Ko ha Afeʻi Taʻu Lelei Lahi ʻOku Ofi Mai

“Pea u vakai ha ngaahi taloni, pea naʻa nau nofo ai, pea naʻe tuku kiate kinautolu ʻa e fakamāu: pea ko e ngaahi laumalie ʻo e kakai ne tuʻusi honau ʻulu koeʻuhi ko ʻenau fakamoʻoni kia Sisu, pea koeʻuhi ko e folofola ʻa e ʻOtua, kaeʻumaʻā ʻakinautolu naʻe ʻikai lotu ki he manu fekai, ʻumaʻā hono ʻimisi, pea naʻe ʻikai te nau maʻu hono fakaʻilonga ʻi honau laʻe, pea ʻi honau nima; naʻe toe moʻui ʻa kinautolu, ʻo nau hau mo Kalaisi ʻi he taʻu ʻe taha afe.” “Pea [ko e ʻOtua] te ne holoholo ʻa e loʻimata kotoa pē mei honau mata [ʻo e faʻahinga ʻo e tangata]; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”​—Fakahā 20:4; 21:4.

KO IA ʻoku kikiteʻi ʻe he Tohitapú ha afeʻi taʻu lelei lahi ʻoku ofi mai​—ko e Pule Taʻu ʻe Taha Afe ʻa Sīsū Kalaisi mo hono kaungā-pule ko e ngaahi tuʻi fakahēvani. Mahalo ʻokú ke hehema ke tukunoaʻi ʻa e kikite ko ʻení ʻo pehē ko ha fakakaukau hala, ko ha misi pē. Ka neongo ia, ʻoku huluʻānoa ʻa e ʻuhingá ia kiate koe ke ke fakakaukau ki he Afeʻi Taʻu ko ení ko ha meʻa moʻoni ʻe hoko!

Ko ha meʻa ʻe taha, ʻe fakahā kiate koe ʻi hoʻo ako ʻa e Tohitapú kuó ne lave ki he hisitōlia ʻo e faʻahinga ʻo e tangatá ʻi he afeʻi taʻu ʻe ono kuo maliu atú ʻi ha founga falalaʻanga fakaofo. ʻIkai ko ia pē, ko e Tohitapú ko ha tohi ia ʻo e kikite, pea ko e lahi ʻo ʻene ngaahi kikité, pe ngaahi palōfisaí, kuo ʻosi fakahoko ʻi hono fakaikiiki kotoa pē.a ʻI he hoko ʻo peheé, ko e hā ʻe ʻikai ke totonu ai ke falalaʻanga ʻa e Tohitapú ʻi hono kikiteʻi ʻa e Afeʻi Taʻu ʻo e pule ʻa Kalaisí ʻoku ofi maí? Ka neongo ia, te ke fifili nai pe ko e hā ʻoku tala mai ʻe he Tohitapú ʻo fekauʻaki mo e vahaʻa taimi ko iá. Ko e hā hono taumuʻá? Pea ko e meʻa ʻoku fakatefito ai ʻene mahuʻinga kiate koé, pe ʻe anga-fēfē ʻene uesia hoʻo moʻuí?

Ko ha Tofiʻa Ne Mole

ʻOku fakahā ʻe he Tohitapú ko e Pule Taʻu Taha Afe ʻa Kalaisí ko ʻene founga ia ke tuku atu ai ʻa e tofiʻa mahuʻinga lahi taha ki heʻene “fānau.” Ka ko e hā ʻa e tofiʻá? Pea ko hai ʻa e “fānau”? Ko ha tofiʻa ʻe fakaʻuhinga nai ko ha meʻa ʻoku tuku atu ke maʻu ʻe ha hako ʻo ha taha ʻi heʻene maté. ʻI he talangataʻa hotau tupuʻanga ko ʻĀtamá ki he ʻOtuá, naʻe mole meiate ia pea mo hono hakó kotoa​—ko e faʻahinga kotoa ʻo e tangatá​—ʻa e totonu ke moʻui taʻengata ʻi he palataisi he māmaní. Ko ia kuo tuku ai ʻe ʻĀtama ha tofiʻa ko e angahala, mate, mo e moʻui mamahi ki hono hakó.​—Sēnesi 3:​1-19; Loma 5:12.

Naʻe haʻu ʻa Sīsū ʻi he kakano ki he māmaní ke ne fakafoki mai ki he faʻahinga ʻo e tangatá ʻa e tofiʻa naʻe mole mei a ʻĀtamá. Naʻá ne fai eni ʻaki ʻene fakamoʻoniʻi ʻene angatonú ki he ʻOtua ko Sihová, ʻo ne foaki loto ki ai ʻa ʻene moʻuí koeʻuhi ko e faʻahinga ʻo e tangatá. (Sione 3:16) ʻI heʻene moʻui haohaoá, ʻikai ha angahalá, naʻe maʻu ai ʻe Sīsū ʻa e totonu ki he moʻui haohaoa taʻengata ʻi he Palataisi ʻi he māmaní​—ʻa e meʻa tofu pē ko ia naʻe mole mei a ʻĀtamá. Kaekehe, naʻe ʻikai pē ke ngāueʻaki ʻe Sīsū ia ʻa e totonu ko iá; pea naʻe ʻikai ke mole ia meiate Ia ʻi heʻene maté pea kuo fokotuʻu hake ia ke moʻui ʻi hēvani. Ko ia ai naʻá ne malava ke ngāueʻaki ia ko ha tofiʻa mahuʻinga ke ne ʻoatu ki heʻene “fānau.”​—Loma 5:​18, 19.

Ko e Ngaahi ʻEa​—Ko e “Fānau” ʻa Kalaisi

ʻIa ʻAisea 9:6 kuo ui fakaekikite ai ʻa Sīsū ko e “Tamai Taʻengata.” ʻOkú ne hoko ko e Tamai Taʻengata ki he māmani ʻo e faʻahinga ʻo e tangatá kuo huhuʻí, ʻi ha tuʻunga ke ne tuku atu ha tofiʻa ki he faʻahinga ko ʻeni kuo huhuʻí, pe fānau kuo ohi. (Mātiu 20:28; sio foki kia Sāme 37:​18, 29.) ʻOku fakahā mahino ʻeni ʻi heʻene talaʻofá: “Omi kimoutolu, ʻa e faʻahinga kuo fakamonuʻia ʻe heʻeku Tamai, ʻo mou hoko ki he puleʻanga kuo toka teuteu moʻomoutolu talu e tanu pou ʻo mamani.” Naʻá ne toe pehē: “Monūʻiaā ka ko kinautolu ʻoku faʻa kataki: he ʻe to moʻonautolu ʻae fonua [māmani, NW].”​—Mātiu 5:5; 25:34.

Kaekehe, ke hoko ʻa e māmaní ko ha tofiʻa ʻoku taau, kuo pau ke fetongi ʻa e ngaahi tuʻunga ʻi aí​—ke hoko ki he tuʻunga haohaoa! Kuo pau ke hoko ko ha māmani ʻe ʻi ai ʻa e melino haohaoa mo e fetāiaki ʻi he lotolotonga ʻo e ngaahi meʻa moʻui kotoa pē ʻa e ʻOtuá. (ʻAisea 11:​6-9) Kuo pau ke fakaʻauha ʻa e aka kotoa pē ʻo e taʻehaohaoa fakaetangatá, kau ki ai mo e maté. (1 Kolinitō 15:​25, 26) ʻOku ʻuhinga ʻení kuo pau ke toetuʻu ʻa e kau maté, ʻa ia ko e konga ʻo e faʻahinga ʻo e tangata kuo huhuʻí. ʻI he founga pē ko ʻení ʻe lava ai ke nau maʻu ʻa e faingamālie ke hoko ko e ngaahi ʻea ʻo Kalaisi!​—Sione 5:​28, 29.

Ko ia, ko e Pule Taʻu Taha Afe ʻa Kalaisí ko ha vahaʻa taimi ia ʻo e fiefia pea ʻi he lolotonga iá ko e faʻahinga ʻo e tangatá ʻe māmālie pē ʻa hono “fakaʻataʻatā mei heʻene popula ki he ʻauha” pea aʻusia ʻa e haohaoá. (Loma 8:21) ʻOku fakatupu-tokanga, naʻa mo e ngaahi maʻuʻanga fakamatala fakamāmaní ʻoku nau fakatokangaʻi ʻeni ko e taumuʻa ia ʻo ha afeʻi taʻu. ʻOku fakaʻuhingaʻi ʻe he Webster’s Ninth New Collegiate Dictionary (1985 edition) ʻa e “afeʻi taʻu” ko ha “vahaʻa taimi ʻo e fiefia lahi pe haohaoa fakaetangata.”

ʻE Laka Ia ʻi he Pule ʻa Solomoné

ʻOku malava ke fakatatau ʻa e Afeʻi Taʻu lāngilangiʻia ko ʻení ki he pule ʻa Solomone ʻi he melino mo e mahu ʻi he taʻu ʻe 40 ki ʻIsileli ʻo e kuonga muʻá. (1 Tuʻi 4:​24, 25, 29) Naʻe pehē ʻe he kuini ʻo Sipá ʻi heʻene ʻaʻahi kia Solomoné: “Ta ko e talanoa naʻa ku fanongo ki ai ʻi hoku fonua hoʻo ngaahi ngaue, pea mo hoʻo poto, ko e moʻoni pe. Ka naʻe ʻikai te u tui ki he meʻa naʻe lau, kaeʻoua ke u haʻu ʻo sio ki ai hoku mata ni: pea ta ko e vaeua naʻe ʻikai tala mai: ʻoku hulu atu hoʻo poto mo ho monuʻia ʻi he ongoongo naʻa ku maʻu. Monuʻiaā ka ko hoʻo kau tangata ni, monuʻiaā ka ko hoʻo kau tamaioʻeiki ni, ʻa ia ʻoku nau tutuʻu maʻu pe ʻi ho ʻao ʻo fanongoa hoʻo poto.”​—1 Tuʻi 10:​6-8.

Kapau ko e melino, mahu, mo e poto ʻo Tuʻi Solomone fakamāmani ʻi he taʻu ʻe 40 naʻe laka ia, ʻio naʻe lahi ange ʻi he liunga ua ʻo e ngaahi ʻamanaki ʻa e kuini ʻo Sipá, ko ia ko e Pule Taʻu Taha Afe ʻa Tuʻi Solomone faka-hēvani lahi angé, ʻa Sīsū Kalaisi, te ne lakasi ʻe ia ʻa e ngaahi fakakaukau ʻa e tangatá! ʻI he ngaahi lea ʻa Sīsū tonu pē, ko iá “ʻoku lahi ʻia Solomone.” (Mātiu 12:42) Feinga ke sio loto ki he ngaahi tuʻunga moʻui lelei taha, mahu, melino, angatonu, mo e fiefia ʻi he māmaní ʻe lava ke ke fakakaukau ki aí, pea ʻe ʻikai te ke lava ke maʻu ha kiʻi konga siʻi pē ʻo e meʻa ʻoku tuku tauhi ʻe he Afeʻi Taʻu ʻa Kalaisí.

ʻE Hoko Taimi Taha mo e Afeʻi Taʻu Hono Tolú?

ʻOku fakahā ʻe he ngaahi meʻa ʻi he māmaní talu mei he 1914 ʻoku tau moʻui ʻi he ‘fakaʻosiʻosi ʻo e ngaahi meʻa ʻoku tuʻu ní.’ Naʻe toe pehē ʻe Sīsū ko e toʻutangata naʻe hoko ai ʻa e ngaahi meʻa naʻe kikiteʻí “ʻe ʻikai ʻaupito mole. . . , kaeʻoua ke hoko ʻa e ngāhi meʻa ko ia kotoa pe.” Ko ia, ʻoku ʻuhinga ʻení, ʻe hoko taimi taha ʻa e Pule Afeʻi Taʻu ʻa Kalaisí mo e afeʻi taʻu hono tolú?​—Mātiu 24:​3-21, 34.

Naʻe fakatokangaʻi ʻe Sīsū ʻa ʻene kau ākongá ke ʻoua te nau fakamahalo. Naʻá ne pehē: “ʻOku ʻikai ʻamoutolu ke ʻilo ʻa e ngaahi taimi mo e ngaahi kuonga, ʻa ia kuo taʻofi ʻe he Tamai ki heʻene faʻiteliha aʻana.” (Ngāue 1:7) Pea fekauʻaki mo e “ʻaho ko ia mo hono houa” ʻe hoko ai ʻa e ngaahi meʻa ko ení, naʻe pehē ʻe Sīsū ko ʻene Tamaí pē, ko e ʻOtua ko Sihová ʻoku ʻilo ki aí. (Mātiu 24:36) Ko ia, ʻoku ʻikai ke poupouʻi ʻe he Tohitapú ha taha ʻo e fuʻu kau palōfita he ʻahó ni ki he ngataʻanga ʻo e māmaní mo e ngaahi meʻa ʻoku nau tuhu ki ai ʻe hoko ʻi he tuʻuapō ʻo e Taʻu Foʻou ʻo e 1999, ko e ngataʻanga ia ʻo e māmaní.

Kaekehe, ko e ngaahi meʻa ʻoku lolotonga hoko ʻi he māmaní ʻoku nau fakahā mahino ai ko e ngataʻanga ʻo e fakapoʻuli ko ʻení, ʻo e ngaahi meʻa anga-fulikivanú kuo “fakaʻau atu” pea ko e Afeʻi Taʻu ʻa Kalaisí “kuo ofi.” (Loma 13:12) Ko e taimi mahuʻinga ʻeni ke maʻu ʻa e ʻilo ki he ngaahi fiemaʻu ʻa e ʻOtuá ki he fakahaofí, kae ʻikai ko hono fakamahaloʻi ʻa e ʻaho mo e houa pau ke hoko ai ʻa e ngaahi meʻa ko ʻení. (Sione 17:3) ʻI he founga ko ʻení ʻe lava ai ke ke ako ai ki he founga ke kau kiate kinautolu ʻa ia ʻe pehē ki ai ʻe Sīsū: “Omi kimoutolu, ʻa e faʻahinga kuo fakamonuʻia ʻe heʻeku Tamai, ʻo mou hoko ki he puleʻanga kuo toka teuteu moʻomoutolu talu e tanu pou ʻo mamani.” (Mātiu 25:34) ʻOku loto-fietokoni ʻa e Kau Fakamoʻoni ʻa Sihová pea ʻe malava ke nau tokoniʻi koe ke kau kiate kinautolu ʻa ia te nau fiefia ʻi he ngaahi tāpuaki ʻo e Afeʻi Taʻu lelei lahi kuo mei hokó.b

[Fakamatala ʻi lalo]

[Fakamatala ʻi he peesi 6]

“Omi kimoutolu, ʻa e faʻahinga kuo fakamonuʻia ʻe heʻeku Tamai, ʻo mou hoko ki he puleʻanga kuo toka teuteu moʻomoutolu talu e tanu pou ʻo mamani”