Ko e ʻOhofi mei he Tokelaú!

 1. Ko e hā ʻa e founga ako naʻe muimui ai ʻa Tokoua Russell mo hono ngaahi kaumeʻá, pea ko e hā naʻe ola lelei aí?

LAKA hake ʻi he taʻu ʻe teau kuohilí, ko Tokoua C. T. Russell mo hono ngaahi kaumeʻá naʻa nau kamata ke ako fakataha ʻa e Folofola ʻa e ʻOtuá. Naʻa nau loto ke ʻilo fekauʻaki mo e meʻa ʻoku akoʻi moʻoni ʻe he Tohi Tapú fekauʻaki mo Sihova ko e ʻOtuá, Sīsū Kalaisi, tuʻunga ʻo e kau maté mo e huhuʻí. Ko e founga ʻenau akó naʻe faingofua. ʻE ʻohake ʻe ha tokotaha ha fehuʻi, pea ko e kulupú leva te nau sivisiviʻi ʻa e konga Tohi Tapu kotoa ʻoku felāveʻi mo e kaveingá. Fakaʻosí, te nau hiki ʻa e meʻa naʻa nau maʻú. Koeʻuhi ko e tāpuaki ʻa Sihová, ko e kau tangata Kalisitiane loto-moʻoni ko iá naʻa nau maʻu ʻa e ngaahi moʻoni Fakatohitapu tefito ʻoku tau kei koloaʻaki he ʻahó ni.

 2. Ko e hā ʻoku tau faʻa maʻu nai ai ha fakamulituku hala ʻi heʻetau feinga ke mahinoʻi ha kikite?

² Kae kehe, hangē ko ia naʻe vave hono ʻiloʻi ʻe he kau ako Tohi Tapú, ko hono ʻiloʻi ʻa e meʻa ʻoku akoʻi ʻe he Tohi Tapú fekauʻaki mo ha tokāteline pau ʻoku kehe ia mei hono ʻiloʻi totonu ʻa e ʻuhinga ʻo ha kikite ʻi he Tohi Tapú. Ko e hā hono ʻuhingá? Ko e ʻuhinga ʻe taha, ko e ngaahi kikite ʻi he Tohi Tapú ʻoku faʻa mahinoʻi lelei tahá ʻi he lolotonga hono fakahokó pe ʻi he hili hono fakahokó. Ka ʻoku toe ʻi ai ha ʻuhinga ʻe taha. Ke mahinoʻi totonu ha kikite, ʻoku fiemaʻu ke tau vakaiʻi hono potutohí. Kapau ʻoku tau tokangataha pē ki ha tafaʻaki ʻe taha ʻo e kikité pea tukunoaʻi ʻa e toengá, te tau maʻu nai ai ha fakamulituku hala. ʻI he sioloto atu ki aí, ʻoku hā ngali ko e meʻa eni naʻe hoko ki he kikite ʻi he tohi ʻa Sioelí. Tau sivisiviʻi angé ʻa e kikite ko iá pea lāulea ki he ʻuhinga ʻoku fiemaʻu ai ke fakatonutonu ʻetau mahino lolotongá.

3-4. Ko e hā ʻetau mahino ki muʻa fekauʻaki mo e kikite ʻi he Sioeli 2:7-9?

³ Lau ʻa e Sioeli 2:7-9. ʻOku tomuʻa tala ʻe Sioeli ko ha pupunga heʻe te nau fakaʻauha ʻa e fonua ko ʻIsilelí. Ko e fanga ʻinisēkite maumau ko ení, ko honau nifó mo honau kaungaó ʻoku hangē ha laioné, te nau fakaʻauha ʻa e meʻa kotoa ʻoku nau sio ki aí! (Sioeli 1:4, 6) ʻI he ngaahi taʻu lahi, kuo tau ngāueʻaki fakaefakatātā ʻa e kikite ko iá ki he founga ʻoku hangē ai ʻa e kakai ʻa Sihová ko ha fuʻu pupunga heʻe taʻealataʻofí, ʻi heʻenau kau atu ʻi he ngāue fakamalangá. Naʻa tau mahinoʻi ko e ngāue ko ení naʻe ʻi ai hono ola fakatupu maumau ki he “fonuá” pe ko e kakai ʻoku nau ʻi he malumalu ʻo e kau taki lotú.b

⁴ Kapau ʻe ngata pē ʻetau laú ʻi he Sioeli 2:7-9, ʻe hā ngali tonu ʻa e fakamatala ko iá. Kae kehe, ʻi heʻetau vakaiʻi ʻa e potutohi ʻo e kikité, ʻoku tau sio ai ʻoku feʻungamālie ke liliu ʻetau mahinó. Tau sivisiviʻi angé ʻa e ʻuhinga ʻe fā ke fai ai ení.

5-6. Ko e hā ʻa e fehuʻi te tau ʻeke ʻi heʻetau lau ʻa e (a) Sioeli 2:20? (e) Sioeli 2:25?

⁵ ʻUluakí, fakatokangaʻi ʻoku talaʻofa ʻe Sihova fekauʻaki mo e pupunga heʻé: “Te u kapusi ke mamaʻo meiate kimoutolu ʻa e faʻahinga ʻi he tokelaú [fanga heʻe].” (Sioeli 2:20) Kapau ʻoku fakafofongaʻi ʻe he fanga heʻé ʻa e Kau Fakamoʻoni ʻa Sihova ʻoku nau talangofua ki he fekau ʻa Sīsū ke malanga mo ngaohi ākongá, ko e hā ʻe talaʻofa ai ʻe Sihova te ne kapusi kinautolú? (ʻIsi. 33:7-9; Māt. 28:19, 20) ʻOku hā mahino, ʻoku ʻikai kapusi ʻe Sihova ʻene kau sevāniti faitōnungá, ka ʻokú ne kapusi ha meʻa pe ko ha taha ʻoku fakafili ki heʻene kakaí.

⁶ Ko e ʻuhinga hono uá, fakakaukau ki he meʻa naʻe hiki ʻi he Sioeli 2:25. ʻOku pehē ai ʻe Sihova: “Te u fai ha totongi fakafoki kiate kimoutolu ki he ngaahi taʻu ʻo e ngaahi utu-taʻu kuo molé ʻa ia kuo keina ʻe he pupunga heʻé, mo e heʻe taʻekapakaú, mo e heʻe maumaú, pea mo e heʻe fakaʻauhá, ʻa ʻeku fuʻu kau tau naʻá ku fekauʻi atu ki homou lotolotongá.” Fakatokangaʻi naʻe talaʻofa ʻe Sihova ke “fai ha totongi fakafoki” ʻo e maumau naʻe fakatupunga ʻe he fanga heʻé. Kapau ʻoku fakatātaaʻi ʻe he fanga heʻé ʻa e kau ʻevangeliō ʻo e Puleʻangá, ʻe fakahuʻunga ení ko e pōpoaki ʻoku nau talakí ʻoku fakatupu maumau. Neongo ia, ko e pōpoaki fakahaofi moʻui ko iá ʻe lava ke ne ueʻi ha niʻihi ʻo e kau fulikivanú ke fakatomala. (ʻIsi. 33:8, 19) He tāpuaki ē ko ia kiate kinautolu!

 7. ʻI he Sioeli 2:28, 29, ko e hā hono mahuʻinga ʻo e kupuʻi lea “hili iá”?

⁷ Lau ʻa e Sioeli 2:28, 29. Fakakaukau ki he ʻuhinga hono tolú—ko e hokohoko ʻo e meʻa ʻoku fakamatalaʻi ʻi he kikité. Naʻá ke fakatokangaʻi ʻoku pehē ʻe Sihova: “ʻI he hili iá, te u huaʻi hifo ʻa hoku laumālié”; ʻa ia, ko e hili ia hono fakakakato ʻe he fanga heʻé ʻenau ngāué? Kapau ko e fanga heʻé ko e kau malanga ʻo e Puleʻanga ʻo e ʻOtuá, ko e hā ʻe huaʻi hifo ai ʻe Sihova hono laumālié kiate kinautolu ʻi he hili ʻenau fakakakato ʻenau faifakamoʻoní? Ko hono moʻoní, ka ne taʻeʻoua ʻa e tokoni ʻa e laumālie māʻoniʻoni mālohi ʻo e ʻOtuá, heʻikai ʻaupito lava ke hokohoko atu ʻenau malangá ʻi he laui taʻu neongo ʻa e fakatangá mo e fakataputapuí.

 8. Ko hai ʻokú ne fakafofongaʻi ʻa e fanga heʻe ʻi he Fakahā 9:1-11? (Sio ki he tā ʻi he takafí.)

⁸ Lau ʻa e Fakahā 9:1-11. Tau sio angé ki he ʻuhinga hono faá. Naʻa tau fakafekauʻaki ʻa e pupunga heʻe naʻe fakamatalaʻi ʻe Sioelí mo ʻetau ngāue fakamalangá koeʻuhi ko ha kikite meimei tatau ʻi he tohi ʻa Fakahaá. ʻOku fakamatala ʻa e kikite ko ení ki ha fuʻu pupunga heʻe ʻoku nau fofonga hangē ha tangatá pea ʻoku ʻi honau ʻulú ha meʻa ʻoku “hā matamata ko ha kalauni koula.” (Fkh. 9:7) ʻOku nau fakamamahiʻi ʻa e “kakai [fili ʻo e ʻOtuá] . . . ko ia ʻoku ʻikai te nau maʻu ʻa e sila ʻa e ʻOtuá ʻi honau laʻé” ʻi ha māhina ʻe nima, ko e lōloa ia ʻo e moʻui ʻa ha heʻe. (Fkh. 9:4, 5) Ko hono moʻoní ko ha fakamatala feʻungamālie eni mo e kau sevāniti pani ʻa Sihová. ʻOku nau talaki loto-toʻa ʻa e fakamaau ʻa e ʻOtuá ki he fokotuʻutuʻu fulikivanu ko ení, ko hono olá, ʻoku ʻai ai hono kau poupoú ke nau mātuʻaki tailiili.

 9. Ko e hā ʻa e ngaahi faikehekehe mahuʻinga ʻi he fanga heʻe naʻe sio ki ai ʻa Sioelí mo ia naʻe fakamatalaʻi ʻe Sioné?

⁹ Ko hono moʻoní, ʻoku ʻi ai ʻa e ngaahi faitatau ʻi he kikite ʻi he Fakahaá mo ia naʻe hiki ʻe Sioelí. Neongo ia, ʻoku ʻi ai hona ngaahi faikehekehe mahuʻinga. Fakatokangaʻi: ʻI he kikite ʻa Sioelí, ko e fanga heʻé ʻoku nau fakaʻauha ʻa e mohukú. (Sioeli 1:4, 6, 7) ʻI he vīsone ʻa Sioné, ʻoku tala ai ki he fanga heʻé “ke ʻoua te nau maumauʻi ʻa e mohuku ʻo e māmaní.” (Fkh. 9:4) Ko e fanga heʻe naʻe sio ki ai ʻa Sioelí naʻa nau haʻu mei he tokelaú. (Sioeli 2:20) Ko e fanga heʻe naʻe sio ki ai ʻa Sioné naʻa nau ʻalu hake mei ha luo taʻehanotakele. (Fkh. 9:2, 3) Ko e fanga heʻe naʻe fakamatala ki ai ʻa Sioelí naʻe kapusi kinautolu. Ko e fanga heʻe ʻi he Fakahaá naʻe ʻikai kapusi kinautolu ka naʻe fakaʻatā ke fakaʻosi ʻenau ngāué. ʻOku ʻikai ha lave ai naʻa nau fai ha meʻa ke taʻefakahōifua kia Sihova.—Sio ki he puha “Kikite Fekauʻaki mo e Fanga Heʻé—Faikehekehe Mahuʻingá.”

10. ʻOmai ha fakatātā Fakatohitapu ʻoku fakahaaʻi ai ko e fanga heʻe naʻe fakamatala ki ai ʻa Sioeli mo Sioné ʻoku lava ke na fakafofongaʻi ʻa e meʻa kehekehe.

¹⁰ Ko e ngaahi faikehekehe mahuʻinga ʻi he ongo kikité ʻoku tau fakamulituku ai ʻoku ʻikai ke na fekauʻaki. ʻA ia ʻoku tau pehē ko e fanga heʻe naʻe fakamatala ki ai ʻa Sioelí ʻoku ʻikai ke tatau ia mo e fanga heʻe ʻi he tohi Fakahaá? ʻIo. ʻI he Tohi Tapú, ʻoku anga-maheni pē hono ngāueʻaki ha fakaʻilonga ke fakatātaaʻi ʻaki ha meʻa kehekehe ʻi he ngaahi tuʻunga kehekehe. Ko e fakatātaá, ʻi he Fakahā 5:5, naʻe ui ai ʻa Sīsū “ko e Laione ʻo e matakali ʻo Siutá,” ka ʻi he 1 Pita 5:8, ʻoku fakamatalaʻi ai ʻa e Tēvoló ko e “laione ngungulú.” ʻI he vakai ki he ngaahi fehuʻi fekauʻaki mo ʻetau mahino lolotongá, ʻoku fiemaʻu ai ke tau toe vakai ki ha toe fakamatala fekauʻaki mo e kikite ʻa Sioelí. Ko e hā ia?

11. Ko e hā ʻa e fakalika ʻoku ʻomai ʻi he Sioeli 1:6 mo e 2:1, 8, 11 fekauʻaki mo e fanga heʻé?

¹¹ Ko ha toe vakai ofi ange ki he kikite ʻa Sioelí mo hono potutohí ʻoku fakahaaʻi ai naʻe tomuʻa tala ʻe he palōfitá ha ʻohofi fakakautau. (Sioeli 1:6; 2:1, 8, 11) Naʻe pehē ʻe Sihova te ne ngāueʻaki ʻene “fuʻu kau tau” (ʻa e kau sōtia Pāpilone) ke tauteaʻi ʻa e kau ʻIsileli talangataʻá. (Sioeli 2:25) ʻOku totonu hono ui ʻa e kau tau ko ení ko e “faʻahinga ʻi he tokelaú” koeʻuhi ko e kau Pāpiloné te nau ʻohofi ʻa ʻIsileli mei he tokelaú. (Sioeli 2:20) Ko e kau tau ko iá ʻoku fakahoa ki ha pupunga heʻe kuo fokotuʻutuʻu maau. ʻOku pehē ʻe Sioeli: “ʻOku ʻalu atu ʻa e [sōtia] taki taha ʻi hono ʻalunga. . . . ʻOku nau fakavave ki he loto koló, ʻoku nau lele ʻi he ʻaá. ʻOku nau kaka ki he ngaahi falé, ʻoku nau hū atu ʻi he matapā-teké ʻo hangē ko ha kaihaʻá.” (Sioeli 2:8, 9) ʻE lava ke ke sioloto atu ki ai? Ko e kau sōtiá ʻoku nau ʻi he feituʻu kotoa. ʻOku ʻikai toe lava ha toitoi. Heʻikai ke toe hao ha taha mei he heletā ʻa e kau Pāpiloné!

12. Naʻe anga-fēfē hono fakahoko ʻa e kikite ʻa Sioeli fekauʻaki mo e fanga heʻé?

¹² Hangē ko e fanga heʻé, ko e kau Pāpiloné (pe kau Kalitiá) naʻa nau ʻohofi ʻa Selusalema ʻi he 607 K.M. ʻOku pehē ʻi he Tohi Tapú: “[Ko e] tuʻi ʻo e kau Kalitiá, ʻa ia naʻá ne tāmateʻi ʻenau kau talavoú ʻaki ʻa e heletā . . . , naʻe ʻikai te ne ongoʻi manavaʻofa ki ha talavou pe finemui, motuʻa pe vaivai. Naʻe tuku ʻe he ʻOtuá ʻa e meʻa kotoa ki hono nimá. Naʻá ne tutu ʻa e fale ʻo e ʻOtua moʻoní, holoki ʻa e ʻā ʻo Selusalemá, tutu ʻa hono ngaahi taua fakakolotaú kotoa, pea fakaʻauha ʻa e meʻa kotoa pē naʻe mahuʻingá.” (2 Kal. 36:17, 19) ʻI he ʻosi hono ʻohofi ʻe he kau Pāpiloné ʻa e fonuá, ko e meʻa pē naʻe leaʻaki ʻe he kakaí: “Ko ha feituʻu lala ia ʻoku ʻikai ʻi ai ha tangata mo ha manu, pea kuo tuku atu ia ki he kau Kalitiá.”—Sel. 32:43.

13. Fakamatalaʻi ʻa e ʻuhinga ʻo e Selemaia 16:16, 18.

¹³ Hili ha taʻu nai ʻe 200 mei he kikite ʻa Sioelí, naʻe ngāueʻaki ʻe Sihova ʻa Selemaia ke ne tomuʻa tala ha toe meʻa fekauʻaki mo e ʻohofi ko ení. Naʻá ne pehē ʻe fai ha fekumi fakaʻāuliliki ki he kau ʻIsileli naʻa nau fai ʻa e ngaahi tōʻonga fulikivanu—ko ha kumi ke maʻu kinautolu. “‘Ko eni ʻoku ou fekau ke ʻomai ha kau tangata toutai tokolahi,’ ko e fakahaaʻi ia ʻe Sihová, ‘pea te nau toutaiʻi kinautolu. ʻI he hili iá, te u fekau ke ʻomai ha kau tulimanu tokolahi, pea te nau kumi kiate kinautolu ʻi he moʻunga kotoa pē mo e foʻi māʻolunga kotoa pē pea ʻi he ngaahi avaʻi maká. . . . Te u totongi kiate kinautolu ʻa honau moʻua kotoa ki heʻenau faihalá mo ʻenau angahalá.’” Naʻa mo e tahí pe ko e ngaahi vaotaá heʻikai lava ke nau fufū ʻa e kau ʻIsileli taʻefakatomalá mei hono ʻohofi ʻe he kau Pāpiloné.—Sel. 16:16, 18.

14. Naʻe fakahoko ʻanefē ʻa e Sioeli 2:28, 29?

¹⁴ Ka ʻi he tafaʻaki ʻe tahá, ʻoku ʻomai ʻe Sioeli ha ongoongo lelei ʻo e toe fakafoki mai. ʻE toe mahu ʻa e fonuá. (Sioeli 2:23-26) Pea ʻi ha taimi ʻi he kahaʻú, ʻe feʻungaʻānoa ʻa e meʻakai fakalaumālié. “Te u huaʻi hifo ʻa hoku laumālié ki he faʻahinga kakano kotoa pē,” ko e folofola ia ʻa Sihová, “pea ko homou ngaahi fohá mo homou ngaahi ʻofefiné te nau kikite . . . Pea naʻa mo ʻeku kau tamaioʻeikí mo ʻeku kau kaunangá te u huaʻi hifo ki ai ʻa hoku laumālié.” (Sioeli 2:28, 29) Ko hono huaʻi hifo ko ia ʻa e laumālie ʻo e ʻOtuá naʻe ʻikai ke hoko ia ʻi he foki pē ʻa e kau ʻIsilelí mei Pāpilone ki honau fonuá. Ka, naʻe toki hoko ia ʻi ha laui senituli ki mui, ʻi he Penitekosi 33 T.S. ʻOku anga-fēfē ʻetau ʻiloʻi iá?

15. Fakatatau ki he Ngāue 2:16, 17, ko e hā ʻa e liliu naʻe fai ʻe Pita ki he Sioeli 2:28, pea ko e hā ʻoku fakahaaʻi aí?

¹⁵ Naʻe fakamānavaʻi ʻa Pita ke ne fakafekauʻaki ʻa e Sioeli 2:28, 29 ki he meʻa fakaofo naʻe hoko ʻi he ʻaho ʻo e Penitekosí. ʻI he hivá nai ʻi he pongipongi ko iá naʻe huaʻi fakaemana hifo ʻa e laumālie māʻoniʻoní pea ueʻi ai ʻa e faʻahinga naʻa nau maʻu iá ke kamata lea “fekauʻaki mo e ngaahi meʻa fisifisimuʻa ʻa e ʻOtuá.” (Ngā. 2:11) ʻI hono fakamānavaʻi ʻa Pitá naʻá ne ngāueʻaki ha fakalea ʻo kiʻi kehe siʻi pē ʻi heʻene toʻo-lea mei he kikite ʻa Sioelí. Naʻá ke fakatokangaʻi ʻa e liliu naʻá ne faí? (Lau ʻa e Ngāue 2:16, 17.) ʻI he ʻikai kamataʻaki ʻa e kupuʻi lea “hili iá,” naʻe pehē ʻe Pita: “Pea ʻi he ngaahi ʻaho fakaʻosí”—ʻi he potutohi ko ení, ko e ngaahi ʻaho fakaʻosi ʻo e fokotuʻutuʻu ʻa e kau Siú—ko e laumālie ʻo e ʻOtuá ʻe huaʻi hifo “ki he faʻahinga kakano kotoa pē.” ʻOku fakahaaʻi heni naʻe ʻi ai ha vahaʻa taimi ki muʻa pea toki fakahoko ʻa e kikite ʻa Sioelí.

16. Naʻe anga-fēfē tokoni ʻa e laumālie ʻo e ʻOtuá ki he ngāue fakamalanga ʻi he ʻuluaki senitulí, pea fēfē ʻa e ʻahó ni?

¹⁶ Hili hono huaʻi hifo ʻa e laumālie ʻo e ʻOtuá ʻi he ʻuluaki senitulí ko e ngāue fakamalangá naʻe kamata ke laka ki muʻa ʻi he māmaní kotoa. ʻI he taimi naʻe fai ai ʻe Paula ʻene tohi ki he kau Kolosé, ʻi he 61 T.S. nai, naʻá ne pehē ko e ongoongo leleí kuo malangaʻi “ʻi he meʻa fakatupu kotoa pē ʻi he lalo langí.” (Kol. 1:23) ʻI he lea ʻa Paula fekauʻaki mo e “meʻa fakatupu kotoa pē,” ʻoku ʻuhinga eni ki he ngaahi feituʻu he māmaní naʻá ne fononga ki aí. ʻI he tokoni ʻa e laumālie māʻoniʻoni mālohi ʻo Sihová, ko e ngāue fakamalangá kuo toe tupulaki ange ia ʻi he ʻahó ni—“ki he ngaahi ngataʻanga ʻo e māmaní”!—Ngā. 13:47; sio ki he puha “Te U Huaʻi Hifo ʻa Hoku Laumālié.”

17. Kuo anga-fēfē hono liliu ʻetau mahino fekauʻaki mo e kikite ʻa Sioeli fekauʻaki mo e fanga heʻé?

¹⁷ Ko e hā kuo liliú? Kuo tau mahinoʻi totonu ange he taimí ni ʻa e kikite ʻi he Sioeli 2:7-9. ʻOku hā mahino, ʻoku ʻikai ʻuhinga ʻa e ngaahi veesi ko ení ki heʻetau ngāue fakamalanga faivelengá, ka ki hono ʻohofi ʻe he kau tau Pāpiloné ʻa Selusalema ʻi he 607 K.M.

18. Ko e hā kuo ʻikai liliu fekauʻaki mo e kakai ʻa Sihová?

¹⁸ Ko e hā kuo ʻikai ke liliú? Ko e kakai ʻa Sihová ʻoku hokohoko atu ʻenau malangaʻi ʻa e ongoongo leleí ʻi he feituʻu kotoa pē, ʻo ngāueʻaki ʻa e founga kotoa ʻoku ala lavá. (Māt. 24:14) Heʻikai lava ʻe ha fakangatangata fakapuleʻanga ke ne taʻofi ʻetau malangá. Pea ʻi he tāpuaki ʻa Sihová, ʻoku tau longomoʻui ange ai ʻi ha toe taimi ʻi hono malangaʻi loto-toʻa ʻa e ongoongo lelei ʻo e Puleʻangá! ʻOku tau hokohoko atu anga-fakatōkilalo ke hanga ki he tataki ʻa Sihová ki hono mahinoʻi ʻa e kikite ʻi he Tohi Tapú, ʻo tuipau ʻi he taimi totonú, te ne tataki atu kitautolu “ki he kotoa ʻo e moʻoní”!—Sione 16:13.