Ko Sihová ko ha ʻOtua ʻo e Kātaki-Fuoloa

“Ko Sihová, ko ha ʻOtua mohu meesi mo anga-lelei, tuai ki he houhau, pea fonu ʻi he anga-ʻofa.”—EKISOTO 34:​6, NW.

1, 2. (a) Ko hai ʻi he kuohilí naʻe maʻu ʻaonga mei he kātaki-fuoloa ʻa Sihová? (e) ʻOku ʻuhinga ki he hā ʻa e foʻi lea ko e “kātaki-fuoloa”?

KO E kakai ʻi he ʻaho ʻo Noá, ko e fononga holo ʻa e kau ʻIsilelí ʻi he toafá mo Mōsesé, ko e kau Siu naʻa nau moʻui ʻi he taimi naʻe ʻaʻeva ai ʻa Sīsū ʻi he māmaní—naʻa nau moʻui kotoa ʻi he malumalu ʻo e ngaahi tuʻunga kehekehe. Ka naʻa nau maʻu kotoa ʻa e ʻaonga mei he ʻulungaanga anga-ʻofa tatau pē ʻo Sihová—ʻa e kātaki-fuoloá. Ki he niʻihi, naʻe ʻuhinga ia ki heʻenau hao ai. Pea ʻoku malava ke toe ʻuhinga pehē ʻa e kātaki-fuoloa ʻa Sihová ki heʻetau moʻuí tonu.

² Ko e hā ʻa e kātaki-fuoloa? Ko fē ʻa e taimi ʻoku fakahaaʻi ai ia ʻe Sihová, pea ko e hā hono ʻuhingá? Kuo fakamatalaʻi ʻa e “kātaki-fuoloa” ko e “kātakiʻi ʻo e faihalá pe fakatupu ʻitá, ʻo ʻalu fakataha mo ha fakafisi ke ʻoua ʻe toʻo ʻa e ʻamanaki ki ha fakalelei ange ʻi he vahaʻangatae kuo uesiá.” Ko ia ai, ʻoku maʻu ʻe he ʻulungaanga ko ʻení ha taumuʻa. ʻOku sio ia ʻo tautefito ki he lelei ʻa e tokotaha ʻokú ne fakatupunga ha tuʻunga loto-kehekehé. Kae kehe, ʻoku ʻikai ʻuhinga ʻa e kātaki-fuoloá ia ke tukunoaʻi ai ʻa e faihalá. ʻI he taimi ʻoku fakahoko ai ʻa e taumuʻa ki he kātaki-fuoloá pe ko e taimi ʻoku ʻikai ai ke ʻi ai ha ʻuhinga ke toe kātakiʻi ai ʻa e tuʻungá, ʻoku ngata leva ʻa e kātaki-fuoloá.

 3. Ko e hā kuo hoko ko e taumuʻa ʻo e kātaki-fuoloa ʻa Sihová, pea ko e hā hono ngataʻangá?

³ Lolotonga ʻoku malava ʻa e faʻahinga ʻo e tangatá ke kātaki-fuoloa, ko Sihova ʻa e faʻifaʻitakiʻanga aoniu ʻo e ʻulungaanga ko ʻení. ʻI he laui taʻu talu mei hono uesia ʻe he angahalá ʻa e vahaʻangatae ʻi he vahaʻa ʻo Sihova mo ʻene fakatupu fakaetangatá, kuo fakahāhā ai ʻe hotau Tokotaha-Fakatupú ʻa e kātakí pea kuó ne tokonaki mai ʻa e founga ʻa ia ʻe malava ai ʻa e faʻahinga fakatomala ʻo e tangatá ke fakaleleiʻi honau vahaʻangatae mo iá. (2 Pita 3:9; 1 Sione 4:10) Ka ʻi he taimi kuo aʻusia ai ʻe heʻene kātaki-fuoloá ʻa hono taumuʻá, ʻe fai leva ʻe he ʻOtuá ha meʻa ki he kau angahala loto-fiefaí, ʻo fakahoko mai ha ngataʻanga ki he fokotuʻutuʻu fulikivanu lolotongá.—2 Pita 3:7.

Huʻufataha mo e Ngaahi Anga Tefito ʻo e ʻOtuá

 4. (a) ʻOku anga-fēfē hono fakahaaʻi ʻa e foʻi fakakaukau fekauʻaki mo e kātaki-fuoloá ʻi he Ngaahi Konga Tohitapu Faka-Hepeluú? (Sio foki ki he fakamatala ʻi laló.) (e) ʻOku anga-fēfē hono fakamatalaʻi ʻe he palōfita ko Nēhumí ʻa Sihová, pea ko e hā ʻoku fakahaaʻi ʻe he meʻá ni ʻo fekauʻaki mo e kātaki-fuoloa ʻa Sihová?

⁴ ʻI he Ngaahi Konga Tohitapu Faka-Hepeluú, ko e foʻi fakakaukau ko ia ʻo e kātaki-fuoloá ʻoku fakahaaʻi ia ʻe he foʻi lea faka-Hepelū ʻe ua ʻoku ʻuhinga fakaelea ko e “lōloa ʻo e ongo avaʻi ihú” pea ʻoku liliu ko e “tuai ki he houhau” ʻi he New World Translation.a ʻI he lea ʻo kau ki he kātaki-fuoloa ʻa e ʻOtuá, naʻe pehē ʻe he palōfita ko Nēhumí: “Ko Sihova ko e taha tuai ki he houhau, pea kaukaua ʻi he ivi [“mālohi,” NW], pea ʻikai ʻaupito te ne fakaʻatā ʻa e halaia.” (Nehumi 1:3) Ko ia ai, ko e kātaki-fuoloa ʻa Sihová ʻoku ʻikai ko ha fakaʻilonga ia ʻo e vaivai pea ʻoku ʻikai ke taʻeʻiai hano ngaahi ngataʻanga. Ko e moʻoniʻi meʻa ko ia ko e ʻOtua māfimafi-aoniú ʻoku tuai ki he houhau pea ʻi he taimi tatau pē ʻoku kaukaua ʻi he mālohí ʻoku fakahaaʻi ai ko ʻene kātaki-fuoloá ʻoku tupu ia mei he taʻotaʻofi mohu taumuʻa. ʻOkú ne maʻu ʻa e mafai ke tautea, ka ʻokú ne fakaʻehiʻehi loto-lelei mei hono fai leva iá koeʻuhi ke ʻoange ai ki he tokotaha faihalá ʻa e faingamālie ke liliu. (Isikeli 18:​31, 32) Ko ia ai, ko e kātaki-fuoloa ʻa Sihová ko ha fakahāhaaʻi ia ʻo ʻene ʻofá, pea ʻoku fakahāhaaʻi ai ʻa ʻene poto ʻi hono ngāueʻaki hono mālohí.

 5. ʻI he founga fē ʻoku fehoanaki ai ʻa e kātaki-fuoloa ʻa Sihová mo ʻene fakamaau totonú?

⁵ ʻOku toe fehoanaki ʻa e kātaki-fuoloa ʻa Sihová mo ʻene fakamaau totonú mo ʻene māʻoniʻoní. Naʻá ne fakahaaʻi ʻa ia tonu kia Mōsese “ko ha ʻOtua mohu meesi mo anga-lelei, tuai ki he houhau [“kātaki-fuoloa,” King James Version] pea fonu ʻi he anga-ʻofa mo e moʻoni.” (Ekisoto 34:​6, NW) Hili ha ngaahi taʻu mei ai, naʻe hiva ʻa Mōsese ʻi he fakahīkihikiʻi ʻo Sihova: “Ko ʻene ngaahi foungá kotoa ʻoku fakamaau totonu. Ko e ʻOtua ʻo e loto-tōnunga, ʻa ia ʻoku ʻikai ha fakamaau taʻetotonu ʻiate ia; ʻokú ne māʻoniʻoni mo faitotonu.” (Teutalonome 32:​4, NW) ʻIo, ʻoku fengāueʻaki feongoongoi kotoa ʻa e mēsí, kātaki-fuoloá, fakamaau totonú mo e faitotonu ʻa Sihová.

Kātaki-Fuoloa ʻa Sihova ki Muʻa he Lōmakí

 6. Ko e hā ʻa e fakamoʻoni fisifisimuʻa ʻo e kātaki-fuoloa kuo fakahāhā ʻe Sihova ki he ngaahi hako ʻo ʻĀtama mo ʻIví?

⁶ Naʻe hanga ʻe he angatuʻu ʻa ʻĀtama mo ʻIvi ʻi ʻĪtení ʻo motuhi taʻengata hona vahaʻangatae mātuʻaki mahuʻinga mo hona Tokotaha-Fakatupu anga-ʻofa ko Sihová. (Senesi 3:​8-13, 23, 24) Naʻe uesia ʻe he mavahe ko ʻení ʻa ʻena fānaú, ʻa ia kuo nau tukufakaholo mai ʻi he angahalá, taʻehaohaoá mo e maté. (Loma 5:​17-19) Neongo ko e ʻuluaki ongo meʻa mali fakaetangatá naʻá na hoko ko e ongo angahala loto-lelei, naʻe fakaʻatā kinaua ʻe Sihova ke na maʻu fānau. Ki mui mai ai, naʻá ne tokonaki anga-ʻofa ʻa e founga ʻa ia ʻe malava ai ʻe he ngaahi hako ʻo ʻĀtama mo ʻIví ke fakalelei mo ia. (Sione 3:​16, 36) Naʻe fakamatalaʻi ʻe he ʻapositolo ko Paulá: “Ko e ʻOtua ʻoku ne fakaha ʻa e moʻoni o ʻene ʻofa aʻana kiate kitautolu ʻi he pekia ʻa Kalaisi maʻatautolu, lolotonga ʻoku tau kei angahala.—Pea kapau ko ia, pea ka kuo tau maʻu ʻeni ʻa e fakatonuhia ʻi hono taʻataʻa, pea huanoa hotau fakamoʻui ka fai ʻiate ia mei he houhau. He kapau naʻe fakalelei ʻa e ʻOtua kiate kitautolu ʻi he pekia ʻa hono ʻAlo, lolotonga ʻene filiʻaki kitautolu, pea huanoa hotau fakamoʻui ka fai ʻi he moʻui aʻana, ka kuo ne hoifua mai.”—Loma 5:​8-10.

 7. Naʻe anga-fēfē hono fakahāhā ʻe Sihova ʻa e kātaki-fuoloá ki muʻa ʻi he Lōmakí, pea ko e hā naʻe totonu ai ʻa hono fakaʻauha ʻo e toʻutangata ki muʻa ʻi he Lōmakí?

⁷ Naʻe mātā ʻa e kātaki-fuoloa ʻa Sihová ʻi he ʻaho ʻo Noá. Laka hake ʻi ha senituli ki muʻa ʻi he Lōmakí, “naʻe ʻafio ʻa e ʻOtua ki mamani, pea ta kuo kaʻanga; he kuo fakakaʻanga ʻe he kakano kotoa pe hono ʻalunga ʻi mamani.” (Senesi 6:12) Kae kehe, ki ha taimi fakangatangata, naʻe fakahāhā ai ʻe Sihova ʻa e kātaki-fuoloá ki he faʻahinga ʻo e tangatá. Naʻá ne pehē: “ʻE ʻikai nofo maʻuaipe hoku Laumalie mo e tangata, ke fiu hono oʻi, he ko e kakano foki mo ia: ka ko hono fuoloa ko e taʻu ʻe teau mo e taʻu ʻe uofulu.” (Senesi 6:3) Ko e taʻu ʻe 120 ko iá naʻe fakaʻatā ai ʻa e taimi kia Noa loto-tōnunga ke ne maʻu ha fāmili pea—naʻe fakahā ai kiate ia ʻa e tuʻutuʻuni ʻa e ʻOtuá—ke langa ha ʻaʻake pea fakatokanga ki hono toʻutangatá ʻo fekauʻaki mo e Lōmaki naʻe tuʻunuku maí. Naʻe tohi ʻe he ʻapositolo ko Pitá: “I he tatali moe faa kataki [ko ha ʻulungaanga ʻoku fekauʻaki mo e kātaki-fuoloa] ae Otua i he gaahi aho o Noa, lolotoga ae teuteu ae vaka, aia nae fakamoui ai ae toko jii i he vai, koe toko valu be.” (1 Pita 3:​20, PM) Ko e moʻoni, ko e faʻahinga ʻi tuʻa mei he fāmili tonu ʻo Noá “naʻe ʻikai te nau tokanga” ki heʻene malangá. (Mātiu 24:​38, 39, NW) Ka ʻi hono ʻai ʻa Noa ke ne langa ʻa e ʻaʻaké pea ngāue nai ʻi ha ngaahi hongofuluʻi taʻu “ko ha tokotaha malangaʻi ʻo e māʻoniʻoní,” naʻe ʻoange ai ʻe Sihova ki he ngaahi toʻutangata ʻo Noá ʻa e faingamālie feʻunga ke nau fakatomala ai mei heʻenau ngaahi founga fakamālohí pea tafoki ʻo tauhi kiate ia. (2 Pita 2:​5, NW; Hepelu 11:7) Ko hono fakaʻauha ki mui ʻo e toʻutangata fulikivanu ko iá naʻe totonu fakaʻaufuli ia.

Ko ha Kātaki-Fuoloa Alafaʻifaʻitakiʻanga ki ʻIsileli

 8. Naʻe anga-fēfē hono fakahāhā ʻa e kātaki-fuoloa ʻa Sihová ki he puleʻanga ʻo ʻIsilelí?

⁸ Ko e kātaki-fuoloa ʻa Sihova ki ʻIsilelí naʻe tolonga ia ʻo fuoloa ange ʻi he taʻu ʻe 120. ʻI he kotoa ʻo e ngaahi taʻu laka hake he 1,500 ʻo honau hisitōlia ʻi he tuʻunga ko e kakai fili ʻa e ʻOtuá, naʻe siʻisiʻi ke ʻi ai ha ngaahi vahaʻa taimi naʻe ʻikai ke ʻahiʻahiʻi ai ʻe he kau ʻIsilelí pe ko e hā ʻa e ngataʻanga ʻo e kātaki-fuoloa ʻa e ʻOtuá. ʻI ha ngaahi uike pē hili hono fakahaofi fakaemana kinautolu mei ʻIsipité, naʻa nau tafoki ki he lotu ʻaitolí, ʻo fakahaaʻi ai ʻa e mātuʻaki taʻeʻapasia ki honau Fakamoʻuí. (Ekisoto 32:4; Sāme 106:21) ʻI he lolotonga ʻa e ngaahi hongofuluʻi taʻu hokó, naʻe lāunga ai ʻa e kau ʻIsilelí ʻo fekauʻaki mo e meʻakai naʻe tokonaki fakaemana mai ʻe Sihova ʻi he toafá, muhumuhu ʻo kau kia Mōsese mo ʻĒlone, lea fakafepaki kia Sihova, pea fai feʻauaki mo e kau panganí, ʻo aʻu ʻo kau ʻi he lotu Pēalí. (Nomipa 11:​4-6; 14:​2-4; 21:5; 25:​1-3; 1 Kolinito 10:​6-11) Naʻe ʻosi totonu ke fakaʻauha ai leva ʻe Sihova ʻene kakaí, ka ʻi hono kehé naʻá ne ngāueʻaki ʻa e kātaki-fuoloá.—Nomipa 14:​11-21.

 9. Naʻe anga-fēfē hono fakamoʻoniʻi ʻe Sihova ko ha ʻOtua ia ʻo e kātaki-fuoloa ʻi he lolotonga ʻa e taimi ʻo e kau Fakamāú pea ʻi he lolotonga ʻa e pule fakatuʻí?

⁹ ʻI he lolotonga ʻa e taimi ʻo e kau Fakamāú, naʻe toutou tō ai ʻa e kau ʻIsilelí ki he tauhi ʻaitolí. ʻI he taimi naʻa nau fai pehē aí, naʻe siʻaki atu ai kinautolu ʻe Sihova ki honau ngaahi filí. Ka ʻi he taimi naʻa nau fakatomala ai ʻo ui kiate ia ki ha tokoní, naʻá ne ngāueʻaki ʻa e kātaki-fuoloá pea fokotuʻu hake ʻa e kau fakamāú ke fakahaofi kinautolu. (Fakamāu 2:​17, 18) ʻI he lolotonga ʻa e vahaʻa taimi lōloa ʻo e pule fakatuʻí, ko e ngaahi tuʻi tokosiʻi pē naʻa nau fakahāhā ʻa e anga-līʻoa maʻataʻatā kia Sihová. Pea naʻa mo e ʻi he malumalu ʻo e ngaahi tuʻi loto-tōnungá, naʻe faʻa tuifio ai ʻe he kakaí ʻa e lotu moʻoní mo e loí. ʻI he taimi naʻe fokotuʻu hake ai ʻe Sihova ʻa e kau palōfitá ke nau fakatokanga fekauʻaki mo e taʻelototōnungá, naʻe faʻa saiʻia ange ʻa e kakaí ia ke fanongo ki he kau taulaʻeiki kākaá mo e kau palōfita loí. (Selemaia 5:31; 25:​4-7) Ko hono moʻoní, naʻe fakatangaʻi ʻe he kau ʻIsilelí ʻa e kau palōfita loto-tōnunga ʻa Sihová pea aʻu ʻo tāmateʻi ʻa e niʻihi ʻo kinautolu. (2 Kalonikali 24:​20, 21; Ngāue 7:​51, 52) Neongo ia, naʻe hokohoko atu pē hono fakahāhā ʻe Sihova ʻa e kātaki-fuoloá.—2 Kalonikali 36:15.

Naʻe ʻIkai ke ʻOsi ʻa e Kātaki-Fuoloa ʻa Sihová

10. Ko fē ʻa e taimi naʻe aʻu ai ʻa e kātaki-fuoloa ʻa Sihová ki hano ngataʻangá?

¹⁰ Kae kehe, ʻoku fakahaaʻi ʻe he hisitōliá ʻoku ʻi ai ha fakangatangata ʻo e kātaki-fuoloa ʻa e ʻOtuá. ʻI he 740 K.M., naʻá ne fakaʻatā ai ʻa e kau ʻAsīliá ke nau liua ʻa e puleʻanga matakali ʻe hongofulu ʻo ʻIsilelí pea taki atu ʻa e kau nofo aí ki he fakaheeʻi. (2 Tuʻi 17:​5, 6) Pea ʻi he ngataʻanga ʻo e senituli hokó, naʻá ne fakangofua ai ʻa e kau Pāpiloné ke nau fakatūʻuta ki he puleʻanga matakali ʻe ua ʻo Siutá pea fakaʻauha ʻa Selusalema mo hono temipalé.—2 Kalonikali 36:​16-19.

11. Naʻe anga-fēfē hono fakahāhā ʻe Sihova ʻa e kātaki-fuoloá naʻa mo e taimi naʻá ne fakahoko ai ʻa e fakamāú?

¹¹ Kae kehe, naʻa mo e lolotonga hono fakahoko ʻa ʻene ngaahi fakamaau ki ʻIsileli mo Siutá, naʻe ʻikai ngalo ʻia Sihova ke kātaki-fuoloa. Fakafou ʻi heʻene palōfita ko Selemaiá, naʻe tomuʻa tala ai ʻe Sihova ha toe fakafoki ʻo hono kakai filí. Naʻá ne pehē: “Ka kakato leva maʻa Papilone ʻa e fitungofuluʻi taʻu, te u aʻahi kiate kimoutolu, pea te u fakaai ʻeku talaʻofa kiate kimoutolu, ke fakafoki kimoutolu ki he potu ni. ʻIo, te u tuku ke mou maʻu au . . . pea te u liliu hoʻomou nofo popula, pea te u tanaki kimoutolu mei he ngaahi puleʻanga mo e ngaahi potu kehekehe, ʻa ia kuo u fakateka kimoutolu ki ai.”—Selemaia 29:​10, 14.

12. Naʻe anga-fēfē hono fakamoʻoniʻi ko e toe foki mai ʻa ha toenga ʻo e kau Siú ki Siutá naʻe ʻi he malumalu ʻo e tataki ʻa e ʻOtuá ʻi he fekauʻaki mo e hoko mai ʻa e Mīsaiá?

¹² Ko ha toenga mei he lotolotonga ʻo e kau Siu naʻe fakahēʻí naʻa nau foki moʻoni ki Siuta ʻo toe fakaake ʻa e lotu ʻa Sihová ʻi he temipale naʻe toe langa ʻi Selusalemá. ʻI hono fakahoko ʻo e ngaahi taumuʻa ʻa Sihová, ʻe hoko ai ʻa e toenga ko ʻení ʻo hangē ha “hahau meia Sihová,” ʻa ia ʻokú ne ʻomai ʻa e fakaivifoʻou mo e lakalakaimonū. Te nau toe loto-toʻa foki mo mālohi hangē “ha laione ʻi he lotolotonga ʻo e fanga manu fekai ʻo e vaotaá.” (Maika 5:​7, 8, NW) Ko e kupuʻi lea ko eni hono uá naʻe fakahoko nai ia ʻi he lolotonga ʻo e vahaʻa taimi ʻo e Makapeó ʻi he taimi naʻe hanga ai ʻe he kau Siu ʻi he malumalu ʻo e fāmili ʻo e kau Makapeó ʻo kapusi honau ngaahi filí mei he Fonua ʻo e Talaʻofá pea toe fakatapui ʻa e temipale ʻa ē naʻe fakalieliaʻí. Ko ia, naʻe maluʻi ʻa e fonuá mo e temipalé koeʻuhi ʻe toe ʻi ai ʻa e toenga loto-tōnunga te nau malava ke talitali fiefia ʻa e ʻAlo ʻo e ʻOtuá ʻi heʻene hā ai ko e Mīsaiá.—Taniela 9:25; Luke 1:​13-​17, 67-​79; 3:​15, 21, 22.

13. Naʻa mo e hili ʻo hono tāmateʻi ʻe he kau Siú ʻa hono ʻAló, naʻe anga-fēfē ʻa e hokohoko atu ʻa Sihova ʻi hono fakahāhā kiate kinautolu ʻa e kātaki-fuoloá?

¹³ Naʻa mo e hili hono fakapoongi ʻe he kau Siú ʻa hono ʻAló, naʻe hokohoko atu pē hono fakahāhā ʻe Sihova kiate kinautolu ʻa e kātaki-fuoloá ʻi ha vahaʻa taimi ko e taʻu ʻe tolu mo e konga, ʻo ʻoange ai kiate kinautolu ʻataʻatā pē ʻa e faingamālie ʻo hono ui ke hoko ko ha konga ʻo e hako fakalaumālie ʻo ʻĒpalahamé. (Taniela 9:27)b ʻI he ki muʻa mo e hili ʻa e taʻu 36 T.S., naʻe tali ʻe he kau Siu ʻe niʻihi ʻa e ui ko ʻení, pea ko ia ai, hangē ko ia naʻe toki fakahaaʻi ʻe Paula ki muí, ko “ha toenga kuo fakatoe, ko e meʻa ʻi he fili ʻoku fai ʻofa pe.”—Loma 11:5.

14. (a) ʻI he 36 T.S., ko hai naʻe fakaaʻu atu ki ai ʻa e monū ʻo e hoko ko ha konga ʻo e hako fakalaumālie ʻo ʻĒpalahamé? (e) Naʻe anga-fēfē hono fakahaaʻi ʻe Paula ʻa ʻene ongoʻi fekauʻaki mo e founga ʻo hono fili ʻe Sihova ʻa e kau mēmipa ʻo e ʻIsileli fakalaumālié?

¹⁴ ʻI he 36 T.S., ko e monū ʻo e hoko ko ha konga ʻo e hako fakalaumālie ʻo ʻĒpalahamé naʻe fakaaʻu atu ia ʻi he ʻuluaki taimi ko ʻení ki he faʻahinga ko ia naʻe ʻikai ko ha kau Siu pe kau ului Siú. Ko ha taha naʻá ne tali ia naʻe toe hoko ʻo ne maʻu ʻa e ʻofa maʻataʻatā mo e kātaki-fuoloa ʻa Sihová. (Kaletia 3:​26-29; Efeso 2:​4-7) ʻI hono fakahaaʻi ʻa e houngaʻia loloto ki he poto mo e taumuʻa ʻoku tuʻu mei mui ʻi he kātaki-fuoloa mohu meesi ʻa Sihová, ʻa ia ʻokú ne tokonaki ai ʻa e tokolahi fakakātoa ʻo e faʻahinga naʻe ui ke fakakakato ʻa e ʻIsileli fakalaumālié, naʻe kalanga ʻa Paula: “ʻOiau! ʻene kilukilua ʻa e koloa mo e poto mo e ʻilomeʻa ʻa e ʻOtua! hono ʻikai taʻemahakulea ʻene ngaahi tuʻutuʻuni, mo taʻemafakatotoloa hono ngaahi founga!”—Loma 11:​25, 26, 33; Kaletia 6:​15, 16.

Kātaki-Fuoloa Koeʻuhi ko Hono Huafá

15. Ko e hā ʻa e ʻuhinga tefito ki he kātaki-fuoloa fakaʻotuá, pea ko e hā ʻa e fakakikihi naʻe fiemaʻu ha taimi ki hano fakaleleiʻí?

¹⁵ Ko e hā ʻoku ngāueʻaki ai ʻe Sihova ʻa e kātaki-fuoloá? Ko hono tefitó koeʻuhi ke fakahīkihikiʻi ai hono huafa māʻoniʻoní pea fakatonuhiaʻi ai hono tuʻunga-haú. (1 Samiuela 12:​20-22) Ko e fakakikihi fakaeʻulungaanga naʻe langaʻi ʻe Sētane fekauʻaki mo e founga ʻoku ngāueʻaki ai ʻe Sihova Hono tuʻunga-haú naʻe fiemaʻu ki ai ʻa e taimi ke fakaleleiʻi ʻi ha tuʻunga fakafiemālie ʻi he ʻao ʻo e meʻamoʻui fakatupú kotoa. (Siope 1:​9-11; 42:​2, 5, 6) Ko ia ai, ʻi he taimi naʻe fakafeʻātungiaʻi ai ʻa ʻene kakaí ʻi ʻIsipité, naʻe tala ʻe Sihova kia Felo: “Kuou fokotuu koe, koeuhi ke fakaha iate koe eku malohi; bea ke fakaogo atu ai hoku huafa i mamani kotoabe.”—Ekisoto 9:​16, PM.

16. (a) Naʻe anga-fēfē hono hanga ʻe he kātaki-fuoloa ʻa Sihová ʻo ʻai ke malava ʻa hono teuʻi ʻo ha kakai ki hono huafá? (e) ʻE anga-fēfē hono fakamāʻoniʻoniʻi ʻa e huafa ʻo Sihová pea mo hono fakatonuhiaʻi ʻa hono tuʻunga-haú?

¹⁶ Ko e ngaahi lea ʻa Sihova kia Feló naʻe lave ki ai ʻi he taimi naʻe fakamatalaʻi ai ʻe he ʻapositolo ko Paulá ʻa e ngafa ʻo e kātaki-fuoloa ʻa e ʻOtuá ʻi hono fakalāngilangiʻi ʻa Hono huafa māʻoniʻoní. Pea naʻe tohi leva ʻe Paula: “Bea kabau kuo finagalo ae Otua ke fakaha hono houhau, bea fakailo mo hono malohi, naa ne kataki i he kataki fuoloa ae gaahi ibu oe houhau nae tāu moe malaia: Bea koeuhi ke ne fakaha hono lahi o ene lelei ki he gaahi ibu oe aloofa, akinautolu naa ne tomua teuʻi ki he hakeakiʻi, Io, akitautolu kuo ne ui, ikai mei he kakai Jiu be, ka mei he kakai Jenitaile foki? O hage ko ene folofola ia Hosea, Teu ui akinautolu ko hoku kakai, aia nae ikai ko hoku kakai.” (Loma 9:​17, 22-25, PM) Koeʻuhi naʻe ngāueʻaki ʻe Sihova ʻa e kātaki-fuoloá, naʻe malava ai ke ne toʻo mei he ngaahi puleʻangá “ha kakai ke kau ki hono huafa.” (Ngāue 15:14) ʻI he malumalu ʻo honau ʻUlú, ʻa Sīsū Kalaisi, ko e “kakai tapu” ko ʻení ko e kau ʻea ia ʻo e Puleʻanga ko ia ʻe ngāueʻaki ʻe Sihova ke fakamāʻoniʻoniʻi Hono huafa lahí pea ke fakatonuhiaʻi Hono tuʻunga-haú.—Taniela 2:44; 7:​13, 14, 27; Fakahā 4:​9-11; 5:​9, 10.

ʻOku Iku ʻa e Kātaki-Fuoloa ʻa Sihová ki he Fakamoʻui

17, 18. (a) Ko hono fai ʻa e hā ʻoku malava ke tau fakaangaʻi taʻeʻilo ai ʻa Sihova ki heʻene ngāueʻaki ʻa e kātaki-fuoloá? (e) ʻOku anga-fēfē hono fakalototoʻaʻi kitautolu ke tau vakai ki he kātaki-fuoloa ʻa Sihová?

¹⁷ Talu pē mei he fuofua tō faingatāmaki ʻa e faʻahinga ʻo e tangatá ki he angahalá ʻo aʻu mai ki he taimí ni, mo hono fakahaaʻi ai pē ʻe Sihova ʻa ia tonu ko ha ʻOtua kātaki-fuoloa. Ko ʻene kātaki-fuoloa ki muʻa he Lōmakí naʻe fakaʻatā ai ʻa e taimi ki ha fakatokanga totonu ke fai pea mo ha fakamoʻuiʻanga ke langa. Ka naʻe aʻu ʻa ʻene kātakí ki ha ngataʻanga, pea naʻe hoko mai ʻa e Lōmakí. ʻOku meimei tatau pē he ʻahó ni, ʻoku fakahāhā ʻe Sihova ʻa e kātaki-fuoloa lahi, pea ʻoku tolonga ia ʻo fuoloa ange ʻi he meʻa ʻoku fakakaukau atu nai ki ai ʻa e niʻihi. Kae kehe, ʻoku ʻikai ko ha ʻuhinga ʻeni ia ke ʻikai ai ha toe ʻamanaki. Ke fai pehē ʻe tatau pē ia mo hono fakaangaʻi ʻa e ʻOtuá ki heʻene kātaki-fuoloá. Naʻe ʻeke ʻe Paula: “Oku ke loto manuki ki he lahi faufau o ene agalelei, moe faa kataki, moe kataki ofa; o ikai te ke ilo koe agalelei ae Otua koe mea ke tataki koe ki he fakatomala?”—Loma 2:​4, PM.

¹⁸ ʻOku ʻikai ha taha ʻo kitautolu ʻe lava ke ne ʻilo ʻa e lahi kakato ʻoku fiemaʻu ai kiate kitautolu ʻa e kātaki-fuoloa ʻa e ʻOtuá ke fakapapauʻi ai ʻoku tau maʻu ʻene hōifua ki he fakamoʻuí. ʻOku akonaki mai ʻa Paula kiate kitautolu ke tau “hanganaki ngāue ki [hotau] fakamoʻuí tonu fakataha mo e manavahē pea mo e tetetete.” (Filipai 2:​12, NW) Naʻe tohi ʻa e ʻapositolo ko Pitá ki he kaungā Kalisitiané: “Oku ikai fakatuotuai e he Eiki ki he ene talaofa, o hage koe lau ae niihi koe tuotuai; ka oku kataki fuoloa kiate kitautolu, o ikai finagalo ke auha ha toko taha, ka koeuhi ke hoko o fakatomala kotoabe.”—2 Pita 3:​9, PM, fakaʻītali ʻamautolu.

19. ʻI he founga fē ʻoku malava ke tau ngāueʻaongaʻaki ai ʻa e kātaki-fuoloa ʻa Sihová?

¹⁹ Ko ia ai, ʻai ke ʻoua te tau hoko ʻo taʻekātaki ʻi he founga ʻa Sihova ki hono fakaleleiʻi ʻa e ngaahi meʻá. ʻI hono kehé, ʻai ke tau muimui ʻi he toe akonaki ʻa Pitá pea “lau ʻa e kataki fuoloa ʻa hotau ʻEiki ko e koto fakamoʻui.” Fakamoʻui ʻo hai? ʻO kitautolu pea aʻu atu ai ki he niʻihi kehe taʻefaʻalaua ʻa ia ʻoku kei fiemaʻu ke nau fanongo ki he “ongoongolelei . . . ʻo e puleʻanga.” (2 Pita 3:15; Mātiu 24:14) ʻE tokoni ʻeni kiate kitautolu ke tau koloaʻaki ʻa e nima-homo lahi fau ʻo e kātaki-fuoloa ʻa Sihová pea ueʻi ai kitautolu ke tau hoko ʻo kātaki-fuoloa ʻi heʻetau ngaahi feangai mo e niʻihi kehé.

[Fakamatala ʻi lalo]

ʻE Lava Ke Ke Fakamatalaʻi?

• Ko e hā ʻa e ʻuhinga ʻi he Tohitapú ki he foʻi lea ko e “kātaki-fuoloa”?

• Naʻe anga-fēfē hono fakahāhaaʻi ʻe Sihova ʻene kātaki-fuoloá ki muʻa ʻi he Lōmakí, hili ʻa e nofo pōpula ʻi Pāpiloné pea ʻi he ʻuluaki senituli T.S.?

• Ko e hā ʻa e ngaahi ʻuhinga mahuʻinga kuo fakahāhā ai ʻe Sihova ʻa e kātaki-fuoloá?

• ʻOku totonu ke fēfē ʻetau vakai ki he kātaki-fuoloa ʻa Sihová?

[Fakatātā ʻi he peesi 9]

Naʻe hanga ʻe he kātaki-fuoloa ʻa Sihova ki muʻa ʻi he Lōmakí ʻo ʻoange ki he kakaí ʻa e faingamālie feʻunga ke nau fakatomala ai

[Fakatātā ʻi he peesi 10]

ʻI he hili ʻa e tō ʻa Pāpiloné, naʻe maʻu ʻe he kau Siú ʻa e ʻaonga mei he kātaki-fuoloa ʻa Sihová

[Fakatātā ʻi he peesi 11]

ʻI he ʻuluaki senitulí, naʻe maʻu ai ʻe he kau Siú mo e ʻikai Siú ʻa e ʻaonga mei he kātaki-fuoloa ʻa Sihová

[Fakatātā ʻi he peesi 12]

ʻOku ngāueʻaongaʻaki ʻe he kau Kalisitiane ʻi he ʻaho ní ʻa e kātaki-fuoloa ʻa Sihová