“ʻOku Ou Maʻu ʻa e ʻAmanaki ki he ʻOtuá”

1-3. (a) Ko e hā ʻoku totonu ke tau fakakau ʻi he taha ʻo ʻetau ngaahi tui tefitó? (e) Ko e hā ʻoku mātuʻaki mahuʻinga ai ʻa e toetuʻú? (Sio ki he ʻuluaki fakatātā ʻi he kupú ni.)

KAPAU naʻe ʻeke atu ʻe ha taha pe ko e hā ʻa e ngaahi akonaki tefito ʻi hoʻo tuí, ko e hā te ke leaʻakí? ʻOku pau pē te ke pehē ʻokú ke tui ko Sihova ʻa e Tokotaha-Fakatupú mo e tokotaha ʻokú ne ʻomai kiate kitautolu ʻa e moʻuí. Ngalingali te ke toe pehē foki ʻokú ke tui kia Sīsū Kalaisi, ʻa ia naʻá ne pekia ko ha huhuʻi. Ko e moʻoni te ke talanoa fekauʻaki mo e Palataisi ʻi he māmaní ʻi he kahaʻú, ʻa ia ʻe moʻui taʻengata ai ʻa e kakaí. Ka te ke lave ki he toetuʻú ko e taha ia ʻo hoʻo tui mahuʻinga tahá?

² ʻOku tau maʻu ʻa e ngaahi ʻuhinga lelei ke fakakau ʻa e toetuʻú ʻi he taha ʻo ʻetau ngaahi tui tefitó, ʻo tatau ai pē pe ʻoku tau ʻamanaki ke hao atu ʻi he fuʻu mamahi lahí pea moʻui taʻengata ʻi he māmaní. Naʻe fakahaaʻi ʻe he ʻapositolo ko Paulá ʻa e ʻuhinga ʻoku mātuʻaki mahuʻinga ai ʻa e toetuʻú. Naʻá ne pehē: “Kapau, ko e moʻoni, ʻoku ʻikai ha toetuʻu ʻa e maté, tā kuo ʻikai ke fokotuʻu hake ʻa Kalaisi.” Kapau naʻe ʻikai ke fokotuʻu hake ʻa Sīsū, heʻikai lava ke ne pule ko e Tuʻi ʻi hēvani, pea ʻe taʻeʻaonga ʻa ʻetau malangá. (Lau ʻa e 1 Kolinitō 15:12-19.) Kae kehe, ʻoku tau ʻiloʻi naʻe fokotuʻu hake ʻa Sīsū. Koeʻuhi ko ʻetau tui ki heʻene toetuʻú, ʻoku ʻikai ke tau hangē ai ko e kau Sātusi Siú, ʻa ia naʻa nau fakaʻikaiʻi mālohi ʻe lava ke toe moʻui ʻa e kau maté. Naʻa mo hono fakakataʻaki kitautolu ʻe he niʻihi kehé, ʻoku kei mālohi ai pē ʻetau tui ʻe lava ke fokotuʻu hake ʻe he ʻOtuá ʻa e kau maté.​—Mk. 12:18; Ngā. 4:2, 3; 17:32; 23:6-8.

³ Naʻe pehē ʻe Paula ko e akonaki fekauʻaki mo e “toetuʻu ʻa e kau maté” ko e konga ia ʻo e “tokāteline tefito fekauʻaki mo e Kalaisí.” (Hep. 6:1, 2) Naʻá ne fakamamafaʻi ko e toetuʻú ko e meʻa ia naʻá ne tui ki ai. (Ngā. 24:10, 15, 24, 25) Neongo ko ha tokāteline tefito ia, ko e taha ʻo e ngaahi meʻa mahuʻinga ʻoku tau ako mei he Folofola ʻa e ʻOtuá, ʻoku kei fiemaʻu pē ke tau ako fakamākukanga fekauʻaki mo e toetuʻú. (Hep. 5:12) Ko e hā hono ʻuhingá?

 4. Ko e hā nai ʻa e ongo fehuʻi te tau ʻeke fekauʻaki mo e toetuʻú?

⁴ ʻI he taimi ʻoku kamata ako ai ʻe he kakaí ʻa e Tohi Tapú, ʻoku nau faʻa lau ʻa e ngaahi talanoa fekauʻaki mo e ngaahi toetuʻu ʻi he kuohilí, hangē ko e toetuʻu ʻa Lāsalosí. ʻOku nau toe ako ʻo ʻilo ko ʻĒpalahame, Siope mo Taniela naʻa nau tuipau ʻe toe moʻui ʻa e kau maté ʻi he kahaʻú. Kae kehe, ko e hā te ke leaʻakí kapau ʻe fiemaʻu ʻe ha taha ke ke fakamoʻoniʻi mei he Tohi Tapú ʻa e ʻuhinga ʻe lava ke tau falala ai ki he ngaahi talaʻofa ki he toetuʻú ʻa ia naʻe fai ʻi he taʻu ʻe lauingeau kuohilí? Pea ʻoku tala mai koā ʻe he Tohi Tapú ʻa e taimi ʻe hoko ai ʻa e toetuʻú ʻi he kahaʻú? Ko e tali ki he ongo fehuʻi ko iá ʻe fakaivimālohiʻi ai ʻetau tuí.

 5. Ko e hā te tau ʻuluaki lāulea ki aí?

⁵ ʻE faingofua nai ke tau sioloto atu ki hano fokotuʻu hake ha taha ʻi he hili pē ʻene maté. (Sione 11:11; Ngā. 20:9, 10) Ka ʻe lava ke tau falala ki ha talaʻofa ʻe fokotuʻu hake ha taha ʻi ha ngaahi taʻu, naʻa mo e taʻu ʻe lauingeau ʻi he kahaʻú? ʻE lava ke tau tui ki ai ʻo tatau ai pē pe naʻe fai ki ha tokotaha naʻe mate ʻi ha taimi fuoloa pe ko ha taha naʻe toki mate pē ki muí ni? Ko hono moʻoní, kuó ke ʻosi tui ki ha toetuʻu naʻe hoko ʻi he taʻu ʻe lauingeau hili ʻa e talaʻofa naʻe fai ki aí. Ko e toetuʻu fē ia? Pea ko e hā hono kaunga ki hoʻo ʻamanaki ki ha toetuʻu ʻi he kahaʻú?

 6. Naʻe anga-fēfē kaunga ʻa Sīsū ki hono fakahoko ʻo e Saame 118?

⁶ ʻI hono ngāueʻaki ʻa e Saame 118, ʻa ia naʻe hiki nai ʻe Tēvita, tau lāulea angé ki ha toetuʻu naʻe tomuʻa tala ʻi ha ngaahi taʻu lahi ki muʻa. Ko e Saame ko ení ʻoku kau ai ʻa e ngaahi leá ni: “ʻE Sihova, fakahaofi muʻa kimautolu, ʻoku mau kōlenga atu!” mo e “Ke faitāpuekina ʻa e tokotaha ʻoku haʻu ʻi he huafa ʻo Sihová.” Naʻe lave ʻa e kakaí ki he kikite ko eni fekauʻaki mo e Mīsaiá ʻi he taimi naʻe heka atu ai ʻa Sīsū ki Selusalema ʻi he ʻaho 9 ʻo Nīsaní, ko ha ngaahi ʻaho siʻi ki muʻa ʻi heʻene pekiá. (Saame 118:25, 26; Māt. 21:7-9) Ka naʻe anga-fēfē ʻa e lave ʻi he Saame 118 ki ha toetuʻu ʻe hoko ʻi ha ngaahi taʻu lahi ʻi he kahaʻú? Vakai angé ki ha toe meʻa naʻe leaʻaki ʻi he saame ko ení: “Ko e maka naʻe siʻaki ʻe he kau tufungá kuo hoko ia ko e maka-tuliki tefitó.”​—Saame 118:22.

 7. Naʻe anga-fēfē hono siʻaki ʻa Sīsū ʻe he kau Siú?

⁷ Ko e ‘kau tufunga’ naʻa nau siʻaki ʻa e Mīsaiá ko e kau taki Siú. Naʻa nau fai ʻa e meʻa lahi ange ʻi hono tukunoaʻi pē ʻa Sīsū pe fakafisi ke tali ia ko e Kalaisí. Naʻe siʻaki ia ʻe he kau Siu tokolahi ʻaki hono kounaʻi ʻa Pailato ke tāmateʻi ia. (Luke 23:18-23) ʻIo, naʻe toe tupu foki meia kinautolu ʻa e pekia ʻa Sīsuú.

 8. Naʻe lava fēfē ke hoko ʻa Sīsū ko e “maka-tuliki tefitó”?

⁸ Kapau naʻe siʻaki pea tāmateʻi ʻa Sīsū, naʻe lava fēfē ke ne hoko ko e “maka-tuliki tefitó”? Naʻe lava ke toki hoko pē iá kapau te ne toetuʻu. Naʻe fakamahinoʻi ia ʻe Sīsū ʻi heʻene fai ha talanoa fekauʻaki mo ha tokotaha naʻe ʻoʻona ha kelekele ʻa ia naʻá ne fekauʻi atu ʻene kau talafekau ki ha kau ngoue naʻa nau ngāue kiate ia. Naʻe ngaohikoviʻi ʻe he kau ngoué ʻa e kau talafekaú. Naʻe faifai pē pea fekauʻi atu ʻe he tokotaha naʻe ʻoʻona ʻa e kelekelé ʻa hono fohá tonu, ʻi heʻene ʻamanaki ʻe fanongo kiate ia ʻa e kau ngoué. Ka naʻa nau tāmateʻi ʻa e foha ʻo e tokotaha naʻe ʻoʻona ʻa e kelekelé. Hili ʻene fai ʻa e talanoa ko ení, naʻe toʻo-lea ʻa Sīsū mei he kikite ʻi he Saame 118:22. (Luke 20:9-17) Naʻe ngāueʻaki ʻe he ʻapositolo ko Pitá ʻa e veesi tatau ʻi heʻene lea ki he kau Siu ko e “kau pulé, kau mātuʻá, pea mo e kau sikalaipé ʻi Selusalema.” Naʻá ne talanoa fekauʻaki mo “Sīsū Kalaisi ko e Nāsaletí, ʻa ia naʻa mou tautau ʻi he ʻakaú ka naʻe fokotuʻu hake ʻe he ʻOtuá mei he maté.” Pea naʻá ne pehē: “Ko eni ia ‘ʻa e maka naʻe ʻikai fakamahuʻingaʻi ʻe kimoutolu kau tufungá kuo hoko ia ko e maka-tuliki tefitó.’”​—Ngā. 3:15; 4:5-11; 1 Pita 2:5-7.

 9. Ko e hā ʻa e meʻa ʻoku taau ke fakatokangaʻi naʻe tomuʻa tala ʻi he Saame 118:22?

⁹ ʻOku hā mahino, ko e kikite ʻi he Saame 118:22 naʻe tomuʻa tala ai ha toetuʻu ʻe hoko ʻi he taʻu ʻe lauingeau ki mui. ʻE siʻaki ʻa e Mīsaiá pea tāmateʻi. Ka ʻe fokotuʻu hake ia pea te ne hoko ko e maka-tuliki tefito. ʻI heʻene toetuʻú pē, naʻe hoko ai ʻa Sīsū ko e toko taha pē ia ʻe taha ʻa ia ko hono hingoá naʻe “tuku mai ki he haʻohaʻonga ʻo e tangatá ʻa ia kuo pau ke tau maʻu ai ʻa e moʻuí.”​—Ngā. 4:12; ʻEf. 1:20.

10. (a) Ko e hā naʻe tomuʻa tala ʻi he Saame 16:10? (e) Ko e hā ʻoku lava ai ke tau fakapapauʻi naʻe ʻikai ʻuhinga ʻa e Saame 16:10 kia Tēvita?

¹⁰ Tau lāulea angé ki ha toe veesi ʻoku fakamatala ai fekauʻaki mo ha toetuʻu. Naʻe fakahoko ia laka hake ʻi ha taʻu ʻe taha afe ki mui. Ko e moʻoniʻi meʻa ko ení ʻoku totonu ke ne ʻai ke tau tuipau ʻe lava ke hoko ha toetuʻu ʻi ha taimi fuoloa hili hono tomuʻa tala pe talaʻofaʻakí. ʻI he Saame 16, ʻoku tau lau ai ʻa e lea ʻa Tēvita: “Heʻikai te ke tuku au ʻi he Faʻitoká. ʻE ʻikai te ke tuku ʻa hoʻo tokotaha mateakí ke sio ki he luó.” (Saame 16:10) Naʻe ʻikai feinga ʻa Tēvita ke ne pehē heʻikai ʻaupito te ne mate pea ʻi he Faʻitoká. ʻOku leaʻaki mātuʻaki mahino ʻi he Folofola ʻa e ʻOtuá naʻá ne motuʻa peá ne mate pea “naʻe toka ʻa Tēvita ʻo mālōlō fakataha mo ʻene fanga kuí pea naʻe tanu ia ʻi he Kolo-ʻo-Tēvitá.” (1 Tuʻi 2:1, 10) Ko ia ʻoku ʻuhinga ʻa e veesi ko ení kia hai?

11. Ko e taimi fē naʻe fakamatalaʻi ai ʻe Pita ʻa e Saame 16:10?

¹¹ Laka hake ʻi he taʻu ʻe taha afe hili hono hiki ʻe Tēvita ʻa e ngaahi lea ko iá, naʻe fakamatala ʻa Pita ki he tokotaha naʻe ʻuhinga ki ai ʻa e Saame 16:10. ʻI ha ngaahi uike siʻi mei he pekia ʻa Sīsū peá ne toetuʻú, naʻe lea ai ʻa Pita ki he kau Siu mo e kau ului Siu ʻe laui afe. (Lau ʻa e Ngāue 2:29-32.) Naʻá ne fakamanatu kiate kinautolu naʻe mate ʻa Tēvita pea naʻe tanu ia. Pea ʻoku ʻikai ke pehē ʻi he Tohi Tapú naʻe ʻikai loto-tatau ha taha ʻo kinautolu mo Pita ʻi heʻene hoko atu ʻo pehē ko Tēvitá “naʻá ne tomuʻa sio mo ne lea ʻo kau ki he toetuʻu” ʻa e Mīsaiá.

12. Naʻe anga-fēfē hono fakahoko ʻa e Saame 16:10, pea ko e hā ʻoku fakapapauʻi ʻe he meʻa ko iá fekauʻaki mo e talaʻofa ki he toetuʻú?

¹² Naʻe poupouʻi ʻe Pita ʻene poiní ʻaki ʻene toʻo-lea mei he ngaahi lea ʻa Tēvita ʻi he Saame 110:1. (Lau ʻa e Ngāue 2:33-36.) Ko e fakaʻuhinga ʻa Pita mei he Folofolá naʻe tokoni ki hono fakatuipauʻi ki he fuʻu kakaí ko Sīsuú “ko e ʻEiki mo e Kalaisi.” Naʻe ʻiloʻi ʻe he kakaí naʻe fakahoko ʻa e Saame 16:10 ʻi he toetuʻu ʻa Sīsū mei he pekiá. Ki mui ai, naʻe ngāueʻaki ʻe he ʻapositolo ko Paulá ʻa e fakamoʻoni tatau ʻi heʻene lea ki he kau Siu ʻi he kolo ko ʻAniteoke ʻi Pisitiá. Naʻe maongo moʻoni kiate kinautolu ʻa e fakamoʻoni ko ení, pea naʻa nau loto ke fanongo ki ha meʻa lahi ange. (Lau ʻa e Ngāue 13:32-37, 42.) ʻOku totonu ke ne fakatuipauʻi foki kitautolu ko e ngaahi kikite Fakatohitapu ko ia fekauʻaki mo ha toetuʻu ʻi he kahaʻú naʻe alafalalaʻanga neongo naʻe fakahoko ia ʻi ha taʻu ʻe lauingeau ki mui.

13. Ko e hā ʻa e ongo fehuʻi te tau ʻeke nai fekauʻaki mo e toetuʻú?

¹³ ʻOku fakalototoʻa ke ʻiloʻi ʻe lava ke hoko ha toetuʻu ʻi he taʻu ʻe lauingeau hili hono tomuʻa talá. Neongo ia, ʻe ʻeke nai ʻe he niʻihi: ‘ʻOku ʻuhinga iá te u tatali ʻi ha taimi fuoloa peá u toki sio ki he tokotaha ʻoku ou ʻofa aí? ʻE hoko ʻafē ʻa e toetuʻú?’ Sai, naʻe tala ʻe Sīsū ki heʻene kau ʻapositoló naʻe ʻi ai ʻa e ngaahi meʻa naʻe ʻikai te nau ʻiloʻi pea heʻikai lava ke nau ʻiloʻi. ʻOku ʻi ai ʻa e ngaahi fakaikiiki fekauʻaki mo e “ngaahi taimi pe ngaahi kuonga ʻa ia kuo taʻofi ʻe he Tamaí ki hono mafai pē ʻoʻoná.” (Ngā. 1:6, 7; Sione 16:12) Kae kehe, ʻoku tau maʻu ha fakamatala fekauʻaki mo e taimi ʻe hoko ai ʻa e toetuʻú.

14. Naʻe anga-fēfē ʻa e kehe ʻa e toetuʻu ʻa Sīsuú mei he niʻihi kehe naʻe toetuʻu ki muʻa aí?

¹⁴ Ko e toetuʻu mahuʻinga taha ʻoku hiki ʻi he Tohi Tapú ko e toetuʻu ʻa Sīsuú. Kapau naʻe ʻikai ke fokotuʻu hake ia mei he pekiá, heʻikai ha taha ʻo kitautolu ʻe ʻi ai haʻatau ʻamanaki ke toe sio ki he faʻahinga ʻoku tau ʻofa aí. Ko e kakai naʻe fokotuʻu hake ki muʻa ʻia Sīsuú, hangē ko e faʻahinga naʻe fokotuʻu hake ʻe ʻIlaisiā mo ʻIlaisá, naʻe ʻikai te nau moʻui taʻengata. Naʻa nau toe mate pea hoko ko e efu ʻi he faʻitoká. Ka ko Sīsuú kuo “fokotuʻu hake ia mei he pekiá.” Ko iá “heʻikai te ne toe pekia; ʻoku ʻikai ke kei pule kiate ia ʻa e maté.” ʻI hēvaní, ʻokú ne moʻui ai “ʻo taʻengata pea taʻengata.”​—Loma 6:9; Fkh. 1:5, 18; Kol. 1:18; 1 Pita 3:18.

15. Ko e hā ʻoku ui ai ʻa Sīsū ko e “ʻuluaki fuá”?

¹⁵ Ko e toetuʻu ʻa Sīsū ki hēvani ko ha tokotaha laumālié ʻa e toetuʻu ʻuluaki mo mahuʻinga taha ʻi he faʻahinga toetuʻu ko ení. (Ngā. 26:23) Kae kehe, ʻoku ʻikai ko ia pē ʻa e toko taha naʻe fokotuʻu hake ki hēvaní. Naʻe talaʻofa ʻa Sīsū ko ʻene kau ʻapositolo faitōnungá te nau pule fakataha mo ia ʻi ai. (Luke 22:28-30) Ka te nau toki maʻu pē ʻa e pale ko ení hili ʻenau maté. Pea ʻi he hangē ko Sīsuú, ʻe fokotuʻu hake kinautolu mo ha sino fakalaumālie. Naʻe tohi ʻe Paula ʻo pehē “kuo ʻosi fokotuʻu hake ʻa Kalaisi mei he maté, ko e ʻuluaki fua ia ʻi he faʻahinga kuo mohe ʻi he maté.” Naʻe pehē leva ʻe Paula ʻe ʻi ai mo e niʻihi kehe ʻe fokotuʻu hake pea te nau ō ki hēvani: “Ko e tokotaha taki taha ʻi hono fakahokohoko totonu: Ko Kalaisi ʻa e ʻuluaki fuá, hili iá ko e faʻahinga ʻoku ʻo e Kalaisí ʻi he lolotonga ʻo ʻene ʻi hení.”​—1 Kol. 15:20, 23.

16. Ko e hā ʻa e fakalika ʻoku tau maʻu fekauʻaki mo e taimi ʻe hoko ai ʻa e toetuʻu fakahēvaní?

¹⁶ Ko e ngaahi lea ʻa Paulá ʻoku ʻomi ai kiate kitautolu ha fakalika ki he taimi ʻe hoko ai ʻa e toetuʻu fakahēvaní. ʻE hoko ia lolotonga ʻa e ʻi heni ʻa Kalaisí. Kuo fakamoʻoniʻi ʻe he Kau Fakamoʻoni ʻa Sihová ʻi he ngaahi taʻu lahi mei he Tohi Tapú ko e “i heni” ʻa Kalaisí naʻe kamata ʻi he 1914. ʻOku tau lolotonga moʻui ʻi heʻene ‘ʻi hení,’ pea ko e ngataʻanga ʻo e fokotuʻutuʻu fulikivanu ko ení ʻoku ofi ʻaupito.

17, 18. Ko e hā ʻe hoko ki he kau pani ʻe niʻihi lolotonga ʻa e ʻi heni ʻa Kalaisí?

¹⁷ ʻOku fakamatala ʻa e Tohi Tapú ki he meʻa lahi ange fekauʻaki mo e toetuʻu fakahēvaní: “ʻOku ʻikai ke mau loto ke mou hoko ʻo taʻeʻilo fekauʻaki mo e kahaʻu ʻo e faʻahinga ʻoku nau mohe ʻi he maté . . . He kapau ʻoku tau tui naʻe pekia ʻa Sīsū peá ne toetuʻu hake, ʻe pehē pē ʻa hono fakafoki mai ʻe he ʻOtuá ke fakataha mo ia ʻa e faʻahinga kuo nau mohe ʻi he maté . . . Ko kitautolu kau moʻuí ʻa ia ʻoku tau hao moʻui atu ʻo aʻu ki he ʻi heni ʻa e ʻEikí ʻe ʻikai ʻaupito te tau muʻomuʻa ʻi he faʻahinga ko ia kuo nau mohe ʻi he maté; koeʻuhí ʻe ʻalu hifo ʻa e ʻEikí mei hēvani ʻo ne ʻoatu ha tuʻutuʻuni, . . . pea ko e faʻahinga ʻoku nau mate ʻi he fāʻūtaha mo Kalaisí te nau ʻuluaki toetuʻu hake kinautolu. Hili iá ko kitautolu kau moʻuí ʻa ia ʻoku tau hao moʻui atú ʻe ʻohake kitautolu, fakataha mo kinautolu ʻi he ngaahi ʻaó ke fetaulaki mo e ʻEikí ʻi he langí; pea ko ia ai, te tau ʻi he ʻEikí maʻu ai pē.”​—1 Tes. 4:13-17.

¹⁸ Ko e ʻuluaki toetuʻú ʻe hoko ia ʻi ha taimi hili ʻa e kamata ʻo e ʻi heni ʻa Kalaisí. Ko e kau pani ʻe moʻui lolotonga ʻa e fuʻu mamahi lahí ʻe ‘ʻohake kinautolu ʻi he ngaahi ʻaó.’ (Māt. 24:31) ʻOku ʻuhinga ia ki he hā? Ko e faʻahinga ʻe “ʻohake” ʻe ʻikai te nau “mohe ʻi he maté,” ʻa ia, ʻe ʻikai te nau mate ai pē ʻi ha taimi fuoloa. ʻI hono kehé, ʻi he taimi te nau mate aí, te nau “liliu kotoa pē, ʻi ha foʻi mōmeniti, ʻi ha foʻi kemo pē ʻa e matá, ʻi he lolotonga ʻa e ifi ʻa e talupite fakaʻosí.”​—1 Kol. 15:51, 52.

19. Ko e hā ʻa e “toetuʻu lelei ange”?

¹⁹ ʻI he ʻahó ni, ko e tokolahi taha ʻo e kau Kalisitiane faitōnungá ʻoku ʻikai pani kinautolu pea ʻoku ʻikai fili kinautolu ke nau pule fakataha mo Kalaisi ʻi hēvani. Ka, ʻoku nau fakatuʻamelie atu ki he “ʻaho ʻo Sihová,” ki he taimi te ne fakangata ai ʻa e māmani fulikivanu ko ení. ʻOku ʻikai ha taha te ne ʻiloʻi ʻa e taimi tofu pē ʻe hoko ai ʻa e ngataʻanga ko ení, ka ʻoku fakahaaʻi ʻi he fakamoʻoní ʻoku ofi ia. (1 Tes. 5:1-3) ʻI he hoko mai ʻa e māmani foʻou ʻa e ʻOtuá, ʻe ʻi ai ha faʻahinga kehekehe ʻo e toetuʻú. ʻI he taimi ko iá, ʻe fokotuʻu hake ʻa e kakaí ke nau moʻui ʻi māmani pea te nau maʻu ʻa e ʻamanaki ʻo e hoko ʻo haohaoa pea ʻikai ʻaupito ke nau toe mate. ʻE hoko eni ko ha “toetuʻu lelei ange” ʻi he toetuʻu ʻa e faʻahinga ʻi he kuohilí ʻa ia naʻe fokotuʻu hake ka naʻa nau toe mate ʻi ha taimi ki mui ai.​—Hep. 11:35.

20. Ko e hā ʻoku lava ai ke tau falala ʻe fokotuʻutuʻu maau ʻa e toetuʻú?

²⁰ ʻOku pehē ʻe he Tohi Tapú ko e faʻahinga ʻoku ō ki hēvaní ʻoku fokotuʻu hake ʻa e “tokotaha taki taha ʻi hono fakahokohoko totonu.” (1 Kol. 15:23) Ko ia ʻe lava ke tau falala ko e toetuʻu ʻi he māmaní ʻe fakahokohoko mo ia, pe ʻe fokotuʻutuʻu maau. ʻE fakatupunga nai ai ke tau ʻeke: ʻE fokotuʻu hake ʻa e faʻahinga naʻe toki mate ki mui ní ofi ki he kamata ʻo e Pule Taʻu ʻe Taha Afe ʻa Kalaisí pea talitali lelei kinautolu ʻe honau ngaahi ʻofaʻanga ʻoku nau ʻiloʻi kinautolú? ʻE toetuʻu mai ki muʻa ange ʻa e kau tangata faitōnunga mei he kuohilí ʻa ia naʻa nau hoko ko e kau taki pōtoʻí ke nau tokoni ki hono fokotuʻutuʻu ʻa e kakai ʻa e ʻOtuá ʻi he māmani foʻoú? Ko e hā ʻe hoko ki he kakai naʻe ʻikai ʻaupito te nau tauhi kia Sihová? ʻE fokotuʻu hake kinautolu ʻafē pea ʻi fē? ʻOku lahi ʻaupito ʻa e ngaahi fehuʻi ʻe lava ke tau ʻeké. Ka ʻoku ʻikai fiemaʻu ke tau hohaʻa fekauʻaki mo e ngaahi meʻá ni ʻi he taimí ni. ʻOku lelei ange pē ke tau tatali anga-kātaki. ʻOku lava ke tau falala ʻe fakalotomāfana ʻa e sio ki he founga ʻe fai ai ʻe Sihova ʻa e ngaahi meʻá.

21. Ko e hā hoʻo ʻamanakí?

²¹ ʻOku totonu ke tau fakaivimālohiʻi ʻetau tui kia Sihová, kae ʻoua kuo toki aʻu ki he taimi ko iá. Naʻá ne talaʻofa fakafou ʻia Sīsū ko e kau maté ʻoku ʻi Heʻene manatú pea te nau toe moʻui. (Sione 5:28, 29; 11:23) Ko ha toe fakamoʻoni ʻe fokotuʻu hake ʻe Sihova ʻa e kau maté, naʻe pehē ʻe Sīsū ʻi he taimi ʻe taha ko ʻĒpalahame, ʻAisake, pea mo Sēkope “ʻoku nau moʻui kotoa pē kiate ia.” (Luke 20:37, 38) ʻOku hā mahino, ʻoku lahi ʻa e ngaahi ʻuhinga lelei ke tau lea ai ʻo hangē ko e ʻapositolo ko Paulá: “ʻOku ou maʻu ʻa e ʻamanaki ki he ʻOtuá . . . ʻe ʻi ai ʻa e toetuʻu.”​—Ngā. 24:15.