Anga-Malū​—ʻE Lava Fēfē ke ʻAonga Kiate Kitautolu?

“Ko ha tokotaha natula mā au,” ko e fakamatala ia ʻa Selá,a “pea ʻoku ʻikai ke u fuʻu loto-maʻu. ʻOku ʻikai ke u fuʻu ongoʻi fiemālie ʻi heʻeku ʻi he kakai ʻoku anga-fefeka pea anga-mālohi. Ka ʻoku ou fiemālie ʻi ha taha ʻoku anga-malū mo anga-fakatōkilalo. ʻOku lava ke u talanoa ki he tokotaha ko iá, vahevahe ʻeku ngaahi ongoʻí pea lāulea ki heʻeku ngaahi palopalemá. Ko hoku ngaahi kaumeʻa lelei tahá ʻoku nau peheni.”

ʻOku hā mei he fakamatala ʻa Selá ko e anga-maluú ʻoku tohoakiʻi mai ai ʻa e niʻihi kehé. Ko e anga-maluú ʻoku toe fakahōifua kia Sihova. ʻOku fakaʻaiʻai kitautolu ʻe heʻene Folofolá: “Mou kofuʻaki kimoutolu ʻa e . . . anga-malū.” (Kol. 3:12) Ko e hā ʻa e anga-malū? Naʻe anga-fēfē hono fakahāhā ʻe Sīsū ʻa e anga-maluú? Pea ʻe anga-fēfē hono ʻai ʻe he ʻulungaanga ko ení kitautolu ke fiefia ange?

Ko e anga-maluú ko ha ongoʻi ia ʻi loto ʻo e nonga. Ko ha tokotaha anga-malū ʻokú ne fakafeangai ki he niʻihi kehé ʻi he anga-fakaalaala, anga-ʻofa pea ʻoku malava ke ne fehangahangai mo e ngaahi meʻa fakatupu ʻita ʻi he moʻuí ʻi he nonga mo e mapuleʻi-kita.

Ko e anga-maluú ko ha fakaʻilonga ia ʻo e mālohi ʻi loto. Ko e foʻi lea faka-Kalisi ki he “anga-maluú” naʻe fakamatalaʻiʻaki ha hoosi hehengi ka kuo akoʻi. ʻOku kei mālohi pē ʻa e hōsí ka kuo akoʻi ia ke ne mapuleʻi hono iví. ʻI he tuʻunga meimei tatau, ʻi heʻetau anga-maluú, ʻoku tau mapuleʻi ai ʻetau hehema taʻehaohaoá pea tauhi ʻa e melino mo e niʻihi kehé.

ʻOku tau fakakaukau nai ‘ʻOku ʻikai ko ha tokotaha natula anga-malū au.’ Ko e kakai tokolahi ʻoku anga-fefeka mo ʻikai anga-kātaki. Ko ia ʻe mātuʻaki faingataʻa nai kiate kitautolu ke anga-malū. (Loma 7:19) ʻOku hā mahino, ʻoku fiemaʻu ʻa e feinga mālohi ke fakatupulekina ʻa e anga-maluú, ka ko e laumālie māʻoniʻoni ʻo Sihová ʻe lava ke ne tokoniʻi kitautolu ke fakaivimālohiʻi ʻetau fakapapau ke aʻusia ʻetau taumuʻá. (Kal. 5:22, 23) Ko e hā ʻoku totonu ai ke tau fai ʻa e feinga mālohi ke fakatupulekina ʻa e anga-maluú?

Ko e anga-maluú ko ha ʻulungaanga ʻokú ne tohoakiʻi mai ʻa e kakaí. Hangē ko ia naʻe lave ki ai ʻa Selá, ʻoku tau ongoʻi fiemālie ʻi he feohi mo ha tokotaha anga-malū. Ko Sīsuú, ko ha faʻifaʻitakiʻanga lelei ʻaupito ia ʻo e anga-maluú mo e anga-leleí. (2 Kol. 10:1) Naʻa mo e fānau naʻe ʻikai ke nau ʻiloʻi iá, naʻa nau loto ke ofi kiate ia.—Mk. 10:13-16.

ʻOku ʻikai ngata pē ʻa e lelei ʻa e anga-maluú kiate kitautolú kae toe pehē ki he niʻihi takatakai ʻiate kitautolú. Kapau ʻoku tau anga-malū, heʻikai ke tau vave ke ʻita. (Pal. 16:32) ʻOku tau fakaʻehiʻehi ai mei he ongoʻi kovi ʻoku malanga hake ʻi heʻetau fakaʻitaʻi ha taha, tautefito ki ha tokotaha ʻoku tau ʻofa ai. Pea ʻe maʻu ʻaonga ʻa e niʻihi kehé kapau ʻoku tau mapuleʻi ʻetau ngaahi ongoʻí mo e tōʻongá pea ʻikai fakalotomamahiʻi kinautolu.

Naʻe anga-malū ʻa Sīsū ki he tokotaha kotoa neongo naʻe lahi hono ngaahi fatongiá pea fuʻu femoʻuekina. Ko e tokolahi ʻi hono ʻahó, naʻa nau faingataʻaʻia mo ongosia pea naʻa nau fiemaʻu ha fakaivifoʻou. Kuo pau pē naʻa nau ongoʻi fiemālie ʻi hono tala ange ʻe Sīsū kiate kinautolu: “Haʻu kiate au, . . . he ʻoku ou anga-malū mo loto-fakatōkilalo”!—Māt. 11:28, 29.

ʻE lava fēfē ke tau fakatupulekina ʻa e anga-malū naʻe fakahāhā ʻe Sīsū? ʻOku tau ako ʻa e Folofola ʻa e ʻOtuá ke ʻiloʻi ʻa e founga ʻo e fakafeangai ʻa Sīsū ki he kakaí mo ʻene fakaleleiʻi ʻa e ngaahi tuʻunga faingataʻá. Pea ʻi heʻetau fehangahangai leva mo e ngaahi tuʻunga ʻoku ʻahiʻahiʻi ai ʻetau anga-maluú, ʻoku tau feinga ke fakafeangai ʻo hangē ko Sīsuú. (1 Pita 2:21) Fakakaukau ki he meʻa ʻe tolu naʻá ne tokoniʻi ʻa Sīsū ke hoko ʻo anga-maluú.

Naʻe anga-fakatōkilalo moʻoni ʻa Sīsū. Naʻe pehē ʻe Sīsū naʻá ne “anga-malū mo loto-fakatōkilalo.” (Māt. 11:29) ʻI hono fakamatalaʻi ʻi he Tohi Tapú ʻa e ongo ʻulungaanga ko ení ʻokú na ō fakataha pē koeʻuhí ko e anga-maluú ʻoku vāofi ʻaupito mo e anga-fakatōkilaló. (ʻEf. 4:1-3) He ko e hā hono ʻuhingá?

Ko e anga-fakatōkilaló ʻokú ne tokoniʻi kitautolu ke fakaʻehiʻehi mei he hoko ʻo fuʻu fakamātoato pe hoko ʻo mamahingofua. Ko e hā ʻa e fakafeangai ʻa Sīsū ki he niʻihi naʻa nau fakaangaʻi taʻetotonu ia ki he hoko ʻo “kai fakaputa mo faʻa inu uaine lahi”? Naʻá ne tali ʻa e fakaangá ʻaki hono ngaahi ʻulungaanga leleí peá ne lave “ʻoku fakamoʻoniʻi ʻa e māʻoniʻoni ʻa potó ʻe heʻene ngaahi ngāué.”—Māt. 11:19.

Feinga ke tali anga-malū ki ha taha ʻokú ne fai ha lea taʻefakakaukauʻi atu kiate koe ʻi ha faʻahinga founga. ʻOku pehē ʻe Pita, ko ha mātuʻa ʻi ʻAfilika Tonga: “ʻI he taimi ʻoku ou ʻita ai ʻi ha taha koeʻuhi ko ha meʻa ʻokú ne leaʻakí, ʻoku ou ʻeke hifo, ‘ʻE fēfē nai ha fakafeangai ʻa Sīsū?’” ʻOkú ne pehē: “Kuó u ako ke ʻoua ʻe hoko ʻo fuʻu fakamātoato.”

Naʻe mahinoʻi ʻe Sīsū ʻoku taʻehaohaoa ʻa e faʻahinga ʻo e tangatá. Naʻe loto ʻa e kau ākonga ʻa Sīsuú ke fai ʻa e meʻa ʻoku totonu, ka koeʻuhi ko ʻenau taʻehaohaoá naʻe ʻikai ke faingofua maʻu pē. Ko e fakatātaá, ʻi he pō ki muʻa ke pekia ʻa Sīsuú, ko Pita, Sēmisi mo Sione, naʻe ʻikai ke nau lava ʻo ʻoatu ʻa e poupou naʻá ne fiemaʻú. Naʻe ʻiloʻi ʻe Sīsū “ko e moʻoni, ʻoku vēkeveke ʻa laumālie ka ʻoku vaivai ʻa kakano.” (Māt. 26:40, 41) Koeʻuhi naʻe mahinoʻi eni ʻe Sīsū, naʻe ʻikai te ne ʻita ki heʻene kau ʻapositoló.

Ko Menitī, ko ha tuofefine naʻá ne fuʻu fakaanga tōtuʻa, ka ʻi he taimí ni ʻokú ne feinga mālohi ke faʻifaʻitaki ki he faʻifaʻitakiʻanga ʻa Sīsū ʻo e anga-maluú. ʻOkú ne pehē, “ʻOku ou feinga ke manatuʻi ko e taha kotoa ʻoku taʻehaohaoa pea tokangataha ki he ngaahi ʻulungaanga lelei ʻo e kakaí ʻo hangē ko ia ko Sihova.” ʻE lava nai ʻe he vakai manavaʻofa ʻa Sīsū ki he taʻehaohaoá ʻo toe tokoniʻi koe ke fakafeangai anga-malū ki he niʻihi kehé?

Naʻe falala ʻa Sīsū ki he ʻOtuá. Lolotonga ʻa e ʻi māmani ʻa Sīsuú, naʻá ne kātekina ʻa e fakafeangai taʻetotonu. Naʻe ʻikai ke nau mahinoʻi ia, taʻetokaʻi pea fakamamahiʻi. Neongo ia, naʻá ne hanganaki anga-malū koeʻuhi “naʻá ne tuku atu ʻa ia tonu ki he Tokotaha ʻoku fakamaau māʻoniʻoní.” (1 Pita 2:23) Naʻe ʻiloʻi ʻe Sīsū ʻe tokoniʻi ia ʻe heʻene Tamaí ke kātaki pea te ne tauteaʻi ʻa e faʻahinga naʻe fakafeangai taʻetotonu angé ʻi he taimi feʻungamālié.

Kapau ʻoku fai mai ha fakafeangai taʻetotonu pea tau hoko ai ʻo ʻita, te tau ʻai nai ʻa e ngaahi meʻá ke kovi ange. Ko e ʻuhinga ia ʻoku fakamanatu mai ai ʻa e Folofolá: “Ko e ʻita ʻa e tangatá ʻoku ʻikai te ne fakahāhā ai ʻa e māʻoniʻoni ʻa e ʻOtuá.” (Sēm. 1:20) Naʻa mo ʻetau maʻu ha ʻuhinga ke ʻitá, ko e taʻehaohaoá te ne taki atu kitautolu ke fakafeangai ʻi ha founga hala.

Ko ha tuofefine mei Siamane ko Kefi, naʻá ne faʻa fakakaukau, ‘Kapau heʻikai ke ke taukapoʻi koe heʻikai ha taha te ne fai ia maʻau.’ Ka ʻi heʻene ako ke falala kia Sihová, naʻe liliu ʻene fakakaukaú. “ʻOku ʻikai kei fiemaʻu ke u kumi kalofanga,” ko ʻene laú ia. “ʻOku ou ongoʻi tauʻatāina ke ngāue anga-malū ʻi hono ʻiloʻi ʻoku mapuleʻi lelei ʻe Sihova ʻa e meʻa kotoa pē.” Kapau kuo maʻukovia koe ʻe ha fakamaau taʻetotonu, muimui ʻi he faʻifaʻitakiʻanga ʻa Sīsuú ʻi he falala ki he ʻOtuá te ne tokoniʻi mo koe ke tauhi maʻu ha laumālie anga-maluú.

Naʻe pehē ʻe Sīsū kapau ʻoku tau loto ke fiefia, kuo pau ke tau anga-malū. Naʻá ne pehē, “Fiefia ē ko e kau anga-maluú.” (Māt. 5:5) Fakatokangaʻi ʻa e tokoni ʻa e anga-maluú ʻi he ngaahi tuʻunga ko ení.

Ko e anga-maluú te ne fakaleleiʻi ʻa e ngaahi palopalema ʻi he nofo malí. ʻOku pehē ʻe Lōpeti, ko ha tokoua mei ʻAositelēlia, “Naʻá ku fai ha ngaahi lea fakalotomamahi ki hoku uaifí, ka naʻe ʻikai ko ʻeku taumuʻá ia. Ka ʻoku ʻikai lava ke toe fakafoki mai ʻa e ngaahi lea ʻita ko iá. Naʻá ku ongoʻi kovi ʻaupito ʻi heʻeku sio ki heʻene loto-mamahí.”

“Ko e kotoa ʻo kitautolú ʻoku tau tūkia ʻo tā-tuʻo-lahi” ʻi heʻetau leá pea ko ʻetau ngaahi lea taʻefakakaukauʻí ʻe fakamanamanaʻi ai ʻa e melino ʻetau nofo malí. (Sēm. 3:2) ʻI he ngaahi taimi peheé, ʻe tokoniʻi kitautolu ʻe he anga-maluú ke hanganaki nonga pea mapuleʻi hotau ʻeleló.—Pal. 17:27.

Naʻe ngāue mālohi ʻa Lōpeti ke fakatupulekina ʻa e nonga mo e mapuleʻi-kita. Ko e hā ʻa e olá? ʻOkú ne pehē, “ʻI he taimi ní, ʻi he taimi ʻoku ou taʻefelotoi ai mo hoku uaifí, ʻoku ou feinga mālohi ke fanongo lelei, lea anga-malū pea ʻoua ʻe hoko ʻo ʻita. ʻOku lelei ange hoku vahaʻangatae mo hoku uaifí.”

ʻOku tokoniʻi kitautolu ʻe he anga-maluú ke vā lelei ange mo e niʻihi kehé. Ko e faʻahinga ʻitangofuá, ʻoku tokosiʻi pē honau kaumeʻá. Ka ko e anga-maluú ʻokú ne tokoniʻi kitautolu “ke tauhi maʻu ʻa e . . . haʻi fāʻūtaha ko e melinó.” (ʻEf. 4:2, 3.) Naʻe toe pehē ʻe Kefi, “Kuo ʻomai ʻe he anga-maluú ʻa e mālohi kiate au ke fakafeangai lelei ange ki he niʻihi kehé naʻa mo e faʻahinga ʻoku faingataʻa ke fetaulaki mo iá.”

Ko e anga-maluú ʻokú ne ʻomai ʻa e nonga ʻi loto. ʻOku fakahoa ʻe he Tohi Tapú ʻa e “poto ʻoku mei ʻolungá” ki he anga-malū mo e melino. (Sēm. 3:13, 17) Ko ha tokotaha ʻoku anga-malū ʻokú ne maʻu “ha loto ʻoku nonga.” (Pal. 14:30) Kuo ngāue mālohi ʻa Mātini ke fakatupulekina ʻa e anga-maluú, ʻokú ne pehē, “ʻI he taimi ní ʻoku ʻikai ke u kei tuʻukāivi ai pē ke fai ʻa e ngaahi meʻá ʻo fakatatau ki heʻeku foungá pea ʻoku ou maʻu ʻa e nonga lahi ange ʻi loto mo e fiefia.”

Ko e moʻoni, kuo pau ke tau ngāue mālohi ke fakatupulekina ʻa e anga-maluú. ʻOku pehē ʻe ha tokoua, “Ko hono moʻoní, naʻa mo e ʻahó ni ʻoku ou kei ʻita tōlili ʻi loto ʻi he taimi ʻe niʻihi.” Ka ko Sihova, ʻokú ne fakalototoʻaʻi kitautolu ke tuli ki he anga-maluú te ne tokoniʻi kitautolu ʻi he fāinga ko ení. (ʻAi. 41:10; 1 Tīm. 6:11) ʻOku lava ke ne ‘fakaʻosi hotau akoʻí’ peá ne ‘ʻai ke tau mālohi.’ (1 Pita 5:10) Hangē ko e ʻapositolo ko Paulá, ʻe lava leva ke tau tapua atu ʻa e “anga-malū mo e anga-lelei ʻa e Kalaisí.”—2 Kol. 10:1.