LĒSONI 19
Ko e Kau Kalisitiane Moʻoni ʻa e Kau Fakamoʻoni ʻa Sihová?
ʻOku mau tui ko kimautolu ʻa e Kau Fakamoʻoni ʻa Sihová, ko e kau Kalisitiane moʻoni. Ko e hā hono ʻuhingá? Ko e hā ʻoku makatuʻunga ai ʻemau ngaahi tuí? Ko e hā ʻoku mau ui ai kimautolu ko e Kau Fakamoʻoni ʻa Sihová? ʻOku anga-fēfē ʻemau fakahaaʻi ʻoku mau feʻofaʻakí?
1. Ko e hā ʻoku makatuʻunga ai ʻa e ngaahi tui ʻa e Kau Fakamoʻoni ʻa Sihová?
Naʻe pehē ʻe Sīsū: Ko e “folofolá ko e moʻoní ia.” (Sione 17:17) ʻI he hangē pē ko Sīsuú, ko e Kau Fakamoʻoni ʻa Sihová ʻoku makatuʻunga maʻu pē ʻenau ngaahi tuí ʻi he Folofola ʻa e ʻOtuá. Ko e fakatātaá, fakakaukau ki he hisitōlia ʻo e Kau Fakamoʻoni ʻa Sihová, ʻa ia naʻe ʻiloa ki muʻa ko e Kau Ako Tohi Tapú. ʻI he 1870 nai, ko e Kau Ako Tohi Tapú naʻe kamata ke nau ako fakamātoato ʻa e Tohi Tapú. Naʻe makatuʻunga ʻenau tuí ʻi he meʻa naʻe leaʻaki aí, neongo naʻe kehe ia mei he ngaahi tokāteline ʻa e lotu kehé. Pea naʻe kamata leva ke nau vahevahe ʻa e ngaahi moʻoni Fakatohitapu ko iá mo e niʻihi kehé.a
2. Ko e hā ʻoku mau ui ai kimautolu ko e Kau Fakamoʻoni ʻa Sihová?
ʻOku ui ʻe Sihova ʻene kau lotú ko ʻene kau fakamoʻoni koeʻuhí ʻoku nau tala ʻa e moʻoni fekauʻaki mo iá. (Hepelū 11:4–12:1) Ko e fakatātaá, ʻi he kuonga muʻá naʻe tala ʻe he ʻOtuá ki hono kakaí: “Ko kimoutolú ko ʻeku kau fakamoʻoni.” (Lau ʻa e ʻAisea 43:10.) ʻOku ui ʻa Sīsū “ko e Fakamoʻoni Faitōnunga.” (Fakahā 1:5) Ko ia ʻi he 1931 naʻa mau fili ʻa e hingoa Kau Fakamoʻoni ʻa Sihová. ʻOku mau fiefia ke fataki ʻa e hingoa ko iá.
3. ʻOku anga-fēfē ʻa e faʻifaʻitaki ʻa e Kau Fakamoʻoni ʻa Sihová ki he ʻofa ʻa Sīsuú?
Naʻe ʻofa lahi ʻa Sīsū ʻi heʻene kau ākongá ʻo hangē pē ha fāmili kiate iá. (Lau ʻa e Maʻake 3:35.) ʻI he tuʻunga meimei tatau, ko e Kau Fakamoʻoni ʻa Sihová ko ha fāmili fāʻūtaha fakaemāmani lahi. Ko e ʻuhinga ia ʻoku mau ui ai kimautolu ko e fanga tokoua mo e fanga tuofāfiné. (Filimone 1, 2) ʻOku mau toe talangofua ki he fekau: “Maʻu ʻa e ʻofa ki he haʻohaʻonga fakakātoa ʻo e fanga tokouá.” (1 Pita 2:17) Ko e Kau Fakamoʻoni ʻa Sihová ʻoku nau fakahāhā ʻa e ʻofa ko ení ʻi he ngaahi founga lahi, hangē ko hono tokoniʻi ʻa e kaungātui takatakai ʻi he māmaní ʻi he taimi ʻoku nau fiemaʻu tokoni aí.
KELI LOLOTO ANGE
Ako lahi ange ki he hisitōlia ʻo e Kau Fakamoʻoni ʻa Sihová pea te ke sio ai ki he fakamoʻoni lahi ange ko e kau Kalisitiane moʻoni kimautolu.
Ko e kau Kalisitiane moʻoní ʻoku makatuʻunga ʻenau tuí ʻi he Tohi Tapú pea vahevahe ia mo e niʻihi kehé
4. ʻOku makatuʻunga ʻemau tuí ʻi he Tohi Tapú
Naʻe tomuʻa tala ʻe Sihova, ʻi he ngaahi ʻaho fakaʻosí ko e moʻoni ʻo e Tohi Tapú ʻe mahinoʻi ʻo toe māʻalaʻala ange. Lau ʻa e Taniela 12:4 mo e fakamatala ʻi lalo, pea lāulea leva ki he fehuʻi ko ení:
Ko e hā ʻe hoko ʻo “lahi ʻaupito” ʻi he haʻohaʻonga ʻo e kakai ʻa e ʻOtuá ʻi heʻenau hokohoko atu hono sivisiviʻi ʻa e Tohi Tapú?
Sio angé ki hono hanga ʻe ha kulupu ʻo e kau ako Tohi Tapú, kau ai ʻa Charles Russell, ʻo ako ʻa e Folofola ʻa e ʻOtuá. Huluʻi ʻa e VITIOÓ, pea lāulea leva ki he fehuʻi hokó.
ʻI he vitioó, naʻe anga-fēfē hono ako ʻa e Tohi Tapú ʻe Charles Russell mo hono kaungā Ako Tohi Tapú?
Naʻá ke ʻiloʻi?
ʻI he taimi ki he taimi, kuo mau fakatonutonu ʻa e ngaahi meʻa ʻoku mau tui ki aí. Ko e hā hono ʻuhingá? ʻI he hopo hake ʻa e laʻaá ʻoku māmālie ʻa e sio ki he fakaikiiki ʻo e ngaahi meʻá. ʻI he founga meimei tatau, ʻoku fakaeʻa māmālie mai ʻe he ʻOtuá ʻa e mahino ʻo ʻene Folofolá. (Lau ʻa e Palōveepi 4:18.) ʻOku ʻikai ke liliu ʻa e Tohi Tapú, ka ʻi he taimi ʻoku mau mahinoʻi lelei ange ai iá, ʻoku mau fakatonutonu ʻa e meʻa ʻoku mau akoʻí.
5. ʻOku mau moʻui ʻo fakatatau ki homau hingoá
Ko e hā naʻa mau fili ai ʻa e hingoa Kau Fakamoʻoni ʻa Sihová? Huluʻi ʻa e VITIOÓ, pea lāulea leva ki he fehuʻi hokó.
Ko e hā ʻoku feʻungamālie ai ʻa e hingoa Kau Fakamoʻoni ʻa Sihová?
Ko e hā kuo fili ai ʻe Sihova ha kakai ke hoko ko ʻene kau fakamoʻoní? Koeʻuhí te nau talaki ʻa e moʻoni fekauʻaki mo Sihova ʻa e ʻOtua moʻoní, he kuo lahi ʻa e ngaahi loi kuo tala fekauʻaki mo iá. Sio angé ki ha ongo foʻi loi pē ʻe ua.
ʻOku akoʻi ʻe he ngaahi lotu ʻe niʻihi ki heʻenau kau lotú ʻoku loto mai ʻa e ʻOtuá ke nau ngāueʻaki ʻa e ʻīmisí ʻi heʻenau lotú. ʻOku moʻoni ia? Lau ʻa e Livitiko 26:1, pea lāulea leva ki he fehuʻi ko ení:
Fakatatau ki he konga Tohi Tapu ko ení, ʻoku anga-fēfē ongoʻi ʻa Sihova fekauʻaki mo e ngaahi ʻaitolí?
ʻOku akoʻi ʻe he kau taki lotu ʻe niʻihi ko Sīsū ʻa e ʻOtuá. ʻOku moʻoni ia? Lau ʻa e Sione 20:17, pea lāulea leva ki he ongo fehuʻi ko ení:
Fakatatau ki he konga Tohi Tapu ko ení, ʻoku tatau pē ʻa e ʻOtuá mo Sīsū?
ʻOku anga-fēfē hoʻo ongoʻí ʻi hono ʻiloʻi kuo fekau atu ʻe Sihova ʻene Kau Fakamoʻoní ke malangaʻi ʻa e moʻoni fekauʻaki mo ia pea mo hono ʻAló?
6. ʻOku mau feʻofaʻaki
ʻOku fakahoa ʻe he Tohi Tapú ʻa e kau Kalisitiané ki he ngaahi kongokonga kehekehe ʻi he sino ʻo e tangatá. Lau ʻa e 1 Kolinitō 12:25, 26, pea lāulea leva ki he ongo fehuʻi ko ení:
Ko e hā ʻoku totonu ke fai ʻe he kau Kalisitiane moʻoní ʻi he faingataʻaʻia ʻa e kau Kalisitiane kehé?
Ko e hā kuó ke fakatokangaʻi fekauʻaki mo e feʻofaʻaki ʻi he haʻohaʻonga ʻo e Kau Fakamoʻoni ʻa Sihová?
ʻI he faingataʻaʻia ʻa e Kau Fakamoʻoni ʻa Sihová ʻi ha feituʻu ʻo e māmaní, ʻoku fakavave ʻa e Kau Fakamoʻoní ke fai ha tokoni. Huluʻi ʻa e VITIOÓ ke sio ki ha fakatātā. Lāulea leva ki he fehuʻi hokó.
Naʻe anga-fēfē fetokoniʻaki ʻa e Kau Fakamoʻoni ʻa Sihová ʻi he hili ʻa e afaá?
Ko e kau Kalisitiane moʻoní ʻoku nau fakahaaʻi ʻa e ʻofa ki he faʻahinga ʻoku fiemaʻu tokoní
ʻOKU PEHĒ ʻE HE NIʻIHI: “Ko e Kau Fakamoʻoni ʻa Sihová ko ha kiʻi lotu foʻou.”
Naʻe kamata ʻanefē hono ui ʻe Sihova ʻene kau lotú ko ʻene kau fakamoʻoní?
FAKANOUNOU
Ko e kau Kalisitiane moʻoni ʻa e Kau Fakamoʻoni ʻa Sihová. Ko ha fāmili fakaemāmani lahi kimautolu ʻo ha kau lotu ʻa ia ʻoku makatuʻunga ʻemau ngaahi tuí ʻi he Tohi Tapú pea ʻoku mau ʻai ke ʻiloa ʻa e moʻoni fekauʻaki mo Sihová.
Fakamanatu
Ko e hā naʻa mau fili ai ʻa e hingoa Kau Fakamoʻoni ʻa Sihová?
ʻOku anga-fēfē ʻemau fefakahāhāʻaki ʻa e ʻofá?
ʻOkú ke fakakaukau ko e kau Kalisitiane moʻoni ʻa e Kau Fakamoʻoni ʻa Sihová?
AKO LAHI ANGE
Sio ki ha fakatātā ʻo hono fakaeʻa ʻe he Kau Fakamoʻoni ʻa Sihová ʻa e ngaahi akonaki halá.
Maʻu ʻa e tali ki ha ngaahi fehuʻi ʻokú ke maʻu fekauʻaki mo e Kau Fakamoʻoni ʻa Sihová.
“Ngaahi Fehuʻi ʻOku Toutou ʻEke Fekauʻaki mo e Kau Fakamoʻoni ʻa Sihová” (peesi ʻi he uepisaití)
Naʻe fehiʻa lahi ʻa Stephen ʻi he ngaahi matakali kehé ʻo ne faʻa ʻohofi kinautolu. Ako ki he meʻa naʻá ne fakatokangaʻi ʻi he Kau Fakamoʻoni ʻa Sihová ʻo ueʻi ia ke ne liliú.
“Ko ʻEku Moʻuí Naʻe ʻAlu mei he Kovi ki he Kovi Ange” (Ko e Taua Leʻo, Sepitema 1, 2015)
a Talu mei he 1879, kuo pulusi ʻe he kakai ʻa Sihová ʻa e makasini Ko e Taua Leʻo ke fakamatalaʻi ʻa e meʻa ʻoku leaʻaki ʻe he Tohi Tapú.