ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi Aiseá—II

ʻOKU fakahoko faitōnunga ʻe ʻAisea ʻa e fekau ʻoku tuku mai kiate ia ʻi hono tuʻunga ko ha palōfitá. Ko e ngaahi fanongonongo naʻá ne leaʻaki ʻo kau ki he puleʻanga matakali ʻe hongofulu ʻo ʻIsilelí kuo ʻosi hoko ia ʻo moʻoni. ʻOku ʻi ai ʻa e toe meʻa ke ne leaʻaki he taimí ni ʻo kau ki he kahaʻu ʻo Selusalemá.

ʻE fakaʻauha ʻa e kolo ko Selusalemá, pea ʻe taki pōpula ʻa hono kakaí. Kae kehe, ko hono fakalalá ʻe ʻikai tuʻuloa. Hili ha taimi, ʻe toe fakafoki ʻa e lotu moʻoní. Ko e pōpoaki tefito eni ʻi he Aisea 36:1–66:24.a ʻE lava ke tau maʻu ʻaonga mei he lāulea ki he meʻa ʻoku hā ʻi he ngaahi vahe ko ení koeʻuhi he ʻoku lahi ʻa e ngaahi kikite ai ʻoku fakahoko tefito ia ʻi hotau ʻahó ni pe ʻi he kahaʻu ʻoku maluʻaki maí. Ko e konga ko eni ʻo e tohi Aiseá ʻoku toe ʻi ai ʻa e ngaahi kikite fakafiefia ʻaupito fekauʻaki mo e Mīsaiá.

“VAKAI ʻOKU HAʻU ʻA E TAIMI”

(Aisea 36:1–​39:8)

ʻI he taʻu hono 14 ʻo e pule ʻa Tuʻi Hesekaiá (732 K.M.), ʻoku ʻohofi ai ʻe he kau ʻAsīliá ʻa Siuta. ʻOku talaʻofa ʻe Sihova te ne maluʻi ʻa Selusalema. ʻOku fakangata ʻa e fakamanamana ʻo e ʻohofí ʻi hono tāmateʻi toko taha ʻe he ʻāngelo ʻa Sihová ʻa e kau sōtia ʻAsīlia ʻe toko 185,000.

ʻOku puke ʻa Hesekaia. ʻOku tali ʻe Sihova ʻene lotú peá ne fakamoʻui ia, ʻo fakalahi atu ʻa e taʻu ʻe 15 ki heʻene moʻuí. ʻI hono fekauʻi atu ʻe he tuʻi ʻo Pāpiloné ha kau fakafofonga ke nau talamonū kia Hesekaiá, ʻokú ne fakahaaʻi taʻefakapotopoto ange kia kinautolu ʻa ʻene koloá kotoa. ʻOku fakahoko ʻe ʻAisea ʻa e pōpoaki ʻa Sihová kia Hesekaia, ʻi heʻene pehē: “Vakai ʻoku haʻu ʻa e taimi, ʻe ʻave ki Papilone ʻa e meʻa kotoa ʻi ho fale na, mo e meʻa kuo tanaki ʻe hoʻo ngaahi kui ʻo aʻu mai ki he taimi ni.” (Aisea 39:​5, 6) Laka siʻi hake he taʻu ʻe 100 ki mui ai, ʻoku hoko ʻo moʻoni ʻa e kikité.

Tali ki he Ngaahi Fehuʻi Fakatohitapú:

38:8​—Ko e hā ʻa e “ngaahi tuʻunga” ʻa ia naʻe ʻai ke mavahe mei ai ʻa e ʻatá? Koeʻuhi naʻe ngāueʻaki ʻa e uasi laʻaá ʻi ʻIsipite mo Pāpilone fakatouʻosi ʻi he senituli hono valu K.M., ko e ngaahi tuʻunga ko ení ʻoku lava ke ʻuhinga ia ki he ngaahi tikilī ʻo ha uasi laʻā ʻa ia naʻe maʻu nai ʻe he tamai ʻa Hesekaiá, ʻa ʻĀhasi. Pe naʻe ʻi ai nai ha sitepu ʻi loto he palasí. Mahalo ko ha fuʻu pou naʻe ʻi he tafaʻaki sitepú naʻe faʻa tapua mei ai ha ʻata ʻi he sitepú, ʻa ia naʻe lava ke tala mei ai ʻa e taimí.

Ngaahi Lēsoni kia Kitautolu:

36:​2, 3, 22. Neongo hono fakanofo ia mei he hoko ko ha tangata tauhi koloá, naʻe fakaʻatā ʻa Sepinā ke hokohoko atu ʻi he ngāue ʻa e tuʻí ko ha sekelitali maʻá e tokotaha naʻá ne fetongi iá. (Aisea 22:​15, 19) Kapau ʻoku toʻo kitautolu mei ha tuʻunga fatongia ʻi he kautaha ʻa Sihová ʻi ha faʻahinga ʻuhinga, ʻikai ʻoku totonu ke tau hokohoko atu ʻa e tauhi ki he ʻOtuá ʻi ha faʻahinga ngāue pē ʻokú ne fakaʻatā mai?

37:​1, 14, 15; 38:​1, 2. ʻI he ngaahi taimi ʻo e mamahí, ʻoku fakapotopoto ke tau hanga kia Sihova ʻi he lotu pea tau falala kakato kiate ia.

37:​15-​20; 38:​2, 3. ʻI he taimi naʻe fakamanamanaʻi ai ʻa Selusalema ʻe ʻAsīliá, ko e tokanga tefito ʻa Hesekaiá ʻe hoko ʻa hono liua ʻo Selusalemá ke ʻomi ai ʻa e luma ki he huafa ʻo Sihová. ʻI hono ʻiloʻi heʻikai toe felave ʻa ʻene puké, naʻe ʻi ai ʻa e toe meʻa ia naʻe tokanga ki ai ʻa Hesekaia. Ko e meʻa naʻe fakamafasia ange ki hono ʻatamaí ko e uesia ʻe hoko ki he laine tuʻi ʻo Tēvitá ʻi haʻane mate kae ʻikai ha ʻeá. Naʻá ne toe tokanga foki pe ko hai te ne taki ʻa e faitau mo e kau ʻAsīliá. ʻI he hangē ko Hesekaiá, ʻoku tau fakakaukau ʻoku mahuʻinga ange ʻa hono fakamāʻoniʻoniʻi ʻa e huafa ʻo Sihová mo hono fakahoko ʻene taumuʻá ʻi hotau fakahaofí tonu.

38:​9-​20. Ko e hiva ko eni ʻa Hesekaiá ʻoku akoʻi mai ai kiate kitautolu ʻoku ʻikai ha meʻa ia ʻe toe mahuʻinga ange ʻi he moʻuí ka ko e malava ke fakahīkihikiʻi ʻa Sihová.

“ʻE TOE LANGA IA”

(Aisea 40:1–59:21)

Ko e tuai pē hono tomuʻa tala ʻa hono fakaʻauha ʻo Selusalemá pea mo e tuku pōpula ʻe iku ki ai ʻi Pāpiloné, ʻoku kikite ʻa ʻAisea ʻo kau ki hono toe fakafokí. (Aisea 40:​1, 2) “ʻE toe langa ia [Selusalema],” ko e lau ia ʻa e Aisea 44:28. Ko e ngaahi ʻotua ʻaitoli ʻo Pāpiloné ʻe ʻave ia ʻo hangē ha ‘meʻa ʻoku fua holo kuo haʻihaʻi.’ (Aisea 46:1) ʻE fakaʻauha ʻa Pāpilone. ʻOku hoko kotoa eni ʻo moʻoni ʻi he hili ha senituli ʻe ua ki mui ai.

ʻE ʻoatu ʻe Sihova ʻene tamaioʻeikí “ko e maama ki he ngaahi puleʻanga.” (Aisea 49:6) Ko e “ngaahi langi” ʻo Pāpiloné, pe faʻahinga ʻoku pulé, ʻe ‘mole ʻo hange ha kohú,’ pea ko hono kakaí ‘ʻe mate hange ko e namú’; ka ko e ‘taʻahine popula ko Saioné ʻe huʻi ʻa e ngaahi seiní mei hono kiá.’ (Aisea 51:6; 52:2) ʻOku folofola ʻa Sihova ki he faʻahinga ko ia ʻoku ōmai kiate ia ʻo fanongó: “Te u fai mo kimoutolu ha kovinanite taʻengata, ko e ngaahi talaʻofa kia Tevita.” (Aisea 55:3) Ko e moʻui ʻo fehoanaki mo e ngaahi fiemaʻu māʻoniʻoni ʻa e ʻOtuá ʻoku iku atu ia ki hono maʻu ʻa e ‘fiefia ʻia Sihova.’ (Aisea 58:14) ʻI he tafaʻaki ʻe tahá, ko e ngaahi faihala ʻa e kakaí, ʻoku ‘hoko ai ʻa e ngaahi ʻa-vahevahe ki honau vahaʻa mo honau ʻOtuá.’—Aisea 59:2.

Tali ki he Ngaahi Fehuʻi Fakatohitapú:

40:​27, 28—Ko e hā naʻe pehē ai ʻe ʻIsileli: “ʻOku puli hoku hala meia Sihova, pea ko hoku ʻOtua kuo ne moʻutukua ke mole ʻeku totonu”? Naʻe ongoʻi nai ʻe he niʻihi ʻo e kau Siu ʻi Pāpiloné ko e ngaahi fakamaau taʻetotonu naʻa nau tofanga aí naʻe puli ia pe ʻikai ke ʻafioʻi ʻe Sihova. Naʻe fakamanatu ange kia kinautolu naʻe ʻikai taʻemalava ke aʻu ki Pāpilone ʻa e Tokotaha-Fakatupu ʻo e māmaní, ʻa ia ʻoku ʻikai ke vaivai ia pe ongosia.

43:​18-​21​—Ko e hā naʻe tala ai ki he kau fakaheeʻi naʻe toe fokí ke ‘ʻoua te nau manatu ki he ngaahi meʻa muʻá’? Naʻe ʻikai ke ʻuhinga eni ia ʻoku totonu ke nau fakangaloʻi ʻa e ngaahi ngāue faifakahaofi ʻa Sihova he kuohilí. ʻI hono kehé, naʻe fiemaʻu kinautolu ʻe Sihova ke nau fakahīkihikiʻi ia ʻo makatuʻunga ʻi ha “meʻa foʻou” ʻa ia te nau hokosia tonu, hangē ko e malu ʻenau fononga ki Selusalemá, mahalo ko ha fononga he toafá ne hangatonu ange. “Ko e fuʻu kakai lahi” ko ia ʻoku nau haʻu “mei he mamahi lahi” ʻe ʻi ai foki mo ʻenau ngaahi ʻuhinga foʻou mo fakafoʻituitui ki hono fakalāngilangiʻi ʻo Sihová.—Fakahā 7:​9, 14.

49:6​—ʻOku anga-fēfē ʻa e hoko ʻa e Mīsaiá ko ha “maama ki he ngaahi puleʻanga,” neongo naʻe fakangatangata pē ʻa ʻene ngāue fakafaifekau he māmaní ki he ngaahi foha ʻo ʻIsilelí? ʻOku peheé koeʻuhi ko e meʻa naʻe hoko hili ʻa e pekia ʻa Sīsuú. ʻOku toe ngāueʻaki foki ʻe he Tohi Tapú ʻa e Aisea 49:6 ki heʻene kau ākongá. (Ngāue 13:​46, 47) ʻI he ʻahó ni, ko e kau Kalisitiane paní, ʻo tokoni ki ai ha fuʻu kakai lotu tokolahi, ʻoku nau hoko ko e “maama ki he ngaahi puleʻanga,” ʻo fakamaama ai ʻa e kakaí “ʻo aʻu ki he ngataʻanga ʻo mamani.”—Mātiu 24:14; 28:​19, 20.

53:10​—ʻI he ʻuhinga fē naʻe hāngaifofonga ai ʻa Sihova ki he laiki hono ʻAló? Kuo pau pē naʻe loto-mamahi ʻa Sihova, ʻa e ʻOtua manavaʻofa mo kaungāongoʻí, ke ʻafio hifo ki hono ʻAlo ʻofaʻangá ʻoku faingataʻaʻia. Ka neongo ia, naʻá Ne hāngaifofonga ki he talangofua loto-lelei ʻa Sīsuú pea mo e meʻa ʻe fakahoko kotoa ʻe heʻene faingataʻaʻiá mo ʻene pekiá.—Palovepi 27:11; Aisea 63:9.

53:11​—Ko e hā ʻa e poto pe ʻilo ʻa ia ʻe hanga ai ʻe he Mīsaiá ʻo “ngaohi ke angatonu [pe māʻoniʻoni] ha tokolahi”? Ko e ʻilo eni naʻe maʻu ʻe Sīsū ʻi heʻene haʻu ki māmani ʻo hoko ko ha tangatá, peá ne faingataʻaʻia taʻeʻiai haʻane hia ʻo aʻu ki heʻene pekiá. (Hepelu 4:15) Naʻá ne tokonaki leva ai ha feilaulau huhuʻi, ʻa ia naʻe fiemaʻu ke tokoniʻiʻaki ʻa e kau Kalisitiane paní pea mo e fuʻu kakai lahí ke nau hoko ʻo māʻoniʻoni ʻi he ʻao ʻo e ʻOtuá.—Loma 5:19; Semisi 2:​23, 25.

56:6​—Ko hai ʻa e “hakoʻi muli,” pea ʻi he ngaahi founga fē ʻoku nau ‘puke maʻu ai ki he kovinanite ʻa Sihová’? Ko e “hakoʻi muli” ko e “fanga sipi kehe” ia ʻa Sīsuú. (Sione 10:16) ʻOku nau puke maʻu ki he fuakava foʻoú ʻo ʻuhinga iá ʻoku nau talangofua ki he ngaahi lao felāveʻi mo e fuakava ko iá, ʻo fāitaha kakato mo e ngaahi fokotuʻutuʻu ʻoku fakafou mai aí, kai mei he meʻakai fakalaumālie tatau ʻo hangē pē ko e kau Kalisitiane paní, pea poupouʻi kinautolu ʻi he ngāue fakamalanga ʻo e Puleʻangá mo e ngāue ngaohi ākongá.

Ngaahi Lēsoni kia Kitautolu:

40:​10-​14, 26, 28. Ko Sihová ʻoku mālohi mo anga-ʻofa, ʻokú ne mafeia e meʻa kotoa mo poto taʻefakatataua, pea ʻoku lahi mamaʻo ange ʻa e meʻa ʻokú ne ʻafioʻí ʻi he meʻa ʻoku lava ke tau mahinoʻí.

40:​17, 23; 41:29; 44:9; 59:4. Ko e ngaahi kautaha fakapolitikalé mo e ngaahi ʻaitolí “ko e koto ngeʻesi.” Ko e falala kia kinautolú ʻoku ʻikai hano mahuʻinga ʻe taha.

42:​18, 19; 43:8. Ke tau kuikui mei he Folofola ʻa e ʻOtuá pea tāpuniʻi hotau telingá mei heʻene fakahinohino fakafou ʻi he “tamaioeiki agatonu mo boto” ko e hoko ia ʻo kui mo tuli fakalaumālié.—Mātiu 24:​45, PM.

43:25. ʻOku tāmateʻi ʻe Sihova ʻa e ngaahi angahalá koeʻuhí pē ko ia. Ko hono fakatauʻatāinaʻi kitautolu mei he haʻisia ki he angahalá mo e maté pea mo hono maʻu ʻa e moʻuí ʻoku fika ua ia ki hono fakatoputapuʻi ʻa e huafa ʻo Sihová.

44:8. ʻOku tau maʻu ʻa e poupou ʻa Sihová, ʻa ia ʻokú ne tuʻumaʻu mo mālohi ʻo hangē ha makatuʻú. ʻOku ʻikai ʻaupito totonu ke tau manavahē ʻi hono fai ha fakamoʻoni ʻo kau ki hono Tuʻunga-ʻOtuá!—2 Samiuela 22:​31, 32.

44:​18-​20. Ko e tauhi ʻaitolí ko ha fakaʻilonga ia ʻo e kākā ʻa e lotó. ʻOku ʻikai totonu ki ha meʻa ke ne toe fetongi ʻa Sihova ʻi hotau lotó.

46:​10, 11. Ko e malava ko ia ke ‘ʻai ʻene fakakaukaú ke tuʻú,’ ʻa ia ko hono fakahoko ia ʻene taumuʻá, ko e fakamoʻoni taʻetoealafehālaaki ia ʻo e Tuʻunga-ʻOtua ʻo Sihová.

48:​17, 18; 57:​19-21. Kapau te tau hanga kia Sihova ki ha fakamoʻui, ʻunuʻunu ofi kiate ia, pea tokanga ki heʻene ngaahi fekaú, ʻe lahi ʻetau fiemālié ʻo hangē pē ko ha vaitafé pea ʻe lahi hotau ngaahi ʻulungāanga māʻoniʻoní ʻo hangē ko e ngaahi peau ʻo e tahí. Ko e faʻahinga ʻoku ʻikai te nau talangofua ki he Folofola ʻa e ʻOtuá ʻoku nau hangē ko e “tahi hou.” ʻOku ʻikai te nau maʻu ha fiemālie.

52:​5, 6. Naʻe fakamulituku hala ʻaki ʻe he kau Pāpiloné ʻo pehē naʻe vaivai ʻa e ʻOtua moʻoní. Naʻe ʻikai te nau ʻiloʻi ko e taʻehōifua hifo ʻa Sihova ki heʻene kakaí ʻa e ʻuhinga naʻe taki pōpula ai ʻa ʻIsilelí. ʻI he hoko ʻa e fakatamakí ki he niʻihi kehé, ʻoku fakapotopoto ke ʻoua te tau fakavave ke fakamulituku ʻaki ʻa e tupuʻanga ʻo e meʻa ʻoku hokó.

52:​7-9; 55:​12, 13. ʻOku tau maʻu ʻa e ʻuhinga lahi hake he tolú ki heʻetau kau fiefia ko ia ʻi he ngāue fakamalanga ʻo e Puleʻangá mo e ngaohi ākongá. Ko hotau vaʻé ʻoku fakaʻofoʻofa ia ki he faʻahinga anga-fakatōkilalo ʻoku nau fiekaia fakalaumālié. ʻOku ‘femataaki ʻetau sió’ mo Sihova, pe maʻu ha vahaʻangatae vāofi mo ia. ʻOku tau tofanga foki ʻi he tuʻumālie fakalaumālie.

52:​11, 12. Ke tau hoko ʻo taau ki hono “fua ʻa e nāunau” ʻa Sihová—ʻa ʻene ngaahi tokonaki maʻá e ngāue toputapú—kuo pau ke tau hoko ʻo maʻa fakalaumālie mo maʻa fakaeʻulungāanga.

58:​1-​14. Ko e ngaahi fakahāhā mālualoi ʻa e līʻoá mo e māʻoniʻoní ko e koto kulanoa pē ia. Ko e kau lotu moʻoní ʻoku totonu ke nau fonu ʻi he ngaahi fakahāhā loto-moʻoni ʻo e līʻoa fakaʻotuá mo e ngaahi ngāue ʻo e feʻofaʻaki fakatokouá.—Sione 13:35; 2 Pita 3:11.

59:15e-19. ʻOku ʻafio hifo ʻa Sihova ki he ngaahi meʻa ʻoku hoko ki he tangatá pea ʻokú ne tokoni mai leva ʻi he taimi kotofa pē ʻaʻana.

‘TE NE HOKO KO E KALAUNI FAKAʻOFOʻOFA’

(Aisea 60:1–66:24)

ʻI heʻene lave ki hono toe fakafoki ʻa e lotu moʻoní ʻi he kuohilí pea pehē ki hotau ʻahó ni, ʻoku pehē ai ʻi he Aisea 60:1: “Tuʻu hake, ulo; he kuo hoko mai hoʻo maama, pea kuo hopo kiate koe ʻa e kololia ʻo Sihova.” Ko Saione kuo pau “ke hoko ko e kalauni fakaʻofoʻofa ʻi he nima ʻo Sihova.”—Aisea 62:3.

ʻOku lotu ʻa ʻAisea kia Sihova maʻa hono kaungā tangataʻifonuá ʻa ia te nau fakatomala lolotonga honau fakaheeʻi ʻi Pāpiloné. (Aisea 63:15–64:12) Hili hono fakafaikehekeheʻi ʻa e kau tamaioʻeiki moʻoní mei he kau tamaioʻeiki loí, ʻoku talaki ʻe he palōfitá ʻa e founga ʻe faitāpuekina ai ʻe Sihova ʻa e faʻahinga ʻoku nau tauhi kiate Iá.—Aisea 65:1–66:24.

Tali ki he Ngaahi Fehuʻi Fakatohitapú:

61:​8, 9​—Ko e hā ʻa e “kovinanite taʻengata,” pea ko hai ʻa e “hako”? Ko e kovinānite foʻou eni kuo fokotuʻutuʻu ʻe Sihova mo e kau Kalisitiane paní. Ko e “hako” ko e “fanga sipi kehe” ia—ʻa e laui miliona ʻo e faʻahinga ʻoku nau tali ʻenau pōpoakí.—Sione 10:16.

63:5​—ʻOku anga-fēfē hono poupouʻi ʻa e ʻOtuá ʻe heʻene lilí? Ko e lili ʻa e ʻOtuá ko ha ongoʻi ia ʻoku mapuleʻi—ko ʻene houhau ʻi he founga māʻoniʻoni. Ko ʻene lilí ʻoku poupouʻi mo ueʻi ai ia ke ne fakahoko ʻene ngaahi fakamaau māʻoniʻoní.

Ngaahi Lēsoni kia Kitautolu:

64:6. Ko e faʻahinga taʻehaohaoa ʻo e tangatá heʻikai lava ke nau fakahaofi kinautolu. ʻI he felāveʻi mo hono fai ʻa e fakalelei angahalá, ko ʻenau ngaahi ngāue māʻoniʻoní ʻoku hangē pē ia ha ngaahi kofu taʻemaʻa pē.—Loma 3:23, 24.

65:​13, 14. ʻOku faitāpuekina ʻe Sihova ʻene kau tamaioʻeiki faitōnungá, ʻo fakalato lahi ʻaupito ʻenau ngaahi fiemaʻu fakalaumālié.

66:​3-5. ʻOku fehiʻa ʻa Sihova ʻi he mālualoí.

“Mou Fiefia”

He fakafiemālie moʻoni ko e ngaahi kikite ʻo e toe fakafokí ki he kau Siu faitōnunga ʻoku nau nofo ko e kau fakaheeʻi ʻi Pāpiloné! “Mou fiefia,” ko e folofola ia ʻa Sihová, “mo tomeʻe ʻo taʻengata, ʻi he meʻa ʻoku ou fakatupu: he ko au eni ʻoku ou fakatupu foʻou ʻa Selusalema ko e koto tomeʻe, pea ko hono kakai ko e koto fiefia.”—Aisea 65:18.

Ko kitautolu foki ʻoku tau moʻui ʻi ha taimi ʻa ia ʻoku ʻufiʻufi ai ʻa e māmaní ʻe he fakapoʻulí pea ko e kakaí ʻoku nau ʻi he poʻuli matolu. (Aisea 60:2) ʻOku lolotonga hoko ʻa e “ngaahi taimi faingataʻa.” (2 Timote 3:1) Ko ia ai, ko e pōpoaki faifakahaofi ʻa Sihova ʻoku ʻomai ʻi he tohi Aiseá ʻoku fakalototoʻa lahi ia kia kitautolu.—Hepelu 4:12.

[Fakamatala ʻi lalo]

[Fakatātā ʻi he peesi 8]

ʻOkú ke ʻilo ʻa e ʻuhinga tefito naʻe lotu ai ʻa Hesekaia ke fakahaofi ia mei he kau ʻAsīliá?

[Fakatātā ʻi he peesi 11]

“Hono ʻikai fakaʻofoʻofa ʻi he ngaahi moʻunga siʻi vaʻe ʻo e talaongoongolelei”!