“ʻOkú Ne Foaki ʻa e Mālohi ki he Tokotaha Helaʻiá”

 1. Ko e hā ʻa e ngaahi palopalema ʻe niʻihi kuo pau ke tau kātekiná, ka ko e hā ʻoku hōifua ai ʻa Sihova ki heʻene kau sevāniti mateakí? (Sio ki he ʻuluaki fakatātā ʻi he kupú ni.)

KO E moʻui ʻi he fokotuʻutuʻu ko ení ʻoku ʻikai ke faingofua. Ko e fakatātaá, ko e tokolahi ʻo kimoutolu siʻi fanga tokoua mo e fanga tuofāfiné ʻoku mou tofanga ʻi ha puke lahi. Ko e niʻihi ʻoku nau ʻosi taʻumotuʻá, kuo pau ke nau tokangaʻi ha ngaahi kāinga taʻumotuʻa. Lolotonga ia ʻoku fāinga ʻa e niʻihi ke tokonaki ʻa e ngaahi fiemaʻu ʻa honau fāmilí. Pea ʻoku mau ʻiloʻi ko e tokolahi ʻo kimoutolu ʻoku mou fekuki ʻi he taimi tatau mo e niʻihi ʻo e ngaahi palopalema ko ení ʻo ʻikai ko e taha pē. ʻOku toʻo ʻe he meʻá ni ʻa e taimi, ivi, mo e paʻanga lahi. Ka ʻokú ke fakapapauʻi fakaʻaufuli ʻe tokoniʻi koe ʻe Sihova. ʻOkú ke ʻiloʻi ʻe toe lelei ange ʻa e ngaahi meʻá he ko e meʻa ia kuó ne talaʻofá. Ko hoʻo tuí kuo pau pē ʻoku fakahōifua moʻoni kia Sihova!

 2. ʻOku anga-fēfē hono fakalototoʻaʻi kitautolu ʻe he ʻAisea 40:29, ka ko e hā ʻa e fehālaaki mafatukituki ʻe lava ke tau faí?

² Neongo ia, ʻokú ke ongoʻi nai ʻi he taimi ʻe niʻihi ʻoku fuʻu faingataʻa ke ke kātekina ʻa hoʻo ngaahi palopalemá? Kapau ʻokú ke ongoʻi pehē, ʻoku ʻikai ko koe pē. Ko e niʻihi ʻo e kau sevāniti faitōnunga ʻa e ʻOtuá ʻi he kuohilí naʻa nau maʻu ʻa e ongoʻi tatau. (1 Tuʻi 19:4; Siope 7:7) Ko e hā naʻá ne tokoniʻi kinautolu ke nau kātakí? Naʻa nau falala kia Sihova ki ha mālohi. ʻOku pehē ʻe he Tohi Tapú ko e ʻOtuá “ʻokú ne foaki ʻa e mālohi ki he tokotaha helaʻiá.” (ʻAi. 40:29) Kae kehe, ko e meʻa fakamamahí, ko e niʻihi ʻo e kakai ʻa e ʻOtuá he ʻaho ní ʻoku nau tui ko e founga lelei taha ke kātekina ai ʻenau ngaahi palopalema ʻi he moʻuí ko e tuku ʻa ʻenau tauhi kia Sihová ʻi ha taimi. ʻOku nau tui ko e tauhi kia Sihová ko ha kavenga kae ʻikai ko ha tāpuaki. Ko ia ʻoku tuku ʻenau lau Tohi Tapú mo e ʻalu ki he ngaahi fakatahá pea mo e malangá. Ko e meʻa tofu pē eni ʻoku fakaʻamu ʻa Sētane ke nau faí.

 3. (a) ʻE lava fēfē ke tau fakaʻehiʻehi mei hono ʻai kitautolu ʻe Sētane ke tau vaivaí? (e) Ko e hā te tau lāulea ki ai ʻi he kupu ko ení?

³ ʻOku ʻikai ke loto ʻa e Tēvoló ke tau mālohi. Pea ʻokú ne ʻiloʻi te tau hoko ʻo mālohi ange ʻi he taimi ʻoku tau femoʻuekina lahi ai ʻi heʻetau ngāue kia Sihová. Ko ia ʻi he taimi ʻokú ke ongoʻi ongosia fakaesino mo fakaeongo aí, ʻoua ʻe mavahe meia Sihova. ʻUnuʻunu ke ofi ange kiate ia. ʻOku pehē ʻe he Tohi Tapú: “Te ne ʻai kimoutolu ke mou tuʻu maʻu, te ne ʻai kimoutolu ke mou mālohi.” (1 Pita 5:10; Sēm. 4:8) ʻI he kupu ko ení, te tau ako ai mei he ʻAisea 40:26-31 fekauʻaki mo e malava ʻa Sihova ke fakaivimālohiʻi kitautolú. Pea te tau lāulea leva ki he tuʻunga ʻe ua ʻe lava ke ne fakatupunga ke siʻi ʻetau ngāue kia Sihová, pea te tau ako ki he founga ʻe lava ke tokoniʻi ai kitautolu ke tau kātaki ʻi hono ngāueʻaki ʻa e ngaahi tefitoʻi moʻoni Fakatohitapú.

 4. Ko e hā ʻa e lēsoni ʻe lava ke tau ako mei he ʻAisea 40:26?

⁴ Lau ʻa e ʻAisea 40:26. Kuo ʻikai malava ʻe ha taha ke ne lau ʻa e ngaahi foʻi fetuʻu kotoa ʻi he ʻunivēsí. ʻOku tui ʻa e kau saienisí ʻoku ʻi ai nai ʻa e foʻi fetuʻu ʻe 400 piliona ʻi hotau kanivá pē. Neongo ia, ʻoku fakahingoa ʻe Sihova ʻa e foʻi fetuʻu taki taha. Ko e hā ʻoku akoʻi mai ʻe he meʻa ko iá fekauʻaki mo Sihová? Kapau ʻokú ne mahuʻingaʻia fakafoʻituitui ʻi he ngaahi foʻi fetuʻu ʻoku ʻikai ke moʻuí, sioloto atu ki he anga ʻo e ongoʻi kuo pau ʻokú ne maʻu fekauʻaki mo koé! ʻOkú ke tauhi kiate ia, ʻo ʻikai koeʻuhí pē kuo pau ke ke fai pehē, ka koeʻuhí ʻokú ke ʻofa kiate ia. (Saame 19:1, 3, 14) Ko ʻetau Tamai ʻofeiná ʻokú ne ʻafioʻi ʻa e meʻa kotoa pē fekauʻaki mo koe. ʻOku pehē ʻe he Tohi Tapú “naʻa mo homou ngaahi tuʻoni louʻulú kuo ʻosi lau fakalautelau ia” ʻe ia. (Māt. 10:30) ʻOku fiemaʻu ʻe Sihova ke tau ʻiloʻi ‘ʻokú ne ʻafioʻi ʻa e meʻa ʻoku foua ʻe he faʻahinga taʻemelé.’ (Saame 37:18) ʻOku hā mahino, ʻoku ʻiloʻi ʻe Sihova ʻa e kotoa ʻo hoʻo ngaahi palopalemá, pea ʻe lava ke ne ʻoatu kiate koe ʻa e mālohi ʻokú ke fiemaʻu ke ke kātekina taki taha ai iá.

 5. ʻE lava fēfē ke tau fakapapauʻi ʻoku malava ʻe Sihova ke ne fakaivimālohiʻi kitautolu?

⁵ Lau ʻa e ʻAisea 40:28. Ko Sihova ʻa e Matavai ʻo e ivi kotoa pē. Ko e fakatātaá, fakakaukau angé ki he lahi ʻo e ivi ʻokú ne ʻomai ki he laʻaá. Naʻe pehē ʻe he tokotaha-tohi saienisi ko David Bodanis ʻoku faʻu ʻe he laʻaá ʻi he sekoni taki taha ʻa e ivi lahi tatau mo e ivi ʻi he pā ʻa ha foʻi pomu ʻātomi ʻe laui piliona. Ko e tokotaha fakatotolo ʻe taha naʻá ne fikaʻi ʻo pehē ko e lahi ʻo e ivi ʻoku faʻu ʻe he laʻaá ʻi he sekoni pē ʻe tahá te ne tokonaki ki he kakai kotoa ʻi he māmaní ʻa e ivi feʻunga ki he taʻu ʻe 200,000! Ko e moʻoni, ko Sihova, ʻa e tokotaha ʻokú ne ʻomai ʻa e ivi ki he laʻaá, ʻoku lava ke ne ʻomai kiate kitautolu ʻa e mālohi ʻoku tau fiemaʻu ke kātekina ʻaki ʻetau ngaahi palopalemá.

 6. ʻI he founga fē ʻoku fakafiemālie ai ʻa e ʻioke ʻa Sīsuú, pea ʻoku anga-fēfē ʻa e kaunga ʻa e meʻá ni kiate kitautolú?

⁶ Lau ʻa e ʻAisea 40:29. Ko e tauhi kia Sihová ʻoku ʻomai ai kiate kitautolu ʻa e fiefia lahi. Naʻe tala ʻe Sīsū ki heʻene kau ākongá: “Mou fua ʻeku ʻioké.” Pea naʻá ne hoko atu ʻo pehē: “Te mou maʻu ha fakaivifoʻou kiate kimoutolu. He ko ʻeku ʻioké ʻoku fakafiemālie, pea ko ʻeku kavengá ʻoku maʻamaʻa.” (Māt. 11:28-30) ʻOku mātuʻaki moʻoni eni! ʻI he taimi ʻe niʻihi, ʻoku tau ongoʻi ongosia nai ai ʻi heʻetau mavahe mei ʻapi ke maʻu ʻa e fakatahá pe ʻalu he malangá. Ka ʻoku fēfē ʻetau ongoʻí ʻi he taimi ʻoku tau foki aí? ʻOku tau ongoʻi fakaivifoʻou pea mateuteu lelei ange ai ke fekuki mo ʻetau ngaahi palopalemá. Ko e moʻoni, ko e ʻioke ʻa Sīsuú ʻoku fakafiemālie.

 7. Lave ki ha hokosia ʻoku fakahaaʻi ai ʻa e moʻoni ʻa e Mātiu 11:28-30.

⁷ Fakakaukau angé ki he hokosia fekauʻaki mo e taha ʻo hotau fanga tuofāfiné. ʻOkú ne puke ʻi ha mahaki tauhi tāvaivaia, loto-mafasia, mo e langa ʻulu lahi. Ko ia ʻoku faingataʻa ʻaupito ʻi he taimi ʻe niʻihi ke ne maʻu ʻa e ngaahi fakatahá. Kae kehe, ʻi he ʻaho ʻe taha, hili ʻene fai ha feinga ke maʻu ha fakataha, naʻá ne tohi: “Naʻe fekauʻaki ʻa e malangá mo e loto-siʻí. Ko e fakamatalá naʻe fakahoko mai ia ʻi ha founga kaungāongoʻi mo e tokanga ʻo ueʻi ai au ke u fakatō loʻimata. Naʻe fakamanatu mai ai kiate au ko e ngaahi fakatahá ʻa e feituʻu ʻoku fiemaʻu ke u ʻi aí.” Naʻá ne fiefia ʻaupito ʻi heʻene feinga ke maʻu ʻa e fakatahá!

8, 9. Naʻe ʻuhinga ki he hā ʻa e ʻapositolo ko Paulá ʻi heʻene tohi: “ʻI heʻeku vaivaí, ʻoku ou toki mālohi leva”?

⁸ Lau ʻa e ʻAisea 40:30. ʻOku tau maʻu nai ha ngaahi pōtoʻi lahi, ka ʻoku fakangatangata ʻa e meʻa ʻoku lava ke tau fai ʻi hotau mālohi pē ʻotautolú. Ko ha lēsoni eni kuo pau ke tau ako kotoa. Ko e ʻapositolo ko Paulá naʻá ne malava ke fai ʻa e ngaahi meʻa lahi, ka naʻe ʻikai lava ke ne fai ʻa e meʻa kotoa pē naʻá ne loto ke faí. ʻI heʻene tala kia Sihova ʻa e anga ʻo ʻene ongoʻí, naʻe folofola ʻa Sihova kiate ia: “Ko hoku mālohí ʻoku fakahaohaoaʻi ia ʻi hoʻo hoko ʻo vaivaí.” Naʻe mahinoʻi ʻe Paula ʻa e meʻa naʻe tala ange ʻe Sihova kiate iá. Ko e ʻuhinga ia naʻá ne pehē ai: “ʻI heʻeku vaivaí, ʻoku ou toki mālohi leva.” (2 Kol. 12:7-10) Ko e hā naʻá ne ʻuhinga ki aí?

⁹ Naʻe ʻiloʻi ʻe Paula naʻe ʻi ai ha fakangatangata ʻo e meʻa naʻe lava ke ne fai ʻiate ia peé. Naʻá ne fiemaʻu ʻa e tokoni mei ha taha ʻoku mālohi lahi ange. Ko e laumālie māʻoniʻoni ʻo e ʻOtuá naʻe lava ke ne ʻoange kia Paula ʻa e mālohi ʻi heʻene ongoʻi vaivaí. Pea naʻe lava ke ne fai ʻa e meʻa naʻe toe lahi ange. Naʻe toe lava ke ʻoange ʻe he laumālie ʻo e ʻOtuá kia Paula ʻa e mālohi ke ne fakahoko ʻa e ngaahi meʻa naʻe ʻikai lava ke ne fai ʻi hono mālohi pē ʻoʻoná. ʻE lava ke hoko ʻa e meʻa tatau kiate kitautolu. ʻI hono ʻomai ʻe Sihova kiate kitautolu ʻa hono laumālie māʻoniʻoní, te tau hoko moʻoni ai ʻo mālohi!

10. Naʻe anga-fēfē hono tokoniʻi ʻe Sihova ʻa Tēvita ke ne kātekina ʻene ngaahi palopalemá?

¹⁰ Naʻe faʻa hokosia ʻe he tokotaha-tohi-saame ko Tēvitá ʻa hono ʻai ia ʻe he laumālie māʻoniʻoni ʻo e ʻOtuá ke ne mālohí. Naʻá ne hiva: “ʻI hoʻo tokoní ʻoku lava ai ke u ʻohofi ha kau kaihaʻa fakamālohi; ʻi he mālohi ʻo e ʻOtuá ʻoku lava ai ke u kaka ʻi ha ʻā.” (Saame 18:29) ʻI he hangē ko ha ʻā māʻolunga ʻoku faingataʻa ke tau kaka aí, ʻi he taimi ʻe niʻihi ʻoku fuʻu lahi ʻetau ngaahi palopalemá ʻo ʻikai malava ke tau fakaleleiʻi ʻiate kitautolu pē. ʻOku tau fiemaʻu ʻa e tokoni ʻa Sihová.

11. ʻOku anga-fēfē hono tokoniʻi kitautolu ʻe he laumālie māʻoniʻoní ke tau kātekina ʻetau ngaahi palopalemá?

¹¹ Lau ʻa e ʻAisea 40:31. Ko e fanga ʻīkalé ʻoku ʻikai te nau nofo ʻi he ʻataá ʻi hano ngāueʻaki ʻa e ivi pē ʻo kinautolu. Ko e mālohi mei he ʻea māfana ʻoku ʻalu hake ki ʻolungá ʻokú ne hiki hake ha ʻīkale ki he ʻataá. ʻOku ʻai ʻe he meʻá ni ke malava ʻa e ʻīkalé ʻo puna mamaʻo pea tuku tauhi ai hono iví. Ko ia ʻi he taimi ʻokú ke maʻu ai ha palopalema taulōfuʻú, fakakaukau fekauʻaki mo e ʻīkalé. Kōlenga kia Sihova ke ne ʻoatu kiate koe ha mālohi lahi ange fakafou ʻi he “tokoní, ʻa e laumālie māʻoniʻoní.” (Sione 14:26) ʻE lava ke tau kole kia Sihova ke ne ʻomai kiate kitautolu ʻa hono laumālié ʻi ha faʻahinga taimi pē, houa ʻe 24 ʻi he ʻaho. ʻE tautefito nai ʻetau ongoʻi ʻa e fiemaʻu ke kole ki he tokoni ʻa Sihová ʻi he taimi ʻoku tau fetōkehekeheʻaki ai mo ha taha ʻo hotau fanga tokoua pe fanga tuofāfine ʻi he fakatahaʻangá. Ka ko e hā ʻoku hoko ai ʻa e ngaahi fetōkehekeheʻaki peheé?

12, 13. (a) Ko e hā ʻoku hoko ai he taimi ʻe niʻihi ʻa e ngaahi fetōkehekeheʻaki ʻi he vahaʻa ʻo e kau Kalisitiané? (e) Ko e hā ʻoku akoʻi mai kiate kitautolu fekauʻaki mo Sihova ʻi he moʻui ʻa Siosifá?

¹² ʻOku hoko ʻa e ngaahi fetōkehekeheʻakí koeʻuhí ʻoku tau taʻehaohaoa kotoa. ʻI he taimi ʻe niʻihi, te tau ʻita nai ai ʻi ha meʻa ʻoku leaʻaki pe fai ʻe he niʻihi kehé, pe ʻe ʻita nai ʻa e niʻihi kehé ʻiate kitautolu. ʻE lava ke hoko eni ko ha ʻahiʻahi faingataʻa. Ka ʻoku ʻomai ai kiate kitautolu ha faingamālie ke tau mateaki kia Sihova. Anga-fēfē? ʻI he ako ke ngāue fakataha ʻi he feongoongoi mo hotau fanga tokouá mo e fanga tuofāfiné. ʻOku ʻofa ʻa Sihova ʻiate kinautolu neongo ʻenau taʻehaohaoá, pea ʻoku totonu ke tau pehē pē mo kitautolu.

¹³ ʻOku ʻikai ke taʻofi ʻe Sihova ʻa hono ʻahiʻahiʻi ʻo ʻene kau sevānití. ʻOku tau ʻiloʻi ia ʻi he moʻui ʻa Siosifá. ʻI he kei talavou ʻa Siosifá, naʻe loto-kovi ʻa hono fanga tokoua tamai-tahá kiate ia. Naʻa nau fakatau atu ia ko ha pōpula, pea naʻe ʻave ia ki ʻIsipite. (Sēn. 37:28) Naʻe ʻafioʻi ʻe Sihova ʻa e meʻa tofu pē naʻe hokó pea ʻoku ʻikai ha veiveiua naʻá ne mamahi ʻi he vakai mai ki hono ngaohikoviʻi ʻa hono kaumeʻá, ʻa ʻene sevāniti faitōnunga ko Siosifá. Neongo ia, naʻe ʻikai ke taʻofi ʻe Sihova ʻa e meʻa naʻe hokó. Ki mui ai, ʻi hono tukuakiʻi ʻo Siosifa naʻá ne feinga ke tohotohoʻi ʻa e uaifi ʻo Pōtifá pea lī ki he pilīsoné, naʻe ʻikai pē ke fakahaofi ʻe Sihova ʻa Siosifa. Ka naʻe ʻi ai ha taimi naʻe liʻaki ai ʻe he ʻOtuá ʻa Siosifa? ʻIkai. ʻOku pehē ʻe he Tohi Tapú “naʻe ʻia Siosifa ʻa Sihova pea naʻe ʻai ʻe Sihova ha meʻa pē naʻá ne fai ke lavameʻa.”​—Sēn. 39:21-23.

14. ʻOku anga-fēfē ʻetau maʻu ʻaonga ʻi heʻetau tuku ange ʻa e ʻitá?

¹⁴ Ko e fakatātā ʻe taha ko Tēvita. Ko e tokolahi taha ʻo e kakaí kuo ʻikai ʻaupito ke ngaohikoviʻi kinautolu ʻo hangē ko Tēvitá. Neongo ia, ko e kaumeʻa ko ia ʻo e ʻOtuá naʻe ʻikai te ne fakaʻatā ke ne hoko ʻo ʻita. Naʻá ne tohi: “Tuku ange ʻa e ʻitá pea liʻaki ʻa e lilí; ʻoua ʻe hoko ʻo loto-mamahi peá ke tafoki ʻo fai ʻa e meʻa ʻoku koví.” (Saame 37:8) Ko e ʻuhinga mahuʻinga taha ke “tuku ange” ai ʻa e ʻitá, pe taʻofi ʻa e ʻitá, he ʻoku tau loto ke faʻifaʻitaki kia Sihova. Kuo “ʻikai te ne fai kiate kitautolu ʻo fakatatau ki heʻetau ngaahi angahalá” ka kuó ne fakamolemoleʻi kitautolu. (Saame 103:10) ʻOku toe ʻi ai ʻa e ngaahi ʻaonga kehe ʻo hono tuku ange ʻa e ʻitá. Ko e fakatātaá, ko e ʻitá ʻe lava ke ne fakatupunga ʻa e toto māʻolunga mo e palopalema ʻi he mānavá. ʻE lava ke ne maumauʻi ʻa e ʻaté mo e lama ʻo e keté, pea ʻe lava ke ne fakatupunga ʻa e palopalema ʻi he fakamolū-meʻakaí. Pehē foki, ʻi he taimi ʻoku tau ʻita aí, ʻoku ʻikai maʻu pē ke tau fakakaukau lelei. Te tau leaʻaki nai pe fai ha ngaahi meʻa ʻoku fakalotomamahiʻi ai ʻa e niʻihi kehé, pea ʻe lava ke ne fakatupunga ke tau ongoʻi loto-mafasia ʻi ha taimi lōloa. ʻOku lelei lahi ange ke tau hanganaki nonga. ʻOku pehē ʻe he Tohi Tapú: “Ko ha loto ʻoku nonga ʻokú ne ʻoatu ʻa e moʻui ki he sinó.” (Pal. 14:30) Ko ia ai, ko e hā ʻe lava ke tau fai ʻi hono ʻai ʻe he niʻihi kehé ke tau ongoʻi mamahí, pea ʻe lava fēfē ke tau fakamelino mo hotau tokouá? ʻE lava ke tau ngāueʻaki ʻa e faleʻi fakapotopoto ʻa e Tohi Tapú.

15, 16. Ko e hā ʻoku totonu ke tau faí ʻi he taimi ʻoku fakalotomamahiʻi ai kitautolu ʻe ha tahá?

¹⁵ Lau ʻa e ʻEfesō 4:26. ʻOku ʻikai ke tau ʻohovale ʻi he taimi ʻoku ngaohikoviʻi ai kitautolu ʻe he kakai ʻoku ʻikai te nau tauhi kia Sihová. Ka ʻi he taimi ʻoku leaʻaki ai pe fai ʻe ha tokoua pe tuofefine Kalisitiane pe ko ha mēmipa ʻo e fāmilí ha meʻa ʻoku fakalotomamahiʻi ai kitautolu, ʻoku tau ongoʻi mamahi lahi nai ai. Fēfē kapau heʻikai pē lava ke tau fakangaloʻi ʻa e meʻa naʻe hokó? Te tau fakaʻatā ke tau kei ʻita ai pē, naʻa mo e ʻi ha ngaahi taʻu lahi? Pe te tau muimui ʻi he faleʻi fakapotopoto ʻa e Tohi Tapú ke fakaleleiʻi vave ʻa e ngaahi meʻá? Ko e lōloa ange ʻetau tatali ke talanoa mo e tokotaha ʻe tahá, ko e faingataʻa ange ia ke tau fakamelinó.

¹⁶ Fēfē kapau ʻokú ke ongoʻi mamahi ʻi ha tokoua pea ʻikai lava ke tuku hoʻo fakakaukau ki aí? Ko e hā ʻe lava ke ke fai ke fakamelinó? ʻUluakí, ʻe lava ke ke lotu kia Sihova. Kōlenga kiate ia ke ne tokoniʻi koe ke ke talanoa lelei mo ho tokouá. Manatuʻi, ko ho tokouá ko e taha foki ia ʻo e ngaahi kaumeʻa ʻo Sihová. (Saame 25:14) ʻOku ʻofa ʻa e ʻOtuá ʻiate ia. ʻOku fakafeangai ʻa Sihova ʻi he anga-lelei ki hono ngaahi kaumeʻá, pea ʻokú ne ʻamanekina mai ke tau fai ʻa e meʻa tatau. (Pal. 15:23; Māt. 7:12; Kol. 4:6) Uá, fakakaukau fakalelei fekauʻaki mo e meʻa te ke leaʻaki ki ho tokouá. ʻOua ʻe fakamahalo naʻá ne loto ke fakalotomamahiʻi koe. Mahalo pē ko ha fehālaaki, pe naʻá ke maʻuhala nai ki he tuʻungá. Loto-lelei ke fakahaaʻi naʻá ke fakatupunga nai ha konga ʻo e palopalemá. Te ke kamata nai ʻa e fetalanoaʻakí ʻaki hoʻo leaʻaki ha meʻa hangē ko ení, “Mahalo pē ʻoku ou mamahingofua tōtuʻa, ka ʻi hoʻo lea mai kiate au ʻaneafí, naʻá ku ongoʻi . . .” Kapau heʻikai ke tokoni ʻa e talanoá ke fai ha fakamelino ʻi ho vahaʻa mo ho tokouá, hokohoko atu pē hoʻo feingá. Lotu maʻa ho tokouá. Kole kia Sihova ke ne tāpuakiʻi ia pea tokoniʻi koe ke ke tokangataha ki hono ngaahi ʻulungaanga leleí. ʻE lava ke ke fakapapauʻi ʻe fiefia ʻa Sihova ʻi hoʻo ngaahi feinga loto-moʻoni ke fakamelino mo ho tokouá, ʻa ia ko e taha ia ʻo e ngaahi kaumeʻa ʻo e ʻOtuá.

17. ʻOku anga-fēfē hono tokoniʻi kitautolu ʻe Sihova ke fakaleleiʻi hotau vahaʻangatae mo iá ʻi he taimi ʻoku tau faiangahala aí, pea ko e hā ʻoku totonu ai ke tau tali ʻa e tokoni ko iá?

¹⁷ ʻOku ongoʻi taʻetaau ʻa e niʻihi ke tauhi kia Sihova koeʻuhí naʻa nau fai ha angahala mamafa. Ko e ongoʻi halaiá ʻe lava ke ne toʻo ʻetau nongá, fiefiá, mo hotau iví. Naʻe fāinga ʻa Tuʻi Tēvita mo e ngaahi ongoʻi halaia peá ne pehē: “ʻI heʻeku hanganaki fakalongolongó, ʻoku ʻauʻaunga ʻa hoku ngaahi huí koeʻuhi ko ʻeku toʻe ʻi he ʻahó kotoa. Naʻe mamafa ho nimá kiate au ʻi he ʻaho mo e pō.” Ko e meʻa fakafiefiá, he naʻe maʻu ʻe Tēvita ʻa e loto-toʻa ke fai ʻa e meʻa ʻoku fiemaʻu ʻe Sihova ke fai ʻe heʻene kau sevānití. “Naʻe faifai pē peá u vete ʻa ʻeku angahalá kiate koe,” ko ʻene tohí ia, “pea naʻá ke fakamolemoleʻi ʻa ʻeku faihalá mo ʻeku ngaahi angahalá.” (Saame 32:3-5) Kapau kuó ke fai ha angahala mamafa, ʻoku mateuteu ʻa Sihova ke ne fakamolemoleʻi koe. ʻOkú ne loto ke tokoniʻi koe ke fakaleleiʻi ho vahaʻangatae mo iá. Ka kuo pau ke ke tali ʻa e tokoni ʻokú ne tokonaki mai fakafou ʻi he kau mātuʻá. (Pal. 24:16; Sēm. 5:13-15) Ko ia ʻoua ʻe toe tatali! Ko hoʻo moʻui taʻengatá ʻoku fakatuʻunga ai. Kae fēfē kapau ʻokú ke kei ongoʻi halaia pē ʻi ha taimi fuoloa hili hono fakamolemoleʻi ha angahala. Ko e hā ʻoku totonu ke ke faí?

18. ʻE lava fēfē ke tokoniʻi ʻe he faʻifaʻitakiʻanga ʻa Paulá ʻa e faʻahinga ʻoku nau ongoʻi taʻetaau ke tauhi kia Sihová?

¹⁸ Naʻe ʻi ai ʻa e ngaahi taimi naʻe loto-siʻi ai ʻa e ʻapositolo ko Paulá koeʻuhi ko e ngaahi angahala naʻá ne fai ʻi he kuohilí. Naʻá ne pehē: “Ko e siʻi taha au ʻi he kau ʻapositoló, pea ʻoku ʻikai te u taau mo hono ui ko ha ʻapositoló, koeʻuhi naʻá ku fakatangaʻi ʻa e fakatahaʻanga ʻa e ʻOtuá.” Neongo ia, naʻe toe pehē ʻe Paula: “Ka ʻi he ʻofa maʻataʻatā ʻa e ʻOtuá ʻoku ou ʻi he tuʻunga ai ʻoku ou ʻi aí.” (1 Kol. 15:9, 10) Naʻe ʻafioʻi ʻe Sihova naʻe taʻehaohaoa ʻa Paula. Ka naʻá ne tali ʻa Paula ʻi he tuʻunga naʻá ne ʻi aí, pea naʻá ne loto ke fakapapauʻi ʻe Paula ʻa e meʻa ko iá. Kapau ʻokú ke fakatomala moʻoni ʻi he meʻa kuó ke faí peá ke talanoa kia Sihova ʻo fekauʻaki mo ia, pea ki he kau mātuʻá kapau ʻoku fiemaʻu, ko e moʻoni ʻe fakamolemoleʻi koe ʻe Sihova. Tui kuo fakamolemoleʻi koe ʻe Sihova, pea tali ʻa ʻene fakamolemolé!​—ʻAi. 55:6, 7.

19. Ko e hā ʻa e konga tohi fakataʻu ki he 2018, pea ko e hā ʻoku fiemaʻu ai iá?

¹⁹ ʻI heʻetau ofi ange ki he ngataʻanga ʻo e fokotuʻutuʻu ko ení, ʻe lava ke tau ʻamanekina ʻe lahi ange ʻetau palopalemá. Ka ʻoku totonu ke tau manatuʻi ko Sihova ʻa e tokotaha “ʻokú ne foaki ʻa e mālohi ki he tokotaha helaʻiá mo e mālohi kakato ki he faʻahinga ʻoku ʻikai hanau mālohí,” ʻe lava ke ne ʻoatu ha meʻa pē ʻokú ke fiemaʻu ke ke hanganaki faitōnunga ai kiate ia. (ʻAi. 40:29; Saame 55:22; 68:19) Lolotonga ʻa e 2018, ʻe fakamanatu mai ai kiate kitautolu ʻa e foʻi moʻoni mahuʻinga ko ení ʻi he taimi kotoa pē ʻoku tau maʻu ai ha fakataha ʻi he Fale Fakatahaʻangá pea sio ki he lea ʻo ʻetau konga tohi fakataʻú: “Ko kinautolu ʻoku ʻamanaki kia Sihová te nau maʻu ʻa e mālohi.”​—ʻAi. 40:31.