ʻOku Ueʻi Koe ʻe Hoʻo Tuí Ke Ke Fai ha Meʻa?

KO E ʻōfisa fakakautaú naʻá ne tuipau ʻe lava ke fakamoʻui ʻe Sīsū ʻa e mamatea ʻo e pōpula ʻa e ʻōfisá. Ka naʻe ʻikai ke fakaafeʻi ʻe he ʻōfisa fakakautaú ʻa Sīsū ki hono ʻapí, mahalo pē nai koeʻuhi naʻá ne ongoʻi taʻetaau pe koeʻuhí he ko ha Senitaile ia. ʻI hono kehé, naʻe ʻai ʻe he ʻōfisá ha kau tangata matuʻotuʻa ʻi he kau Siú ke nau fakaofiofi kia Sīsū ʻo pehē: “ʻEiki, ʻoku ʻikai te u tāu ke ke hu mai ki hoku pokoʻi fale: ka ke fai pē ha foʻi folofola, pea ʻe moʻui ai ʻeku tamaioʻeiki.” ʻI hono ʻiloʻi naʻe tui ʻa e ʻōfisa fakakautaú ʻe lava ʻa Sīsū ʻo faifakamoʻui mei he mamaʻó, naʻe tala ʻe Sīsū ki he fuʻu kakai naʻe muimui ʻiate iá: “Ko au ē, ʻoku ou tala atu, naʻe ʻikai te u ʻilo mei ha taha ʻi Isileli ha tui ʻoku pehē fau.”—Mātiu 8:​5-10; Luke 7:​1-10.

ʻOku lava ke tokoniʻi kitautolu ʻe he meʻa ko eni naʻe hokosiá ke tau tokangataha ki he ʻelemēniti tefito ʻo e tuí. Ko e tui moʻoní ʻoku ʻikai ko ha tui taʻelongomoʻui; ʻoku poupouʻi ia ʻe he ngāue. Naʻe fakamatala ʻa e tokotaha-tohi Tohi Tapu ko Sēmisí: “Pehe foki ʻa e tui, kapau ʻoku ʻikai ke ō mo e ngaue, ʻoku mate pe ia, heʻene tuʻu taha.” (Semisi 2:17) ʻOku hoko ʻo toe māʻalaʻala ange ʻa e foʻi moʻoni ko ení ʻi heʻetau fakakaukau ki ha fakatātā moʻoni ʻo e meʻa ʻe lava ke hoko ʻi he taimi ʻoku hoko ai ʻo taʻelongomoʻui ʻa e tuí.

ʻI he 1513 K.M., naʻe haʻisia ai ʻa e puleʻanga ʻIsilelí kia Sihova ko e ʻOtuá fakafou ʻi he fuakava Laó. ʻI he tuʻunga ko e fakalaloa ʻo e fuakava ko iá, naʻe fakahaaʻi ʻe Mōsese ʻa e folofola ʻa e ʻOtuá ki he fānau ʻIsilelí: “Kabau te mou tuitala mooni ki hoku leʻo, o tauhi eku fuakava, te mou iate au koe . . . kakai maonioni.” (Ekisoto 19:​3-6, PM) ʻIo, naʻe fakatuʻunga ʻa e tuʻunga māʻoniʻoni ʻo ʻIsilelí ʻi he talangofuá.

ʻI he ngaahi senituli lahi ki mui ai, naʻe kamata ke mahuʻingaʻia lahi ange ʻa e kau Siú ʻi hono ako ʻo e Laó kae ʻikai ko hono ngāueʻaki ʻa hono ngaahi tefitoʻi moʻoní. ʻI heʻene tohi The Life and Times of Jesus the Messiah, naʻe tohi ai ʻe Alfred Edersheim: “Ko e [kau lāpaí]—ʻa e ‘faʻahinga lalahi ʻo e māmaní’ naʻe fuoloa pē ʻenau fakapapauʻi ʻoku muʻomuʻa ʻa e akó ʻi he ngaahi ngāué.”

Ko e moʻoni, naʻe fekauʻi ʻa e kau ʻIsileli he kuonga muʻá ke nau ako tōtōivi ʻa e ngaahi fiemaʻu ʻa e ʻOtuá. Naʻe pehē ʻe he ʻOtuá tonu: “Ko e ngaahi foʻi folofola ko ʻeni ʻoku ou kouna atu he ʻaho ni ʻe fuesia ʻe ho loto: pea te ke uhuʻi ki hoʻo fanau, pea te ke lea ki ai ʻi hoʻo nofo ʻi ho fale, pea ʻi hoʻo ʻalu ʻi he hala, pea ʻi hoʻo tokoto hifo, pea ʻi hoʻo tuʻu hake.” (Teutalonome 6:​6, 7) Ka naʻe ʻuhinga ʻi ha taimi ʻa Sihova ke muʻomuʻa ʻa hono ako ʻo e Laó ʻi hono fai ʻo e ngaahi meʻa ʻoku fehoanaki mo iá pe fakahaaʻi ʻe he Laó? Tau vakai angé ki aí.

Ngaahi Ako Tuʻunga Mataotao

Ko hono fokotuʻu ʻa e fakamamafa tōtuʻa ki hano ako ʻo e Laó naʻe ʻuhinga lelei nai ia ki he kau ʻIsilelí, koeʻuhi naʻe pehē ʻi ha talatukufakaholo faka-Siu ʻe taha, naʻe fakamoleki ʻe he ʻOtuá tonu ʻa e houa ʻe tolu ʻi he ʻaho kotoa pē ʻi hono ako ʻo e Laó. ʻE lava ke ke sio ai ki he ʻuhinga ʻe fakaʻuhinga nai ai ʻa e kau Siu ʻe niʻihi, ‘Kapau ʻoku ako tuʻumaʻu ʻe he ʻOtuá ʻa e Laó, ʻikai ʻoku totonu ki heʻene ngaahi meʻamoʻui fakamāmaní ke nau kau kakato ʻi hono fai ʻa e meʻa tatau?’

ʻI he ʻuluaki senituli T.S., ko e nōfoʻi ʻa e kau lāpaí ʻi hono ʻanalaiso mo fakaʻuhinga ʻa e Laó naʻe mioʻi fakaʻaufuli ai ʻenau fakakaukaú. “Ko e kau sikalaipe mo e Falesi ʻoku nau . . . lea kae ʻikai fai ki ai,” ko e lea ia ʻa Sīsuú. “ʻOku nau haʻihaʻi ʻa e ngāhi kavenga mamafa, mo ʻai ki he uma ʻo e kakai; ka ko kinautolu ʻoku ʻikai te nau fie ʻai hanau foʻi tuhu ke hiki ia.” (Mātiu 23:​2-4) Ko e kau taki lotu ko iá naʻa nau hilifaki ki he kakai lāuvalé ʻa e ngaahi lao mo e tuʻutuʻuni taʻefaʻalaua, ka naʻa nau maʻu ʻenautolu tonu ʻi he mālualoi ʻa e ngaahi founga ʻa ia naʻe ʻikai fakakau ai kinautolu ki hono tauhi ʻo e ngaahi lao tatau ko iá. ʻIkai ngata aí, naʻe tokangataha ʻa e kau tangata ko iá ki he ako lahi ʻi he tuʻunga mataotaó ʻo nau “tuku ʻa e ngāhi meʻa mamafa ʻo e Lao, ʻa e fakamāu totonu, mo e fai mesi, mo e lototō.”—Mātiu 23:​16-24.

He taʻehuʻufataha ē ko ia he ʻi he kumi ke fokotuʻu ʻa e māʻoniʻoni pē ʻanautolú, naʻe iku ai ʻa e kau sikalaipé mo e kau Fālesí ki hono maumauʻi ʻa e Lao tofu pē ko ia naʻa nau taukaveʻi ʻoku nau poupouʻí! Ko e kotoa ʻo e ngaahi senituli ʻo e fakakikihi ʻi he ngaahi lea mo e fanga kiʻi fakaikiiki ʻo e Laó naʻe ʻikai ʻomai ai kinautolu ke nau ofi ange ki he ʻOtuá. Ko e olá naʻe meimei tatau ia mo e māvahevahe naʻe fakatupunga ʻe he meʻa naʻe ui ʻe he ʻapositolo ko Paulá ko e “koto lau,” “ngaahi fakakikihi,” mo e “ʻIlo-loloto” hala. (1 Timote 6:​20, 21) Kae kehe, ko e toe palopalema mafatukituki ʻe taha, ko e tākiekina naʻe fai ʻe he fekumi taʻefakangatangata ko iá kia kinautolú. Naʻe ʻikai te nau hoko ʻo maʻu ʻa e faʻahinga tui naʻe ueʻi ai kinautolu ki he ngāue totonú.

Ngaahi ʻAtamai Poto, Ngaahi Loto Taʻetui

He kehekehe ē ko e fakakaukau ʻa e kau taki lotu Siú mei he fakakaukau ʻa e ʻOtuá! Taimi nounou ki muʻa ke hū ʻa e kau ʻIsilelí ki he Fonua ʻo e Talaʻofá, naʻe tala ange ʻe Mōsese kia kinautolu: “Mou ʻai homou loto ki he ngaahi meʻa ʻoku ou fakapapau atu he ʻaho ni, ʻa ia te mou tuʻutuʻuni ki hoʻomou fanau, ke tauhi mo fai ʻa e ngaahi lea kotoa ʻo e lao ni.” (Teutalonome 32:46) ʻOku hā mahino, ko e kakai ʻa e ʻOtuá naʻe ʻikai fiemaʻu ke nau hoko pē ko e kau mataotao ʻo e Laó ka ko e kau fai ki he Laó.

Kae kehe, naʻe fakamoʻoniʻi ʻe he puleʻanga ʻIsilelí ʻenau taʻefaitōnunga kia Sihová. ʻI he ʻikai ke fai ʻa e faʻahinga ngāue ʻoku totonú, ko e fānau ʻIsilelí “naʻe ʻikai te [nau] tui kiate ia, pea naʻe ʻikai te [nau] fakaongo ki hono leʻo.” (Teutalonome 9:23; Fakamaau 2:​15, 16; 2 Kalonikali 24:​18, 19; Selemaia 25:​4-7) Fakaʻosí, naʻe fai ʻe he kau Siú ʻenau ngāue taʻefaitōnunga kovi tahá ʻi he taimi naʻa nau siʻaki ai ʻa Sīsū ʻi hono tuʻunga ko e Mīsaiá. (Sione 19:​14-16) Ko hono olá, naʻe siʻaki ai ʻe Sihova ko e ʻOtuá ʻa ʻIsileli pea fakahanga ʻa ʻene tokangá ki he ngaahi puleʻangá.—Ngāue 13:46.

ʻOku fiemaʻu moʻoni ke tau tokanga ke ʻoua ʻe tō ki he tauhele tatau—ʻi he fakakaukau ʻe lava ke tau lotu ki he ʻOtuá ʻaki ʻa e ʻatamai poto ka ko e loto taʻetui. ʻI he toe fakalea ʻe tahá, ko ʻetau ako ʻa e Tohi Tapú ʻoku fiemaʻú ke hoko ko e meʻa lahi ange ia ʻi ha ako pē ke fokotuʻuna ʻa e ʻiló. Ko e ʻilo totonú kuo pau ke aʻu ia ki hotau lotó ke ne ueʻi ʻetau moʻuí ki he tuʻunga lelei ange. ʻE ʻuhinga lelei ke ako ki he ngoue vesitapoló kae ʻikai ʻaupito ke tō ha ngaahi tengaʻi vesitapolo? Ko hono moʻoní, ʻe lava ke tau maʻu ha lahi pau ʻo e ʻilo fekauʻaki mo hono tō ha ngoué, ka ʻe ʻikai ʻaupito ke tau utu ai ha meʻa! ʻI he tuʻunga meimei tatau, ko e kakai ʻoku nau ʻilo ki he ngaahi fiemaʻu ʻa e ʻOtuá fakafou ʻi ha ako ʻo e Tohi Tapú kuo pau ke nau fakaʻatā ʻa e ngaahi tenga ʻo e moʻoní ke aʻu ki he lotó koeʻuhi ke tupu hake ʻa e ngaahi tenga ko iá pea ueʻi ai kinautolu ke nau fai ha meʻa.​—Mātiu 13:​3-9, 19-​23.

“Mou Hoko ko e Kau Fai ki he Folofola”

Naʻe pehē ʻe he ʻapositolo ko Paulá “ʻoku tupu ʻa e tui mei he fanongo.” (Loma 10:17) Ko e hokohoko fakanatula ko eni mei he fanongo ki he Folofola ʻa e ʻOtuá ki hono ngāueʻi ʻa e tui ki hono ʻAló, ʻa Sīsū Kalaisí, ʻokú ne ʻomai ai kia kitautolu ʻa e ʻamanaki ki he moʻui taʻengatá. ʻIo, ʻoku fiemaʻu ʻa e meʻa lahi ange ia ʻi he leá pē, ‘ʻOku ou tui ki he ʻOtuá mo Kalaisi.’

Naʻe ekinaki ʻa Sīsū ki hono kau muimuí ke nau maʻu ʻa e faʻahinga tui ʻa ia te ne ueʻi kinautolu ke nau fai ha meʻá: “Ko e meʻa ko ia kuo fakalangilangiʻi ai ʻa ʻeku Tamai, koeʻuhi ke iku ki hoʻomou fua lahi, mo hoʻomou mātuʻaki hoko ko e kau ako aʻaku.” (Sione 15:8) Ki mui ai, naʻe tohi ʻe he tokoua faʻē-taha ʻo Sīsū ko Sēmisí: “Mou hoko ko e kau fai ki he folofola, ʻo ʻikai ko e kau fanongo pe.” (Semisi 1:22) Ko ia ai, ʻe lava fēfē ke tau ʻiloʻi ʻa e meʻa ke faí? ʻI he leá mo e faʻifaʻitakiʻangá, naʻe fakahaaʻi ai ʻe Sīsū ʻa e meʻa ʻoku fiemaʻu ke tau fai ke fakahōifuaʻi ʻa e ʻOtuá.

Lolotonga ʻene ʻi māmaní, naʻe ngāue mālohi ai ʻa Sīsū ke pouaki ʻa e ngaahi meʻa ʻo e Puleʻangá pea ke fakalāngilangiʻi ʻa e huafa ʻo ʻene Tamaí. (Sione 17:​4-8) ʻI he founga fē? ʻE manatuʻi nai ʻe he kakai tokolahi ʻa e ngaahi mana ʻa Sīsū ko hono fakamoʻui ʻa e mahakí pea mo e heké. Ka ʻoku fakahaaʻi mahino ʻe he Kōsipeli ʻa Mātiú ʻa e founga mahuʻinga tahá: “Pea foli ʻe Sisu ʻa e ngāhi kolo mo e ngāhi vilisi, ʻo ne faiako ʻi honau ngāhi falelotu, mo ne malangaʻaki ʻa e Kosipeli ʻo e Puleʻanga.” Fakatokangaʻi, naʻe ʻikai fakangatangata pē ʻe Sīsū ʻene ngāue fakafaifekaú ke lea ʻi ha founga ʻikai anga-maheni ki ha ngaahi kaumeʻa tokosiʻi mo e mahení, pe ki he faʻahinga naʻa nau fetuʻutaki mo ia ʻi he feituʻú. Naʻá ne fāinga mālohi, ʻo ngāueʻaki ha ngaahi founga pē naʻe faingamālie kiate ia ke ne ʻaʻahi ai ki he kakaí ʻi “Kaleli kātoa.”—Mātiu 4:​23, 24; 9:35.

Naʻe fakahinohinoʻi ʻe Sīsū ʻa hono kau muimuí ke nau kau foki ki he ngāue ngaohi-ākongá. Ko e moʻoni, naʻá ne fokotuʻu ha faʻifaʻitakiʻanga haohaoa kia kinautolu ke nau faʻifaʻitaki ki ai. (1 Pita 2:21) Naʻe tala ʻe Sīsū ki heʻene kau ākonga faitōnungá: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu ki he Huafa ʻo e Tamai mo e ʻAlo mo e Laumalie Maʻoniʻoni, mo e akoʻi kinautolu ke tauhi ʻa e ngāhi meʻa kotoa pe kuo u tuʻutuʻuni atu.”​—Mātiu 28:​19, 20.

Ko e moʻoni, ko e kau ʻi he ngāue fakamalangá ʻoku ʻomai ai ha pole moʻoni. Naʻe pehē tonu ʻe Sīsū: “Ko eni, ʻoku ou tuku atu kimoutolu ke mou hange ha fanga lami ʻi he lotolotonga ʻo e fanga ulofi.” (Luke 10:3) ʻI he taimi ʻoku tau fehangahangai ai mo e fakafepakí, ko ha hehema fakanatula ia ke holomui koeʻuhí ke tau hao ai mei he mamahi pe loto-moʻua ʻoku ʻikai fiemaʻú. Ko e meʻa ia naʻe hoko ʻi he efiafi ʻo hono puke ʻo Sīsuú. Naʻe hola ʻa e kau ʻapositoló hili hono ikuʻi kinautolu ʻe he manavaheé. Ki mui ai ʻi he efiafi ko iá, naʻe fakafisingaʻi tuʻo tolu ai ʻe Pita ʻoku ʻikai te ne ʻiloʻi ʻa Sīsū.​—Mātiu 26:​56, 69-​75.

ʻIkai ko ia pē, te ke ʻohovale nai ke ʻiloʻi naʻa mo e ʻapositolo ko Paulá naʻá ne pehē naʻá ne fāinga ke malangaʻi ʻa e ongoongo leleí. Naʻá ne tohi ki he fakatahaʻanga ʻi Tesalonaiká: “Naʻa mau langaʻi ʻa e loto-toʻa fakafou ʻi hotau ʻOtuá ke leaʻaki kiate kimoutolu ʻa e ongoongo lelei ʻa e ʻOtuá fakataha mo ha fuʻu fāinga lahi.”—1 Tesalonaika 2:​1, 2, NW.

Ko Paula mo hono kaungā ʻapositoló naʻa nau malava ke ikuʻi ha faʻahinga manavahē pē ʻi he lea ki he niʻihi kehé fekauʻaki mo e Puleʻanga ʻo e ʻOtuá, pea te ke lava pē mo koe ke pehē. Anga-fēfē? Ko e sitepu mahuʻinga tahá ke falala kia Sihova. Kapau te tau falala kakato kia Sihova, ʻe ueʻi kitautolu ʻe he tui ko iá ke fai ha meʻa, pea te tau malava ai ke fai ʻa hono finangaló.​—Ngāue 4:​17-​20; 5:​18, 27-​29.

ʻOku ʻi Ai ha Pale ki Hoʻomou Ngāué

ʻOku ʻafioʻi lelei ʻe Sihova ʻa e feinga ʻoku tau fai ke tauhi kiate iá. Ko e fakatātaá, ʻokú ne ʻafioʻi ʻa e taimi ʻoku tau puke ai pe ongosiá. ʻOkú ne lāuʻilo ki heʻetau ngaahi filingauá mo e veiveiuá. ʻI he taimi ʻoku lōmekina ai kitautolu ʻe he ngaahi kavenga fakapaʻangá pe ʻi he taimi ʻoku hā ngali fakasiva ʻamanaki ai ʻetau moʻuí pe ko ʻetau ngaahi ongoʻí, ʻoku lāuʻilo maʻu pē ʻa Sihova ki hotau tuʻungá.​—2 Kalonikali 16:9; 1 Pita 3:​12.

He pau moʻoni ē ko e fiefia ʻa Sihová he neongo ʻetau ngaahi taʻehaohaoá mo e ngaahi faingataʻá, ʻoku ueʻi kitautolu heʻetau tuí ke fai ha meʻa! Ko e tokanga fakaalaala ʻoku maʻu ʻe Sihova ki heʻene kau sevāniti faitōnungá ʻoku ʻikai ko ha ongoʻi fakaʻalongaua pē—ʻoku poupouʻi ia ʻaki ha palōmesi. ʻI he malumalu ʻo e fakamānavaʻi fakaʻotuá, naʻe tohi ʻe he ʻapositolo ko Paulá: “Talaʻehai ʻoku fai taʻetotonu ʻa e ʻOtua ke ne fakangaloʻi hoʻomou ngaue, mo e ʻofa ki hono huafa naʻe ha ʻiate kimoutolu ʻi hoʻomou tokoni ki he kakai lotu, ʻa ia foki ʻoku mou kei fai.”—Hepelu 6:10.

ʻOku lava ke ke falala ki hono fakamatalaʻi ʻe he Tohi Tapú ʻa Sihova “ko e ʻOtua ʻo e Moʻoni, pea taʻe haʻane hala,” pea “te ne hanga ʻo totongi kiate kinautolu ʻoku kumi hakili kiate ia.” (Teutalonome 32:4; Hepelu 11:6) Ko e fakatātaá, ʻoku manatu ha fefine ʻi Kalefōnia, U.S.A.: “Naʻe ngāue ʻa ʻeku tamaí ko ha faifekau taimi-kakato ʻo feʻunga mo e taʻu ʻe hongofulu ki muʻa ke ne tauhi ha fāmilí. Naʻá ne fakafiefiaʻi au ʻaki ʻa e ngaahi talanoa ki he anga hono fakaivia ia ʻe Sihova ʻi he ngāue fakafaifekaú. Naʻe tuʻo lahi ʻa e taimi naʻá ne fakamoleki ai ʻa e paʻanga kotoa naʻá ne maʻú ki ha penisini koeʻuhí ke ne ʻalu ai ʻi he ngāue fakafaifekaú. ʻI heʻene aʻu ki ʻapi mei he ngāue fakafaifekaú, naʻe faʻa ʻi ai ʻa e ngaahi tokonaki taʻeʻamanekina ne tuku tatali mai kiate ia ʻi he matapaá.”

Tānaki atu ki he tokoni fakamatelié, “koe Tamai ae gaahi aloofa, moe Otua oe fiemalie kotoabe” ʻokú ne ʻomai kia kitautolu ʻa e tokoni fakaeongo mo fakalaumālie. (2 Kolinito 1:​3, PM) “Ko e falala kia Sihová ko ha ongoʻi fakafiemālie ia,” ko e lau ia ʻa e Fakamoʻoni ʻe taha ʻa ia kuó ne kātekina ʻa e ngaahi ʻahiʻahi lahi ʻi he faai mai ʻa e ngaahi taʻú. “ʻOku ʻoatu kia koe ʻa e faingamālie ke falala ai kia Sihova pea sio ki he anga ʻo ʻene ngāué ʻi heʻene tokoniʻi koé.” ʻE lava ke ke fakaofiofi anga-fakatōkilalo ki he “Tokotaha-Fanongo ki he lotú,” ʻo fakapapauʻi te ne tokanga ki hoʻo ngaahi hohaʻa fakafoʻituituí.—Sāme 65:​2, NW.

Ko e ngaahi tāpuaki mo e pale ʻoku maʻu ʻe he kau ngāue utu-taʻu fakalaumālié ʻoku lahi. (Mātiu 9:​37, 38) Ko e kau ʻi he ngāue fakafaifekau ki he kakaí kuo ne ʻomai ʻa e ngaahi ʻaonga fakaemoʻuilelei ki he tokolahi pea te ne fai nai ʻa e meʻa tatau kiate koe. Neongo ia, ko e meʻa ʻoku mahuʻinga angé, ko e faifakamoʻoni ki he niʻihi kehé ʻokú ne tokoniʻi kitautolu ke fakaivimālohiʻi ha vahaʻangatae lelei mo e ʻOtuá.​—Semisi 2:​23.

Hanganaki Failelei

ʻE hoko ko ha fehālaaki ia ki he taha ʻo e kau sevāniti ʻa e ʻOtuá ke ne fakaʻosiʻaki ʻoku siva ʻa e ʻamanaki ʻa Sihová kapau ʻoku taʻofi ia ʻi ha founga ʻe he vaivaí pe taʻumotuʻá mei hono fai ʻa e meʻa kotoa te ne loto ke fai ʻi he ngāue fakafaifekaú. Ko e meʻa tatau pē ʻi he fekauʻaki mo e faʻahinga ʻoku fakangatangata kinautolu ʻe he mahamahakí, ngaahi fatongia fakafāmilí pe ko e ngaahi tuʻunga kehé.

Manatuʻi ʻi he taimi naʻe ongoʻi fakangatangata ai ʻa e ʻapositolo ko Paulá ʻi ha vaivai pe fakafaingataʻaʻiaʻangá, naʻe ‘tuʻo tolu ʻene kōlenga ki he ʻEikí, ke mavahe atu muʻa ia’ meiate ia. ʻI he ʻikai ke fakamoʻui ʻa Paula koeʻuhi ke ne lava ʻo fakahoko ʻa e meʻa lahi ange ʻi he ngāue ʻa Sihová, naʻe folofola ʻa e ʻOtuá: “Ko ʻeku ʻofa maʻataʻataá ʻoku feʻungaʻānoa ia kiate koe; he ko hoku mālohí ʻoku hoko ʻo haohaoa ʻi he vaivaí.” (2 Kolinito 12:​7-10, NW) Ko ia ai, fakapapauʻi neongo ha ngaahi tuʻunga faingataʻa pē nai ʻokú ke kātekina, ʻoku fakamahuʻingaʻi ʻe hoʻo Tamai fakahēvaní ha meʻa pē ʻoku malava nai ke ke fai ke fakalahi atu ai ʻa e ngaahi meʻa ʻokú ne tokanga ki aí.​—Hepelu 13:​15, 16.

Ko hotau Tokotaha-Fakatupu ʻofá ʻoku ʻikai te ne fiemaʻu mai ha meʻa lahi ange meia kitautolu ʻi he meʻa ʻoku malava ke tau foakí. ʻOkú ne kole mai pē ke tau maʻu ʻa e faʻahinga tui ʻoku ueʻi ai kitautolu ke fai ha meʻá.

[Fakatātā ʻi he peesi 26]

Naʻe feʻunga ʻa hono ako ʻo e Laó?

[Fakatātā ʻi he peesi 29]

Ko ʻetau tuí ʻoku fiemaʻu ke poupouʻi ia ʻe he ngaahi ngāue