Ko e Kau Nofo Fakataha ʻi ha “Fonua” Kuo Fakafoʻou

“Ka ʻe ui kimoutolu ko e kau taulaʻeiki ʻa Sihova: ʻe lau kimoutolu ko e kau tauhi ʻo hotau ʻOtua.”​—ʻAISEA 61:6.

 1, 2. (a) Ko e hā ʻa e tuʻunga ʻo e kau ului ʻi ʻIsilelí? (e) Ko e hā ʻa e fakakaukau kuo fakahā ʻe he kau mēmipa ʻo e “fuʻu kakai lahi” ʻi onopooní?

ʻI HE kuonga muʻá, ʻi he ngāue anga-tonu ʻa ʻIsilelí naʻe hoko ia ko ha fakamoʻoni ki he lāngilangi ʻo Sihova ʻi he māmaní. (ʻAisea 41:​8, 9; 43:​10) Naʻe tali ʻe he kau muli tokolahi pea nau hoko ʻo lotu kia Sihova ʻi heʻenau feohi mo ʻEne kakai filí. Ko hono moʻoní, naʻa nau lea ki ʻIsileli ʻo hangē ko e lea ʻa Lute kia Neomai: “Ko ho kakai ko hoku kakai, pea ko ho ʻOtua ko hoku ʻOtua.” (Lute 1:16) Naʻa nau muimui ki he tuʻutuʻuni ʻi he fuakava ʻo e Lao, naʻe kamu ʻa e kakai tangata. (ʻEkisoto 12:​43-48) Naʻe mali ʻa e kau fefine ʻe niʻihi mo e kau ʻIsileli. Ko Lēhapi ʻo Sielikoó mo Lute ko e fefine Moapé naʻá na hoko ko e ongo kui ia ʻa Sīsū Kalaisí. (Mātiu 1:5) Ko e kau ului peheé ko e konga kinautolu ʻo e fakatahaʻanga ʻo ʻIsilelí.​—Teutalōnome 23:​7, 8.

² ʻOku hangē ko e kau ului ʻi ʻIsilelí, kuo pehē ʻa e “fuʻu kakai lahi” ʻi he ʻahó ni ki he toenga ʻo e kau paní: “Te tau ō mo kimoutolu; he kuo mau fanongo ʻoku ʻiate kimoutolu ʻa e ʻOtua.” (Fakahā 7:9; Sākalaia 8:23) ʻOku nau ʻilo ko e kau Kalisitiane pani ko iá ko e “tamaioeiki agatonu mo boto” kinautolu ʻa Sihova, pea ʻoku nau mātuʻaki ngāue vāofi ʻaupito mo kinautolu, ko ia ai ko e kau paní mo e “fanga sipi kehe” ko e “takanga pe taha, pea taha pe ʻa e tauhi.” (Mātiu 24:​45-47, PM; Sione 10:16) Ko e hā ʻe hoko ki he fuʻu kakai lahí ʻi he maʻu ʻe honau ngaahi tokoua paní kotoa ʻa honau pale fakahēvaní? ʻOku fiemaʻu ke ʻoua te nau manavasiʻi. ʻI he lolotonga ʻo e “kuonga fakamui” ni, kuo fai ʻe Sihova ʻa e teuteu ki he taimi ko ia.​—2 Tīmote 3:1.

Ko ha “Fonua” Fakalaumālie

 3. Ko e hā ʻa e “ngaahi langi foʻou” naʻe kikiteʻi ʻe Pitá, pea naʻe fokotuʻu kinautolu ʻanefē?

³ Ko e fokotuʻutuʻu fakaefounga-pule fakahēvaní ʻa ia ʻe kau ki ai ʻa e kau Kalisitiane pani ʻe toko 144,000 naʻe kikiteʻi ʻe he ʻaposetolo ko Pita. Naʻá ne pehē: “Ka ʻi he funga ʻo e talaʻofa ʻa ʻEne ʻAfio ʻoku tau ʻamanaki ki ha ngaahi langi foʻou mo ha fonua foʻou, ʻa ia ʻoku nofoʻanga ai ʻa maʻoniʻoni.” (2 Pita 3:13) Naʻe fokotuʻu ʻa e “ngaahi langi foʻou” ko ʻení ʻi he 1914, ʻi hono fakanofo ʻa Kalaisi ko e Tuʻi ʻi he Puleʻanga fakahēvaní. Kae fēfē ʻa e “fonua foʻou”?

 4. (a) Ko e hā ʻa e meʻa taʻeʻamanekina naʻe hoko ʻi he 1919? (e) Ko e hā ʻa e ‘puleʻanga naʻe fanauʻi ʻi he feinga pe ʻe taha,’ pea ko e hā ʻa e ‘fonua naʻe faʻeleʻi’?

⁴ ʻI he 1919, naʻe ʻomai ai ʻe Sihova ʻa e toenga ʻo e kau paní mei he nofo pōpula ki Pāpilone ko e Lahí. (Fakahā 18:4) Ko e meʻa fakafokifā mo fakaofo ko ʻení naʻe mātuʻaki taʻeʻamanekina ia ʻe he kau taki ʻo e Puleʻanga-Haʻa-Kalisitiané. Fekauʻaki mo iá, ʻoku pehē ʻe he Tohitapú: “Ko hai kuo ne fanongo ki ha meʻa pehe? Ko hai kuo mamata ki ha ngaahi meʻa hange ko ena? ʻOku faʻeleʻi koā ha fonua kotoa ʻi ha ʻaho pe taha? ʻIo, ʻoku fanauʻi ha puleʻanga ʻi ha feinga pe taha?” (ʻAisea 66:8) ʻI he ʻasi fakafokifā ʻa e fakatahaʻanga pani ʻi he ʻao ʻo e ngaahi puleʻangá ko ha kakai naʻe fakatauʻatāinaʻí, ʻoku moʻoni ia ko ha puleʻanga naʻe ‘fanauʻi ʻi ha feinga pe ʻe taha.’ Ka neongo ia, ko e hā ʻa e “fonua”? ʻI ha founga ʻe taha, naʻe tatau fakalaumālie ia ki he fonua ʻo ʻIsileli ʻo e kuonga muʻa. Ko e tafaʻaki ia ʻo e ngāue naʻe tuku ki he “puleʻanga” toki fanauʻi, ko ha feituʻu ʻoku fakahoko fakalaumālie ai ʻi onopooni ʻa e ngaahi kikite ʻo kau ki he Palataisí ʻi he tohi ʻAiseá. (ʻAisea 32:​16-20; 35:​1-7; fakafehoanaki mo Hepelū 12:​12-14.) Neongo pe ko e fē ha feituʻu ʻoku nofo ai ha Kalisitiane, ʻokú ne kau ʻi he “fonua” ko iá.

 5. Ko e hā ʻa e senitā naʻe kamata ʻi he 1919? Fakamatalaʻi.

⁵ Ko e hā ʻa e kaunga ʻo e meʻá ni ki he “fonua foʻou” naʻe kikiteʻi ʻe Pita? Sai, ko e “puleʻanga” foʻou ko iá naʻe fanauʻi ʻi he 1919 ʻi ha “fonua” kuo fakafoʻoú, kuo tupulekina ia ki ha kautaha ʻi māmani lahi ʻa ia kuo faʻuʻaki ʻa e kau fakahīkihiki pani mo ʻikai ke pani ʻa Sihová. Ko e kautaha ko ʻení ʻe hao atu ʻi ʻĀmaketone ki he māmani foʻou ʻa e ʻOtuá. ʻI he founga ko ʻení ʻe lava ke vakai ki he puleʻanga ko iá ko e senitā ia ʻo e sōsaieti ʻo e faʻahinga māʻoniʻoní, ko e fonua foʻou, ʻe tuʻu pē ia ʻi he hili hono fakaʻauha ʻo e māmani ʻo Sētané.a ʻI he vaeua ʻo e 1930 tupú, ko e kau paní, ʻi ha tuʻunga ko ha kulupu, naʻe fakatahaʻi ki he fonua kuo fakafoʻoú. Talu mei ai, kuo fai ʻa e fakamamafá ʻi hono fakatahatahaʻi ʻa e fuʻu kakai lahi ʻo e fanga sipi kehé, ʻa ia ʻi he ʻaho ní ʻoku meimei toko nima miliona. (Fakahā 14:​15, 16) ʻOku fuʻu tokolahi ʻa e kakai ʻi he “fonua”? ʻIkai, ko hono ngaahi kauʻā ʻoku lava ke fakalahi ki he lahi ʻoku fiemaʻú. (ʻAisea 26:15) Ko e moʻoni, ʻoku fakatupu-fiefia ʻa e sio ki he tupu ʻa hono tokolahi ʻo e kakaí ʻi hono fakafonu ʻe he kau paní ʻa e “fonua” ʻaki ʻa e “fua”​—ko e meʻakai fakalaumālie fakaivimoʻui mo fakatupu-moʻuilelei. (ʻAisea 27:6) Ka ko e hā ʻa e tuʻunga ʻo e fanga sipi kehe ko ʻení ʻi he “fonua” kuo fakafoʻou ʻo e kakai ʻa e ʻOtuá?

Kau Muli Longomoʻui ʻi he “Fonua”

 6. Kuo anga-fēfē ʻa e longomoʻui ʻa e kau mulí ʻi he “fonua” ʻo e kakai ʻa e ʻOtuá?

⁶ ʻOku hangē pē ko e kau ului ʻi he fonua ʻo ʻIsilelí naʻa nau muimui ki he Lao ʻa Mōsesé, ko e fuʻu kakai lahi ʻi he ʻahó ni ʻi he “fonua” kuo fakafoʻou ʻoku nau talangofua ki he ngaahi fekau ʻa Sihová. Kuo akoʻi kinautolu ʻe honau ngaahi tokoua paní, ʻoku nau fakaʻehiʻehi ai mei he ngaahi tafaʻaki kotoa ʻo e lotu loi mo tauhi ʻa e toputapu ʻo e totó. (Ngāue 15:​19, 20; Kalētia 5:​19, 20; Kolose 3:5) ʻOku nau ʻofa kia Sihova ʻaki ʻa e kotoa ʻo honau lotó, fakakaukaú, soulú mo e mālohí pea ʻofa ki honau kaungāʻapí ʻo hangē pē ko kinautolú. (Mātiu 22:37; Sēmisi 2:8) ʻI ʻIsileli ʻo e kuonga muʻa naʻe tokoni ʻa e kau uluí ki hono langa ʻa e temipale ʻo Solomoné pea naʻa nau poupouʻi ʻa e toe feinga ke fakafoki ʻa e lotu moʻoní. (1 Kalonikali 22:2; 2 Kalonikali 15:​8-14; 30:25) ʻI he ʻahó ni, ʻoku toe kau foki ʻa e fuʻu kakai lahi ʻi he ngaahi ngāue langá. Ko e fakatātaá, ʻoku nau tokoni ke langa hake ʻa e ngaahi fakatahaʻangá mo e ngaahi feituʻú, tuku kehe ʻa ʻenau fai ʻa e ngaahi ngāue langa fakamatelié, ʻo hangē ko e ngaahi Kingdom Hall, ngaahi Holo ʻAsemipilī, mo e ngaahi fale ʻo e vaʻá.

 7. Ko e hā naʻe hoko ʻi Selusalema hili ʻa e toe foki ʻi he ʻikai ke tokolahi feʻunga ʻa e kau Līvaí ke fai ʻa e ngaahi ngāue ʻi he temipalé?

⁷ ʻI he 537 K.M., ʻi he toe foki ʻa e kau ʻIsileli mei he nofo pōpula ʻi Pāpiloné, naʻa nau kamata fokotuʻutuʻu ha ngāue ʻi he temipalé ʻa ia naʻe ʻosi langa foʻoú. Kae kehe, ko e kau Līvai naʻe toe fokí naʻe ʻikai ke fuʻu tokolahi. Ko ia, ko e Netinimí​—ko e kau muli ʻosi kamu naʻa nau nofo ʻi he fonuá ʻa ia ko e kau tokoni ki muʻa ki he kau Līvaí​—naʻe fakalahi ange ʻa honau monū ʻi he ngāue ʻi he temipalé. Kae kehe, naʻe ʻikai pē te nau tatau mo e kau taulaʻeiki pani faka-ʻĒloné.b​—ʻĒsela 7:24; 8:​15-20; Nehemaia 3:​22-26.

 8, 9. Kuo anga-fēfē ʻa e kau lahi ange ʻa e fanga sipi kehé ʻi hono fai ʻa e ngāue toputapú ʻi he lolotonga ʻo e kuonga fakamuí?

⁸ Kuo muimui ʻa e kau Kalisitiane pani ʻi he ʻaho ní ʻi he sīpinga ko ʻeni. ʻI he laka ki muʻa ʻa e “taimi fakamui,” ko e toenga ʻo e kau paní ʻoku fakaʻau ke tokosiʻi mo tokosiʻi ange ʻi he “fonua” ʻo e kakai ʻa e ʻOtua. (Tāniela 12:9; Fakahā 12:17) ʻI he vakai ki he meʻá ni, ʻoku lavaʻi ʻe he fuʻu kakai lahi ʻa e lahi taha ʻo e “ngāue toputapú.” (Fakahā 7:​15, NW) ʻI he muimui ki he tataki ʻa honau ngaahi tokoua paní, ʻoku nau ʻoatu ai “ha feilaulau fakafetaʻi ki he ʻOtua ʻa é ko e fua ʻo e loungutu ʻoku takua hono huafa.” ʻOku ʻikai “ngalo ʻa e fai ʻofa mo e fai tokoni” ʻiate kinautolu ki he niʻihi kehé, ʻo ʻilo “ko e alā feilaulau pehe ʻoku hohóʻia ai ʻa e ʻOtua.”​—Hepelū 13:​15, 16.

⁹ Pehē foki, ʻi he tupulekina ʻa e fuʻu kakai lahi ʻaki ʻa e laui kilu ʻi he taʻu taki tahá, ʻoku tupulaki maʻu ai pē ʻa e fiemaʻu ʻo ha tauhí. ʻI he taimi ʻe taha naʻe fai ʻataʻatā pē ia ʻe he kau Kalisitiane pani. ʻI he taimi ní, ko e tauhi ʻo e lahi taha ʻo e ngaahi fakatahaʻangá, pea pehē ki he ngaahi feituʻú, ngaahi vahé, mo e ngaahi vaʻá, kuo tuku ia ki he fanga sipi kehé. ʻI he 1992 ko e tokosiʻi pē ʻo e faʻahingá ni naʻa nau maʻu ʻa e monū ke kau ki he ngaahi fakataha ʻa e ngaahi kōmiti ʻo e Kulupu Pulé ko e kau tokoni pē kae ʻikai ke kau ʻi ha fili ki ha meʻa. Ka naʻe kei mateaki pē ʻa e fanga sipi kehe ki honau kaungā-Kalisitiane paní pea mo lau ko honau monuú ia ke poupouʻi kinautolu ʻi honau tuʻunga ko e tamaioʻeiki anga-tonu mo poto ʻa Sihová.​—Mātiu 25:​34-40.

“Hange ha Hingoa ʻEiki”

10, 11. ʻI he muimui ki he sīpinga ʻo e kau Filisitia ʻe niʻihi, kuo anga-fēfē ʻa e liliu ʻo e loto ʻo e ngaahi fili ki muʻa ʻo e kakai ʻa e ʻOtuá? Ko e hā hono olá?

¹⁰ Ko e founga ʻo hono ngāueʻaki ʻe he tamaioʻeiki anga-tonu mo poto ʻa e fanga sipi kehé ʻi he ngaahi tuʻunga ʻo e fai fatongia naʻe kikiteʻi ia ʻi he Sākalaia 9:​6, 7. ʻOku tau lau ai: “Pea te u tuʻusi ʻa e fielahi ʻa e kau Filisitia. Pea te u ʻave ʻene ngaahi meʻa toto mei hono ngutu, mo ʻene ngaahi meʻa fakalielia mei hono vahaʻa nifo, pea ko ia foki te ne nofo ko e toenga maʻa hotau ʻOtua: ʻio, te ne hoko hange ha hingoa ʻeiki ʻi Siuta, pea tatau ʻa Ekiloni mo haʻa Siepusi.”c Ko e kau Filisitiá naʻa nau tāufehiʻa mamahi ki he kakai ʻa Sihová, ʻo hangē pē ko e māmani ʻo Sētane ʻi he ʻaho ní. (1 Sione 5:19) Tatau pē mo e kau Filisitia naʻa nau toki ʻauhamālie ʻi hono tuʻunga ko ha kakai, ʻoku pehē mo e māmani ko ʻení, hono ngaahi ʻelemēniti fakalotú, fakapolitikalé, mo e fakakomēsialé, ʻe vavé ni ʻa ʻenau hokosia ʻa e kakaha ʻo e fakaʻauha ʻa Sihová.​—Fakahā 18:21; 19:​19-21.

¹¹ Kae kehe, fakatatau ki he ngaahi lea ʻa Sākalaiá, ko e kau Filisitia ʻe niʻihi naʻa nau liliu honau lotó, pea naʻe tomuʻa fakatātaaʻi ʻe he meʻa ko ʻeni ʻa e faʻahinga anga-fakamāmani ʻi he ʻaho ní ʻe ʻikai te nau nofo maʻu ai pē ko e fili ʻo Sihova. Te nau tuku ʻa e tauhi ʻo e ngaahi tuʻunga ʻaitoli fakalotú mo hono ngaahi ouau palakuú mo e ngaahi feilaulau fakalieliá pea hoko ʻo fakamaʻa ʻi he ʻao ʻo Sihová. ʻI hotau ʻahó ni ko e “kau Filisitia” liliu peheé ʻoku nau ʻi he fuʻu kakai lahí.

12. ʻI onopooni, kuo anga-fēfē ʻa e hoko ʻa “Ekiloni” ʻo hangē ko e “haʻa Siepusi”?

¹² Fakatatau ki he kikité, ko e kolo Filisitia lahi ko ʻEkiloní ʻe hoko hangē ko e “haʻa Siepusi.” Ko e kau Siepusi ko e ngaahi fili foki kinautolu ʻi he taimi ʻe taha ʻo ʻIsileli. Naʻa nau maʻu ʻa Selusalema ʻo aʻu ki hono toki ikunaʻi ia ʻe Tēvitá. Ka neongo ia, ko e niʻihi ʻo kinautolu naʻa nau hao ʻi he ngaahi tau mo e kau ʻIsilelí ʻoku hā mahino naʻa nau hoko ko e kau ului. Naʻa nau ngāue ʻi he fonua ʻo ʻIsileli ʻi he tuʻunga ko e kau tamaioʻeiki pea naʻa nau maʻu ai ʻa e monū ʻo e ngāue ʻi hono langa ʻo e temipalé. (2 Sāmiuela 5:​4-9; 2 Kalonikali 8:​1-18) ʻI he ʻahó ni, ko e kau “Ekiloni” ʻoku nau tafoki ʻo lotu kia Sihová ʻoku nau toe maʻu foki ʻa e ngaahi monū ʻo e ngāue ʻi he “fonua” ʻi he malumalu ʻo e tauhi ʻa e tamaioʻeiki anga-tonu mo potó.

13. Ko e hā ʻa e ngaahi hingoa ʻeiki ʻi he kuonga muʻá?

¹³ ʻOku pehē ʻe Sākalaia ko e Filisitiá ʻe hoko ʻo hangē ha hingoa ʻeikí ʻi Siuta. Ko e foʻi lea faka-Hepelū ko e ʼal·luphʹ, ʻi hono liliu leá ko e “hingoa ʻeiki,” ʻoku ʻuhingá ko e “taki ʻo e toko afe” (pe, “siliaki”). Ko ha tuʻunga māʻolunga ʻaupito ia. ʻOku hā mahino ko e muʻaki puleʻanga ʻo ʻĪtomí naʻe ʻi ai ʻa e ngaahi hingoa ʻeiki ʻe 13 pē. (Sēnesi 36:​15-19) Ko e ongo foʻi lea “hingoa ʻeiki” ʻoku ʻikai ke faʻa ngāueʻaki ia ʻi he lea ʻo kau ki ʻIsileli, ka ko e kupuʻi lea “ʻulu (pe, ʻeiki) ʻo e ngaahi toko afe” ʻoku toutou ʻasi. ʻI hono fekau ʻe Mōsese ke haʻu ʻa e kau fakafofonga ʻo e puleʻanga ʻo ʻIsilelí, naʻá ne ui ki he ‘ngaahi ʻulu ʻo e ngaahi toko afe ʻo Isileli.’d Naʻe toko 12 ʻa e faʻahingá ni, ʻoku hā mahino naʻa nau fakaongoongo pē kia Mōsese. (Nōmipa 1:​4-16) ʻOku meimei tatau pē, ʻi he kautaha ʻo e kau taú, ko e ngaahi ʻeiki ʻo e laui afe naʻa nau hoko hake pē ki he senialé pe ko e tuʻí.​—2 Sāmiuela 18:​1, 2; 2 Kalonikali 25:5.

14. Kuo anga-fēfē he ʻahó ni ʻa e hoko ʻa e “Filisitia” ʻo hangē ha hingoa ʻeikí?

¹⁴ Naʻe ʻikai ke kikite ʻa Sākalaia ia ʻe hoko ʻa e Filisitia naʻe fakatomalá ko ha hingoa ʻeiki moʻoni ʻi ʻIsileli. ʻE ʻikai ke totonu ia, koeʻuhi he naʻe ʻikai ko ha ʻIsileli totonu ia. Ka te ne hoko ʻo hangē ha hingoa ʻeikí, ʻo maʻu ha tuʻunga ʻo e mafai ʻo ala fakatatau ki ha hingoa ʻeiki. Pea kuo fakamoʻoniʻi ko e meʻa ia kuo hokó. ʻI he holo hifo ʻa e tokolahi ʻo e toenga ʻo e kau Kalisitiane paní pea ko e tokolahi ʻo kinautolu ʻoku kei moʻui kuo fakangatangata kinautolu ia ko e taʻumotuʻa, ʻoku fai ʻe he fanga sipi kehe kuo ʻosi teuʻi leleí ʻa e tokoni ʻi hano fiemaʻu. ʻOku ʻikai te nau fie fetongi ʻa honau ngaahi tokoua pani. Ka ʻoku ʻoange ʻe he tamaioʻeiki anga-tonu mo potó kiate kinautolu ʻa e mafai ʻo hangē ko e fiemaʻu ʻi he “fonua” koeʻuhi ke hokohoko atu ke laka ki muʻa ʻa e kautaha ʻa e ʻOtuá ʻi ha founga maau. Ko ha founga fakalaka pehē ʻoku hā ia ʻi ha toe kikite ʻe taha.

Kau Taulaʻeiki mo e Kau Faama

15. (a) ʻI hono fakahoko ʻo e ʻAisea 61:​5, 6, “ko e kau taulaʻeiki ʻa Sihova” ko hai kinautolu, pea te nau ngāue ʻafē ʻi he tuʻunga ko ia ʻi ha ʻuhinga kakató? (e) Ko hai ʻa e “kau muli” ʻoku nau fai ʻa e ngāue fakangoue ʻo ʻIsilelí, pea​—ʻi hono ʻuhinga fakalaumālié​—ko e hā ʻoku kau ʻi he ngāue ko ʻení?

¹⁵ ʻOku lau ʻa e ʻAisea 61:​5, 6: “Pea ʻe tuʻu ʻa e kau muli ʻo fafanga hoʻomou ngaahi takanga, pea ko e hakoʻi kehe ʻe fakaʻuli hoʻomou palau, mo tauhi hoʻomou ngaahi ngoue vaine. Ka ʻe ui kimoutolu ko e kau taulaʻeiki ʻa Sihova: ʻe lau kimoutolu ko e kau tauhi ʻo hotau ʻOtua: te mou kai ʻa e koloa ʻo e ngaahi puleʻanga, pea ko e langilangi ʻonautolu te mou polepole ai.” ʻI he ʻaho ní, “ko e kau taulaʻeiki ʻa Sihova” ʻa ia ko e kau Kalisitiane paní ia. ʻI ha ʻuhinga fakaʻosi mo kakato, te nau ngāue ko e “kau taulaʻeiki ʻa Sihova . . . , kau tauhi ʻa hotau ʻOtua,” ʻi he Puleʻanga fakahēvaní. (Fakahā 4:​9-11) Ko hai ʻa e “kau muli” te nau fai ʻa e ngāue fakangoué? Ko e fanga sipi kehé ʻeni, ʻa ia ʻoku nau nofo ʻi he “fonua” ʻo e ʻIsileli ʻo e ʻOtua. Ko e hā ʻa e ngaahi ngāue tauhi-sipi, faama, mo e ngoue vaine kuo tuku kiate kinautolú? ʻI he ʻuhinga mahuʻinga fakalaumālié, ko e ngaahi fatongia ko ʻení kuo fekauʻaki ia mo e tokoni, tauhi mo fafangaʻi, pea tānaki mai ʻa e kakaí.​—ʻAisea 5:7; Mātiu 9:​37, 38; 1 Kolinitō 3:9; 1 Pita 5:2.

16. Ko hai ʻe faifai atu pē pea nau fai kotoa ʻa e ngāue ʻi he “fonua” ʻo e kakai ʻa e ʻOtuá?

¹⁶ ʻI he taimí ni, ko e tokosiʻi pē ʻo e kau ʻIsileli fakalaumālie ʻoku kei toe ʻi māmaní ʻo kau ki he ngāue fakalaumālie ʻo e tauhi-sipí, faamá, mo e ngoue vainé. ʻI he faifai pea fāʻūtaha kātoa ʻa e fakatahaʻanga paní mo Kalaisí, ko e ngāue kotoa ko ʻení ʻe tuku ia ki he fanga sipi kehé. Naʻa mo hono tauhi ʻe he tangata ʻa e “fonua” ʻe ʻi he nima ia ʻo e fanga sipi kehe alafuá, ʻa ia ʻoku fakahā ʻi he tohi ʻIsikeli ko e kalasi ʻeiki kinautolu.​—ʻIsikeli, vahe 45, 46.e

ʻOku Tolonga ʻa e “Fonua”

17. Ko e hā ʻa e teuteu kuo fai ʻe Sihova ʻi he lolotonga ʻo e ngaahi ʻaho fakaʻosí ni?

¹⁷ Ko ia, ʻoku fiemaʻu ki he fuʻu kakai lahi ke ʻoua ʻe ilifia! Kuo fai ʻe Sihova ha teuteu feʻunga ʻānoa kiate kinautolu. Ko e meʻa mahuʻinga lahi taha kuo hoko ʻi he māmani ʻi he lolotonga ʻo e ngaahi ʻaho fakaʻosi ní ko hono fakatahatahaʻi mo silaʻi ʻo e kau paní. (Fakahā 7:3) Kae kehe, ʻi he lolotongá ni ʻoku fakahoko ai ʻa e meʻá ni, kuo ʻomai ʻe Sihova ʻa e fanga sipi kehe ke feohi mo kinautolu ʻi ha fonua kuo fakafoʻou fakalaumālie. Kuo fafangaʻi fakalaumālie ai kinautolu mo akoʻi ʻi he moʻui ʻa e Kalisitiane. ʻIkai ko ia pē, kuo akoʻi lelei kinautolu ʻi he ngāue toputapu, kau ai mo e tauhi. ʻI he meʻá ni ʻoku nau houngaʻia lahi ʻaupito kia Sihova pea mo honau ngaahi tokoua pani.

18. Ko e ngaahi meʻa hā ʻe fakafou ai ʻa e nofo mateaki ai pē ʻa e fanga sipi kehé ʻi he “fonua” ʻo ʻIsileli fakalaumālié?

¹⁸ ʻI hono fai ʻe Koki ʻo Mekoki ʻa ʻene ʻohofi fakaʻosi ʻo e kakai ʻa e ʻOtuá, ʻe tuʻumaʻu ʻa e fanga sipí kehe mo e toenga ʻo e kau paní ʻi he “fonua tukuʻuta.” ʻE kei ʻi he “fonua” ko ia pē ʻa e fanga sipi kehe ʻi heʻenau hao atu ʻi he fakaʻauha ʻo e ngaahi puleʻangá mo hū atu ai ki he māmani foʻou ʻa e ʻOtua. (ʻIsikeli 38:11; 39:​12, 13; Tāniela 12:1; Fakahā 7:​9, 14) Hokohoko atu ʻi he anga-tonú, ʻe ʻikai ʻaupito fiemaʻu ke nau mavahe mei he feituʻu fakafiefia ko ia.​—ʻAisea 11:9.

19, 20. (a) ʻI he māmani foʻoú, ko e hā ʻa e tauhi fakaofo ʻe maʻu ʻe he kau nofo ʻi he “fonua”? (e) Ko e hā ʻoku tau fakatuʻamelie atu ki ai mo e fiefia lahi?

¹⁹ Naʻe puleʻi ʻa e ʻIsileli ʻo e kuonga muʻa ʻe he ngaahi tuʻi fakaetangata pea naʻe ʻi ai mo e kau taulaʻeiki faka-Līvai. ʻI he māmani foʻoú, ʻe lahi mo molumalu ʻa e tauhi ʻa e kau Kalisitiane. ʻI he malumalu ʻo Sihova ko e ʻOtuá, te nau fakaongo ki he Taulaʻeiki Lahi mo e Tuʻi ko Sīsū Kalaisí, pea ki he toko 144,000 ko e kaungātaulaʻeiki mo e ngaahi tuʻi​—ko e niʻihi ʻo kinautolu naʻa nau ʻilo ki muʻa ʻa honau ngaahi tokoua mo e tuofāfine Kalisitiane ʻi māmaní. (Fakahā 21:1) Ko e kau nofo anga-tonu ʻi he fonua fakalaumālié te nau nofo ʻi ha māmani kuo fakafoʻou ki ha palataisi moʻoni, fiefia ʻi he ngaahi tāpuaki fakamoʻui ʻoku fakafou hifo ʻi Selusalema Foʻou.​—ʻAisea 32:1; Fakahā 21:2; 22:​1, 2.

²⁰ ʻI he ngaʻunu atu ʻo ʻikai lava ke taʻofi ʻa e saliote fakahēvani fakaofo ʻa Sihová ke fakahoko ʻa ʻene ngaahi taumuʻá, ʻoku tau fakatuʻamelie atu kotoa pē ke fakahoko ʻa ʻetau konga kuo vaheʻi maí. (ʻIsikeli 1:​1-28) ʻI hono toki lavaʻi ʻa e ngaahi taumuʻa ko iá, fakakaukau atu ko ha fiefia ē ʻa e kātoangaʻi ʻo hono fakamāʻoniʻoniʻi ʻo Sihova ʻi heʻene ikuna! ʻE hivaʻi ʻe he fakatupu kotoa pē ʻa e ʻanitema māfimafi naʻe hiki ʻi he Fakahā 5:13: “Ko Ia ʻoku ʻafio ʻi he taloni pea mo e Lami, ke ʻonaua ʻa e fakafetaʻi, mo e fakaʻapaʻapa, mo e kololia, mo e aoniu, ʻo lauikuonga pea taʻengata”! Tatau ai pē pe te tau ʻi hēvani pe ʻi māmani, ʻikai ʻoku tau ʻunaloto ke tau ʻi ai, ʻo kau hotau leʻó ʻi he hiva mālie fakahīkihikiʻi ko ia?

[Fakamatala ʻi lalo]

Ko e Hā Haʻo Tali?

◻ Ko e “fonua” fē naʻe toe fakafoʻou ʻi he 1919, pea naʻe anga-fēfē ʻa hono nofoʻi ʻe he kakaí?

◻ Kuo anga-fēfē ʻa hono fakalahi ange ʻa e ngaahi fatongia ki he fanga sipi kehé ʻi he “fonua” ʻo e kakai kuo fakafoʻou ʻa e ʻOtuá?

◻ ʻI he founga fē ʻoku hangē ko e “haʻa Siepusi” ai ʻa e ngaahi mēmipa ʻo e fuʻu kakai lahi? “hange ha hingoa ʻeiki ʻi Siuta”?

◻ Ko e hā hono fuoloa ʻa e nofo maʻu ʻa e fanga sipi kehe anga-tonú ʻi he “fonua”?

[Fakatātā ʻi he peesi 20]

ʻOku ngāue fakataha ʻa e kau pani mo e fanga sipi kehé ʻi he fonua fakalaumālié