Sīsū​–Ko ʻEne Moʻuí mo ʻEne Ngāue Fakafaifekau

Naʻe Fakaeʻa ʻAki ʻa e Ngaahi Talanoa Fakatātā ʻo e Ngoue Vainé

NAʻE ʻi he temipalé ʻa Sīsū. Naʻá ne toki ʻosi fakapuputuʻuʻi ʻa e kau taki lotu naʻa nau feinga ke ʻilo pe ko e mafai ʻo hai naʻá ne fai ai ʻa e ngaahi meʻá ni. Lolotonga ʻa ʻenau kei puputuʻú, naʻe ʻeke ʻe Sīsū: “Ka ko e ha hoʻomou poa ki he meʻa ni?” Pea fakafou ʻi ha talanoa fakatātā naʻá ne fakahā ai kiate kinautolu pe ko e faʻahinga kakai fēfē moʻoni kinautolu.

Naʻe pehē ʻe Sīsū: “Tokua naʻe ai ha tangata mo hono ongo foha; pea ne ʻunuʻunu atu ki he ʻuluaki, ʻo ne pehe, Tama, ke ke ʻalu ʻo ngaue he ʻaho ni ʻi he ngoue vaine. Ka ka tali ʻe ia, ʻo ne pehe, ʻE ʻikai: ka naʻe tautea ia ʻe hono loto ki mui, ʻo ne ʻalu. Pea ne ʻunuʻunu ki he tama ʻe taha, ʻo ne lea ki ai ʻo hange ko e ʻanenai. Pea tali ʻe ia, ʻo ne pehe, ʻOku lelei, Tangataʻeiki: ka naʻe ʻikai ʻalu ia.” Naʻe ʻeke ʻe Sīsū: “Ko e fe nai ʻi he ongo tama ne ne fai ʻa e tuʻutuʻuni ʻa ʻena tamai?”

Naʻe tali ʻe he kau fakafepaki kiate iá: “Ko e ʻuluaki.”

Ko ia naʻe fakamatala ʻe Sīsū: “Ko au e, ʻoku ou tala atu, ko e kau popilikane mo e kau feʻauaki ʻoku nau takimuʻa kiate kimoutolu ʻi he hū ki he puleʻanga ʻo e ʻOtua.” Ko hono moʻoní, ko e kau tānaki tukuhaú mo e kau feʻauakí naʻa nau fakafisi ʻi he kamataʻangá ke tauhi ki he ʻOtuá. Ka naʻa nau hangē ko e ʻuluaki tama, naʻa nau fakatomala pea nau tauhi ki he ʻOtuá. ʻI he tafaʻaki ʻe tahá, ko e kau taki lotú, ʻo hangē ko e tama hono uá, naʻa nau taukaveʻi ʻoku nau tauhi ki he ʻOtuá, ka, ʻo hangē ko e lave ʻa Sīsū: “Naʻe haʻu ʻa Sione [Papitaiso] kiate kimoutolu ʻi he hala ko e tauhi tuʻutuʻuni, pea naʻe ʻikai te mou tuitala ki ai: ka ko e kau popilikane mo e feʻauaki naʻa nau tuitala ʻe kinautolu: pea ko kimoutolu, ne ongo naʻa mou sio ki ai, ka naʻe ʻikai tautea homou loto kimui ke mou tuitala kiate ia.”

Naʻe hoko atu hono fakahā ʻe Sīsū ʻoku ʻikai ke ngata pē ʻa e kau taki lotú ʻi heʻenau taʻe tauhi ki he ʻOtuá. Ka ko e kau tangata kovi mo anga-fulikivanu moʻoni kinautolu. Naʻe pehē ʻe Sīsū: “Tokua naʻe ai ha tangata, ko e matāpule, ʻa ia naʻa ne tō ha ngoue vaine, pea naʻa ne ʻāʻi takai ia, mo ne foa ai ha tataʻoʻanga kalepi, ʻo ne langa ai ha taua, pea ne tuku ke lisi e ha kau faʻa, ʻo ne ʻalu ki muli. Pea ʻi he ofi ʻa e toʻukai kālepi, naʻa ne fekau atu ʻene kau tamaioʻeiki ki he kau faʻa ke maʻu mai hono ʻinasi: ka ka puke ʻe he kau faʻa ʻene kau tamaioʻeiki, ʻo nau haha ha toko taha, pea tamateʻi ha toko taha, pea tolomakaʻi ha toko taha. Pea ne toe fekau atu mo ha tuʻunga tamaioʻeiki kehe, ʻo toko lahi ʻi he fua ō: pea nau ngaohia kinautolu ʻo hange ko e ʻuluaki.”

Ko e “kau tamaioʻeiki” ko e kau palōfita ia naʻe fekau mai ʻe he “matāpule,” ko e ʻOtua ko Sihová ki he “kau faʻa” ʻo ʻene “ngoue vaine.” Ko e kau faʻa ko ʻení ko e kau fakafofonga tuʻu-ki-muʻa ia ʻo e puleʻanga ʻIsilelí, ʻa ia ko e puleʻanga ʻoku fakahā ʻe he Tohitapú ko e “ngoue vaine” ʻa e ʻOtuá.

Koeʻuhi ko e ngaohikoviʻi mo tāmateʻi ʻe he “kau faʻa” ʻa e “kau tamaioʻeiki,” naʻe fakamatala ʻe Sīsū: “Pea naʻa ne [toko taha naʻe ʻaʻana ʻa e ngoue vaine] fekau atu kimui hono foha, heʻene pehe, Te nau tokaʻi hoku foha. Ka ko e kau faʻa ʻi heʻenau mamata ki he foha, naʻa nau fealeleaʻaki, ʻo pehe, Ko e hoko ʻena; ʻe, tau tamateʻi muʻa ia, ʻo tau maʻu hono tofiʻa. Pea nau puke ia ʻo toho ki he tuaʻā ngoue, ʻo nau tamateʻi ai.”

Naʻe hanga atu ʻeni ʻa Sīsū ki he kau taki lotu ʻo ne ʻeke: “Pea ka ʻiloange ai ʻe hoko mai ʻa e ʻeiki ʻo e ngoue vaine, ko e ha te ne fai ki he kau faʻa ko ia?”

Naʻa nau tali: “Te ne fakaʻauha fakalieliaʻi ʻa e kau fakalielia ko ia, pea te ne tuku ke lisi ʻa e ngoue ʻe ha kau faʻa kehe, ʻa ia ko e faʻahinga te nau ʻange hono ʻinasi ʻi hono taimi totonu.”

Ko ia naʻe ʻikai ke ʻilo ʻe he kau taki lotú ʻa ʻenau fanongonongo ʻa e fakamaau kiate kinautolu pē, koeʻuhi he naʻa nau kau ki he “kau faʻa” faka-ʻIsileli ʻo e “ngoue vaine” faka-puleʻanga ʻa Sihova ko ʻIsilelí. Ko e fua naʻe ʻamanekina ʻe Sihova mei he kau faʻa ko iá ko e tui ki hono ʻAló, ko e Mīsaia moʻoní. ʻI he ʻikai te nau maʻu ʻa e fua ko iá, naʻe fakatokanga ai ʻe Sīsū: “Kuo teʻeki koā ke mou lau ʻi he Tohitapu [ʻi he Sāme 118:​22, 23], Ko e maka ne fakataleʻi ʻe he kau tufunga kuo hoko ʻo tuliki tauʻolunga: Ko e meʻa mei he ʻEiki ia, pea fakaofo ki hotau mata. Ko ia ʻoku ou tala atu, ʻE toʻo meiate kimoutolu ʻa e puleʻanga ʻo e ʻOtua, pea ʻe tuku ki ha kakai ʻoku fua ʻo tāu mo ia. Pea ko ia te ne tō ki he maka ko ia ʻe mafesifesi: ka ka ʻilonga ʻa ia ʻe to ʻa e maka ki ai ʻe laiki ke efu.”

Naʻe toki fakatokangaʻi ʻeni ʻe he kau sikalaipé mo e houʻeiki taulaʻeikí ko e lea ʻa Sīsū ʻo kau kiate kinautolu, pea naʻa nau loto ke tāmateʻi ia, ko e “hoko” pe “ʻea” totonú. Ko ia ko e monū ʻo e hoko ko e kaungāpule ʻi he Puleʻanga ʻo e ʻOtuá naʻe ʻave ia meiate kinautolu ʻi honau tuʻunga ko ha puleʻangá, pea naʻe fakatupu ha puleʻanga foʻou ʻo e ‘kau faʻa ki he ngoue vaine,’ ʻa ia naʻe maʻu mei ai ha ngaahi fua leleí.

Koeʻuhi naʻe ilifia ʻa e kau taki lotú ki he fuʻu kakaí, ʻa ia naʻa nau lau ʻa Sīsū ko ha palōfitá, naʻe ʻikai te nau feinga ke tāmateʻi ia ʻi he taimi ko ʻení. Mātiu 21:​28-46; Maʻake 12:​1-12; Luke 20:​9-19; ʻAisea 5:​1-7.

◆ Ko hai naʻe fakatātaaʻi ʻe he ongo tamaiki ʻi he ʻuluaki talanoa fakatātā ʻa Sīsuú?

◆ Ko hai naʻe fakatātaaʻi ʻe he “matāpule,” ko e “ngoue vaine,” ko e “kau faʻa,” ko e “kau tamaioʻeiki,” mo e “hoko” pe “ʻea” ʻi he talanoa fakatātā hono uá?

◆ Ko e hā naʻe hoko ki he ‘kau faʻa ʻo e ngoue vaine,’ pea ko hai naʻá ne fetongi kinautolú?