ʻOku Malava ʻa e ʻOfa Tuʻuloá?

‘Ko e ngaahi tapa ʻa e ʻofá ko e tapa ʻa e afi, ko e matuʻaki ulo meia Iaa.’​—HIVA. 8:6.

KO E HĀ HOʻO TALÍ?

Ko e hā ʻoku malava ai ke maʻu ʻa e ʻofa moʻoní ʻi he vahaʻa ʻo ha tangata mo ha fefine?

Ko e hā ʻe lava ke ako ʻe he kau Kalisitiane ʻosi malí mei he Hiva ʻa Solomoné?

Ko e hā ʻe lava ke ako ʻe he kau Kalisitiane teʻeki malí fekauʻaki mo e faialeá mo e malí?

1, 2. Ko hai ʻe lava ke maʻu ʻaonga mei he Hiva ʻa Solomoné, pea ko e hā hono ʻuhingá? (Sio ki he ʻuluaki fakatātā ʻi he kupú ni.)

ʻOKU fesiofaki mo malimali ʻa e taʻahine malí mo e tangata malí. ʻOku lava ke sio ʻa e tokotaha kotoa ʻokú na feʻofaʻaki. Ko e tokoua ʻokú ne fai ʻena malanga malí ʻoku lava ke ne fakatokangaʻi ʻena piki nima anga-ʻofá, peá ne fifili: ‘ʻI he faai atu ʻa e taʻú, ʻe loloto ange ʻena ʻofá? Pe ʻe mōlia atu ia?’ ʻI he taimi ʻoku feʻofaʻaki moʻoni ai ha husepāniti mo ha uaifi, ko hona vahaʻangataé ʻe lava ke ne kātekina naʻa mo e ngaahi palopalema faingataʻa tahá. Ka ko e meʻa fakamamahí, ko e kakai mali tokolahi ʻoku nau hoko ʻo loto-mamahi pea vete. Ko ia te ke fifili nai, ‘ʻE lava ke tuʻuloa moʻoni ʻa e ʻofá?’

² Naʻa mo e taimi naʻe kei moʻui ai ʻa Tuʻi Solomoné, naʻe hāhāmolofia ʻa e ʻofa moʻoní. Ko e hā hono ʻuhingá? Naʻe pehē ʻe Solomone: “Kuo u maʻu ha tangata ʻe toko taha ʻi he toko afe: Ka ko ha fefine ʻi he fuʻu tokolahi pehe naʻe ʻikai te u maʻu. Sio mai, ko eni pe meʻa kuo u maʻu; naʻe ngaohi ʻa e tangata ʻe Elohimi ko e tonusika; ka kuo feingaʻi ʻe he faʻahinga ko ia ha faliunga lahi.” (Koh. 7:26-29) Ko e kau fefine muli ʻulungaanga taʻetaau naʻe lotu Pēalí naʻa nau nofo ʻi he lotolotonga ʻo e kau ʻIsilelí. Ko hono olá, naʻe hoko foki mo e kau tangata mo e kau fefine ʻIsileli tokolahi ʻo ʻulungaanga taʻetaau.a Ka ʻi he taʻu nai ʻe 20 ki muʻá, naʻe hiki ʻe Tuʻi Solomone ha maau fekauʻaki mo ha tangata mo ha fefine naʻá na feʻofaʻaki moʻoni. Pe ʻoku tau ʻosi mali pe ʻikai, ʻe lava ke tokoniʻi kitautolu ʻe he Hiva ʻa Solomoné ke mahinoʻi ʻa e ʻofa moʻoní pea mo e founga ʻe lava ke tau fakahāhā ai iá.

ʻOKU MALAVA ʻA E ʻOFA MOʻONÍ!

 3. Ko e hā ʻoku malava ai ke maʻu ʻa e ʻofa moʻoní ʻi he vahaʻa ʻo ha tangata mo ha fefine?

³ Lau ʻa e Hiva ʻa Solomone 8:6. ʻOku fakamatalaʻi ʻa e ʻofá ko ha “ulo meia Iaa.” Ko e hā hono ʻuhingá? Koeʻuhí ko e ʻulungaanga tuʻu-ki-muʻa ʻo Sihová ko e ʻofa, pea naʻá ne fakatupu kitautolu mo e malava ke faʻifaʻitaki ki heʻene ʻofá. (Sēn. 1:26, 27) Hili hono fakatupu ʻe Sihova ʻa e ʻuluaki tangatá, ʻa ʻĀtama, naʻá ne ʻoange kiate ia ha uaifi fakaʻofoʻofa. ʻI he taimi naʻe fuofua sio ai ʻa ʻĀtama kia ʻIví, naʻá ne ongoʻi fiefia ʻaupito ʻo ne fakamatalaʻi ʻa e anga ʻene ongoʻi fekauʻaki mo iá. Naʻe toe ongoʻi ofi ʻaupito ʻa ʻIvi ki hono husepānití. He ko ē, naʻe fakatupu ʻe Sihova ʻa ʻIvi meia ʻĀtama. (Sēn. 2:21-23) Mei he kamataʻangá, naʻe ʻai ʻe Sihova ke malava ʻo maʻu ʻe ha tangata mo ha fefine ʻa e feʻofaʻaki moʻoni mo tuʻuloá.

4, 5. Ko e hā ʻa e talanoa ʻi he Hiva ʻa Solomoné?

⁴ ʻOku fakamatalaʻi lelei ʻe he Hiva ʻa Solomoné ʻa e feʻofaʻaki ʻe lava ke maʻu ʻe ha tangata mo ha fefine. Ko e hivá ʻoku fekauʻaki ia mo e ʻofa ʻi he vahaʻa ʻo ha taʻahine tukuʻuta mei he kolo ko Sūnemí pe Sūlemi mo ha talavou tauhi-sipi. Ko e talanoa eni kia kinauá: Naʻe ngāue ʻa e taʻahiné ʻi he ngoue vaine hono fanga tuongaʻané ʻo ofi ki he feituʻu naʻe ʻapitanga ai ʻa Tuʻi Solomone mo ʻene kau sōtiá. Naʻá ne fakatokangaʻi ʻa e taʻahiné peá ne fekauʻi ʻene kau sevānití ke ʻomai ia ki he ʻapitangá. Peá ne fakamatalaʻi ange leva hono fakaʻofoʻofá pea foaki ange kiate ia mo e ngaahi meʻaʻofa lahi. Ka naʻe ʻofa ʻa e taʻahiné ʻi ha tauhi-sipi pea fakapapauʻi naʻá ne loto ke fakataha mo ia. (Hiva. 1:4-14) Naʻe kumi ʻa e tauhi-sipí ki he taʻahiné peá ne ʻalu ki he ʻapitangá. ʻI he taimi naʻá ne maʻu ai iá, naʻá na fakahāhā ʻena feʻofaʻakí ʻaki ʻa e ngaahi lea fakaʻofoʻofa.​—Hiva. 1:15–17.

⁵ ʻI he foki ʻa Solomone ki Selusalemá, naʻá ne ʻave mo e taʻahiné pea naʻe muimui ʻa e tauhi-sipí ʻiate ia. (Hiva. 4:1-5, 8, 9) Naʻe ʻikai ʻaupito liliu ʻe he lea pe meʻa naʻe fai ʻe Solomoné ʻa e ʻofa ʻa e taʻahiné ki he tauhi-sipí. (Hiva 6:4-7; 7:1-10) Ko ia naʻe tuku ʻe Solomone ʻa e taʻahiné ke foki ki ʻapi. ʻI he fakaʻosí, naʻe ui ʻe he taʻahine Sūlemí ʻa hono ʻofaʻangá ke lele mai kiate ia ʻo hangē ha ‘kaseli.’​—Hiva. 8:14.

 6. Ko e hā ʻe lava ai ke faingataʻa ke ʻiloʻi ʻa e tokotaha ʻoku leá ʻi he Hiva ʻa Solomoné?

⁶ Ko e Hiva ʻa Solomoné ko ha hiva mālie. Ko hono moʻoní kuo ui ia “ko e hiva ʻo e hiva.” (Hiva. 1:1) Ka ʻi he hivá, naʻe ʻikai fakakau ʻe Solomone ʻa e hingoa ʻo e faʻahinga naʻe kau aí ʻi he taimi naʻa nau lea aí. Naʻá ne loto ke tuku ʻa e mālie ʻo e māú mo e hivá ke hā mahino kae ʻikai toe tānaki ki ai ha ngaahi fakaikiiki lahi. Neongo ʻoku ʻikai fakakau ʻi he hivá ha ngaahi hingoa, ʻoku kei malava pē ke ʻiloʻi ʻa e tokotaha ʻoku leá mei he meʻa ʻokú ne leaʻakí.

“ʻOKU NGANGATU ANGE HOʻO TOʻONGA ʻOFA ʻI HE UAINE”

7, 8. Naʻe anga-fēfē hono fakahāhā ʻe he tauhi-sipí mo e taʻahiné ʻena feʻofaʻakí? ʻOmai ha fakatātā.

⁷ Naʻe leaʻaki ʻe he taʻahiné mo e tauhi-sipí ʻa e ngaahi lea fakaʻofoʻofa ke fakahaaʻi ʻaki ʻena feʻofaʻakí. ʻE ongo ngalikehe nai ʻena “toʻonga ʻofa” ʻe niʻihi kia kitautolu koeʻuhí naʻe hiki ia ʻi he taʻu ʻe 3,000 tupu kuohilí. (Hiva. 1:2) Neongo naʻe kehe hona anga fakafonuá meia kitautolu he ʻahó ni, ʻe lava ke tau mahinoʻi ʻa e anga ʻo e feongoʻiʻaki ʻa e ongo meʻá. Ko e fakatātaá, naʻe pehē ʻe he tauhi-sipí ko e mata ʻo e taʻahiné naʻe hangē “ko e ongo lupe,” ʻa ia ko e ʻuhingá naʻá ne saiʻia ʻi hono mata anga-ʻofá. (Hiva. 1:15) Pea naʻe pehē ʻe he taʻahiné ko e fofonga ʻo e tauhi-sipí naʻe fakaʻofoʻofa ʻo hangē ko e lupé. (Lau ʻa e Hiva ʻa Solomone 5:12.) Kiate ia, ko e lanu ʻo e fofonga ʻo e tauhi-sipí naʻe makehe atu ʻi he hinehiná, hangē ko ha lupe lanu pulū-kulei ʻoku kakau ʻi he huʻakau.

⁸ Naʻe tauʻaki fakahīkihikiʻi ʻe he tauhi-sipí mo e taʻahiné ʻena matamata leleí, ka naʻe ʻikai ko ia pē. Ko e fakatātaá, naʻe saiʻia ʻa e tauhi-sipí ʻi he founga anga-ʻofa ʻo e talanoa ʻa e taʻahiné ki he kakai kehé. (Lau ʻa e Hiva ʻa Solomone 4:7, 11.) Ko ia naʻe tala ange ʻe he tauhi-sipí kiate ia: “Ko ho loungutu na ʻoku toʻi honi, siʻoku poloʻi, ko e honi mo e huʻakau ʻoku ʻi ho lalo ʻelelo.” Kiate ia, ko e ngaahi lea ʻa e taʻahiné naʻe melie mo lelei ʻo hangē ko e huʻakaú mo e hone ifo tahá. ʻI he taimi naʻe tala ange ai ʻe he tauhi-sipí ki he taʻahiné ‘ʻoku ke fufuli pe hoihoifua ʻaupito,’ pea “ʻoku ʻikai hao mele,” naʻe ʻikai ke ne talanoa pē fekauʻaki mo hono fakaʻofoʻofá kae fekauʻaki foki mo hono ngaahi ʻulungaanga fakaʻofoʻofá.

 9. (a) Ko e hā ʻoku kau ki he ʻofa ʻi he vahaʻa ʻo ha husepāniti mo ha uaifi? (e) Ko e hā ʻoku mahuʻinga ai ke fakahāhā ʻe ha husepāniti mo ha uaifi ʻena feʻofaʻakí?

⁹ ʻI he ʻahó ni, ki ha husepāniti mo ha uaifi ʻokú na tauhi kia Sihova, ko e nofo malí ʻoku fakalaka ange ia ʻi ha felotoi anga-maheni pē. ʻOkú na feʻofaʻaki moʻoni pea fakahāhā ʻena ʻofá. Ka ʻoku totonu ke fēfē ʻa e ʻofa ko iá? Ko e ʻofa taʻesiokita ia ʻoku akoʻi kitautolu ʻe he Tohi Tapú ke maʻu ki he kakai kotoa pē? (1 Sio. 4:8) Ko e ʻofa fakanatula ia ʻoku tau maʻu ki hotau fāmilí? Ko e vāofi ia ʻi he vahaʻa ʻo ha ongo kaumeʻa lelei? (Sione 11:3) Pe ko e ʻofa fakaemanako? (Pal. 5:15-20) Ko hono moʻoní, ʻi he tuʻunga ko ha ongo meʻa mali, ʻoku fiemaʻu ke mo fakahāhā ʻa e feʻofaʻaki moʻoni ʻi he kotoa ʻo e ngaahi founga ko ení. ʻI he meʻa ʻokú mo leaʻaki mo faí, ʻe lava ke mo fakapapauʻi hoʻomo feʻofaʻakí pea fiefia ʻi hoʻomo nofo malí. ʻIo, ʻoku mātuʻaki mahuʻinga ke fai pehē, tatau ai pē pe ʻoku lahi fēfē hoʻo femoʻuekiná. ʻI he ngaahi anga fakafonua ʻe niʻihi ʻa ē ʻoku fokotuʻutuʻu ai ʻa e nofo malí, heʻikai nai feʻilongaki ʻa e husepānití mo e uaifí ki muʻa ʻi he ʻaho malí. Ko ia ʻi heʻena feʻilongaki angé pea tupulaki ʻena ʻofá, ʻoku fiemaʻu ke na talanoa fekauʻaki mo e feʻofaʻaki ʻokú na maʻú. ʻE ʻai heni kinaua ke na vāofi ange pea fakaivimālohiʻi ʻena nofo malí.

10. ʻE lava fēfē ke toe fakaivimālohiʻi ha nofo mali ʻe he fakahāhā ʻa e feʻofaʻakí?

¹⁰ ʻI he taimi ʻoku fakahāhā ai ʻe ha ongo meʻa ʻena feʻofaʻakí, ʻokú na fakaivimālohiʻi ai ʻena nofo malí ʻi ha founga kehe. ʻI he hivá, naʻe ʻoange ʻe Tuʻi Solomone ki he taʻahiné ʻa e “teunga-koula, pea fonofono siliva.” Naʻá ne fakahīkihikiʻi ʻa e taʻahiné, ʻo pehē naʻá ne “fakaʻofoʻofa hange ko e mahina, ʻasinisini hange ko e laʻa.” (Hiva. 1:9-11; 6:10) Ka naʻe ʻosi maʻu ʻe he taʻahiné ʻa e tokotaha naʻá ne ʻofa moʻoni aí. Ko e hā naʻá ne tokoniʻi ia ke mateaki ai pē ki he tauhi-sipí? Ko e hā naʻá ne fakafiemālieʻi ia ʻi he taimi naʻe ʻikai lava ke na fakataha aí? (Lau ʻa e Hiva ʻa Solomone 1:2, 3.) Naʻá ne manatuʻi ʻa e anga ʻene ongoʻi fiefia ʻi he ngaahi lea ʻofa ʻa e tauhi-sipí. Ko e ngaahi tōʻonga ʻofa ʻa e tauhi-sipí naʻe “ngangatu ange ʻi he uaine” kiate ia, pea ʻi he palasí naʻa nau fakafiemālieʻi ai ia hangē ha “tākai kuo mahua” ʻi hono ʻulú. (Saame 23:5; 104:15) ʻOku mahuʻinga ki ha husepāniti mo ha uaifi ke fakahāhā maʻu pē ʻena feʻofaʻakí koeʻuhí ʻe tokoni ia ke tupulaki ʻena ʻofá. Pea ko ʻena manatu ki he ngaahi tōʻonga ko ení ʻe tokoni ia ke mālohi ai pē ʻena ʻofá.

ʻOUA ʻE FAFANGU ʻA ʻOFA “KAE FAI ʻENE FAʻITELIHA”

11. Ko e hā ʻe lava ke ke ako mei he ngaahi lea ʻa e taʻahine Sūlemí ki he kau fefine ʻi he palasi ʻo Solomoné?

¹¹ Kapau te ke saiʻia ke mali, ko e hā ʻe lava ke ke ako mei he taʻahine Sūlemí? Naʻe ʻikai ke ne ʻofa ʻia Tuʻi Solomone pea tala ange papau ki he kau fefine ʻi he palasí: “ʻOua ʻe ueʻi, pe fafangu ʻa ʻofa; kae fai ʻene faʻiteliha.” (Hiva. 2:7; 3:5) Ko ia ʻoku totonu ke kamata ha vahaʻangatae fakaemanako mo ha faʻahinga taha pē? ʻIkai, ʻi hono kehé ʻoku fakapotopoto ke tatali anga-kātaki pea mali mo ha taha ʻe lava ke ke ʻofa moʻoni aí.

12. Ko e hā naʻe ʻofa ai ʻa e taʻahine Sūlemí ʻi he tauhi-sipí?

¹² Ko e hā naʻe ʻofa ai ʻa e taʻahine Sūlemí ʻi he tauhi-sipí? Naʻá ne fakakaukau naʻe talavou ʻa e tauhi-sipí, ʻo hangē “ha kaseli.” Ko hono nimá naʻe mālohi ʻo hangē ha “lula koula,” pea ko hono ongo vaʻé naʻe fakaʻofoʻofa mo mālohi hangē ha “pou mapeli.” Ka naʻe ʻikai ke ne mālohi pē mo talavou. Naʻe ʻiloʻi ʻe he taʻahiné naʻe ʻofa ʻa e tauhi-sipí kia Sihova pea maʻu mo e ngaahi ʻulungaanga lelei. Ko e ʻuhinga ia naʻe makehe ai kiate ia ʻa e tauhi-sipí, “hange ha fuʻu apele ʻi he ngaahi ʻakau ʻo e vao.”​—Hiva. 2:2 [2:3, PM], 9; 5:14, 15.

13. Ko e hā naʻe ʻofa ai ʻa e tauhi-sipí ʻi he taʻahine Sūlemí?

¹³ Naʻe hoihoifua ʻaupito ʻa e taʻahine Sūlemí. Naʻa mo Tuʻi Solomone naʻá ne manako ʻiate ia, neongo naʻe “toko onongofulu ʻa e kuini, pea valungofulu ʻa e sinifu,” naʻá ne ʻosi maʻú. Ko ʻene hoihoifuá pē ʻa e ʻuhinga naʻe ʻofa ai ʻa e tauhi-sipí ʻi he taʻahiné? ʻIkai. Naʻe toe ʻofa ʻa e taʻahiné kia Sihova pea maʻu mo e ngaahi ʻulungaanga lelei. Ko e fakatātaá, naʻe anga-fakatōkilalo ʻa e taʻahiné ʻo fakahoa ia tonu ki ha matalaʻiʻakau anga-maheni, “ko ha lose toafa.” Ka ki he tauhi-sipí naʻe makehe ʻa e taʻahiné, “hange ha lile ʻoku huluni he talatala.”​—Hiva. 1:17–2:1 [2:1, 2, PM]; 6:8.

14. Kapau te ke saiʻia ke mali, ko e hā ʻe lava ke ke ako mei he tauhi-sipí mo e taʻahine Sūlemí?

¹⁴ ʻOku fekauʻi ʻe Sihova ʻene kau sevānití ke mali “ʻi he ʻEikí pē.” (1 Kol. 7:39) ʻOku ʻuhinga ení te tau faialea pē pe mali mo ha taha ʻa ia ko ha sevāniti ʻosi papitaiso ʻa Sihova. ʻE anga-fēfē tokoni ʻa e meʻá ni ki ha nofo mali? Ko ha husepāniti mo ha uaifi kuo pau ke na fekuki mo e ngaahi loto-mafasia ʻo e moʻui fakaʻahó. Ka ʻi he taimi te na fakatou maʻu ai ha vahaʻangatae vāofi mo Sihová, ko ʻena nofo malí ʻe lava ke hoko ʻo melino mo fiefia. Ko ia kapau te ke saiʻia ke mali, muimui ʻi he faʻifaʻitakiʻanga ʻa e tauhi-sipí mo e taʻahine Sūlemí. Kumi ki ha tokotaha ʻoku ʻulungaanga lelei ʻa ia ʻoku ʻofa moʻoni kia Sihova.

KO HOKU MALÍ ʻOKU HANGĒ HA “NGOUETAPU KEI LOKAʻI”

15. ʻOku anga-fēfē hoko ʻa e mateaki ʻa e taʻahine Sūlemí ko ha faʻifaʻitakiʻanga lelei ki he ngaahi hoa Kalisitiane teʻeki malí?

¹⁵ Lau ʻa e Hiva ʻa Solomone 4:12. Ko e hā naʻe pehē ai ʻe he tauhi-sipí ko ʻene taʻahine Sūlemí naʻe hangē ha “ngouetapu kei lokaʻi”? Ko ha ngoue ʻoku lokaʻi hono matapaá ʻoku ʻikai ʻatā ia ki he kakaí. Ko e taʻahiné naʻe hangē ko e ngoue ko iá koeʻuhí naʻá ne ʻofa ʻi he tauhi-sipí pē. Naʻá ne palani ke mali mo e tauhi-sipí, ko ia naʻá ne tukunoaʻi ha tokanga pē mei he tuʻí. Pea naʻe ʻikai ke ne liliu ʻene fakakaukaú. Naʻá ne hangē ha “ʻamaka” kae ʻikai ko ha “matapa” ʻa ia ʻe faingofua ke fakaava. (Hiva. 8:8-10) ʻI he founga meimei tatau, ko ha ongo meʻa Kalisitiane ʻokú na palani ke mali te na femateakiʻaki. Heʻikai te na tokanga fakaemanako ki ha toe taha kehe.

16. Kapau ʻokú ke faialea, ko e hā ʻe lava ke ke ako mei he Hiva ʻa Solomoné?

¹⁶ ʻI he taimi naʻe kole ange ai ʻe he tauhi-sipí ki he taʻahiné ke na ʻalu ʻo ʻevá, naʻe ʻikai ke tuku ʻe hono fanga tuongaʻané ia ke ne ʻalu. ʻI hono kehé, naʻa nau ʻave ia ke ne tokangaʻi ʻenau ngoue vainé. Naʻe ʻikai ke nau falala kiate ia? Naʻa nau fakakaukau naʻe loto honau tuofefiné mo e tauhi-sipí ke fai ha meʻa taʻetaau? ʻIkai. Naʻe loto hono fanga tuongaʻané ke maluʻi honau tuofefiné mei ha tuʻunga ʻe lava ke fakataueleʻi ai ia ke fai ha fehālaaki. (Hiva. 1:6; 2:10-15) Kapau ʻokú ke faialea, ʻe lava fēfē ke ke fakaʻehiʻehi mei ha meʻa pē ʻe lava ke taki atu ki ha ʻulungaanga taʻetaau fakaefehokotaki fakasino? Fakapapauʻi ki muʻa ʻa e meʻa te ke fakaʻehiʻehi mei ai koeʻuhí ke tauhi ke maʻa ho vahaʻangataé. ʻOua ʻaupito te mo nofo toko ua ʻi ha feituʻu heʻikai lava ke sio atu ki ai ha taha. Fakahaaʻi pē hoʻomo feʻofaʻakí ʻi ha founga maʻa.

17, 18. Kuo anga-fēfē hono tokoniʻi koe ʻe he ako fekauʻaki mo e Hiva ʻa Solomoné?

¹⁷ ʻOku finangalo ʻa Sihova ke tuʻuloa ʻa e nofo malí. ʻOkú ne finangalo ke feʻofaʻaki ʻa e husepānití mo e uaifí. ʻOku fakanatula ke na feʻofaʻaki ʻi heʻena malí. Ka ke tuʻuloa ʻena nofo malí, kuo pau ke na tauhi ʻena ʻofá ke mālohi, ʻo hangē ha afi heʻikai ʻaupito ʻosi ʻene velá.​—Mk. 10:6-9.

¹⁸ Kapau te ke saiʻia ke mali, kumi ʻa e tokotaha ʻe lava ke ke ʻofa moʻoni aí. ʻI hoʻo maʻu ʻa e tokotaha ko iá, ngāue fakataha ke tauhi homo feʻofaʻakí ke mālohi. Hangē naʻa tau ako mei he Hiva ʻa Solomoné, ko e ʻofa moʻoni mo tuʻuloá ʻoku malava ke maʻu, he “ko e matuʻaki ulo meia Iaa.”​—Hiva. 8:6.

[Fakamatala ʻi lalo]

[Fakatātā ʻi he peesi 31]

Heʻikai loto ha Kalisitiane ke faialea pe mali mo ha taha ʻa ia ʻoku ʻikai ko ha sevāniti ʻosi papitaiso ʻa Sihova (Sio ki he palakalafi 14)