12:​13, NW; 1 Samiuela 2:​18, 19; Filipai 4:​14-​18) Ko ha fakakaukau poupou pehē ʻe fakahōifua moʻoni ia kia Sihova.

Ko ia ai, ko e hā leva ʻoku moʻuaʻaki ʻe he ngaahi mātuʻá ki heʻenau fānaú? Tuku kehe ʻa e tokonaki ki heʻenau ngaahi fiemaʻu fakamatelié, ko e ngaahi mātuʻa Kalisitiané te nau fakapapauʻi ʻoku maʻu ʻe heʻenau fānaú ha tofiʻa fakalaumālie lahi ʻa ia ʻe ʻaonga kia kinautolu ʻo taʻengata. ʻI he founga ko iá, ʻe hoko moʻoni ai ʻa e ngaahi lea ʻoku maʻu ʻi he Sāme 37:18: “ʻOku ʻiloʻi ʻe Sihova ʻa e ngaahi ʻaho ʻo e kau haohaoa, pea ko honau tofiʻa ʻe tuʻu ʻo taʻengata.”

[Fakatātā ʻi he peesi 26, 27]

Ko e hā ʻa e kahaʻu ʻokú ke fakakaukau ki ai maʻa hoʻo fānaú?