Ko Hoʻo Moʻuí​—Ko e Hā Hono Taumuʻá?

“Kae fakaʻuli poto pe ʻe hoku ʻatamai . . . ke u vakai pe ko e ha ʻoku lelei ke fai ʻe he hako ʻo e tangata . . . kaeʻoua ke kakato ʻa e ngaahi ʻaho o ʻene moʻui.”​—KOHELETI 2:3.

 1, 2. Ko e hā ʻoku ʻikai hala ai ke maʻu ha mahuʻingaʻia feʻunga pē ʻiate kitá?

ʻOKÚ KE mahuʻingaʻia ʻiate koe, ʻikai ko ia? Ko e anga-totonú pē ia. Ko ia ai, ʻoku tau kai ʻi he ʻaho kotoa pē, ʻoku tau mohe ʻi he taimi ʻoku tau helaʻia aí, pea ʻoku tau saiʻia ke fakataha mo hotau ngaahi kaungāmeʻá pea mo e faʻahinga ʻoku tau ʻofa aí. ʻI he taimi ʻe niʻihi, ʻoku tau fai ai ha ngaahi vaʻinga, kakau, pe fai ʻa e ngaahi meʻa kehe ko ia ʻoku tau saiʻia aí, ʻo fakahaaʻi ai ʻa e mahuʻingaʻia mafamafatatau ʻiate kitautolu.

² Ko e mahuʻingaʻia ʻia kita peheé, ʻoku fetāiaki ia mo e meʻa naʻe ueʻi ʻe he ʻOtuá ʻa Solomone ke tohí: “ʻOku ʻikai ha lelei ʻi he nofo, ka ko ʻete kai pe mo inu, mo fafanga ʻaki hoku loto ʻa e lelei ʻoku maʻu ʻi heʻete ngaue.” Makatuʻunga ʻi heʻene taukeí, naʻe tānaki atu ai ʻe Solomone: “Naʻa mo ia naʻa ku vakai ʻoku meia Elohimi pe. He ko hai te ne lava ke kai, pea ko hai te ne lava ke ongoʻi malie, ʻo ʻatā mei Heʻene Afio?”​—Koheleti 2:​24, 25.

 3. Ko e hā ʻa e ngaahi fehuʻi fakatupu fifili ʻoku ʻikai ala tali ʻe he tokolahi?

³ Neongo ia ʻokú ke ʻiloʻi ʻe koe, ko e moʻuí ʻoku hulu atu ia ʻi he kaí, inú, mohé, mo hono fai pē ha lelei. ʻOku ʻi ai hotau ngaahi faingataʻaʻia, ngaahi ʻamanaki taʻehoko, pea mo e ngaahi loto-hohaʻa. Pea ʻoku tau ngali fuʻu femoʻuekina ke fakakaukau ai ki he ʻuhinga ʻo ʻetau moʻuí. ʻIkai ko e meʻa ʻeni ʻoku hoko kiate koé? Ko Vermont Royster, ko e ʻētita ki muʻa ia ʻo e The Wall Street Journal, hili ʻene fakatokangaʻi ko ia ʻa e tupulekina ʻo ʻetau ʻiló mo e pōtoʻí, naʻá ne tohi: “Ko e meʻa ngali kehe ʻeni. ʻI he fakakaukau ki he tangatá tonu, ʻa ʻene ngaahi filifilingauá, ʻa hono tuʻunga ʻi he ʻuniveesi ko ʻení, ʻoku tau kiʻi ngaʻunu siʻi pē pea mei he kamataʻangá. ʻOku tau kei nofo pē mo e ngaahi fehuʻi pe ko hai kitautolu, pea ko e hā ʻa e ʻuhinga ʻoku tau ʻi heni aí pea ko ʻetau ʻalú ki fē.”

 4. Ko e hā ʻoku totonu ai ke tau fiemaʻu tāutaha ke tau lava ʻo tali ʻa e ngaahi fehuʻi fekauʻaki mo kitautolú?

⁴ ʻE fēfē haʻo tali ki he ngaahi fehuʻi: Ko hai kitautolu? Ko e hā ʻoku tau ʻi heni aí? Pea ko ʻetau ʻalú ki fē? ʻI Siulai ʻo e taʻu kuo ʻosí, naʻe mālōlō ai ʻa Mr. Royster ia. ʻOkú ke pehē, ʻi he aʻu mai ki aí, kuó ne ʻosi maʻu ha ngaahi tali fakafiemālie? Ke mahino angé, ʻOku ʻi ai ha founga te ke malava ʻo maʻu ai? Pea ʻe anga-fēfē malava ʻe he meʻá ni ʻo tokoniʻi koe ke maʻu ha moʻui fiefia mo mohu ʻuhinga ange? Tau sio angé.

Ko ha Maʻuʻanga Tefito ʻo e ʻIló

 5. Ko e hā ʻoku totonu ai ke tau hanga ki he ʻOtuá ʻi he taimi ʻoku tau fekumi ai ke ʻilo ki he ngaahi fehuʻi fekauʻaki mo e ʻuhinga ʻo e moʻuí?

⁵ Kapau ko kitautolú ʻoku tau taki taha fekumi pē ki he taumuʻa ʻo ʻetau moʻuí, mahalo pē pe ʻe maʻu ha kiʻi ola pe ʻikai, ʻo hangē pē ko ia kuo fakamoʻoniʻi ʻe he tokolahi taha ʻo e kau tangata mo e kau fefine, naʻa mo e faʻahinga kuo hulu atu ʻenau akó mo e taukeí. Ka ʻoku ʻikai liʻekina ai kitautolu ia. Ko hotau Tokotaha-Fakatupú kuó ne ʻosi tokonaki ha tokoni. ʻI hoʻo fakakaukau atu ki aí, ʻikai ko ia ʻa e maʻuʻanga māʻolunga taha ʻo e ʻiló mo e potó, ʻoku “mei muʻa ʻo lauikuonga” pea ʻokú ne maʻu ʻa e ʻilo kakato ki he ʻuniveesí mo e hisitōliá? (Sāme 90:​1, 2) Naʻá ne fakatupu ʻa e faʻahinga ʻo e tangatá, pea kuó ne ʻosi ʻafioʻi ʻa e meʻa kotoa kuo hokosia ʻe he faʻahinga ʻo e tangatá, ko ia ai, ko ia ʻa e Tokotaha ʻa ē ʻoku totonu ke tau hanga ki ai ki he ʻiló, kae ʻikai ko e faʻahinga taʻehaohaoa ʻo e tangatá, ʻa ia ʻoku fakangatangata pē ʻenau ʻiló mo e mahinó.​—Sāme 14:​1-3; Loma 3:​10-12.

 6. (a) Kuo anga-fēfē hono tokonaki mai ʻe he Tokotaha-Fakatupú ʻa e ʻilo ʻoku fiemaʻú? (e) ʻOku anga-fēfē kaunga ki ai ʻa Solomoné?

⁶ Lolotonga ʻa e ʻikai te tau ʻamanekina ʻe fafana mai ʻa e Tokotaha-Fakatupú ki hotau telingá ha meʻa fakahā fekauʻaki mo e ʻuhinga ʻo e moʻuí, kuó ne ʻosi tokonaki mai ʻe ia ha maʻuʻanga ki he ʻiló​—ko ʻene Folofola fakamānavaʻí. (Sāme 32:8; 111:10) Ko e tohi ʻa Koheletí ʻoku tautefito ʻene mahuʻinga fekauʻaki mo e meʻá ni. Naʻe fakamānavaʻi ʻe he ʻOtuá ʻa hono tokotaha-tohí, ʻo hoko ai ʻo “hulu ʻa e poto ʻa Solomone ʻi haʻa Hahake katoa.” (1 Tuʻi 3:​6-12; 4:​30-34) Ko e “poto ʻa Solomone” naʻe mātuʻaki maongo ia ki ha kuini naʻe ʻaʻahi mai, ʻo ne pehē ai, ko e vaeua naʻe ʻikai tala ange, pea ko kinautolu ʻoku fanongo ki hono potó te nau mātuʻaki fiefia moʻoni.a (1 Tuʻi 10:​4-8) Ko kitautolu foki ʻe lava ke tau maʻu ʻa e ʻilo mo e fiefia mei he poto fakaʻotua ko ia kuo tokonaki mai ʻe hotau Tokotaha-Fakatupú ʻo fakafou ʻia Solomoné.

 7. (a) Ko e hā naʻe fakaʻosiʻaki ʻe Solomone ʻo fekauʻaki mo e lahi taha ʻo e ngaahi ngāue ʻi he lalo langí? (e) Ko e hā ʻokú ne fakatataaʻi ʻa e ngaahi fakafuofua totonu ʻa Solomoné?

⁷ Ko Koheleti ʻokú ne fakaeʻa ʻa e poto ʻoku foaki mei he ʻOtuá, ʻa ē naʻá ne ueʻi ʻa e loto mo e ʻatamai ʻo Solomoné. ʻI hono maʻu ʻa e taimí, koloá, ʻilo ki hono fai iá, naʻe sivisiviʻi ai ʻe Solomone ʻa e “meʻa kotoa [naʻe] fai ʻi he lalo langi.” Naʻá ne vakai ko e lahi taha ʻo iá “ko e koto muna ia, mo e kai matangi,” ʻa ia ko e fakafuofua ia naʻe fakamānavaʻi ke tau manatu ki ai ʻi he taimi ʻoku tau fakakaukau ai ki he taumuʻa ʻo ʻetau moʻuí. (Koheleti 1:​13, 14, 16) Naʻe lea hangatonu ʻa Solomone, ʻo lea totonu. Ko e fakatātaá, fakakaukau atu ki heʻene ngaahi lea ko ia ʻoku ʻi he Koheleti 1:​15, 18. ʻOkú ke ʻilo ʻi he faai mai ʻa e ngaahi senitulí, kuo ʻosi ʻahiʻahiʻi ʻe he tangatá ia ʻa e ngaahi founga-pule kehekehe, ʻi he taimi ʻe niʻihi ko ha feinga loto-moʻoni pē ke solova ʻa e ngaahi palopalemá pea mo fakaleleiʻi ʻa e moʻui ʻa e kakaí. Ka kuo malava ʻe ha founga-pule ʻo fakatonutonu ʻa e ngaahi meʻa ʻoku “piko” ʻi he fokotuʻutuʻu taʻehaohaoa ko ʻení? Pea mahalo kuó ke ʻosi mātā, ko e lahi ange ha ʻilo ʻa ha taha, ko e mataʻā ange ia ʻene fakatokangaʻi ko ha moʻui fuonounou, ʻe taʻemalava ke fakatonutonu kakato ai ʻa e ngaahi meʻá ia. Ko ha ʻilo pehē ʻokú ne ʻomi ʻa e ongoʻi feifeitamakí ki he tokolahi, ka ʻoku ʻikai totonu ke pehē ia ʻiate kitautolu.

 8. Ko e hā ʻa e ngaahi vilo kuo fuoloa pē ʻene hokó?

⁸ Ko e toe poini ʻe taha ke fakakaukau ki aí, ko e ngaahi vilo hokohoko ko ia ʻa ē ʻoku kaunga kiate kitautolú, hangē ko e hopo mo e tō ʻa e laʻaá, pe ko e ngāʻunu ʻa e matangí mo e vaí. Naʻa nau ʻi ai ʻi he ngaahi ʻaho ʻo Mōsesé, Solomone, Napoleone, pea mo ʻetau ngaahi kui-uá. Pea ʻoku nau hoko atu pē. ʻOku pehē pē, ʻoku “mole ha toʻutangata, pea haʻu ha toʻutangata.” (Koheleti 1:​4-7) Mei ha sio fakaetangata, kuo ʻikai ha loko liliu ia. Ko e kakai ʻi he kuonga muʻá mo e kuongá ni kuo nau ʻinasi ʻi he ngaahi ngāue, ngaahi ʻamanaki, ngaahi taumuʻa mo e ngaahi lavameʻa ala fakatatauʻi. Neongo kapau ne ʻai ʻe ha taha ʻo ʻiloa hono hingoá pe tuʻu-ki-muʻa ʻi he fakaʻofoʻofá pe malavá ʻi he founga fakaetangatá pē, ʻoku ʻi fē ʻa e tokotaha ko iá ʻi he ʻahó ni? Kuo puli ia pea mahalo pē kuo ngalo. ʻOku ʻikai ke ngali kehe ia. Ko e kakai tokolahi ʻoku ʻikai te nau teitei ʻilo ʻa e hingoa ʻenau ngaahi kui-uá pe ʻilo pe naʻe fāʻeleʻi mo tanu kinautolu ʻi fē. ʻOkú ke sio ai ki he ʻuhinga naʻe fakatokangaʻi lelei ai ʻe Solomone, ʻoku muna pē ʻa e ngaahi ngāue mo e ngaahi feinga ʻa e faʻahinga ʻo e tangatá.​—Koheleti 1:​9-11.

 9. ʻE anga-fēfē nai hano tokoniʻi kitautolu ʻe he ʻilo totonu ko ia ki he tuʻunga ʻo e faʻahinga ʻo e tangatá?

⁹ ʻI he ʻikai ke ʻai ai kitautolu ke ongoʻi feifeitamakí, ko e ʻilo fakaeʻotua ko ʻeni ki he tuʻunga tefito ʻo e tangatá, ʻe maʻu ai ha ola lelei, ʻoku ueʻi ai kitautolu ke tau fakaʻehiʻehi mei he piki ko ia ki he ngaahi taumuʻa ʻikai ke mahuʻingá pe ko e ngaahi ngāue ʻe vave ʻene mole mo ngaló. ʻOku tonu ke ne tokoniʻi kitautolu ke tau sivisiviʻi ʻa e meʻa ʻoku tau maʻu ʻi he moʻuí mo ia ʻoku tau feinga ke lavaʻí. Ke fakatātā, ʻi he ʻikai hoko ko e kau mātuʻaki fieʻaukaí, te tau fiefia ʻi he kai mo e inu ʻoku palanisí. (Koheleti 2:24) Pea, hangē ko ia te tau vakai ki aí, ʻoku aʻusia ʻe Solomone ha fakamulituku ʻoku pau mo mahino lelei. Ko hono fakanounoú, ko hono moʻoní ia ʻoku totonu ke tau houngaʻia loloto ʻi hotau vahaʻangatae mo hotau Tokotaha-Fakatupú, ʻa ē te ne malava ʻo tokoniʻi kitautolu ke maʻu ha kahaʻu taʻengata ʻoku fiefia mo mohu taumuʻá. Naʻe fakamamafaʻi ʻe Solomone: “Ko e ngataʻanga ʻeni ʻo e meʻa: kuo aʻau hono kotoa. Ke ke ʻapasia kia Elohimi, ʻo tauhi ʻene ngahi fekau; he ko e kotoa ʻo e tangata ia.”​—Koheleti 12:13.

Ko e Taumuʻa ʻi he Vakai ki he Ngaahi Vilo ʻa e Moʻuí

10. ʻI he tuʻunga fē naʻe fakatatau ai ʻe Solomone ʻa e fanga manú ki he faʻahinga ʻo e tangatá?

¹⁰ Ko e poto fakaʻotua ko ia ʻoku tapua mai ʻia Koheletí ʻoku malava ke ne toe tokoniʻi kitautolu ʻi hono fakakaukauʻi ko ia ʻetau taumuʻa ʻi he moʻuí. ʻO anga-fēfē? ʻI hono fakahanga moʻoni ko ia ʻe Solomone ki he ngaahi moʻoni kehe ʻoku ʻikai nai te tau faʻa fakakaukau ki aí. Ko e taha ʻa ia ʻoku felāveʻi ia mo e ngaahi faitatau ʻi he fanga manú mo e faʻahinga ʻo e tangatá. Naʻe fakatatau ʻe Sīsū ʻa ʻene kau muimuí ki he fanga sipi, lolotonga ia ko e fakalūkufua ʻo e kakaí ia ʻoku ʻikai te nau saiʻia hono fakatatau kinautolu ki he fanga manú. (Sione 10:​11-16) Neongo ia naʻe kei ʻomai pē ʻe Solomone ia ʻa e ngaahi moʻoni pau ʻoku taʻealafakaʻikaiʻi: “Ta koeʻuhia ko e [hakoʻi tangata], ko e fie sivi kinautolu ʻe Elohimi, pea ke nau sio ko e fanga manu pe kinautolu ʻiate kinautolu. He ko e hakoʻi tangata ko e meʻa hokonoa, pea ko e fanga manu ko e meʻa hokonoa; pea ʻoku taha pe ʻa e meʻa ʻoku hoko kiate kinautolu: hange ko e mate ʻa é ʻoku pehe ʻa e mate ʻo é; . . . pea ʻoku ʻikai ke amo atu ʻa e tangata ʻi he manu: he ko e muna kotoa pe. . . . ʻOku mei he efu kotoa pe, pea ʻoku foki kotoa pe ki he efu.”​—Koheleti 3:​18-20.

11. (a) ʻE fakamatalaʻi fēfē nai ʻa e faʻahinga vilo ʻa e moʻui ko ia ʻa ha manu? (e) ʻOkú ke ongoʻi fēfē fekauʻaki mo ha sivisiviʻi pehē?

¹¹ Fakakaukau atu ki ha manu ʻokú ke saiʻia he mamata ki aí, mahalo pē ko ha sāfana pe ko ha lāpisi. (Teutalonome 14:7; Sāme 104:18; Palovepi 30:26) Pe ko haʻo sioloto atu nai ki ha sikueli; ʻa ia ʻoku laka hake ʻi he faʻahinga ʻe 300 ʻi he māmaní. ʻOku vilo fēfē ʻene moʻuí? Hili hono fanauʻí, ʻoku fafanga ia ʻe heʻene faʻeé ʻi ha ngaahi uike. Taimi nounou mei ai kuo tupu leva hono fulufulú pea lava leva ʻo takatakai holo. Te ke sio nai ki ai ʻoku topunopuna holo heʻene ako ke kumi meʻakaí. Ka ko e taimi lahi ʻoku hā ngali ko haʻane vaʻinga pē, ko e fiefia ʻi heʻene kei tupú. Hili ʻene tupu ʻo taʻu taha pe ofi ki ai, ʻokú ne maʻu leva hono hoa. Kuo pau leva ke ne langa hano pununga pe mohenga, pea mo tokangaʻi ʻa e fāngangá. Kapau te ne maʻu ha fanga kiʻi foʻi ʻakau, fanga kiʻi foʻi nati, mo ha fanga kiʻi tengaʻiʻakau feʻunga, ʻe tupu leva nai ʻa e fāmili sikuelí pea maʻu leva mo e taimi ke fakalahi ai honau nofoʻangá. Ka ʻi he ngaahi taʻu siʻi pē, kuo motuʻa ia pea matangofua ange leva ai ʻa e hoko ʻa e fakatuʻutāmakí mo e mahakí. ʻOku mate leva ia ʻi hono taʻu hongofulú nai. ʻI ha ngaahi faikehekehe siʻi pē ʻi he faʻahinga kehekehe ko ia ʻo e sikuelí, ʻoku pehē pē ʻa e vilo ia ʻenau moʻuí.

12. (a) ʻI hono moʻoní, ko e hā ʻoku hangē ai ʻa e vilo ʻa e moʻui ʻa e tokolahi ʻo e faʻahinga ʻo e tangatá ko e tuʻunga maheni ʻo e fanga manú? (e) Ko e hā te tau fakakaukau atu nai ki ai ʻi he taimi ka hoko mai te tau sio ai ki ha manu ʻoku tau fakakaukau atu ki ai?

¹² Ko e kakai tokolahi, heʻikai ke nau fakaʻikaiʻi ha vilo pehē ʻa ha manu, pea heʻikai te nau ʻamanekina ha sikueli te ne fakakaukauʻi fakaleleiʻi ʻa e taumuʻa ʻo e moʻuí. Ka neongo ia, ko e moʻui ʻa e tokolahi ʻo e faʻahinga ʻo e tangatá ʻoku ʻikai fuʻu loko kehe ia mei ai, ʻikai ko ia? ʻOku fanauʻi pea tauhi kinautolu ko e fanga pēpē. ʻOku nau kai, tupu, pea vaʻinga ko e kau talavou. Taimi siʻi mei ai, ʻoku nau hoko ʻo lalahi, kumi ki ha hoa, pea kumi ki ha feituʻu ke nofo ai mo ha founga ke maʻu ai ha meʻakai. Kapau ʻe lava lelei ia, te nau ngali tupu nai ʻo tokolahi pea mo fakalahi honau nofoʻangá (pununga) ke ʻohake ai ʻa e fānaú. Ka ʻoku vave pē ʻalu ʻa e ngaahi hongofuluʻi taʻú ia, pea ʻoku nau tupu ʻo motuʻa ange. Kapau ʻe ʻikai ki muʻa ai, ʻoku nau mate nai hili ha ngaahi taʻu ʻe 70 pe 80, ʻa ia kuo fonu ʻi he “ongosia mo e muna.” (Sāme 90:​9, 10, 12) Te ke fakakaukau nai ki he ngaahi moʻoni fakamamahi ko ʻení ʻi he taimi ka hoko mai te ke sio ai ki ha sikueli (pe ko ha manu pē ʻokú ke fakakaukau atu ki ai).

13. Ko e hā ʻa e ikuʻanga ʻoku fakamoʻoniʻi pau fakatouʻosi ki he fanga manú mo e faʻahinga ʻo e tangatá?

¹³ Te ke lava ʻo sio ai ki he ʻuhinga naʻe fakahoa ai ʻe Solomone ʻa e moʻui ʻa e kakaí ki he fanga manú. Naʻá ne tohi: “Ko e meʻa kotoa ʻoku ai hano taimi, . . . Ko e ʻaho ke fanauʻi, mo e ʻaho ke pekia.” Ko e meʻa hokonoa ko ia ki muí, ʻa e maté, ʻoku tatau pē ki he tangatá mo e manú, “hange ko e mate ʻa é ʻoku pehe ʻa e mate ʻo é.” Naʻá ne tānaki atu: “ʻOku mei he efu kotoa pe, pea ʻoku foki kotoa pe ki he efu.”​—Koheleti 3:​1, 2, 19, 20.

14. ʻOku anga-fēfē ʻa e feinga ʻa e niʻihi ʻo e faʻahinga ʻo e tangatá ke fulihi ʻa e vilo anga-maheni ʻo e moʻuí, ka ʻoku iku ia ki he hā?

¹⁴ ʻOku ʻikai fiemaʻu ke tau sio ki he fakafuofua tonu ko ʻení ko ha fakakaukau hala. ʻOku moʻoni, ʻoku feinga ʻa e niʻihi ke fulihi ʻa e tuʻunga ko iá, hangē ko e ngāue lahi ange ke fakalahi honau tuʻunga fakamatelié ke laka ia ʻi he meʻa naʻe maʻu ʻe heʻenau mātuʻá. ʻOku nau tulimui nai ki ha ngaahi taʻu lahi ange ʻo e akó ke lava ʻo tokonaki ai ha tuʻunga māʻolunga ange ʻo e nofó, lolotonga ia ʻa e feinga ke fakalahi ʻa ʻenau mahino fekauʻaki mo e moʻuí. Pe ko e fakamātoato nai ʻi he fakamālohi sinó pe ko hono tauhi ʻo e kaí, ke maʻu ha moʻui lelei ange pe ko e moʻui kiʻi fuoloa ange. Pea ko e ngaahi feinga ko ʻení te ne ʻomi nai ha ngaahi ʻaonga pau. Ka ko hai ia te ne lava ʻo fakapapauʻi ko e ngaahi feinga peheé ʻe hoko moʻoni ʻo ola lelei? Pea kapau ʻe hoko ʻo pehē, ko e hā hono fuoloá?

15. Ko e hā ʻa e fakafuofua tonu ʻoku moʻoni fekauʻaki mo e moʻui ʻa e kakai tokolahi?

¹⁵ Naʻe ʻeke ʻe Solomone: “Seuke, ʻoku ai ha ngaahi fuʻu lau ʻoku fakalahi muna, ka ko e ha hono ʻaonga ki he tangata? He ko hai ʻoku ne ʻilo ʻa e meʻa ʻoku lelei ki he tangata ʻi heʻene moʻui lolotonga kuo teʻeki kakato ʻa e ngaahi ʻaho oʻene moʻui muna? he ko e moʻui fakaʻata hono kotoa. Hono lava ʻe ha tangata ke fakaha ki ha tangata ʻa e meʻa ʻe hoko . . . hili ʻene pekia?” (Koheleti 6:​11, 12) Koeʻuhí ʻoku fakangata vave pē ʻe he maté ʻa e ngaahi feinga ʻa ha taha, ʻoku ʻi ai hano fuʻu ʻaonga ʻa e feinga ke maʻu ha ngaahi meʻa fakamatelie lahi ange pe ko e tulimui ki ha ngaahi taʻu lahi ʻo e akó ko e ʻuhinga lahí pē ke maʻu ha koloa lahi ange? Pea koeʻuhi ko e moʻuí ʻoku fuʻu nounou, ʻo mole atu pē hangē ha ʻatá, kuo ʻilo ai ʻe he tokolahi ʻoku ʻikai toe ʻi ai ha taimi ke toe fakahanga ai ʻa e ngaahi feingá ki ha toe taumuʻa fakaetangata, ʻi heʻenau ongoʻi ʻe ʻikai siaʻa; pea hala ke ʻilo fakapapau ʻe ha tangata ko e hā ʻe hoko ki heʻene fānaú he “hili ʻene pekia.”

Kuo Taimi ke ʻAi ha Hingoa Lelei

16. (a) Ko e hā ʻoku totonu ke tau faí ʻa ē ʻoku ʻikai malava ia ʻe he fanga manú? (e) Ko e hā ʻa e toe moʻoni ʻe taha ʻoku totonu ke ne ueʻi ʻetau fakakaukaú?

¹⁶ ʻI he ʻikai hangē ko e fanga manú, ʻoku maʻu ʻe kitautolu faʻahinga ʻo e tangatá ia ʻa e malava ke fakakaukau, ‘Ko e hā ʻa e ʻuhinga ʻo ʻeku ʻi ai ní? Ko ha vilo pē ia kuo ʻosi fokotuʻu pau, ʻaki ha taimi ke fanauʻi mo e taimi ke pekia?’ ʻI he felāveʻi mo iá, manatu ki he moʻoni ko ia ʻo e ngaahi lea ʻa Solomone fekauʻaki mo e tangatá mo e manú: “ʻOku foki kotoa pe ki he efu.” ʻOku ʻuhinga iá ko e maté ko e ngata fakaʻaufuli ia ʻo e ʻi ai ʻa ha taha? Sai, ʻoku fakahā ʻe he Tohitapú ʻoku ʻikai maʻu ʻe he faʻahinga ʻo e tangatá ha soulu taʻefaʻamate ʻoku moʻui atu hili ʻa e maté. Ko e faʻahinga ʻo e tangatá ko e ngaahi soulu, pea ko e soulu ʻoku fai angahalá ʻoku mate ia. (Isikeli 18:​4, 20) Naʻe fakamatalaʻi mahino ʻe Solomone: “Ko e kau moʻui ʻoku nau ʻilo ai pe te nau pekia: ka ko e kau pekia ʻoku ʻikai te nau ʻilo ha momoʻi meʻa, pea ʻoku ʻikai te nau kei sio totongi: he kuo mole ʻa e manatu kiate kinautolu. Ko ia kotoa ʻoku ʻilo ʻe ho nima te ne mafai, fai ʻaki ho ivi; he ʻoku ʻikai ha ngaue, pe ha fakakaukau, pe ha ʻilo, pe ha poto ʻi Lolofonua, ʻa e feituʻu ʻoku ke fononga ki ai.”​—Koheleti 9:​5, 10.

17. ʻOku totonu ke ueʻi kitautolu ʻe he Koheleti 7:​1, 2 ke tau fakakaukau lelei ki he hā?

¹⁷ ʻI he vakai ki he moʻoni taʻeala kalofi ko iá, fakakaukau ki he fakamatala ko ʻení: “ʻOku ngangatu ange ʻa e hingoa lelei ʻi he lolo takai, mo e ʻaho ʻo e pekia ʻi he ʻaho ʻo hoto fanauʻi. ʻOku lelei hake ke ʻalu ki ha fale ʻoku i ai ha tangi, ʻi he ʻalu ki he fale ʻoku fai ai ha inu kava: he ko é ko e ngataʻanga ʻo e tangata kotoa pe, pea ko e tangata moʻui ʻoku ne ʻai ia ki hono loto.” (Koheleti 7:​1, 2) Kuo pau ke tau loto tatau ki ai, ko e maté kuo hoko ia “ko e ngataʻanga ʻo e tangata kotoa pe.” Kuo ʻikai ha tangata te ne malava ʻo inu ha faʻahinga faitoʻo, kai ha faʻahinga fefiofi ʻo e vaitaminí, muimui ʻi ha faʻahinga kai, pe kau ʻi ha faʻahinga fakamālohi sino pea iku atu ai ki he moʻui taʻengatá. Pea ʻoku faʻa “mole ʻa e manatu kiate kinautolu” ʻi he fuoloa siʻi pē hili ʻenau maté. Ko ia ai, ko e hā ʻoku hoko ai ha hingoa ʻo “ngangatu ange . . . ʻi he lolo takai, mo e ʻaho ʻo e pekia ʻi he ʻaho ʻo hoto fanauʻi”?

18. Ko e hā ʻe lava ai ke tau fakapapauʻi naʻe tui ʻa Solomone ki he toetuʻú?

¹⁸ Hangē ko ia kuo mahinó, naʻe lea moʻoni ʻa Solomone. Naʻá ne ʻilo ki heʻene fanga kui ko ia ko ʻĒpalahame, ʻAisake, mo Sēkope, ʻa kinautolu naʻa nau ʻai moʻoni ha hingoa lelei mo hotau Tokotaha-Fakatupú. ʻI heʻene maheni lelei ko ia mo ʻĒpalahamé, naʻe talaʻofa ai ʻe Sihova ko e ʻOtuá, te ne tāpuakiʻi ia mo hono hakó. (Senesi 18:​18, 19; 22:17) ʻIo, naʻe maʻu ʻe ʻĒpalahame ha hingoa lelei mo e ʻOtuá, ʻo ne hoko ai ko hono kaumeʻa. (2 Kalonikali 20:7; Aisea 41:8; Semisi 2:23) Naʻe ʻilo ʻe ʻĒpalahame, ko ʻene moʻuí mo e moʻui ʻa hono fohá ʻoku ʻikai ko ha konga pē ia ʻo e vilo taʻetoe tuku ʻo e fanauʻí mo e maté. ʻOku ʻi ai ʻa e ʻuhinga pau lahi ange ia ki ai. Naʻá na maʻu ʻa e ʻamanaki papau ko ia ʻo e toe moʻui maí, ʻo ʻikai ko haʻana maʻu ha soulu taʻefaʻamate, ka koeʻuhi ʻe toe fokotuʻu mai kinaua. Naʻe tui pau ʻa ʻĒpalahame “naʻa mo e pekia, . . . ʻoku mafai ʻe he ʻOtua ke fokotuʻu [ʻa ʻAisake] mei ai.”​—Hepelu 11:​17-19.

19. Ko e hā ʻa e ʻilo te tau lava ʻo maʻu meia Siope ʻi he fekauʻaki mo e ʻuhinga ko ia ʻo e Koheleti 7:1?

¹⁹ Ko e kī ia ke mahino ai “ʻoku ngangatu ange ʻa e hingoa lelei ʻi he lolo takai, mo e ʻaho ʻo e pekia ʻi he ʻaho ʻo hoto fanauʻi.” Hangē pē ko Siopé ʻa ia naʻe ʻi muʻa ʻiate iá, naʻe tui pau ʻa Solomone ko e Tokotaha ko ia naʻá ne fakatupu ʻa e moʻui fakaetangatá, te ne toe malava pē ʻo fakafoki mai ia. Te ne lava ʻo toe fakafoki mai ki he moʻuí ʻa e faʻahinga ko ia kuo nau ʻosi maté. (Siope 14:​7-14) Naʻe pehē ʻe he tangata anga-tonu ko Siopé: “Te ke [Sihova] toki ui, pea te u tali atu ʻe au: ʻe kavea ho finangalo ki he fitaʻa ʻa ho nima.” (Siope 14:15) Fakakaukau atu ki ai! Ki heʻene kau sevāniti kuo nau ʻosi maté, ʻoku ʻi ai ʻa e “fitaʻa” ʻa hotau Tokotaha-Fakatupú. (“Te ke fiemaʻu ke toe sio ki he ngāue ʻa ho nimá.”​—The Jerusalem Bible.) ʻI hono ngāueʻaki ʻa e feilaulau huhuʻi ʻa Sīsū Kalaisí, ʻe lava ai ʻe he Tokotaha-Fakatupú ʻo toe fokotuʻu mai ʻa e faʻahinga ʻo e tangatá. (Sione 3:16; Ngāue 24:15) ʻOku hā mahino, ʻoku lava ʻo kehe ʻa e faʻahinga ʻo e tangatá ia mei he fanga manu ko ē ʻoku maté.

20. (a) Ko fē ʻa e taimi ʻoku lelei ange ai ʻa e ʻaho ʻo e maté ʻi he ʻaho ʻo e fanauʻí? (e) Naʻe maongo fēfē nai ki he tokolahi ʻa e toetuʻu ko ia ʻa Lasalosí?

²⁰ ʻOku ʻuhinga ení ko e ʻaho ʻo e maté ʻe lava ʻo lelei hake ʻi he ʻaho ʻo hoto fanauʻí, ʻo kapau kuo fokotuʻu ʻi he taimi ko iá ʻe ha taha ha hingoa lelei mo Sihova, ʻa ē ʻokú ne lava ke toe fokotuʻu mai ʻa e faʻahinga anga-tonu ʻoku maté. Ko Solomone Lahi Ange, ʻa Sīsū Kalaisi, naʻá ne fakamoʻoniʻi ʻa e meʻa ko iá. Ko e fakatātaá, naʻá ne toe fakafoki ki he moʻuí ʻa e tangata anga-tonu ko ia ko Lasalosi. (Luke 11:31; Sione 11:​1-44) ʻI haʻo sio loto atu ki ai, ko e tokolahi ʻo e faʻahinga ko ia naʻa nau sio tonu ʻi he toe foki ʻo moʻui ʻa Lasalosí, naʻe maongo moʻoni kiate kinautolu, ʻo nau tui ai ki he ʻAlo ʻo e ʻOtuá. (Sione 11:45) ʻOkú ke fakakaukau atu naʻa nau ongoʻi taumuʻavalea ʻi he moʻuí, ʻo ʻikai ʻilo ko hai kinautolu, pea ko ʻenau ʻalú ki fē? ʻI hono kehé, naʻe malava ke nau sio ʻoku ʻikai ke fiemaʻu ke nau hangē ha fanga manú, ʻa ia ʻoku fanauʻi mai pē, moʻui ʻi ha vahaʻa taimi, pea mate leva. Ko ʻenau taumuʻa ʻi he moʻuí naʻe fekauʻaki hangatonu ia mo vā ofi mo hono ʻiloʻi ko ia ʻa e Tamai ʻa Sīsuú, pea mo e fai ko ia Hono finangaló. Fēfē koe? Kuo hanga nai ʻe he fakamatalá ni ʻo tokoniʻi koe ke sio, pe toe sio lelei ange, ʻe malava pea ʻoku totonu ki hoʻo moʻuí ke ne maʻu ha taumuʻa moʻoni?

21. Ko e hā ʻa e tafaʻaki ʻoku kei toe ki hono ʻiloʻi ko ia ʻa e ʻuhinga ki heʻetau moʻuí ʻoku tau fiemaʻu ke sivisiviʻí?

²¹ Neongo ia, ko hono maʻu ʻa e taumuʻa moʻoni mo mohu ʻuhinga ʻi he moʻuí ʻoku mamaʻo atu ia ʻi ha fakakaukau atu pē ki he maté mo e moʻui atu hili iá. ʻOku kau ki ai ʻa e meʻa ʻoku tau fai ki heʻetau moʻuí ʻi he tuʻunga fakaʻahó. Naʻe toe fakamahino lelei ia ʻe Solomone ʻi he Koheletí, ʻo hangē ko ia te tau sio ki ai ʻi he kupu hono hokó.

[Fakamatala ʻi lalo]

ʻOkú ke Manatuʻi?

◻ ʻI he ngaahi founga fē ʻoku ala fakatatau ai ʻa e fanga manú mo e faʻahinga ʻo e tangatá?

◻ Ko e hā ʻoku fakamamafaʻi ai ʻe he maté ko e lahi ʻo e feinga mo e ngāue ʻa e faʻahinga ʻo e tangatá ko e muna pē?

◻ ʻOku malava fēfē ke lelei ange ʻa e ʻaho ʻo e maté ʻi he ʻaho ʻo e fanauʻí?

◻ ʻOku fakatuʻunga ʻi he vahaʻangatae fē ʻa hono maʻu ko ia ha taumuʻa mohu ʻuhinga ki heʻetau moʻuí?

[Fakatātā ʻi he peesi 10]

ʻOku faikehekehe lahi fēfē hoʻo moʻuí mei he moʻui ʻa e fanga manú?