Founga Hono Fakalele ʻo e Fakatahaʻangá

Ko Sihová ko ha ʻOtua ʻo e maau. (1 Kolinitō 14:33) Ko ia ʻoku tau ʻamanekina hono kakaí ke hoko ʻo maau. ʻOku anga-fēfē hono fokotuʻutuʻu maau ʻa e fakatahaʻanga faka-Kalisitiané? ʻOku lava fēfē ke tau poupou ki he lavameʻa ʻa e fakatahaʻangá?

1. Ko hai ʻa e ʻulu ʻo e fakatahaʻangá?

“Ko e Kalaisí ko e ʻulu ia ʻo e fakatahaʻangá.” (ʻEfesō 5:23) Mei hēvani, ʻokú ne tataki ʻa e ngāue ʻa e kakai ʻa Sihová ʻi māmaní. Naʻe fakanofo ʻe Sīsū ʻa e “tamaioʻeiki anga-tonu mo potó” ko ha kulupu toko siʻi ʻo e kau mātuʻa taukei ʻa ia ʻoku toe ui ko e Kulupu Pulé. (Lau ʻa e Mātiu 24:45-47.) Hangē ko e kau ʻapositolo mo e kau mātuʻa ʻi he ʻuluaki senitulí ʻi Selusalemá, ko e Kulupu Pulé ʻoku nau ʻoatu ʻa e fakahinohino ki he ngaahi fakatahaʻanga ʻi māmaní. (Ngāue 15:2) Ka ko e kau tangata ko ení ʻoku ʻikai ko e kau taki kinautolu ʻo ʻemau kautahá. ʻOku nau hanga kia Sihova mo ʻene Folofolá ki ha tataki, pea ʻoku nau muimui loto-lelei ki he fakahinohino ʻa Sīsuú.

2. Ko hai ʻa e kau mātuʻá pea ko e hā ʻenau ngāué?

Ko e kau mātuʻá ko e kau tangata kuo nau hoko ko e kau Kalisitiane faitōnunga ʻi he laui taʻu. ʻOku nau akoʻi ʻa e kakai ʻa Sihová mei he Tohi Tapú pea tokoniʻi mo fakalototoʻaʻi kinautolu. ʻOku ʻikai ke nau maʻu ha totongi ki he ngāue ko ení. Kae kehe, ʻoku nau ngāue “loto-lelei ʻi he ʻao ʻo e ʻOtuá; ʻo ʻikai ʻi he ʻofa ki ha meʻa ʻoku maʻu taʻefaitotonu, ka ʻi he loto-vēkeveke.” (1 Pita 5:1, 2) Ko e kau sevāniti fakafaifekaú ko e kau tangata ʻi he fakatahaʻangá ʻoku nau tokoni ki he kau mātuʻá. Hili ha vahaʻa taimi, ko e kau sevāniti fakafaifekaú ʻoku lava ke nau hoko ko e kau mātuʻa.

ʻOku fakanofo ʻe he Kulupu Pulé ʻa e kau mātuʻa ʻe niʻihi ke hoko ko e kau ʻovasia sēketi. ʻOku nau ʻaʻahi ki he ngaahi fakatahaʻanga kehekehe ke ʻoatu ʻa e tataki mo e fakalototoʻa. ʻOku nau fakanofo ʻa e kau mātuʻa mo e kau sevāniti fakafaifekau, ʻa ia kuo nau aʻusia ʻa e ngaahi fiemaʻu Fakatohitapú.​—1 Tīmote 3:1-10, 12; Taitusi 1:5-9.

3. Ko e hā ʻa e fatongia ʻo e Fakamoʻoni taki taha?

Ko e faʻahinga kotoa ʻi he fakatahaʻangá ʻoku nau “fakahīkihikiʻi ʻa e huafa ʻo Sihová” ʻaki ʻa e kau ʻi he ngaahi fakataha ʻa e fakatahaʻangá pea mo e ngāue fakamalangá ʻo fakatatau ki honau ngaahi tuʻungá.​—Lau ʻa e Saame 148:12, 13.

KELI LOLOTO ANGE

4. Ko Sīsuú ko ha tokotaha taki anga-lelei

ʻOku fakaafeʻi anga-ʻofa mai kitautolu ʻe Sīsū. Lau ʻa e Mātiu 11:28-30, pea lāulea leva ki he ongo fehuʻi ko ení:

• Ko e tokotaha taki fēfē ʻa Sīsū? ʻOkú ne loto mai ke tau ongoʻi fēfē ʻi heʻene takí?

VITIŌ: Tokoni e Kau Mātuʻá ki he Mofuike ʻi Nepolo (4:56)

ʻOku akoʻi māʻalaʻala mai ʻe he Tohi Tapú ʻa e founga ʻoku totonu ke fakahoko ai ʻe he kau mātuʻá ʻenau ngāué.

Lau ʻa e ʻAisea 32:2 mo e 1 Pita 5:1-3, pea lāulea leva ki he ongo fehuʻi ko ení:

• ʻOku anga-fēfē hono ueʻi koe ʻe he feinga ʻa e kau mātuʻá ke fakaivifoʻou ʻa e niʻihi kehé ʻo hangē ko Sīsuú?

• Ko e hā ʻa e ngaahi founga kehe ʻoku faʻifaʻitaki ai ʻa e kau mātuʻá kia Sīsuú?

5. ʻOku faiako ʻa e kau mātuʻá ʻaki ʻenau faʻifaʻitakiʻangá

VITIŌ: ʻOku Takimuʻa ʻa e Kau Mātuʻá! (7:39)

Naʻe fokotuʻu ʻe Sīsū ʻa e faʻifaʻitakiʻanga ki he faʻahinga ʻoku takimuʻa ʻi he fakatahaʻangá. Lau ʻa e Mātiu 23:8-12, pea lāulea leva ki he ongo fehuʻi ko ení:

• Ko e hā ʻoku fiemaʻu ʻe he Tohi Tapú ki he kau mātuʻá? ʻOkú ke fakakaukau ʻoku muimui ʻa e kau taki lotú ki he meʻa ʻoku leaʻaki ʻe he Tohi Tapú?

1. A. ʻOku tauhi ʻe he kau mātuʻá ke mālohi honau vahaʻangatae mo Sihová pea nau tokoniʻi honau fāmilí ke fai ʻa e meʻa tatau

2. E. ʻOku tokanga ʻa e kau mātuʻá ki he taha kotoa ʻi he fakatahaʻangá

3. F. ʻOku kau maʻu pē ʻa e kau mātuʻá ʻi he ngāue fakamalangá

4. H. Ko e kau mātuʻá ko e kau faiako pea ʻoku nau toe tokoni ʻi he fakamaʻá mo e ngāue kehé

6. ʻOku tau ngāue fāitaha mo e kau mātuʻá

ʻOku ʻomai ʻe he Tohi Tapú ʻa e ʻuhinga mahuʻinga ke ngāue fāitaha ai mo e kau mātuʻá. Lau ʻa e Hepelū 13:17, pea lāulea leva ki he ongo fehuʻi ko ení:

• Ko e hā ʻoku tala mai ai ʻe he Tohi Tapú ʻoku totonu ke tau talangofua loto-lelei ki he faʻahinga ʻoku takimuʻá? Ko e hā hoʻo ongoʻi fekauʻaki mo ení?

Lau ʻa e Luke 16:10, pea lāulea leva ki he fehuʻi ko ení:

• Ko e hā ʻoku mahuʻinga ai ke ngāue fāitaha mo e kau mātuʻá neongo kapau ʻoku tau fakakaukau ko e meʻa ko iá ʻoku ʻikai ke fuʻu mahuʻinga?

FAKANOUNOU

Ko Sīsū ʻa e ʻulu ʻo e fakatahaʻangá. ʻOku tau ngāue fiefia fāitaha mo e kau mātuʻa ʻoku nau ngāue ʻi hono malumalú koeʻuhí ʻoku nau fakaivifoʻou kitautolu pea fokotuʻu ha faʻifaʻitakiʻanga lelei.

Fakamanatu

• Ko hai ʻa e ʻulu ʻo e fakatahaʻangá?

• ʻOku anga-fēfē tokoni ʻa e kau mātuʻá ki he fakatahaʻangá?

• Ko e hā ʻa e fatongia ʻo e tokotaha taki taha ʻoku lotu kia Sihová?

AKO LAHI ANGE

Sio ki he fakamoʻoni ʻo e tokanga lahi ʻa e Kulupu Pulé mo e kau mātuʻá ki he kau Kalisitiane he ʻaho ní.

Fakaivimālohiʻi ʻa e Fanga Tokouá Lolotonga ʻa e Fakataputapuí (4:22)

Ako fekauʻaki mo e ngāue ʻoku fai ʻe he ʻovasia sēketí.

Ko e Moʻui ʻa ha ʻOvasia Sēketi ʻi ha Feituʻu Tuʻu-Mavahe (4:51)

Lau fekauʻaki mo e ngafa mahuʻinga ʻo e kakai fefiné ʻi he fakatahaʻangá.

“ʻOku ʻi Ai ha Kau Faifekau Fefine ʻa e Kau Fakamoʻoni ʻa Sihová?” (Ko e Taua Leʻo, ʻOkatopa 1, 2012)

Ako ki he ngāue lahi ʻa e kau mātuʻá ke fakalototoʻaʻi honau kaungātuí.

“Kau Mātuʻa Kalisitiané​—‘Ko e Kau Kaungāngāue Ke Tau Fiefia Ai’” (Ko e Taua Leʻo, Sanuali 15, 2013)