Ko Hono Kaunga Kiate Koe ʻa e Fakakehe ʻo Sīsū

Naʻe toki ʻalu hake ʻa e kau tangata ʻe toko fā ki ha moʻunga māʻolunga. Naʻe hoko ha meʻa fakaʻohovale ʻi he feituʻu māʻolunga ko iá. Naʻe ʻohovale ʻa e kau ākonga ʻe toko tolu ʻa Sīsū Kalaisí ʻi heʻenau vakai ki he liliu naʻe hoko kiate iá. Fanongo ki he fakamatala ʻa e tokotaha tohi Kosipeli ko Maʻaké ʻi heʻene fakamatalaʻi ʻa e meʻa fakatoʻoaloto ko ení:

“NAʻE ʻave ʻe Sīsū ʻa Pita, mo Semisi, mo Sione, ʻo ne ʻohake kinautolu ki ha moʻunga māʻolunga, fakaēkinautolu pē. Pea naʻe fakakehe hono anga ʻi honau ʻao; pea fetapatapaki mai hono ngaahi kofu, ʻo hinaekiaki faufau; ʻoku ʻikai ha taha fo tupenu ʻi māmani te ne mafai hono fakahinehina ke pehē. Pea naʻe ha kiate kinautolu ʻa Ilaisiā fakataha mo Mosese: pea naʻa nau ʻi ai ʻo talanoa mo Sīsū. Pea tali ʻe Pita ʻo ne pehē kia Sisū, Lapai, ʻoku sai ʻetau ʻi heni: pea mau ngaohi muʻa ha fakahekeheke ʻe tolu, ʻo taha moʻou, pea taha moʻo Mosese, pea taha moʻo ʻIlaisiā. He naʻe ʻikai te ne ʻilo ha meʻa te ne lau; he naʻa nau mate he manavahē. Pea hoko mai ha ʻao ʻo fakapūlou kinaua; pea ongo mai ha leʻo mei he ʻao ʻo pehe, Ko hoku Alo pele ʻena: mou fakaongo kiate ia. Pea fakafokifā naʻa nau sio holo, ʻo ʻikai te nau ʻilo ha taha, ka ko Sīsū pē toko taha naʻe ʻiate kinautolu.”​—Maʻake 9:1-8 [9:2-8, PM].

Fakakaukau ki ai! Naʻe malama ʻa e fōtunga ʻo Sīsuú ʻo hangē ko e laʻaá. (Mātiu 17:2) Naʻe fetapatapaki mai hono ngaahi kofú, “ʻo hinaekiaki faufau; ʻoku ʻikai ha taha fo tupenu ʻi māmani te ne mafai hono fakahinehina ke pehē.” Naʻe ʻi ai ʻa e ongo mai ʻa e leʻo mālohi ʻo e ʻOtuá tonu ʻo ne fai ha fakahāhā ʻo fekauʻaki mo hono ʻAló. Ko ha meʻa mātuʻaki fakaofo ē!

Ko e foʻi lea faka-Kalisi ʻoku liliu heni ko e “fakakehe” ʻoku ʻuhinga ia ko e “liliu ki ha toe anga.” ʻOku toe hā ia ʻia Loma 12:​2, ʻa ia ʻoku akonakiʻi ai ʻa e kau Kalisitiané ke “fai ai pe homou liliu” ʻaki hono fakafoʻou honau ʻatamaí.​—An Expository Dictionary of New Testament Words, naʻe fai ʻe W. E. Vine, Voliume IV, peesi 148.

ʻIo, naʻe hoko ha meʻa mātuʻaki fakaofo ʻi hono fakakehe ʻo Sīsū ʻi he hili ʻa hono kātoangaʻi ʻa e Lakaatú ʻi he 32 T.S. Ko e hā ʻa e ngaahi meʻa naʻe hoko ki muʻa ʻi he mana ko ení? Naʻe ʻi ai hano taumuʻa makehe? Ko e hā naʻe kau ai ki ai ʻa ʻIlaisiā mo Mōsesé? Pea ko e hā ʻa e kaunga kiate koe ʻa e fakakehe ʻa Kalaisí?

Ngaahi Meʻa Ki Muʻa Ai

Ki muʻa ʻi he ʻalu hake ʻa Sīsū ki he moʻungá, ko ia mo ʻene kau ākongá naʻa nau ʻi he feituʻu ko Sesalia Filipai. Ko e kolo ko iá naʻe kilomita nai ʻe 25 ki he tonga hihifo ʻo Moʻunga Heamoné, ko ia ai, naʻe hoko nai ʻa e fakakehé ʻi he Moʻunga ko iá.

Lolotonga ʻa e fononga ki he “moʻunga māʻolunga” ko ení, naʻe ʻeke ʻe Sīsū ki heʻene kau ākongá: “Ko hai au ʻi he lau ʻa e kakai?” Naʻa nau tali ʻo pehē: “Ko Sione Papitaiso: pea ko e lau ʻa e niʻihi, Ko Ilaisiā; ka ko e niʻihi, Ko e toko taha ʻi he kau pālofita.” Naʻe toki ʻeke ʻe Kalaisi: “Ka ko hai au ʻi he lau ʻamoutolu?” Naʻe tali ʻe Pita: “Ko e Misaia koe.” ʻI he meʻa ko ení, naʻe hanga ai ʻe Sīsū ʻo “ne lolomi kinautolu ke ʻoua te nau lea ki ha taha ʻi he meʻa ko ia. Pea naʻa ne kamata hinoiʻi kinautolu, ʻa e pau ki he Fanautama ʻa tangata ke lahi hono fakamamahiʻi; pea ke fakataleʻi ia ʻe he kau matuʻa, mo e houʻeiki taulaʻeiki, mo e kau sikalaipe; pea ke tamateʻi; pea hili ʻa e ʻaho ʻe tolu ke ne toetuʻu.”​—Maʻake 8:27-31.

Naʻe hoko atu ʻe Sīsū ke ne fai ʻa e talaʻofa ko ʻení: “ʻOku ai ha niʻihi ʻoku tutuʻu heni, ʻa ia ʻe ʻikai te nau momoʻi lave ki he mate, kaeʻoua ke nau mamata ki he puleʻanga ʻo e ʻOtua kuo hoko mai mo e haʻahaʻa.” (Maʻake 8:39 [9:1, PM]; Mātiu 16:28) Naʻe fakahoko ʻa e talaʻofa ko ení “hili ʻa e ʻaho ʻe ono,” ʻi he lolotonga ʻa e lotu ʻa Sīsū pea naʻe fakakehe ia ʻi he vakai ki ai ʻa Pita, Sēmisi mo Sioné. Naʻe pehē ʻe Luke naʻe hoko ia “feʻunga nai mo hono valu ʻo e ʻaho hili” ia, ʻo hā ngalingali koeʻuhi naʻá ne fakakau ki ai ʻa e ʻaho naʻe fai ai ʻa e talaʻofá pea mo e ʻaho naʻe fakahoko ai iá.​—Mātiu 17:1, 2; Maʻake 9:1 [9:2, PM]; Luke 9:28.

ʻIkai ko ha Misi pe Muna

Naʻe ʻikai ko ha misi ʻa e fakakehe ʻa Sīsuú. Naʻe ʻikai ke mei maʻu ʻe he kau ʻapositolo ʻe toko tolú ʻa e misi tatau, pea naʻe ui ia ʻe Sīsū ko ha “vīsone.” ʻOku ʻikai ke fakahuʻuhuʻu eni ia ko ha muna pē, he ko e foʻi lea faka-Kalisi ʻoku ngāueʻaki ʻia Mātiu 17:9, NW, ʻoku toe liliu ia ko e “meʻa naʻe ha.” (Ngāue 7:31) Ko ia naʻe ʻāʻā fakaʻaufuli ʻa e kau mamatá ni, pea naʻa nau sio mo fanongo moʻoni ʻaki honau matá mo e telingá ki he meʻa naʻe hokó.​—Luke 9:32.

Naʻe ʻāʻā fakaʻaufuli ʻa Pita ka naʻe ʻikai te ne ʻilo ʻa e meʻa ke leaʻakí, ko ia naʻá ne fokotuʻu atu ai ke fokotuʻutuʻu ʻa e ngaahi tēniti ʻe tolu​—ha taha moʻo Sīsū, pea taki taha ʻa Mōsese mo ʻIlaisiā. (Luke 9:33) Ko e konga ʻao naʻe hoko mai ʻi he lolotonga ʻa e lea ʻa Pitá naʻá ne fakahā mai ʻa e ʻi ai ʻa e ʻOtuá ʻi he moʻungá, ʻo tatau tofu pē mo hono fakahā ʻa e ʻi ai ʻa e ʻOtuá ʻi he teniti feʻiloakiʻanga ʻo ʻIsilelí ʻi he toafá. (ʻEkisoto 40:34-38; Luke 9:34) Pea ʻoku pau naʻe ʻikai ke mohe ʻa e kau ʻapositoló ʻi he folofola ange ʻa e “ʻOtua ko e Tamai” ʻo ne pehē: “Ko hoku ʻAlo ʻena kuo u fili; mou fakaongo kiate ia.”​—2 Pita 1:17, 18; Luke 9:35.

ʻUhinga Naʻe Hā Ai ʻa Mōsese

ʻI he hoko ʻa e fakakehé, ko Mōsese naʻe “ʻikai te [ne] ʻilo ha momoʻi meʻa,” he naʻe mate ia ʻi he ngaahi senituli lahi ki muʻa atu. (Koheleti 9:5, 10) Hangē ko Tēvita, naʻe ʻikai ke fokotuʻu ia mei he maté, pea ko ia ai, naʻe ʻikai te ne ʻi ai. (Ngāue 2:29-31) Ka ko e hā naʻe hā ai ʻa Mōsese fakataha mo Sīsū ʻi he vīsone ko ení?

Naʻe folofola ʻa e ʻOtuá kia Mōsese: “Te u fokotuʻu maʻanautolu ha palofita mei he lotolotonga ʻo honau kainga hange ko koe, pea te u ʻai ʻeku lea ki hono ngutu, pea te ne leaʻaki kiate kinautolu ʻa e meʻa kotoa te u fekau kiate ia.” (Teutalōnome 18:18) Naʻe fakahā tonu ʻe Pita ʻa e kaunga ʻo e kikite ko ení kia Sīsū Kalaisí. (Ngāue 3:20-23) Tukukehe meia Sīsū, ko Mōsese ko e palōfita lahi taha ia naʻe fekau ʻe he ʻOtuá ki he puleʻanga ʻo ʻIsilelí.

ʻOku ʻi ai ʻa e ngaahi faitatau ʻia Mōsese pea mo Mōsese Lahi Ange, ko Sīsū Kalaisí. Hangē ko ʻení, ʻi heʻena kei taʻu siʻí, naʻe ʻai ʻe he kau pule fakaaoaó ʻa ʻena moʻuí ki ha tuʻunga fakatuʻutāmaki, ka naʻe ʻai ʻe he ʻOtuá ke fakahaofi ʻa e ongo kiʻi pēpeé. (ʻEkisoto 1:20–2:10; Mātiu 2:7-23) Naʻe fakatou ʻaukai ʻa e ongo tangata ko ení he ʻaho ʻe 40 ʻi he kamata ʻo ʻena ngāue ko e ongo sevāniti makehe ʻa Sihová. (ʻEkisoto 24:18; 34:28; Teutalōnome 9:18, 25; Mātiu 4:1, 2) Pea ko Mōsese mo Sīsū naʻá na fakatou fai ʻa e ngaahi mana ʻi he mālohi ʻo e ʻOtuá.​—ʻEkisoto 14:21-31; 16:11-36; Sāme 78:12-54; Maʻake 4:41; Luke 7:18-23; Sione 14:11.

Naʻe ngāueʻaki ʻe he ʻOtuá ʻa Mōsese ke ne fakatauʻatāinaʻi ʻa ʻIsileli mei he nofo pōpula ʻi ʻIsipité, ʻo hangē tofu pē ko e fakahoko ʻe Sīsū ʻa e tauʻatāina fakalaumālie. (ʻEkisoto 12:37–14:31; Sione 8:31, 32) Naʻe monūʻia ʻa Mōsese ke ne hoko ko e fakalaloa ʻo e fuakava ʻo e Laó ʻi he vahaʻa ʻo e ʻOtuá mo e kau ʻIsilelí, ka ko Sīsū ko e Fakalaloa ʻo e fuakava foʻoú. (ʻEkisoto 19:3-9; 34:3-7; Selemaia 31:31-34; Luke 22:20; Hepelū 8:3-6; 9:15) Naʻe toe ngāueʻaki ʻe Sihova ʻa Mōsese ke ʻai ke ʻiloa Hono huafá ʻi he lotolotonga ʻo e kau ʻIsilelí, kau ʻIsipité pea mo e niʻihi kehe, ʻo hangē tofu pē ko ia kuo fakalāngilangiʻi ʻe Sīsū Kalaisi ʻa e huafa toputapu ʻo Sihová. (ʻEkisoto 9:13-17; 1 Sāmiuela 6:6; Sione 12:28-30; 17:5, 6, 25, 26) ʻI hono ʻai ke hā ʻa Mōsese fakataha mo Sīsū kuo fakakeheʻí, naʻe fakahāhā ai ʻe he ʻOtuá ʻe ngāue ʻa Kalaisi ʻi he ngaahi lakanga ko ení ka ki he tuʻunga mātuʻaki lahi ange.

ʻUhinga Naʻe Hā Ai ʻa ʻIlaisiā

Neongo naʻe teʻeki ai ke fokotuʻu mei he maté ʻa e palōfita mate ko ʻIlaisiaá, naʻe feʻungamālie ke ne hā ʻi he vīsone ʻo e fakakehé. Naʻe fai ʻe ʻIlaisiā ha ngāue lahi ʻi hono toe fokotuʻu ʻa e lotu maʻá pea mo hono fakatapuhaaʻi ʻa e huafa ʻo Sihová ʻi he lotolotonga ʻo e kau ʻIsilelí. Naʻe fai ʻe Sīsū ʻa e meʻa tatau pē ʻi heʻene ʻi māmaní pea te ne fai ʻo toe lahi ange ke toe fokotuʻu ʻa e lotu maʻá mo fakatapuhaaʻi ʻa ʻene Tamai fakahēvaní ʻo fakafou ʻi he Puleʻanga faka-Mīsaiá.

Naʻe fakahā ʻe he palōfita ko Malakaí naʻe tuʻu fakaefakatātā ʻa e ngāue ʻa ʻIlaisiaá ki ha ngāue ʻi he kahaʻú. Naʻe folofola ʻa e ʻOtuá ʻo fakafou ʻia Malakai ʻo pehē: “Ko au eni ʻoku ou te u fekau atu ʻa e palofita ko Ilaisia ʻi he teʻeki ke hoko ʻa e ʻaho ʻo Sihova, ʻa e ʻaho lahi mo fakalilifu. Pea te ne fakafoki mai ʻa e loto ʻo e matuʻa ki he fanau, mo e loto ʻo e fanau ki heʻenau matuʻa; naʻa ʻiloange te u haʻu, ʻo taaʻi ʻa e fonua ʻaki ʻa e mala.”​—Malakai 4:5, 6.

Naʻe hoko ʻa e fakahoko siʻisiʻi ange ʻo e kikité ni ʻi he ngāue ʻa Sione Papitaisó. Naʻe fakahā ʻeni ʻe Sīsū ʻi he hili ʻa e fakakehé, ʻi hono ʻeke ʻe heʻene kau ākongá pe ko e hā naʻe pehē ai ʻe he kau sikalaipé kuo pau ke fuofua haʻu ʻa ʻIlaisiā​—ki muʻa ʻi he hā mai ʻa e Mīsaiá. Naʻe pehē ʻe Sīsū: “Moʻoni pe ʻa e pehe, ʻOku haʻu ʻa Ilaisia, pea te ne toe fokotuʻu ʻa e ngāhi meʻa. Ka ʻoku ou tala atu, kuo haʻu ʻa ʻIlaisia, pea naʻe ʻikai te nau ʻilo ko ia, ka naʻa nau fai hoʻonautolu loto kiate ia. Pehe foki ʻa e Fanautama ʻa tangata, ʻoku nānāfaki hono fakamamahiʻi ʻiate kinautolu.” ʻOku tānaki atu ʻe he fakamatalá: “Toki eʻa ki he kau ako, ta ko Sione Papitaiso ʻoku kau ki ai ʻene lea.”​—Mātiu 17:10-13.

Naʻe fai ʻe Sione ha ngāue hangē ko ʻIlaisiā ʻi heʻene papitaiso ʻa e kau Siu ʻa ia naʻa nau fakatomala mei heʻenau ngaahi angahala naʻe fai ʻo maumauʻi ai ʻa e fuakava ʻo e Laó. Ka ko e meʻa mahuʻinga angé, ko Sioné ko e fakamelomelo ia ʻo e Mīsaiá pea naʻá ne fakahā ʻa Sīsū Kalaisi. (Mātiu 11:11-15; Luke 1:11-17; Sione 1:29) Ka ko e hā naʻe hoko ai ʻa e ngāue ʻa Sioné ko e fakahoko siʻisiʻi ange pē ia ʻo e kikite ʻa Malakaí?

ʻI he vīsone ko ení, naʻe hā ai ʻa ʻIlaisiā ʻo ne lea kia Sīsū. Naʻe hoko eni hili ʻa e mate ʻa Sione Papitaisó, ʻo ne fakahuʻuhuʻu ai ʻe fai ʻi he kahaʻú ha ngāue ʻo hangē ko ia naʻe fai ʻe ʻIlaisiaá. ʻIkai ko ia pē, ka naʻe fakahā ʻe he kikité ʻe fai ʻa e ngāue ko ení ki muʻa ke hoko “ʻa e ʻaho ʻo Sihova, ʻa e ʻaho lahi mo fakalilifu.” Ko e meʻa ko eni ʻoku vave ʻaupito ʻa ʻene tuʻunuku maí ʻoku kau ki ai ʻa e “tau ʻo e ʻaho lahi ʻo e ʻOtua Aoniu” ʻi Hamaketone, pe ʻĀmaketone. (Fakahā 16:14-16) ʻI he taimi naʻe hoko ai ʻa e vīsone ko iá naʻe ʻuhinga ení ki muʻa ke fokotuʻu ʻa e Puleʻanga fakahēvani ʻo e ʻOtuá ʻe hoko ha ngāue ʻo tatau tofu pē mo ia naʻe fai ʻe ʻIlaisiā mo hono fetongi ko ʻIlaisá. Kuo lahi ange ʻi ha senituli ʻa hono fai ʻe he Kau Fakamoʻoni ʻi onopooni ʻa Sihová ʻa e ngāue ʻoku fekauʻaki mo hono toe fokotuʻu ʻa e lotu maʻá mo hono hakeakiʻi ʻa e huafa ʻo e ʻOtuá.​—Sāme 145:9-13; Mātiu 24:14.

Ko Hono Taumuʻá

ʻOku pau naʻe fakatupu mālohi ʻa e fakakehé kia Sīsū ke ne fehangahahangai mo e ngaahi mamahi mo e mate ʻe hoko kiate iá. ʻI heʻene fanongo ki hono folofolaʻaki ʻe heʻene Tamai fakahēvaní ʻo pehē ko Hono ʻAlo fakatupuhōifua iá ʻoku pau naʻe ʻai ʻe he meʻá ni ke mālohi ʻa e tui ʻa Sīsū. Ka ko e hā ʻa e meʻa naʻe fakahoko ʻe he fakakehé ki he niʻihi kehé?

Naʻe toe fakatupu mālohi ʻe he fakakehe ʻa Sīsuú ʻa e tui ʻa e kau mamatá. Naʻá ne fakamamafaʻi ki honau ʻatamaí ko e ʻAlo ʻo e Otuá ʻa Sīsū Kalaisi. Ko hono moʻoní, koeʻuhi naʻe ʻi honau lotolotongá ʻa e Tangata-lea Pule ʻa Sihová, ko Folofola, naʻa nau fanongo ai ki he leʻo tonu ʻo e ʻOtuá heʻene fakahā: “Ko hoku ʻAlo pele ʻena, ʻa ia kuo u hōifua ai.” Neongo naʻe folofola pehē ʻa Sihova ʻi hono papitaiso ʻa Sīsuú, ka lolotonga ʻa e fakakehé naʻe tānaki atu ki ai ʻe he ʻOtuá ʻo pehē ʻoku totonu ki he kau ākongá ke nau fakaongo ki Hono ʻAló.​—Mātiu 3:13-17; 17:5; Sione 1:1-3, 14.

Ko e fakakehé naʻá ne toe fakatupu mālohi ki he tuí ʻi ha toe founga ʻe taha. Lolotonga ʻa e vīsoné, ko Sīsū mo “Mosese” mo “Ilaisiā” naʻa nau lea ʻo kau ki he “ekisoto ʻoku . . . fakatetuʻa [ʻa Kalaisi] ke lava ʻi Selusalema.” (Luke 9:31) Ko e foʻi lea “ekisoto” ʻoku liliu ia mei he tuʻunga ʻe taha ʻo e foʻi lea faka-Kalisi ko e eʹxo·dos. Ko e ʻekisotó, pe mavahe ko ení, ʻoku hā mahino naʻe kau fakatouʻosi ki ai ʻa e pekia ʻa Sīsuú pea mo hono fokotuʻu ia ʻe he ʻOtuá mei he maté ki he moʻui fakalaumālié. (1 Peter 3:18) Ko ia ko e fakakehé naʻá ne ʻai ke mālohi ange ʻa e tui ki he fokotuʻu ʻo Sīsū mei he maté. Naʻe fakatautefito ʻa hono langaʻi ʻa e tuí ʻaki ʻene tokonaki mai ʻa e fakamoʻoni fakatupu tuipau ʻe hoko ʻa Sīsū ko e Tuʻi ʻo e Puleʻanga Faka-Mīsaia ʻo e ʻOtuá. ʻIkai ngata ai, naʻe fakahā ʻe he visoné ʻe lāngilangiʻia ʻa e Puleʻangá.

Naʻe toe fakatupu mālohi ʻe he fakakehé ʻa e tui ki he ngaahi kikite faka-Tohitapú. ʻI he taʻu ʻe 32 nai ki mui mai (fakafuofua ki he 64 T.S.), naʻe kei manatuʻi ʻe Pita ʻa e fakakehé peá ne tohi: “He talaʻehai ko ʻemau fai ki ha ngaahi fananga ne faʻu ke fakahinga ʻa e kakai, ʻa ʻemau ongoongoa atu ʻa e māfimafi ʻa hotau ʻEiki ko Sisu Kalaisi, mo ʻene toe hoko mai; ka ko e kau sio tonu kimautolu ki hono langilangi. He naʻa ne maʻu mei he ʻOtua ko e Tamai ʻa e fakaʻapaʻapa mo e fakalangilangiʻi, he ʻomai kiate ia ʻa e leʻo ko ia naʻe pehe fau ʻe he sikaina nāunauʻia, ʻo pehē, Ko hoku ʻAlo pele ʻena, ʻa ia kuo toka ki ai ʻeku hōifua. Pea ko e leʻo ko ia naʻa mau fanongo ki ai ʻi hono ʻomeia mei langi, ʻi heʻemau ʻiate ia ʻi he moʻunga tapu. Kaeʻumaʻā ʻoku tau maʻu ʻa e folofola palofisai, ʻa ia ko e meʻa ʻoku pau ange; pea ʻoku mālō hoʻomou fakatokanga ki ai, he ʻoku hange ko ha maama ʻoku ulo ʻi ha potu maomaonganoa, kaeʻoua ke mafoa ʻa e ata, pea hopo ʻa e fetuʻuʻaho ʻi homou loto.”​—2 Pita 1:16-19.

Ko Hono ʻUhingá Kiate Koe

ʻIo, ko e fakakehe ʻa Sīsuú naʻe hoko ia ko e fakapapauʻi mālohi kia Pita ʻa e folofola palofisai ʻa e ʻOtuá. Naʻe toe lave nai ʻa e ʻapositolo ko Sioné ki he vīsone ko ení ʻi heʻene pehē: “Pea naʻe hoko ʻa Folofola ko e kakano; ʻo ne fokotuʻu hono tapanekale ʻi hotau lotolotonga, pea naʻa tau mamata ki hono sikaina (ko ha langilangi naʻe taau mo ha ʻalo-tofu-pe-taha kuo haʻu mei heʻene tamai,)​—ta ʻoku ne fonu ʻi he kelesi mo e moʻoni.” (Sione 1:14) ʻI he founga meimei tatau pē, ʻoku malava ʻe he fakakehé ke ne langaʻi ʻa hoʻo tui ki he folofola palofisai ʻa Sihová.

Ko e fakakehé mo e ngaahi meʻa naʻe fekauʻaki mo iá ʻoku malava ke nau ʻai ke mālohi ange ʻa hoʻo tui ko Sīsū Kalaisi ko e ʻAlo ʻo e ʻOtuá pea mo e Mīsaia ia naʻe talaʻofá. ʻOku malava ke ne ʻai ke mālohi ange ʻa hoʻo tui ki he fokotuʻu ʻa Sīsū mei he maté ki he moʻui fakalaumālie ʻi hēvani. ʻOku toe totonu foki ke ʻai ʻe he vīsone fakaofo ko ení ke lahi ange ʻa hoʻo tui ki he founga-pule ʻa e ʻOtuá, he ko e fakakehé ko e tōmuʻa vakai ia ki he nāunau mo e mafai faka-Puleʻanga ʻo Kalaisí.

ʻOku fakatefito ʻa hono ʻai ke mālohi ange ʻetau tuí ʻi hono ʻilo naʻe tuhu ʻa e fakakehe ʻa Kalaisí ki hotau taimí, ʻa ia ʻoku hoko ko e meʻa moʻoni ʻa e ʻi ai ʻa Sīsuú. (Mātiu 24:3-14) Kuó ne pule ʻi hēvani ko e Tuʻi kuo fakanofo ʻe he ʻOtuá talu mei he 1914. ʻE vave ʻa ʻene ngāueʻaki ʻa hono mafai mo e mālohi kuo foaki ʻe he ʻOtuá ki he kau fili ʻo e pule fakaʻotuá, ʻo ne fakaʻatā ai ʻa e hala ki he māmani foʻoú. (2 Pita 3:13) ʻE lava ke ke ʻinasi ʻi hono ngaahi tāpuaki taʻengatá ʻo kapau te ke tui ki he ngaahi meʻa fakaofo naʻe fakahā ʻi he fakakehe ʻo Sīsū Kalaisí.