ʻUhinga Naʻe Hoko Ai ʻa Sīsū ko ha Faiako Lahí

LAKA hake ʻi he taʻu ʻe ua afe kuo maliu atú, naʻe fāʻeleʻi ai ha kiʻi tama makehe ʻaupito ʻa ia naʻe tupu hake ʻo hoko ko e moʻungaʻi tangata lahi taha kuo moʻui maí. Naʻe ʻikai ha taha ʻe moʻui ʻi he taimi fuoloa ko iá naʻe ʻi ai haʻane vakapuna pe meʻalele. Naʻe ʻikai ke ʻi ai ha ngaahi meʻa ʻo hangē ko e televīsoné, komipiutá pea mo e ʻInitanetí.

Ko e kiʻi tamá naʻe ʻoange kiate ia ʻa e hingoa ko e Sīsū. Naʻá ne hoko ko e tangata poto taha kuo faifai pea ʻaʻeva ʻi he māmaní. Naʻe toe hoko foki ʻa Sīsū ko e faiako lelei tahá. Naʻá ne fakamatalaʻi ʻa e ngaahi meʻa naʻe faingataʻá ʻi he ngaahi founga naʻe ʻai ai ʻa e meʻa ko iá ke faingofua ʻa hono mahinoʻí.

Naʻe akoʻi ʻe Sīsū ʻa e kakaí ʻi he feituʻu kotoa pē naʻá ne fetaulaki ai mo kinautolú. Naʻá ne akoʻi kinautolu ʻi he matātahí pea ʻi he ngaahi vaká. Naʻá ne akoʻi kinautolu ʻi honau ngaahi ʻapí pea ʻi he fefonongaʻakí. Naʻe ʻikai ke ʻi ai ha kā ʻa Sīsū, pea naʻe ʻikai te ne fononga ʻi ha pasi pe lēlue. Naʻe lue ʻa Sīsū mei he feituʻu ki he feituʻu ʻo akoʻi ai ʻa e kakaí.

ʻOkú ta ako ʻa e ngaahi meʻa lahi mei he kakai kehé. Ka ʻe lava ke ta ako ʻa e ngaahi meʻa mātuʻaki mahuʻinga tahá mei he Faiako Lahi ko Sīsuú. ʻOku maʻu ʻa e ngaahi lea ʻa Sīsuú ʻi he Tohitapú. ʻI heʻeta fanongo ki he ngaahi lea ko iá mei he Tohitapú, ʻoku hangē ia ne lea mai ʻa Sīsū kia kitauá.

Ko e hā naʻe hoko ai ʻa Sīsū ko ha Faiako Lahí? Ko e ʻuhinga ʻe taha, he ko Sīsuú tonu naʻe akoʻi. Pea naʻá ne ʻiloʻi ʻa e mātuʻaki mahuʻinga ko ia ke fanongó. Ka ko hai naʻe fanongo ki ai ʻa Sīsuú? Ko hai naʻá ne akoʻi iá?— Ko ʻene Tamaí. Pea ko e Tamai ʻa Sīsuú ko e ʻOtuá.

Ki muʻa ke hoko mai ki he māmaní ko ha tangatá, naʻe nofo ʻa Sīsū ʻi hēvani mo e ʻOtuá. Ko ia, naʻe kehe ʻa Sīsū mei he kau tangata kehé koeʻuhi naʻe ʻikai toe ʻi ai ha tangata kehe naʻe nofo ʻi hēvani ki muʻa ke fāʻeleʻi mai ki he māmaní. ʻI hēvani, naʻe hoko ai ʻa Sīsū ko ha ʻAlo lelei, ko ha tokotaha naʻe fakaongo ki heʻene Tamaí. Ko ia naʻe malava ai ʻe Sīsū ke akoʻi ki he kakaí ʻa e meʻa naʻá ne ako mei he ʻOtuá. ʻI hoʻo fanongo ki hoʻo tamaí mo hoʻo faʻeé, ʻe malava ai ke ke faʻifaʻitaki kia Sīsū.

Ko e toe ʻuhinga ʻe taha naʻe hoko ai ʻa Sīsū ko ha Faiako Lahí he naʻá ne ʻofa ʻi he kakaí. Naʻá ne loto ke tokoniʻi ʻa e kakaí ke nau ako ʻo fekauʻaki mo e ʻOtuá. Naʻe ʻofa ʻa Sīsū ʻi he kakai lalahí, ka naʻá ne toe ʻofa foki ʻi he fānaú. Pea naʻe saiʻia ʻa e fānaú ke ʻia Sīsū koeʻuhí he naʻá ne talanoa kia kinautolu mo fanongo kia kinautolu.

ʻI he ʻaho ʻe taha, naʻe ʻomai ai ʻe he ngaahi mātuʻa ʻe niʻihi ʻenau fānau īkí kia Sīsū. Ka naʻe fakakaukau ʻa hono ngaahi kaumeʻá ʻona ia ʻoku fuʻu femoʻuekina ʻa e Faiako Lahí ke talanoa mo e fānau īkí. Ko ia, naʻa nau fekauʻi kinautolu ke nau ō. Ka ko e hā naʻe leaʻaki ʻe Sīsuú?— Naʻe pehē ʻe Sīsū: ‘Tuku pē ʻa e tamaikí ke nau haʻu kiate au; ʻoua ʻe taʻofi kinautolu.’ ʻIo, naʻe fiemaʻu ʻe Sīsū ʻa e fānau īkí ke nau ʻalu ange kiate ia. Ko ia, neongo ko ha tangata poto lahi mo mātuʻaki mahuʻinga ia, naʻe vaheʻi ʻe Sīsū ha taimi ke akoʻi ai ʻa e fānau īkí.—Maake 10:​13, 14.

ʻOkú ke ʻilo ʻa e ʻuhinga naʻe akoʻi ai ʻe Sīsū ʻa e fānaú mo fanongo kia kinautolú? Ko e ʻuhinga ʻe tahá, he naʻá ne loto ke ʻai kinautolu ke nau fiefia ʻaki hono fakahā kia kinautolu ʻa e ngaahi meʻa fekauʻaki mo e ʻOtuá, ʻa ʻene Tamai fakahēvaní. ʻE lava fēfē ke ke ʻai ke fiefia ʻa e kakaí?— ʻAki hono fakahā kia kinautolu ʻa e ngaahi meʻa kuó ke ako ʻo fekauʻaki mo e ʻOtuá.

ʻI he taimi ʻe taha, naʻe ngāueʻaki ai ʻe Sīsū ha kiʻi tama ke akoʻi ki Hono ngaahi kaumeʻá ha lēsoni mahuʻinga. Naʻá ne ʻomi ʻa e kiʻi tamá ʻo fokotuʻu ia ʻi he lotolotonga ʻo ʻEne kau ākongá, ʻa ia ko Hono kau muimuí. Pea naʻe pehē ai ʻe Sīsū kuo pau ke liliu ʻe he kau tangata lalahi ko ení ʻa ʻenau ngaahi foungá pea hoko ʻo hangē ko e kiʻi tama ko ení.

Ko e hā naʻe ʻuhinga ki ai ʻa Sīsū ʻi heʻene leaʻaki iá? ʻOkú ke ʻilo ʻa e founga ʻoku totonu ke hoko ai ha tangata lahi, pe naʻa mo ha kiʻi tama lahilahi hake, ko ha kiʻi tama kei siʻí?— Sai, ko ha kiʻi tama kei siʻi ʻoku ʻikai tatau ʻene ʻiló ʻaʻana ia mo ha tokotaha lahi pea ʻoku loto-lelei ia ke ako. Ko ia, naʻe pehē ʻe Sīsuú ko ʻene kau ākongá naʻe fiemaʻu ke nau anga-fakatōkilalo, ʻo hangē ko e fānau īkí. ʻIo, ʻe malava ke tau ako kotoa ʻa e ngaahi meʻa lahi mei he kakai kehé. Pea ʻoku totonu ke tau ʻiloʻi kotoa ko e ngaahi akonaki ʻa Sīsuú ʻoku mahuʻinga ange ia ʻi heʻetau ngaahi fakakaukau ʻatautolú.—Mātiu 18:​1-5.

Ko e toe ʻuhinga ʻe taha naʻe hoko ai ʻa Sīsū ko ha Faiako Lahí he naʻá ne ʻilo ʻa e founga ke ʻai ai ʻa e ngaahi meʻá ke fakamānako ki he kakaí. Naʻá ne fakamatalaʻi ʻa e ngaahi meʻá ʻi ha founga faingofua mo mahino. Naʻá ne lea ʻo fekauʻaki mo e fanga manupuná mo e matalaʻiʻakaú pea mo e ngaahi meʻa anga-maheni kehé ke tokoniʻi ʻaki ʻa e kakaí ke nau maʻu ʻa e mahino ʻo fekauʻaki mo e ʻOtuá.

ʻI ha ʻaho ʻe taha ʻa ia naʻe ʻi he tafaʻaki moʻungá ai ʻa Sīsū, naʻe haʻu kiate ia ha fuʻu kakai tokolahi. Naʻe tangutu hifo ʻa Sīsū ʻo ne fai ha lea, pe malanga kia kinautolu, ʻo hangē ko ia ʻoku lava ke ke sio ki ai ʻi hení. Ko e lea ko ení ʻoku ui ia ko e Malanga he Moʻungá. Naʻá ne pehē: ‘Vakai ki he fanga manupuna ʻi he ʻataá. ʻOku ʻikai te nau tō ha tenga. ʻOku ʻikai te nau faʻoaki meʻakai ʻi ha ngaahi fale. Ka ko e ʻOtua ʻi he langí ʻokú ne fafanga kinautolu. ʻIkai ʻoku mou mahuʻinga ange ʻia kinautolu?’

Naʻe toe pehē foki ʻe Sīsū: ‘Mou ako mei he ngaahi lile ʻo e ngoué. ʻOku nau tupu ʻo ʻikai ha ngāue. Pea vakai atu ki honau fakaʻofoʻofá! Naʻa mo Tuʻi Solomone koloaʻia naʻe ʻikai fakaʻofoʻofa ange hono teungá ʻi he ngaahi lile ʻo e ngoué. Ko ia, kapau ʻoku tokangaʻi ʻe he ʻOtuá ʻa e ngaahi matalaʻiʻakau ʻoku tupú, ʻikai te ne tokangaʻi foki mo kimoutolu?’—Mātiu 6:​25-33.

ʻOkú ke mahinoʻi ʻa e lēsoni naʻe akoʻi ʻe Sīsuú?— Naʻe ʻikai te ne fiemaʻu ke ta hohaʻa pe te ta maʻu mei fē ha meʻakai ke kai pe ko ha vala ke tui. ʻOku ʻafioʻi ʻe he ʻOtuá ʻokú ta fiemaʻu ʻa e ngaahi meʻa kotoa ko iá. Naʻe ʻikai ke pehē ʻe Sīsū ia ke ʻoua te ta ngāue ke maʻu ha meʻakai mo ha vala. Ka naʻá ne pehē ʻoku totonu ke ta fakamuʻomuʻa ʻa e ʻOtuá. Kapau te ta fai ia, ʻe fakapapauʻi ʻe he ʻOtuá ʻokú ta maʻu ʻa e meʻakai ke kai mo e vala ke tui. ʻOkú ke tui ki he meʻa ko iá?—

ʻI he ʻosi ʻa e lea ʻa Sīsuú, naʻe fēfē ʻa e fakakaukau ʻa e kakaí?— ʻOku pehē ʻe he Tohitapú naʻa nau ofo ʻi heʻene founga faiakó. Naʻe fakamānako ʻaupito ke fanongo kiate ia. Ko e meʻa naʻá ne leaʻakí naʻe tokoniʻi ai ʻa e kakaí ke nau fai ʻa e meʻa ʻoku totonú.—Mātiu 7:28.

Ko ia, ʻoku mātuʻaki mahuʻinga ke ta ako meia Sīsū. ʻOkú ke ʻilo pe ʻe lava fēfē ke ta fai ia?— Sai, ʻokú ta maʻu ʻa ʻene ngaahi leá kuo hiki ia ʻi ha tohi. ʻOkú ke ʻilo pe ko e hā ʻa e tohi ko iá?— Ko e Tohitapu Māʻoniʻoní. ʻOku ʻuhinga ení, ʻe lava ke ta fanongo kia Sīsū ʻaki ʻa e tokanga ki he ngaahi meʻa ʻokú ta lau ʻi he Tohitapú. Ko hono moʻoní, ʻoku ʻi he Tohitapú ha talanoa fakafiefia ʻo fekauʻaki mo e founga naʻe fakahā tonu mai ai ʻe he ʻOtuá kia kitaua ke ta fakaongo kia Sīsuú. Ta sio angé ki he meʻa naʻe hokó.

ʻI he ʻaho ʻe taha, naʻe ʻave ai ʻe Sīsū ha toko tolu ʻo hono ngaahi kaumeʻá ki ʻolunga ki ha moʻunga. Ko honau hingoá ko Sēmisi, Sione mo Pita. Te ta ako lahi ange ki he kau tangatá ni ʻamui ange, he ko e toko tolú ni kotoa ko e ngaahi kaumeʻa ofi ʻo Sīsū. Ka ʻi he foʻi taimi makehe ko ení, naʻe kamata ke ulo ngingila ai ʻa e fofonga ʻo Sīsuú. Pea ko hono teungá naʻe hoko ia ʻo ngingila hangē ko e māmá, ʻo hangē ko ia ʻokú ke sio ki ai ʻi hení.

Hili iá, naʻe fanongo ʻa Sīsū mo hono ngaahi kaumeʻá ki ha leʻo mei hēvani. Naʻe pehē mai: ‘Ko hoku ʻAlo ʻofaʻangá eni ʻa ia ʻoku ou fiemālie lahi aí; mou fakaongo kiate ia.’ (Mātiu 17:​1-5, PM) ʻOkú ke ʻilo pe ko e leʻo nai ia ʻo hai?— Ko e leʻo ia ʻo e ʻOtuá! ʻIo, ko e ʻOtuá ia naʻe lea hifo ke nau fanongo ki hono ʻAló.

Fēfē kitaua he ʻaho ní? Te ta talangofua ki he ʻOtuá ʻo fakaongo ki hono ʻAló, ko e Faiako Lahí?— Ko e meʻa ia ʻoku fiemaʻu kitautolu kotoa ke tau faí. ʻOkú ke manatuʻi ʻa e founga ʻe lava ke ta fai ai iá?—

ʻIo, ʻe lava ke ta fanongo ki he ʻAlo ʻo e ʻOtuá ʻaki hono lau ʻa e ngaahi fakamatala faka-Tohitapu ki heʻene moʻuí. ʻOku lahi ʻaupito ʻa e ngaahi meʻa lelei ʻa e Faiako Lahí ke fakahā mai kia kitaua. Te ke fiefia ʻi hono ako ʻa e ngaahi meʻa ko eni ʻoku hiki ʻi he Tohitapú. Pea ʻe ʻomai foki ʻa e fiefia kiate koe kapau te ke tala ki ho ngaahi kaumeʻá ʻa e ngaahi meʻa lelei ʻokú ke akó.